Kulikata na Vamuanetu Ceku Tukuasa!

1-2. Cuma cika caseho kuli Yehova, kaha atonda tulinge vika?

CIFUA citue kuyoyelamo na vakuetu capua caseho kuli Yehova. Yesu ua handekele nguendi, tuapande kulema vakuetu ngue mutua lilema etu vavenya. (Mat. 22:​37-39) Kaha evi viambatesela kumo naku muesa ngozi ku vantu kava puile Vakaleho. Kulingamo, tueku tambuluisa Yehova Njambi, “ue ku tuhuila litangua ku vakua vilinga via ku vihia na ku vantu va cili. Kaha ue ku nokesela niondzi kuli vakua vuviuke na vakua vuhenge.”—Mat. 5:45.

² Yehova ualema vantu, cikumakuma vaze veku linga viacili. (Yoa. 14:21) Kaha atonda netu tumu tambuluise, ngeci ua tumamuna ku ‘lema cikumakuma’ vamuanetu na vandumbuetu naku vamuesa “mutima ua uvotsi,” ni nguetu, ku vamuesa ngozi. (1 Pet. 4:8; Loma 12:10) Kaha cilemo na ngozi itue ku vamuesa ya lifua na itue kumuesa vavusoko ni kavusamba uaha mutima.

3. Vika tuapande kuvuluka kutuala ha cilemo?

³ Cilemo capua ngue vintemo vieku tondeka kuvi tukumuina mema linga vikole vuino. Ngeci mukemuo, kapostolo Paulu uamamuine Vakua Kilistu nguendi: “Cilemo ca ku vana va nana ci sueneko.” (VaHe. 13:1) Yehova atonda cilemo cetu ku vamuanetu na vandumbuetu ci tualeleho kukola. Kaha mu cilongesa cino, tu simutuila omolia vika tuapande kulikata na vamuanetu na vati tuhasa ku tualelelaho kulingamo.

OMOLIA VIKA TUAPANDE KULIKATA NA VAMUANETU?

4. Kuliya Visamo 133:​1, vati tuhasa ku tualelaho kumuesa seho ku kulikata cetu na vamuanetu? (Talenu naua vikupulo.)

⁴ Tandenu Visamo 133:1. Netu tua tava via handekele mukua visamo nguendi, ku likuata vusamba na vantu valema Yehova ‘ca viuka’ kaha “ca tovala.” Caku muenako, nga muntu ntsimbu yose alia viakulia via lema, mu kuhita ca ntsimbu ahasa ku sembulula viakulia viaco. Navuno vene, simano ku simano halumo tue kukala na vamuanetu na vandumbuetu. Vunoni mu kuhita ca ntsimbu tuhasa ku sembulula kulikata cetu. Vati tuhasa ku tualelaho kumuesa seho ku vamuanetu na vandumbuetu? Nga tuhilula seho ivakala nayo mu cikungulukilo na kuliyetu, cilemo cetu kuli vakevo cika livuezelela.

5. Vika vihasa kusoloka nga vantu vamona cilemo citue kulimuesa umo na mukuavo?

⁵ Vamo veku kunguluka netu luaku livanga, veku komoka muakama cilemo citue kulimuesa umo na mukuavo. Kaha omo liaco, ve kuhasa ku nongonona nguavo vana uana vusunga. Yesu ua handekele nguendi: “Hakeho vose va ka tantekeya ngecize mu vandongesi vange, nga mu lilema umo na mukuavo.” (Yoa. 13:35) Tu hilulenu muzimbu ua ndumbuetu Chaithra, uakele naku lilongesa Mbimbiliya na Vakeleho va Yehova. Ua tavele kuya ku ciuano ca muhato. Mu nima yaku kunguluka litangua lia kulivanga citona meso, ualekele ndumbuetu uakele naku lilongesa nendi nguendi: “Visemi vange kanda vanji vumbateleho, vunoni kuno ku ciuano vana nji vumbatela lua kupua 52 mu litangua limo lika. Njina limuena cilemo ca Yehova kuhitila muli vamuanetu. Kaha nange nji tonda kupua Mukaleho.” Ngeci ndumbuetu Chaithra ua tualeleho kukola mu lutsilielo kaha vamu mbatizile mu 2024. Mua vusunga, vantu muve kumona vilinga vietu viacili na cilemo citue kulimuesa umo na mukuavo, vekuivua cizango ca kupangela Yehova.—Mat. 5:16.

