CILONGESA 55
Puenu na ku Kuasa Cikungulukilo
Mu mavu ose, makulukazi na makulukazi a vantu ve ku lemesa Yehova na Ndzolela mu vikungulukilo via vingi. Ve ku santsela mua kama ku vimamuna na ku ku tuamenena ci ve ku tambula, kaha ve ku kuasa cikungulukilo mu vinjila via vingi. Nenu mukemuo mu mua tonda ku linga ni?
1. Mu vinjila vika mu hasa ku pangesa ntsimbu na ngolo yenu mu ku kuasa cikungulukilo?
Tu vose, tua kala na viuma vi tu hasa ku linga mu ku kuasa cikungulukilo. Ca ku muenako, vuno mu cikungulukilo cenu mua kala tusinakazi cipue vakua vitanga via cihindu ni? Nga mukemuo, vuno citava mu pue na ku va va kuasa-kuasako kuya ku viuano ni? Ni ku va kuasa ku vimo viuma via tondeka ngeci mua ku va kuasa ku landako vimo, ni ku va kuasa na vipanga via ha ndzivo ni? (Tandenu Tiango 1:27.) Cikuavo naua, tu hasa ku lihana ku ku komba na ku viukisa Ndzivo ya Vuangana. Ku linga evi, ka ca puile ku ntsindiye. Vunoni cilemo cetu kuli Njambi na kuli vamuanetu, cikeco ce ku tu lingisa ku ‘lihana ku cizango cetu.’—Visamo 110:3.
Kuli vinjila vikuavo naua vi va hasa ku kuaselamo vamuanetu va ku mbatiza. Vaze va na puisamo vinanga vi ya handeka Mbimbiliya, va hasa ku pua vakua ku kuasa vipanga. Kaha mu nima ya ntsimbu, vakuluntu mu cikungulukilo. Vamuanetu na vandumbuetu vose, va hasa ku kuasa ku cipanga ca ku ambulula mu ku pua vapioneiro. Vakaleho vakuavo co, va hasa ku kuasa ku tunga vindzivo vi tue ku lemesela, ni ku nungulukila ku vihela kue ku tondeka vukuasi vua ku liseza-seza.
2. Vati tu hasa ku pangesa vikuata vietu mu ku kuasa vikungulukilo?
Tu hasa ku “Singimika Yehova na vikuata [vietu].” (Visimo 3:9) Mua vusunga, ca pua ku vezika ca kama kuli yetu, ku lambula vimbongo na vikuata vikuavo vi tua kala navio mu ku kuasa cikungulukilo na cipanga ca ku ambulula mu mavu ose. (Tandenu 2 Kolintu 9:7.) Milambu yetu ye ku kuasa naua vakua ku ovoka ku viyovo via mavu. Vavengi ve ku tulika kamo ku sua kumo, linga va ka ka hane ku pua milambu. (Tandenu 1 Kolintu 16:2.) Tu hasa ku hana milambu yetu ku hitila mu vikasa vie ku kala ku vihela vi tue ku lemesela, ni mu saiti donate.jw.org. Yehova ua tu hana vukovelelo vua ku muesa cilemo cetu kuli ikeye, ku hitila mu vikuata vietu.
TANTEKEYENU VIKUAVO
Tantekeyenu vimo vinjila vi mu hasa ku kuaselamo cikungulukilo.
3. Tu hasa ku pangesa vikuata vietu
Yehova na Yesu, va lema mukua ku hana na ndzolela. Ca ku muenako, Yesu ua sangalele umo ntuluue ua hanene mulambu, vutuhu ua puile cihutu. Tandenu Luka 21:1-4, kaha simutuilenu ha vihula evi:
Vuno tua pande ku hana milambu ya ingi amba tuye Yehova ku mutima ni?
Vati Yehova na Yesu ve ku livua ku mitima ku tuala ha milambu i tue ku hana na mutima uose?
