VINIMBU VIA MU MBIMBILIYA VIVA LOMBOLOLA
Visimo 17:17—“Kavusamba ueku Muesa Cilemo Ntsimbu Yose”
“Kavusamba a lema ntsimbu yose; na muanetu na semuuila muku kuasa ku lamba.”—Visi. 17:17, Mbimbiliya ya ku Lela.
“Vasamba vamwesa cizemo cavo ntsimbu yoshe, vavushoko vanasemukila ngeci vamwene amo tuyando.”—Visi. 17:17, Shukulu Kalunga.
Vulumbunuiso vua Visimo 17:17
Vavusoko vavusunga citava kuva kulahela na mutima uose. Muomu veku kakatela kuli yetu na kutu muesa cilemo, cikuma-kuma mu vintsimbu via vikalu, ngue vantu vatua semuka navo.
“Kavusamba a lema ntsimbu yose.” Aa mezi citava naua ku alangulula nguetu “vavusamba veku muesa cilemo cavo ntsimbu yose.” Mu ciHevelu lizi “cilemo” liva tumbula hano, kalia lombolokele lika cilemo caku mutima. Vunoni cilemo ci tueku muesa mu vilinga. (1 Kolintu 13:4-7) Vavusamba valilema umo na mukuavo mu cifua eci veku tualelelaho kulikata ambe nga vusamba vuavo vuhita mu vieseko, ngeci muaku lisevukila ni visoti vieka via muono. Kaha naua veku liecela umo na mukuavo. (Visi. 10:12) Cikuavo naua, nga viuma via cili vina solokela umo, mukuavo keku muvuila cipululu, vunoni ueku viukilila nendi.—Loma 12:15.
“Kavusamba . . . [uapua] muanetu na semuuila mu ku kuasa ku lamba.” Eci cisimo ca muesa ngecize vana va umo, veku lilema muakama umo na mukuavo. Ngeci mukemuo, ngatu lihakela kapandi kaku kuasa kavusamba ali naku hita ha hakalu, tuli na kulipuisa vene ngue muntu ya semuka nendi. Kaha cilemo cavo kaceku kokoloka omo lia vitanga, vunoni ceku livuezelela, muomu veku lilema naku lisingimika honi cikuma umo na mukuavo.
Mezi Alihata na Visimo 17:17
Mu livulu lia Visimo mua kala mezi a mana, ava soneka mu vuihi, linga muntu evue cizango ca ku singaniekaho. Cingi ca mezi aco Solomone ikeye ua asonekele. Kaha ua sonekele mu cifua ca kulinga vinguli vivali vihasa kulikava, imo itsindika ikuavo ni ihilimika. Ngue muva kele na kusoneka vaHevelu mavulu a visimo na cilemo. Visimo 17:17 ya muesa vuino ovu vusunga, muomu nguli yamu civali ya tsindika ha nguli ya katete. Kahaco Visimo 18:24 ya muesa vinguli viaku lihilimika. Nguayo: “Uze a kuata vavusamba va vengi a linongesa ivene; vunoni kuali kavusamba na hiana muanaye ku kakatela.”
Solomone mua sonekele Visimo 17:17 halumo ua singaniekele ha kulikata ca ise Ndaviti na Yonatase muana Saulu. (Visi. 17:17; 1 Sam. 13:16; 18:1; 19:1-3; 20:30-34, 41, 42; 23:16-18) Vutuhu Ndaviti na Yonatase kava puile vavusoko vunoni va likatele ku hiana muntu na muanaye. Yonatase ua hetele naha kuhaka muono uendi mu vusonde omo lia kavusamba kendi.a
Talenu eyi video yaihi mu mone mpupulule ya livulu lia Visimo.
a Talenu cimpande “Uma grande amizade.”