Tueku Santsela Yehova omo liaku Tuecela

1-2. Vati muono ua vantu vose ua lifua na muono ua mukuendze u tua tumbula mu cinanga 1?

ACI SINGANIEKENU nga umo mukuendze ua kolela mu vusoko vua vampite. Vunoni, visemi vendi vatsa ku mponde. Muzimbu uaco ua mu vavalele cikuma ku mutima. Kaha kati ovio lika, visemi vendi va hetele haku sanduola vimbongo viose naku mu seza na makongo. Ngeci mukemuo, mu cihela caku suana vupite, asuana honi makongo a visemi vendi. Cikuavo naua, vantu vavalevalele vatonda vimbongo viavo mu vuasi-vuasi. Vunoni nalimo litangua liahi aka hasa kufueta makongo ose.

² Na vuno vene, muono uetu uapua ngeci mua muono ua mukuendze uaco. Visemi vetu Andama na Eva, vapuile vaku tantuluka kaha va kele na muono ua cili mu citungu. (Njen. 1:27; 2:​7-9) Veku yoyele mu ndzolela ku miaka yose! Vunoni Andama na Eva va vulumuine, kaha viose vialulukile. Yehova ua vasekuile mu citungu ca Endene, ngeci va zimbalesele muono ua ya-ye. Vika vasuanene vana vavo? Mbimbiliya nguayo: “Hali yala umo lika [Andama], vupi vua kovelele hano ha mavu, na ku-tsa ha vupi; kaha ngecize vene ku-tsa ci na hete ku vantu vose muomu vose va na lingi vupi.” (Loma 5:12) Tua suana vupi vua Andama, ngeci tue kutsa. Vupi vuaco, vuapua ngue makongo katu hasa kufueta.—Visa. 49:8.

3. Omo lia vika vupi vuetu vavu setekesa ku “makongo”?

³ Yesu ua setekesele vupi ku “makongo.” (Mat. 6:12; Luka 11:4) Mu tueku vulumuna, ce kupua ngue tuli naku levala Yehova, ni nguetu tua pande kufueta imo ndando omo lia vupi vuetu. Ngeci mukemuo, nga makongo aco kava afuetele, fueto ya vupi yeku puile lika kutsa caku hona lulavelelo lua kusanguka.—Loma 6:​7, 23.

4. (a) Caku hona vukuasi, nga vika vieku solokelele vantu vose? (Visamo 49:​7-9) (b) Mu Mbimbiliya lizi “vupi” lia lomboloka vika? (Talenu cikasa “Vupi.”)

⁴ Kacitava kuhiluisa viva zimbalesele Andama na Eva mu ndzili yetu vavenia. (Tandenu Visamo 49:​7-9.) Caku hona vukuasi, nga ka tua kele na lulavelelo ni cisangukilo. Mua vusunga, nga kutsa cetu ceku fuile ngue ca tusitu.—Ekel. 3:19; 2 Pet. 2:12.

5. Vati Tatetu ua cilemo uatu kuasele kufueta makongo avupi vu tua suana? (Talenu helu.)

⁵ Aci singaniekenu via mukuendze utua tumbula helu, vati ueku livuile nga umo mpite alihana muku fueta makongo endi ose? Mua vusunga, mukuendze uaco asantsela muakama naku tava vuana vuaco. Na vuno vene, Tatetu ua cilemo Yehova uatu hana vuana vuafueta vupi vutua suana kuli Andama. Yesu ua lomboluele nguendi: “Njambi ua lemene vakua mavu cikuma, ngecize ua hele Muaneni umo lika, linga uose a mu tsiliela kati a nonge, vunoni a kale na muono ka ue ku hua ua ya-ye.” (Yoa. 3:16) Cikuavo naua, vuana vuaco vueku tu hana vukovelelo vuaku likuata vusamba na Yehova.

