Vati tu Hasa ku pua va ku Lela ku Meso a Njambi?

Aci singaniekenu cisemi ua mpuevo ali na ku vuahesa muaneni linga aye ku sikola. Ali na ku tala nga kanike na tana kaha na zala vuzalo vua ku kusa. Evi vie ku lingisa kanike a kale na cihindu ca cili, na ku muesa ku vantu ngecize visemi veni ve ku mu niunga vuino. Na vuno vene, Tatetu ua cilemo Yehova ua tonda tu pue va ku lela ku muvila na mu vilinga. Muomu ku pua va ku lela ce ku tu kuasa kaha ce ku lingisa vantu ku hana vumpahu kuli ikeye.

1. Vati tu hasa ku pua va ku lela ku muvila?

Yehova ua tu leka ngueni: “Enu mu ka lela.” (1 Petulu 1:16) Ku lela ci va na tumbula ca lomboloka ku lela ku muvila na ku kala na vilinga via cili. Tu hasa ku pua va ku lela ku muvila, mu ku tana ntsimbu yose, ku kusa vuzalo na mendelo kaha na ku vuahesa membo. Kaha tu hasa naua ku viukisa-viukisa Ndzivo ya Vuangana. Ku pua va ku lela ku muvila, ce ku hana vumpahu kuli Yehova.—2 Kolintu 6:3, 4.

2. Vilinga vika tua pande ku likela, mangana tu pue va ku lela?

Mbimbiliya ya tu mamuna ‘tu lilelese ku mazilo ose a ku muvila na a ku cimbembesi.’ (2 Kolintu 7:1) Ngeci mukemuo, tue ku linga cose mu ku liniunga ku viuma vi hasa ku vihisa mivila yetu na visinganieka vietu. Visinganieka vietu vie ku ya Yehova ku mutima, ngeci tue ku lihakela kapandi ka ku viana visinganieka via ku vihia. (Visamo 104:34) Kaha tue ku lihakela naua kapandi ka ku liniunga ku handekesi ya ku vihia.—Tandenu Kolose 3:8.

Vika vikuavo vi hasa ku tu lingisa ku pua va mazilo ku muvila na ku vilinga? Kua kala vimo viuma vi hasa ku vihisa mivila yetu. Ngeci mukemuo, tue ku liniunga ku viuma ngeci mua ku sipa, ku fuenia vidroga, ni vihemba vieka via ku pendesa. Mu ku viana evi, tue ku kala na cihindu ca cili na ku muesa ngecize tua haka seho ku vuana vua muono. Kaha naua tue ku lihakela kapandi ka ku kala na vilinga via ku lela, mu ku viana vilinga via mazilo, ngeci mua mututaa na ku tala via vuntselentsele. (Visamo 119:37; Efeso 5:5) Ci hasa ku pua ca cikalu ku viana evi vilinga viaco, vunoni Yehova a hasa ku tu kuasa ku vi puisamo.—Tandenu Isaya 41:13.

TANTEKEYENU VIKUAVO

3. Ku lela ku muvila ce ku hana vumpahu kuli Yehova

Mu hasa ku nongonona cifua ce ku muenamo Yehova ku lela, mu ku hilula masiko a hele vaIsaleli. Tandenu Ezundu 19:10 na 30:17-19, kaha simutuilenu ha vihula evi:

• Vika via muesa evi vinimbu ku tuala ha cifua ce ku muenamo Yehova via ku lela ku muvila?

• Vilinga vika via cili vi hasa ku mi kuasa ku pua va ku lela ku muvila?

Ku lela ku muvila ca tondeka ntsimbu na ku lihakela kapandi. Vutuhu ngoco, tu hasa ku pua va ku lela kuose okuo ku cihela ci tua kala, cipue tu vampite ni tu vihutu. Talenu VIDEO, kaha simutuilenu ha cihula ci na hatako.

VIDEO: Njambi ua Lema Vantu va ku Lela (4:10)

• Omo lia vika ku lela cetu ce ku lingisa vantu va tue ku ambuluila va hane vumpahu kuli Yehova?

4. Vulenu vilinga via ku vihia

Nga mue ku sipa ni ku pangesa vidroga, citava mu tantekeya ku kaluua ca kala ha ku likela vilinga viaco. Vika vi hasa ku kuasa? Hilulenu vati vilinga viaco vie ku kuata ku muono uenu. Tandenu Mateo 22:37-39, kaha simutuilenu ha vati ku sipa ni ku fuenia vidroga ce ku kuata  . . .