6. Vati kulikuata vusamba na vamuanetu cihasa ku tuniunga?

⁶ Kulikuata vusamba na vamuanetu na vandumbuetu cihasa ku tuniunga. Paulu uamamuine vamuanaye nguendi: “Limamunienu ku litangua ku litangua, . . . ku tina umosi ha kati kenu a kaluua mu ku-onga ca vupi.” (VaHe. 3:13) Nga tuli mu vusiua vuakama tuhasa kuzeya mu lutsilielo. Vunoni Yehova ahasa kupangesa umo muanetu ni ndumbuetu na nongonona citanga caco, muku tuhana vukuasi vutondeka. (Visa. 73:​2, 17, 23) Mua vusunga, vukuasi vuaco vueku tu kaniamesa.

7. Vati cilemo ca likuata na kulikata cetu? (Kolose 3:​13, 14)

⁷ Etu Vakaleho va Yehova, tueku lihakela kapandi kaku limuesa cilemo umo na mukuavo, omo liaco tue kutambula vivezikiso viavingi. (1 Yoa. 4:11) Caku muenako, cilemo ceku tukuasa ku ‘liyandela umo na mukuavo,’ ni nguetu kumuesa lukakatela, kaha evi vieku tukuasa ku tualelaho kulikuata kumo. (Tandenu Kolose 3:​13, 14; Efe. 4:​2-6) Ngeci mukemuo, cilemo citue kulimuesa ku viuano capua caku lifuila kaha cahiana cilemo ci veku limuesa vantu veka.

LISINGIMIKENU UMO NA MUKUAVO

8. Vati Yehova ueku tukuasa kulikuata kumo?

⁸ Kulikata cetu na vamuanetu mu mavu ose, capua cikomoueso ca Yehova, muomu tuvose katua tantulukile. (1 Kol. 12:25) Mbimbiliya nguayo, tua “lilongesa kuli Njambi ku lilema umo na mukuavo.” (1 Tes. 4:9) Mu mezi akuavo, kuhitila mu Mbimbiliya Yehova ueku tuleka vi tuapande kulinga mangana tulikate na vamuanetu. Cikuavo naua, linga vatu ‘longese kuli Njambi,’ tuapande kuhilula vilongesa viendi naku viononoka. (VaHe. 4:12; Tia. 1:25) Kaha kakeko kapandi kaveku lihakela Vakaleho va Yehova.

9. Vika tua lilongesa ku Loma 12:​9-13, kutuala haku lisingimika umo na mukuavo?

⁹ Vati Lizi lia Njambi lieku tukuasa kulikuata kumo? Tu hilulenu via handekele Paulu ha cimpande caco, ku Loma 12:​9-13. (Tandenu.) Mezi “ku kasingimiko tuamekenu vakuenu ku lutue” alomboloka vika? Mezi aco, amuesa ngecize yetu tuapande kutonda vukovelelo vuaku muesa ngozi, ngeci mua kupua vakua kuecela, ni kumuesa vuhuanga. (Efe. 4:32) Ngeci mukemuo, ka tuapandele kuvandamena vakuetu va livange kutu muesa kasingimiko. Yesu nguendi: “Kuhana, ce ku neha ndzolela ya kama ku tuvakana ku tambula.”—Vili. 20:35.

