Mu Hasa ku Puisamo Vizango Vienu via mu Lutsilielo

1. Citanga cika tue ku pinda naco cingi cetu?

VUNO mua lihakelaho laza cimo cizango ca mu lutsilielo vunoni ce ku mi kaluuila ku ci puisamo ni?b Nga mukemuo, kati likalienu. Ca ku muenako, muanetu Filipe ua lihakelele cizango ca ku pangela ha vivundilo vieni, vunoni ca mu kaluuilile ku uana ntsimbu ya ku pangelaho. Ndumbuetu Erika, ua lihakelele cizango ca ku livanga ku heta ku viuano via ku tuhuka mu lihia, vunoni kampe ua kele na ku kotokela ku viuano viaco viose. Muanetu Tomáš, ua lihakelele vintsimbu via vingi cizango ca ku tanda Mbimbiliya, vunoni ngueni: “Ange ku tanda Mbimbiliya ca nji kambalala. Njesekele lutatu luose, vunoni nja kele na ku lengela ha livulu lia Levitiku kaha nji likela.”

2. Omo lia vika ka tua pandele ku ivua vusiua nga ka tua puisilemo cimo cizango ca mu lutsilielo?

² Nga ka mua puisilemo cimo cizango cenu ca mu lutsilielo, kati mu uile mu vusiua. Muomu ku puisamo cizango ambe ca cindende ce ku tondeka ntsimbu na ku lihakela kapandi. Ku tonda lika ku puisamo cizango cenu ca muesa ngecize mua haka seho ku vusamba vuenu na Yehova kaha mu tonda ku mu pangela na mutima uose. Yehova ua haka seho ya kama ku kapandi ka mue ku lihakela. Kaha naua ke ku lavelela viuma via vingi ku hiana vize vi mu hasa ku mu hana. (Visa. 103:14; Mika 6:8) Ngeci mukemuo, lihakelenu vizango vize vi mu hasa ku puisamo kuliya na cifua ci ulimo muono uenu mu ntsimbu yaco. Nga muli na cizango caco, vati mu hasa ku ci puisamo? Tu talenu vimo vinguli vi hasa ku kuasa.

KU KALA NA VUKATUISI CA PUA CA SEHO

3. Vika ca puila ca seho ku kala na vukatuisi?

³ Vukatuisi vua pua vua seho mu ku puisamo cimo cizango ca mu lutsilielo. Muntu ua kala na vukatuisi ue ku ivua ntsindiye ya ku puisamo vutumbe vueni. Tu hasa ku setekesa vukatuisi ku luhundzi lue ku pekula vuato linga vu ka hete kuze ku vuya. Nga luhundzi lu tualelelaho ku pekula vuato vue ku heta kuze ku vuli na kuya. Kaha nga luli na ndzili ya kama halumo muntu ue ku livanga vene ku heta. Na vuno vene, ku kala na vukatuisi ce ku tu hana ndzili ya ku puisamo cizango cetu. Umo muanetu ua ku EI Salvador ngueni: “Muntu ali na vukatuisi ue ku lihakela kapandi ka kama. Kaha ue ku linga cose mangana na vimo viahi vi mu vindike ku puisamo cizango ceni ca mu lutsilielo.” Ngeci mukemuo, vati mu hasa ku linga mangana mu kale na vukatuisi?

4. Vika mu hasa ku vundila? (Filipu 2:13) (Talenu naua cipulo.)

⁴ Vundilenu vukatuisi. Ku hitila mu sipilitu santu, Yehova a hasa ku tu vuisa cizango ca ku puisamo vutumbe vueni. (Tandenu Filipu 2:13.) Vintsimbu vimo, tue ku lihakela vumo vutumbe muomu tua tantekeya ngecize tua pande ku lingamo ni ca pua ca cili ku lingamo. Vunoni halumo ka tue ku kala mpundu na vukatuisi vua ku vu puisamo. Evi vikevio via solokelele ndumbuetu Norina ua ku Uganda. Ua lihakelele cizango ca ku putuka cilongesa ca Mbimbiliya vunoni ka kele na ku ci puisamo muomu ua livuile ngecize ka puile mulongisi ua cili. Vika via mu kuasele? Ivene ngueni: “Nja putukile ku vundila Yehova tangua na tangua linga a nji vuezelele cizango ca ku putuka cilongesa ca Mbimbiliya. Kaha mu ku litombola na vivundilo viange, nja putukile ku lihakela kapandi ka ku vueza ku vutongue vuange vua ku longesa. Mu nima ya vimo vingonde nja nongonuene ngecize vukatuisi vuange vuli na ku livuezelela. Kaha mu muaka uaco vene nja putukile vilongesa vivali via Mbimbiliya.”

