Cifua ce ku Kumbuluilamo Yehova Vivundilo Vietu

1-2. Vika tu hasa ku lihula ku tuala ha vivundilo?

VUNO mua lihulaho laza nga Yehova ali na ku kumbulula vivundilo vienu ni? Nga mukemuo, kaha tantekeyenu ngecize kati lika lienu. Vamuanetu na vandumbuetu vavengi navo va livuaho laza ngoco, cikuma-kuma mu ve ku hita mu visoti. Nga tuli na ku yanda, netu ci hasa ku tu kaluuila ku nongonona nga Yehova ali na ku kumbulula vivundilo vietu ni kuahi.

² Tu ci hilulenu omo lia vika tuli na vusunga ngecize Yehova ue ku kumbulula vivundilo via vangamba veni lelo lino. (1 Yoa. 5:15) Kaha mu nima yaco, tu simutuila naua ha vihula evi: Omo lia vika vintsimbu vimo, ci hasa ku soloka ngecize Yehova kesi na ku kumbulula vivundilo vietu? Mu vinjila vika Yehova ue ku kumbulula vivundilo vietu lelo lino?

YEHOVA A HASA KU KUMBULULA VIVUNDILO VIETU MU NJILA KA TUA LAVELELELE

3. Omo lia vika Yehova ua tonda tu vundile kuli Ikeye?

³ Mbimbiliya ya tu hana vusunga ngecize Yehova ua tu lema mua kama kaha tua kala na seho kuli ikeye. (Hangai 2:7; 1 Yoa. 4:10) Ngeci mukemuo, ua tu lania tu vundile vukuasi kuli Ikeye ku hitila mu vivundilo. (1 Pet. 5:6, 7) Ua tonda ku tu kuasa tu tualeleho ku likuata vusamba vua kama neni kaha na ku kolesa mu visoti vi tuli na ku lihita navio.

4. Vati tua tantekeya ngecize Yehova ue ku kumbulula vivundilo via vangamba veni? (Talenu naua ha cikupulo.)

⁴ Mu Mbimbiliya mua kala mizimbu ya ingi ya muesa ngecize Yehova ua kumbuluile vivundilo via vangamba veni. Kuli umo muzimbu u mu na vulukako? Halumo mua vuluka ua Muangana Ndaviti. Ndaviti va mu luisile ku vitozi vavengi va vukenia mu muono ueni uose. Kaha ua kele na ku vundila vukuasi vua Yehova ku-sua kumo. Ntsimbu imo, ua vundilile ngueni: “Ivua civundilo cange, A Yehova; Ivuilila ku-lambelela cange: Mu vucili vuove nji kuanieko, na mu vuviuke vuove.” (Visa. 143:1) Yehova ua kumbuluile vivundilo via Ndaviti na ku mu ohiela. (1 Sam. 19:10, 18-20; 2 Sam. 5:17-25) Ngeci Ndaviti ua handekele na mutima uose ngueni: “Yehova ali mu hiehi na vose vaze va mu tambakana.” Netu tu hasa ku kala na vusunga vuaco.—Visa. 145:18.

5. Vuno ntsimbu yose Yehova ua kele na ku kumbulula vivundilo via vangamba veni va ku laza mu cifua ci va lavelelele ni? Hanenu cimueso. (Talenu naua cikupulo.)

⁵ Vintsimbu vimo, Yehova ke ku kumbulula vivundilo vietu mu cifua ci tue ku lavelela. Evi vikevio via solokelele na kapostolo Paulu. Ua vundilile Njambi linga a mu tundise “lumo lumbimbo” mu muvila. Kaha ua vundilile ha citanga caco lutatu luose. Vuno Yehova ua kumbuluile evi vivundilo vieni ni? Eyo, vunoni kati mu njila ya lavelele Paulu. Yehova ka mu tundisile mpundu citanga caco, vunoni ua mu hele lika ngolo ya tondekele mu ku kolesa na ku tualelelaho ku mu pangela.

6. Omo lia vika vintsimbu vimo ci hasa ku soloka ngue Yehova kesi na ku kumbulula vivundilo vietu?

⁶ Netu tu hasa ku tambula vikumbululo via vivundilo vietu mu cifua ka tua lavelelele. Tu kalenu na vusunga ngecize Yehova a tantekeya mpundu njila ya cili ya ku tu kuaselamo. Kaha naua “a hasa ku linga mua ku pulakana cikumakuma mu ku hiana viose vize vi tu ku vundila nevi vi tu ku singanieka.” (Efe. 3:20) Omo lia vusunga vuaco, Yehova a hasa ku kumbulula vivundilo vietu ha ntsimbu ni mu njila ka tua lavelelele.

