3 | Uanenu Vukuasi ku Malungano a mu Mbimbiliya

MBIMBILIYA NGUAYO . . . Vamala na vampuevo va lutsilielo va kele na “vifua ngue vietu.”—TIANGO 5:17.

Vi ca Lomboloka

Mu Mbimbiliya mua sula mizimbu ya vamala na vampuevo, va hitile mu visoti via mu visinganieka via ku liseza-seza. Omo tu tanda mizimbu yavo, halumo tu hasa ku uana muntu ua hitile mu visoti ngeci muetu.

Vati ci Hasa ku Kuasa

Tu vose tue ku tondeka ku livua ngecize vakuetu ve ku tu ivuisisa. Kaha evi vie ku tondeka mua kama nga tuli na ku pinda na vumo vuvezi vua mu visinganieka. Ngeci mukemuo, omo tu tanda mizimbu ya mu Mbimbiliya, halumo tu ka hasa ku nongonona vamo vantu va va tumbulamo, va pindile na visoti via mu visinganieka ngue vi tue ku pinda navio yetu. Kaha eci ci ka tu kuasa ku livua ngecize ka tuesi lika lietu mu visoti vietu, vunoni kuli vakuetu naua ve ku pinda na visoti via mu visinganieka ngeci muetu.

Mu Mbimbiliya, mua kala mezi a engi a va handekele vantu va livuile ngecize ka vesi na vukuasi ni vomine mutima. Vuno mua livuaho laza nguenu, ‘Ka nji hasa naua ku tualelelaho ni? Mosesa, Eliya na Ndaviti navo va livuile ngoco.—Numelu 11:14; 1 Vamiangana 19:4; Visamo 55:4.
Mu Mbimbiliya, mua kala umo mpuevo lizina lieni Hana, “ua sasele mu muono ueni”, muomu ua puile ntsimpi kaha kavuhale keni ua kele na ku mu tsopa ntsimbu yose.—1 Samuele 1:6, 10.
Mu Mbimbiliya, va tumbulamo via umo yala lizina lieni Yombi, ua hitile mu visoti vi tu hasa ku lihita navio netu. Vutuhu ua puile yala ua lutsilielo, vunoni ua yandele mua kama mu visinganieka. Kaha ntsimbu imo ua handekele ngueni: “Nji zinda muono uange; ka nji hianga ku yoya.”—Yombi 7:16.

Ku tantekeya vati ava vantu va va tumbula mu Mbimbiliya va hasele ku pinda na visinganieka via ku henga na ku vi vula, ci hasa ku tu hana ndzili i tua tondeka linga tu vule visoti vietu netu.

Vati ili na ku Kuasa Mbimbiliya Kevin

Musongo Uange ua ku Hita-hitaho ue ku nji Yandesa

“Va nji uanene na vumo vuvezi vua ku hita-hitaho, Transtorno bipolar tele nji kokela ku miaka 50. Vintsimbu vimo, nje ku livua ngecize nji hasa ku pinda na nkala visoti vi nji solokela mu muono. Vunoni vintsimbu vikuavo, nje ku livua ngecize cili ku lutue nji tse.”

Cifua ci ye ku Nji Kuaselamo Mbimbiliya

Mu Mbimbiliya, kapostolo Petulu ikeye i nje ku mona nguange ua hitile mu visoti ngeci mua viange. Ua lingile vimo visevuka via mu lingisile ku livua vungoco. Vunoni Petulu ka tondele ku tualeleleho ku singanieka mu cifua cize. Ngeci ua tondele ku likata na vavusamba va mu hakele seho. Nange vene ha vintsimbu vi ce ku nji uana ku vavala cange, visevuka viange vie ku nji vuluisa ngecize ka nja kele na seho. Vunoni ngeci mua Petulu, nja lilongesa ku likata na vavusamba vange linga va nji kuase kuya ku lutue.

Muntu mukuavo u va tumbula mu Mbimbiliya ue ku nji lembezieka mua kama, ua pua Muangana Ndaviti. Vintsimbu via vingi ua vuile vusiua vua kama omo lia visoti via kele na ku pinda navio kaha ua liveyele omo lia visevuka vieni via ku nima. Kaha nje ku hasa ku livua ngeci mueni, muomu vintsimbu vimo nje ku handeka ni ku linga viuma vi nje ku liveya mu nima yaco. Mezi a Ndaviti a ku Visamo 51, eku nji lembezieka mua kama. Ha cinimbu 3, Ndaviti ua handekele ngueni: ‘Nji tantekeya vivulumuna viange; Na vupi vuange vuli ku meso ange ntsimbu yose.’ Aa mezi a muesa mpundu cifua ci nje ku livuilamo ha vintsimbu vi ue ku nji kuata mua kama vuvezi vuange. Muomu ce ku nji kaluuila ku lisinganiekela ange ivene viuma via cili.’ Vunoni nje ku livua naua ngue mu a muesa mezi a Ndaviti a ha cinimbu 10. Ngueni: ‘Tanga muli ange mutima ua ku lela, A Njambi.’ Nange nje ku vundila vene kuli Njambi linga a nji kuase ku limona ange ivene mu cifua ceka ca cili. Kaha mu ku manusula, cinimbu 17 ce ku nji lembezieka. Nguaco: ‘Mutima ua ku pokoka na ku aluluka, ko u ka yengula, A Njambi.’ Eci cinimbu ca nji hana vusunga ngecize Njambi ua nji lema.

“Mu ku tuala mana ku vantu va va tumbula mu Mbimbiliya na ku viuma via nji hana Njambi mu ntsimbu ino, nje ku kaniamesa lulavelelo luange ku tuala ha viuma via ku lutue. Vikulaheso via mu Mbimbiliya vie ku pua via vusunga kuli yange kaha eci ce ku nji kuasa ku tualelelaho ku yoya.”