JOSUÉ

1 Jehová kinojnotsak Josué* satepan ke momikilij itekitikauj Moisés. Josué katka ikoneuj Nun uan kipaleuiaya Moisés. Jehová kiluij Josué: 2 “Notekitikauj Moisés momikilijya. Yejua ika, tejua tikpanauiti ueyiat Jordán iniuan nochin israelitas, uan namoaxkatiliskej tal tein namechmakati. 3 Namechmakas nochi in talmej kampa nanpanoskej, ijkon kemej nimotenkauak iuan Moisés. 4 Tanikopa* namotal peuas kampa yetok taluakyan uan ajkokopa tamitiuj hasta Líbano. Uan no peuas desde kampa yetok ueyiat Éufrates uan tamitiuj hasta mar Mediterráneo, kampa pankalaki tonaltsin. Nochi nejin inintal hititas. 5 Tikintanis nochin akin mitsixnamikiskej. Ijkon kemej nikpaleuij Moisés, no nimitspaleuis. Amo keman nimitskauas. 6 Xiyolchikauak uan amo ximoui, porin tejua tikinixyekanas israelitas para maj moaxkatilikan tal tein nimotenkaujka nikinmakaskia ininuejkaujtatuan.

7 ”Sayoj amo ximoui uan xiyolchikauak, uan xiktakamati nochi tanauatilmej tein notekitikauj Moisés mitsiluij. Amo xikixpanaui nion se tanauatil uan ijkon nochipa kuali tikchiuas teisa. 8 Nochipa ika xitajto nejin Tanauatil, mojmostaj xiklero uan itech xitanemili* para tiktakamatis nochi tein kijtoua. Nejon mitspaleuis maj kuali kisa nochi tein tikchiuas uan no mitspaleuis kuali xitaixejeko. 9 Oksepa nimitsiluia amo ximoui, ta xiyolchikauak. Nejua nimoDios Jehová uan nochipa nimitspaleuis kampa yeski tias, yejua ika amo ximomoujti”.

10 Uan Josué kinnauatij akin kinixyekanayaj israelitas: 11 “Xipanotiakan kampa israelitas kitalijkej ininkaltsitsin* uan xikiniluikan: ‘Uipta tikpanauiskej ueyiat Jordán para timoaxkatiliskej tal tein toDios Jehová techmakati, yejua ika xiksentilikan tein nankikuaskej’”.

12 Uan no, Josué kinnojnotsak ichankauan Rubén, ichankauan Gad uan ichankauan* Manasés akin achto kinmakakajya inintal uan kiniluij: 13 “Xikelnamikikan tein namechnauatij Moisés, itekitikauj Jehová. Yejua kijtoj: ‘NamoDios Jehová namechmakak nejin tal para ompa kualtsin nanemiskej. 14 Namosiuauan, namokoneuan uan namotapialuan amo kipanauiskej ueyiat Jordán, ta nikan mokauaskej, itech tal tein Moisés namechxejxelouilij. Sayoj ke nochin namosoldados moneki kinyekantiaskej okseki israelitas* keman kipanauiskej ueyiat Jordán. Namejuan moneki nankinpaleuiskej okseki israelitas. 15 Moneki nankinpaleuiskej hasta maj Jehová kinmaka tal kampa kualtsin nemiskej ijkon kemej namechmakak namejuan. Xikinpaleuikan maj moaxkatilikan tal tein toDios Jehová kinmakati. Satepan uelis namokepaskej kampa namechtaxelouilijkejya uan ompa ximokaltalikan. Moisés, itekitikauj Jehová, namechmakak nejin tal nikampa den ueyiat Jordán, kampa ualkisa tonaltsin’”.

16 Yejuan kinankilijkej Josué: “Tikchiuaskej nochi tein titechnauatia uan tiaskej kampa titechtitanis. 17 No timitstakamatiskej ijkon kemej tiktakamatkej Moisés. Uan tiktajtaniskej toDios Jehová maj mitspaleui, ijkon kemej kipaleuij Moisés. 18 Uan komo aksa* amo kineki mitstakamatis uan amo kichiua tein titanauatia, maj kimiktikan. Sayoj ximoyolchikaua uan amo ximoui”.

