Mu nima ya ku tunda mu citungu ca Endene, va Andama na Eva va semene vana vavengi. Muana ua ku livanga Kaini ua puile mukua ku lima, kaha muana ua mu civali Avele, ua puile kaniungi ka vampanga.

Tangua limo Kaini na Avele va hanene vikombelo kuli Yehova. Ua tantekeya vika via pua cikombelo? Ca pua vuana vua ku lifuila. Yehova ua viukililile na cikombelo ca Avele, vunoni ka lemene ca Kaini. Ngeci Kaini ua nienguele cikuma. Yehova ua mu mamuine a likele vutenu, kati ngoco vu ka mu lingisa via ku pihia. Vunoni Kaini ka mu halakanene.

Ngeci mukemuo Kaini ua lekele Avele ngueni: ‘Tu ye ku musenge.’ Mu va ka hetele kua lika liavo, Kaini ua pupile ntsongo yeni na ku mu tsiha. Vati Yehova ua lingile? Yehova ua hele kasitiku kuli Kaini mu ku mu sekuila ku lahako na vusoko vueni. Kaini ka va mu tavesele ku hiluka naua ku vusoko vueni.

Vika tu hasa ku lilongesaho? Halumo tu hasa ku ivua matoto nga viuma ka viesi na ku enda ngue muaya cizango cetu. Vunoni nga tu ivua matoto ni halumo vakuetu va tu mamuna omo lia vutenu vuetu, tua pande ku lipokuesa linga vutenu kati vu tu tuamenene.

Mu ku linga Avele ua lemene Yehova kaha ntsimbu yose ua lingile via cili, Yehova a ka mu vuluka ntsimbu yose. Ngeci Yehova a ka mu sangula mua ka puisa mavu citungu.

Mu nima ya ntsimbu, ha mavu ha kele vantu va vengi. Cingi cavo va lemene ku linga vupi. Na vamo tungelo muilu navo va puile va vapi. Va sezele limbo liavo muilu na ku iza ha mavu. Ua tantekeya vika va lingililemo? Va tondele ku lihimpula vantu linga va ambate vampuevo.

Tungelo vaco va semene vana na vampuevo. Kaha mu va kolele vana vaco, va kele na ngolo ya kama, va puile vakua ku pakesa. Va yandesele vantu. Vunoni Yehova kecelele vupi vuaco vu tualeleleho. Ngeci ua tumbile ku nongesa vantu va vapi na livazi.

Vunoni kua kele umo yala ua lisezele navo. Ua lemene Yehova. Lizina lieni Noa. Ua kele na mpuevo na vana vatatu va vamala, Seme, Hame na Yafete, ava vana veni vose va kele na vampuevo. Yehova ua tumine Noa ku tunga vuato vua kama, linga ikeye na vusoko vueni va hase ku ovoka ku livazi. Vuato vuaco vua puile cikasa ca kama ca hasele ku hungumuka helu lia mema. Yehova ua tumine naua Noa a kovelese tusitu va vengi mu vuato linga navo vovoke.

Haze vene, Noa ua putukile ku tunga vuato. Noa na vusoko vueni va ambatele miaka i heta ku 50 mu ku tunga vuato. Va vu tungile mpundu ngue mua va sikile Yehova. Mu ntsimbu yaco, Noa ua lekeleko vantu via ku iza ca Livazi. Vunoni na umo uahi ua mu halakanene.

Mu vua huile vuato, ntsimbu ya ku kovelamo ya hetele. Tu ci tale vati viendele.