7. Omo lia vika halumo ci hasa ku tondeka tu alulule viuma vi tue ku vundila? Hanenu cimueso.

⁷ Vintsimbu vimo, tu hasa ku tondeka ku alulula viuma vi tue ku vundila, mu nima ya ku nongonona vuino cizango ca Yehova. Tu hilulenu muzimbu ua Martin Poetzinger. Mu nima ya ku liambata, muanetu Martin va mu kuatele na ku mu tuala ku cimpaka ca vipanga via kayando. Ku vuputukilo, ua kele na ku vundila Yehova a mu tuhule mu cimpaka caco linga a ka kale hamo na mpueyeni na ku tualeleho ku ambulula. Vunoni mu nima ya visimano vivali, ua nongonuene ngecize halumo Yehova ka mu patula. Ngeci ua putukile ku vundila ngueni: “Yehova sukulukambu nji lekese vi u tonda linga nji linge.” Mu nima yaco ua putukile ku singanieka ha visoti vi va kele na ku pinda navio vamuanetu vakuavo va kele mu cimpaka. Cingi cavo va lisosomuene na vampuevo vavo na vana. Ngeci mu nima yaco, muanetu Martin ua vundilile ngueni: “Yehova nja santselako mu ku nji kundika cipanga ca ciha. Nji kuase linga nji kaniame linga nji hase ku kaniamesa vamuanetu.” Kaha mu miaka 9 ya kele mu kamenga, ua lihakelele vene kapandi ka ku kaniamesa vamuanaye!

8. Cuma cika ca seho ka tua pandele ku suva nga tu vundila?

⁸ Ka tua pandele ku suva ngecize Yehova ua kala na vutumbe, kaha a ka vu puisamo ku ntsimbu ya hangula. Vutumbe vuaco vua ambatesela kumo na ku manusula mu vutuntu visoti viose vie ku yandesa vantu lelo lino. Visoti ngeci mua viyovo via mavu, ku vavala na ku-tsa. Yehova a ka puisamo ovu vutumbe vueni ku hitila naua mu Vuangana vueni. (Ndan. 2:44; Ku-So. 21:3, 4) Vunoni omo ntsimbu yaco kanda i ci hete, Yehova ua tavesa Satana a sike mavu.b (Yoa. 12:31; Ku-So. 12:9) Ngeci mukemuo, nga Yehova a manusula visoti viose mu ntsimbu ino, ci ka soloka ngue Satana ali na ku sika vuino ano mavu. Tua pande ku lavelela Yehova a puisemo vikulaheso vieni, vutuhu ngoco ka tu sezele ca ku hona vukuasi. Tu talenu vimo vinjila vie ku tu kuaselamo Yehova.

VINJILA VIE KU KUMBULUILAMO YEHOVA LELO LINO

9. Vati Yehova a hasa ku tu kuasa nga tu tondeka ku linga vimo vihangula? Hanenu cimueso.

⁹ Ue ku tu hana mana. Yehova ua kulahesa ku tu hana mana a tue ku tondeka mu ku linga vihangula via cili. Kaha tue ku tondeka mua kama mana a Njambi, ha ntsimbu ya ku linga vihangula vize vie ku kuata ku muono uetu uose ngeci mua cihangula ca ku ambata ni ku tualeleho mu vuzike. (Tia. 1:5) Halakanenu muzimbu ua umo ndumbuetu ua pua muzike lizina lieni Maria.c Ua kele na ku pangela Yehova na ndzolela mu vupioneiro vua ntsimbu yose kaha ua putuka ku litantekeya na umo muanetu. Ivene ngueni: “Vusamba vuetu vua putukile ku kola kaha tua putukile ku lilema. Ngeci nja muene ngecize noho nji linge cimo cihangula. Nja vundilile mua kama ha cimpande caco. Nja tondekele Yehova a nji tuamenene, vunoni nja tantekeyele naua ngecize Yehova ka ka nji lingilako cihangula caco.” Ndumbuetu Maria ua nongonuene ngecize Yehova na kumbulula vivundilo vieni via ku mu vundila mana. Mu njila ika? Ua tondesesele mu mikanda yetu kaha ua uanene vimo vimpande mpundu via kumbuluile vihula via kele navio ku tuala ha cimpande caco. Kaha ua halakanene naua ku vimamuna via mana via mu hele naye, uze ua pua ndumbuetu neni.Vimamuna viaco via kuasele ndumbuetu Maria ku hilula cifua ca kele na ku livuilamo. Ngeci ku ntsongo ua hasele ku linga cihangula ca mana.

10. Kuliya na Filipu 4:13, vika Yehova ue ku linga mu ku kuasa vangamba veni? Hanenu cimo cimueso.(Talenu naua cikupulo.)

