Vati tu Hasa ku Kaniamesa Lutsilielo Luetu mu Cikulaheso ca Yehova ca Mavu a Aha?

1-2. Vika tua pande ku linga omo tu lavelela mavu a aha?

TUA HAKA seho ya kama ku cikulaheso ca Yehova ca ku neha mavu a aha. (2 Pet. 3:13) Vutuhu ka tu tantekeya tangua lika mpundu vi ka lipuisamo, vunoni vukaleho vua muesa ngecize kua lisupu ka ntsimbu ka kandende lika.—Mat. 24:32-34, 36; Vili. 1:7.

² Vunoni mu ntsimbu ino, ambe nga tuli mu vusunga mu miaka ya ingi, kasi tu vose tua pande ku kolesa lutsilielo luetu mu cikulaheso caco. Omo lia vika? Muomu cipue mukua lutsilielo lua kama a hasa ku zeya. Ngeci kapostolo Paulu ua lukile ku hona lutsilielo ngueni: “Vupi vuze vue ku satela ntsimbu yose.” (VaHe. 12:1) Linga lutsilielo luetu kati luzeye, tua tondeka ku tualelelaho ku hilula vukaleho vua muesa ngecize mavu a aha vuovuno a heta.—VaHe. 11:1.

3. Vika tu simutuila mu cilongesa cino?

³ Mu cilongesa cino, tu simutuila ha vinjila vitatu via ku kaniameselamo lutsilielo luetu mu cikulaheso ca Yehova ca mavu a aha: (1) ku singanieka ha nkombelo, (2) ku hilula ha ngolo ya Yehova kaha (3) Ku lihaka mu vipanga via mu lutsilielo. Mu nima yaco, tu simutuila vati muzimbu ua Havakuke u hasa ku kaniamesa lutsilielo luetu lelo lino. Vunoni ha katete, tu ci simutuilenu vimo viuma halumo vi tuli na ku hita navio mu ntsimbu ino vene, via tondeka ku kaniamesa lutsilielo luetu mu mavu a aha.

VIUMA VIA TONDEKA LUTSILIELO LUA KAMA

4. Vihangula vika via tondeka lutsilielo lua ku kaniama?

⁴ Tangua na tangua, tue ku linga vihangula via tondeka lutsilielo lua ku kaniama. Ca ku muenako, tue ku linga vihangula ku tuala ha vavusamba, vueho, ku lilongesa, vulo, vanike na vipanga. Ngeci mukemuo, tua pande ku lihula nguetu: ‘Vuno vihangula viange vie ku muesa ngecize nja kulahela nguange ano mavu a ntsimbu ya indende lika, vuovuno Njambi a neha mavu a aha ni? Ni nange nje ku linga vihangula mu ku temunuina vaze ve ku yoya ngue ku-tsa cikeco kuhua ca viose?’ (Mat. 6:19, 20; Luka 12:16-21) Tu ka linga vihangula via cili nga tu ka kaniamesa lutsilielo luetu ngecize mavu a aha vuovuno a heta.

5-6. Omo lia vika tua tondeka lutsilielo lua ku kaniama mu ntsimbu ya visoti? Hanenu cimueso.

⁵ Tue ku hita naua mu visoti vie ku tondeka lutsilielo lua kaniama. Viuma ngeci mua, ku tu luisa, vuvezi vua kama na vikuavo vi hasa ku tu zeyesa. Ha katete, tu hasa ku kolesa nga tu hita mu ceseko. Vunoni nga ceseko caco ci tualelelaho mu ntsimbu ya kama, tu ka tondeka lutsilielo lua ku kaniama linga tu hase ku kolesa na ku tualelelaho ku pangela Yehova na ndzolela.—Loma 12:12; 1 Pet. 1:6, 7.

⁶ Nga tuli na ku hita mu ceseko, tu hasa ku livua ngecize mavu a aha a kulahesa Yehova ka a keza. Vuno eci ca lomboloka ngecize tu na zeye mu lutsilielo ni? Houe. Tu ci singaniekenu ha cimueso eci. Nga cisika ci na hiana cikuma, tu hasa ku livua ngue ntondue ka i keza naua. Vunoni ye kuiza vene. Na vuno vene, nga tuli mu vusiua vua kama, tu hasa ku livua ngecize mavu a aha ka a keza naua. Vunoni nga lutsilielo luetu lu na kaniama, tu tantekeya ngecize vikulaheso via Njambi vi ka lipuisamo. (Visa. 94:3, 14, 15; VaHe. 6:17-19) Kaha nga tuli novu vusunga, tu ka tualelelaho ku tuameka ku lutue ku lemesa cetu.

