Isaya 41:10—“Kati u Ivue Vuoma, Muomu Ange Njili Nove”

“Kati u ivue vuoma, muomu ange njili nove; Kati u livete cikumba, muomu yange Njambi yove; Nji ka ku kolesa; Cili, nji ka ku kuasa; Cili nji ka ku kaniamesa na livoko lia cilio lia vuviuke vuange.”—Isaya 41:10, Mbimbiliya ya ku Lela.

“Kesi muzive lyova, yange njili amo neni! Kati mujaje, yange Njambi yeni! Njikamitakamesa nakumikwasa, njikaminyunga nakumyamena.”—Isaya 41:10, Mbimbiliya Shukulu Kalunga.

Vulumbunuiso vua Isaya 41:10

Yehovaa Njambi ua kulahesa ku kuasa vangamba vendi va vuoloke, ambe nga va hita mu visito via kufua vati.

“Njili nove.” Yehova ua hana vusunga ku vangamba vendi mu ku valekesa omo lia vika ka vapandele ku kala na liova—ka vesi lika liavo. Muomu ue ku mona visoti viose vi ve kupinda navio kaha ue ku halakana ku vivundilo viavo, ci napu vene ngue ali kumukulo uavo mpundu.—Visamo 34:15; 1 Petulu 3:12.

“Yange Njambi Yove.” Yehova ue ku lembezieka vangamba vendi mu ku vavuluisa ngecize, ua pua Njambi yavo kaha ua vatava ku pua vakua ku mu lemesa. Kaha va na pande ku kala na vusunga ngecize, na vimo viahi vi hasa ku vindika Njambi mu kuva kuasa.—Visamo 118:6; Loma 8:32; VaHevelu 13:6.

“Nji ka ku kolesa; Cili, nji ka ku kuasa; Cili nji ka ku kaniamesa na livoko lia cilio lia vuviuke vuange.” Yehova ua pangesa evi vinjila vitatu, mu ku ntsindika ha vusunga vua ku vakuasa mpundu. Cikuavo naua, ue ku pangesa amo mezi mu ku lekesa vati ue ku livua nga vangamba vendi va tondeka vukuasi, kaha nga umo aua Njambi a hasa kuolola livoko liendi lia cilio linga akatuke.—Isaya 41:13.

Imo njila ya seho ya kama ye ku kaniameselamo na ku kuasa vangamba vendi, ya pua ku hitila mu Lizi liendi Mbimbiliya. (Yehosua 1:8; VaHevelu 4:12) Ca kumuenako, Lizi lia Njambi lie ku hana vimamuna kuli vaze ve kuhita mu visoti ngeci mua, vuhutu, ku vavala ni kutsisa muntu uva lema. (Visimo 2:6, 7) Cikuavo naua, Njambi ue ku pangesa silipilitu santu yendi, ni nguetu ndzili yendi ya ku hiana mu ku hana vangamba vendi ndzili ya mu visinganieka na ku muvila linga va hase ku kolesa mu visoti.—Isaya 40:29; Luka 11:13.

Mezi Alihata na Isaya 41:10

Aa mezi a hele ku lembezieka kuYundeya va lutsilielo vaze vava tualele mu vundzinda ku Mbambilone. Yehova ua polofetele ngecize vaYundeya ve ku va patuile ku vundzinda, kaha kue ku solokele umo ue ku vulile vimbonge via hahiehi na ku zuzuisa Mbimbilone. (Isaya 41:2-4; 44:1-4) Mua vusunga, Mbambilone na vifuti vikuavo via lihatele va kele mu visoti kaha va vuile liova omo lia mizimbu yaco. Vunoni vaYundeya ka va tondekele kuiva vuoma, muomu Yehova ue ku va niungile. Mu vitsimbu vitatu viose ua va kaniamesele na mezi: “Kati u ivue vuoma.”—Isaya 41:5, 6, 10, 13, 14.

Vutuhu ha katete ua talekesele aa mezi ku vaYundeya va lutsilielo mu va kele mu ndzinda ku Mbambilone, Yehova Njambi ua handekele mezi a ku Isaya 41:10 mu ku lembezieka vangamba vendi vose. (Isaya 40:8; Loma 15:4) Na lelo lino, ue ku kuasa vangamba vendi ngue mua kuasele vangamba vendi va ku nima.