CILONGESA 39
Cifua ce ku Muenamo Njambi Maninga
Maninga, a kala na seho ya kama. Na umo uahi a hasa ku yoya ca ku hona maninga. Kaha Njambi ikeye ali na mpoko ya ku tu leka vati tua pande ku pangesa maninga, muomu ikeye Sakatanga. Vika honi ua handeka ku tuala ha maninga? Vuno citava ku a lia cipue ku lihakao mu muvila ni? Vati mu hasa ku linga vihangula via mana mu cimpande eci?
1. Vati Yehova ue ku mona maninga?
Ku laza, Yehova ua lekele vangamba veni ngueni: “Muono ua ntsitu yose, ukeuo maninga ayo.” (Levitiku 17:14) Kuli Yehova, maninga emanena muono. Kaha mu ku linga muono ua pua ua ku lela, kaha naua ua pua vuana vua ku tunda kuli Njambi, maninga nao a pua a ku lela.
2. Cifua cika ca ku pangeselamo maninga ua vindika Njambi?
Ku laza, tele Yesu kanda aci ize hano ha mavu, Yehova ua vindikile vakua ku mu lemesa ku lia maninga. (Tandenu Njenisisi 9:4 na Levitiku 17:10.) Kaha mu nima ya ntsimbu ua tsindikile naua ha cimpande caco, omo civunga ca vantuamena ca lekele Vakua Kilistu ‘va tualeleleho ku zila ku maninga.’—Tandenu Vilinga 15:28, 29.
Vika ca lomboloka ku zila ku maninga? Nga ndotolo a mi zilika vuala, mu likela ku vu nua. Vatico nga vimo via-ku-lia via kala na vuala, mu vi lia ni? Amba co nga kua kala vumo vuala vua ku lihaka mu misisa, mu lingamo ni? Mua vusunga houe. Cizila ca pua cizila vene. Na vuno vene, Njambi ua tu sika tu zile ku maninga. Ngeci mukemuo, ka tua pandele ku a nua, ni ku lia ntsitu ya kasitu ua ku tekenia. Kaha ka tua pandele naua ku lia nkala viuma via ku haka maninga.
Vatico ku tuala ha cifua ci ve ku pangeselamo maninga ku via ku saka? Cimo ku saka, ce ku tsiha ha toma Lisiko lia Njambi. Eci ca ambatesela kumo na ku tu haka maninga ose a mutuntu, ni mitamba yao, ngeci mua viselula via ku venga, viselula via ku toka, viplaketa na plasma. Kaha kua kala lisiko likuavo ka ce ku tsiha ha toma Lisiko lia Njambi. Ca ku muenako, imo sakesi ye ku pangesa tu mitamba tua tundende tua ku nona ku imo mitamba ya kama ya maninga. Sakesi ikuavo co, ya pua ku saka muntu mu ku pangesa maninga eni ivene. Ngeci mukemuo, ha vimpande ngeci muevi, muntu ku muntu na pande ku lilingila cihangula ceni ivene.a—Ngalata 6:5.
TANTEKEYENU VIKUAVO
Hilulenu mua ku lingila vihangula ku tuala ha sakesi ya likuata na maninga.
3. Lingenu vihangula vie kuya Yehova ku mutima ku tuala ha cihindu
Vati mu hasa ku linga vihangula ku tuala ha cihindu, vize via litombola na cifua ce ku muenamo Njambi maninga? Talenu VIDEO, kaha simutuilenu ha seho ya ku puisamo vinanga vi na hatako.
Vundilenu mana kuli Njambi.—Tiango 1:5.
Tondesesenu vitume via Mbimbiliya na vati via likuata na cimpande caco.—Visimo 13:16.
Tondesesenu vifua vika vikuavo via ku saka via kala ku cihela ci mua kala.
Hakelenu ku mukulo vifua via ku saka vi mua viana.
Lihakelenu kapandi ka ku linga vihangula vize ka vi mi sila citaku-taku.—Vilinga 24:16.b
Tantekeyenu ngecize, na umo uahi na pande ku mi lingila cihangula ku tuala ha vimpande via mutima. Cipue vene mukua ndzivo yenu, umo mukuluntu mu cikungulukilo, ni mulongisi uenu ua Mbimbiliya, ka pandele ku lingamo.—Loma 14:12.
