Vuangana vua Njambi vua pua Vika?

Vuangana vua Njambi cikeco cimpande ca seho ya kama ci ya handeka Mbimbiliya. Yehova a ka pangesa Vuangana vueni mu ku puisamo vutumbe vueni vua katete ku tuala ha mavu. Vuno Vuangana vuaco, vua pua vika? Vati tua tantekeya ngecize Vuangana vuaco vuli na ku sika mu ntsimbu ino? Vika vu na puisamo laza? Kaha vika vu ka linga ku lutue? Cino cilongesa na vikuavo vivali vi na hatako, vi ka kumbulula vihula evi.

1. Vuangana vua Njambi vua pua vuka, kaha iya ua pua Muangana uavo?

Vuangana vua Njambi vua pua nguvulu ya tumbika Yehova Njambi muilu. Kaha Muangana uavuo ua pua Yesu Kilistu. (Mateo 4:17; Yoano 18:36) Mbimbiliya ya handeka ku tuala hali Yesu nguayo: “A ka sika . . . ku miaka yose ya ya-ye.” (Luka 1:32, 33) Mu ku pua Muangana ua Vuangana vua Njambi, Yesu a ka sika mavu ose.

2. Veya va ka sika na Yesu?

Yesu ka ka siki lika lieni. “Vantu va ku miyati yose, na malimi ose na vantu vose, na vifuti viose, . . . va ka suana ha mavu.” (Ku-Solola 5:9, 10) Vangahi va ka sika na Kilistu? Tunde hezilile Yesu hano ha mavu, makulukazi na makulukazi a vantu ve ku mu kava na ku pua Mukua Kilistu. Vunoni vantu va ku pua 144.000, vakevo lika va kaya muli mu ku sika hamo na Yesu. (Tandenu Ku-Solola 14:1-4.) Cingi ca Vakua Kilistu vose va ka kala ha mavu kaha va ka va sika ku Vuangana vua Njambi.—Visamo 37:29.

3. Vati Vuangana vua Njambi vua hiana mavuangana a vantu?

Cipue nga vamiangana va mavu va tonda ku linga via cili, ka va hasa ku vi puisamo, muomu ka va kele na ngolo ya ku linga muose mu nayi cizango cavo. Kaha cikuavo naua, mu nima ya ntsimbu, ve ku va hinga ku vamiangana veka vaze ka va kele na cizango ca ku kuasa vantu. Vunoni Muangana ua Vuangana vua Njambi, Yesu, ka va ka mu hingi kuli muangana ueka. Njambi ua “tumbika vuangana vumosi vuntsa ka va kenieka.” (Ndaniele 2:44) Yesu a ka sika mavu ose kaha ka ka muesa kahanga. Ua kala na cilemo, ngozi na vuoloke. Kaha a ka longesa vantu ku limuesa evi vifua viaco umo na mukuavo.—Tandenu Isaya 11:9.

4. Vuangana vua ngolo vu ka sika mavu ose

Ka kua kele muangana ueka ua hiana Yesu Kilistu ku ngolo. Tandenu Mateo 28:18, kaha simutuilenu ha cihula eci:

• Mu njila ika ngolo ya kala nayo Yesu, ya hiana nkala muangana ua ha mavu?

Mavuangana a vantu eku aluluka ku sua kumo, kaha naua nkala vuangana vue ku sika lika umo mutamba ua mavu. Amba Vuangana vua Njambi co? Tandenu Ndaniele 7:14, kaha simutuilenu ha vihula evi:

• Vika ca puila ca cili ku tantekeya ngecize Vuangana vua Njambi ka va ka vu enieka?

• Vika ca puila ca cili ku tantekeya ngecize Vuangana vua Njambi vu ka sika mavu ose?

5. Mavuangana a vantu a tondeka ku a tundisako

Omo lia vika Vuangana vua Njambi vua pande ku hinga mu cihela ca mavuangana a vantu? Talenu VIDEO, kaha simutuilenu ha vihula vi na hatako.

VIDEO: Vika Vuangana vua Njambi?​—Mutamba ua Video (1:41)

• Vika vieza mu ku sika ca vantu?

Tandenu Ekelesiaste 8:9, kaha simutuilenu ha vihula evi:

• Mu ku mona cenu, vuno mavuangana a vantu a tondeka ku a hinga ku Vuangana vua Njambi ni? Omo lia vika?

6. Vuangana vua Njambi vua kala na vamiangana ve ku tu ivuisisa

Mu ku linga Muangana uetu Yesu, neni ua puileho muntu, a “hasa ku tu tetela ku ku zeya cetu.” (VaHevelu 4:15) Cikuavo naua, vamala na vampuevo va ku pua 144.000 va ka sika na Yesu, Yehova ua va hangula “ku miyati yose, na malimi ose na vantu vose, na vifuti viose.” —Ku-Solola 5:9.

• Vuno ce ku mi lembezieka ku tantekeya ngecize Yesu na vaze va ka sika neni, va tantekeya muono ua vuntu ni? Omo lia vika?

7. Vuangana vua Njambi vua kala na masiko a ku hiana

Vanguvulu ve ku tumbika masiko na vutumbe vua ku kuasa na ku niunga vantu vavo. Vuangana vua Njambi, navuo vua kala na masiko a va na pande ku kava vantu vavuo. Tandenu 1 Kolintu 6:9-11, kaha simutuilenu ha vihula evi:

• Mu ku mona cenu, vati a ka fua mavu omo vantu vose va ka kava masiko a Njambi?a

• Mu ku mona cenu, vuno Yehova ua kala na mpoko ya ku lavelela ngecize vantu va kala muintsi lia ku sika ca Vuangana vueni, va niunge masiko avuo ni? Omo lia vika?

• Vika via muesa ngecize vantu ka ve ku ononoka masiko aco, citava va aluluke?—Talenu cinimbu 11.

VI MU NA LILONGESA

Vuangana vua Njambi, vua pua nguvulu mpundu ya kala muilu kaha i ka sika mavu ose.

Mpupulule

• Veya va ka sika mu Vuangana vua Njambi?

• Vati Vuangana vua Njambi vua hiana mavuangana a vantu?

• Tumbulenu vimo viuma via lavelela Yehova ku vantu va vu ka sika Vuangana vueni.

KONKENUHO

Hilulenu vika ua longesele Yesu ku cihela ci vua kala Vuangana vua Njambi.

“Vuno Vuangana vua Njambi vua Kala mu Mutima Uenu Ni?” (Cimpande ca mu saiti)

Omo lia vika Vakaleho va Yehova ve ku hangula ku hakuila Vuangana vua Njambi ku hiana mavuangana a vantu?

Va Likundika ku Vuangana vua Njambi (1:43)

Hilulenu vi ya handeka Mbimbiliya ku tuala ha vantu 144.000, va hangula Yehova mu ku sika na Yesu.

“Veya ve Kuya Muilu?” (Cimpande ca mu saiti)

Vika via hele vusunga kuli umo mpuevo ua kele mu kamenga, ngecize Vuangana vua Njambi vu hasa ku neha vuoloke ha mavu?

“Minha busca por um mundo sem injustiça” (Despertai! Novembro de 2011, mu putu)