Yehova ue ku Lunguisa Vaze va mu Lengeya

1, 2. (a) Haka via likuatela cilemo na lutsilielo? (b) Vihula vika tu ka lilongesa?

TATETU Yehova, ua likuminia ku vezikisa vangamba veni. Eyi ya pua imo ya vinjila ye ku mueselamo Yehova cilemo ceni kuli yetu, kaha tua mu lema “muomu ikeye ua livangele ku tu lema.” (1 Yoano 4:19) Omo cilemo cetu kuli Yehova ci ya na ku kola, lutsilielo luetu muli ikeye lu ya na ku livuezelela kaha tu li na vusunga ngecize Yehova a ka vezikisa vose vaze va mu lema.—Tandenu VaHevelu 11:6.

² Yehova mukua ku lunguisa! Eci ca pua cuma ca seho ya kama kuli ikeye muomu ce ku solola vati ua fua na viuma vie ku linga. Lutsilielo luetu muli Njambi lu hasa lika ku pua lua mutuntu nga tu kala na vusunga ngecize ikeye ue ku vezikisa vaze va mu lengeya. Omo lia vika? Muomu “ku-tsiliela ci na pu ciye ca viuma via ku lavelela.” (VaHevelu 11:1) Ku tsiliela ca lomboloka ku kala na vusunga mpundu ngecize Njambi a ka vezikisa vose vakua ku mu ononoka. Vati ku lavelela cilunguiso ci hasa ku tu vezikisa? Vati Yehova ua vezikisile vangamba veni ku laza na ku tsimbu ino? Tu ci talenu.

YEHOVA UA LIKUMINIA KU VEZIKISA VANGAMBA VENI

3. Vikulaheso vika tue ku tanda ku Malakiya 3:10?

³ Yehova Njambi ua likuminia ku lunguisa vangamba veni vakua vusunga. Ua tu lania tu mu pangele na ndzili yetu yose na ku tsiliela ngecize tangua a ka tu vezikisa. Yehova ngueni, ‘Nji esekenu.’ Ua vuezeleko naua ngueni: “Nga ange ka nji ka mi sokoluela zinjanena zia muilu, na ku mi muaniena civekiso, ngecize ka mu ka kala na muhela ha ku ci tambuila.” (Malakiya 3:10) Tu ka muesa ku santsela cetu ku vuana vueni nga tu tava cilanio ca Yehova ca ku mu eseka.

4. Omo lia vika tu hasa ku tsiliela mezi a Yesu a ku Mateo 6:33?

⁴ Yesu ua kulahesele vandongesi veni ngueni nga va tuameka Vuangana ha katete, Njambi a ka va kuasa. (Tandenu Mateo 6:33.) Yesu ua handekelemo muomu ua kele na vusunga ngecize vikulaheso via Njambi vie ku lipuisamo ntismbu yose. (Isaya 55:11) Ngeci netu, tu hasa ku kala na vusunga nguetu nga tu tsiliela mpundu muli Yehova, a ka puisamo via tu kulahesa: “Na hamo hahi ha nji ka ku ecelela, cipue na hamo hahi ha nji ka ku sila.” (VaHevelu 13:5) Eci cikulaheso ca Yehova ce ku tu kuasa ku tsiliela mezi a Yesu a ku Mateo 6:33.

5. Omo lia vika cikumbululo ci va hele Petulu ci tu kaniamesa tu vose?

⁵ Tangua limo kapostolo Petulu uehuile Yesu ngueni: “Etu tu na seza viose na ku ku kava; vikandzo tu ka tambula?” (Mateo 19:27) Yesu ka payele Petulu omo lia ku linga eci cihula. Vunoni, Yesu ua lekele vandongesi veni ngueni tangua va ka tambula cilunguiso omo lia ku lihana cavo. Vapostolo na vakuavo vakua ku ononoka va ka sika hamo na Yesu muilu ku lutue. Vunoni Yesu ua handekele naua ngueni cipue ntsimbu ino kua kala vivezikiso: “Uose na seza zindzivo, cipue vana va naye va vamala ni va vampuevo, cipue mehia muomu lizina liange, Ikeye a ka tambula cihita ku cuma cimo ca sile, kaha a ka suana muono ka ue ku hua ua ya-ye.” (Mateo 19:29) Vandongesi va Yesu vose va hasa ku uana va ise, va naye, vamuanaye, na vandumbuavo hamo na vana mu cikungulukilo matangua ano. Mua vusunga, evi via pua vivezikiso via kama ku hiana nkala viuma vi va seza omo lia Vuangana vua Njambi.