¹⁰ Ue ku tu hana ngolo ya ku kolesa. Ngue mua lingile na kapostolo Paulu, Yehova ue ku tu hana ngolo i tua tondeka mu ku kolesa mu visoti vietu. (Tandenu Filipu 4:13.) Tu hilulenu vati Yehova ua kuasele muanetu Benjamin, a kolese mu ntsimbu ya ikalu. Tunde ku vunike, muanetu Benjamin na vusoko vueni, va yoyelele mu cimo cimpaka ca vakua ku tina mu Afrika. Ivene ngueni: “Nja kele na ku vundila ku-sua kumo kuli Yehova a nji hane ngolo ya ku linga viuma vie ku muya ku mutima. Kaha ua kumbuluile vivundilo viange mu ku nji hana ciyulo ca mu ntima, ku simpa ci nja tondekele mu ku tualelelaho ku ambulula kaha na mikanda ya ku nji kuasa ku tualelelaho ku kaniamesa mu lutsilielo.” Kaha ua vuezeleko naua ngueni: “Ku tanda mizimbu ya vakuetu Vakaleho na ku tantekeya vati Yehova ua va kuasele ku kolesa, ca kaniamesele kapandi kange ka ku tualelelaho ku ononoka Yehova.”

11-12. Vati Yehova a hasa ku pangesa vusoko vuetu vua mu lutsilielo mu ku kumbulula vivundilo vietu? (Talenu naua cikupulo.)

¹¹ Ue ku pangesa vusoko vuetu vua mu lutsilielo. Ku vutsiki vua ku manusuila tele kanda va mu kuate, Yesu ua vundilile mua kama. Ua lambelele Yehova a mu ohiele ku kasahuntu ka ku mu tumbula ku pua mukua ku sahula Njambi. Vunoni Yehova ka mu ohielele ngue mua vundilile, ua tumine lika kangelo na ku mu kaniamesa. (Luka 22:42, 43) Na vuno vene, Yehova a hasa ku tu kuasa ku hitila muli vamuanetu na vandumbuetu. Ca ku muenako, va hasa ku tu sana mu ku tu kaniamesa ni ku iza mpundu mu ku tu mona. Ngeci mukemuo, tu vose tu lihakelenu kapandi ka ku tonda vukovelelo vua ku kaniamesa vamuanetu na “lizi lia cili.”—Visi. 12:25.

¹² Halakanenu muzimbu ua ndumbuetu Miriam. Ndumbuetu Miriam ua tsisile yalieni. Kaha mu vimo visimano via vindende, ua kele lika lieni ku ndzivo mu vusiua vua kama na ku livua ngue na zimbala. Kaha ua lilile mua kama na ku ivua cizango ca ku simutuila na umo muntu. Ivene ngueni: “Ka nja kele na ndzili cipue ya ku sana muntu na umo uahi. Ngeci nja vundilile kuli Yehova. Kaha mu nja kele na ku lila, nja vuile telefone ngelele-ngelele, nji ka taleho umo mukuluntu mu cikungulukilo kaha ua puile naua kavusamba ketu. Kaha neni na mpueyeni va nji lembeziekele mua kama.” Ndumbuetu Miriam ua kele na vusunga ngecize Yehova ikeye ua vuisile uze muanetu cizango ca ku mu sana.

13. Tumbulenu cimo cimueso ca vati Yehova a hasa ku pangesa vaze ka ve ku mu pangela mu ku kumbulula vivundilo vietu.

¹³ Yehova a hasa ku pangesa vantu ka ve ku mu pangela. (Visi. 21:1) Vintsimbu vimo, Yehova ue ku kumbulula vivundilo via vangamba veni mu ku pangesa vantu ka ve ku mu pangela. Ca ku muenako, ua lingisile Muangana Aletalezeleze a tavese Nehemiya ku hiluka ku Yelusalema mu ku ka kuasa ku tungulula mbonge yaco. (Neh. 2:3-6) Na lelo lino, Yehova a hasa ku pangesa cipue vene vantu ka ve ku mu pangela, linga a tu ohiele nga tuli mu visoti.

