Vati ce ku Panga Cikungulukilo

Yehova ua pua Njambi ua vutongue. (1 Kolintu 14:33) Ngeci mukemuo, vantu veni navo va na pande ku pua va ku noneka vuino. Vati ce ku panga cikungulukilo ca Vakua Kilistu? Vati netu tu hasa ku lingako mutamba uetu linga cikungulukilo ci pange vuino?

1. Iya ua pua mutue ua cikungulukilo?

“Kilistu naua na pu mutue ua mbunga,” ni nguetu cikungulukilo. (Efeso 5:23) Ku tundilila muilu, Yesu ue ku tuamenena cipanga ca vangamba va Yehova mu mavu ose. Yesu ua hangula cimo civunga ca cindende ca vakuluntu va kuhia mu lutsilielo ca luka ngueni, “mukuamanda ua cili mukua mana.” Civunga caco ve ku ci sana naua nguavo, Civunga ca vantuamena. (Tandenu Mateo 24:45-47.) Ngeci mua vapostolo na vakuluntu va kele mu Yelusalema, Vakua Civunga ca Vantuamena ve ku tuamenena vikungulukilo mu mavu ose. (Vilinga 15:2) Vunoni ava vamuanetu, ka va puile vavene lukungulukilo. Ve ku tonda ku tuamenena ca Yehova mu ku tanda Mbimbiliya, kaha na ku ononoka Yesu, mu ku pua mutue ua vikungulukilo.

2. Vipanga vika ve ku linga vakuluntu?

Vakuluntu va pua Vakua Kilistu va vamala va kuhia mu lutsilielo. ve ku longesa Mbimbiliya vangamba va Njambi, ku va kuasa, kaha na ku va kaniamesa. Ka ve ku va fueta omo lia vipanga vi ve ku linga. Vakuluntu va lema ku pangela Njambi “kati muomu nganio ya ku pihia, vunoni na cizango ca ku viuka.” (1 Petulu 5:1, 2) Vakuluntu ve ku va kuasa kuli vakua ku kuasa vipanga, kaha mu nima ya ntsimbu navo ve ku heta ha ku pua vakuluntu.

Vakua Civunga ca Vantuamena ve ku hangula vamo vakuluntu ku pua tuniungi va ku zinguluka. Tuniungi vaco, ve ku meneka vikungulukilo, mu ku vi hana vimamuna na ku vi kaniamesa. Kaha ve ku hangula vakuluntu na vakua ku kuasa vipanga, vaze va na puisamo vinanga vi ya noneka Mbimbiliya.—1 Timoteo 3:1-10, 12; Tito 1:5-9.

3. Vipanga vika ue ku linga nkala Mukaleho?

Vose mu cikungulukilo, ve ku ‘sangala lizina lia Yehova’ mu ku kumbulula, ku hana vimpande, ku linga vimueso na ku imba ku viuano. Kaha na ku ambulula.—Tandenu Visamo 148:12, 13.

TANTEKEYENU VIKUAVO

4. Yesu ua pua ntuamena ua ngozi

Yesu ua tu linga cilanio ce ku tuya ku mutima. Tandenu Mateo 11:28-30, kaha simutuilenu ha cihula eci:

• Yesu ua tonda tu livue vati omo tu kava ku tuamenena ceni?

VIDEO: Vukuasi vu va Hele Vakuluntu ku Nepal mu kua Hitile Lindunduma (4:56)

Mbimbiliya ya longesa ha toma vati vakuluntu va na pande ku linga vipanga viavo.

Tandenu Isaya 32:2 na 1 Petulu 5:1-3, kaha simutuilenu ha vihula evi:

• Vati muli na ku livua ku mutima mu ku tantekeya ngecize vakuluntu ve ku tambuluisa Yesu mu ku muesa ngozi ku vampanga?

• Mu vinjila vika vikuavo vakuluntu ve ku tambuluisa Yesu?

5. Vakuluntu ve ku longesa ku hitila mu lungano luavo

VIDEO: Vakuluntu ve ku Tuamenena! (7:39)

Yesu ua seza citambuluiso ci va pande ku kava vaze ve ku tuamenena. Tandenu Mateo 23:8-12, kaha simutuilenu ha cihula eci:

• Vika via mi komouesa ku tuala ha ku litepa ca vitume via mu Mbimbiliya vi ve ku kava vakuluntu, na vize vi ve ku linga vakuluntu va malombelo?

1. Vakuluntu ve ku niunga na ku kaniamesa lutsilielo luavo na lua vavusoko vuavo

2. Vakuluntu ve ku niunga vose mu cikungulukilo

3. Vakuluntu ve ku ambulula ku sua kumo

4. Vakuluntu va pua valongisi. Vunoni ve ku kuasa naua ku vipanga via ku komba na vikuavo

6. Tu hasa ku pangela hamo na vakuluntu

Mbimbiliya ya tu hana vusunga vua kama vua pande ku tu lingisa ku pangela hamo na vakuluntu. Tandenu VaHevelu 13:17, kaha simutuilenu ha vihula evi:

• Vuno ca pua ca cili Mbimbiliya ku tu kaniamesa ku ononoka na ku lihaka muintsi lia vaze ve ku tu tuamenena ni? Nga nguenu ‘ca cili,’ omo lia vika? Nga naua ‘houe’, omo lia vika?

Tandenu Luka 16:10, kaha simutuilenu ha cihula eci:

• Vika ca puila ca seho ku ononoka vakuluntu, ambe mu tu viuma tue ku soloka ngue tua tundende?

VI MU NA LI LONGESA

Yesu ikeye mutue ua vikungulukilo. Tua lema ku pangela hamo na vakuluntu, muomu ve ku kava ku tuamenena ca Yesu, kaha ve ku tu kaniamesa na ku tu longesa ku hitila mu malungano avo.

Mpupulule

• Iya ua pua mutue ua cikungulukilo?

• Vati vakuluntu ve ku kuasa cikungulukilo?

• Vipanga vika ua kala navio nkala ngamba ya Yehova?

KONKENUHO

Talenu vukaleho vua muesa seho i va haka Vakua Civunga ca Vantuamena na vakuluntu ku vamuanaye mu lutsilielo.

Ku Kaniamesa Vamuanaye mu Ntsimbu ya Vusonde

Tantekeyenu vipanga vi ve ku linga tuniungi va ku zinguluka.

Ku pua Kaniungi ua ku Zinguluka ku Membo (4:51)

Tantekeyenu vipanga via seho vi ve ku linga vampuevo mu cikungulukilo.

“Vuno Vakaleho va Yehova va Vampuevo Navo Citava va pue Vakua ku Ambulula Ni?” (Vutala vua Kaniungi, 1 ya Setembro ya 2012, mu putu)

Tantekeyenu kapandi ka ve ku lihakela vakuluntu mu ku kaniamesa vamuanaye.

“Anciãos cristãos—‘colaboradores para a nossa alegria’” (A Sentinela, 15 de Janeiro de 2013)