7. Tua pande ku liniunga ku vika?

⁷ Tu hilulenu naua cimo cuma ca tondeka lutsilielo lua ku kaniama, ku ambulula. Cingi ca vantu va tue ku ambuluila, ve ku singanieka nguavo, muzimbu ua cili ku tuala ha mavu a aha a kulahesa Njambi ka u ka lipuisamo. (Mat. 24:14; Ezek. 33:32) Tua pande ku liniunga linga visinganieka viavo kati vi tu sampuke. Kaha linga tu hase ku liniunga, tua pande ku tualelelaho ku kaniamesa lutsilielo luetu. Tu hilulenu vinjila vitatu vi tu hasa ku lingamo.

SINGANIEKENU HA NKOMBELO

8-9. Vati ku singanieka ha nkombelo ca kuata ku lutsilielo luetu?

⁸ Imo njila i tu hasa ku kaniameselamo lutsilielo luetu, ya pua mu ku singanieka ha nkombelo. Nkombelo, ikeyo luvula lua tu hana vusunga ngecize vikulaheso via Njambi viose vi ka lipuisamo. Mu tue ku hilula vuino ha viuma via lingisile Njambi ku tu tuma nkombelo na viuma via lihitile navio, lutsilielo luetu mu vikulaheso via Njambi ngeci mua cikulaheso ca muono ka ue kuhua ua ya-ye mu mavu a aha, lue ku kaniama. Vika tu handekela ngoco?

⁹ Vuno nkombelo ya puile vika mpundu? Yehova ua tumine Muaneni ua ndala ya lema, uze ua pua naua kavusamba keni ua kama a tunde muilu linga a ku pue muntu hano ha mavu. Mua kele hano ha mavu, Yesu ua hitile mu visoti via vifua viose. Kaha mu nima yaco, ua yandele na ku-tsa mua vukenia. Mua vusunga, Yehova ua fuetele ndando ya kama cikuma! Evi via muesa ngecize Njambi yetu ua cilemo nga tavesele muaneni ya lema, a ku yande na ku-tsa omo lia ku tu hana muono ua cili mu ntsimbu ya indende. (Yoa. 3:16; 1 Pet. 1:18, 19) Omo lia ndando ya kama ya fuetele Yehova, mua vusunga a ka linga cose linga a ka puisemo cikulaheso ceni ca ku tu hana muono ka ue kuhua ua ya-ye mu mavu a aha.

HILULENU HA NGOLO YA YEHOVA

10. Kuliya na Efeso 3:20 vika a hasa ku linga Yehova?

¹⁰ Njila ya mu civali ya ku kaniameselamo lutsilielo luetu, ya pua mu ku hilula ha ngolo ya Yehova. Ikeye ua kala na ngolo ya ku puisamo vikulaheso viose via linga. Vutuhu cikulaheso ca muono ua ya-ye mu mavu a aha, ci hasa ku soloka ngue ka citava ku vantu. Vunoni Yehova vintsimbu via vingi ue ku kulahesa viuma vize ka va hasa ku linga vantu. Muomu ua pua Mukua Ngolo yose (Yombi 42:2; Mako 10:27) Ngeci mukemuo, ku tu kulahesa viuma via vikalu, ka ca pandele ku tu komouesa, ni vati?—Tandenu Efeso 3:20.

11. Hanenu cimueso ca cimo cikulaheso ca ku komouesa ca tu linga Njambi. (Talenu cikasa, “Vimo Vikulaheso via ku Komouesa via Lipuisamo.”)

¹¹ Tu hilulenu vimo viuma via solokele ngue ka vi tava, via kulahesele Yehova ku vangamba veni ku nima. Ua kulahesele Avilahama na Sala ngecize va ka kala na muana, vutuhu tele va na kulupa. (Njen. 17:15-17) Ua lekele Avilahama naua ngecize vakua mbuto yeni, va ka suana cifuti ca Kanana. VaIsaleli va puile vakua mbuto ya Avilahama kaha va kele miaka ya ingi mu vundungo mu Ingito. Mu ntsimbu yaco, citava ca solokele vene ngue cikulaheso ca Njambi ka ci ka lipuisamo. Vunoni ca lipuisilemo vene. Mu nima ya ntsimbu, Yehova ua lekele Elizambete ngecize a ka kala na muana, vutuhu kasinakazi. Kaha ua lekele nauaMaliya, uze tele kanda a ci limone na yala ngecize a ka sema muana Njambi. Evi via puisilemo cikulaheso ca lingile Yehova ku makulukazi a miaka ku nima, mu citungu ca Endene!—Njen. 3:15.

