LEVÍTICO

1 Uan Jehová kiualnotsak Moisés desde kaltsin kampa israelitas taueyichiuayaj,* uan kiluij: 2 “Xikinilui israelitas nejin: ‘Komo nankimaktilitij Jehová se namotapial, moneki yeski se kuakouej, se ichkat* oso se chivo.

3 ”’Akin kiuikas se kuakouej para maj kichichinouilikan Dios, moneki yeski se kuakuejueuet tein kuali yetos uan yekin moskaltijtos. Kitemakas porin ijkon kiixtalij uan kiuikilis Jehová ikalakyan kaltsin. 4 Moneki kitalis imay ikuako in kuakouej, uan Dios kiyolpaktis tein kimaktilia uan kiixpolos itajtakoluan.

5 ”’Moneki kimiktiskej kuakouej iixpan Jehová. Uan ikoneuan Aarón, akin tekitij kemej tiopixkamej, kimaktiliskej Dios iesyo tapial uan kipijpisuiskej ikejkespan altar, tein yetok ikalakyan kaltsin. 6 Nejon tapial moneki kikixtiliskej ipankuetaxyo uan kikojkotonaskej. 7 Ikoneuan Aarón moneki kitaliskej tekol itech altar uan ompa kitaliskej kouit. 8 Yejuan kitaliskej nakat tein kikojkotonkej iuan itsontekon uan imantecayo* itech kouit tein xotatos itech altar. 9 Kipajpakaskej ikuitaxkol* uan imetsuan, uan tiopixkat moneki kitamichichinos itech altar para maj popoka. Nejin kitamichichinouiliskej Jehová uan yejua semi kiajuiyakmatis.*

10 ”’Akin kiuikas se itapial para maj kichichinouilikan Dios, yeski se ichkat oso se chivo, moneki maj tapialueuet uan maj kuali yeto. Uan ichkat moneki yekin moskaltijtos. 11 Moneki kimiktiskej iixpan Jehová, tanakastan* den altar. Uan ikoneuan Aarón kipijpisuiskej esti ikejkespan altar. 12 Kikojkotonaskej tapial, uan tiopixkat kitalis nakat iuan itsontekon uan imantecayo* itech kouit tein xotatos itech altar. 13 Kipajpakaskej ikuitaxkol* uan imetsuan, uan tiopixkat moneki kimaktilis Dios nochi uan kichichinos itech altar para maj popoka. Nejin kitamichichinouiliskej Jehová uan yejua semi kiajuiyakmatis.

14 ”’Sayoj ke, akin kiuikas totomej para maj kichichinouilikan Jehová, moneki yeskij palomas oso palomajkonemej. 15 Tiopixkat kimaktilis Dios sejse tototsin itech altar, ika iisti kikechtekis uan kichichinos itech altar para maj popoka. Sayoj ke kichiuas maj iesyo temo ikespan altar. 16 Moneki kikixtilis ibuche uan iijuiyo uan kitamotas tanakastan den altar kampa ika ualkisa tonaltsin, kampa kitemaj koujnex.* 17 Uan moneki kiixtapos tepitsin iajtapalkopa sayoj ke maj amo kitajkokotona. Tiopixkat moneki kichichinos itech altar para maj popoka. Nejin kitamichichinouilis Jehová uan yejua semi kiajuiyakmatis.

2 ”’Uan akin kiuikas teisa tachijchiuj ika harina para kimaktilis Jehová, moneki yeski tachijchiuj ika harina tein okachi kuali. Moneki kitekilis aceite uan no kiuikas istak kopal. 2 Kinuikilis ikoneuan Aarón, akin tekitij kemej tiopixkamej, uan tiopixkat kikuis se tamatsol harina tein tamanelol ika aceite uan kikuis nochi in istak kopal. Tamatsol tein kikuis kiixnextis nochi tein kimaktiliti Dios. Kichichinos nejon itech altar para maj popoka uan Jehová semi kiajuiyakmatis. 3 Uan tein mokauas, ininaxka yeski Aarón uan ikoneuan. De nochi tein kichichinouiliskej Jehová, kixeloj nejin sayoj para yejuan.

4 ”’Komo tikmaktiliti Dios tein tikyokxitij itech tikomit, moneki yeski ika harina tein okachi kuali. Moneki tikmanelos harina uan aceite uan tikchijchiuas pantsin tein ijtikoyoktik. Oso no uelis tikchijchiuas seki taxkaltsitsin tein kajkanauak uan tikojxilis aceite. Nion se taman tiktalilis levadura.

5 ”’Komo tikmaktiliti Dios tein tikyokxitij itech se komal, moneki yeski tachijchiuj ika harina tein okachi kuali, tikmanelos ika aceite uan amo tiktalilis levadura. 6 Moneki tiktajtapanas uan tiktekilis aceite.

7 ”’Komo tikmaktiliti Dios tein tikyokxitij itech se komit, moneki yeski tachijchiuj ika harina tein okachi kuali uan ika aceite. 8 Moneki tikuikilis Jehová nejon uan tikmakatiuj tiopixkat, uan yejua kiuikas itech altar. 9 Tiopixkat kikuis tepitsin, uan nejon kiixnextis nochi tein tikmaktiliti Dios. Kichichinos itech altar para maj popoka uan Jehová semi kiajuiyakmatis. 10 Uan tein mokauas, ininaxka yeski Aarón uan ikoneuan. De nochi tein kichichinouiliaj Jehová, kixeloj nejin sayoj para yejuan.

11 ”’Amo xikmaktilikan Jehová teisa tachijchiuj ika harina tein kipia levadura, porin Jehová amo kineki xikchichinouilikan harinajtix tein kipia levadura nion nekti.*

12 ”’Komo kipia levadura oso nekti, uelis nankimaktiliskej Jehová keman nankitemakaskej tein achto chikauaya, sayoj ke amo kichichinoskej itech altar.

13 ”’Nochi tein tikchijchiuas ika harina para tikmaktilis Dios moneki tiktalilis istat. Nochipa xiktalili istat tein mitselnamiktia tein moDios motenkauak. Nochipa keman tiktemaktis teisa, moneki tiktalilis istat.

14 ”’Komo tikmaktiliti Jehová trigo oso okseki xinach tein achto chikauayak, moneki tikteuatsas uan tikpayanas. 15 Moneki tiktekilis aceite uan tiktalilis istak kopal. 16 Uan tiopixkat kikuis tepitsin de nejon xinach tein tikpayanak uan tikmaneloj ika aceite uan istak kopal. Tein kikuis kiixnextis nochi tein tikmaktiliti Dios. Kichichinouilis Jehová para maj popoka.

3 ”’Akin kimaktilis Jehová se kuakouej para sentakuaskej,* moneki kiuikilis se tein kuali yetok. 2 Yejua moneki kitalis imay ikuako in kuakouej, uan moneki kimiktiskej ikalakyan kaltsin kampa kiueyichiuaj Dios.* Uan ikoneuan Aarón, akin tekitij kemej tiopixkamej, kipijpisuiskej esti ikejkespan altar. 3 Seki taman tein kipia nejon tapial kichichinouilis Jehová. Kichichinouilis imantecayo tein kipia ipoxko uan nochi manteca tein kipanpia ikuitaxkol,* 4 ome iriñones uan imantecayo, uan manteca tein kipia ikuitapankopa. No kikixtilis imantecayo tein kipia itech ieltapach. 5 Uan ikoneuan Aarón kichichinoskej nochi nejin itech altar para maj popoka. Kitaliskej tapani den tapial tein chichinaujtos itech altar. Nejin kichichinouiliskej Jehová uan yejua semi kiajuiyakmatis.

6 ”’Akin kimaktilitiuj Jehová se ichkat oso se chivo para takuas iuan, tapial moneki kuali yetos. Uelis yeski se tapialueuet oso tapial lamat. 7 Komo kitemakati se ichkaueuet* tein yekin moskaltijtok, moneki kiuikilis Jehová. 8 Kitalis imay ikuako in tapial uan kimiktiskej taixpan den kaltsin. Uan ikoneuan Aarón kipijpisuiskej esti ikejkespan altar. 9 Kichichinouilis Jehová imantecayo tapial. Kitekilis ikuitapil tein tel mantecayoj desde kampa peua, kikixtilis imantecayo tein kipia ipoxko uan nochi manteca tein kipanpia ikuitaxkol,* 10 ome iriñones uan imantecayo, uan manteca tein kipia ikuitapankopa. No kikixtilis imantecayo tein kipia itech ieltapach. 11 Uan tiopixkat kichichinos nochi itech altar para maj popoka. Nejin takual kichichinouiliskej Jehová.

12 ”’Akin kitemakati se chivo, moneki kiuikilis Jehová. 13 Kitalis imay ikuako in tapial uan kimiktiskej taixpan den kaltsin. Uan ikoneuan Aarón moneki kipijpisuiskej esti ikejkespan altar. 14 Kichichinouilis Jehová imantecayo tein kipia ipoxko uan nochi manteca tein kipanpia ikuitaxkol,* 15 ome iriñones uan imantecayo, uan manteca tein kipia ikuitapankopa. No kikixtilis imantecayo tein kipia itech ieltapach. 16 Uan tiopixkat kichichinos nochi itech altar para maj popoka. Nejin takual kichichinouiliskej Dios uan yejua semi kiajuiyakmatis. Nochi imantecayo tapial iaxka Jehová.

17 ”’Desde axkan, namejuan uan namokoneuan moneki nankitakamatiskej nejin tanauatil kampa yeski nanemiskej: amo keman xikuakan imantecayo se tapial nion esti’”.

4 Uan Jehová no kiluij Moisés: 2 “Xikinilui israelitas: ‘Takan aksa* kichiua tein Jehová kijtoua ke amo kuali, maski amo kinekia, nejon se tajtakol. Yejua ika moneki mochiuas nejin:

3 ”’Komo tayekankatiopixkat kichiua tein amo kuali uan nochin israelitas moneki taxtauaskej por nejon tajtakol, moneki kimaktilis Jehová se kuakouej para maj kitapojpolui. Nejon kuakouej moneki maj yekin moskaltijto uan maj kuali yeto. 4 Kiuikilis Jehová in kuakouej ikalakyan kaltsin kampa kiueyichiuaj,* kitalis imay ikuako in kuakouej uan kimiktis iixpan Jehová. 5 Uan tayekankatiopixkat kikuis tepitsin iesyo in kuakouej uan kiuikas kalijtik. 6 Momajpilkalakis itech esti uan kipijpisuis iixpan Jehová chikome viaje. Kipijpisuis taixpan den cortina tein yetok itech cuarto tein monotsa Santo. 7 Tiopixkat no kitalilis tepitsin esti cuernos tein kipia altar kampa tapopochuiaj, tein yetok kalijtik iixpan Jehová. Uan esti tein mokauas, kitoyauas itsintan altar kampa kichichinouaj tein kimaktiliaj Dios, tein yetok taixpan de ikalakyan kaltsin.

8 ”’Kikixtilis nochi imantecayo kuakouej tein kitemaktij: imantecayo tein kipia ipoxko uan nochi manteca tein kipanpia ikuitaxkol,* 9 ome iriñones uan imantecayo, uan manteca tein kipia ikuitapankopa. No kikixtilis imantecayo tein kipia itech ieltapach. 10 Kikixtilis tein kikixtiliaj kuakouej tein kimaktiliaj Dios para iuan sentakuaskej.* Uan tiopixkat kichichinos nochi itech altar para maj popoka.

11 ”’Sayoj ke, yejua nejin kichiuilis ipankuetaxyo kuakouej, nochi inakayo, itsontekon, imetsuan, ikuitaxkol* uan ikuit: 12 tanauatis maj kiuikakan kampa tachipaujkan uejka den kaltsitsin,* kampa kitemaj koujnex.* Taxotaltis* ika kouit uan ompa kitatis* nochi.

13 ”’Uan komo nochin israelitas kichiuaj se tajtakol maski amo kinekiaj, sayoj ke amo kimatiaj ke kichiujkej tein Jehová kijtoua ke amo kuali 14 uan satepan momati, moneki kimaktiliskej Dios se kuakouej tein yekin moskaltijtok para maj kintapojpolui. Moneki kiuikaskej taixpan den kaltsin. 15 Taixyekananij israelitas kitaliskej ininmay ikuako in kuakouej iixpan Jehová, uan kimiktiskej iixpan Jehová.

16 ”’Tayekankatiopixkat kikuis tepitsin iesyo in kuakouej uan kiuikas kalijtik. 17 Moneki momajpilkalakis itech esti uan kipijpisuis iixpan Jehová chikome viaje. Kipijpisuis taixpan den cortina. 18 Uan kitalilis tepitsin esti cuernos tein kipia altar tein yetok kalijtik iixpan Jehová. Uan esti tein mokauas, kitoyauas itsintan altar kampa kichichinouaj tein kimaktiliaj Dios, tein yetok taixpan de ikalakyan kaltsin. 19 Kikixtilis nochi imantecayo kuakouej uan kichichinos itech altar para maj popoka. 20 Kichiuilis nejin kuakouej tein kichiuilia kuakouej tein kitemaktia para maj Dios kitapojpolui. Ijkon tiopixkat kitemaktis in tapial para maj Dios kiixpolo inintajtakol israelitas, uan yejua kintapojpoluis. 21 Uan tein mokauas den kuakouej, tanauatis maj kiuikakan uejka den kaltsitsin uan kitatis,* ijkon kemej kichiuak iuan okse kuakouej. Kitemaktiskej nejin tapial para maj Dios kintapojpolui nochin israelitas.

22 ”’Komo se taixyekankej israelita kichiua tein iDios Jehová kijtoua ke amo kuali, maski amo kinekia, 23 oso momaka cuenta ke amo kitakamatik se tanauatil, nejon se tajtakol. Yejua ika, moneki kitemaktis se chivojkonet tein kuali yetos. 24 Kitalis imay ikuako chivojkonet uan kimiktis kampa kinmiktiaj tapialmej tein kichichinouaj iixpan Jehová. Kitemaktis nejin chivojkonet para maj Dios kitapojpolui. 25 Tiopixkat kikuis ika imajpil tepitsin iesyo tapial uan kitalilis cuernos tein kipia altar kampa kichichinouaj tein kimaktiliaj Dios. Uan esti tein mokauas kitoyauas itsintan nejon altar. 26 Uan nochi imantecayo chivojkonet kichichinos itech altar para maj popoka, ijkon kemej kichiuak ika imantecayo tapial tein kimaktilijkej Dios para iuan sentakuaskej. Tiopixkat kichiuas nejin para maj Dios kiixpolo itajtakol nejon takat uan yejua kitapojpoluis.

27 ”’Komo se israelita kichiua tein Jehová kijtoua ke amo kuali, maski amo kinekia, 28 oso momaka cuenta ke kichiuak se tajtakol, moneki kitemaktis se chivojlamat para maj Dios kitapojpolui. Nejon chivojlamat moneki tsikitsinok yeski uan kuali yetos. 29 Kitalis imay ikuako in tapial uan kimiktis kampa kinmiktiaj tapialmej tein kichichinouiliaj Dios. 30 Tiopixkat kikuis ika imajpil tepitsin iesyo tapial uan kitalilis cuernos tein kipia altar kampa kichichinouaj tein kimaktiliaj Dios. Uan esti tein mokauas kitoyauas itsintan altar. 31 Uan kikixtilis nochi imantecayo nejin tapial, ijkon kemej kikixtiliaj tapial tein kimaktiliaj Dios para iuan sentakuaskej. Uan tiopixkat kichichinos itech altar para maj popoka uan Jehová semi kiajuiyakmatis. Tiopixkat kichiuas nejin para maj Dios kiixpolo itajtakol akin kichiuak tein amo kuali uan yejua kitapojpoluis.

32 ”’Sayoj ke, komo kitemaka se ichkatsin* para maj Dios kitapojpolui, moneki yeski se ichkalamat uan kuali yetos. 33 Kitalis imay ikuako in tapial uan kimiktis kampa kinmiktiaj tapialmej tein kichichinouiliaj Dios. Kimaktilis Dios para maj kitapojpolui. 34 Tiopixkat kikuis ika imajpil tepitsin iesyo tapial uan kitalilis cuernos tein kipia altar kampa kichichinouaj tein kimaktiliaj Dios. Uan esti tein mokauas kitoyauas itsintan altar. 35 Kikixtilis nochi imantecayo nejin tapial. Kikixtilis tein kikixtiliaj ichkaueuet tein yekin moskaltijtok tein kimaktiliaj Dios para iuan sentakuaskej. Uan tiopixkat kichichinos itech altar para maj popoka. Kitalis tapani den tapial tein kichichinouilijtoskej Jehová itech altar. Tiopixkat kichiuas nejin para maj Dios kiixpolo itajtakol akin kichiuak tein amo kuali uan yejua kitapojpoluis.

5 ”’Akin kiita oso kimati ke aksa* kichiuak teisa tein amo kuali uan kikaki ke tanotstokej* para maj kijtokan tein panok, uan amo teyi kijtoua, nejon se tajtakol uan moneki taxtauas.

2 ”’Oso takan aksa kikitskia* tein amo chipauak, maski nion kimatis, mopitsotilia. Nejon se tajtakol. Uelis yeski por se tapial miket tein Dios kiita ke amo chipauak, kemej se koujtajtapial, se tapial tein momati kalijtik oso semej okuiltsitsin tein olochnemij. 3 Oso komo mokuiltia akin amo chipauak oso kikitskia teisa tein uelis kichiuas maj mopitsotili uan nion kimati, uan satepan momaka cuenta, nejon se tajtakol.

4 ”’Oso akin kijtojtiuetsi ke kichiuas teisa, yeski kuali oso amo, uan satepan momaka cuenta ke amo uelis kichiuas, nejon se tajtakol.*

5 ”’Akin kichiuas se taman kemej nejin, moneki kijtos toni tajtakol kichiuak. 6 No kiuikilis Jehová se tapial tein tsikitsinok para maj kitapojpolui porin kichiuak tein amo kuali. Uelis yeski se ichkalamat oso se chivojlamat. Uan tiopixkat kimaktilis Dios nejon para maj kiixpolo itajtakol akin kichiuak tein amo kuali.

7 ”’Sayoj ke komo amo kiajsi tomin para kikouas se ichkat,* moneki kiuikilis Jehová ome palomas oso ome palomajkonemej porin kichiuak tein amo kuali. Se paloma kimaktilis Dios para maj kitapojpolui uan okse para kichichinouiliskej. 8 Moneki kiuikilis tiopixkat nejon palomas. Tiopixkat achto kimaktilis Dios in paloma tein kiuikak para maj kitapojpolui. Ika iisti kikechtekis, sayoj ke amo kikechkotonas. 9 Uan tepitsin iesyo nejon paloma kipijpisuis ikespan altar. Uan tein mokauas kichiuas maj ijxika itsintan altar. 10 Uan okse paloma kichichinouilis Dios, kemej ipa kichichinouiliaj okseki taman. Tiopixkat kichiuas nejin para maj Dios kiixpolo itajtakol uan yejua kitapojpoluis.

11 ”’Sayoj ke komo amo kiajsi tomin para kikouas ome palomas oso ome palomajkonemej, moneki kiuikilis Dios se kilo harina tein okachi kuali para maj kitapojpolui. Maj amo kitekili aceite nion maj kitalili istak kopal, porin kitemaktia nejon para maj Dios kitapojpolui. 12 Kiuikilis tiopixkat uan tiopixkat kikuis se tamatsol harina uan kichichinos itech altar para maj popoka. Tamatsol tein kikuis kiixnextis nochi tein kimaktiliti Dios. Kitalis tapani den tapial tein kichichinouilijtoskej Jehová itech altar. 13 Uan tiopixkat kichiuas nejin para maj Dios kiixpolo itajtakol akin kichiuak semej nejon tajtakolmej, uan yejua kitapojpoluis. Uan harina tein mokauas iaxka yeski tiopixkat, ijkon kemej mokauilia keman kimaktiliaj Dios teisa tachijchiuj ika harina’”.

14 Jehová no kiluij Moisés: 15 “Akin amo kikuis kemej moneki tein xeliujtok para Jehová maski amo kinekia, nejon se tajtakol. Yejua ika moneki kiuikilis Jehová se ichkaueuet tein kuali yetos porin kichiuak tein amo kuali. Tiopixkat kijtos kanachi plata yeski ipatiuj ichkaueuet. Yejua kitamachiuas plata ika pesa tein kikuij kampa Dios taxeloj. 16 Akin tajtakoj moneki taxtauas porin amo kikuik kemej moneki tein xeliujtok para Dios, uan no moneki kitemakas tepitsinok.* Nochi nejon kimakas tiopixkat. Uan tiopixkat kimaktilis Dios in ichkaueuet para maj kiixpolo itajtakol uan yejua kitapojpoluis.