6. Vika tu hilula mu cilongesa cino, kaha omo lia vika?

⁶ Vati tu hasa kuuana vukuasi kuvuana vuaku tuecela ku vupi vuetu? Linga tu kumbulule eci cihula, tu simutuila ha mezi ava pangesa mu Mbimbiliya na vika a lomboloka. Nga tu hilula via tu lingila Yehova linga a tuecele kuvupi, kusantsela cetu cika livuezelela.

VUTUMBE: KU LIHAMBA NA YEHOVA

7. (a) Vika naua va zimbalesele Andama na Eva? (b) Mukupua vana vaAndama na Eva, vika tua tondeka cikuma? (Loma 5:​10, 11)

⁷ Andama na Eva muva vulumuine, kava zimbalesele lika muono uayaye. Vunoni, va lipuisile naua vitozi va Iseavo Yehova. Andama na Eva vapuile mutamba ua vusoko vua Yehova, tele kanda vavulumune. (Luka 3:38) Munima yaku muesa lisino, Yehova kava tavesele naua ku tualelelaho kupua mutamba ua vusoko vuendi. Kaha evi via solokele ntsimbu kanda vakale na vana. (Njen. 3:​23, 24; 4:1) Muku linga tuapua vana vavo, tua tondeka ku lihamba na Yehova. (Tandenu Loma 5:​10, 11.) Mumezi akuavo, tua pande ku likuata vusamba Nendi. Mu ciNgelengu lizi “ku lihamba” lihasa kulomboloka “ku tavesa citozi kupua kavusamba.” Ceku tu komouesa cikuma kutantekeya nguetu, Yehova ikeye uahanguile kulihamba netu. Vati ua lingilemo?

NJAMBI UATU SOKOLUELA NJILA TU LIKUATE VUSAMBA NENDI

8. Vika Yehova uatu hana?

⁸ Yehova ua sokolola njila linga vantu va likuate lueka vusamba Nendi, muku fueta ndando yaku hiluisa viose via zimbalesele Andama. Visoneka via ciNgelengu navio via muesa vati Yehova ua hana vu kovelelo ku vantu, linga va likuate vusamba Nendi.—Loma 3:25.

9. Vika ua lingile Yehova linga ecele vupi vua vaIsaleli?

⁹ Yehova ua soluele imo njila yakuecela vupi vua vaIsaleli linga va likuate vusamba Nendi. Lumo mu muaka, vaIsaleli vakele naku linga cimo cilika caku lifuila ci va sanene nguavo: Litangua lia ku Minina Mata, ni nguetu, Litangua lia Kusambuesa. Ha litangua liaco, Sasendote ua Kama uakele naku hana cikombelo ca tusitu mukuimanenako mbunga. Mua vusunga, cikombelo ca tusitu kaca hasele kufuika vupi vua vaIsaleli mu vutuntu, muomu vantu vakala na seho ku hiana tusitu. Vunoni vaIsaleli ntsimbu yose i vakele na kuliveya naku hana vikombelo kuli Yehova, uakele naku vecela ku vupi vuavo. (VaHe. 10:​1-4) Kaha vikombelo viva kele naku linga ha Litangua lia ku Minina Mata na vintsimbu vikuavo, via kuasele vaIsaleli kuivuisisa nguavo va puile vakua vupi. Ngeci mukemuo, va tondekele viuma vieka vieku fuikile vupi vuavo.

10. Vika Yehova ua lingile mangana atuecele kuvupi?

¹⁰ Vika Yehova ua lingile mangana atuecele kuvupi? Yehova ua tumine Muanendi ya lema va mu “[kombeleye] lumo lika linga a ambate vipi via va vengi.” (VaHe. 9:28) Kaha Yesu ua hele “muono uendi, muku pua ndando linga a patule vavengi.” (Mat. 20:28) Cikombelo capua vika?

NDANDO YA FUETELE LINGA TU LIKUATE VUSAMBA NA NJAMBI

11. (a) Kuliya na Mbimbiliya, ndando yapua vika? (b) Vika via tondekele muku fueta ndando yaco?