12. Vusunga vuka ya tu hana Yehosua 23:14; Isaya 55:10, 11, ku tuala ha ngolo ya Yehova?

¹² Tue ku kaniamesa lutsilielo luetu mu ngolo ya Yehova ya ku neha mavu a aha, mu tue ku hilula ha vikulaheso viose via linga na cifua ca vi puisilamo. (Tandenu Yehosua 23:14; Isaya 55:10, 11.) Evi vi ka tu kuasa ku liviukisila mu ku kuasa vakuetu, linga va tave ngecize cikulaheso ca mavu a aha, ka ca puile cilota ni cisimo ca ngoco. Ivene Yehova ua handeka ku tuala ha melu a aha na mavu a aha ngueni: “Mezi ano akeo a cili a vusunga.”—Ku-So. 21:1, 5.

SULISENU MUONO UENU NA VIPANGA VIA MU LUTSILIELO

13. Vati viuano vi hasa ku kaniamesa lutsilielo luenu? Lombololenu.

¹³ Njila ya mu citatu ya ku kaniameselamo lutsilielo luetu, ya pua ku sulisa muono uetu na vipanga via mu lutsilielo. Ca ku muenako, tu hilulenu ha vukuasi vu tue ku uana ku viuano vietu. Anna, ua hita mu visoti via ku liseza-seza mu cipanga a ntsimbu yose ngueni: “Viuano vie ku kaniamesa lutsilielo luange na ku luniunga. Ambe nga uze ali ku mutula ka kele na vuhasi vua kama vua longesa, ni ka longesa na vimo viuma via viha viahi, kasi nje ku ivua vimo vie ku nji kuasa ku ivuisisa mua cili vusunga vua mu Mbimbiliya. Kaha eci ce ku kaniamesa lutsilielo luange.”b Mua vusunga, tue ku ivua naua vikumbululo vie ku kaniamesa lutsilielo luetu mu mbunga.—Loma 1:11, 12; 10:17.

14. Vati ku ambulula ce ku kaniamesa lutsilielo luetu?

¹⁴ Tue ku kaniamesa naua lutsilielo luetu, mu ku linga cipanga ca ku ambulula. (VaHe. 10:23) Barbara, uze ali na ku pangela Yehova mu miaka i tuvakana 70 ngueni: “Ange kuli yange, ku ambulula ce ku nji kaniamesa mua kama mu lutsilielo. Ku handeka na vantu vavengi via vikulaheso via ku komouesa via linga Yehova, ce ku kaniamesa lutsilielo luange na ku luniunga.”

15. Vati cilongesa ca mu vulika ce ku kaniamesa lutsilielo luetu? (Talenu cikupulo.)

¹⁵ Tu hilulenu naua cipanga cikuavo ca mu lutsilielo ce ku kaniamesa lutsilielo luetu: Cilongesa ca mu Vulika. Ndumbuetu Susan ngueni, ku kala na programa ya ku lilongesa mu vulika ce ku mu kuasa mua kama. Ivene ngueni: “Lia Calumingu nje ku liviukisila cilongesa ca Vutala vua Kaniungi ca simano i hatako. Lia mu cimo na lia mu civali, nje ku liviukisila ciuano ca mu kati kasimano. Kaha ha matangua a na lisupoko, nje ku pangela ha cilongesa ca mu vulika.” Mu ku lihakela kapandi ka ku kava programa ya cili ya ku lilongesa, ndumbuetu Susan ue ku tualelelaho ku kaniamesa lutsilielo lueni. Ndumbuetu Irene, uze ua pangela miaka ya ingi ku cikota cetu ca kama, ua nongonona ngecize ku lilongesa vupolofeto vua mu Mbimbiliya ce ku kaniamesa lutsilielo lueni. Ivene ngueni: “Nje ku komoka vati Yehova ue ku puisamo vupolofeto vueni, ambe tu mizimbu tua tundende cikuma.”c