5. Ha viuma vika tua pande ku hilula linga tu vueze ku vukatuisi vuetu?

⁵ Hilulenu ha viuma via mi lingila laza Yehova. (Visa. 143:5) Kapostolo Paulu ua hiluile ha kavumbi ka mu muesele Yehova kaha eci ca mu hele vukatuisi vua ku pangela Yehova na mutima uose. (1 Kol. 15:9, 10; 1 Tim. 1:12-14) Na vuno vene, nga mu tualelelaho ku hilula ha viuma via mi lingila laza Yehova, mu ka kala na vukatuisi vua ku puisamo cizango cenu. (Visa. 116:12) Halakanenu via kuasele umo ndumbuetu ku Honduras linga a puisemo cizango ca ku pua pioneiro ua ntsimbu yose. Ivene ngueni: “Nja singaniekele ha vukama vua cilemo ca Yehova kuli ange na ha ku nji lania ku pua mutamba ua civunga ca vantu veni. Cikuavo naua, nja hiluile ha cifua ce ku nji niungilamo na ku nji lela. Ku singanieka hali evi, ca kaniamesele cilemo cange kuli ikeye na ku vueza ku vukatuisi vuange vua ku mu pangela.”

6. Vika vikuavo vi hasa ku tu kuasa ku vueza ku vukatuisi vuetu?

⁶ Tualenu mana ku vivezikiso vi keza mu ku puisamo cizango cenu. Halakanenu via kuasele ndumbuetu Erika u tu na tumbuile laza ku puisamo cizango ceni ca ku heta na ntsimbu. Ivene ngueni: “Nja nongonuene ngecize njili na ku liputuisa via vingi mu ku kotokela ku ciuano ca ku tuhuka mu lihia. Nga nje ku livanga ku heta, nga nje ku meneka vamuanetu na vandumbuetu na ku simutuila kavundende. Kaha cikuavo naua nga nje ku ivua vimamuna via cili vi ve ku hana ku viuano viaco, mu ku nji vuisa ndzolela na ku nji kuasa ku vueza ku vutongue vuange vua ku ambulula.” Cili vene, ndumbuetu Erika ua tualele mana ku vivezikiso via kala ha ku livanga ku heta, ngeci ua hasele ku puisamo cizango ceni. Kaha enuco vivezikiso vika mu hasa ku tuala mana? Nga cizango cenu ca pua ku tanda Mbimbiliya yose ni ku vundila vuino, singaiekenu ha vati ku lingamo ci ka kaniamesa vusamba vuenu na Yehova. (Visa. 145:18, 19) Nga co cizango cenu ku pangela ha cimo cifua ca Vukua Kilistu, singaniekenu ha vati ku lingamo ci ka vueza ku ku likata cenu na vakuenu. (Kolo. 3:14) Evi vi napu vimueso lika. Ngeci mukemuo, ci pua ca cili nga mu noneka vusunga vuose vu mu tonda ku puisilamo cizango cenu. Kaha na ku tala-tala ha mukana ua vusunga vuaco ku-sua kumo. Muanetu Tomáš, u tu na tumbuile laza ngueni: “Ku kala na vusunga vua vuingi vua ku puisamo cimo cizango, ce ku nji kuasa linga kati nji likelele ha kati.”

7. Vika via kuasele muanetu Julio na mpueyeni linga va puisemo vutumbe vuavo?

⁷ Puenu na ku sikama na vaze va ka mi hana ndzili. (Visi. 13:20) Halakanenu via kuasele muanetu Julio na mpueyeni ku puisamo cizango cavo ca ku vueza ku cipanga ca ku ambulula. Ikeye ngueni: “Tua hanguile vavusamba vaze va lemene cizango cetu kaha va tua hasele ku simutuila navo ku tuala ha cizango caco. Cingi cavo te va puisamo laza vizango via lifua na cetu. Ngeci mukemuo, va tu hele vimamuna via cili, va kele na ku tu hula vati ci li na kuenda cizango cetu na ku tu kaniamesa ha ntsimbu i ca tondekele.”