17 ”Takan aksa kichiua tein Jehová kijtoua ke amo kuali, maski amo kimatik, nejon se tajtakol uan moneki taxtauas. 18 Moneki kiuikilis tiopixkat se ichkaueuet tein kuali yetos porin kichiuak tein amo kuali maski amo kinekia uan nion kimatik. Tiopixkat kiixtalis ipatiuj ichkaueuet. Uan yejua kimaktilis Dios para maj kiixpolo itajtakol, uan Dios kitapojpoluis. 19 Kimaktilis Jehová para maj kitapojpolui porin kiixnamikik”.

6 Uan Jehová kiluij Moisés: 2 “Akin kichiua nejin tajtakolmej, amo kitakamati Jehová: akin amo kikepilia aksa* tein kikauilij maj kipiali uan kikajkayaua, akin kitachtekia okse oso kikajkayaua para kikuilis tein iaxka, 3 oso akin kiajsi tein aksa kipoloj sayoj ke amo kikepa uan takajkayaua, uan kiyekijtoua ke amo teyi kichiujtok maski amo melauj. 4 Akin kichiuak semej nejon tajtakolmej, moneki kikepas tein kiichtekik, tein tekuilij, tein kikauilijkaj maj tepiali, tein kiajsik, 5 oso tein iaxka okse uan yejua kiyekijtojka ke amo kipia. Moneki kikepas oso kiixtauas ipatiuj, uan temakas tepitsinok* keman kimatililiskej tein kichiuak. 6 Uan kiuikilis Jehová se ichkaueuet* tein kuali yetos porin kichiuak tein amo kuali. Nejon ichkaueuet kiuikilis tiopixkat, akin kiixtalis ipatiuj nejon tapial. 7 Tiopixkat kimaktilis Jehová nejin tapial para maj kiixpolo itajtakol, uan yejua kitapojpoluis komo kichiuak semej nejin tajtakolmej”.

8 Jehová no kiluij Moisés: 9 “Xikinnauati Aarón uan ikoneuan: ‘Yejua nejin tein moneki mochiuas keman kichichinouiliskej Dios se tapial. Moneki yetos itech altar nochi youal hasta ke tanesis, uan maj amo tiseui. 10 Keman tanesis, tiopixkat motalilis itasal* tachijchiuj ika lino. No motalilis itatampa calzon tein tachijchiuj ika lino. Satepan kikixtis koujnex* tein mosentilis itech altar uan kitalis tanakastan den altar. 11 Motapatilis uan kiuikas koujnex kampa tachipaujkan, uejka den kaltsitsin.* 12 Nochipa maj xotato kouit itech altar. Maj amo seui. Mostaj kualkan tiopixkat moneki kitalis kouit, uan ompa kitalis tein kichichinouiliskej Dios. Ompa no kitalis imantecayo tapial tein kimaktiliskej Dios para iuan sentakuaskej* uan kichichinos para maj popoka. 13 Nochipa maj xotato kouit itech altar. Maj amo seui.

14 ”’Yejua nejin tein moneki mochiuas keman kimaktiliskej Dios teisa tachijchiuj ika harina. Ikoneuan Aarón kiuikaskej itech altar, iixpan Jehová. 15 Se ikoneuj Aarón kikuis se tamatsol harina tein okachi kuali tein kipia aceite uan kikuis nochi istak kopal. Tamatsol tein kikuis kiixnextis nochi tein kimaktilitij Dios. Kichichinos nejon itech altar para maj popoka uan Jehová semi kiajuiyakmatis. 16 Uan ika tein mokauas, Aarón uan ikoneuan mochijchiuiliskej seki pantsitsin tein amo kipias levadura. Kikuaskej kampa Dios taxeloj, taixpan den kaltsin kampa kiueyichiuaj.* 17 Maj amo kichijchiuakan ika levadura. Nochi tein nechualkuiliaj para nechchichinouiliskej, no nikinxelouilia yejuan. Nikxeloua sayoj para yejuan, ijkon kemej nikinxelouilia keman aksa nechmaktilia se tapial para maj niktapojpolui, oso nechmaktilia teisa porin kichiuak tein amo kuali. 18 Kikuaskej nochin iokichpipiluan Aarón. Desde axkan, tein kitemakaj para kichichinouiliskej Jehová, kixeloskej tepitsin para yejuan uan nochin ininokichpipiluan akin yoltiaskej. Nochi tein mokuis keman kimaktiliskej Dios teisa, moneki kiitaskej ke xeliujtok sayoj para yejua’”.

19 Jehová no kiluij Moisés: 20 “Yejua nejin tein Aarón uan iokichpipiluan nochipa kimaktiliskej Jehová keman kinixtaliskej kemej tayekankatiopixkamej: kimaktiliskej se kilo harina tein okachi kuali, tajko kilo kualkan uan tajko kilo tiotak. 21 Kichijchiuaskej ika aceite itech se komal. Kuali tiktalilis aceite, tiktajtapanas uan tikchichinouilis Jehová uan yejua semi kiajuiyakmatis. 22 Kitemaktis akin kiixpatas Aarón. Akin kiixpatas yeski se iokichpil. Desde axkan moneki mochiuas nejin: tein kimaktiliaj Jehová, moneki kitamichichinouiliskej. 23 Keman se tiopixkat motemakilis teisa tachijchiuj ika harina, moneki kitamichichinoskej. Maj amo akin kikua, porin nejon kimaktiliaj Dios”.

24 Jehová oksepa iuan tajtoj Moisés uan kiluij: 25 “Xikinilui Aarón uan ikoneuan: ‘Yejua nejin tein moneki mochiuas keman aksa kimaktilis Dios se tapial porin tajtakolej. Kimiktiskej in tapial iixpan Jehová kampa kinmiktiaj tapialmej tein kichichinouiliaj. Dios kixeloj nejon. 26 Tiopixkat akin kitemaktis nejon tapial, kikuas tein xeliujtok para yejua. Maj kikuakan kampa Dios taxeloj, taixpan den kaltsin.

27 ”’Nochi tein mokuis keman kimaktiliskej Dios nejon tapial, moneki kiitaskej ke xeliujtok sayoj para yejua. Uan komo iesyo mopisuia itech itasal aksa, moneki kipakaskej kampa Dios taxeloj nochi tein moejesuis. 28 Komo nakat kimolontijkej* itech se sokikomit, moneki kitapanaskej. Sayoj ke komo kimolontijkej itech se komit de cobre, moneki kuali kipajpakaskej.

29 ”’Nochin tiopixkamej kikuaskej nejon nakat. Dios kixeloj sayoj para yejuan. 30 Sayoj ke keman kikalakiskej itech kaltsin iesyo se tapial tein aksa kitemaktia para maj Dios kiixpolo itajtakol, inakayo nejon tapial amo akin uelis kikuas. Moneki kichichinoskej.

7 ”’Yejua nejin tein moneki mochiuas keman aksa* kimaktilis Dios se tapial porin kichiuak tein amo kuali. Dios kixeloj nejon. 2 Kimiktiskej tapial kampa kinmiktiaj tapialmej tein kichichinouiliaj Dios uan kipijpisuiskej iesyo ikejkespan altar. 3 Yejua kitemakas nochi imantecayo tapial: ikuitapil tein tel mantecayoj, imantecayo tein kipia ipoxko, 4 ome iriñones uan imantecayo tein kipia ikuitapankopa. No kikixtilis imantecayo tein kipia itech ieltapach. 5 Tiopixkat kichichinouilis Jehová nochi itech altar para maj popoka. 6 Nochin tiopixkamej kikuaskej nejon nakat. Dios kixeloj sayoj para yejuan. Moneki kikuaskej kampa yejua taxeloj. 7 Tein mochiuas keman aksa kimaktilis Dios se tapial porin tajtakolej, no yejua tein mochiuas keman aksa kimaktilis se tapial porin kichiuak tein amo kuali. Inakayo tapial iaxka yeski tiopixkat akin kitemaktis.

8 ”’Keman tiopixkat kichichinouilis Dios se tapial tein aksa kimaktilis, tiopixkat mokauilis ipankuetaxyo tapial.

9 ”’Pantsin tein kimaktiliskej Dios uan kiyokxitiskej itech tikomit, itech se komit oso itech se komal iaxka yeski tiopixkat akin kitemaktis. 10 Sayoj ke okseki taman tachijchiuj ika harina tein kimaktiliskej Dios, kipias aceite oso amo, yeski ininaxka iokichpipiluan Aarón. Maj kuali kinxejxelouilikan nochin uan maj amo chichiko.

11 ”’Yejua nejin tein moneki mochiuas keman aksa kinekis kimaktilis Jehová teisa para iuan takuas.* 12 Komo kimaktilia porin kineki kitasojkamatilis, no kimaktilis nejin tein amo kipias levadura: seki pantsin tein ijtikoyoktik tein kipias aceite uan seki taxkaltsitsin tein kajkanauak tein kiojxiliskej aceite. No kimaktilis seki pantsin tein ijtikoyoktik tachijchiuj ika harina tein okachi kuali uan tel aceitejyoj. 13 Iuan nochi nejin pantsitsin no kitemaktis seki pantsin tein ijtikoyoktik tein kipias levadura, uan tapial tein kimaktilis Dios para kitasojkamatilis. 14 Moneki kimaktilis Jehová sejse taman pantsin. Nejon yeski iaxka tiopixkat akin kipijpisuis iesyo tapial tein kimaktiliskej Dios para iuan sentakuaskej. 15 Inakayo tapial tein kitemaktiskej para kitasojkamatiliskej Dios, moneki kikuaskej itech tonal keman kimaktiliskej. Maj amo akin mokauili para mostika.

16 ”’Komo kitemaktia se tapial porin motenkauak teisa oso sayoj porin kineki kitayokolis Dios, moneki maj kikuakan itech tonal keman kitemaktis, uan mostika no uelis kikuaskej tein mokauas. 17 Sayoj ke uiptika moneki kichichinoskej nochi tein mokauas. 18 Sayoj ke komo uiptika aksa kikua tein mokauak, akin nechmaktilis amo nechyolpaktis. Tein kitemaktis nenkaj yeski porin amo kipaleuis. Nejon tetajyaltij uan akin kikuas nejon nakat kitatsakuiltiskej. 19 Komo nejon nakat mokuiltia teisa tein amo chipauak, amo akin uelis kikuas uan moneki kichichinoskej nochi. Sayoj akin chipauak uelis kikuas nakat tein chipauak.

20 ”’Sayoj ke akin mopitsotilij uan kikua tein kimaktiliaj Jehová para iuan sentakuaskej, moneki mikis. 21 Komo aksa kikitskia* tein amo chipauak uan kikua nejon nakat tein kimaktiliaj Jehová, moneki mikis. Ijkon yeski komo kikitskia se akin Dios kiita ke amo chipauak, se tapial tein amo chipauak oso tein yeski taman tein amo chipauak uan tetajyaltij’”.

22 Jehová no kiluij Moisés: 23 “Xikinilui israelitas: ‘Amo xikuakan imantecayo kuakouej, ichkat* nion chivo. 24 Komo nankiajsij se tapial tein mikik oso kimiktij okse tapial, uelis nankikuiskej imantecayo para tein nankinekiskej, sayoj ke nion xiknemilikan nankikuaskej. 25 Akin kikuas imantecayo tapial tein kitemaktis para kichichinouiliskej Jehová, moneki mikis.

26 ”’Kampa yeski nanemiskej, amo xikuakan esti. Amo xikuakan ininesyo totomej oso okseki tapialmej. 27 Akin kikuas esti moneki mikis’”.

28 Jehová no kiluij Moisés nejin: 29 “Xikinilui israelitas: ‘Akin kiuikilis Jehová se tapial para takuas iuan, moneki kimaktilis Jehová seki taman tein kipia nejon tapial. 30 Kiuikas imantecayo uan iyolixpan tapial para kimaktilis Jehová. Kimauiuikas iixpan Jehová. 31 Tiopixkat kichichinos imantecayo tapial itech altar para maj popoka, sayoj ke iyolixpan tapial ininaxka yeski Aarón uan iokichpipiluan.

32 ”’Keman nanechmaktiliskej se tapial para tisentakuaskej, moneki nankimakaskej tiopixkat iyekmets tapial. Nejon ixyetok para tiopixkamej. 33 Iokichpil Aarón akin nechmaktilis iesyo uan imantecayo nejon tapial, iaxka yeski iyekmets tapial. 34 Keman israelitas kitemakaskej se tapial para tisentakuaskej, iyolixpan tapial tein kimauiuikaskej uan imets, nikinmaka Aarón uan ikoneuan. Desde axkan, israelitas moneki kimatiskej ke ijkon mochiuas.

35 ”’Yejua nejin tein monekia kinxelouiliskej Aarón uan ikoneuan keman kimaktiliskiaj Jehová se tapial para kichichinouiliskej. Kinxelouilijkej itech tonal keman kinixtalijkej maj kitekitilikan Jehová kemej tiopixkamej. 36 Itech tonal keman kinixtalijkej, Jehová tanauatij maj israelitas kinmakakan nejin. Desde ijkuak israelitas moneki ijkon kichiuaskej’”.

37 Yejua nejin tein monekia mochiuas keman kichichinouiliskiaj Dios se tapial, keman kimaktiliskiaj trigo uan okseki taman xinach, se tapial porin tajtakolejkej, porin kichiujkej tein amo kuali, keman kinixtaliskiaj tiopixkamej uan para iuan sentakuaskej. 38 Monekia mochiuas ijkon kemej Jehová kinauatij Moisés itech tepet Sinaí, itech tonal keman kinnauatij israelitas tein ueliskia kimaktiliskej Jehová itech taluakyan ompa Sinaí.

8 Jehová no kiluij Moisés: 2 “Xikinuika Aarón uan ikoneuan ikalakyan kaltsin kampa nechueyichiuaj,* xikuika inintasal,* aceite tein ika tikinixtalis, kuakouej tein tiktemaktis porin tajtakolejkej, ome ichkaueuetkej* uan chikiuit kampa yetokej pantsitsin tein amo kipiaj levadura. 3 Uan xikinilui nochin israelitas maj mosentilikan ikalakyan kaltsin”.

4 Yejua ika Moisés kichiuak nochi tein Jehová kinauatijka, uan israelitas mosentilijkej ikalakyan kaltsin. 5 Uan kiniluij: “Yejua nejin tein Jehová technauatij”. 6 Moisés kiniluij Aarón uan ikoneuan maj motokikan, uan kinpajpakak. 7 Kitalilij Aarón tasal tein maueueyak uan kitajkoilpij.* No kitalilij tasal tein makojkotoltik, koton tein kiluiaj efod,* uan kitajkotilintij ika cinturón* tein tajkitil. 8 No kitalilij iyolixpankopa bolsita uan ompa kinkalakij Urim uan Tumim.* 9 Uan kikuayoualouilij se tasal, uan itech nejon tasal kiixkuatalilij tepos kanauak tachijchiuj ika oro tein miliktik. Nejon tepos kinextiaya ke Dios kixeloj. Moisés kichiuak nochi nejin ijkon kemej Jehová kinauatijka.

10 Uan Moisés kikuik aceite tein ika kixelouaj tein iaxka Dios, uan kipijpisuilij in kaltsin uan nochi tein ompa yetoya. Ijkon kixeloj para Dios nochi nejon. 11 Satepan chikome viaje kipijpisuilij aceite in altar uan nochi tein ompa mokuia, uan no kipijpisuilij paila uan kampa ijkatoya. Ijkon kinxeloj para Dios. 12 Uan satepan, kikuatekilij Aarón tepitsin de nejon aceite uan ijkon kixeloj para Dios.

13 Uan Moisés kiniluij ikoneuan Aarón maj motokikan, kintalilij tasal tein maueueyak, kintajkoilpij* uan kinkuayoualouilij se tasal, ijkon kemej Jehová kinauatijka.

14 Moisés tanauatij maj kiuikilikan kuakouej tein kitemaktiskia porin tajtakolejkej, uan Aarón uan ikoneuan kitalijkej ininmay ikuako nejon kuakouej. 15 Moisés kimiktij, uan ika imajpil kikuik tepitsin iesyo uan kitalilij nochin cuernos tein kipiaya altar. Ijkon kikixtilij tajtakol in altar. Uan esti tein mokauak kitoyauak itsintan altar. Ijkon kikuiskiaj sayoj para kiueyichiuaskej Dios uan ompa kimaktiliskiaj tein ika kitajtaniskiaj maj kiixpolo inintajtakol. 16 Satepan kikuik imantecayo in kuakouej: tein kipiaya ipoxko uan tein kipiaya itech ieltapach. No kikuik ome iriñones uan imantecayo. Nochi nejin kichichinoj itech altar para maj popoka. 17 Uan ipankuetaxyo kuakouej, inakayo uan ikuit kitatijkej* uejka de kampa yetoyaj kaltsitsin,* ijkon kemej Jehová kinauatijka Moisés.

18 No tanauatij maj kiuikilikan ichkaueuet tein kichichinouiliskia Dios. Uan Aarón uan ikoneuan kitalijkej ininmay ikuako ichkaueuet. 19 Uan Moisés kimiktij tapial uan iesyo kipijpisuij ikejkespan altar. 20 Kikojkotonkej, uan Moisés kichichinoj nochi nejon iuan itsontekon uan imantecayo.* 21 Uan kipajpakkej ikuitaxkol* uan imetsuan, uan Moisés kitamichichinoj ichkaueuet itech altar para maj popoka. Nejin kitamichichinouilij Jehová uan yejua semi kiajuiyakmatik. Moisés kichiuak ijkon kemej Jehová kinauatijka.

22 Moisés no tanauatij maj kiuikilikan okse ichkaueuet, tein kitemakaskia para kinixtalis tiopixkamej, uan Aarón uan ikoneuan kitalijkej ininmay ikuako ichkaueuet. 23 Moisés kimiktij uan kitalilij tepitsin iesyo inakasko Aarón. Kitalilij itech inakas tein yetok iyekmakopa. No kitalilij tepitsin esti itech imajpil uan iikxipil tein okachi tomauak tein kipia iyekmakopa. 24 Uan Moisés kiniluij ikoneuan Aarón maj motokikan uan kintalilij tepitsin iesyo ichkaueuet ininnakasko. Kintalilij itech ininnakas tein yetok ininyekmakopa. No kintalilij tepitsin esti itech ininmajpil uan ininikxipil tein okachi tomauak tein kipiaj ininyekmakopa. Uan esti tein mokauak, Moisés kipijpisuij ikejkespan altar.

25 Uan kikuik nochi imantecayo tapial, manteca tein kipiaya itech ikuitapil, ipoxko uan ieltapach, ome iriñones uan imantecayo, uan iyekmets. 26 Uan den chikiuit tein yetoya iixpan Jehová kikuik se pantsin tein ijtikoyoktik, se pantsin tein ijtikoyoktik tachijchiuj ika aceite uan se taxkaltsin tein kanauak, tein amo kipiayaj levadura. Nochi nejon kitalij itech imantecayo uan iyekmets tapial. 27 Satepan kinmatalilij Aarón uan ikoneuan nochi nejin, uan peuak kimauiuika iixpan Jehová para kimaktilis. 28 Oksepa kikuik nochi tein kinmatalilijka uan kichichinoj itech altar, kampa yetoya okse tapial tein chichinaujtoya. Kimaktilij Dios nochi nejon para kinixtalis tiopixkamej. Kichichinouilij Jehová para maj popoka uan maj kiajuiyakmati.

29 Satepan, den ichkaueuet tein kitemakak para kinixtalis tiopixkamej, kikuik iyolixpan uan kimauiuikak iixpan Jehová para kimaktilis. Nejin katka para Moisés, ijkon kemej Jehová kinauatijka Moisés.

30 Uan kikuik tepitsin aceite tein ika kixelouaj tein iaxka Dios uan tepitsin esti tein yetoya itech altar, uan kipijpisuilij Aarón uan ikoneuan uan inintasal. Ijkon, Aarón uan ikoneuan xeliujtoyajya para Dios uan ika nejon tasal ueliskia kitekitiliskej.

