2 | “Ku Lembezieka ca mu Visoneka”

MBIMBILIYA NGUAYO: “Muomu viose vi va sonekele laza, va vi sonekelele ku tu longesa, linga ku lukakatela na ku ku-lembezieka via ku visoneka tu kale na ku lavelela.”—LOMA 15:4.

Vi ca Lomboloka

Mu Mbimbiliya mua kala mezi a ku lembezieka, aze a hasa ku tu kaniamesa na ku tu kolesa linga tu tualeleho ku lua na visinganieka via ku henga. Kaha ya tu kulahesa naua ngecize vuovuno ku vavala cose ci tue ku ivua ku mutima ci ka hita.

Vati ci Hasa ku Kuasa

Tu vose tue ku lisosomua na ku uma mutima vintsimbu vimo, vunoni vaze mpundu vavala musongo ua ku lisosomua, ve ku pinda na visinganieka viaco tangua na tangua. Vati Mbimbiliya i hasa ku kuasa?

Mbimbiliya ya muesa visinganieka via vingi via cili vi tu hasa ku hingisa mu visinganieka via ku henga. (Filipu 4:8) Visinganieka viaco vi hasa mpundu ku sulisa mutima yetu na visinganieka via ku lembezieka na ku lembama. Eci ci hasa ku tu kuasa ku niunga cifua ci tue ku livuilamo.—Visamo 94:18, 19.
Mbimbiliya i hasa ku tu kuasa ku luisa visinganieka via ku livua ngecize ka tua kele na seho.—Luka 12:6, 7.
Mizimbu ya ingi ya mu Mbimbiliya, ya tu kaniamesa ngecize ka tuesi lika lietu. Kaha Sakatanga uetu, ue ku ivuisisa mu vutuntu cifua ci tue ku livuilamo.—Visamo 34:18; 1 Yoano 3:19, 20.
Mbimbiliya ya tu kulahesa ngecize ku lutue Njambi a ka tu zima vuhasi vua ku vuluka viuma viose via ku vihia via tu solokela. (Isaya 65:17; Ku-Solola 21:4) Nga tuli na ku hita mu vimo visoti via kama via mu singanieka, eci cikulaheso ce ku tu kaniamesa mua kama na ku tu hana ndzili ya ku tualelelaho.

Vati ili na ku Kuasa Mbimbiliya Jessica

Nje ku Pinda na Vusiua vua ku Hianesamo

“Mu nja kele na miaka 25, nja putukile ku vangaziala kaha mu nima yaco va nji uana na musongo ua ku hianesamo vusiua. Kaha visinganieka via viuma via ku vihia vi nja lihitile navio ku nima, via putukile naua ku nji yandesa. Vandotolo va nji kuasele ku ivuisisa naua ngecize, nja kele na ku pinda na vusiua vua ku hianesamo, omo lia viuma via ku vihia vi nja lihitile navio mu muono ku nima. Kaha vutuhu nja kele na ku nua vihemba, vunoni nja tondekele naua vukuasi vua vakua ku lilongesa yoyesi ya vantu (terapia pisicolgica) linga nji hase ku sungamesa cifua ci nja kele na ku singaniekelamo.”

Cifua ci ye ku nji Kuaselamo Mbimbiliya

“Ha vintsimbu vi nje ku uila mu vusiua vua kama, nje ku uila mu cova-ova, ku uma mua kama mutima kaha na ku kosa cilavu-lavu. Ku vutsiki ka nja kele na ku hasa ku simpitika mutima uange linga kati nji singanieke viuma via ku henga. Ngue muya muesa Visamo 94:19, Njambi a hasa ku tu lembezieka na ku tu lembamesa nga tuli na ku pinda na visinganieka via ku lisosomua cikuma. Ngeci mukemuo, Mbimbiliya na mukanda u nja soneka vinimbu via ku kaniamesa, nja kele na ku vi haka mu hiehi na muhela uange. Kaha mu nja kele na ku linga nga njesi na ku hasa ku kosa, nja kele na ku tanda vimo vinimbu mu Mbimbiliya, linga nji tavese visinganieka via Njambi vi nji lembezieke.

“Mbimbiliya ya tu kaniamesa ku luisa visinganieka vize ka via litombuele na viuma vi tu tantekeya ku tuala hali Njambi. Ku miaka ya ku nima, nja kele na ku livua ngecize ka nja kele na seho, ka citava ku nji lema kaha nji cilinge ca ngoco. Vunoni nja lilongesa ngecize visinganieka viaco ka via litombuele na Mbimbiliya, ize ya muesa ngecize Njambi ua pua Tatetu ua cilemo na cikeketima, uze ua tu haka seho muntu ku muntu. Ngeci kamandende-kamandende, nja putukile ku vula visinganieka via ku viha na ku lilongesa ku limona ange ivene ngue mue ku nji muenamo Njambi. Eci ca puile cinanga ca seho linga nji hase ku vula cifua ca ku vihia ci nja kele na ku limuenamo.

“Nja lavelela mua kama omo Njambi a ka tu zima vuhasi vua ku vuluka viuma via ku vihia via tu solokela. Kaha na ku sungamesa cifua ca ku henga ci tue ku singaniekelamo. Ku tantekeya ngecize mavezi ya mu visinganieka tangua a ka hua, ce ku nji kuasa kulua na citanga caco mu ntsimbu ino kaha na ku nji hana lulavelelo lua cili lua ku lutue ngecize tangua nji ka hasa ku vula ou musongo u nje ku pinda nauo.”