CILONGESA 28
Muesenu ku Santsela ku Viuma via mi Lingilile Yehova na Yesu
Vati mue ku livua ku mutima nga kavusamba a mi hana vuana vua cili? Citava mue ku ivua ndzolela ya kama, kaha mue ku linga cose linga mu muese ku santsela kuli kavusamba kenu. Yehova na Yesu va tu hele vuana vua seho ya kama ku hiana nkala vuana vuose. Vuana vuaco vuka? Kaha vati tu hasa ku muesa ku santsela cetu ku vukevuo?
1. Njila ika imo i tu hasa ku mueselamo ku santsela cetu ku vize via tu lingila Yehova na Kilistu?
Mbimbiliya ya kulahesa nguayo “uose a tsiliela muli [Yesu]” a hasa ku yoya miaka yose ya-ya-ye. (Yoano 3:16) Ku muesa lutsilielo ca lomboloka vika? Ka ca lengelele lika ha ku tsiliela muli Yesu. Vunoni ca tondeka naua, tu muese lutsilielo luetu ku hitila mu vihangula vietu na viuma vi tue ku linga. (Tiango 2:17) Mu tue ku muesa lutsilielo ku hitila mu vilinga na mezi etu, tue ku kaniamesa vusamba vuetu na Yesu kaha na Ise, Yehova.—Tandenu Yoano 14:21.
2. Ciuano cika ca ku lifuila ce ku tu kuasa ku muesa ku santsela cetu ku viuma via tu lingilile Yehova na Yesu?
Mukua lisupile vutsiki vumo tele kanda a tse, Yesu ua lekele vandongesi veni njila ikuavo ya ku mueselamo ku santsela ku nkombelo yeni. Ua va sikile ku linga-linga cimo ciuano ca ku lifuila, ci ya luka Mbimbiliya nguayo, “via-ku-lia via Muangana” kaha lizina liaco likuavo lia pua Mulalelo ua Ku-tsa ca Kilistu. (1 Kolintu 11:20) Yesu ua tumbikile ciuano caco linga vapostolo veni kaha na Vakua Kilistu vose va pue na ku vuluka vuana vua muono ueni vua tu hanene. Ku tuala ha ciuano caco, Yesu ua sikile ngueni: “Lingenu ngecize mu ku nji vulukilaho ange.” (Luka 22:19) Mu mue kuya ku Mulalelo, mue ku muesa ngecize mua santsela cikuma ku cilemo ca kama ca tu muesa Yehova na Yesu.
TANTEKEYENU VIKUAVO
Hilulenu vinjila vikuavo via ku mueselamo ku santsela ku cilemo ca kama ca tu muesa Yehova na Yesu. Tantekeyenu naua omo lia vika Mulalelo ua ku-tsa ua Kilistu ca pua ca seho ya kama.
3. Mutima ua ku santsela ue ku tu vuisa cizango ca ku lingako mumo
Aci singaniekenu nga mu na kala na kutsa mu ndonga kaha umo muntu na mi ovola. Vuno mu ka suva via na mi lingila ni? Ni mu ka tonda vinjila via ku mueselamo mua santsela?
Tua kala na vukovelelo vua ku ka tambula muono ua ya-ye, omo lia viuma via tu lingila Yehova. Tandenu 1 Yoano 4:8-10, kaha simutuilenu ha vihula evi:
Omo lia vika nkombelo ya Yesu ya pua vuana vua ku lifuila?
Vati muli na ku livua ku tuala ha viuma via mi lingila Yehova na Yesu?
Vati tu hasa ku muesa ku santsela ku viuma via tu lingila Yehova na Yesu? Tandenu 2 Kolintu 5:15 na 1 Yoano 4:11; 5:3. Mu nima ya ku tanda nkala cinimbu, simutuilenu ha cihula eci:
Kuliya neci cinimbu, vika tua pande ku linga mu ku muesa ku santsela cetu?
4. Tambuluisenu Yesu
Njila ikuavo i tu hasa ku mueselamo ku santsela ya pua mu ku tambuluisa Yesu. Tandenu 1 Petulu 2:21, kaha simutuilenu ha cihula eci:
Mu vinjila vika mu hasa ku tambuluisa vuino lungano lua Yesu?
Yesu ua lemene Lizi lia Njambi, ua ambuluile muzimbu ua cili na ku kuasa vakuavo
5. Puenu na kuya ku Mulalelo ua ku-tsa ca Kilistu
Linga mu tantekeyele vati uendele Mulalelo ua katete ua ku-tsa ca Yesu, tandenu Luka 22:14, 19, 20. Kaha simutuilenu ha vihula evi:
Vati uendele Mulalelo ua ku-tsa ca Yesu?
Vika yemanena mbolo na viniu?—Talenu vinimbu 19 na 20.
Yesu ua tondele vandongesi veni, vapue na ku linga Mulalelo ua ku-tsa ceni lumo lika mu muaka ha litangua lia tsile. Ngeci mukemuo, Vakaleho va Yehova ve ku likungulula nkala muaka mu ku vuluka ku-tsa ca Yesu mu njila ya sikile. Linga mu tantekeye vieci ciuano ca seho, talenu VIDEO. kaha simutuilenu ha cihula ci na hatako.
Vati ue ku enda Mulalelo?
Mbolo na viniu via pua vimueso. Mbolo yemanena muvila ua ku tantuluka ua Yesu, uze ua a hanene mu ku tu tsila. Viniu yemanena maninga eni
VAMO VE KU HANDEKA NGUAVO: “Ku tsiliela lika muli Yesu cikeco lika ca tonda linga muntu a kovoke.”
Vati mu hasa ku pangesa Yoano 3:16 na Tiango 2:17, mu ku muesa ngecize kuli vikuavo naua vi tua pande ku linga?
VI MU NA LILONGESA
Tue ku muesa ku santsela ku vize via tu lingilile Yesu mu ku muesa lutsilielo muli ikeye na ku kunguluka ku Mulalelo ua ku-tsa ceni.
Mpupulule
Vika ca lomboloka ku muesa lutsilielo muli Yesu?
Vati mu tonda ku muesa ku santsela cenu ku vize via mi lingila Yehova na Yesu?
Vika ca puila ca seho ya kama ku kunguluka ku Mulalelo ua ku-tsa ca Kilistu?
KONKENUHO
Ku-tsa ca Yesu, ce ku tu vuisa cizango ca ku linga vika?
Lilongesenu vikuavo ku tuala ha lutsilielo na vati mu hasa ku lu muesa.
“Tsilielenu mu Vikulaheso via Yehova” (Vutala vua Kaniungi, Outubro ya 2016)
Mu muzimbu “Eu me sinto limpa, viva e realizada,” talenu vati nkombelo ya Kilistu ya kuasa umo mpuevo.
“A Bíblia Muda a Vida das Pessoas” (A Sentinela, 1 de Agosto de 2011)
Tantekeyenu omo lia vika va vandende lika ve ku lia ku vimueso via Mulalelo.