KEJ TIMONEJNEMILTIAJ

Se yankuik tlaxeloli ipan tlanechikoli Kej Timonejnemiltiaj uan Titlajtolmoyauaj

Ipan enero 2018, ipan tlanechikoli Kej Timonejnemiltiaj uan Titlajtolmoyauaj peuas timomachtisej nopa notas, tlaixkopinkayomej uan videos tlen kipia nopa Biblia tlen ika timomachtiaj, tlen eltok ipan Internet, Traducción del Nuevo Mundo de las Santas Escrituras (nwtsty), kiampa tijchiuasej maske nopa Biblia amo eltos ipan totlajtol. Nopa tlauel techpaleuis kema timomachtisej tlen moixtomas ipan tlanechikoli. Uan techpaleuis nojua ma tijnechkauikaj Jehová, toTata katli tlauel techiknelia.

NOTAS TLEN TIMOMACHTISEJ

Ipan se keski versículos kipia notas tlen kiijtoua kenijkatsa itstoyaj uejkajkia, kenijkatsa eliyayaj altepemej uan tlake tlajtoli kitekiuiyayaj.

Mateo 12:20, TNM

Se mecha tlen kichijchijtokej ika lino popokatok: Uejkajkia ipan ininchaj maseualmej motlauiliyayaj ika pilxarrojtsitsij tlen kitekiliyayaj aceite de oliva uan kipixtoya se mecha tlen kichijchijtoyaj ika lino. Nopa aceite tlejkoyaya ipan nopa mecha uan kichiuayaya ma lemento. Kema ipan tlajtoli griego kiijtoua se mecha tlen kichijchijtokej ika lino popokatok, kiijtosneki nopa mecha popokatok pampa nojua totonik maske nopa tlitl seuisneki o ya sejki. Nopa tlajtolpanextili tlen ijkuilijtok ipan Isaías 42:3, TNM, kiijtoua Jesús kejuak amo kikauaskia ma seui nopa tlitl, nopa kiijtosneki ya teikneliskia uan kinyolchikauaskia maseualmej katli tlaijiyouiyayaj.

Mateo 26:13

Nelia; nelnelia: Ipan griego uan hebreo, nopa tlajtoli amén kiijtosneki “kiampa ma mochiua” o “nelnelia”. Jesús kitekiuiyaya ni tlajtoli kema kiijtoskia se tlamantli, se tlajtolpanextili o kema kiijtok mochiuaskia se tlamantli. Kiampa kinextiyaya ueliskiaj motemachisej ipan tlen kiijtojtoya uan eliyaya melauak. Sekij kiijtouaj nopa tlajtoli “nelia” o “amén” tlen Jesús kitekiuik, san motekiuia ipan amochtli tlen kamanalti tlen toTeotsij. Ipan pilamochtsi Juan, kema Jesús ompa kiijtouayaya nopa tlajtoli (amén amén), motlajtolkueptok “nelnelia” (Juan 1:51, TNM).

TLAIXKOPINKAYOMEJ UAN VIDEOS

Tlaixkopinkayomej uan videos kinextia se keski tlamantli tlen kiijtoua Biblia.

Betfagé, tepetl Olivos uan Jerusalén

Ni video kinextia se ojtli tlen onasi Jerusalén, ni ojtli eltok ika este. Nopa ojtli peua ipan altepetl et-Tur, tlen sekij kiijtouaj achtouia eliyaya Betfagé, uan onasi ipan tepetl Olivos. Betania mokaua ika este tlen Betfagé, ika este tlen nopa tepetl Olivos. Kema Jesús uan itokilijkauaj yauiyayaj Jerusalén, nochipa panoyayaj Betania uan nopaya mokauayayaj se youali. Nama nopaya eltok nopa pilaltepetsi el-Ázariyeh (El Éizariya), itoka eltok ipan tlajtoli árabe uan kiijtosneki “Kampa Lázaro itstoya”. Jesús mokauayaya ininchaj Marta, María uan Lázaro (Mt 21:17; Mr 11:11; Lu 21:37; Jn 11:1). Kema Jesús kisteuayaya tlen ininchaj uan yauiyaya Jerusalén, uelis yauiyaya ipan nopa ojtli tlen nesi ipan video. Ipan tonali 9, metstli nisán, xiuitl 33, Jesús tlejkok ipan se burro, panok ipan tepetl Olivos uan asito Jerusalén. Uelis kistejki Betfagé, uan yajki ipan nopa ojtli tlen onasi Jerusalén.

Ojtli tlen peua ipan Betania uan onasi Betfagé
Betfagé
Tepetl Olivos
Tlamayamitl Cedrón
Tepetl kampa eltok teokali

Se maseuali iomiyo tlen kikalakilijtokej se clavo

Ipan ni tlaixkopinkayotl kiixkopintokej se omitl tlen kikalakilijtokej se ueyi clavo tlen kipixtoya 11,5 centímetros iueueyaka (4,5 pulgadas). Nopa omitl kipantijkej ipan xiuitl 1968, kema tlaxauayayaj ipan Jerusalén ika norte, uan kiijtouaj nopa maseuali itstoya kema romaeuanij tlanauatiyayaj. Tlen kipantijkej, kinextia kema kinkuapilouayayaj maseualmej uelis kitekiuiyayaj clavos. Uelis kiampa eliyaya nopa clavos tlen kitekiuijkej nopa soldados romaeuanij kema kikuapilojkej Jesús. Nopa omitl kipantijkej kampa kiajokuij iomiyo se maseuali katli kikixtijkej kampa kitlalpachojtoyaj. Nopa kinextia maske se akajya kikuapilouayayaj nojkia kitlalpachouayayaj (Mt 27:35).