Vihula via Vakua ku Tanda
Veya vapua “tungelo vaze va va na hangula” va va tumbula ku 1 Timoteo 5:21?
Kapostolo Paulu ua sonekelele Timoteo nguendi: “Nji ku sika ku meso a Njambi, na Kilistu Yesu, na tungelo vaze va va na hangula, ngecize u linge viuma evi na ku hisa ngoco cahi, na vimo viahi viu ka linga mu ku sompela vulemu.”—1 Tim. 5:21.
Linga tuivuisise vuino, ha katete tua pande ku tepesa ava tungelo vaco na va 144.000 va ku vuavesa. Muomu ka vesi ha mutamba ua tungelo va va na tumbula ha cinimbu eci. Paulu mua sonekelele Timoteo, cisangukilo ca Vakua Kilistu va ku vuavesa linga vaye muilu, tele kanda ci putuke. Kaha muvila ua vapostolo na vua Vakua Kilistu va ku vuavuesa tele kanda u himpuke vua sipilitu. Ngeci mukemuo, ka citava tu handeke nguetu “tungelo vaze va va na hangula” vapua vakevo.—1 Kol. 15:50-54; 1 Tes. 4:13-17; 1 Yoa. 3:2.
Cikuavo naua, “tungelo vaze va va na hangula” ka va puile vaze tungelo va muesele lisino ku ntsimbu ya Livazi lia Kama. Muomu tungelo vaco, va hanguile ku kala ku mutamba ua Satana na ku lihimpula vandemone kaha va puile vitozi va Yesu. (Njen. 6:2; Luka 8:30, 31; 2 Pet. 2:4) Ku lutue, Yesu a ka va mbila mu cina ka cesi na masima, muze mu va ka kala likulukazi lia miaka. Kaha munima ya likulukazi lia miaka va ka va nongesa hamo lika na Satana.—Yun. 6; Ku-So. 20:1-3, 10.
Vunoni “tungelo vaze va va na hangula” va tumbuile Paulu, halumo va puile vaze tungelo va muilu, ve ku hakuila “Njambi, na Kilistu Yesu” ngue mu ci na muesa cinimbu caco.
Kua kala makulukazi na makulukazi a tungelo va kuononoka. (VaHe. 12:22, 23) Kaha ka tua pandele ku singanieka nguetu, Yehova ue ku va hana cipanga cimo lika. (Ku-So. 14:17, 18) Ca ku muenako, Yehova ua pangesele kangelo umo lika a nongese masualale vakua Asilia va kupua 185.000. (2 Vam. 19:35) Vunoni, cingi ca tungelo halumo va kala na vipanga via ku “tundisa mu Vuangana [vua Yesu] viose vie ku suntsuisa na vose vakua ku linga via kuvihia.” (Mat. 13:39-41) Tungelo vakuavo, va va hana cipanga ca ku kungulula vaze va ku vuavesa. (Mat. 24:31) Kasi vakuavo co, ve ku tambula lisiko lia ku tu ‘niunga mu vinjila vietu viose.’—Visa. 91:11; Mat. 18:10; setekesenu na Mateu 4:11; Luka 22:43.
Ngeci mukemuo, “tungelo vaze va va na hangula,” va va tumbula ku mukanda 1 Timoteo 5:21, halumo va puile tungelo vaze va va kundikile vipanga via ku lifuila, via ku talesesa vangamba va Njambi. Mu muzimbu uaco, Paulu ua hele cimamuna ku tuala ha vati vakuluntu mu cikungulukilo va hasa ku niunga viteli viavo, na vati vamuanetu va hasa ku muesa kasingimiko ku vakuluntu mu cikungulukilo. Paulu ua handekele nguendi: Vakuluntu mu cikungulukilo ka va pandele ku kala na ‘kahangu’ kaha naua, ka va pandele ku linga vihangula via ku hona ku hilulaho vuino. Paulu ua hele cimamuna ca cili ci va pandele ku kava vakuluntu mu cikungulukilo. Muomu ua handekele nguendi: Vaze vali na ku pangela vamuanaye, vali “ku meso a Njambi, na Kilistu Yesu, na tungelo vaze va va na hangula,” ni nguetu, Yehova, Yesu na “tungelo vaze va va na hangula” ve ku talesesa vati vakuluntu ve ku niunga cikungulukilo. Ngeci mukemuo, vamo tungelo va kala na cipanga ca ku niunga cikungulukilo. Vakuavo co, ve kuohiela vangamba va Njambi na ku tu kuasa mu cipanga ca kuambulula kaha naua ve ku hetesa mizimbu i ve ku talesesa kuli Yehova.—Mat. 18:10; Ku-So. 14:6.