NGA KU MUTIMA VUI

8. Vika vi hasa ku soloka nga tu pangela lika ha cizango cetu ha ntsimbu i tue ku kala na vukatuisi vua ku lingamo? (Talenu naua cikupulo.)

⁸ Tu vose, tue ku kala na amo matangua a tue ku ivua ku mutima vui. Vuno eci ca lomboloka ngecize ka tu hasa ku pangela ha cizango cetu ni? Houe. Ca ku muenako, luhundzi lu hasa ku kala na ndzili ya ku sindika vuato linga vu ka hete ku vuya. Vunoni ndzili ya luhundzi ya liseza-seza. Matangua amo ye ku pua ya ingi, akuavo co na imo yahi. Vuno eci ca lomboloka ngecize vaze ve ku enda na mato ve ku likela ni? Houe. Ca ku muenako, amo mato a kala na mitoli, akuavo co a kala na vilapo ni vikasi. Ngeci mukemuo, va ka ku pangesa aa mato aco ve ku pangesa evi vikuata mu ku heta kuze ku va tonda kuya. Cizango cetu tu hasa ku ci setekesa ku luhundzi muomu amo matangua tue ku ivua cizango ca kama, akuavo co kuahi. Ngeci mukemuo, nga tu pangela lika ha cizango cetu ha ntsimbu i tue ku tavuluka ku mutima, halumo ka tu ka hasa ku puisamo vutumbe vuetu. Vunoni ngeci mua vaze vakua ku endesa mato, ve ku tonda vinjila vieka linga va ka hete kuze ku va tonda kuya, netu tu hasa ku lihakela kapandi ka ku puisamo vutumbe vuetu ambe nga ku mutima vui. Eci ce ku tondeka ku lihakela kapandi ka kama na ku lipokuesa. Vunoni ku lingamo ka ca puile ku lisina ngoco. Ngeci mukemuo, ntsimbu kanda tu simutuile ha viuma vi tua pande ku linga, tu talenu cimo cihula ci hasa ku katukaho.

9. Vuno ca pua ku sevuka ku tualelelaho ku pangela ha cizango cetu ambe nga ka tuesi na vukatuisi ni? Lombololenu.

⁹ Yehova ua tonda tu mu pangele na ndzolela kaha ku cizango. (Visa. 100:2; 2 Kol. 9:7) Ngeci mukemuo, tue ku lihakela kapandi ka ku lihakela vizango via mu lutsilielo ambe nga ku mutima vui. Tu hilulenu via kapostolo Paulu. Ua handekele ngueni: “Nji pokuesa muvila uange, kaha nji u himpuisa ku vundungo.” (1 Kol. 9:25-27, nota de estudo ha cinimbu 27) Paulu ua kele na ku likakateya ku linga via cili, ambe vene ha ntsimbu ya kele na ku ivua cizango ca ku linga vieka. Vuno Yehova ua tavele vipanga via Paulu ni? Eyo ua vi tavele! Kaha ua mu vezikisile ku kapandi kose ka lihakelele.—2 Tim. 4:7, 8.

10. Vukuasi vuka tu hasa ku uana nga tu pangela ha cizango cetu ambe nga ku mutima vui?

¹⁰ Na vuno vene, Yehova ue ku ivua ndzolela ya kama mue ku tu mona tu pangela ha cizango cetu ambe nga ku mutima vui. Ue ku ivua ndzolela muomu a tantekeya ngecize vintsimbu vimo, tue ku linga cimo cipanga kati muomu tua lema cipanga caco, vunoni muomu tua lema ikeye. Na vuno vene, ngue muze mua vezikisile kapandi ka Paulu, netu a ka tu vezikisa. (Visa. 126:5) Kaha omo tu ka tambula vivezikiso via Yehova, tu ka putuka ku ivua cizango ka ku lihakela kapandi kakuavo. Ndumbuetu Lucina ua ku Polonia ngueni: “Vintsimbu vimo, ka nje ku tonda ku tuhuka mu lihia, cikuma-kuma nga nji na hono. Vunoni ndzolela i nje ku ivua mu nima ya ku lingamo ye ku pua vuana vua seho kuli ange.” Ngeci mukemuo, tu talenu ha vika tua pande ku linga nga ku mutima vui.