“NGUNDZI YA MUONO UETU”

6. Omo lia vika Yehova ua kulahesa ku lunguisa vangamba veni?

⁶ Ku vueza ku vivezikiso vi tue ku tambula ntsimbu ino, tua lavelela naua ku ka tambula vivezikiso via vingi ku lutue. (1 Timoteo 4:8) Yehova ua likuminia ku lunguisa vangamba veni vakua vuoloke, kaha ku tantekeyamo ce ku tu kuasa na ku tu kolesa. Mu ku linga tua kala na vusunga nguetu Yehova “mukua ku lunguisa vaze ve ku mu lengeya,” tu hasa ku tualelelaho ku kolesa.—VaHevelu 11:6.

7. Vati lulavelelo luetu lu hasa ku pua ngue ngundzi?

⁷ Yesu mu Cimpande ceni ca ha Muncinda ua handekele ngueni: “Viukililenu na ku zolela cikumakuma: muomu cilunguiso cenu ca kama muilu: muomu mu va yandesele vapolofeto vaze va livangele ku lutue luenu.” (Mateo 5:12) Ha kati ka vangamba va Njambi, vamo tangua va ka tambula cilunguiso cavo muilu. Kaha vakuavo tangua va ka tambula cilunguiso ca muono ua ya-ye mu citungu. Ovu vua pua vusunga vukuavo vua pande ku tu lingisa ku ‘viukilila na ku zolela cikumakuma.’ (Visamo 37:11; Luka 18:30) Vunoni tu vose, lulavelelo luetu lu hasa ku pua “ngue ngundzi ya muono uetu, cikeco ca cili, ca kola vene.” (VaHevelu 6:17-20) Ngeci mua ngundzi ye ku kuatesa ndzivo linga kati i ue, lulavelelo luetu lu hasa ku tu kuasa ku kaniama. Lu hasa ku tu hana ndzili ya ku kolesa mu vieseko.

8. Mu njila ika lulavelelo luetu lu hasa ku tepuluisa ku uma mutima?

⁸ Lulavelelo luetu lu hasa ku tu kuasa tu tepulule ku uma mutima. Vikulaheso via Njambi vi hasa ku tu simpisa ku ku uma mitima, ngeci mua ku kuita vihemba haze ha na zimbi linga ha huvuluke. Ce ku kaniamesa ku tantekeya ngecize Yehova a ka tu niunga nga tu mbila viteli vietu kuli ikeye. (Visamo 55:22) Tu hasa ku kala na vusunga vua mutuntu nguetu Njambi a hasa “ku linga mua ku pulakana cikumakuma mu ku hiana viose vize vi tu ku vundila.” (Efeso 3:20) Yehova a ka tu kuasa, kati lika mu ku pulakana ni ku pulakana cikumakuma, vunoni “mua ku pulakana cikumakuma mu ku hiana viose”!

9. Vusunga vuka tua pande ku kala navuo linga tu ka tambule vivezikiso via Yahova?

⁹ Tua pande ku tsiliela mpundu muli Yehova na ku ononoka vimamuna vieni, linga tu ka tambule vivezikiso viaco. Mosesa ua lekele vaIsaleli ngueni: “Yehova a ka ku vezikisa cili vene mu cifuti cize ca li ka ku hia Yehova Njambi yove mu ku pua vusuana mu ku ci fuka, nga u takama lika ku halakana ku lizi lia Yehova Njambi yove, mu ku zangama ku linga lisiko eli liose li nji ku kusika ku litangua lia lelo. Muomu Yehova Njambi yove a ka ku vezikisa, ngue mu a na lisika nove.” (Ndeutelonomi 15:4-6) Vuno mua kala na vusunga cili-cili ngecize nga mu tualelelaho ku pangela Yehova a ka mi vezikisa ni? Mu li na vusunga vua ku lingamo.

YEHOVA UA VA LUNGUISILE

10, 11. Vati Yehova ua lunguisile Yosefe?

¹⁰ Mbimbiliya va i sonekela ku tu kuasa. Tue ku tandamo via vangamba va Njambi vakua vuoloke va ku laza na vati ua va lunguisile. (Loma 15:4) Yosefe ua puile umo uavo. Ca ku livanga, vamuanaye va mu landesele mu vundungo. Kaha mu nima ya ntsimbu, mpuevo ya kukueni ua mu vangeyele kaha va mu sokele mu kamenga ka ku Ingito. Vuno Yehova ua suvile Yosefe omo ua kele mu kamenga ni? Na limo litangua liahi! Mbimbiliya nguayo: “Vunoni Yehova ua kele na Yosefe, na ku mu muesa ngozi, na ku mu muesa kavumbi” kaha naua nguayo: “Yehova ua kele neni; na vize via lingile, Yehova ua vi vezikisile.” (Njenisisi 39:21,23) Cipue mu vintsimbu vize via vikalu, Yosefe ua muesele lukakatela mu ku lavelela muli Njambi.