31 Uan Moisés kiniluij Aarón uan ikoneuan: “Xikmolontikan* nakat ikalakyan kaltsin. Ompa nankikuaskej iuan pantsin tein yetok itech chikiuit, ijkon kemej nechnauatijkej: ‘Aarón uan ikoneuan kikuaskej’. 32 Uan komo mokauaok tepitsin nakat uan pantsin, nankitatiskej* nochi. 33 Moneki nanyetoskej ikalakyan kaltsin chikome tonal, hasta maj tami tonalmej keman namechixtaliskej kemej tiopixkamej, porin uejkauas chikome tonal. 34 Jehová tanauatij maj tikchiuakan tein tikchiujkejya axkan para kiixpolos namotajtakol. 35 Uan namejuan namokauaskej chikome tonal ikalakyan kaltsin nochin tonal uan nochi youal, uan nankichiuaskej nochi tein Jehová tanauatij xikchiuakan, para amo namikiskej; porin ijkon nechnauatijkej”.

36 Uan Aarón uan ikoneuan kichiujkej nochi tein Jehová tanauatijka itechkopa Moisés.

9 Itech chikueyitika tonal, Moisés kinnotsak Aarón uan ikoneuan uan taixyekananij israelitas. 2 Uan kiluij Aarón nejin: “Xikui se kuakuejkonet para tiktemaktis porin nantajtakolejkej uan se ichkaueuet* para tikchichinos, uan xikinuika iixpan Jehová. Nejon tapialmej moneki kuali yetoskej. 3 Sayoj ke xikinilui israelitas: ‘Xikuikan se chivo para nankimaktiliskej Dios porin nantajtakolejkej, uan se kuakouej uan se ichkaueuet tein kuali yetoskej uan kipiaskej se xiuit para nankinchichinoskej. 4 No xikuikan se kuakouej uan se ichkaueuet tein nankimaktiliskej para iuan nansentakuaskej.* Nochi nejin tapialmej nankimaktiliskej Jehová. No xikmaktilikan harina tamanelol ika aceite, porin axkan Jehová monextis namoixpan’”.

5 Yejua ika kiuikakej nochi nejin itech kaltsin kampa kiueyichiuayaj Dios,* ijkon kemej Moisés tanauatijka. Satepan nochin motokijkej uan moketskej iixpan Jehová. 6 Uan Moisés kijtoj: “Yejua nejin tein Jehová tanauatij xikchiuakan para maj Jehová namechnextili iueyi chikaualis”. 7 Uan Moisés kiluij Aarón: “Ximotoki itech altar uan xikmaktili Dios in tapial porin nantajtakolejkej uan tein tikchichinouiliti para maj kiixpolo motajtakoluan tejua uan mochankauan; no xiktemakti tein israelitas kiuikilijkej Dios para maj kiixpolo inintajtakoluan, ijkon kemej Jehová tanauatij”.

8 Aarón niman motokij itech altar uan kimiktij kuakuejkonet tein kimaktiliskia Dios porin tajtakolej. 9 Uan ikoneuan kiuikilijkej esti, uan ika imajpil kikuik tepitsin uan kitalilij cuernos tein kipiaya altar. Uan esti tein mokauak kitoyauak itsintan altar. 10 Satepan kichichinoj itech altar imantecayo kuakuejkonet, iriñones uan imantecayo tein kipiaya itech ieltapach para maj popoka, ijkon kemej Jehová kinauatijka Moisés. 11 Uan inakayo uan ipankuetaxyo tapial kitamitatij* uejka de kampa yetoyaj kaltsitsin.*

12 Satepan Aarón kimiktij tapial tein kichichinouiliskiaj Dios. Uan ikoneuan kimakakej iesyo uan yejua kipijpisuij ikejkespan altar. 13 Yejuan no kimakakej nakat tein kikojkotonkaj iuan itsontekon, uan yejua kichichinoj itech altar para maj popoka. 14 Uan no, kipajpakak ikuitaxkol* uan imetsuan, uan no kitalij itech altar, kampa yetoya tapial tein chichinaujtoya.

15 No kitemaktij tein israelitas kiuikilijkaj Dios. Achto kikuik chivo, kimiktij uan kimaktilij Dios porin tajtakolejkej. Kichiuak ijkon kemej kitemaktijka kuakuejkonet. 16 No kitemaktij tein israelitas kiuikakaj para kichichinouiliskej Dios. Kichiuak kemej ipa kichichinouiliayaj okseki taman.

17 Uan no kitemaktij harina: kikuik se tamatsol uan kichichinoj itech altar para maj popoka, iuan tapial tein kitemaktijkaj kualkan.

18 Uan Aarón kimiktij kuakouej uan ichkaueuet tein israelitas kitemakakej para sentakuaskej iuan Dios. Uan ikoneuan kimakakej esti uan yejua kipijpisuij ikejkespan altar. 19 Kikuikej imantecayo kuakouej, ikuitapil ichkaueuet tein tel mantecayoj, manteca tein kipiayaj ininpoxko, riñones uan manteca tein kipiayaj itech inineltapach. 20 Uan nochi nejon kitalijkej ininyolixpan tapialmej, uan satepan yejua kichichinoj ininmantecayo itech altar para maj popoka. 21 Sayoj ke ininyolixpan tapialmej uan ininyekmets, Aarón kimauiuikak iixpan Jehová para kimaktilis, ijkon kemej Moisés tanauatijka.

22 Satepan ke Aarón kitemaktij tapialmej porin tajtakolejkej, para kichichinouiliskej Dios uan para iuan sentakuaskej, momaajokuik ininixpan israelitas, kintiochiuak uan temok. 23 Satepan, Moisés uan Aarón kalakkej itech kaltsin, uan keman kiskej kintiochiujkej israelitas.

Uan iueyi chikaualis Jehová monextij ininixpan nochin, 24 uan Jehová kiualtitanik se tit* uan kitamij nochi nakat uan ininmantecayo tapialmej tein yetoya itech altar. Keman nochin israelitas kiitakej, tel yolpakkej, motankuaketskej uan moixpilojkej hasta talpan.

10 Satepan, Nadab uan Abihú, iokichpipiluan Aarón kikuikej sejse tekolkaxit, ompa kitalijkej tekol uan kopal, uan peuak tapopochuiaj iixpan Jehová. Sayoj ke amo kichiujkej kemej Dios tanauatijka. 2 Uan Jehová kiualtitanik se tit* tein kinchichinoj, uan yejuan mikkej iixpan Jehová. 3 Uan Moisés kiluij Aarón: “Yejua nejin tein kijtoua Jehová: ‘Nochin akin motokiaj itech kaltsin kampa nechueyichiuaj* moneki kielnamikiskej ke senkis nichipauak uan nochin moneki nechueyitaliskej’”. Uan Aarón amo teyi kijtoj.

4 Moisés kinnotsak Misael uan Elzafán, ikoneuan Uziel. Uziel katka itío Aarón. Uan kiniluij: “Xiualakan. Xikinkixtikan namokniuan de kampa Dios taxeloj uan xikinuikakan uejka den kaltsitsin”.* 5 Uan yejuan kinkixtitoj ijkon kemej Moisés kiniluijka. Uan aktoyajok inintasal* tein kikuiaj para tekitiskej kemej tiopixkamej.

6 Satepan, Moisés kiluij Aarón uan okseki iokichpipiluan, Eleazar uan Itamar: “Amo xikauakan maj fiero mochiua namotson nion xiktsayanakan namotasal. Amo xikchiuakan nejon para amo namikiskej uan para maj Dios amo kualani iniuan nochin israelitas. Nochin namokniuan israelitas kinchokiliskej akin Jehová kinmiktij ika tit.* 7 Xietokan ikalakyan kaltsin kampa tikueyichiuaj Dios. Komo nankisaj namikiskej, porin Jehová namechixtalij ika aceite”. Uan yejuan kichiujkej tein Moisés kinnauatij.

8 Uan Jehová kiluij Aarón: 9 “Amo xitayikan vino nion okseki tayil tein teuintij keman nankalakiskej itech kaltsin kampa nantaueyichiuaj, ijkon amo namikiskej. Desde axkan ixyetok nejin tanauatil para tejua uan nochin mokoneuan. 10 Ijkon uelis kimatiskej toni mokui para kiueyichiuaskej Dios uan toni amo uelis mokuis, toni tein chipauak uan toni tein pitsotik. 11 Uan uelis kinmachtiskej israelitas nochi tein Jehová kinnauatij itechkopa Moisés”.

12 Uan Moisés kiluij Aarón uan iokichpipiluan, Eleazar uan Itamar, akin nemiajok: “Tein mokauak den harina tein kitemakakej para kichichinouiliskej Jehová, ika ximochijchiuilikan pantsitsin tein amo kipias levadura. Xikuakan kampa ika yetok altar, porin Dios kixeloj nejon sayoj para namejuan. 13 Moneki nankikuaskej kampa Dios taxeloj, porin nejin mitsxelouiliaj tejua uan mokoneuan keman kimaktiliaj Jehová teisa para kichichinouiliskej. Yejua nejon tein nechnauatijkej. 14 Tejua, mookichpipiluan uan mosiuapipiluan no nankikuaskej iyolixpan tapial tein kimauiuikaskej uan imets tein ixyetok para tiopixkamej. Moneki nankikuaskej kampa tachipaujkan. Keman israelitas kitemakaskej teisa para sentakuaskej iuan Dios,* nejin namechxelouiliskej tejua uan mokoneuan. 15 Kiuikaskej imets uan iyolixpan tapial uan no ininmantecayo tapialmej tein kichichinouiliskej Dios. Kimauiuikaskej iixpan Jehová para kimaktiliskej. Imets uan iyolixpan tapial nochipa yeski para tejua uan mokoneuan, ijkon kemej Jehová tanauatij”.

16 Uan Moisés ika tajtantinemik chivo tein israelitas kitemaktijkaj porin tajtakolejkej uan kimatik ke kichichinojkaj. Yejua ika kualanik iuan Eleazar uan Itamar, uan kiniluij: 17 “¿Keyej amo nankikuajkej tapial tein israelitas kitemakakej? Monekia nankikuaskej kampa Dios taxeloj porin nejon namechxelouilij sayoj para namejuan. Uan namechmakakej para maj Jehová kiixpolo inintajtakoluan israelitas. 18 Iesyo tapial amo kiuikakej kalijtik. Yejua ika monekia nankikuaskej inakayo kampa Dios taxeloj, ijkon kemej nechnauatijkej”. 19 Aarón kiluij Moisés: “Xikita, axkan yejuan kitemaktijkej tapialmej porin tajtakolejkej uan para kichichinouiliskej Jehová. Tejua tikmati nochi tein nechpanok axkan. Komo nikuaskia nejon nakat, ¿kiuelitaskia Jehová?”. 20 Keman Moisés kikakik tein Aarón kiluij, kiajsikamatik keyej kichiuak nejon.

11 Uan Jehová kiniluij Moisés uan Aarón: 2 “Xikiniluikan israelitas: ‘Yejuan nejin tapialmej tein nemij talixko tein uelis nankinkuaskej. 3 Uelis nankikuaskej tein yeski tapial tein istimaxaltik, metstampaxeliujtok uan ojpa takuajkua.*

4 ”’Sayoj ke yejuan nejin tapialmej tein ojpa takuajkuaj oso istimaxaltikej tein amo uelis nankinkuaskej: camello, tein ojpa takuajkua sayoj ke amo istimaxaltik. Dios kiita ke amo chipauak. 5 Amo no uelis nankikuaskej damán,* porin ojpa takuajkua sayoj ke amo istimaxaltik. Dios kiita ke amo chipauak. 6 Amo no uelis nankikuaskej tochij, porin ojpa takuajkua sayoj ke amo istimaxaltik. Dios kiita ke amo chipauak. 7 Amo no xikuakan pitsot, porin istimaxaltik uan metstampaxeliujtok sayoj ke amo ojpa takuajkua. Dios kiita ke amo chipauak. 8 Amo xikinkuakan nejin tapialmej nion xikinkitskikan komo mikkej. Dios kinita ke amo chipaujkej uan namejuan no moneki ijkon nankinitaskej.

9 ”’Uelis nankinkuaskej nochin okuiltsitsin tein kipiaj kemej yeskia ajtapaltsitsin uan pantitikiltikej tein nemij itech mar oso ueyiat. 10 Sayoj ke nochin okuiltsitsin tein amo kipiaj ajtapaltsitsin nion pantitikiltikej, moneki namechtajyaltis. Uelis yeskij tein mosenkuitinemij itech at oso okseki okuilimej tein ompa nemij. 11 Moneki nankinitaskej kemej teisa tein tetajyaltij. Amo xikinkuakan nejin tapialmej, uan komo mikkej moneki namechtajyaltis. 12 Nochin okuiltsitsin tein nemij itech at uan amo kipiaj ajtapaltsitsin nion pantitikiltikej, moneki namechtajyaltis.

13 ”’Yejuan nejin totomej tein moneki nankinitaskej kemej teisa tein tetajyaltij uan amo nankinkuaskej: águila uan águila tein kinkitskia pescados, tsojpilot tein cafentik, 14 chichil kuixij uan nochi tataman tiltik kuixij, 15 nochi tataman cuervo, 16 avestruz, lechuza, gaviota, nochi tataman halcón, 17 tololoj* tein tsikitsin uan tein ueyi, tiltik totot tein kinkitskia pescados, 18 ueyi pato tein monotsa cisne, pelícano, tsojpilot, 19 cigüeña, nochi tataman garza, tototsin tein tatemoua kampa tapitsokan* uan tsinaka. 20 Moneki namechtajyaltis nochi tataman okuiltsitsin tein olochnemij, ajtapalejkej uan nejnemij ika naui ininmetsuan.

21 ”’De nochin okuiltsitsin tein olochnemij, ajtapalejkej uan nejnemij ika naui ininmetsuan, sayoj uelis nankinkuaskej tein kipiaj ome ininmetsuan tein ueueyakej para ajkotsikuiniskej. 22 Yejuan nejin okuiltsitsin tein uelis nankinkuaskej: tataman chapolimej tein patanij, tein ajkotsikuinij uan okseki taman chapolimej tein ueli se kinkua. 23 Moneki namechtajyaltis nochin okseki tataman okuiltsitsin tein olochnemij, ajtapalejkej uan kipiaj naui ininmetsuan. 24 Nejin okuiltsitsin uelis namechpitsotiliskej. Akin mokuiltis semej de nejin okuiltsitsin tein mikikya, amo chipauak yeski hasta keman tapoyauis. 25 Akin kiajokuis semej de nejon okuiltsitsin tein mikikya moneki kipakas itasal,* uan amo chipauak yeski hasta keman tapoyauis.

26 ”’Tapial tein istimaxaltik sayoj ke amo metstampaxeliujtok nion ojpa takuajkua, Dios kiita ke amo chipauak. Akin kikitskis semej de nejin tapialmej, amo chipauak yeski. 27 Tapialmej tein nejnemij ika naui ininmetsuan uan istiyejkej, Dios kinita ke amo chipaujkej. Akin kikitskis semej de nejon tapialmej tein mikikya, amo chipauak yeski hasta keman tapoyauis. 28 Akin kiajokuis semej de nejon tapialmej tein mikikya, moneki kipakas itasal, uan amo chipauak yeski hasta keman tapoyauis. Dios kinita ke amo chipaujkej uan namejuan no moneki ijkon nankinitaskej.

29 ”’De nochi tataman okuilimej tein olochnemij, yejuan nejin tein Dios kinita ke amo chipaujkej: kimichij tein nemi taltampa,* kimichij tein ajkotsikuini, nochi tataman okuilimej tein kinixmatij kemej lagartos, 30 geco, ueyi lagarto, salamandra tein nemi itech at, topej uan camaleón. 31 Nejin okuilimej tein olochnemij, Dios kinita ke amo chipaujkej. Akin kikitskis semej de nejin okuilimej tein mikikya, amo chipauak yeski hasta keman tapoyauis.

32 ”’Komo mikij uan uetsij itech teisa, nejon amo yeski chipauak, maski yeski tachijchiuj ika kouit, se tasal, se kuetax oso se cacho tasal tein teajuayotia. Komo uetsij itech teisa tein motelkui, moneki nankiakalakiskej uan amo chipauak yeski hasta keman tapoyauis. Satepan chipauak yeski. 33 Komo uetsij itech se sokikomit, moneki nankitapanaskej uan tein kipias nejon tapalkat amo chipauak yeski. 34 Tein yeski tapalol tein monelos iuan at tein kipias nejon komit, amo chipauak yeski. Uan tein yeski taman tein se tayi uan yetos itech nejon komit, amo no chipauak yeski. 35 Komo mikij uan uetsij itech tein yeski taman, nejon amo yeski chipauak. Maski uetsis kampa kichijchiuaj pantsin oso itech tikomit, moneki kitatapatsaskej. Amo chipaujkej uan amo uelisok nankinkuiskej. 36 Sayoj komo uetsij itech se ameyal* oso kampa kisentiliaj at, nejon at kisentokas chipauak. Sayoj ke akin kikitskis semej de nejon okuilimej tein mikikya amo yeski chipauak. 37 Komo uetsi itech seki xinach, nejon xinach kisentokas chipauak. 38 Sayoj ke komo nejon xinach kiapachojtokej uan ompa uetsiti se cacho de nejon tapial, in xinach amo yeski chipauak.

39 ”’Uan komo miki se tapial tein ueli se kikua, akin kikitskis nejon tapial amo chipauak yeski hasta keman tapoyauis. 40 Akin kikuas nejon tapial oso kiajchiuas moneki kipakas itasal, uan amo chipauak yeski hasta keman tapoyauis. 41 Nochi tataman okuiltsitsin tein olochnemij tetajyaltijkej. Amo xikinkuakan. 42 Amo xikuakan nion se okuilij tein moxoxolatsa, nion se tapial tein nejnemi ika naui imetsuan nion okuilimej tein olochnemij uan kipiaj miak ininmetsuan, porin tetajyaltijkej. 43 Amo xikuakan nion semej de nejon okuilimej tein olochnemij, para amo namopitsotiliskej uan nantetajyaltiskej. 44 Porin nejua namoDios Jehová, uan namejuan moneki nanxeliujtoskej para nejua uan nanyeskij nanchipaujkej, porin nejua senkis nichipauak. Yejua ika amo xikinkuakan okuilimej tein olochnemij talixko para amo namopitsotiliskej. 45 Porin nejua niJehová, akin namechkixtij de Egipto para nankimatiskej ke nejua niDios, uan namejuan moneki nanyeskij nanchipaujkej porin nejua senkis nichipauak.

46 ”’Yejua nejin tein moneki mochiuas iniuan tapialmej, totomej, okuilimej tein nemij itech at uan tein olochnemij talixko. 47 Ijkon nankimatiskej toni chipauak uan toni amo chipauak, uan katin tapial uelis nankikuaskej uan katin amo’”.

12 Jehová kiluij Moisés: 2 “Xikinilui israelitas: ‘Komo se siuatsin mokokoxkatalia uan kipia se okichpiltsin, Dios kiitas ke amo chipauak chikome tonal. Amo chipauak yeski ijkon kemej ipa panoua keman estemoua mejmetstika. 3 Itech chikueyitika tonal kitekiskej* okichpiltsin. 4 Siuatsin kisentokas mochias 33 tonalmejok para motamichipauas porin tel eskisak. Amo uelis kikitskis nion se taman tein mokui para kiueyichiuaskej Dios nion kalakis kampa taxeliujtok hasta maj motamichipaua.

5 ”’Komo kipia se siuapiltsin, Dios kiitas ke amo chipauak 14 tonalmej. Amo chipauak yeski ijkon kemej ipa panoua keman estemoua mejmetstika. Siuatsin kisentokas mochias 66 tonalmejok para motamichipauas porin tel eskisak. 6 Keman motamichipauas porin kipiak se okichpiltsin oso se siuapiltsin, moneki kiitatiuj tiopixkat ikalakyan kaltsin kampa kiueyichiuaj Dios.* Kiuikilis se ichkaueuet* tein ayamo kiajxitia se xiuit para maj kichichinouilikan Dios. Uan no kiuikas se palomajkonet oso se paloma porin tajtakolej. 7 Tiopixkat kimaktilis Jehová nochi nejon para maj kiixpolo itajtakol siuatsin. Ijkon chipauakya yeski porin tel eskiska. Yejua nejin tein moneki mochiuas keman se siuatsin kipias se okichpiltsin oso se siuapiltsin. 8 Sayoj ke komo siuatsin amo kiajsi tomin para kikouas se ichkat, moneki kiuikas ome palomas oso ome palomajkonemej. Se kitemakas para maj kichichinouilikan Dios uan okse porin tajtakolej. Uan tiopixkat kitemaktis nejon para maj Dios kiixpolo itajtakol siuatsin. Ijkon yejua chipauakya yeski’”.