Cihangula cenu, lingenu ca ku soneka.
4. Vakaleho va Yehova ve ku tonda ku va saka vuino
Citava ku kakatela ku lisiko lia Njambi ku tuala ha maninga, na ku uana sakesi yeka ya cili kaya likuatele na maninga. Talenu VIDEO.
Tandenu Tito 3:2, kaha simutuilenu ha cihula eci:
Omo lia vika tua pande ku muesa kasingimiko na ku konkama kuli vakua ku saka?
Vize ka tua pandele ku tava |
Via na pande ku lihanguila Mukua Kilistu |
|---|---|
A. Plasma |
Tumitamba tua mu plasma |
B. Viselula via ku toka |
Tumitamba tua mu viselula via ku toka |
C. Viplaketa |
Tumitamba tua mu viplaketa |
D. Viselula via ku venga |
Tumitamba tua mu viselula via ku venga |
5. Nga sakesi yaco ya likuata na tu mitamba tua maninga
Maninga a litepa mu mitamba iuana ya kama: Viselula via ku venga, viselula via ku toka, viplaketa, na plasma. Kaha eyi mitamba, ya kala naua na tumitamba tua tundende tua tuingi.c Tumo tumitamba tuaco, ve ku tu pangesa vihemba via ku sakesa, ni via ku imika ku hita ca maninga.
Ku tuala ha tumitamba tua tundende tua maninga, nkala Mukua Kilistu na pande ku lihanguila kuliya na mutima ueni ua ku longesa ku Mbimbiliya. Vamo Vakua Kilistu, ve ku viana sakesi yose ya likuata na tumitamba tua tundende tua maninga. Vamo co, mutima uavo ue ku va tavesa ku tava tumitamba tuaco.
Omo mu pua na ku linga vihangula vienu, puenu na ku singanieka ha cihula eci:
Vati nji hasa ku lomboluela ndotolo viuma via nji lingisa ku viana ni ku tava tumo tumitamba tua maninga?
VAMO VE KU HULA NGUAVO: “Vitanga vika honi via kalaho ha ku tambula maninga”?
Vati mu kumbulula?
VI MU NA LILONGESA
Yehova a tonda tu liniunge ku ku pangesa maninga mu njila ya ku vihia.
Mpupulule
Omo lia vika Yehova ue ku mona maninga ku pua a ku lela?
Vati tua tantekeya ngecize lisiko lia Njambi lia ku zila ku maninga, lia kuata na ku a haka ku muvila?
Vati mu hasa ku linga vihangula via cili, ku tua ha cimpande ca ku pangesa maninga mu ku saka?
KONKENUHO
Vika mua pande ku hilula ntsimbu kanda mu linge vihangula via ku saka ce ku pangesa maninga enu vavene?
“Vihula via Vakua ku Tanda” (Vutala vua Kaniungi, 15 ya Outubro ya 2000, mu putu)
Vika mua pande ku hilula ku tuala ha ku tava tumitamba tua tundende tua maninga?
“Vihula via Vakua ku Tanda” (Vutala vua Kaniungi, 15 ya Junho ya 2004, mu putu)
Vika via lingisile umo ndotolo ku tava ngecize cifua ce ku muenamo Yehova maninga ca sungama?
“Nja Tavele Cifua ce ku Muenamo Njambi Maninga” (Despertai!, 8 ya Dezembro ya 2003, mu putu)
Tantekeyenu vati vakuluntu va pangela ku vivunga via tala via visipitali, ve ku kuasa vamuanaye mu lutsilielo.
a Talenu Cilongesa 35, “Mua ku Lingila Vihangula via Cili.”
b Talenu ntsina 5, “Nga Sakesi Yaco ya Likuata na tu Mitamba tua Maninga,” Litota 3 lia ku ntsongo ya livulu, “Vifua via ku Saka vie ku pangesa Maninga.”
c Vamo vandotolo, ve ku mona mitamba iuana ya kama ya maninga ngue tumitamba tua tundende. Ngeci mukemuo, halumo ce ku tondeka ku va lomboluela via cihangula cenu ca ku viana maninga a mutuntu, viselula via ku venga, viselula via ku toka, viplaketa ni plasma.