• ku vusamba vua muntu na Yehova.

• ku vavusoko vueni na vantu veka.

Lingenu vutumbe vua ku likela cilinga ca ku vihia.b Talenu VIDEO.

VIDEO: Puenu Vakua ku Lipokuesa (2:47)

Tandenu Filipu 4:13, kaha simutuilenu ha cihula eci:

• Vati ku kala na cizilila ca ku vundila, ku lilongesa Mbimbiliya na ku kunguluka vi hasa ku hana muntu ngolo ya ku vula cilinga ca ku vihia?

5. Vianenu visinganieka na vilinga via mazilo

Tandenu Kolose 3:5, kaha simutuilenu ha vihula evi:

• Vati tua tantekeya ngecize ku tala via vuntselentsele, ku lituma mizimbu ya mazilo na ku linga mututa via pua vilinga via mazilo ku meso a Yehova?

• Mu ku mona cenu, vuno Yehova ua kala na vusunga vua ku lavelela ngecize tu pue va ku lela ni? Omo lia vika?

Tantekeyenu mua ku vulila visinganieka via mazilo. Talenu VIDEO.

VIDEO: Lingenuko Mumo Linga mu Tualeleleho ku Lela (1:51)

Yesu ua tele cimo cisimo ca muesa ngecize tua pande ku lingako mumo, linga tu tualeleleho ku pua va ku lela. Tandenu Mateo 5:29, 30, kaha simutuilenu ha cihula eci:

• Aa mezi a Yesu ka a muesele ngecize tua pande ku livulumuna ku muvila mpundu, vunoni a muesa ngecize tua pande ku lingako mumo ku tuala ha vilinga via ku vihia. Vika a hasa ku linga muntu mu ku liniunga ku vilinga via mazilo?c

Nga muli na ku lihakela kapandi ka ku vula visinganieka via mazilo, tantekeyenu ngecize Yehova ua haka seho ku kapandi kenu. Tandenu Visamo 103:13, 14, kaha simutuilenu ha cihula eci:

• Nga muli na ku lihakela kapandi ka ku vula cimo cilinga ca mazilo, vati eci cinimbu ci hasa ku mi kuasa ku tualelelaho ku lihakela kapandi kaco?

Mua lumo kati mua luvali!

Nga tua uila naua mu cimo cisevuka cetu, ca casi ku singanieka nguetu: ‘Muzeni ka nji hasa naua.’ Aci singaniekenu hali evi: Mukua ku tunta mu vueho vua laha nga nau, ka ca lombolokele ngecize ka hasa naua ku vula, ni na pande ku hilukila ku vuputukilo houe. Na vuno vene, nga mu na uila naua lueka mu cisevuka cenu, kati mu singanieke ngecize ka mu hasa naua ku vula, houe. Ni ngecize kapandi kose ka mua lihakela ka nai mu ngoco houe. Mu ku vula vimo vilinga, mua kala ku sevuka vene. Ngeci mukemuo, kati mu hilukile mu nima! Na vukuasi vua Yehova mu hasa ku vula cilinga ca mazilo.

VI MU NA LILONGESA

Tue ku ya Yehova ku mutima mu ku pua va ku lela ku muvila, mu visinganieka na mu vilinga.

Mpupulule

• Omo lia vika ku pua va ku lela ca kala na seho ya kama?

• Vati mu hasa ku lela ku muvila?

• Vati mu hasa ku kala na visinganieka kaha na vilinga via ku lela?

KONKENUHO

Viuma vika via viasi mu hasa ku linga mangana mu tualeleleho ku pua va ku lela ku muvila ambe nga mua pua cihutu?

Cihindu na ku Lela—Ku Tana ku Mavoko (3:01)

Nongononenu vinanga vi mu hasa ku puisamo linga mu likele ku sipa.

“Como parar de fumar” (Despertai!, Maio de 2010)

Hilulenu ha vitanga vie ku iza mu ku tala via vuntselentsele.

“Ku Tala via Vuntselentsele—Ka ca Kele na Vitanga ni ce ku Liana?” (Vutala vua Kaniungi, 1 ya Agosto, 2013, mu putu)

Talenu vati umo yala ua likelele ku tala via vuntselentsele.

“Nja Honouele Vintsimbu via Vingi Amba Nji Hase” (Vutala vua Kaniungi No. 4 2016)