13 Jehová no kiniluij Moisés uan Aarón nejin: 2 “Komo aksa* peua posauaya,* xojxoleui uan ixteuaki itech inakayo oso chichileui uan moita ke uelis yeski lepra,* moneki kiuikaskej iuan tiopixkat Aarón oso semej iokichpipiluan, akin no tiopixkamej. 3 Tiopixkat kuali kiitas tein kipia. Komo tsonti tein ompa kipia pochiniak uan moita ke kokolis* yajtokya okachi taijtik, kijtosneki ke kipia lepra. Tiopixkat kuali kiitas uan kijtos ke amo chipauak porin Dios ijkon kiita. 4 Sayoj ke komo kampa chichileuik no istaktiak, uan amo moita ke kokolis yajtokya okachi taijtik nion pochinia tsonti tein ompa kipia, tiopixkat kiluis maj yetoti okseko uan maj amo kisa chikome tonal. 5 Itech chikometika tonal, tiopixkat oksepa kuali kiitas. Komo nesi ke kokolis motsakuilij uan amo nejnemik, kiluis maj oksepa yetoti okseko uan maj amo kisa chikome tonalok.

6 ”Itech chikometika tonal, tiopixkat moneki oksepa kuali kiitas. Komo inakayo ixpajtitiujya uan kokolis amo nejnemikok, kijtos ke chipauakya. Sayoj xojxoleujka. Kipakas itasal* uan chipauakya yeski. 7 Sayoj ke komo peuak ueyitia satepan ke tiopixkat kijtoj ke chipauakya katka, oksepa moneki kiitatiuj. 8 Tiopixkat kuali kiitas kampa xojxoleuik. Komo ueyitiak, kijtos ke amo chipauak. Kipia lepra.

9 ”Komo nesi ke aksa kikuiti lepra, moneki kiuikaskej iuan tiopixkat, 10 uan yejua kuali kiitas. Komo posauaya uan istaktia kampa posauaya, pochinia tsonti tein ompa kipia uan ixkoyoni, 11 kijtosneki ke kipia lepra tein amo niman pajti, uan tiopixkat kijtos ke amo chipauak. Amo monekiok kiluis maj yetoti okseko para satepan kiitas keniuj kisentoka, porin amo chipauak. 12 Sayoj ke komo tiopixkat kiita ke kitamikuikya lepra desde itsontekon hasta imetsuan, 13 uan kuali kiitakya ke yekmelauj kitamikemikya uan senistaktiak, kijtos ke kokoxkej* chipauakya. Amo temauasok. 14 Sayoj ke komo inakayo ixkoyoni, in kokoxkej amo chipauak yeski. 15 Keman tiopixkat kiitas nejon, kijtos ke amo chipauak. Kipia lepra. 16 Sayoj ke komo kampa ixkoyonik oksepa istaktia, moneki kiitatiuj tiopixkat, 17 uan yejua kuali kiitas. Komo kiita ke melauj istaktiak, kijtos ke kokoxkej chipauakya.

18 ”Komo itech inakayo aksa kisa se kokot tein temaloua uan pajti, 19 sayoj ke kampa yetoya peua posauaya oso chichileui uan no istaktia, moneki kiitatiuj tiopixkat. 20 Yejua kuali kiitas nejon. Komo moita ke tel taijtik ualeujtok uan tsonti tein ompa kipia pochiniak, tiopixkat kijtos ke amo chipauak. Nejon kijtosneki ke nesik lepra kampa yetoya nejon kokot. 21 Sayoj ke komo tiopixkat kiyekita ke tsonti tein ompa kipia amo pochinia uan ke amo tel taijtik ualeujtok, ta moita ke ixpajtitokya, kiluis maj yetoti okseko uan maj amo kisa chikome tonal. 22 Uan komo moyekita ke ueyitiak, tiopixkat kijtos ke amo chipauak. Nejon se kokolis.* 23 Sayoj ke komo motsakuilij uan amo ueyitiak, kijtosneki ke sayoj posauayak porin ompa kiska se kokot, uan tiopixkat kijtos ke chipauak.

24 ”Oso komo aksa mochichinoua hasta koyoni inakayo uan ompa chichileui uan istaktia oso sayoj istaktia, 25 tiopixkat kuali kiitas nejon. Komo tsonti tein ompa kipia pochinia uan moita ke ixpankalaktok, tiopixkat kijtos ke amo chipauak. Kijtosneki ke nesik lepra kampa mochichinoj. 26 Sayoj ke komo kiyekita ke amo pochinia tsonti tein ompa kipia uan amo ixpankalaktok, ta moita ke ixpajtitokya, tiopixkat kiluis maj yetoti okseko uan maj amo kisa chikome tonal. 27 Itech chikometika tonal, tiopixkat kuali kiitas. Komo moyekita ke ueyitiak, kijtos ke amo chipauak. Kipia lepra. 28 Sayoj ke komo amo ueyitia uan ixpajtitokya, kijtosneki ke sayoj posauayak porin mochichinoj, yejua ika tiopixkat kijtos ke chipauak.

29 ”Komo itech itsontekon oso itesakako se takat oso se siuat kisa se mancha, 30 tiopixkat kuali kiitas nejon. Komo moita ke kokolis kalaktokya uan tsonti kostiak uan amo miakok kipia, kijtos ke nejon takat oso siuat amo chipauak. Nejon mancha tein nesik itech itsontekon oso itesakako, yejua lepra. 31 Sayoj ke komo tiopixkat kiita ke kokolis ayamo kalaki uan amo kipia nion se tsonti tiltik, moneki kiluis maj yetoti okseko uan maj amo kisa chikome tonal. 32 Itech chikometika tonal, tiopixkat kuali kiitas nejon. Komo amo ueyitia, amo okachi kalaki nion kostia tsonti 33 moneki moximas,* sayoj ke amo moximas kampa nesik mancha. Tiopixkat kiluis maj yetoti okseko uan maj amo kisa chikome tonal.

34 ”Itech chikometika tonal, tiopixkat oksepa kuali kiitas kampa chichileuik itech itsontekon oso itesakako. Komo amo ueyitiak uan moita ke kokolis amo kalakik, kijtos ke nejon takat oso siuat chipauak. Moneki kipakas itasal uan ijkon chipauakya yeski. 35 Sayoj ke komo satepan moyekita ke ueyitiak, maski tiopixkat kijtojka ke chipauakya katka, 36 tiopixkat kuali kiitas. Komo melauj ueyitiak, amo moneki kiitasok ox kostiak tsonti, ta nejon takat oso siuat amo chipauak. 37 Sayoj ke komo tiopixkat kuali kiita ke amo ueyitiak uan ixuak tsonti tiltik, kijtosneki ke pajtikya. Yejua chipauak, uan tiopixkat kijtos ke chipauak.

38 ”Komo itech inakayo se takat oso se siuat chichileui uan no istaktia, 39 tiopixkat kuali kiitas nejon. Komo amo yekistak, nejon amo se kokolis.* Nejon takat oso siuat chipauak.

40 ”Komo aksa kuaxini* uan kuaxipetstia,* chipauak porin amo mokokoua. 41 Komo sayoj iixkuakopa uetsi itson, kisentoka chipauak. 42 Sayoj ke komo chichileui uan istaktia kampa kuaxipetstik,* kijtosneki ke kikuitokya lepra ikuako. 43 Komo tiopixkat kiyekita kampa kuaxipetstik uan moita ke tein kipia tamati kemej lepra, 44 moneki kijtos ke amo chipauak porin kikuik lepra. 45 Uan akin kipias lepra, moneki kitsayanas itasal uan kikauas maj fiero mochiua itson. Uan no, moneki motenpikis uan chikauak kijtos: ‘¡Amo nichipauak, amo nichipauak!’. 46 Amo chipauak yeski hasta maj pajti. Yejua ika, moneki nemis okseko, uejka de kampa yetokej kaltsitsin.*

47 ”Komo lepra nesi itech se tasal tachijchiuj ika lino oso ika ipantojmiyo ichkat,* moneki kinextiliskej tiopixkat. 48 Maski yeski itech se tasal tein tajkitil ika lino oso ipantojmiyo ichkat, itech ipankuetaxyo se tapial oso itech tein yeski taman tachijchiuj ika ipankuetaxyo se tapial, moneki kinextiliskej tiopixkat. 49 Uan komo nesi tepitsin xoxoktik uan tepitsin kostik oso chichiltik itech se tasal tein tajkitil, itech ipankuetaxyo se tapial oso itech tein yeski taman tachijchiuj ika kuetax, kipia lepra. Moneki kinextiliskej tiopixkat. 50 Yejua kuali kiitas nejon tasal oso kuetax tein kipia lepra, uan moneki kitalis okseko uan ompa kikauas chikome tonal. 51 Itech chikometika tonal, oksepa kuali kiitas tasal oso tein yeski taman tachijchiuj ika kuetax. Komo kiita ke lepra nejnemik, kijtosneki ke nejon lepra amo poliui. Nejon amo chipauak. 52 Tiopixkat moneki kichichinos tasal tajkitil ika lino oso ika ipantojmiyo ichkat, oso tein yeski taman tachijchiuj ika kuetax kampa nesik lepra, porin nejon lepra amo poliui. Moneki kitamichichinoskej.

53 ”Sayoj ke komo tiopixkat kuali kiita tasal oso kuetax, uan kiita ke mancha amo ueyiak, 54 tanauatis maj kipakakan uan oksepa kitalis okseko uan ompa kikauas chikome tonalok. 55 Tiopixkat oksepa kiyekitas satepan ke kuali kipakkej. Komo mancha kisentoka kemej ipa maski lepra ompa motsakuilij, nejon tasal oso kuetax amo chipauak yeski. Moneki tiktamichichinos, porin palantok.

56 ”Sayoj ke komo tiopixkat kiyekita ke mancha tein neska poliujtokya satepan ke kuali kipakkej, kitejtekis uan kikixtilis cacho den tasal oso kuetax. 57 Sayoj ke komo oksepa nesi se mancha, kijtosneki ke nejnentok. Moneki tiktamichichinos tein yeski tasal tajkitil, teisa tachijchiuj ika kuetax oso tein yeski taman tein kipias lepra. 58 Sayoj ke komo nejon tein neska poliuikya satepan ke tikpakak, moneki oksepa tikpakas, uan chipauakya yeski.

59 ”Yejua nejin tein moneki mochiuas keman teisa kipias lepra. Uelis yeski se tasal tajkitil ika lino oso ika ipantojmiyo ichkat oso tein yeski taman tachijchiuj ika ipankuetaxyo se tapial. Ijkon tiopixkat uelis kijtos toni Dios kiita ke chipauak uan toni amo”.

14 Jehová no kiluij Moisés: 2 “Yejua nejin tein moneki mochiuas keman akin kipiaya lepra kiuikaskej iuan tiopixkat para maj kijto ke chipauakya. 3 Tiopixkat kisas de kampa yetokej kaltsitsin* uan kuali kiitas keniuj yetok. Komo pajtikya, 4 para uelis mochipauas, tiopixkat kinauatis maj kiuika ome totomej tein Dios kinita ke chipaujkej, cedrojkouit, hilo chichiltik uan xiujtsitsin.* 5 Tiopixkat tanauatis maj kimiktikan se totot itech se komit. Nejon komit moneki kipias at de se ameyal.* 6 Sayoj ke moneki kikuis totot tein yoltok uan cedrojkouit, hilo chichiltik uan xiujtsitsin. Nochi nejon moneki kisenajakis itech iesyo totot tein kimiktijkej. 7 Uan kipijpisuilis chikome viaje akin kipiaya lepra, uan tiopixkat kijtos ke chipauakya. Uan nejon totot kikajkauas kampa amo kaltaj.

8 ”Akin kipiaya lepra moneki kipakas itasal,* motamiximas* uan maltis,* uan chipauakya yeski. Satepan uelisya nemis kampa nemij nochin, sayoj ke amo uelis kalakis ichan chikome tonal. 9 Keman ajsis chikome tonal moneki mokuaximas, motenximas uan moixkuaximas.* Satepan ke motamiximas, kipakas itasal uan maltis uan chipauakya yeski.

10 ”Itech chikueyitika tonal kikuis ome ichkaueuetkej* tein yekin moskaltijtokej uan se ichkalamat tein ayamo kiajxitia se xiuit. Nejon tapialmej moneki kuali yetoskej. No kikuis eyi kilo uan tajko harina tein okachi kuali tamanelol ika aceite, uan se taza* aceite. 11 Tiopixkat akin kijtos ke chipauakya takat akin kipiaya lepra, kiuikas nejon takat uan tein kitemaktiti iixpan Jehová, ikalakyan kaltsin kampa kiueyichiuaj.* 12 Kiuikas se ichkaueuet porin kichiuak tein amo kuali. Tiopixkat kikuis nejon tapial uan kimaktilis Dios. No kimaktilis nejon taza aceite uan kimauiuikas nochi nejon iixpan Jehová. 13 Uan kimiktis ichkaueuet kampa Dios taxeloj, kampa ipa kinmiktiaj tapialmej tein kimaktiliaj. Inakayo nejon tapial iaxka tiopixkat, ijkon kemej no iaxka keman aksa* kimaktilia se tapial porin tajtakolej. Dios kixeloj sayoj para tiopixkamej.

14 ”Tiopixkat kitalilis inakasko akin kipiaya lepra tepitsin iesyo nejon ichkaueuet. Kitalilis itech inakas tein yetok iyekmakopa. No kitalilis tepitsin esti itech imajpil uan iikxipil tein okachi tomauak tein kipia iyekmakopa. 15 Momatekilis tepitsin aceite de nejon taza, itech iopochmay. 16 Uan kitalis imajpil de iyekmay itech aceite tein kipia itech iopochmay, uan kipijpisuis iixpan Jehová chikome viaje. 17 Satepan kikuis tepitsin aceite tein kipiasok imako uan kitalilis itech inakas tein yetok iyekmakopa akin kipiaya lepra. Tiopixkat no kitalilis tepitsin aceite itech imajpil uan iikxipil tein okachi tomauak de iyekmakopa, kampa kitalilijkaya esti. 18 Uan aceite tein mokauasok imako, kikuatalilis akin kipiaya lepra. Kichiuas nejon para maj Jehová kiixpolo itajtakol.

19 ”Tiopixkat kitemaktis in tapial tein kiuikak akin kipiaya lepra porin tajtakolej, uan nejon tapaleuis maj Dios kiixpolo itajtakol. Satepan kimiktis okse tapial tein kichichinouilis. 20 Tiopixkat kichichinos tapial uan harina tamanelol ika aceite itech altar. Kichiuas nejon para maj Dios kiixpolo itajtakol akin kipiaya lepra, uan yejua chipauakya yeski.

21 ”Sayoj ke, komo yejua pobre uan amo kiajsi tomin para kikouas nochi nejon, kiuikas se ichkaueuet tein yekin moskaltijtok porin kichiuak tein amo kuali. Tiopixkat kimauiuikas uan kimaktilis Dios para maj kiixpolo itajtakol. No kiuikilis se kilo harina tein okachi kuali tamanelol ika aceite, se taza aceite 22 uan ome palomas oso ome palomajkonemej, ijkon kemej uelis kitemakas. Se kitemaktis porin tajtakolej uan okse para kichichinouilis Dios. 23 Itech chikueyitika tonal, kiuikilis tiopixkat nochi nejon ikalakyan kaltsin, iixpan Jehová, para maj tiopixkat kijto ke chipauakya.

24 ”Tiopixkat kikuis ichkaueuet tein kiuikak akin kipiaya lepra porin kichiuak tein amo kuali uan no taza aceite. Kimauiuikas nochi nejon iixpan Jehová para kimaktilis. 25 Kimiktis ichkaueuet uan kitalilis tepitsin iesyo itech inakas tein yetok iyekmakopa akin kipiaya lepra. No kitalilis tepitsin esti itech imajpil uan iikxipil tein okachi tomauak tein kipia iyekmakopa. 26 Momatekilis tepitsin aceite itech iopochmay. 27 Uan ika imajpil de iyekmay, kikuis aceite tein kipia itech iopochmay uan kipijpisuis iixpan Jehová chikome viaje. 28 No kikuis tepitsin aceite tein kipia imako uan kitalilis itech inakas tein yetok iyekmakopa akin kipiaya lepra. Tiopixkat kitalilis tepitsin aceite itech imajpil uan iikxipil tein okachi tomauak de iyekmakopa, kampa kitalilijkaya iesyo ichkaueuet. 29 Uan aceite tein mokauasok imako, kikuatalilis akin kipiaya lepra. Kichiuas nejon para maj Jehová kiixpolo itajtakol.

30 ”Yejua kitemakas palomas oso palomajkonemej, ijkon kemej uelis kitemakas. 31 Se totot kitemakas porin tajtakolej uan okse totot kitemakas para maj kichichinouilikan Dios iuan harina tamanelol ika aceite. Uan tiopixkat kichiuas nejon para maj Jehová kiixpolo itajtakol akin kipiaya lepra.

32 ”Yejua nejin tein moneki mochiuas para maj Dios kiita ke chipauakya akin kikuika lepra sayoj ke pobre”.

33 Uan Jehová kiniluij Moisés uan Aarón: 34 “Keman nikauas maj nesi lepra itech se kali ompa Canaán, tal tein namechmakas, moneki nankichiuaskej nejin. 35 Akin iaxka kali kiitatiuj tiopixkat uan kiluis: ‘Ne nochan nesik se mancha’. 36 Tiopixkat tanauatis maj tamitakixtikan achto ke kiitatiuj nejon mancha; ijkon amo monekis kijtos ke amo chipauak nochi tein onkak kalijtik. Satepan tiopixkat kalakis para tachiatiuj. 37 Kuali kiitas kampa nesik mancha. Komo tepamit kojkoyonik uan moita xoxoktik uan kostik oso chichiltik uan nesi ke tel kalakikya itech tepamit, 38 tiopixkat yas kaltenoj uan kijtos maj amo akin kalaki itech nejon kali chikome tonal.

39 ”Keman ajsis chikome tonal tiopixkat oksepa tachiatiuj. Komo neskej okachi manchas itech tepamit, 40 tiopixkat tanauatis maj kikixtikan temej tein kipiaskej mancha uan maj kitamotatij kalampa den ueyi xolal, kampa kitamotatij tein pitsotik. 41 Uan tanauatis maj kuali kiuauanakan tepamit kalijtikkopa. Tein kisas moneki kitamotatiuij kalampa den ueyi xolal, kampa kitamotatij tein pitsotik. 42 Kampa kikixtiskej temej moneki kitaliskej okseki, uan tanauatis maj kichijchiuakan mezcla uan maj ika kialaxokan tepamit.

43 ”Sayoj ke, komo oksepa nesi se mancha itech tepamit, satepan ke kikixtijkej temej uan kiuauankej uan kialaxojkej, 44 tiopixkat kalakis uan tachiatiuj. Komo neskej okachi manchas itech tepamit, kijtosneki ke nesik lepra tein amo poliui. Dios kiita ke nejon kali amo chipauak. 45 Yejua tanauatis maj kixitinikan nejon kali uan maj kitamotatij nochi in tet, kouit uan nochi tein kisak kalampa den ueyi xolal, kampa kitamotatij tein pitsotik. 46 Sayoj ke takan aksa kalaki itech se kali satepan ke tiopixkat kijtoj maj amo akin kalaki, amo chipauak yeski hasta keman tapoyauis. 47 Uan akin kochis oso takuas itech nejon kali moneki kipakas itasal.

