Apocalipsis
3 ”Xijtlajkuiljuili nopa ángel tlen tlanechikoli Sardis: Ya ni tlen kiijtoua katli kipia nopa chikome chikaualistli* tlen Dios* uan katli kipia nopa chikome sitlalimej: ‘Kuali nijmati tlen tijchijtok uan nijmati para nochi kimatij para tiyoltok, pero amo nelia, pampa timiktok. 2 Kuali xitlachixto uan xijtetili tlen nojua mokaua tlen nechka tlamiskia, pampa nikitstok amo tijchijtok nochi tlen Dios kineki xijchiua. 3 Yeka, nochipa xikilnamiki tlen tijselik uan tijtlakakilik. Nochipa xijneltoka uan ximoyolkuepa. Tlaj amo tiisas,* niualas kej se tlachtejketl uan amo kema tijmatis tlake hora niasiki.
4 ” ’Pero ipan Sardis itstokej se keskij katli amo kisokiuijkej ininyoyo, uan inijuantij nejnemisej nouaya ika ininyoyo chipauak, pampa motlanilijkej. 5 Katli tlatlanis kiampa moyoyontis, ika iyoyo chipauak uan amo kema nikixpolos itoka ipan nopa libro kampa nesi ajkia inijuantij kiselisej nemilistli, uan iixpa noTata uan iángeles nikijtos nijmati itoka. 6 Katli kipia inakas, ma kitlakakili tlen Dios kiniljuia tlanechikolmej ika ichikaualis’.*
7 ”Xijtlajkuiljuili nopa ángel tlen tlanechikoli Filadelfia: Ya ni tlen kiijtoua katli eli tlatsejtseloltik, katli eli melauak, katli kipia illave David, ya kaltlapoua uan amo aka ueli kaltsakua, uan ya kaltsakua uan amo aka ueli kaltlapoua: 8 ‘Kuali nijmati tlen tijchijtok. (Xikita, moixpa nijtlalijtok se puerta tlen tlapojtok tlen amo aka ueli kitsakua). Uan nijmati maske amo tlauel tijpia fuerza, tijneltokak notlajtol uan amo tijtlauelkajki notoka. 9 Xikita, nijchiuas nopa grupo katli eli iaxka Satanás, katli kiijtouaj elij judíos pero amo nelia pampa san istlakatij, ma ualakaj uan ma motlankuaketsakaj moikxitla, uan nijchiuas ma kimatikaj para nochipa nimitsiknelijtos. 10 Pampa tikijiyouijtok sanse kej na nikijiyouik, na nimitsmokuitlauis ipan nopa tonali kema katli itstokej ipan Tlaltipaktli tlaijiyouisej para nikitas tlaj kichijtokej tlen kuali o tlen amo kuali. 11 Nimantsi niualas. Nojua ximotlatskilijto ika tlen tijpia para amo aka ma mitskuili mocorona.
12 ” ’Katli tlatlanis nijchiuas ma eli kej se tlaketsali ipan nopa teokali tlen iaxka Dios, uan ayokmo kema kisas. Ipan ya nikijkuilos itoka noDios, itoka ialtepe noDios, Nopa Yankuik Jerusalén tlen temo tlen iluikak, desde kampa itstok noDios, uan nojkia nikijkuilos notoka tlen yankuik. 13 Katli kipia inakas, ma kitlakakili tlen Dios kiniljuia tlanechikolmej ika ichikaualis’.
14 ”Xijtlajkuiljuili nopa ángel tlen tlanechikoli Laodicea: Ya ni tlen kiijtoua katli kiiljuiaj Amén,* katli eli testigo tlen amo kitlauelkaua Dios uan katli kiijtoua tlen melauak, katli Dios achtoui kichijchijki: 15 ‘Kuali nijmati tlen tijchijtok uan nijmati para amo tisesek yon titotonik. Kuali tlaj tieliskia tisesek o titotonik. 16 Pero pampa tieli tiyamankatotonik, kiijtosneki amo tieli titotonik yon tisesek, uajka nimitsisotlas. 17 Ta tikijtoua titlatominpia, tijpixtok miak tlamantli uan amo tleno mitspoloua, pero amo timomaka cuenta para amo tiyolpaki, titeiknelti, amo tleno tijpia, amo titlachia uan tiitstok tixolotik.* 18 Yeka, nimitsiljuia xinechkouili tlen eli senkistok oro tlen kipanoltijtokej ipan tlitl para titlatominpias, yoyomitl chipauak tlen timokentis uan kiampa amo tipinauas pampa sekinok mitsitasej tixolotik, uan pomada para timopolos* ipan moixteyol uan kiampa uelis titlachias.
19 ” ’Na nikinxitlaua uan nikintlalnamiktia nochi katli nikiniknelia. Yeka xijchiua kampeka tijtekipanos Dios ika nochi moyolo uan ximoyolkuepa. 20 Xikita, niijkatok kalteno kampa puerta uan nitlanojnotstok. Tlaj se akajya kikakis notoskak uan kaltlapos, nikalakis ichaj uan sansejko titlakuasej. 21 Katli tlatlanis nijkauas ma moseui nouaya ipan noueyi silla, sanse kej na nitlatlanki uan nimoseuik iuaya noTata ipan iueyi silla. 22 Katli kipia inakas, ma kitlakakili tlen Dios kiniljuia tlanechikolmej ika ichikaualis’ ”.