2 Keman israelitas yetoyaj Sitim, Josué akin katka ikoneuj Nun kintitanik ome takamej maj tapijpiatij Canaán. Kiniluij: “Xiakan xitachiatij Canaán, uan no xitachiatij Jericó”. Nejon ome takamej yajkej uan ajsikej ichan Rahab uan ompa mokaujkej. Rahab monamakaya iniuan takamej. 2 Akin tekiuajtia Jericó kiluijkej: “Seki takamej israelitas ualajkej nejin youak para tapijpiaskej”. 3 Keman tekiuaj kikakik nejon, kintitanik seki takamej maj kiluitij Rahab: “Xikinkixti takamej akin mokaujtokej mochan, porin ualajkej tapijpiakoj Canaán”.

4 Sayoj ke Rahab kinuikak nejon ome takamej kampa ueliskia motatiskej.* Satepan kiniluij takamej akin tekiuaj kintitanik: “Kemaj, nechkalpanokoj seki takamej, sayoj ke amo nikmati kani kayomej katkaj. 5 Kisteujkej keman tapoyaujtoyaya, achto ke tatsakuaskiaj Jericó. Amo nikmati kani yajkej. Sayoj ke komo namoijsiuiliaj, nankinajsitiuij”. 6 (Maski tein melauj, yejua kintatijka* kalkuako* itampa seki linojxiuit tein ompa kiixtentoya). 7 Yejua ika, takamej akin tekiuaj kintitanka yajkej ueyiat Jordán. Yejuan kintemotoj tapijpianij kampa uelia se kimetspanauiaya ueyiat. Uan niman keman kiskej den ueyi xolal kitsakkej puerta.

8 Keman tapijpianij ayamo kochiaj, Rahab kinitato kalkuako* kampa motatijtoyaj.* 9 Uan kiniluij: “Nejua nikmati ke Jehová namechmakas nejin tal, uan tinochin semi tamechmouiliaj. Nochin akin nemij nikan tel mojkamikij. 10 Titekakilijkej ke satepan ke nankiskej de Egipto, Jehová kiuatsak mar Rojo para ueliskia nankipanauiskej. No tikakkej ke achto ke nankipanauiskiaj ueyiat Jordán,* nankinmiktijkej Sehón uan Og akin kinixyekanayaj amorreos. 11 Keman tikakkej nejon semi timoujkej, uan amo akin kineki* moteuis namouan porin namoDios Jehová taixyekana ne iluikak uan nikan taltikpak. 12 Uan axkan namechtataujtia ximotenkauakan itokaykopa Jehová ke nankinpaleuiskej* ichankauan nopaj, ijkon kemej nejua namechpaleuij.* Uan moneki nankichiuaskej teisa tein kinextis ke yekmelauj nantechpaleuiskej. 13 Xikinmakixtikan nopaj, nomaj, nokniuan uan nochin akin nemij ichan nopaj. Amo xitechmiktikan”.

14 Uan takamej israelitas kiluijkej: “¡Maj tejuan techmiktikan uan amo namejuan! Komo amo akin nankiluiaj tein tikchiuakoj, tamechpaleuiskej* uan tikchiuaskej tein timotenkaujkej keman Jehová techmakas nejin tal”. 15 Ichan Rahab mokuitoya iuan ueyi tepamit tein kiyoualouaya ueyi xolal uan yejua chanchiuaya tapani de nejon tepamit. Yejua ika itech iventana kipiloj se lazo uan ompa temokej tapijpianij. 16 No kiniluij: “Ximotatitij* eyi tonal kampa tepeyoj para maj amo namechajsikan. Keman mokepaskej akin namechtemotoj, uelisya nanyaskej kampa nanualeujkej”.

17 Takamej israelitas kiluijkej: “Tejuan tikchiuaskej tein timotenkaujkej sayoj komo tikchiua nejin: 18 keman tiejkoskejya nikan kampa nanemij, xikilpi* nejin lazo chichiltik itech nejin ventana kampa titemotij. Uan xikinsentili nikan mopaj, momaj, mokniuan uan nochin akin nemij ichan mopaj. 19 Uan komo aksa* kisa de mochan, amo totajtakolok komo kimiktiaj, ta yejua itajtakol. Sayoj ke tejuan totajtakol komo miki semej akin yetok mochan. 20 Sayoj ke komo tikiluia aksa keyej tiualajkej, amo tikchiuaskejok tein tikijtojkej”. 21 Rahab kiniluij: “Nikchiuas tein nankijtouaj”.