11. Vati Yehova a hasa ku tu kuasa ku kaniamesa ku lipokuesa cetu?

¹¹ Vundilenu ku lipokuesa. Ku lipokuesa ca pua vuhasi vua ku tuamenena cifua ci tue ku livuilamo na vilinga vietu. Lizi liaco, vintsimbu via vingi lie ku tu lingisa ku singanieka ha ku livindika etu vavene ku viuma via ku vihia. Vunoni cifua caco ca tondeka naua linga tu hase ku ivua ndzili ya ku linga via cili, cikuma-kuma nga viuma viaco via vikalu ku vi linga ni ku mutima vui. Vulukenu ngecize ku lipokuesa ca pua mutamba ua muhako ua sipilitu. Ngeci mukemuo, puenu na ku vundila Yehova linga a mi hane sipilitu santu yeni na ku pangela ha cifua eci ca seho. (Luka 11:13; Ngal. 5:22, 23) David u tu na tumbuile laza, ua lombolola vati ku vundila ce ku mu kuasa. Ua tondele ku lihakela kapandi ka ku lilongesa mu vulika ku-sua kumo. Ivene ngueni: “Nja kele na ku vundila kuli Yehova a nji kuase ku lipokuesa. Na vukuasi Vueni, nja hasele ku panga programa ya cili ya ku lilongesa mu vulika na ku i kava.”

12. Vati citume ca ku Ekelesiaste 11:4 ci hasa ku tu kuasa ku tuala ha vizango via mu lutsilielo?

¹² Kati mu lavelele noho viose vili vuino. Mu mavu ano, citava halumo ka tu ka kala na ntsimbu i tu ka handeka nguetu, ‘Hano honi viose vili vuino.’ Ngeci mukemuo, nga tu lavelela ntsimbu yaco, citava ka tu ka puisamo cizango cetu. (Tandenu Ekelesiaste 11:4.) Muanetu Dayniel ngueni: “Ka kua kele ntsimbu ya ku tantuluka, yetu lika tua pande ku lihakela kapandi ka ku putuka ha ntsimbu i tu mona nguetu tu hasa ku lingako mumo.” Muanetu Paulo ua ku Uganda, ua tumbula naua vusunga vukuavo vua pande ku tu kuasa linga kati tu nakuile viuma ku lutue, ngueni: “Nga tu putuka ku pangela ha cizango cetu ambe ha ntsimbu ya ikalu, tue ku hana Yehova vukovelelo vua ku tu vezikisa.”—Malakiya 3:10.

13. Seho ika ya kala ha ku putuka na vizango via vindende?

¹³ Putukenu kamandende. Halumo tu hasa ku ivua ku mutima vui, muomu tuli na ku mona ngecize cizango cetu ca cikalu. Nga mukemuo, vuno mu hasa ku tepa cizango caco mu mitamba ya indende ni? Nga cizango cenu ca pua ku pangela ha cimo cifua ca mu lutsilielo, ci pua ca cili nga mu putuka ku pangelaho mu kamandende-kamandende. Nga co cizango cenu ca pua ku ku tanda Mbimbiliya yose, mu hasa ku putuka ku tanda-tanda mitamba ya indende kaha mu ntsimbu ya indende. Tomáš, u tu na tumbuile ku vuputukilo, ua pindile na cizango ca ku tanda Mbimbiliya mu muaka. Ivene ngueni: “Nja nongonuene ngecize nji li na ku tanda vinimbu via vingi cikuma. Ngeci mukemuo, nja setekele naua ku linga programa yeka, vunoni ku tanda honi mitamba ya indende nkala litangua na ku hilulaho. Omo liaco, ku tanda ca putukile ku nji tovala.” Kaha omo vukatuisi vueni vua ile na ku livuezelela, muanetu Tomáš ua putukile naua ku vueza ku ntsimbu ya ku tanda. Mu nima yaco ua hasele ku tanda Mbimbiliya ya mutuntu.c

NGA MUA SEVUKA KATI MU HILUKILE MU NIMA

14. Vika vi hasa ku tu lingisa tu hilukile mu nima?

¹⁴ Vunoni ca vusiua ku handeka nguetu, ambe nga tuli na cizango ca kama ni tua lipokuesa vati kasi tu hasa ku hilukila mu nima. Ca ku muenako, viuma via ku tungumuna vi hasa ku punda ntsimbu i tua pande ku pangela ha cizango cetu. (Ekel. 9:11) Kaha tu hasa naua ku hita mu cimo citanga ci tu vuisa vusiua ni ku tu zeyesa. (Visi. 24:10) Ku hona ku tantuluka naco, ci hasa ku tu tanganesa mu cifua cose-oco linga kati tu puisemo cizango cetu. (Loma 7:23) Ni tu hasa ku ivua ku zeya lika kunahu. (Mat. 26:43) Vika vi hasa ku tu kuasa ku vula viuma vie ku tu hiluisila mu nima?

