Vati ku Lemesa Cetu ci Hasa Kuya Njambi ku Mutima?

Ngue mu tu na muene mu cilongesa ci na hiti, kati malombelo ose e kuya Njambi ku mutima. Vunoni, tu hasa ku lemesa Sakatanga uetu mu njila i mu vuisa ndzolela. “Ku-lemesa [ni vulombelo]” vua cifua cika vue ku muya ku mutima? (Tiango 1:27) Tu hilulenu vi ya longesa Mbimbiliya.

1. Vika via pande ku pua luvula lua ku lemesa cetu?

Mbimbiliya ikeyo ya pande ku pua luvula lua ku lemesa cetu. Yesu ua handekele na Ise ngueni: “Lizi liove likelio vusunga.” (Yoano 17:17) Amo malombelo eku sembulula vusunga vua mu Lizi lia huimina Njambi, Mbimbiliya. Kaha mu cihela cavuo ve ku hingisamo visemua via vantu. Vunoni Yehova ua zinda vaze ve ku sembulula “lisiko lia Njambi.” (Tandenu Mako 7:9.) Vunoni tue ku vuisa Njambi ndzolela nga tu puisa Mbimbiliya luvula lua ku lemesa cetu na ku kava vimamuna viayo.

2. Vati tua pande ku lemesa Yehova?

Mu ku pua Sakatanga uetu, Yehova ikeye lika tua pande ku lemesa. (Ku-Solola 4:11) Eci ca lomboloka ngecize tua pande ku mu lema na ku lemesa lika ikeye ca ku hona ku pangesa tumponia ni nkala viuma vieka.—Tandenu Isaya 42:8.

Ku lemesa cetu ca pande ku pua ca “ku lela” kaha ca “lema Njambi.” (Loma 12:1) Eci ca lomboloka ngecize tua pande ku yoya muaya vitume vieni. Ca ku muenako, vaze va lema Yehova va lema vitume vieni ku tuala ha vulo, kaha ve ku vi kava. Cikuavo naua ve ku viana vilinga via ku vihia, ngeci mua ku sipa, ku fuenia vidroga, ni ku penda.a

3. Omo lia vika tua pande ku lemesa Yehova hamo lika na vakuetu?

Viuano vi tue ku kala navio nkala simano, vie ku tu hana vukovelelo vua ku ‘sangaziala Yehova mu cikungulukilo.’ (Visamo 111:1, 2) Imo njila i tue ku puisilamo evi, ya pua mu ku imbila Njambi. (Tandenu Visamo 104:33.) Yehova ua tonda tu pue na ku kunguluka muomu ua tu lema, kaha a tantekeya ngecize viuano vi ka tu kuasa ku tambula muono ua ya-ye. Cikuavo naua, ku viuano tue ku likaniamesa umo na mukuavo.

TANTEKEYENU VIKUAVO

4. Ka tua pandele ku pangesa tumponia mu ku lemesa cetu

VIDEO: Vuno Njambi ua tava ku Pangesa Tumponia mu ku mu Lemesa ni? (3:26)

• Vika via solokele ku nima omo vamo vangamba va Njambi vesekele ku mu lemesa na tumponia?

Kua kala vamo ve ku pangesa tumponia mu ku seteka ku lemesa Njambi, nguavo muomu ce ku va kuasa ku livua mu hiehi neni. Vunoni ku lingamo ce ku mu sondolola. Tandenu Ezundu 20:4-6 na Visamo 106:35, 36, kaha simutuilenu ha vihula evi:

• Viuma vika ve ku pangesa vantu mu ku lemesa vi mua monaho laza?

• Vati Yehova ue ku livua ku mutima ku tuala ha ku mu lemesa na tumponia?

• Vati mue ku livua ku tuala ha ku lemesa Njambi ku hitila mu tumponia?

5. Ku lemesa lika Yehova ce ku tu patula ku vilongesa via makuli

VIDEO: Vusunga vua Nji Patula (5:16)

Tandenu Visamo 91:14, kaha simutuilenu ha cihula eci:

• Vika ua kulahesa ku tu lingila Yehova nga tu muesa ngecize tua lema lika ikeye kaha ikeye lika tue ku lemesa?

6. Tue ku lemesa Njambi ku viuano

Tue ku sangaziala Yehova na ku likaniamesa umo na mukuavo mu kuimba na ku kumbulula ku viuano. Tandenu Visamo 22:22, kaha simutuilenu ha vihula evi:

• Mua lema ku ivua vantu va kumbulula ku viuano ni?

• Nenu mu tonda ku liviukisila linga mu ka hane cikumbululo ni?

7. Tue ku vuisa Yehova ndzolela nga tu lekako vakuetu vize vi tue ku lilongesa

Kua kala vinjila via vingi vi tu hasa ku pangesa mu ku lekako vakuetu muzimbu ua mu Mbimbiliya. Tandenu Visamo 9:1 na 34:1, kaha simutuilenu ha cihula eci:

• Vika mua lilongesa mu Mbimbiliya vi mu tonda ku ka lekako umo mukuenu?

VI MU NA LILONGESA

Tue kuya Sakatanga uetu ku mutima nga tu lemesa lika ikeye, tu mu sangaziala ku viuano, kaha na ku lekako vakuetu vi tue ku lilongesa.

Mpupulule

• Kulihi tu hasa ku uana mizimbu ya lombolola mua ku lemesela Njambi mu njila ya muya ku mutima?

• Omo lia vika tua pande ku lemesa lika Yehova?

• Omo lia vika tua pande ku lemesa Njambi hamo lika na vakuetu?

KONKENUHO

Mu muzimbu “Ka nje ku Lemesa Naua Tumponia” tantekeyenu vati umo mpuevo ua putukile ku ku lemesa tumponia.

“Mbimbiliya ye ku Alulula Miono ya vantu” (A Sentinela, 1 de Julho 2011)

Tantekeyenu vi hasa ku mi kuasa ku kumbulula ku viuano.

“Sangazialenu Yehova mu Cikungulukilo” (Vutala vua Kaniungi, Janeiro ya 2019)

Talenu vati umo mukuendze ua uanene vukuasi mu ku kunguluka vutuhu ka ca mu puililile ca casi ku lingamo.

Yehova ue ku Nji Kuasa (3:07)

Vavengi ve ku handeka nguavo, cilindakano cemanena Vakua Kilistu. Vuno tua pande mpundu ku ci pangesa mu ku lemesa ni?

“Omo lia Vika Vakaleho va Yehova ka ve ku Pangesa Cilindakano mu ku Lemesa Cavo?” (Cimpande ca mu saiti)