48 ”Sayoj ke komo tiopixkat tachiati uan kiita ke amo neskej manchas satepan ke kialaxojkej tepamit, kijtos ke in kali chipauakya, porin amo nesikok nion se mancha. 49 Para maj Dios kiita ke kali chipauakya tiopixkat kikuis ome totomej, cedrojkouit, hilo chichiltik uan xiujtsitsin.* 50 Moneki kimiktis se totot itech se komit. Nejon komit moneki kipias at de se ameyal.* 51 No kikuis cedrojkouit, xiujtsitsin, hilo chichiltik uan totot tein yoltok. Nochi nejon kiajakis itech iesyo totot tein kimiktijkej itech komit tein kipia at de se ameyal, uan moneki tapijpisuis chikome viaje kampa ika yetok kali. 52 Kichipauas nejon kali ika iesyo totot, at de se ameyal, totot tein yoltok, cedrojkouit, xiujtsitsin uan hilo chichiltik. 53 Satepan kikajkauas totot tein yoltok kampa amo kaltaj. Ijkon Dios kiitas ke nejon kali chipauakya.

54 ”Yejua nejin tein moneki mochiuas keman nesis lepra, keman nesis se mancha itech itsontekon oso itesakako aksa, 55 keman nesis lepra itech se tasal oso se kali, 56 keman aksa peuas posauayas,* xojxoleuis uan ixteuakis itech inakayo oso chichileuis. 57 Ijkon tiopixkat uelis kiixtalis ox teisa chipauak oso amo chipauak. Yejua nejin tein moneki mochiuas keman nesis lepra”.

15 Jehová no kiniluij Moisés uan Aarón nejin: 2 “Xikiniluikan israelitas: ‘Komo se takat kipia se kokolis* tein kichiua maj kisa teisa kemej temal kampa moxixa,* nejon kichiua maj Dios kiita ke amo chipauak. 3 Komo kisentoka kisa oso amo ueliok moxixa porin motsakuak, yejua amo chipauak.

4 ”’Cama kampa motekas uan tein yeski taman tein kikuis para motalis akin mokokoua, amo chipauak yeski. 5 Akin kimatokas* nejon cama, moneki kipakas itasal* uan maltis,* uan amo chipauak yeski hasta keman tapoyauis. 6 Akin motalis kampa motalij akin mokokoua, moneki kipakas itasal uan maltis, uan amo chipauak yeski hasta keman tapoyauis. 7 Akin mokuiltis takat akin mokokoua, moneki kipakas itasal uan maltis, uan amo chipauak yeski hasta keman tapoyauis. 8 Komo akin mokokoua kichijcha aksa,* akin kichijchakej moneki kipakas itasal uan maltis, uan amo chipauak yeski hasta keman tapoyauis. 9 Komo akin mokokoua motalia ipanko se tapial, ipejpech amo chipauak yeski. 10 Akin kimatokas tein yeski taman tein kikuik para motalis akin mokokoua, amo chipauak yeski hasta keman tapoyauis. Uan akin kimamas tein ika motalij akin mokokoua, moneki kipakas itasal uan maltis, uan amo chipauak yeski hasta keman tapoyauis. 11 Komo akin mokokoua amo momajtekijtok uan kikitskia aksa, akin kikitskiaj moneki kipakas itasal uan maltis, uan amo chipauak yeski hasta keman tapoyauis. 12 Komo akin mokokoua kimatoka se sokikomit, nejon komit moneki kitapanaskej, uan komo tachijchiuj ika kouit moneki kipajpakaskej.

13 ”’Keman amo teyi kisasok uan pajtisya takat, kipouas chikome tonal. Moneki kipakas itasal uan maltis ika at de se ameyal,* uan chipauakya yeski. 14 Itech chikueyitika tonal, moneki kiuikilis tiopixkat ome palomas oso ome palomajkonemej ikalakyan kaltsin kampa taueyichiuaj,* iixpan Jehová. 15 Tiopixkat kitemaktis totomej tein kiuikak takat. Se kitemaktis porin tajtakolej uan okse para kichichinouilis Dios. Tiopixkat kichiuas nejon para maj Jehová kiixpolo itajtakol akin mokokouaya.

16 ”’Uan komo kisa ixinachyo* se takat, moneki maltis uan amo chipauak yeski hasta keman tapoyauis. 17 Komo uetsi itech se tasal oso tein yeski taman tachijchiuj ika ipankuetaxyo se tapial, moneki kipakas uan amo chipauak yeski nejon hasta keman tapoyauis.

18 ”’Keman se takat moteka iuan se siuat uan kisa ixinachyo,* nochin omen moneki maltiskej uan amo chipaujkej yeskij hasta keman tapoyauis.

19 ”’Mejmetstika, keman se siuat estemoua, amo chipauak chikome tonal. Akin mokuiltis nejon siuat, amo chipauak yeski hasta keman tapoyauis. 20 Kampa motekas uan kampa motalis nejon siuat itech nejon chikome tonal, amo chipauak yeski. 21 Akin kimatokas* icama moneki kipakas itasal uan maltis, uan amo chipauak yeski hasta keman tapoyauis. 22 Akin kimatokas tein yeski taman tein kikuik para motalis nejon siuat, moneki kipakas itasal uan maltis, uan amo chipauak yeski hasta keman tapoyauis. 23 Akin kimatokas icama oso tein yeski taman tein kikuik para motalis, amo chipauak yeski hasta keman tapoyauis. 24 Uan komo se takat iuan moteka uan kikuiltia esti porin estemok, nejon takat amo chipauak yeski chikome tonal. Uan tein yeski cama kampa motekas nejon takat, amo no chipauak yeski.

25 ”’Komo se siuat estemoua tel miak tonalmej uan amo ijkuak monekia temos oso estemoua keman ajsi tonal sayoj ke tel uejkaua, amo chipauak yeski nochin tonalmej keman estemotos. Amo chipauak yeski ijkon kemej ipa panoua itech tonalmej keman estemoua mejmetstika. 26 Tein yeski cama kampa motekas uan tein yeski taman tein kikuis para motalis keman estemotos amo chipauak yeski. Amo chipauak yeski ijkon kemej ipa panoua itech tonalmej keman estemoua mejmetstika. 27 Akin kimatokas* nejon, amo chipauak yeski. Moneki kipakas itasal uan maltis, uan amo chipauak yeski hasta keman tapoyauis.

28 ”’Sayoj ke, keman amo estemosok moneki kipouas chikome tonal uan satepan chipauakya yeski. 29 Itech chikueyitika tonal moneki kikuis ome palomas oso ome palomajkonemej uan kiuikilis tiopixkat ikalakyan kaltsin. 30 Se paloma yeski porin tajtakolej uan okse para kichichinouilis Dios. Tiopixkat kitemaktis nejon para maj Jehová kiixpolo itajtakol siuat, porin kemej eskiska, amo chipauak katka.

31 ”’Ijkon namejuan moneki nankinpaleuiskej israelitas para maj chipaujkej. Komo yejuan amo chipaujkej, kaltsin kampa nechueyichiuaj amo no chipauak yeski uan yejua ika monekis mikiskej.

32 ”’Yejua nejin tein moneki mochiuas keman se takat kipias se kokolis* tein kichiuas maj kisa teisa kemej temal kampa moxixa,* keman kisas ixinachyo,* 33 keman se siuat estemoua mejmetstika, keman estemos tel miak tonalmej uan amo ijkuak moneki temos, uan keman se takat motekas iuan se siuat akin amo chipauak’”.

16 Jehová iuan tajtoj Moisés satepan ke ome iokichpipiluan Aarón mikkej porin motokijkej iixpan Jehová. 2 Jehová kiluij Moisés: “Xikilui mokniuj Aarón ke amo uelis kalakis keman yeski itech cuarto tein monotsa Santísimo, oksekopa den cortina, taixpan den tatiochiualkaxon* para maj amo miki. Porin nejua nimonextis itech se mixti kampa yetok ipantsak tatiochiualkaxon.

3 ”Yejua nejin tein Aarón moneki kichiuas achto ke kalakis itech Santísimo: kitemaktis se kuakouej tein yekin moskaltijtok uan se ichkaueuet.* Kuakouej kitemaktis porin tajtakolej uan ichkaueuet para kichichinouilis Dios. 4 Moneki maltis* uan motalilis linojtasal* tein kikui para tekitis kemej tiopixkat: tasal tein maueueyak, tatampa calzon, tasal tein ika motajkoilpis,* uan tasal tein mokuayoualouilis.

5 ”Moneki kinkuis ome chivojkonemej tein israelitas kitemakaskej porin tajtakolejkej uan se ichkaueuet para maj kichichinouilikan Dios.

6 ”Uan Aarón moneki kiuikas itech altar kuakouej tein yejua kiualkuik porin tajtakolej, para maj Dios kiixpolo itajtakoluan yejua uan ichankauan.

7 ”Kinkuis ome chivojkonemej uan kinuikas iixpan Jehová, ikalakyan kaltsin kampa kiueyichiuaj.* 8 Aarón kitatamotas tetsitsin* para kimatis katin chivojkonet kimaktilis Jehová uan katin kiuikas in tajtakol.* 9 Aarón kikuis chivojkonet tein kimaktilis Jehová porin tajtakolejkej. 10 Sayoj ke chivojkonet tein kiuikas in tajtakol, Aarón moneki kiuikas yoltok iixpan Jehová para maj kiixpolo inintajtakoluan. Ijkon uelis kititaniskej taluakyan para maj kiuika in tajtakol.

11 ”Aarón kiuikas itech altar kuakouej tein kiualkuik porin tajtakolej para maj Dios kiixpolo itajtakoluan yejua uan ichankauan. Satepan kimiktis nejon kuakouej.

12 ”Kikuis tekolkaxit uan kitemilis tekol tein kikuis itech altar tein yetok iixpan Jehová. No kikuis ome tamatsol kopal tein kuali takuechol uan kiuikas oksekopa den cortina. 13 No kitemas kopal itech tekol iixpan Jehová, uan pokti tein kisas kikemis ipantsak tatiochiualkaxon, para maj Aarón amo miki.

14 ”Ika imajpil kikuis tepitsin iesyo kuakouej uan kipijpisuis chikome viaje taixpan den* tatiochiualkaxon, kampa ika ualkisa tonaltsin.

15 ”Satepan kimiktis chivojkonet tein kitemakakej israelitas porin tajtakolejkej. Kiuikas iesyo oksekopa den cortina, uan no kipijpisuis iesyo kemej kipijpisuij iesyo kuakouej. Kipijpisuis taixpan den tatiochiualkaxon.

16 ”Ijkon tachipauas kampa Dios taxeloj porin israelitas kichiuaj tein amo chipauak, amo tatakamatij uan tajtakolchiuaj. No ijkon moneki kichipauas in kaltsin, tein yetok kampa nemij israelitas, akin amo chipaujkej.

17 ”Maj amo akin yeto itech nejon kaltsin keman tiopixkat yetos itech Santísimo. Keman kalakis, kitataujtis Dios maj kiixpolo itajtakoluan yejua, ichankauan uan nochin israelitas.

18 ”Uan kisas uan yas kampa yetok altar, iixpan Jehová, uan kitalilis nochin cuernos tepitsin iesyo kuakouej uan tepitsin iesyo chivojkonet. Ijkon kichipauas altar. 19 Ika imajpil no kipijpisuis esti itech altar chikome viaje, uan ijkon kichipauas porin israelitas kichiuaj tein amo chipauak.

20 ”Keman kichiuasya nochi tein moneki para maj Dios kiita ke chipauakya cuarto tein monotsa Santísimo, kaltsin uan altar, no kiualkuis chivojkonet tein yoltok. 21 Aarón kitalis imauan ikuako chivojkonet, uan keman kikuakitskijtos kijtos tein amo kuali tein kichiujkej israelitas uan nochi inintajtakoluan. Nochi nejon kemej yeskia kikuatalilis chivojkonet uan kimakas takat akin kiixtalijkej para maj kititani taluakyan. 22 Kititaniskej chivojkonet taluakyan para maj ompa kiuika nochi inintajtakoluan.

23 ”Uan Aarón kalakis kampa Dios taxeloj, mokixtilis linojtasal tein motalilijka keman kalakik itech Santísimo, uan ompa kikauas. 24 Moneki maltis kampa Dios taxeloj uan motapatilis. Satepan kichichinouilis Dios in tapial tein yejua kiuikak uan tein kiuikakej israelitas. Kichiuas nejon para maj Dios kiixpolo itajtakoluan yejua uan israelitas. 25 Kichichinos itech altar ininmantecayo tapialmej tein kitemakakej porin tajtakolejkej para maj popoka.

26 ”Akin kititanik chivojkonet tein kiuikak in tajtakol moneki kipakas itasal uan maltis. Satepan uelis kalakisya kampa nemij nochin.

27 ”Uan ininpankuetaxyo, ininnakayo uan ininkuit kuakouej uan chivojkonet tein kimaktilijkej Dios porin tajtakolejkej, kitatiskej* uejka den kaltsitsin.* Tiopixkat kiuikak ininesyo nejon tapialmej itech Santísimo para maj Dios kiixpolo inintajtakoluan. 28 Akin kitatis nochi nejon moneki kipakas itasal uan maltis. Satepan uelis kalakisya kampa nemij nochin.

29 ”Desde axkan nikixtalia nejin tanauatil tein moneki nankitakamatiskej: itech metsti etanim,* tonal 10, moneki namotayokoltiskej por namotajtakoluan,* uan amo xikchiuakan nion se tekit, namejuan uan akin okseko kayomej akin nemij namouan. 30 Nejon tonal Dios kiixpolos namotajtakoluan uan namechchipauas. Jehová namechtapojpoluis uan namechitas ke nanchipaujkej. 31 Nejon tonal moneki nankiitaskej kemej tonal sábado uan amo nankichiuaskej nion se tekit. Uan moneki namotayokoltiskej por namotajtakoluan. Desde axkan nikixtalia nejin tanauatil.

32 ”Tiopixkat akin kiixpatas itat uan kikuatekiliskej aceite uan kiixtaliskej kemej tiopixkat kintemaktis tapialmej. Motalilis linojtasal tein kikuis para tekitis kemej tiopixkat. 33 Kintemaktis nejon tapialmej para maj Dios kiita ke chipauakya cuarto tein monotsa Santísimo, nochi kaltsin uan altar, uan para maj kiixpolo inintajtakoluan tiopixkamej uan nochin israelitas. 34 Desde axkan nikixtalia nejin tanauatil tein moneki nankitakamatiskej uan mochiuas sepa itech xiuit, para maj Dios kiixpolo inintajtakoluan israelitas”.

Uan Aarón kichiuak nochi tein Jehová kinauatijka Moisés.

17 Jehová no kiluij Moisés: 2 “Xikilui Aarón, ikoneuan uan nochin israelitas: ‘Yejua nejin tein Jehová tanauatij:

3 ”’“Maj nion se israelita kimikti se kuakouej, se ichkaueuet* tein yekin moskaltijtok oso se chivo kampa yetokej kaltsitsin* oso uejka de ompa. 4 Moneki kiuikilis Jehová in tapial uan kimaktilis ikalakyan kaltsin kampa kiueyichiuaj* Jehová para maj amo kitatsakuiltikan. Komo amo ijkon kichiua, moneki kimiktiskej porin kimiktij tapial okseko. 5 Nitanauatia nejin para maj israelitas amo kinmiktikanok inintapialuan kampa amo kaltaj, ta maj kinuikilikan tiopixkat ikalakyan kaltsin para kimaktiliskej Jehová. Moneki kimaktiliskej Jehová para iuan sentakuaskej.* 6 Uan tiopixkat kipijpisuis ininesyo tapialmej itech ialtar Jehová tein yetok ikalakyan kaltsin, uan kichichinos ininmantecayo tapialmej para maj popoka, uan Jehová semi kiajuiyakmatis. 7 Yejua ika maj amo teyi kinmaktilikanok amo kuali ejekamej* tein kinueyichiuaj.* Desde axkan nikixtalia nejin tanauatil tein moneki nankitakamatiskej namejuan uan namokoneuan akin yoltiaskej”’.

8 ”No moneki tikiniluis: ‘Komo se israelita oso se akin okseko kayot uan nemi namouan, kitemaktia se tapial para kichichinouiliskej Dios oso para okse taman, 9 uan amo kiuika ikalakyan kaltsin para ompa kimaktilis Jehová, moneki kimiktiskej.

10 ”’Komo se israelita oso se akin okseko kayot uan nemi namouan kikua esti, xikyekmatikan ke nikixtopeuas akin kikuas esti uan nikixpolos. 11 Porin nochi tein kipia esti yoltok, porin esti kichiua maj yolto uan nejua namechmakatok para xinechmaktilikan itech altar para maj nikixpolo namotajtakoluan. Kemej esti kichiua maj nochin yoltokan, esti tapaleuia maj namechtapojpolui. 12 Yejua ika nikiniluij israelitas: “Maj amo akin kikua esti, nion namejuan nion akin okseko kayomej uan nemij namouan”.

13 ”’Komo se israelita oso se akin okseko kayot kintemoti tapialmej uan kimiktia se koujtajtapial oso se totot tein ueli se kikua, moneki kitalpachos iesyo. 14 Porin esti kichiua maj nochin yoltokan, porin ininnemilis yetok itech ininesyo. Yejua ika, nikiniluij israelitas: “Amo xikuakan esti, porin esti kichiua maj nochin yoltokan. Akin kikuas moneki kimiktiskej”. 15 Komo se israelita oso se akin okseko kayot, kiajsi uan kikua se tapial miket oso se tein kikokototsak se tekuani, moneki kipakas itasal* uan maltis,* uan amo chipauak yeski hasta keman tapoyauis. Satepan chipauakya yeski. 16 Sayoj ke, komo amo kipaka itasal nion maltia, kitatsakuiltiskej’”.

18 Jehová no kiluij Moisés: 2 “Xikinilui israelitas: ‘Nejua namoDios Jehová. 3 Amo xikchiuakan tein kichiuaj akin nemij Egipto, kampa nanenkej. Amo no xikchiuakan tein kichiuaj akin nemij Canaán, kampa namechajxititi. Uan amo xinemikan kemej yejuan. 4 Xikchiuakan tein nikixtalia uan xiktakamatikan notanauatiluan. Nejua namoDios Jehová. 5 Moneki nankitakamatiskej notanauatiluan uan tein nikixtalia. Akin kichiuas nejon kisentokas nemis. Nejua niJehová.

6 ”’Maj amo akin moteka iuan se ichankauj. Nejua niJehová. 7 Amo ximoteka iuan mopaj nion iuan momaj. Yejua momaj; amo ximoteka iuan.

8 ”’Amo ximoteka iuan motakpanan. Nejon kipinaujtiskia mopaj.

9 ”’Amo ximoteka iuan mokniuj siuat, maski yeski isiuapil mopaj oso isiuapil momaj, maski yolik mochan oso okseko.

10 ”’Amo ximoteka iuan moixuiuj,* porin nejon mitspinaujtiskia.

11 ”’Amo ximoteka iuan motakpaikniuj, isiuapil mopaj, porin yejua mokniuj.

12 ”’Amo ximoteka iuan motía, iikniuj mopaj. Yejua uan mopaj sesaj ininesyo.

13 ”’Amo ximoteka iuan motía, iikniuj momaj. Yejua uan momaj sesaj ininesyo.

14 ”’Amo ximoteka iuan isiuatsin motío, iikniuj mopaj. Komo ijkon tikchiua tikpinaujtis motío. Nejon siuatsin motía.

15 ”’Amo ximoteka iuan mosiuamon. Yejua isiuatsin mookichpil; amo ximoteka iuan.

16 ”’Amo ximoteka iuan mocuñada, porin nejon kipinaujtiskia mokniuj.

17 ”’Amo ximoteka iuan se siuat uan iuan isiuapil. Amo no ximoteka iuan iixuiuj. Nejon siuamej sesaj ininesyo. Nejon semi pitsotik.

18 ”’Amo ximonamikti iuan iikniuj mosiuatsin, porin motauelitaskej. Amo ximoteka iuan keman mosiuatsin yoltosok.

19 ”’Amo ximoteka iuan se siuat keman amo chipauak yeski porin estemok.

20 ”’Amo ximoteka iuan se tesiuauj, porin nejon kichiuaskia maj Dios kiita ke amo tichipauak.

21 ”’Amo xikaua maj kikuikan se mokoneuj para kimaktiliskej Mólek.* Amo xikchiua maj amo kuali ika tajtokan moDios. Nejua niJehová.

22 ”’Amo ximoteka iuan se motakaikniuj kemej timoteka iuan se siuat. Nejon tetajyaltij.

23 ”’Maj nion se takat moteka iuan se tapial,* porin nejon kichiuaskia maj Dios kiita ke amo chipauak. Uan maj nion se siuat moteka iuan se tapial. Dios amo ijkon kiixtalij.

