CILONGESA 30
Vantu va mua Lema Vatsa va ka Yoya Naua!
Kutsa, ce ku koka viniengo na vusiua vua kama. Ngeci mukemuo Mbimbiliya ya ci luka nguayo citozi. (1 Kolintu 15:26) Mu cilongesa 27, mua lilongesele ngecize Yehova tangua a ka vula ou citozi uaco. Amba co vaze va-tsa laza? Mu cilongesa cino mu lilongesa via cikulaheso cikuavo ca Yehova ca ku komouesa. Cikulaheso cika? Cisangukilo. Yehova a ka sangula makulukazi na makulukazi a vantu va-tsa linga va ka yoye ku miaka yose. Vuno vi ka lipuisamo ni? Vuno vantu va ka sanguka va ka yoyela muilu ni hano ha mavu?
1. Vika Yehova a tonda ku lingila vantu va tua lema vatsa?
Yehova ua tonda mua kama ku sangula vatsi. Yombi umo yala ua lutsilielo, ua kele na vusunga ngecize nga a tsa Yehova a ka mu sangula. Ngeci ua lekele ngueni: “Nga ua sana, kaha nga nja ku tava, [ku tundilila mu mbumbo].”—Tandenu Yombi 14:13-15.
2. Vati tua tantekeya ngecize vatsi citava ku va sangula?
Yesu mua kele ha mavu, Njambi ua mu hele ngolo ya ku sangula vatsi. Yesu ua sanguile umo kanike ua mpuevo ua miaka 12, na muana ua umo ntuluue. (Mako 5:41, 42; Luka 7:12-15) Mu nima ya ntsimbu, Lazalu, umo kavusamba ka Yesu, ua tsile. Kaha vutuhu tele mu na hiti matangua auana tunde ha va tsindilile Lazalu, Yesu ua mu sanguile. Mu nima ya ku vundila kuli Njambi, Yesu ua tambakanene lika ngueni: “Lazalu, tuhuka” kaha “mutsi ua tuhukile.” (Yoano 11:43, 44) Singaniekenu ha ndzolela i va vuile vavusoko na vavusamba va Lazalu.
3. Vuno citava mu kale na lulavelelo lua ku ka mona vantu va mua lema va-tsa ni?
Mbimbiliya ya kulahesa nguayo: “Ku ka kala cisangukilo.” (Vilinga 24:15) Vantu va sanguile Yesu ku laza ka va ile muilu. (Yoano 3:13) Vunoni va vuile ndzolela ya ku yoyela lueka naua hano ha mavu. Na vuno vene, makulukazi na makulukazi a vantu va a ka sangula Yesu, va ka yoyela mu citungu hano ha mavu. Yesu, ua handekele ngueni: “Vose va li mu vihilo,” cipue vene vaze ve ku soloka ngue va suviua, kasi Njambi ue ku va vuluka, kaha a ka va sangula.—Yoano 5:28, 29.
TANTEKEYENU VIKUAVO
Hilulenu vukaleho vua mu Mbimbiliya vua muesa ngecize vatsi citava va sanguke kaha va ka va sangula vene. Tantekeyenu naua vati cisangukilo cihasa ku mi lembezieka na ku mi hana lulavelelo.
4. Yesu ua muesele ha toma ngecize a hasa ku sangula vatsi
Tantekeyenu vikuavo ku tuala ha viuma via lingile Yesu kuli kavusamba keni Lazalu. Tandenu Yoano 11:14, 38-44, kaha simutuilenu ha vihula evi:
Vati tua tantekeya ngecize Lazalu ua tsile mpundu?—Talenu cinimbu 39
Mu ku mona cenu, nga Lazalu mua tsile ua ile muilu, vuno Yesu nga ua mu sanguile na ku mu hiluisa naua hano ha mavu ni??
5. Vantu vavengi va ka sanguka!
Tandenu Visamo 37:29, kaha simutuilenu ha cihula eci:
Kuiko va ka yoyela makulukazi a vantu va ka sanguka?
Yesu a ka sangula vantu vavengi kati lika vaze va lemesele Yehova. Tandenu Vilinga 24:15, kaha simutuilenu ha cihula eci:
Ku sanguka ceya mua lavelela ku ka mona?
Singaniekenu hali evi: Ci ka pua ca casi kuli Yesu ku sangula vatsi, ngue muze mu ca asiua kuli cisemi ku hindula muana na kosa
6. Cisangukilo ci hasa ku mi lembezieka na ku mi hana lulavelelo
Muzimbu ua mu Mbimbiliya ua ku sanguka ca muana Njailu ua mpuevo, ue ku lembezieka na ku kaniamesa cingi ca vantu va tsisa. Tandenu ou muzimbu ua vusunga ku Luka 8:40-42, 49-56.
Tele kanda a sangule muana Njailu, Yesu ua lekele Njailu ngueni: “Kati u ivue vuoma; tsiliele lika.” (Talenu cinimbu 50) Vati lulavelelo lu hasa ku mi kuasa . . .
nga mu na tsisa muntu u mua lema?
nga muono uenu uli mu vusonde?
Talenu VIDEO, kaha simutuilenu ha cihula ci na hatako.
Vati lulavelelo lua cisangukilo lua lembezieka na ku kaniamesa visemi va Phelicity?
VAMO VE KU HANDEKA NGUAVO: “Ca cikalu ku tsiliela mu cisangukilo.”
Vika mu singaniekeho?
Cinimbu cika mu hasa ku pangesa mu ku muesa ngecize cisangukilo ku ci ka kala mpundu?
VI MU NA LILONGESA
Mbimbiliya ya kulahesa ngecize makulukazi na makulukazi a vatsi va ka sanguka. Yehova ua tonda vantu vaco va ka yoye lueka naua, ngeci ua hana Yesu ngolo ya ku va sangula.
Mpupulule
Vati Yehova na Yesu ve ku livua ku mutima ku tuala ha ku sangula vatsi?
Kuiko va ka yoyela makulukazi na makulukazi a vantu va ka sanguka—muilu ni hano ha mavu? Omo lia vika mu na kumbuluila ngoco?
Vika via mi hana vusunga ngecize vavusoko na vavusamba tangua va ka yoya lueka naua?
KONKENUHO
Tantekeyenu vinanga vi hasa ku mi kuasa ku lua na vusiua vua ku tsisa.
Vuno vitume via mu Mbimbiliya vi hasa ku kuasa muntu na tsisa ni?
Vati vanike va hasa ku lua na vusiua vua ku tsisa?
Vuno kuli vamo va va ka sangula mu ku ka yoyela muilu ni? Veya ka va ka sanguka?