Jeremías nochipa tlamachtik tlen Jehová

Kemantika maseualmej techpinajtiaj o kualanij pampa titemachtiaj tlen Jehová. Yeka uelis ayokmo tijnekij titemachtisej tlen toTeotsij. ¿Nojkia kej nopa mitspanotok?... Biblia kiijtoua uejkajkia itstoya se tlakatl katli tlauel kiikneliyaya Jehová. Nopa tlakatl motokaxtik Jeremías. Maske tlauel kiikneliyaya Jehová, se tonali nojkia ayokmo kinejki temachtis tlen kiiljuijtoya. Ma tikitakaj kenke.

Kema Jeremías eliyaya se telpokatl, Jehová kiiljuik ma kiniljui maseualmej ayokmo ma kichiuakaj tlen amo kuali. Jeremías tlauel majmajki pampa kimatiyaya ouij kichiuaskia nopa. Yeka kiiljuik Jehová: “Na nojua tlauel nitelpokatl uan amo nijmati tlake nikiniljuis”. Jehová kiiljuik: “Amo ximajmaui, na nimitspaleuis”.

Uajka, Jeremías kiniljuik maseualmej tlaj nojua kichiuaskiaj tlen amo kuali, toTeotsij kintlatsakuiltiskia. ¿Timoiljuia kineltokakej?... Amo, sekij san kipinajtijkej uan tlauel kualankej. ¡Uan sekij kinekiyayaj kimiktisej! ¿Kenijkatsa timoiljuia kiyolmatki Jeremías?... Tlauel majmajki uan kiijtok: “Ayokmo niteiljuis tlen Jehová nechiljuijtok”. ¿Nelia ayokmo teiljuiskia?... Amo, pampa Jeremías tlauel kiikneliyaya Jehová. Yeka nojua teiljuik tlen Jehová kinauatijtoya. Uan pampa kichijki nopa, Jehová kipaleuik Jeremías uan amo kikajki ma kichiuilikaj tlen amo kuali.

Se tonali, se keskij tlakamej katli tlauel mosisiniyayaj, kikuamajkajkej Jeremías ipan se ameli tlen san kipixtoya sokitl. Jeremías amo kipiayaya tlen kikuas yon tlen kiijis. Maske nopa tlakamej kinekiyayaj nopaya ma miki, Jehová kipaleuik uan kichijki ma kikixtikaj Jeremías.

¿Tlake techmachtia tlen kipanok Jeremías?... Maske kemantika Jeremías majmajki, ya nochipa teiljuik tlen Jehová kinauatik. Uelis kema tikinnojnotsas sekinok tlen toTeotsij, nojkia mitspinajtisej o kualanisej mouaya, yeka kemantika tipinauas o timajmauis. Maske kej nopa mitspanos, ta nochipa xikinnojnotsa tlen Jehová. Xikilnamiki ya nochipa mitspaleuis kej kipaleuik Jeremías.