CILONGESA 10
Vati Viuano via Vakaleho va Yehova vi Hasa ku mi Kuasa?
Va mi laniaho laza ku cimo ciuano ca Vakaleho va Yehova ni? Nga kanda mu ci kunguluke netu, mu hasa ku lisosomua kamandende kuyako lua katete. Halumo mu hasa ku lihula nguenu: ‘Vati vie kuenda viuano viaco? Vuno via kala na seho ni? Vika nja pande ku ilako?’ Mu cilongesa cino, mu tantekeya vati ku likungulula ci hasa ku kaniamesa vusamba vuenu na Njambi na ku mi kuasa mpundu mu muono.
1. Seho ika ya kama ya kala ha ku likungulula?
Umo mukua ku soneka Mbimbiliya, ua muesele seho ya kama ya kala ha ku likungulula. Ua handekele ngueni: “Mu zimbunga nji ka sangaziala Yehova.” (Visamo 26:12) Na vuno vene, Vakaleho va Yehova ve ku ivua ndzolela ya kama mu ku likungulula. Mu mavu ose, ve ku lemesa Njambi mu ku mu sangaziala, ku muimbila na ku vundila. Kaha vintsimbu vimo ve ku likungulula ku viuano via kama mu ku lemesa.
2. Vika mu ka lilongesa ku viuano vietu?
Ku viuano tue ku tuala mana ku Lizi lia Njambi, mu ‘ku lilangulula, linga vantu vevuisise vize via ku tanda.’ (Tandenu Nehemiya 8:8.) Mu ku kunguluka mu ka lilongesa via Yehova na vifua vieni via ku komouesa. Kaha omo mu ka tantekeya cilemo ca kama ca kala naco kuli yenu, mu kevua cizango ca ku likuata neni vusamba. Mu ka tantekeya naua vati a hasa ku mi kuasa linga mu kale na muono ua ndzolela.—Isaya 48:17, 18.
3. Vati ku likata na vakuenu ku viuano ci hasa ku mi kuasa?
Yehova ua tu sika ku liyongola “ha kati ketu linga tu sangumuke cilemo na vipanga via ku viuka; kati tu likele ku likunguluila hamo.” (VaHevelu 10:24, 25) Ku viuano vietu, mu ka tantekeya vantu va lihaka seho ya vusunga umo na mukuavo. Kaha va lema ku lilongesa via Njambi ngeci muenu. Mu ka vevua va likaniamesa umo na mukuavo na mezi a mu Mbimbiliya. (Tandenu Loma 1:11, 12.) Mu ka hasa naua ku simutuila na vantu va hasele ku lua na visoti via mu vuzike na mu malo. Ovu vu napu vumo vusunga vua vundende lika vua tondela Yehova ngecize tu pue na ku likungulula.
TANTEKEYENU VIKUAVO
Vati via fua viuano via Vakaleho va Yehova, kaha omo lia vika ca puila ca seho ku lihakela kapandi ka kuyako.
4. Viuano via Vakaleho va Yehova
Vakua Kilistu va ku livanga, va kele na ku likungulula ku sua kumo mu ku lemesa Yehova. (Loma 16:3-5) Tandenu Kolose 3:16, kaha kumbululenu eci cihula:
Vati Vakua Kilistu va ku livanga va kele na ku lemesa Yehova?
Lelo lino, Vakaleho va Yehova navo ve ku likungulula ku sua kumo ku vihela viavo via ku lemesela. Linga mu mone vati vie ku enda viuano viavo, talenu VIDEO. Mu nima yaco talenu cikupulo ca cimo ciuano cetu na ku simutuila ha cihula ci na hatako.
Ku litombola cika mua mono ku tuala ha viuma vie ku hita mu Ndzivo ya Vuangana na mezi a ku Kolose 3:16?
Vuno mu na mono vimo viuma vikuavo mu video ni ha cikupulo, vi na miyi ku mutima ku tuala ha viuano vietu ni?