24 ”’Amo xikchiuakan nion se taman kemej nejin para amo namopitsotiliskej, porin yejua nejon tein ika mopitsotilijtokej akin nemij itech altepemej kampa nanajsitij, yejua ika nikinkixtiti. 25 Inintal amo chipauak uan nikintatsakuiltis porin kichiuaj tein amo kuali, uan tal kemej yeskia kinijsotas akin ompa nemij. 26 Sayoj ke namejuan, israelitas uan akin okseko nankayomej, moneki nankitakamatiskej notanauatiluan uan nankichiuaskej tein nikixtalia, uan amo xikchiuakan nion se taman tein tetajyaltij. 27 Porin nochi nejon tein tetajyaltij kichiujtiuitsej akin ompa nemij, yejua ika nejon tal amo chipauak. 28 Komo no nankipitsotiliaj, nejon tal no namechijsotas, ijkon kemej kinijsotas akin ompa nemij. 29 Nochin akin kichiuaskej se taman tein tetajyaltij kemej nejin, ixpoliuiskej. 30 Namejuan moneki nankichiuaskej tein namechnauatia uan amo nankichiuaskej tein pitsotik tein kichiujtiuitsej akin ompa nemij, para amo ximopitsotilikan kemej yejuan. Nejua namoDios Jehová’”.

19 Jehová oksepa iuan tajtoj Moisés uan kiluij: 2 “Xikinilui nochin israelitas nejin: ‘Moneki nanyeskij nanchipaujkej porin nejua, namoDios Jehová, senkis nichipauak.

3 ”’Nanochin moneki nankitakachiuaskej* namomaj uan namopaj, uan nankichiuaskej tein namechnauatij xikchiuakan itech tonal sábado. Nejua namoDios Jehová. 4 Amo xikinueyichiuakan dioses tein amo tapaleuiaj nion ximochijchiuilikan tatadiosmej.* Nejua namoDios Jehová.

5 ”’Komo nankimaktiliaj Jehová se tapial para iuan nansentakuaskej,* xikmaktilikan kemej kinamiki para nankiyolpaktiskej. 6 Moneki nankikuaskej itech tonal keman nankitemaktiskej uan no mostika. Sayoj ke nochi tein mokauas moneki nankichichinoskej uiptika. 7 Uan komo uiptika aksa* kikua tein mokauak, nejon tetajyaltij uan Dios amo kiyolpaktis. 8 Akin kikuas nejon nakat kitatsakuiltiskej, porin amo kikuik kemej kinamiki tein xeliujtok para Jehová. Moneki mikis.

9 ”’Keman tiktekis tein tiktokas, amo xikteki nochi tein mochiuas tatenoj nion xikpejpenati tein mokauas. 10 Amo no xiktekiti uvas tein tikaujtiajki nion xikololo tein uetsik. Xikinkauili pobres* uan akin okseko kayomej. Nejua namoDios Jehová.

11 ”’Amo xitachtekikan, amo xixolopijtikan nion ximokakajkayauakan. 12 Amo xikyekijtokan teisa notokaykopa keman nankimatij ke amo melauj, porin ijkon amo kuali noka tajtoskiaj. Nejua namoDios Jehová. 13 Amo xikajkayaua mokniuj para tikuilis tein iaxka nion xitachteki. Niman xiktaxtaui motakeual. Amo ximokauili itaxtauil hasta mostika.

14 ”’Amo xikuijuikalti* se akin amo ueli takaki nion xiktalili teisa tein kitsakuilis akin amo tachia, uan xikmojkatoka moDios. Nejua niJehová.

15 ”’Amo xitechichikouikan keman nankimelaujtoskej se kuejmol. Amo xikpaleuikan se pobre sayoj porin pobre oso amo sayoj xiktakachiuakan akin tominpia. Xikyektalikan ikuejmol namokniuj kemej kijtoua tanauatil.

16 ”’Amo xitetakajkayauilijtinemi. Amo xikchiua nion teyi tein ueliskia kichiuas maj mokniuj kipano tein amo kuali.* Nejua niJehová.

17 ”’Amo xiktauelita mokniuj moyolijtik. Xikilui mokniuj tein amo kuali kichiuak, para amo tikchiuas se tajtakol kemej yejua.

18 ”’Amo ximomakepa nion xikelnamiktinemi tein mitschiuilijkej, uan xiktasojta moknitsin kemej tejua timotasojta. Nejua niJehová.

19 ”’Xiktakamatikan notanauatiluan: amo xikincruzarokan ome tataman namotapialuan; amo xiktokakan ome tataman xinach namotalpan, uan amo no ximotalilikan se tasal* tein tajkitil ika ome tataman hilo.

20 ”’Komo se takat moteka iuan se siuat, uan nejon siuat ixyetoyaya monamiktis iuan okse takat, sayoj ke ayamo kikouayaj nion kimajkaujtoya iteko, nejon takat uan siuat moneki kintatsakuiltiskej. Sayoj ke amo kinmiktiskej, porin siuat kipiayaok iteko. 21 Takat moneki kiuikilis Jehová se ichkaueuet* para kimaktilis porin kichiuak tein amo kuali. Kiuikas ikalakyan kaltsin kampa kiueyichiuaj.* 22 Uan tiopixkat kimaktilis Jehová nejon ichkaueuet para maj kiixpolo itajtakol nejon takat, uan Dios kitapojpoluis.

23 ”’Keman nanemiskejya itech tal tein namechmakati uan nankitokaskej se kouit tein kitemaka itakilo, nejon takilot amo chipauak yeski uan eyi xiuit amo uelis nankikuiskej. Amo xikuakan. 24 Sayoj ke itech naujpatika xiuit, Jehová kiitas ke nochi itakilo chipauakya uan nanyolpakiskej iixpan. 25 Uan itech makuiltika xiuit uelis nankikuaskejya. Ijkon momiakilis tein nankitekiskej. Nejua namoDios Jehová.

26 ”’Amo xikuakan nion teyi tein esyoj.

”’Amo xiktemokan tein namechmatiltis toni panos satepan nion xitenaualuikan.

27 ”’Amo ximokuaximakan* sayoj namonajnakastan nion eliuis xiktejtekikan namotentson.

28 ”’Amo ximotejtekikan keman aksa momikilis nion ximochiuilikan tatuajes. Nejua niJehová.

29 ”’Amo xikchiua maj mosiuapil monamaka iniuan takamej porin tikpinaujtis. Komo ijkon tikchiua, tal kampa tinemi mopitsochiuas ika nejon auilnemilis uan motelchiuas tein tepinaujtij uan tetajyaltij.

30 ”’Moneki nankichiuaskej tein namechnauatij xikchiuakan itech tonal sábado uan amo xikauilmatikan tein mochiua kampa nechueyichiuaj. Nejua niJehová.

31 ”’Amo xikintemokan akin kinnojnotsaj mikemej nion adivinos, porin nejon kichiuaskia amo xichipaujkej. Nejua namoDios Jehová.

32 ”’Ximoketsa iixpan akin kuapochiktik, uan moneki tiktakachiuas* akin xiuejya uan tikmojkatokas moDios. Nejua niJehová.

33 ”’Komo se akin amo israelita nemi namouan, amo xiktajyouiltikan. 34 Xikitakan kemej se namokniuj uan xiktasojtakan kemej namejuan namotasojtaj, porin namejuan no nantepalnemiaj ompa Egipto. Nejua namoDios Jehová.

35 ”’Amo xitakajkayauakan keman nantatamachiuaskej. 36 Sayoj xikuikan tatamachiualoni, pesas, chikiuit uan komit tein ajsitok tatamachiuaj.* Nejua namoDios Jehová, akin namechkixtij de Egipto. 37 Xiktakamatikan nochi notanauatiluan uan xikchiuakan nochi tein nikixtalia. Nejua niJehová’”.

20 Jehová no kiluij Moisés nejin: 2 “Moneki tikiniluis israelitas: Komo se israelita oso akin okseko kayot uan nemi Israel kimaktilia Mólek* se ikoneuj, moneki mikis. Akin ompa nemij moneki kitetemaskej* hasta maj miki. 3 Nejua nikixtopeuas akin kichiuas nejon uan nikixpolos, porin kimaktilij Mólek se ikoneuj, tapitsotilij kampa nitaxeloj uan kichiuak maj amo kuali noka tajtokan. 4 Komo akin ompa nemij kichiuaj kemej yeskia amo kiitaj akin kimaktilia Mólek se ikoneuj uan amo kimiktiaj, 5 nejua nikixtopeuas yejua uan ichankauan. Nikixpolos yejua uan no akin iuan kiueyichiuaj* Mólek.

6 ”’Akin nechkauas uan kintemos akin kinnojnotsaj mikemej uan adivinos, kemej yeskia auilnemis iniuan okseki dioses. Xikyekmatikan ke akin kichiuas nejon nikixtopeuas uan nikixpolos.

7 ”’Namejuan moneki nanyeskij nanchipaujkej uan nanxeliujtoskej para nejua, porin nejua namoDios Jehová. 8 Uan moneki nankitakamatiskej notanauatiluan. Nejua niJehová, akin namechxelojtok.

9 ”’Akin kiuijuikaltis* itat oso inan, moneki mikis. Yejua motemolij maj kimiktikan* porin kiuijuikaltij itat oso inan.

10 ”’Uan komo se takat moteka iuan se tesiuauj, moneki mikis. Moneki kimiktiskej yejua uan no siuat. 11 Akin moteka iuan itakpanan, kipinaujtia itat. Nejon omen moneki mikiskej. Yejuan motemolijkej maj kinmiktikan. 12 Komo se takat moteka iuan isiuamon, nejon omen moneki mikiskej. Dios amo kiixtalij maj ijkon kichiuakan. Yejuan motemolijkej maj kinmiktikan.

13 ”’Komo se takat moteka iuan se itakaikniuj kemej moteka iuan se siuat, nejon omen kichiuaj tein tetajyaltij. Moneki mikiskej. Yejuan motemolijkej maj kinmiktikan.

14 ”’Komo se takat moteka iuan se siuat uan no iuan inan nejon siuat, tein kichiuaj semi pitsotik. Moneki kinmiktiskej uan kinchichinoskej nejon eyin para maj amo akinok kichiua tein pitsotik.

15 ”’Komo se takat moteka iuan se tapial* moneki mikis, uan no moneki nankimiktiskej tapial. 16 Komo se siuat moteka iuan se tapial, moneki tikmiktis siuat uan tapial. Moneki mikiskej. Yejuan motemolijkej maj kinmiktikan.

17 ”’Komo se takat moteka iuan iikniuj, yeski isiuapil itat oso isiuapil inan, nejon tepinaujtij. Moneki kinmiktiskej ininixpan nochin. Nejon takat kipinaujtij iikniuj. Moneki kitatsakuiltiskej.

18 ”’Komo se takat moteka iuan se siuat keman estemotok, moneki kinmiktiskej porin nion semej kiitak esti kemej Dios kiita.

19 ”’Amo ximoteka iuan motía, yeski iikniuj momaj oso iikniuj mopaj, porin nejon kipinaujtiskia se mochankauj. Nanomen moneki namikiskej. 20 Takat akin moteka iuan isiuatsin itío, kipinaujtia itío. Nejon omen moneki kintatsakuiltiskej. Mikiskej uan amo kinpiaskej ininkoneuan. 21 Komo se takat monamiktia iuan icuñada, nejon tetajyaltij.* Nejon takat kipinaujtia iikniuj. Amo kinpiaskej ininkoneuan.

22 ”’Xiktakamatikan nochi notanauatiluan uan nochi tein nikixtalia. Komo amo ijkon nankichiuaj, tal kampa namechajxititi kemej yeskia namechijsotas. 23 Amo xinemikan kemej akin ompa nemij. Nikinkixtiti porin kichiuaj nochi nejon uan nechtajyaltiaj. 24 Yejua ika namechiluij: “Namejuan namokauiliskej inintal akin nemij itech nejon altepemej uan nejua namechmakas nejon tal kampa moteltachiua.* Nejua namoDios Jehová, akin namechxeloj para amo ximonelokan iniuan akin nemij itech okseki xolalmej”. 25 Moneki nankimatiskej katin tapial chipauak uan katin amo chipauak, uan katin totot chipauak uan katin amo chipauak. Amo xikuakan nion se tapial, nion se totot oso nion se okuilij tein moxoxolatsa, tein namechiluij ke amo chipaujkej para amo nantetajyaltiskej. 26 Moneki nanyeskij nanchipaujkej porin nejua Jehová, senkis nichipauak. Sayoj namejuan namechxelojtok para xinoaxkauan, amo kemej akin nemij itech okseki xolalmej.

27 ”’Akin kinnojnotsas mikemej oso yeski adivino moneki mikis, yeski takat oso siuat. Nochin moneki kintetemaskej* hasta maj mikikan. Yejuan motemolijkej maj kinmiktikan’”.

21 Jehová no kiluij Moisés: “Xikinilui tiopixkamej, ikoneuan Aarón: ‘Komo se akin namouan poui momikilia, amo ximotokikan porin amo nanchipaujkejok nanyeskij. 2 Sayoj ke komo momikilia namomaj, namopaj, namookichpil, namosiuapil oso se namokniuj takat, uelis namotokiskej maski amo nanchipaujkejok nanyeskij. 3 No uelis namotokiskej komo momikilia se namokniuj siuat, komo ayamo motekaya iuan se takat, iuan nanemiaj uan ayamo monamiktiaya. 4 Uan komo momikilia isiuauj se takat akin namouan poui, amo no ximotokikan porin amo nanchipaujkejok nanyeskij. 5 Amo ximokuaximakan* nion ximokanximakan, uan amo no ximotejtekikan. 6 Moneki nesis ke nanxeliujtokej para namoDios uan amo nankichiuaskej maj oksekin amo kuali ika tajtokan, porin namejuan nankichichinouiliaj Jehová tein kimaktiliaj. Nejon kemej yeskia itakual namoDios. Moneki nesis ke nanxeliujtokej. 7 Amo ximonamiktikan iuan se siuat akin monamaka iniuan takamej oso se siuat akin ika mauiltijkej, nion iuan se siuat akin itakauj kikauak, porin tiopixkat xeliujtok para iDios. 8 Moneki tinechxelouilis, porin yejua kimaktilia moDios in takual. Moneki tikitas ke xeliujtok porin nejua Jehová, akin namechxelojtok, senkis nichipauak.

9 ”’Uan komo isiuapil se tiopixkat monamakaskia para motekas iuan se takat, kipinaujtiskia itat. Moneki kimiktiskej uan kichichinoskej.

10 ”’Tayekankatiopixkat kikuatekilijkej aceite uan kiixtalijkej para maj motalili tasal* tein kikuis para tekitis kemej tiopixkat. Maj amo kikaua maj fiero mochiua itson nion maj kitsayana itasal. 11 Maj amo motoki kampa yetok se miket. Maj amo mopitsotili nion por itat nion por inan. 12 Maj amo kisa de kampa yetok ikaltsin Dios* nion maj kipitsotili, porin kikuatekilijkej aceite uan nejon kinextia ke kiixtalijkej maj tekiti kemej tiopixkat. Nejua niJehová.

13 ”’Maj monamikti iuan se siuat akin ayamo motekani iuan se takat. 14 Amo uelis monamiktis iuan se siuat akin momikilijya itakatsin, se akin itakauj kikauak, se akin ika mauiltijkej oso se akin monamakatinemi. Moneki monamiktis iuan se siuat akin iuan poui uan ayamo motekani iuan se takat. 15 Komo amo ijkon kichiua, oksekin kiitaskej ke ikoneuan amo chipaujkej, porin nejua niJehová, akin nikxeloj’”.

16 Jehová no kiluij Moisés: 17 “Xikilui Aarón: ‘Komo semej mokoneuan kipia teisa tein amo kuali, amo uelis kimaktilis Dios in takual. 18 Amo uelis kichiuas nejon nion se takat akin amo tachia, akin koxoj, akin yekatsol kotoltik, akin kipia se imay oso se imets okachi ueyak, 19 akin metspostektok oso mapostektok, 20 akin pantomotstik, akin amo moskaltij,* akin amo ixkuali, akin sauati, xojxoleui oso se takat akin mokokoj ikestsalan.* 21 Komo semej ikoneuan tiopixkat Aarón kipia teisa tein amo kuali, amo uelis kichichinouilis Jehová tein kimaktiliaj. Kemej amo yekkuali, amo uelis kimaktilis iDios in takual. 22 Uelis kikuas nochi tataman takual tein kixelouiliaj Dios. 23 Sayoj ke amo uelis motokis kampa yetok cortina nion kampa yetok altar, porin kipia teisa tein amo kuali. Maj amo kipitsotili kaltsin, porin nejua niJehová, akin nikinxelojtok’”.

24 Uan Moisés tajtoj iuan Aarón uan ikoneuan uan iniuan nochin israelitas.

22 Jehová oksepa iuan tajtoj Moisés uan kiluij: 2 “Xikinilui Aarón uan ikoneuan maj kuali kiitakan keniuj kikuij tein israelitas nechxelouiliaj uan nechmaktiliaj. Ijkon amo kichiuaskej maj amo kuali noka tajtokan. Nejua niJehová. 3 Xikinilui: ‘Komo semej namokoneuan amo chipauak uan kikui tein israelitas kixelouiliaj uan kimaktiliaj Jehová, moneki kimiktiskej. Nejua niJehová. 4 Nion semej ikoneuan Aarón uelis kikuas tein Dios kixeloj hasta maj chipauakya. Amo chipauak yeski komo kipia pitsotik kokolis* tein monotsa lepra, se kokolis tein kichiua maj kisa teisa kemej temal kampa moxixa,* komo kikitskia se akin mopitsotilij por se miket, komo kisa ixinachyo,* 5 komo kikitskia semej okuiltsitsin tein olochnemij tein Dios kiita ke amo chipauak oso komo kikitskia se akin amo chipauak. 6 Akin kikitskis tein amo chipauak, yejua amo chipauak yeski hasta keman tapoyauis uan amo uelis kikuas tein Dios kixeloj hasta maj malti.* 7 Keman pankalakisya tonaltsin, chipauakya yeski, uan uelis kikuasya tein Dios kixeloj porin ipa yejua tein kikua. 8 Maj amo no kikua se tapial miket tein kiajsik oso tein se tekuani kikokototsak, porin nejon kichiuas maj amo chipauak. Nejua niJehová.

9 ”’Yejuan moneki kichiuaskej tein nikinnauatia. Komo amo kichiuaj yeski se tajtakol, uan mikiskej porin amo kikuikej kemej kinamiki tein nechxelouiliaj. Nejua niJehová, akin nikinxelojtok.

10 ”’Amo akin yeski* uelis kikuas tein Dios kixeloj, nion akin okseko kayot uan mokaujtok ichan tiopixkat nion se tetekitilijkej. 11 Sayoj ke komo se tiopixkat kikoua aksa,* yejua kemaj uelis kikuas tein kikua tiopixkat. Takeualmej akin yolij ichan no uelis kikuaskej. 12 Komo isiuapil se tiopixkat monamiktia iuan se akin amo tiopixkat, nejon siuapil amo uelis kikuas tein israelitas kixelouilijkej uan kimaktilijkej Dios. 13 Komo isiuapil se tiopixkat momikilia itakatsin oso itakauj kikaua, amo kinpia ikoneuan uan oksepa nemiti iuan itat, uelis kikuas tein itat kikua. Sayoj ke amo akin yeski* uelis kikuas.

14 ”’Komo aksa kikua tein Dios kixeloj uan nion kimatik, moneki kikepilis tiopixkat tein kikuaj uan kitemakas tepitsinok.* 15 Yejua ika tiopixkamej moneki kikuiskej kemej kinamiki tein israelitas kixelouiliaj Jehová uan kimaktiliaj. 16 Maj amo no kinkauakan maj kikuakan tein Dios kixeloj. Komo kikuaskiaj, motajtakolmakaskiaj uan kintatsakuiltiskiaj. Nejua niJehová, akin nikinxelojtok’”.

17 Jehová no kiluij Moisés: 18 “Xikinilui Aarón uan ikoneuan uan nochin israelitas: ‘Keman se takat israelita oso amo israelita uan nemi Israel kineki kichichinouilis Jehová se tapial, porin motenkauak teisa oso sayoj porin kineki kitayokolis, 19 moneki kitemaktis se kuakuejueuet, se ichkaueuet* tein yekin moskaltijtok oso se chivo. Nejin tapialmej moneki kuali yetoskej para maj Dios kiyolpakti. 20 Amo xikmaktilikan tapialmej tein amo kuajkualmej, porin amo namechpaleuis xikyolpaktikan Dios.