14. Vika mu na leme cikuma mu muzimbu ua ndumbuetu Soo Hing? (Talenu naua cikupulo.)

¹⁴ Umo ndumbuetu ua lizina Soo Hing, ua livuile ngecize Yehova ua mu kuasele ku hitila muli ndotolo yeni. Muana ua yala ua ndumbuetu Soo Hing, ua kele na mavezi a engi a mu visinganieka. Omo muanavo ua hitile mu mponde ya kama, neni na yalieni va likelele vipanga linga va mu niunge. Evi via va kokelele vuhutu vua kama. Ndumbuetu Soo Hing ngueni, visoti viaco via mu kaniekele ngue cilambu ca ha ngoma. Ngeci ua vundilile kuli Yehova na mutima uose, linga a mu kuase. Ngeci umo ndotolo ua lihakelele kapandi ka ku tonda imo njila ya ku va kuaselamo. Evi via lingisile linga nguvulu i va kuase na ku uana cimo cihela ca cili ca ku yoyela. Mu nima yaco, ndumbuetu Soo Hing ngueni: “Tua muene livoko lia Yehova mu cisoti caco.” Cili vene Yehova ua pua “mukua ku ivua vivundilo.”—Visa. 65:2.

KU NONGONONA VIKUMBULULO VIA YEHOVA NA KU VI TAVA CA TONDEKA LUTSILIELO

15. Vika via kuasele umo ndumbuetu ku nongonona ngecize vivundilo vieni va li na ku vi kumbulula?

¹⁵ Cingi ca vivundilo vietu, Yehova ke ku vi kumbulula mu vinjila via ku komouesa. Vunoni vikumbululo vi tue tambula, via pua lika vize via tondeka mu ku tualeleho ku kakatela kuli Ikeye. Ngeci mukemuo, puenu na ku lavelela vikumbululo via Yehova ku vivundilo vieni. Umo ndumbuetu ua lizina Yoko ua livuile ngue Yehova kesi na ku kumbulula vivundilo vieni. Ngeci ua putukile ku soneka viose via kele na vundila kuli Yehova. Mu nima ya imo ntsimbu, ua kuatele livulu lia kele na ku soneka vivundilo vieni kaha ua nongonuene ngecize Yehova ua kumbulula laza cingi ca vivundilo vieni, vimo na ku vi suva ua vi suva. Ngeci mukemuo, vintsimbu vimo ce ku tondeka tu imane na ku hilula vati Yehova a li na ku kumbulula vivundilo vietu.—Visa. 66:19, 20.

16. Vati tu hasa ku muesa lutsilielo ku tuala ha vivundilo? (VaHevelu 11:6)

¹⁶ Tue ku muesa lutsilielo kati lika mu ku vundila kuli Yehova, vunoni naua mu ku tava vikumbululo via vivundilo vietu mu nkala cifua ci vizilamo. (Tandenu VaHevelu 11:6.) Tu hilulenu lungano lua muanetu Mike na mpueyeni Chrissy. Va kele na cizango ca ku ka pangela ha Mbetele. Vavene nguavo: “Tua sonekele vipetição mu miaka ya ingi kaha tua kele na ku vundila Yehova ku-sua kumo ku tuala ha cizango caco. Vutuhu ngoco, ka va tu laniene.” Muanetu Mike na mpueyeni Chrissy, va tualeleho ku kulahela ngecize Yehova a tantekeya njila ya cili ya ku va pangeselamo mu vipanga vieni. Va tualeleho ku lihakela kapandi kose mu ku linga vupioneiro vua ntsimbu yose, kuze kua tondekele vukuasi kaha na ku kuasa ku vipanga via ku tunga via mu lukungulukilo. Lelo lino, va kala honi mu cipanga ca vuniungi vua ku zinguluka. Ngeci muanetu Mike ngueni: “Yehova ka kumbuluile vivundilo vietu viose mu njila i tua lavelelele. Vunoni ua vi kumbulula mu njila ya hiana na ize i tua singaniekele.”

17-18. Kuliya na Visamo 86:6, 7, vusunga vuka tua hasa ku kala navuo?

¹⁷ Tandenu Visamo 86:6, 7. Mukua visamo Ndaviti, ua kele na vusunga ngecize Yehova ua kele na ku mu ivua kaha na ku kumbulula vivundilo vieni. Nenu mu hasa ku kala na vusunga vuaco. Malungano a tua simutuila mu cilongesa cino, a tu hana vusunga ngecize Yehova a hasa ku tu hana mana na ngolo i tua tondeka linga tu kolese. A hasa ku pangesa naua vamuanetu va mu lutsilielo ni vene vantu ka ve ku mu pangela mu ntsimbu ino, va tu kuase.

¹⁸ Vutuhu Yehova vintsimbu vimo ke ku kumbulula vivundilo vietu mu njila i tue ku lavelela, vunoni tu tantekeya ngecize a ka vikumbulula. A ka tu hana mpundu vize vi tua tondeka kaha mu ntsimbu i via tondeka mpundu. Ngeci mukemuo, tualelenuho ku vundila na lutsilielo, oku mua kulahela ngecize Yehova a mi niunga mu ntsimbu ino kaha a ka “kutisa cizango ca viuma viose vi li na muono”, mu mavu a aha a tua lavelela.—Visa. 145:16.