Lahave ua Suekele Vandondzi

Omo vaIsaleli va ka nengele mbonge ya Yeliko, va tulilile ku ndzivo ya umo mpuevo lizina lieni Lahave. Vunoni omo Muangana ua Yeliko ua vi vuile ua tumine masualele ku ndzivo ya Lahave. Lahave ua suekele vandondzi vavali helu lia ndzivo, kaha ua tumine masualele kueka. Mu nima yaco, ua handekele na vandondzi ngueni: ‘Nja mi kuasa muomu nja tantekeya nguange Yehova ali nenu, kaha mu ku vula cifuti cino. Sukulukambu nji kulahesenu ngecize mua ku nji ovola na vusoko vuange.’

Kaha vandondzi va lekele Lahave nguavo: ‘Tu ku kulahesa nguetu uose a ka kala mu ndzivo yove ka ka tsi.’ Kaha naua nguavo: ‘Kuta mukole ua ku tila ha njanena yove, kaha vusoko vuove vu kovoka.’

Lahave ua tuhuisile vandondzi ha njanena na mukole. Kaha va ile ku mincinda na ku ka vandako matangua atatu, amba va hiluke kuli Yehosua. Mu nima yaco, vaIsaleli va zavukile Ndonga ya Yondau na ku liviukisila ku suana cifuti. Yeliko ikeyo mbonge ya ku livanga i va suanene. Yehova ua va lekele ku zinguluka mbonge lumo lika mu litangua mu matangua atanu na limo. Mu litangua lia mu citanu na avali, va zingulukile mbonge lutanu na luvali. Kaha vasasendote va sikile maluneta, kaha masualele va tambekele na ngolo yose. Ngeci vivumbe via putukile ku lundumuka! Vunoni ndzivo ya Lahave ya kele ha civumbe ka ya lundumukile. Lahave na vusoko vueni vovokele muomu va tsilielele muli Yehova.