10. Vati tuhasa kuhona ‘ku kokovoka’ ni kupanga na ndzili muku lisingimika umo na mukuavo? (Talenu naua cikupulo.)

¹⁰ Mu nima yaku tumamuna kulimuesa kasingimiko umo na mukuavo, Paulu ua tumamuna kuhona ‘ku kokovoka’ ni nguetu, tupange na ndzili yose. Kaha mukua ndzili yose, uapua mukua ntuima na mukua ku fuitangana. Nga vamu hana cipanga ueku ci puisamo. Visimo 3:​27, 28 ya tumamuna nguayo: “Kati u likele ku linga mua cili no uze i ci na pande, omo ci li ku ngolo ya livoko liove ku ci linga.” Ngeci mukemuo, nga tumona nguetu vakuetu vatondeka vukuasi, tueku linga vi tuhasa tuvakuase. Ka tuapandele ku likanouela ni ku singanieka nguetu muntu ueka ahasa kulingako mumo muku vakuasa.—1 Yoa. 3:​17, 18.

11. Vika vihasa ku tukuasa kulikuata kumo na vamuanetu?

¹¹ Kuecela vakuetu vana tu vulumuina, yapua imo njila ya kumuesa kasingimiko. Efesu 4:26 nguayo: “Litangua kati li lahuke na vutenu vuenu.” Omolia vika? Cinimbu 27 ca muesa nguaco, kuhona kulingamo cika ‘sila Satana cihela’ ni nguetu vukovelelo. Ngeci mukemuo, Yehova ueku tuleka kusua kumo linga tupue na kuliecela umo na mukuavo. Kolose 3:13 ya tumamuna nguayo: “Liecelienu ha kati kenu ku milonga.” Mutue kulingamo, tue kukuasa “ku niunga vumo vua sipilitu na lizitiko lia ciyulo.” (Efe. 4:3) Kuya muvatu, mutue kuecela vakuetu ceku tukuasa kulikuata kumo navo na kuyoya mu ciyulo.

12. Vati Yehova ueku tukuasa kupua vakua kuecela?

¹² Mua vusunga, kati cacasi kuecela vakuetu nga vana tu vulumuina. Vunoni tuhasa kulingamo na vukuasi vua sipilitu ya Njambi. Mu nima yaku tumamuna ‘ku lilema umo na mukuavo,’ kuhona ‘ku kokovoka’ ni nguetu kupanga na ndzili yose. Mbimbiliya ya tumamuna naua nguayo: “Ku cimbembesi takamenu.” Eci ca lomboloka ngecize sipilitu santu ya Njambi yeku tukuasa kutakama ni nguetu, kukala na ntuima. (Loma 12:11) Ngeci mukemuo, na vukuasi vua sipilitu ya Njambi tue kuhasa kumuesa ngozi na kuliecela umo na mukuavo. Kaha tueku lambelela Yehova linga atukuase.—Luka 11:13.

“HA KATI KENU KATI HA KALE KU LITEPESA”

13. Vika vihasa kukoka matepeso hakati ketu?

¹³ Mu vikungulukilo muakala “vantu vose” vaku visemua viaku liseza-seza. (1 Tim. 2:​3, 4) Omo liaco, tueku linga vihangula viaku liseza-seza kutuala ha viuma ngeci mua zalesi, cifua ci tueku livuaheselamo ni vueho. Kaha nga katua zangamene, viuma viaco vihasa kukoka matepeso hakati ketu. (Loma 14:4; 1 Kol. 1:10) Muku linga tua “lilongesa kuli Njambi ku lilema umo na mukuavo.” Tuapande kuzangama linga kati tusambeye vihangula vietu ngue vikevio viapua viaseho kuhiana via vakuetu.—Filp. 2:3.