¹¹ Mu mua hitile imo miaka, Falao ua tuhuile Yosefe mu kamenga, kaha uze ndungo ua ku likehesa ua hatele kuli muangana ku vukama mu Ingito yose. (Njenisisi 41:1, 37-43) Omo Yosefe na mpueyeni ua kele na vana vavali, “ua lukile lizina lia ndala Manase: Muomu, ngueni, Njambi na nji suvisa ku-fuitangana cange cose, na ndzivo yose ya tata.’ Na lizina lio uze ua mu civali ua mu lukile Efalimi: Muomu, ‘Njambi na nji imitisa mu cifuti ca lamba yange.’” (Njenisisi 41:51, 52) Yehova ua vezikisile ku ononoka ca Yosefe, kaha ua hasele ku ovola vaIsaleli na vakua Ingito ku ndzala. Kaha Yosefe ua hetele ha ku tantekeya ngecize nkuma Yehova ua kele na ku mu vezikisa.​—Njenisisi 45:5-9.

12. Vati Yesu ua hasele ku kolesa omo ua hitile mu vieseko?

¹² Yesu Kilistu neni ua tualeleleho ku ononoka Njambi mua hitile mu vieseko, kaha Yehova ua mu lunguisile. Vika via kuasele Yesu ku ononoka? Lizi lia Njambi lia lombolola ngualio: “Omo ndzolela ize i va mu hakelele ua yandelele ha . . . [citi], ua yenguile ntsoni.” (VaHevelu 12:2) Mua vusunga, Yesu ua vuile ndzolela omo ua puisilemo ku lelesa lizina lia Njambi. Kaha Yesu ua kele na cilunguiso ca cili muomu Ise ua mu lemene na ku mu hana naua vipanga via vingi via seho ya kama. Mbimbiliya nguayo ikeye “na tumama ku livoko lia cilio lia citumamo ca Njambi ca vuangana.” Va soneka naua ngecize: “Njambi naua ua mu hakele ku vukama vua ku hiana cikuma, ua mu hele lizina lize lia ku hiana mazina ose.”—Filipu 2:9.

YEHOVA KE KU SUVA VI TUE KU LINGA

13, 14. Vati Yehova ue ku ivua ku tuala ha vipanga vi tue ku mu pangela?

¹³ Tu hasa ku kala na vusunga nguetu Yehova ke ku suva viose vi tue ku mu pangela. Ue ku tu ivuisisa vuino nga ka tuesi na vusunga muli etu vavene ni tu lisosomua ha vuhasi vuetu. Ue ku tu haka seho mpundu cipue mu tue ku uma mutima omo lia vipanga ni ku niunga vakua ndzivo yetu. Kaha ue ku tu ivuisisa nga ka tu hasa naua ku mu pangela via vingi ngue mu tua lingile laza, halumo omo lia cihindu ni litima. Tu hasa ku kala na vusunga nguetu Yehova ue ku haka seho ku vuoloke vuetu cipue nga tu hita mu visoti.​—Tandenu VaHevelu 6:10, 11.

¹⁴ Vulukenu naua ngecize, Yehova ua pua “Mukua ku ivua vivundilo.” Tu hasa ku kala na vusunga nguetu omo tu vundila kuli ikeye, a ka tu halakana. (Visamo 65:2) “Ise ya vikeketima, ikeye Njambi ua ku-lembezieka cose” a ka tu hana viose vi tu tonda linga tu suene mu hiehi neni. Vintsimbu vimo a hasa ku pangesa vamuanetu mu ku vi puisamo. (2 Kolintu 1:3) Yehova ce ku mu vuisa ndzolela nga tu muesa ngozi ku vakuetu. “Uze a tetela muhutu a kumuisa kuli Yehova, Na cilinga ceni ca ku viuka a ka mu fuetaco naua.” (Visimo 19:17; Mateo 6:3, 4) Kaha nga tu muesa vuhuanga na ku kuasa vamuanetu, Yehova ue ku mona ize ngozi i tua muesa ku vakuetu ngue tua kumuisa kuli ikeye. Kaha na likuminia ku fueta ize ngozi yaco.

VILUNGUISO VIA NTSIMBU INO NA KU LUTUE

15. Vilunguiso vika mua lavelela? (Talenu cikupulo ca ku vuputukilo.)

¹⁵ Vakua Kilistu va ku vuavesa va na lavelela ku ka tambula “cilongo ca vuviuke,” cilunguiso ca ka va hana Yesu. (2 Timoteo 4:7, 8) Vunoni cipue nga lulavelelo luenu kati lua ku ya muilu, ka mua kele na seho ya indende kuli Njambi. Omo lia vika? Muomu makulukazi na makulukazi a “vampanga veka” va Yesu va lavelela na ndzolela ku yoya miaka yose ha mavu mu citungu. Navo naua “va ka viukilila mu ku-lana ca ciyulo.”​—Yoano 10:16; Visamo 37:11.