15. Vuno ku sevuka ca lomboloka ku honoua ni? Lombololenu. (Visamo 145:14)

¹⁵ Vulukenu ngecize ku sevuka ka ca lombolokele ku honoua. Mbimbiliya ya handeka nguayo, tu hasa ku hita mu vitanga ni visoti via ku liseza-seza ku hilukila na ku hilukila. Vunoni ya lombolola naua ngecize kasi tu hasa ku katuka naua na vukuasi vua Yehova. (Tandenu Visamo 145:14.) Muanetu Filipe u tu na tumbuile laza, ua lomboluele viuma vie ku puisamo ngueni: “Ku puisamo viuma ka ca hitukilile ha vintsimbu vingahi vi nji hilukila mu nima, vunoni ha vintsimbu vingahi vi nje ku katuka na ku tualelelaho.” Muanetu David u tu na tumbuile laza ngueni: “Ange nje ku seteka ku mona visevuka kati ngue vioua vunoni ngue vukovelelo vua ku muesa vukama vua cilemo cange kuli Yehova.” Cili vene, mu ku tualelelaho kuya ku lutue vutuhu tue ku sevuka, tue ku muesa ngecize tu tonda kuya Yehova ku mutima! Mua vusunga, Yehova ue ku ivua ndzolela ya kama mue ku tu mona tu tualelelaho tu lihakela kapandi ka ku puisamo vizango vietu.

16. Vika tu hasa ku lilongesa ku visevuka vietu?

¹⁶ Lilongeselenu vimo ku visevuka vienu. Singaniekenu ha vika vi na kokele cisevuka caco kaha lihulenu nguenu: “Vuno nji hasa ku alulula vimo linga kati nji ka uile naua mu cisevuka caco ni?” (Visi. 27:12) Vintsimbu vimo, visevuka, vie ku muesa naua ngecize halumo cizango ci tu na lihakelele ka tu ci hasa vene. Nga mu nongonona ngecize cikeco citanga cenu kaha setekenu ku hilula cizango caco na ku mona nga kasi vene muli na vuhasi vua ku ci puisamo ni kuahi.d Yehova ka ka mi mono ku pua mukua ku zeya, muomu ka mua puisilemo cimo cizango ka cesi ku ndzili yenu.—2 Kol. 8:12.

17. Omo lia vika ka tua pandele ku suva vi tua puisamo laza?

¹⁷ Kati mu suve vi mu na puisamo laza. Mbimbiliya nguayo: “Njambi kati mukua vuhenge linga a suve vipanga vienu.” (VaHe. 6:10) Ngeci mukemuo, nenu ka mua pandele ku vi suva. Singaniekenu ha viuma vi mua puisamo laza—ambe nga ku likuata vusamba na Yehova, ku ambulula ni ku mi Mbatiza. Ngue muze vene mu mua kolele mu lutsilielo na ku puisamo vizango via ku nima, kasi mu hasa ku tualelelaho ku kola linga mu puisemo cizango ci mu na lihakela mu ntsimbu ino.—Filp. 3:16.

18. Vika mua pande ku vuluka ku tuala ha kapandi ka mue ku lihakela linga mu puisemo cizango cenu? (Talenu naua cikupulo.)

¹⁸ Na vukuasi vua Yehova mu hasa ku puisamo cizango cenu, ngeci mua vakua ku endesa mato ve ku heta na ndzolela kuze ku va li na kuya. Vunoni vulukenu ngecize cingi ca vakua ku endesa mato, mangendzi avo eku va tovala. Na vuno vene, omo mu tualelelaho ku puisamo cizango cenu ca mu lutsilielo, kati mu suve vukuasi na vivezikiso vie ku mi hana Yehova mu vungendzi. (2 Kol. 4:7) Mua vusunga, nga ka mu hilukila mu nima, mu ka tambula vivezikiso via kama ku tuvakana na vize vi mue ku tambula mu ntsimbu ino.—Ngal. 6:9.