Linga mu tantekeye vati ve ku pangesa milambu yetu, talenu VIDEO. Kaha simutuilenu ha cihula ci na hatako.
Vati ve ku pangesa milambu mu ku kuasa vikungulukilo mu mavu ose?
4. Tu hasa ku lihana ku vipanga via ku kuasa
Ku ntsimbu i va kele na ku soneka Mbimbiliya, vangamba va Yehova va kele na ku panga na ntuima mu ku niunga vihela vi va kele na ku lemesela. Kaha vuana vu va kele na ku hana ka vua puile lika vimbongo. Tandenu 2 Mizimbu 34:9-11, kaha simutuilenu ha cihula eci:
Vati nkala kaIsaleli ua niungile ndzivo ya Yehova, ni nguetu, cihela ca ku lemesela?
Linga mu mone vati Vakaleho va Yehova ve ku kava olu lungano lua ku laza, talenu VIDEO. Kaha simutuilenu ha vihula vi na hatako.
Vika ca puila ca seho ku lelesa Ndzivo ya Vuangana na ku i viukisa ntsimbu yose?
Mu vinjila vika mu hasa ku kuasa?
5. Vamuanetu va hasa ku lihakela kapandi ka ku tambula viteli vikuavo
Mbimbiliya ya kaniamesa vamuanetu va vamala ku lihakela kapandi ka ku tambula viteli, linga va hase ku kuasa vikungulukilo. Linga mu mone cimo cimueso, talenu VIDEO. Kaha kumbululenu cihula ci na hatako.
Mu video, kapandi kaka ua lihakelele Ryan, mu ku tambula viteli linga a hase ku kuasa cikungulukilo mu vutuntu?
Mbimbiliya ya lombolola vinanga vi va na pande ku puisamo vamuanetu va pua vakua ku kuasa vipanga na vakuluntu. Tandenu 1 Timoteo 3:1-13, kaha simutuilenu ha vihula evi:
Vika va na pande ku puisamo vamuanetu va tonda ku pua vakua ku kuasa vipanga na vakuluntu?
Vati a na pande ku pua masoko avo?—Talenu vinimbu 4 na 11.
Nga vamuanetu va lihakela kapandi ka ku puisamo evi vinanga, vati ku lingamo ce ku kuasa cikungulukilo?
VAMO VE KU HULA NGUAVO: “Vati Vakaleho va Yehova ve ku fuetela vipanga viavo?”
Vati mu kumbulula?
VI MU NA LILONGESA
Yehova ue ku santsela mua kama ku kapandi ka tue ku lihakela mu ku pangesa ntsimbu yetu, ngolo kaha na vikuata vietu mu ku kuasa cikungulukilo.
Mpupulule
Vati tu hasa ku pangesa ntsimbu na ngolo yetu mu ku kuasa cikungulukilo?
Vati tu hasa ku pangesa vikuata vietu mu ku kuasa cikungulukilo?
Mu vinjila vika mu tonda ku kuasa cikungulukilo?
KONKENUHO
Tantekeyenu omo lia vika Njambi ka tondele naua vangamba veni vapue na ku hana cimo ku likumi.
“Vika ya Handeka Mbimbiliya ku Tuala ha ku Hana Cimo ku Likumi?” (Cimpande ca mu saiti)
Mbimbiliya ya kundika vimo viteli ku vamala va ku mbatiza. Vatico nga vamala vahi, vati vampuevo va kasa ku vi puisamo?
“Ivuisisenu Vati va Tumbika ku Tuamenena mu Cikungulukilo” (Vutala vua Kaniungi, Fevereiro ya 2021)
Tantekeyenu vamo Vakaleho va Yehova va ku simpa ve ku lihakela kapandi ka kama ka ku tualela vamuanaye mikanda yetu.
Tantekeyenu vati cifua ci tue ku fuetelamo cipanga cetu ca litepa na ca malombelo eka.