16. Ku simpa cika tu hasa ku uana ku 1 Yoano 3:19, 20?

¹⁶ Vintsimbu vimo tu hasa ku livua ngue ka tuesi na ku puisamo ku pangela Yehova ngue mu ca tondeka, ni ku takania cipue ku hona vusunga nga vi tue ku panga vie ku ya Yehova ku mutima. Halumo tu hasa ku livua ngue ka tua fuilile ku ka tambula na cimo cilunguiso. Vunoni ka tua pandele ku suva ngecize “Njambi ua hiana mitima yetu, ikeye ua tantekeya viuma viose.” (Tandenu 1 Yoano 3:19, 20.) Nga tu pangela Yehova omo lia lutsilielo na ku mu lema, tu hasa ku kala na vusunga nguetu a ka tu lunguisa, cipue nga vi tue ku mu pangela vie ku moneka ngue via seho ya indende.—Mako 12:41-44.

17. Vilunguiso vika vimo tu hasa ku tambula ku ntsimbu ino?

¹⁷ Yehova kasi ue ku vezikisa vangamba veni, cipue ku matangua ano a ku kotokela ca mavu a Satana. Ue ku linga cose mu ku tu longesa linga tu kale na mangana na ciyulo mu civunga cose ca vamuanetu. (Isaya 54:13) Mua vusunga, mezi a Yesu e ku lipuisamo, Yehova ue ku tu vezikisa ku ntsimbu ino mu ku tu hana civunga ca vamuanetu na vandumbuetu mu mavu ose. (Mako 10:29, 30) Kaha vose ve ku lengeya Njambi ve ku va lunguisa na ciyulo ca mu ntima, ndzolela, na ku viukilila.—Filipu 4:4-7.

18, 19. Vati ve ku livua vangamba va Njambi ha vilunguiso vi ve ku tambula?

¹⁸ Vangamba va Yehova mu mavu ose ve ku tambula vilunguiso via cili kuli Tatetu. Ca ku muenako, va Bianca va ku Alemanha va handekele nguavo: “Ka njesi na mezi a ku santsela Yehova, muomu ue ku nji kuasa ku visoti viange ue ku nji suena mu hiehi nkala litangua. Vutuhu mavu a li mu liuayanga. Vunoni ange nje ku panga na Yehova nkala litangua, kaha nje ku uana mukingo mu mavoko eni. Hose ha nje ku lihana vuana mu ku mu pangela, ue ku nji lundika vivezikiso via vingi-vingi.”

¹⁹ Umo Ndumbuetu Paula a li na miaka 70 ku Canada, ua vavala cikuma muongo. Ue ku handeka ngueni, vutuhu cihindu ceni ka ce ku mu tavesa ku linga via vingi, kasi a hasa ku lingako mumo mu ku ambulula. Ua handekele naua ngueni: “Nje ku ambulula mu vifua vieka vi nji hasa, ngeci mua ku pangesa fone, ni ku ambulula ca ku tulukua. Mu ku nji kuasa ku vuluka, nje ku soneka imo mikanda ya mu Mbimbiliya na mezi amo a mu mikanda yetu ha nje ku tala-tala. Kalivulu kaco nja luka nguange ‘Ka Livulu ke ku Njovola.’ Nga tu tuala mana etu ku vikulaheso via Yehova cipue nga tu zeya ci ka pua ca ntsimbu ya indende lika. Muomu Yehova ue ku tu kuasa ntsimbu yose, cipue ku soloke viose-ovio.” Halumo vitanga vienu via liseza cikuma na vize via va Bianca na va Paula. Vunoni nenu mu hasa ku singanieka ha vinjila vika Yehova ua mi lunguisa na vaze va mua kala navo. Mu ka viukilila nga mu singanieka vati Yehova ue ku mi lunguisa ku ntsimbu ino na vati a ka mi lunguisa ku lutue!

20. Vika tu hasa ku lavelela nga tu tualelelaho ku pangela Yehova na vuoloke?

²⁰ Kati mu suve ngecize mu ka tambula “cilunguiso ca kama-kama” omo lia vivundilo vienu via ku mutima. Mu hasa ku kala na vusunga ngecize, “omo mu na lingi cizango ca Njambi,” tangua “mu ka tambula litavasiano.” (VaHevelu 10:35, 36) Tu tualelenuho ku kaniamesa lutsilielo luetu na ku linga cose mu ku pangela Yehova. Tu ka kala na vusunga nguetu Yehova a ka tu lunguisa!​—Tandenu Kolose 3:23, 24.