Josías kipatiitayaya toTeotsij iTlanauatiljuaj

Josías pejki tekichiua ipan Judá kema kipixtoya chikueyi xiuitl. Ipan nopa tonali, maseualmej kitekiuiyayaj magia uan kinueyichiuayayaj teotsitsij. Kema Josías kipixtoya 16 xiuitl, kinejki kiueyichiuas Jehová kej kinamiki. Kema kipixtoya 20 xiuitl, kinijkuinik nochi teteyomej uan tlaixpamitl tlen eltoya ipan nochi nopa tlali. Uan kema kipixtoya 26 xiuitl, tlanauatik ma kikualchijchiuakaj nopa teokali.

Kema kikualchijchiuayayaj nopa teokali, nopa sumo sacerdote Hilcías kipantik toTeotsij iTlanauatiljuaj. Uelis eliyaya nopa Tlanauatili tlen Moisés kiijkuilok. Uajka, Safán, nopa tlajkuilojketl, kiuikilik Josías nopa amatlajkuiloli mimiltik uan kipouilik. Kema Josías kikajki tlen Safán kipouayaya, kiitak miak xiuitl amo kichijtoyaj tlen Jehová kinnauatijtoya. Uajka nopa tlanauatijketl kiiljuik Hilcías: “Jehová tlauel kualantok touaya. Xitlajtlaniti tlake moneki tijchiuasej”. Jehová kinauatik se siuatl katli tlajtolpanextiyaya, ma kiiljui Hilcías: “Judáeuanij nechtlauelkajtokej, yeka nikintlatsakuiltis. San amo nikintlatsakuiltis kema Josías nojua tlanauatijtos, pampa ya amo moueyimati”.

Kema Josías kimatki tlen Jehová kiijtojtoya, yajki ipan teokali uan kinsentilik nochi judáeuanij. Teipa, kinpouilik toTeotsij iTlanauatiljuaj. Josías uan judáeuanij kiiljuijkej Jehová kineltokaskiaj ika nochi ininyolo.

Miak xiuitl judáeuanij amo kichijtoyaj nopa Pascua. Kema Josías kipojki nopa Tlanauatili kiitak monekiyaya sejse xiuitl kichiuasej Pascua. Uajka kiniljuik nochi judáeuanij: “Nama tijchiuilisej se iljuitl Jehová. Tijchiuasej nopa Pascua”. Teipa, Josías tlanauatik ma temakakaj miak tlakajkaualistli uan ma kintlapejpenikaj katli uikaskiaj ipan teokali. Judáeuanij iljuichijkej chikome tonali, kichijkej nopa Pascua uan nopa Iljuitl tlen nopa Pantsi tlen Amo Kixokoltijtoyaj. Ayokmo kema kiampa iljuichijtoyaj, san kema Samuel itstoya kiampa iljuichiuayayaj. Josías tlauel kipatiitayaya toTeotsij iTlanauatiljuaj. Uan ta, ¿nojkia mitspaktia timomachtis tlen Jehová?