¹¹ Kuliya na Mbimbiliya, ndando yapua fueto i veku hana linga va patule muntu na lingi mulonga. Ngeci Yehova ua fuetele ndando ya tondekele, linga tu patuke ku vupi na ku likuata vusamba Nendi. Ndando ika ya tondekele ku fueta linga vantu va kale na vize via zimbalesele Andama? Vulukenu nguenu, Andama na Eva va zimbalesele muono ua ku tantuluka na muono ua ya-ye. Ngeci mukemuo, linga va tu patule, ndando yaco ya pandele ku litombola na viuma vi va zimbalesele. (1 Tim. 2:6) Muntu ueku fuetele ndando yaco, ua pandele kupua (1) uaku tantuluka; (2) ku kala na vuhasi vua ku yoya miaka yose ha mavu; kaha (3) na cizango ca ku hana muono uendi linga a tu patule. Ngeci mukemuo, muono ua muntu uaco, ukeuo lika ueku hasele ku fueta vi va zimbalesele Andama na Eva.

12. Omo lia vika Yesu ua fuetele ndando ya tondekele mpundu?

¹² Tu hilulenu viuma vitatu via lingile Yesu linga a tu patule. (1) Yesu ua puile ua ku tantuluka, “ka lingile vupi.” (1 Pet. 2:22) (2) Omo liaco, ua kele na vuhasi vua ku yoya miaka yose ha mavu. (3) Ua kele na cizango caku hana muono uendi linga a tu patule. (VaHe. 10:​9, 10) Yesu ua pua uaku tantuluka ngue mua puile Andama ntsimbu kanda a vulumune. (1 Kol. 15:45) Kaha Yesu mua tu tsililile, ua fuetele ndando ya tondekele linga tu tambule vize via zimbalesele Andama. (Loma 5:19) Omo liaco, Yesu ua pua ‘Andama ua ku manusuila.’ Ngeci mukemuo, ka ci tondeka muntu ueka naua ua ku tantuluka linga a fuete via zimbalesele Andama, muomu Yesu ua tsile “lumo lika lua ku miaka yose.”—VaHe. 7:27; 10:12.

13. Ku litepa cika ca kala ha Litangua lia ku Minina Mata na Cikombelo?

¹³ Ku litepa cika ca kala ha Litangua lia ku Minina Mata na Cikombelo? Litangua lia ku Minina Mata, ni nguetu Litangua lia Kusambuesa, ya pua imo njila ye ku pangesa Njambi muku hiluisa vusamba na vantu. Ngeci mukemuo, Cikombelo capua imo ndando ya ku sambuesa vantu ku vupi vuavo. Vika vie ku tu lingisa ku likuata vusamba vua cili na Yehova? Muomu Yesu ua hele muono uendi ua ku tantuluka linga a fuete ndando ya vupi vuetu.—Efe. 1:7; VaHe. 9:14.

YEHOVA UA TU PATULA NA KU TU MONA KUPUA VAKUA VUVIUKE

14. Vika tu simutuila vuovuno, kaha omo lia vika?

¹⁴ Vukuasi vuka tue ku uana ku viuma via tu lingila Yehova? Linga tu uane cikumbululo ca cihula caco, tu simutuila ha mezi amo a va pangesa mu Mbimbiliya. Mezi aco a tu kuasa kuivuisisa vati tu hasa ku tambula vukuasi ku kuecela ca Yehova.

15-16. (a) Kuliya na Mbimbiliya, vika via lomboloka lizi ‘ku patula’? (b) Vati tue ku livua omo lia ku tu patula ku vupi na ku kutsa?

¹⁵ Mbimbiliya nguayo, va tu patula muomu va tu fuetela ndando ya ku tu kula. Kapostolo Petulu ua sonekele nguendi: “Muku tantekeya ngecize ka va mi kulile [ni nguetu ku patula] na viuma via ku pola ngue palata ni olu, ku ku-yoya cenu ca ngoco ci mua tambuile kuli vakukuenu; vunoni na maninga a seho ya kama, ngue a muana mpanga uze kesi na kapenga na citoma cahi, akeo maninga a Kilistu.”—1 Pet. 1:​18, 19.