14. Kapandi kaka tuapande ku lihakela ntsimbu yose, kaha omolia vika?

¹⁴ Katu kakoko matepeso mu cikungulukilo, nga tu lihakela kapandi ka kumuesa ngozi ntsimbu yose naku kaniamesa vakuetu. (1 Tes. 5:11) Cingi ca vamuanetu na vandumbuetu vazeyele mu lutsilielo ni vava tundisile mu cikungulukilo, va hiluka kuli Yehova. Kaha tueku vatambula na mavoko avali. (2 Kol. 2:8) Tu hilulenu via solokelele umo ndumbuetu mua ile ku Ndzivo ya Vuangana, mu nima yaku zeya mu lutsilielo mu miaka 10. Ua handekele nguendi: “Vamuanetu na vandumbuetu vanji menekele na ndzolela.” (Vili. 3:19) Vati ngozi iva mu muesele yamu kuatele ku mutima? Ndumbuetu nguendi: “Ngozi iva nji muesele yanji kuasele kumona nguange, Yehova uakele na kunji kuasa lueka naua kuivua ndzolela.” Ngeci mukemuo, nga tupua vakua ku kaniamesa vakuetu, Kilistu ahasa kutu pangesa tu lembezieke vakua “kuambata via ku lema.”—Mat. 11:​28, 29.

15. Vika naua tuhasa kulinga muku kuasa cikungulukilo kulikuata kumo? (Talenu naua cikupulo.)

¹⁵ Kuhitila mu mezi etu tuhasa kukuasa cikungulukilo kulikuata kumo. Yombi 12:11 nguayo: “Lituitui ka lie ku eseka mezi ni, ngue ndakulo ye ku halakana ku-lia cayo?” Mukua kuteleka muacili ueku livanga kumakela viakulia via nateleka, linga atantekeye nga via tovala. Navuno vene, tuapande kuhilula ha mezi atu tonda kuhandeka. (Visa. 141:3) Ngeci mukemuo, ntsimbu yose tu tonda kuhandeka mezi akaniamesa vakuetu naku “kuasa vakua ku ahalakana.”—Efe. 4:​29, NWT.

16. Cikumakuma veya vapande ku lihakela kapandi ka kuhandeka mezi akaniamesa vakuavo?

¹⁶ Cikumakuma vamala vambata na visemi, vakevo vapande ku lihakela kapandi ka kuhandeka mezi akaniamesa vakuavo. (Kolo. 3:​19, 21; Titu 2:4) Cikuavo naua, vakuluntu mu kupua tuniungi mu cikungulukilo, navo vapande kupua lungano luacili mu kuhandeka mezi akaniamesa vutanga vua Yehova. (Isaya 32:​1, 2; Ngal. 6:1) Mbimbiliya ya tuvuluisa nguayo: “Lizi mu ntsimbu yalio, lia viuka cikuma!”—Visi. 15:23.

LEMENU MU “VILINGA NA VUSUNGA”

17. Vati tuhasa kumuesa nguetu tualema vamuanetu na vandumbuetu?

¹⁷ Kapostolo Yoano ua tumamuna nguendi: “Kati tu leme na lizi cipue na lilimi; vunoni na vilinga na vusunga.” (1 Yoa. 3:18) Ngeci mukemuo, tutonda kulema vamuanetu na vandumbuetu na mutima uose. Vati tuhasa ku vipuisamo? Nga tupua na kusikama navo, tuka likuata kumo kaha cilemo cetu kuli vakevo cika livuezelela. Ngeci mukemuo, tupuenu naku tonda vukovelelo vuaku sikama na vamuanetu, nga tuli ku viuano namu kuambulula. Cikuavo naua, tupuenu naku va meneka. Nga tulingamo, tu kamuesa nguetu tua “lilongesa kuli Njambi ku lilema umo na mukuavo.” (1 Tes. 4:9) Kaha tuka tualelaho kulimuena vusunga vua mezi nguauo: ‘Ca viuka na mu ca tovala omo vana naye va kala hamo na cizango cimo!’—Visa. 133:1.