“CI KEZA CILI VENE”

16. Omo lia vika vusunga vua hele Yehova kuli Havakuke netu vu hasa ku tu kuasa? (VaHevelu 10:36, 37)

¹⁶ Vamo vangamba va Yehova, vali na ku lavelela ku kotoka ca ano mavu mu miaka ya ingi. Kuli vantu, cikulaheso ca Njambi ci hasa ku soloka ngue cili na ku simbula. Ngeci Yehova, ua livangele ku pangela ha ku lisosomua caco mu ku hana vusunga kuli Havakuke ngueni: “Muomu cimona ci ci li ku ntsimbu ya ku ci tumbuila, kaha ci zangula ku vusulumuino, kaha ka ci ka handeka makuli: vutuhu ci ka tokaho, ka ci tumamena; muomu ci keza cili vene, ka ci ka simbula.” (Hav. 2:3) Vuno Njambi ua hele ovu vusunga mu ku kuasa lika Havakuke ni? Ni mezi eni a hasa ku tu kuasa netu lelo lino? Kapostolo Paulu, va mu huiminine ku pangesa mezi aco mu ku kuasa Vakua Kilistu vali na ku lavelela mavu a aha. (Tandenu VaHevelu 10:36, 37.) Cili vene, tu kalenu na vusunga ngecize vutuhu cikulaheso ca ku tu patula cisoloka ngue ci cili ku laako, “ci keza cili vene, ka ci ka simbula!”

17. Vati umo ndumbuetu ue ku kava cimamuna ca Yehova kuli Havakuke?

¹⁷ Cingi ca vangamba va Yehova, ve ku kava cimamuna ca ku tumamena litangua lia Yehova mu miaka ya ingi. Ca ku muenako, ndumbuetu Louise ua putukile ku pangela Yehova mu 1939. Ivene ngueni: “Ha ntsimbu yaco, nja singaniekele nguange Alemangendo i keza ntsimbu kanda nji manusule sikola. Vunoni ka yezile. Mu ku hita ca miaka, viuma vie ku nji kuasa, ya pua ku tanda imo mizimbu i nja luka nguange, mizimbu ya ku vandamena. Mizimbu yaco, ya handeka via Noa, Avilahama, Yosefe na vakuavo va vandamenene ntsimbu ya kama linga va hase ku tambula vilunguiso via va kulahesele Yehova. Ku tualelelaho ku lavelela, ca nji kuasa na ku kuasa vakuetu tu kale na vusunga ngecize mavu a aha ali mu hiehi.” Cingi ca vamuanetu va laza mu vusunga, navo ve ku tava aa mezi ou ndumbuetu!

18. Vati ku tala viuma via ku tanga ci hasa ku kaniamesa lutsilielo luetu, ku tuala ha kuiza ca mavu a aha?

¹⁸ Mua vusunga mavu a aha kanda aci hete. Vunoni, aci singaniekenu ha viuma via kalako laza. Vintangantanga, miti, tusitu na vakuetu vantu. Na umo uahi, ua kala na vimpata ngecize evi vi viuma via pua via vusunga. Vutuhu imo ntsimbu ku nima navio ka via keleko. Lelo lino ku via kala, muomu Yehova ua vi tangele. (Njen. 1:1, 26, 27) Njambi yetu, ikeye naua ua likuminia ku alulula ano mavu na ku a puisa a aha. Tuli na vusunga ngecize a ka puisamo nkuminio yeni. Mu mavu a aha, vantu va ka yoya miaka yose ya ya-ye na cihindu ca ku tantuluka. Kaha ha ntsimbu ya hangula Njambi, mavu a aha tu ka a mona mpundu ngue muze mu tue ku mona viuma vikuavo via ku tanga lelo lino.—Isaya 65:17; Ku-So. 21:3, 4.

19. Vati mu hasa ku kaniamesa lutsilielo luenu?

¹⁹ Mu ntsimbu ino a tuli na ku lavelela mavu a aha, pangesenu nkala vukovelelo vu mi solokela mu ku kaniamesa lutsilielo luenu. Muesenu ku santsela ku nkombelo. Hilulenu ha ngolo ya Yehova. Sulisenu muono uenu na viuma via mu lutsilielo. Nga mu lingamo, nenu mu ka kala hakati ka vaze va ku “suana matavasiano mu ku tsiliela na lukakatela.”—VaHe. 6:11, 12; Loma 5:5.