21 ”’Akin kimaktilis Jehová se tapial para iuan takuas* porin motenkauak teisa oso sayoj porin kineki kitayokolis, moneki yeski se kuakouej, se ichkat oso se chivo tein kuali yetos komo kineki kiyolpaktis Dios. Maj amo kipia nion teyi tein amo kuali. 22 Maj amo kimaktilikan Dios se tapial tein amo tachia, tein metspostektok, tein tatekil, tein kokoti, tein kipia sarna oso okse taman kokolis itech ipankuetaxyo. Amo xikuikilikan Jehová nion se tapial kemej nejin nion xikmaktilikan Jehová itech altar. 23 Komo sayoj nankinekij nankitayokoliskej, uelis nankitemakaskej se kuakouej oso se ichkat tein kipias se imets tein okachi ueyak oso okachi tokotstik. Sayoj ke komo nankitemakatij porin namotenkaujkej teisa, amo uelis ijkon nankitemakaskej. 24 Amo xikmaktilikan Jehová nion se tapial tein takokol ikestsalan, tein kitapitsinilijkej ikestsalan oso kicaparojkej. Amo xiktemaktikan nejon tapialmej kampa nanemij. 25 Uan komo se akin okseko kayot kiuika se tapial ijkon, amo xikuilikan para nankimaktiliskej namoDios, porin nejon tapialmej kokolisyojkej uan amo kuajkualmej. Amo namechpaleuis xikyolpaktikan Dios’”.

26 Jehová oksepa iuan tajtoj Moisés uan kiluij: 27 “Keman yolis se kuakouej, se ichkat oso se chivo moneki yetos iuan inan chikome tonal, sayoj ke itech chikueyitika tonal uelis kitemaktiskejya uan kichichinouiliskej Jehová. 28 Amo xikmiktikan itech sayoj se tonal se kuakouej uan ikoneuj oso se ichkat uan ikoneuj.

29 ”Komo nankimaktiliaj Jehová se tapial para nankitasojkamatiliskej, moneki nankimaktiliskej kemej kiyolpaktis. 30 Moneki nankikuaskej nejon tonal. Amo xikauakan nion teyi para mostika. Nejua niJehová.

31 ”Moneki nankichiuaskej tein namechnauatia. Nejua niJehová. 32 Amo xikchiuakan maj amo kuali noka tajtokan; nochin israelitas moneki kielnamikiskej ke senkis nichipauak. Nejua niJehová, akin namechxelojtok, 33 akin namechkixtij de Egipto para nankimatiskej ke nejua niDios. Nejua niJehová”.

23 Jehová no kiluij Moisés: 2 “Xikinilui israelitas: ‘Itech iluimej tein Jehová namechiluia xikchiuakan, moneki nankinnotsaskej nochin uan namosentiliskej para nankiueyichiuaskej Dios. Yejua nejin iluimej:

3 ”’Uelis nantekitiskej chikuasen tonal, sayoj ke chikometika tonal amo xikchiuakan nion se tekit porin sábado. Nejon tonal namosentiliskej para nankiueyichiuaskej Dios. Kampa yeski nanemiskej xikelnamikikan ke nejon tonal xeliujtok para Jehová.

4 ”’Yejua nejin iluimej tein Jehová namechiluia xikchiuakan, keman moneki nankinnotsaskej nochin uan namosentiliskej para nankiueyichiuaskej. Moneki nankichiuaskej itech tonalmej tein yejua kiixtalij. 5 Itech metsti abib,* tonal 14, keman tapoyaujtosya, mochiuas iluit tein monotsa Pascua para kiueyitaliskej Jehová.

6 ”’Itech tonal 15 de nejon metsti, moneki nankichiuaskej iluit keman nankikuaskej pantsin tein amo kisamaualtiaj.* Nankichiuaskej para nankiueyitaliskej Jehová. Moneki nankikuaskej nejon pantsin chikome tonal. 7 Yekinika tonal namosentiliskej para nankiueyichiuaskej Dios. Amo xikchiuakan nion se chikauak tekit. 8 Chikome tonal moneki nankimaktiliskej Jehová tein kichichinouiliskej. Itech chikometika tonal oksepa namosentiliskej para nankiueyichiuaskej Dios. Amo xikchiuakan nion se chikauak tekit’”.

9 Jehová no kiluij Moisés: 10 “Xikinilui israelitas: ‘Keman nanajsiskejya itech tal tein namechmakati uan nankitekiskej tein nankitokaskej uan nankijilpiskej, moneki nankiuikiliskej tiopixkat se talpil. Moneki yeski tein yekinika takik. 11 Uan tiopixkat kimauiuikas nejon iixpan Jehová para nankiyolpaktiskej. Moneki kimauiuikas se tonal satepan ke panos sábado. 12 Nejon tonal moneki nankichichinouiliskej Jehová se ichkaueuet* tein kuali yetos uan ayamo kiajxitis se xiuit. 13 Nankimaktiliskej Jehová ome kilo harina tein okachi kuali tamanelol ika aceite. Nankichichinouiliskej nejon uan yejua semi kiajuiyakmatis. No nankimaktiliskej se litro vino. 14 Amo xikuakan pantsin, cebada tateuats nion yankuik cebada hasta tonal keman nankiuikiliskej namoDios tein nankimaktiliskej. Desde axkan, namejuan uan namokoneuan moneki nankitakamatiskej nejin tanauatil kampa yeski nanemiskej.

15 ”’Desde tonal keman nankiuikaskej tein tiopixkat kimauiuikas para kimaktilis Dios, moneki nankipouaskej chikome sábados. Moneki yeski chikome semanas. 16 Nankipouaskej 50 tonalmej, hasta ke panos chikome sábados, uan ijkuak moneki nankimaktiliskej Jehová trigo tein yekinika chikauayas. 17 Desde namochan moneki nankiuikaskej ome pantsitsin para kimauiuikaskej iixpan Dios. Nejon pantsitsin moneki nankichijchiuaskej ika ome kilo harina tein okachi kuali uan ika levadura. Yejua nejon tein yekinika chikauayas uan nankimaktiliskej Jehová. 18 Iuan nejon pantsitsin no moneki nankimaktiliskej chikome ichkatsitsin tein kuajkualmej uan kipiaskej se xiuit, se kuakouej tein yekin moskaltijtok uan ome ichkaueuetkej. Nejin tapialmej moneki kichichinouiliskej Jehová iuan pantsitsin uan vino, uan Jehová semi kiajuiyakmatis. 19 Uan moneki nankimaktiliskej Dios se chivojkonet porin nantajtakolejkej, uan ome ichkatsitsin tein kipiaskej se xiuit para iuan nansentakuaskej.* 20 Tiopixkat kimauiuikas iixpan Jehová ome ichkatsitsin iuan nejon pantsitsin. Jehová kiita ke nochi nejon xeliujtok uan ininaxka tiopixkamej. 21 Nejon tonal nankinnotsaskej nochin uan namosentiliskej para nankiueyichiuaskej Dios. Amo xikchiuakan nion se chikauak tekit. Desde axkan, namejuan uan namokoneuan moneki nankitakamatiskej nejin tanauatil kampa yeski nanemiskej.

22 ”’Keman nankitekiskej tein nankitokaskej, amo xiktekikan nochi tein mochiuas tatenoj de namotalpan nion xikpejpenakan tein mokaujtias. Moneki nankinkauiliskej pobres* uan akin okseko kayomej uan nemij namouan. Nejua niJehová, namoDios’”.

23 Jehová no kiluij Moisés: 24 “Xikinilui israelitas: ‘Itech tonal keman peuas metsti etanim,* amo xikchiuakan nion se tekit. Nejon tonal kipitsaskej trompeta para xikelnamikikan ke namosentiliskej para nankiueyichiuaskej Dios. 25 Amo uelis nankichiuaskej nion se chikauak tekit uan moneki nankimaktiliskej Jehová tein kichichinouiliskej’”.

26 Uan Jehová no kiluij Moisés: 27 “Sayoj ke, itech tonal 10 de nejin metsti etanim* yeski tonal keman Dios kiixpolos namotajtakoluan. Moneki namosentiliskej para nankiueyichiuaskej Dios uan moneki namotayokoltiskej por namotajtakoluan.* No moneki nankimaktiliskej Jehová tein kichichinouiliskej. 28 Amo xitekitikan nejon tonal, porin ijkuak nankichiuaskej tein tapaleuis maj namoDios Jehová namechtapojpolui, uan yejua kiixpolos namotajtakoluan. 29 Akin amo motayokoltis por itajtakoluan* nejon tonal, kimiktiskej. 30 Uan akin tekitis nejon tonal nejua nikixpolos. 31 Amo xikchiuakan nion se tekit. Desde axkan, namejuan uan namokoneuan moneki nankitakamatiskej nejin tanauatil kampa yeski nanemiskej. 32 Nejon tonal moneki nankiitaskej kemej tonal sábado uan amo nankichiuaskej nion se tekit. Uan moneki namotayokoltiskej itech tonal 9 tiotakpa. Nejon tonal peuas desde tiotak uan tamis mostika tiotak”.

33 Jehová kisentokak tajtoj iuan Moisés uan kiluij: 34 “Xikinilui israelitas: ‘Itech tonal 15 de nejin metsti etanim* peuas iluit itech sakakaltsitsin para kiueyitaliskej Jehová, uan uejkauas chikome tonal. 35 Itech yekinika tonal moneki namosentiliskej para nankiueyichiuaskej Dios, uan amo xikchiuakan nion se chikauak tekit. 36 Chikome tonal moneki nankimaktiliskej Jehová tein kichichinouiliskej. Itech chikueyitika tonal oksepa namosentiliskej uan nankimaktiliskej Jehová tein kichichinouiliskej. Namosentiliskej para nankiueyichiuaskej. Amo uelis nankichiuaskej nion se chikauak tekit.

37 ”’Yejua nejin iluimej tein Jehová namechiluia xikchiuakan. Ijkuak, moneki nankinnotsaskej nochin uan namosentiliskej para nankiueyichiuaskej Jehová, uan nankichichinouiliskej tapialmej, tein tachijchiuj ika harina uan vino. Nankimaktiliskej ijkon kemej ixyetok mochiuas mojmostaj. 38 Nejin yeski aparte de tein ipa moneki nankimaktiliskej Jehová itech sábados keman Jehová kiixtalij ximoseuikan, no aparte de tein nankitayokoliaj, tein nankimaktiliaj porin namotenkauaj teisa uan tein nankimakaj porin ijkon nankinekij. 39 Sayoj ke itech tonal 15 metsti etanim, keman nankitekiskej tein nankitokaskej, moneki nankiiluichiuiliskej Jehová chikome tonal. Itech yekinika tonal uan itech chikueyitika tonal amo xikchiuakan nion se tekit. 40 Itech yekinika tonal nankitekiskej kuajkuali koujtakilot, palmajxiuit uan ininmakoujyo koujmej tein tel maxiujyojkej uan koujmej tein moskaltiaj ataujtenoj. Nanyolpakiskej iixpan namoDios Jehová chikome tonal. 41 Xijxiujtika nankichiuaskej nejon iluit para nankiueyitaliskej Jehová chikome tonal. Moneki nankichiuaskej itech metsti etanim. Desde axkan, namejuan uan namokoneuan moneki nankitakamatiskej nejin tanauatil. 42 Nochin namejuan akin nanisraelitas moneki nanemiskej itech sakakaltsitsin chikome tonal. 43 Ijkon, nochin akin yoltiaskej kimatiskej ke nejua nikchiuak maj israelitas nemikan itech sakakaltsitsin keman nikinkixtij de Egipto. Nejua namoDios Jehová’”.

44 Uan Moisés kiniluij israelitas katin iluimej Jehová kinnauatij maj kichiuakan.

24 Jehová oksepa iuan tajtoj Moisés uan kiluij: 2 “Xikinnauati israelitas maj mitsuikilikan yekaceite de itakilo olivojkouit para maj candilmej nochipa tauijtokan. 3 Aarón moneki kiitas maj xotatokan candilmej tein yetokej itech kaltsin kampa taueyichiuaj,* oksekopa den cortina, tanakastan den tatiochiualkaxon.* Moneki xotatoskej iixpan Jehová desde tiotak hasta kualkan. Desde axkan nikixtalia nejin tanauatil tein moneki kichiuaskej ijkon kemej yoltiaskej. 4 Yejua moneki kiitas maj candilmej nochipa yetokan itech tauilketsaloni tachijchiuj ika oro tein okachi kuali iixpan Jehová.

5 ”Tikuis harina tein okachi kuali uan tikchijchiuas 12 pantsitsin tein ijtikoyoktikej. Tikuis ome kilo harina para tikchijchiuas sejse pantsin. 6 Itech mesa tein tachijchiuj ika oro tein okachi kuali, ojkan tiknejnepanos nejon pantsitsin iixpan Jehová. Seko chikuasen uan okseko no chikuasen. 7 Itech sejse tanepan tiktalis istak kopal tein amo tamanelol. Tikchichinouilis Jehová istak kopal uan nejon kiixnextis pantsin tein kimaktiliaj. 8 Nochi sábados, tiopixkat moneki kitalis pantsin iixpan Jehová. Desde axkan nimotenkaua nejin iniuan israelitas. 9 Nejon pantsin ininaxka yeski Aarón uan ikoneuan, uan kikuaskej kampa Dios taxeloj. Keman kimaktiliaj Jehová teisa para kichichinouiliskej, moneki kinxelouiliskej. Desde axkan nikixtalia nejin”.

10 Moajsia se okichpil akin inan katka se israelita uan itat katka de Egipto. Nejon okichpil peuak moteuia iuan se israelita kampa nochin mochantijtoyaj. 11 Iokichpil nejon israelita peuak kiuijuikaltia* Dios uan kitenkuitiaya itokay. Yejua ika kiuikilijkej Moisés. Inan nejon okichpil monotsaya Selomit, isiuapil Dibrí, ichankauj Dan. 12 Ompa kipixtoyaj hasta maj kimatinij toni kiixtalijka Jehová.

13 Uan Jehová kiluij Moisés: 14 “Xikalankixti akin nechuijuikaltij,* uan nochin akin kikakkej moneki kitaliskej ininmauan ikuako in okichpil, uan nochin moneki kitetemaskej.* 15 Uan xikinilui israelitas: ‘Akin kiuijuikaltis iDios, moneki kitatsakuiltiskej. 16 Yejua ika, akin kiuijuikaltis Jehová uan kitenkuitias itokay moneki mikis. Nochin moneki kitetemaskej.* Yeski israelita oso okseko kayot, moneki mikis por kiuijuikaltis Dios uan kitenkuitias itokay.

17 ”’Komo se takat kimiktia aksa,* moneki mikis. 18 Akin kimiktilis itapial aksa moneki taxtauas, para maj se tapial kiixpata okse. 19 Komo se takat kikokoua okse, nejon takat no moneki kichiuiliskej tein yejua techiuilij. 20 Komo kipostekilij se iomiyo, maj no kipostekilikan se iomiyo, komo kiixpitsinij maj no kiixpitsinikan uan komo kitanpixoj maj no kitanpixokan;* moneki kichiuiliskej tein yejua techiuilij. 21 Akin kimiktilis itapial aksa moneki taxtauas, sayoj ke akin kimiktis aksa, moneki mikis.

22 ”’Tein moixtalis mochiuas iuan se akin okseko kayot maj no yejua moixtali iuan se israelita, porin nejua namoDios Jehová’”.

23 Uan Moisés tajtoj iniuan israelitas uan yejuan kikalankixtijkej akin kiuijuikaltijka* Dios uan kitetenkej.* Israelitas kichiujkej ijkon kemej Jehová kinauatijka Moisés.

25 Jehová oksepa iuan tajtoj Moisés itech tepet Sinaí, uan kiluij: 2 “Xikinilui israelitas: ‘Keman nanajsiskejya itech tal tein namechmakati, nankiixseuiskej namotal se xiuit, kemej yeskia se sábado tein xeliujtok para Jehová. 3 Chikuasen xiuit titatokas, tikmatekis uvajkouit uan tiktekis tein mochiuas. 4 Sayoj ke chikometika xiuit yeski kemej sábado tein xeliujtok para Jehová, uan tikixseuis motal. Amo xitatoka nion xikmateki uvajkouit. 5 Komo uetsi xinach keman tiksentilis tein mochiua uan iselti ixua, amo xiksentili tein mochiuas nion xiksentili uvas. Moneki tikixseuis motal se xiuit. 6 Uelis tiktekis itech nejon xiuit* sayoj tein nankikuaskej: tejua, takamej uan siuamej tein tikinkouas, akin tikintakeuas uan akin amo israelita uan nemis mouan. 7 Motapialuan uan koujtajtapialmej no uelis kikuaskej tein mochiuas. Nochi tein mochiuas uelis nankikuaskej.

8 ”’Chikome viaje moneki tikpouas chikome xiuit, uan ajsis 49 xiujmej. Itech nochi nejon xiujmej tal moixseuis chikome xiuit. 9 Uan itech metsti etanim,* tonal 10, chikauak titapitsas;* itech tonal keman Dios kiixpolos namotajtakoluan, moneki nantapitsaskej kemej mokakis itech nochi namotal. 10 Xiuit 50 moneki nankiitaskej ke xeliujtok para Dios uan nankitematiltiskej ke kinmajkauaskej nochin akin yetoskej temako. Yeski xiuit keman kimakixtiskej nochi, uan nanochin namechkepiliskej namotal uan namokepaskej iniuan namochankauan. 11 Xiuit 50 yeski xiuit keman kimakixtiskej nochi. Amo nantatokaskej nion nankisentiliskej tein iselti mochiuas nion nankisentiliskej uvas. 12 Porin nejon xiuit kimakixtiskej nochi. Moneki nankiitaskej ke xeliujtok para Dios. Ijkuak, sayoj uelis nankitekiskej tein nankikuaskej.

13 ”’Itech nejin xiuit, nanochin moneki namechkepiliskej tein namoaxka katka. 14 Amo ika ximauiltikan namokniuj komo nankinamakiltiaj oso nankikouiliaj teisa. 15 Komo tikouati teisa, xikita kanachi xiujmejya panok desde xiuit keman kimakixtijkej nochi, uan akin mitstanamakiltis moneki kiitas kanachi xiujmejok tatakis. 16 Komo miak xiujmejok poliui, uelis kipankixtilis ipatiuj, sayoj ke komo amo miak xiujmejok poliui, moneki kitsinkixtis. Moneki kiitas kanachi xiujmejok tatakis. 17 Maj amo akin ika mauilti se iikniuj, uan moneki nankimojkatokaskej namoDios, porin nejua namoDios Jehová. 18 Komo nankitakamatij notanauatiluan uan nankichiuaj tein nikixtalia, kualtsin nanemiskej. 19 Motachiuas itech nochi nejon tal, uan namejuan kuali nanixuiskej uan kualtsin nanemiskej.

20 ”’Sayoj ke xa namotajtaniskej “¿Toni tikuatij itech chikometika xiuit komo amo uelis titatokaskej nion tiksentiliskej tein mochiuas?”. 21 Amo ximotekipachokan. Xikyekmatikan ke itech chikuasentika xiuit namechteltatiochiuis uan mochiuas tein namechajsis eyi xiuit. 22 Uan itech chikueyitika xiuit nantatokaskej uan nankikuajtoskej tein nankisentilijkej itech chikuasentika xiuit. Nankikuajtoskej nejon hasta chiknauitika xiuit, hasta maj mochiua tein nankitokkej.

23 ”’Uelis nankinamakaskej namotal, sayoj ke akin namechkouilis amo uelis mokauilis nochipaya, porin tal noaxka. Nejua namechita kemej akin mokaltalitij tetalpan uan kemej akin nemij kampa amo kayomej. 24 Itech nochi in tal kampa nanemiskej, akin kinamakas italpan uelis oksepa kikouas.

25 ”’Komo mokniuj mokaua pobre uan kinamaka se cacho ital, se ichankauj moneki ualas uan oksepa kikouas tein iikniuj kinamakak. 26 Akin amo kipias se ichankauj akin uelis oksepa kikouas tal uan yejua kipia tomin para mokouilisya, 27 moneki kiitas kanachi xiuit panok desde ke kinamakak para kiixtalis ipatiuj tal, uan kikepilis sayoj tomin tein poliuis akin kikouilijka. Uan ijkuak, uelis oksepa iaxka yeski nejon tal.