Tandenu 2 Kolintu 9:7, kaha simutuilenu ha cihula eci:
Omo lia vika Viuano via Vakaleho va Yehova via pua via vuana?
Hamo lika na mulongisi uenu hilulenu ha vilongesa vi ka kala ku ciuano ci na hatako ca ino simano.
Mu ku mona cenu, mutamba uka u ka mi tovala cikuma ni ku mi kuasa?
Mua vi tantekeyele ni?
Mu saiti jw.org, mu hasa ku uanamo mizimbu ku tuala ha vihela na ntsimbu ya viuano vietu mu mavu ose.
Ku viuano vietu kue ku kala vimpande, vimueso na vivideo. Viuano vietu vie ku putuka na muaso na civundilo
Kua kala imo mitamba ya ciuano i ve ku tavesa vantu vali mu mbunga va kumbulule
Uose a tonda, citava ayeko—vamala, vampuevo, kaha vakuluntu na vanike
Viuano vietu via pua via vuana. Vakaleho va Yehova ka ve ku vundila vimbongo mu ku kovela ni ku hitisa cikasa ca vimbongo mu mbunga, houe
5. Ku kunguluka ca tondeka ku lihakela kapandi
Aci hilulenu ha vusoko vua Yosefe, ise ya Yesu. Linga va hase kuya ku ciuano ca nkala muaka va pandele kuenda kampe 100 km muaya mincinda ku tunda ku Nazaleta na ku Yelusalema. Tandenu Luka 2:39-42, kaha simutuilenu ha vihula evi:
Mu ku mona cenu, ca puile ca casi ku ka heta ku Yelusalema ni?
Omo lia vika halumo nenu mu ka tondeka ku lihakela kapandi linga muye ku viuano?
Mu ku mona cenu, vuno ca pua ca seho ku lihakela kapandi kaco ni? Omo lia vika?
Mbimbiliya ya muesa ngecize ku likungulula mu ku lemesa ca pua ca seho ya kama. Tandenu VaHevelu 10:24, 25, kaha simutuilenu ha cihula eci:
Omo lia vika mua pande ku kunguluka ntsimbu yose?
VAMO VE KU HANDEKA NGUAVO: “Cipue nga ka ue ku kunguluka vitanga viahi. Ca kama lika nga ue ku tanda Mbimbiliya.”
Cinimbu cika ni muzimbu uka ua mu Mbimbiliya ua muesa via tonda Yehova?
VI MU NA LILONGESA
Ku kunguluka ci ka mi kuasa ku lilongesa via vingi ku tuala hali Yehova, ci ka kaniamesa vusamba vuenu neni, na ku mi hana vukovelelo vua ku mu lemesa hamo lika na vakuenu.
Mpupulule
Omo lia vika Yehova ua tu kaniamesa tu pue na ku likungulula?
Vika mu ka lilongesa ku viuano via Vakaleho va Yehova?
Mu ku mona cenu, vukuasi vuka vukuavo mu ka hasa ku uana ku viuano vietu?
KONKENUHO
Vati nga ka mue ku livua ku zituka kuya ku viuano vietu? Talenu via umo yala ua livuile ngoco, vunoni mu nima ya ntsimbu ua putukile ku lema viuano.
Talenu via lingisile umo mukuendze ku lema viuano, na vika ua lingile mangana a tualeleleho ku kunguluka.
Tantekeyenu vati ve ku livua vakuenu ku tuala ha ku kunguluka.
“Vika nja Pande ku ila ku Viuano via ku Ndzivo ya Vuangana?” (Cimpande ca mu saiti)
Tantekeyenu vati muono ua umo mbanditu ua alulukile mu nima ya ku kunguluka ku viuano via Vakaleho va Yehova.
“Eu nunca saía sem a minha arma” (A Sentinela de 1 de Julho de 2014)