¹⁶ Tua patuka ku vupi na ku kutsa, omo lia nkombelo. (Loma 5:21) Mua vusunga, tue ku santsela mua kama kuli Yehova na Yesu omo lia ku tu patula na maninga a Kilistu.—1 Kol. 15:22.

17-18. (a) Vika ca lomboloka kupua vakua vuviuke? (b) Vivezikiso vika vie kuizamo, omo Yehova ue ku tu mona kupua vakua vuviuke?

¹⁷ Mbimbiliya nguayo, vangamba va Yehova vapua vakua vuviuke. Eci ca lomboloka ngecize, Ikeye ke ku tu sindiya tu fuete vupi vuetu. Vutuhu ue ku tu mona kupua vakua vuviuke, Yehova ke ku tsiha masiko endi a vuviuke. Kaha ue ku tu mona kupua vakua vuviuke, kati muomu ca tu fuila. Cikuavo naua, Yehova ke ku tava vupi vuetu, vunoni ua kala na cizango ca ku tuecela, omo lia ku muesa lutsilielo ku viuma via tu lingila Ikeye na Yesu muku tu patula.—Loma 3:24; Ngal. 2:16.

¹⁸ Vivezikiso vika vie kuizamo, omo Yehova ue ku tu mona kupua vakua vuviuke? Vamo va va hangula ku ka sika na Yesu muilu, kaha na kupua vana va Njambi. (Tito 3:7; 1 Yoa. 3:1) Cikuavo naua, Yehova ue ku vecela na ku va mona ngue ka va lingile vupi na vumo vuahi. Omo liaco, va fuila ku tambula Vuangana. (Loma 8:​1, 2, 30) Vakua vuviuke vakuavo, va ka yoyela ha mavu. Kaha Njambi ue ku vecela ku vupi vuavo na ku va tavesa ku likuata vusamba Nendi. (Tia. 2:​21-23) Vakua civunga ca kama va kovoka ku Alemangendo, va ka kala na vukovelelo vua ku hona kutsa. (Yoa. 11:26) “Vakua vuviuke na vakua vuhenge,” va ka sanguka. (Vili. 24:15; Yoa. 5:​28, 29) Kaha muku hita ca miaka, vangamba va Yehova vose vakua kuononoka ha mavu, va “ka kovela mu vuovoke vua vumpahu vua vana va Njambi.” (Loma 8:21) Mua vusunga, tua lavelela na ndzolela yose litangua li tu kapua vana va ku tantuluka va Tatetu, Yehova!

19. Vika viezamo omo lia viuma via tu lingila Yehova na Yesu? (Talenu naua cikasa “Kuecela ca Yehova.”)

¹⁹ Mua vusunga, ngeci mua mukuendze u tua tumbula ku vuputukilo ua zimbalesele viose na ku suana makongo ka hasele ku fueta, nga netu ka tua kele na lulavelelo. Vunoni Yehova ua tu kuasa, muomu Yesu ua tu fuetela ndando ya ku tu patula ku vupi. Kaha lutsilielo luetu muli Yesu Kilistu, lue ku tu hana vukovelelo vua ku patuka ku vupi na ku kutsa. Yehova mue kuecela vupi vuetu, ce kupua vene ngue kanda tu vulumuneho. Vunoni ca seho ya kama, tu hasa ku likuata vusamba vua ku kaniama na Tatetu ua muilu, Yehova.

20. Vika tu ka simutuila mu cilongesa ci hatako?

²⁰ Ku santsela cetu ce ku livuezela mu tue ku hilula ha viuma via tu lingila Yehova na Yesu. (2 Kol. 5:15) Mua vusunga, ca ku hona vukuasi vuavo nga ka tua kele na lulavelelo na lumo luahi! Vuno kuecela ca Yehova ca lomboloka vika kuli yetu? Evi vikevio vi tu ka simutuila mu cilongesa ci hatako.