28 ”’Sayoj ke komo amo kipia tomin para kikouas, akin takouak mokauilis hasta itech xiuit keman kimakixtiskej nochi. Itech nejon xiuit, akin tanamakak oksepa iaxka yeski nejon tal.

29 ”’Uan akin kinamakas se kali tein yetok itech se ueyi xolal kampa tatsaktok ika tepamit, uelis oksepa kikouas nejon kali sayoj itech yekinika xiuit. Satepan ke kinamakas, sayoj kipias se xiuit para uelis oksepa kikouas. 30 Sayoj ke, komo nejon kali amo kikouaj itech nejon xiuit, akin kikouak mokauilisya. Iaxka yeski yejua uan ikoneuan akin yoltiaskej. Amo moneki kikepas itech xiuit keman kimakixtiskej nochi. 31 Sayoj ke, komo kali tein kinamakaj yetok itech se xolal kampa amo tatsaktok ika tepamit, uelis oksepa kikouaskej keman yeski, ijkon kemej kichiuaj keman kinamakaj se tal. Uan moneki kikepiliskej akin iaxka katka itech xiuit keman kimakixtiskej nochi.

32 ”ʼIchankauan Leví, akin moixmatij kemej levitas, kipiaj ininchan itech uejueyi xolalmej. Komo kinamakaj ininchan, uelis oksepa kikouaskej keman yeski. 33 Komo se levita amo oksepa kikoua ichan tein kinamakak, no kikepiliskej itech xiuit keman kimakixtiskej nochi, porin kalmej tein yetokej itech uejueyi xolalmej kampa kinmakakej, ininaxka yejuan. 34 Uan no, ixtauat tein kiyoualoua uejueyi xolalmej tein kinmakakej amo uelis kinamakaskej porin ixyetok maj nochipa ininaxka.

35 ”ʼKomo se mokniuj mokaua pobre uan amo ueli moixpanoltiaok, moneki tiktekipanos kemej tikchiuaskia iuan se akin amo israelita oso se akin mokaltaliti tetalpan, para maj amo miki. 36 Komo tikpaleuia, amo xikixtili tomin. Moneki tikmojkatokas moDios, uan mokniuj amo mikis. 37 Amo xiktaneujti motomin para tiktanilis nion xiktamaka para tikixtilis tomin. 38 Nejua namoDios Jehová, akin namechkixtij de Egipto para namechmakas tal tein poui Canaán, para nankimatiskej ke nejua niDios.

39 ”’Komo se mokniuj mokaua pobre uan mitsiluia xikoua, amo xikchiualti tekit tein kichiualtiaj takeual tein tanamak. 40 Moneki tikitas kemej se akin tetekitilia oso kemej se akin mokaltaliti tetalpan. Moneki mitstekitilis hasta xiuit keman kimakixtiskej nochi. 41 Nejon xiuit mitskauas. Yejua uan ikoneuan mokepaskej iniuan ichankauan, uan oksepa kikepiliskej tal tein kikauilijteujkej iuejkaujtatuan. 42 Porin yejuan notakeualuan, akin nikinkixtij de Egipto. Yejuan amo uelis monamakaskej kemej kinnamakaj takeualmej. 43 Amo xiktajyouilti mokniuj, uan moneki tikmojkatokas moDios. 44 Komo tikneki tikinpias takeualmej, moneki yeskij den altepemej tein mitsyoualojtokej, de ompa uelis tikinkouas takamej uan siuamej. 45 No uelis tikinkouas ininkoneuan akin sayoj mokaltalitoj kampa tinemi uan ininchankauan akin ompa yoliskej, uan yejuan yeskij motakeualuan. 46 Uelis tikinkauilijteuas mokoneuan, uan yejuan kisentokaskej yeskij inintakeualuan. Uelis tikintekitiltis. Sayoj ke amo xikintajyouilti mokniuan israelitas.

47 ”’Sayoj ke komo se akin amo israelita uan mouan nemi tominpia, uan se mokniuj israelita mokaua pobre uan kiluia akin amo israelita oso se ichankauj maj kikoua, 48 yejua uelis oksepa kikouaskej. Se iikniuj uelis kikouas. 49 No uelis kikouas itío, iprimo oso okse ichankauj.

”’Yejua no uelis mokouas komo satepan tominpia. 50 Moneki kiitas iuan akin kikouak kanachi xiuit panok desde ke monamakak, kanachi xiuit poliui para ajsis xiuit keman kimakixtiskej nochi uan kanachi ika monamakak. Ika nejon kiixejekoskej kanachi moneki taxtauas. Nochi nejon xiujmej yeski kemej se tetekitilijkej. 51 Komo poliuiok miak xiujmej, moneki taxtauas por xiujmej tein poliuiok. 52 Sayoj ke komo amo miak xiujmejok poliui, moneki kiixejekos kanachi kitemakas uan sayoj taxtauas tein poliuis. 53 Yejua moneki kitekitilis akin kikouak nochi xiujmej kemej se akin tetekitilia, uan tejua moneki tikitas maj amo kitajyouilti. 54 Sayoj ke komo amo ueli mokoua ijkon kemej nikan moixtalia, yejua uan ikoneuan kinmajkauaskej itech xiuit keman kimakixtiskej nochi.

55 ”’Porin israelitas notakeualuan, akin nikinkixtij de Egipto. Nejua namoDios Jehová.

26 ”ʼAmo ximochijchiuilikan tatadiosmej.* Nochi nejon amo tapaleuia. Amo no xiketsakan nion se tatadios nion se tet para ika nantaueyichiuaskej, uan amo no xikchijchiuakan teisa ika se tet para nankiketsaskej uan ompa namotankuaketsaskej; porin nejua namoDios Jehová. 2 Moneki nankichiuaskej tein namechnauatij xikchiuakan itech tonal sábado uan amo xikauilmatikan tein mochiua kampa nechueyichiuaj. Nejua niJehová.

3 ”ʼKomo nankisentokaj nankichiuaj tein namechiluia uan nankitakamatij notanauatiluan, 4 nikchiuas maj tel kioui keman moneki, uan motachiuas uan tel tatakis. 5 Kemej moteltachiuas, keman nankichipaujtoskejok seki tatok, onkasya uvas tein monekis nankitekiskejya. Uan nankitektoskejok uvas keman monekis oksepa nantatokaskejya. Nantakuaskej hasta kuali nanixuiskej uan kualtsin nanemiskej. 6 Nikchiuas xiyolseujkanemikan kampa nanyetoskej, namoseuiskej uan amo akin namechmoujtis. Nikchiuas maj amo yeto nion se tekuani kampa nanemiskej, uan amo akin namechteuitiuj. 7 Xikyekmatikan ke nankintokatiaskej akin namechtauelitaskej uan ika namomachete tein ojkan tenej* nankinmiktiskej. 8 Namakuilimej nankintokatiaskej 100, uan 100 nankintokatiaskej 10 mil, uan ika namomachete nankinmiktiskej akin namechtauelitaskej.

9 ”ʼNamechtatiochiuis uan nikchiuas xikinpiakan miakej namokoneuan uan ximomiakilikan, uan no nikchiuas tein nimotenkauak namouan. 10 Keman nankikuajtoskejok tein nankisentilijkaj se xiuit achto, monekis nankikixtiskej para nankikalakiskej tein yankuik. 11 Uan kampa nanemiskej nikchiuas maj yeto kaltsin kampa nanechueyichiuaskej,* uan amo namechixtopeuas. 12 Nejua namouan nietos uan niyeski namoDios, uan namejuan nanyeskij nannoaxkauan. 13 Nejua niJehová namoDios, akin namechkixtij de Egipto, para maj amo namechtajyouiltianijok uan para amo xietonijok temako.

14 ”ʼSayoj ke, komo amo nanechkakij nion nankichiuaj nochi nejin tein namechnauatia, 15 komo nankiixtopeuaj tein namechiluia, namechkualantia tein nikixtalia, uan amo nankitakamatij nochi notanauatiluan nion nankichiuaj tein timotenkaujkej, 16 yejua nejin tein namechchiuilis: namechtajyouiltis ika tuberculosis* uan nikchiuas maj namechkui chikauak totonik. Nejon kichiuas amo xiyektachiakan uan xikmachilikan ke amo nantaxikouajok. Nenkaj nantatokaskej porin akin namechtauelitaskej namechkuiliskej namotatok. 17 Namechixnamikis uan akin namechtauelitaskej namechtaniskej uan namechchiuiliskej tein kinekiskej. Kemej nantelmoujtoskej, nancholojteuaskej maski amo akin namechteuisnekis.

18 ”ʼKomo maski ijkon amo nanechkakij monekis okachi fiero* namechtatsakuiltis por namotajtakoluan. 19 Komo namotelueyimatij,* namechpinaujtis uan nikchiuas maj tel amo kioui uan maj tel tauakto.* 20 Nenkaj namosioujtiskej, porin amo teyi mochiuas nion tatakis.

21 ”ʼSayoj ke, komo nankisentokaj nanechixnamikij uan amo nankinekij nanechkakiskej, monekis okachi fiero namechtatsakuiltis por namotajtakoluan. 22 Namechtitanilis koujtajtapialmej tein namechinmiktiliskej namokoneuan uan namotapialuan. Uan amo namiakejok nanyeskij uan hasta poliuiskej ojmej tein nankikuiaj.

23 ”ʼKomo maski ijkon amo nankinekij maj namechpaleui ximoyektalikan uan nankisentokaj nanechixnamikij, 24 nejua no namechixnamikis uan okachi fiero namechtatsakuiltis por namotajtakoluan. 25 Nikchiuas maj akin namechtauelitaskej namechteuikan para namechtatsakuiltis, porin amo nankichiujkej tein timotenkaujkej. Komo nancholouaj itech uejueyi xolalmej, nikchiuas xikokolispeuakan* uan namechtaniskej akin namechtauelitaskej. 26 Keman nikchiuas tel amo xikpiakan toni nankikuaskej, majtakti siuamej kiyokxitiskej pantsin itech sayoj se tikomit. Namechtamachiuiliskej tein nankikuaskej uan namechmakaskej tel tepitsin. Nantakuaskej sayoj ke amo nanixuiskej.

27 ”ʼKomo maski ijkon amo nanechkakij uan nankisentokaj nanechixnamikij, 28 nejua okachiok namechixnamikis uan monekis okachi fiero namechtatsakuiltis por namotajtakoluan. 29 Uan hasta monekis nankinkuaskej namookichpipiluan uan namosiuapipiluan. 30 Nitauejuelos kampa nantaueyichiuaskej uan nikinxitinis namoaltares kampa nantapopochuiskej. Uan keman namikiskejya namechmontontalis itech namotatadiosuan* tein tetajyaltiaj* uan nion yoltokej. Uan namechkauas porin nanechtajyaltiskej. 31 Nikinixpolos uejueyi xolalmej kampa nanemiskej uan kampa nantaueyichiuaskej, uan amo nikajuiyakmatis tapialmej tein nanechchichinouiliskej. 32 Nikchiuas maj itech altepet tafierojkan, uan akin namechtauelitaskej uan ompa nemiskej kimojkaitaskej tein panos. 33 Namechmoyauas* itech altepemej, uan nikchiuas maj namechteuitij akin namechtauelitaskej. Kampa nanemiskej tafierojkan yeski uan kinixpoloskej namouejueyi xolaluan.

34 ”ʼKeman nanemiskej itech inintal akin namechtauelitaskej, namotal tafierojkan yeski uan moixseuis porin amo moixseuijtoya chijchikometika xiuit. 35 Keman tafierojkan yeski, namotal moixseuis porin amo nankiixseuijtoyaj chijchikometika xiuit keman ompa nanemiaj.

36 ”ʼAkin nanemiskej itech inintal akin namechtauelitaskej, nikchiuas ximojkamikikan. Nancholoskej hasta keman ejekat kiolinis se xiuit tein uakik. Nancholoskej kemej yeskia namechtokatiouij para namechteuiskej uan nanuetsiskej maski amo akin namechtokatias. 37 Namokuijkuitikisaskej uan nanuetsiskej maski amo akin namechtokatias para namechteuis. Amo uelis nankinixnamikiskej akin namechtauelitaskej. 38 Namikiskej itech okseki altepemej, itech tal kampa yejuan nemij. 39 Akin amo mikiskej, ompa mokauaskej uan tajyouiskej, porin kichiujkej tein amo kuali yejuan uan inintatuan. 40 Uan kijtoskej tein amo kuali tein kichiujkej yejuan uan tein amo kuali tein kichiujkej inintatuan uan keniuj amo tatakamatkej. No kijtoskej keniuj amo nechtakamatkej uan nechixnamikkej. 41 Ijkuak, nejua no nikinixnamikis uan nikinuikas itech tal kampa nemiskej akin kintauelitaskej.

”’Ijkon xa moyolyemaniskej uan takakiskejya, uan kiixtauaskejya tein amo kuali tein kichiujkej. 42 Uan nikelnamikis tein nimotenkauak iuan Jacob, iuan Isaac uan iuan Abrahán, uan nikelnamikis tal tein nimotenkauak nikinmakas. 43 Keman yejuan amo ompa nemiskej, nejon tal moixseuis porin amo moixseuij chijchikometika xiuit uan tafierojkan yeski. Taxtaujtoskej porin kichiujkej tein amo kuali, porin kiixtopeujkej tein nikixtalij uan nion kinekkej kikakiskej notanauatiluan. 44 Sayoj ke maski ijkon, keman nemiskej itech inintal akin kintauelitaskej, amo senkis nikinixtopeuas. Amo no nikintauelitas hasta niknekis nikinixpolos, porin komo nikinixpoloskia amo nikchiuaskia tein nimotenkauak iniuan, porin nejua niJehová. 45 Yejua ika, nikelnamikis tein nimotenkauak iniuan ininuejkaujtatuan. Miakej kiitakej keniuj nikinkixtij de Egipto para kimatiskej ke nejua niDios. Nejua niJehová’”.

46 Yejua nejin tein Jehová kiixtalij uan kinnauatij israelitas itech tepet Sinaí itechkopa Moisés.

27 Jehová oksepa iuan tajtoj Moisés uan kiluij: 2 “Xikinilui israelitas: ‘Akin motenkauas kimaktilis Jehová ipatiuj aksa,* moneki kitemakas tomin tein moixtalis. 3 Komo taxtauati por se takat akin kipia 20 hasta 60 xiujmej, moneki kitemakas 570 gramos* de plata. Kitamachiuaskej plata ika pesa tein kikuij kampa Dios taxeloj. 4 Sayoj ke komo taxtauati por se siuat, moneki kitemakas 342 gramos.* 5 Komo okichpil uan kipia 5 hasta 20 xiujmej, moneki kitemakas 228 gramos,* uan komo siuapil, 114 gramos.* 6 Komo okichpilkonet uan kipia se metsti hasta makuil xiuit, moneki kitemakas 57 gramos* uan komo siuapilkonet, 34 gramos.*

7 ”’Komo taxtauati por se takat akin kipia 60 xiujmej oso kipanauijya, moneki kitemakas 171 gramos* de plata, uan komo siuat, 114 gramos. 8 Sayoj ke, komo akin motenkauak tel pobre uan amo ueli kitemaka tein moixtalia, moneki kiitatiuj tiopixkat uan yejua kiixtalis kanachi kitemakas ijkon kemej uelis taxtauas.

9 ”’Akin motenkauas kimakas Jehová se tapial, nejon tapial xeliujtos para Jehová. 10 Amo uelis kiixpatas; amo no uelis kiualkuis okse tein okachi kuali yetos oso se tein amo kuali yetos. Sayoj ke komo kiixpataskia nejon tapial, nochin ome tapialmej xeliujtoskej para Dios. 11 Komo Jehová kiita ke tapial amo chipauak uan yejua ika amo ueli kimaktiliaj, moneki kiuikiliskej tiopixkat. 12 Uan yejua kiixtalis ipatiuj nejon tapial satepan ke kuali kiitas keniuj yetok. Ipatiuj yeski tein kijtos tiopixkat. 13 Sayoj ke, komo akin motenkauak kitemakas in tapial satepan oksepa kineki kikouas, moneki kiixtauas ipatiuj uan kitemakas tepitsinok.*

14 ”’Uan akin kixelos ichan uan kimaktilis Jehová, tiopixkat kiixtalis ipatiuj nejon kali satepan ke kuali kiitas keniuj yetok. Ipatiuj yeski tein kijtos tiopixkat. 15 Sayoj ke, komo akin kitemaktij ichan satepan oksepa kineki kikouas, moneki kiixtauas ipatiuj uan kitemakas tepitsinok,* uan kali oksepa yeski iaxka.

16 ”’Akin kixelos se cacho ital para Jehová, ipatiuj moixtalis satepan ke kiitaskej kanachi xinach moneki para tatokaskej itech nejon tal: 130 kilos* de cebada ipatiuj yeski 570 gramos* de plata. 17 Komo kitemaka ital itech xiuit keman kimakixtiskej nochi, ipatiuj amo mopatas. 18 Komo kitemaka satepan ke panos nejon xiuit, tiopixkat kiitas kanachi xiuit poliui para ajsis xiuit keman kimakixtiskej nochi, uan ijkon kiixejekos ipatiuj nejon tal. Ipatiuj amo yeskiok kemej achto, ta tsinkisas. 19 Sayoj ke, komo akin kitemakak ital oksepa kineki kikouas, moneki kiixtauas ipatiuj uan kitemakas tepitsinok,* uan tal oksepa yeski iaxka. 20 Uan komo amo oksepa kikoua uan kinamakiltiaj okse takat, amo uelis oksepa kikouas ital. 21 Keman ajsis xiuit keman kimakixtiskej nochi, nejon tal yeski iaxka Dios, xeliujtos sayoj para Jehová uan ininaxka yeski tiopixkamej.

22 ”’Akin kixelos para Jehová se tal tein kikouak uan amo tein kikauilijteujkej itatuan, 23 tiopixkat kiitas kanachi xiuit poliui para ajsis xiuit keman kimakixtiskej nochi. Ijkon kiixejekos ipatiuj nejon tal, uan akin kixeloj ital taxtauas nejon tonal. Nejon xeliujtos para Jehová. 24 Itech xiuit keman kimakixtiskej nochi, nejon tal kikepiliskej akin kikouilijkaj, akin ipa iaxka katka.

25 ”’Nochi maj motamachiua ika pesa tein kikuij kampa Dios taxeloj. Nejon pesa moneki kipias 12 gramos.*

26 ”’Maj amo akin kimaktili Jehová se tapial tein achto yoli, porin tein yekinika yoli ipa iaxka. Yeski kuakouej oso ichkat* ipa iaxka Jehová. 27 Komo tapial amo chipauak porin Dios ijkon kiita uan akin iaxka tapial taxtaua para kimakixtis, moneki kitemakas tein moixtalis uan tepitsinok.* Sayoj ke, komo amo oksepa kikoua, kinamakaskej ika ipatiuj tein moixtalij.

28 ”’Sayoj ke, amo uelis kinamakaskej nion oksepa kikouaskej teisa tein kimaktiliaj Jehová para maj nochipa iaxka. Yeski aksa, se tapial oso se tal. Nochi tein kimaktiliaj Jehová, xeliujtos sayoj para yejua. 29 Uan amo uelis kimakixtiskej akin ixyetokya maj kimiktikan. Moneki mikis.

30 ”’Se parte* de nochi tein mochiuas itech namotal uan koujtakilot tein takis, iaxka Jehová. Xeliujtok para Jehová. 31 Uan komo aksa oksepa kineki kikouas tein kitemakak, moneki kiixtauas ipatiuj uan kitemakas tepitsinok.* 32 Moneki nankimakaskej Dios seki* namotapialuan: kuakuejmej, ichkamej uan chivos. Keman ichkatajpixkej kinpoujtias majmajtak itapialuan uan panotiaskej tatampa de ikouj, se kixelos para Jehová. Kixelos tein majtaktika. 33 Amo moneki nankiitaskej ox tapial kuali yetok oso amo; amo no uelis nankiixpataskej. Sayoj ke komo nankinekiskiaj nankiixpataskej ika okse tapial, nochin ome tapialmej xeliujtoskej para Dios. Amo uelis oksepa nankinkouaskej’”.

34 Yejua nejin tanauatilmej tein Jehová kimakak Moisés itech tepet Sinaí para maj kinmatilti israelitas.