Se tlakatl tlen amo majmajki

XIKITA ipan tlaixkopinkayotl kenijkatsa kiuetskiliaj ni telpokatl. ¿Tijmati tlake itoka? Itoka Jeremías, ya elki se toTeotsij itlajtolpanextijka tlen nojkia tlauel kiixmatkej.

Teipa kema tlanauatijketl Josías ya kipeualtijtoya kintlamiltia teteyomej ipan nopa altepetl, Jehová kiiljuik Jeremías ma eli Itlajtolpanextijka. Uan Jeremías kiijtok amo ueliskia pampa ya nojua eliyaya telpokatl. Yeka Jehová kiiljuik Yaya kipaleuiskia.

Jeremías kiniljuik israeleuanij ayokmo ma kichiuakaj tlen amo kuali. Kiijtok: ‘Kampa ueli kinueyichiuaj teotsitsij katli amo melauakej’. Uan maske kiniljuik ni, miakej israeleuanij kinejkej kinueyichiuasej teteyomej uan amo Jehová katli nelnelia toTeotsij. Yeka kema Jeremías kinmatiltik kintlatsakuiltiskia toTeotsij pampa san tlemach tlachiuayayaj, inijuantij san kiuetskilijkej.

Kema ya panotoya miak xiuitl, Josías mijki. Uan kema panok eyi mestli, kitekitlalijkej ikone Joacim (o Jehoiaquim). Uajka Jeremías sampa kiniljuik israeleuanij: ‘Jerusalén kixoleuasej tlaj inmojuantij amo inmoyolpatlasej’. Yeka sacerdotes kiitskijkej Jeremías uan chikauak kiijtojkej: ‘Jeremías kinamiki mikis pampa kiijtoua tlen amo kuali ipantis ni altepetl’.

¿Tlake kichijki Jeremías? ¡Ya amo majmajki! Yeka nochi kiniljuik: ‘ToTeko [Jehová] nechtitlanki ma niinmechiljuiki ni tlajtoli. Tlaj amo inkikauasej inmotlajtlakoljuaj, inmechtlatsakuiltisej. Uan tlaj innechmiktisej, kuali xijmatikaj inkimiktisej se tlakatl tlen amo kipia tlajtlakoli’.

Maske nopa tlayakananij amo kimiktijkej Jeremías, israeleuanij nojua san tlemach tlachiuayayaj. Teipa Nabucodonosor katli tlanauatiyaya ne Babilonia, kinteuito jerusaléneuanij. Uajka Nabucodonosor kinuikak miakej israeleuanij ne Babilonia uan kinchiualtik ma kitekipanokaj. San ximoiljui, ¿kenijkatsa tijyolmatiskia tlaj mitsuikaskiaj ipan seyok altepetl tlen amo tikixmati?