Satepan takamej israelitas yajkej. Uan Rahab kiilpij* lazo chichiltik itech iventana. 22 Yejuan yajkej kampa tepeyoj uan ompa mokaujkej eyi tonal hasta keman takamej akin kintemojtinemiaj mokepkej Jericó. Maski miakkan kintemojtinenkej, amo kinajsikej. 23 Satepan, tapijpianij akin motatitoj* kampa tepeyoj temokej uan kipanauijkej ueyiat Jordán. Yejuan kiitatoj Josué ikoneuj Nun uan kitapouijkej nochi tein kinpanok. 24 Tapijpianij kiluijkej Josué: “Jehová techmakakya nochi nejin tal. Nochin akin ompa nemij semi techmouiliaj”.

3 Josué uan israelitas kualkantsin meujkej, kiskej de Sitim uan ajsikej ueyiat Jordán. Nejon youak amo kipanauijkej ueyiat, ta ompa mokaujkej.

2 Uiptika, akin kinixyekanayaj israelitas panotiajkej kampa nochin kitalijkej ininkaltsitsin.* 3 Yejuan kinnauatijkej israelitas: “Keman nankiitaskej ke tiopixkamej* kiuikajya tatiochiualkaxon* tein iaxka toDios Jehová, niman xiktojtokakan.* 4 Amo ximoteltokikan, ta xiktakauilijtiakan tatiochiualkaxon kemej 900 metros. Xiktojtokatiakan* para nankimatiskej kanika nanyaskej porin amo keman nanyanij ompaka”.

5 Josué kiniluij israelitas: “Jehová kichiuas miak milagros mosta para namechpaleuis, yejua ika xikchiuakan axkan nochi tein moneki para uelis nankiueyichiuaskej mosta”.

6 Satepan, Josué kiniluij tiopixkamej: “Xikuikan tatiochiualkaxon uan xikinyekantiakan israelitas”. Uan tiopixkamej kikuikej tatiochiualkaxon uan kinyekantiajkej israelitas.

7 Uan Jehová kiluij Josué: “Desde axkan israelitas peuas mitstakachiuaskej,* porin nikinnextiliti ke nejua nimitspaleuijtok, ijkon kemej nikpaleuij Moisés. 8 Xikinnauati tiopixkamej akin kiuikaj tatiochiualkaxon maj kichiuakan nejin: ‘Keman nanajsiskej ueyiat Jordán ximometskalakikan uan ompa xiijkatokan’”.

9 Josué kiniluij israelitas: “Xikakikij tein toDios Jehová kijtoua”. 10 Uan Josué kijtoj: “Nejin namechpaleuis xikmatikan ke yekmelauj moajsi se Dios akin namechpaleuijtok, akin kintalkuiliti cananeos, hititas, heveos, perizitas, guirgaseos, amorreos uan jebuseos. 11 Achto kikalakitij itech ueyiat Jordán nejin tatiochiualkaxon tein iaxka akin taixyekana itech nochi taltikpak, uan satepan namejuan nanpanoskej. 12 Uan namejuan moneki nankinijitaskej* 12 takamej akin pouij itech 12 uejueyi kalyetonij israelitas. 13 Tiopixkamej kiuikaskej tatiochiualkaxon tein iaxka Jehová, akin taixyekana itech nochi taltikpak. Keman mometskalakiskej itech ueyiat Jordán, at tein moualtalojtok motsakuilis kemej yeskia yetoskia se tepamit tein kitsakuilijtoskia”.*

14 Israelitas kiskej de ininkaltsitsin para kipanauiskej ueyiat Jordán. Uan tiopixkamej akin kiuikayaj tatiochiualkaxon kinyekantiajkej. 15 (Ueyiat Jordán peua semi moskaltia keman xijxiujtika kisentiliaj tatok). Keman tiopixkamej akin kiuikayaj tatiochiualkaxon ajsikej ueyiat Jordán uan mometskalakijkej, 16 at tein moualtalojtoya motsakuilij kemej yeskia yetoskia se tepamit tein kitsakuilijtoskia. Motsakuilij itech ueyi xolal Adán, tein semi uejka moajsi de kampa yetoyaj israelitas. Ompaka no moajsi ueyi xolal Zaretán. Uan at tein yaya tamiti hasta mar Salado,* uaktiajki. Kemej at motsakuilij, israelitas uelik panokej oksekopa uan nepakatsin yetoyaya ueyi xolal Jericó. 17 Kemej in ueyiat Jordán uakik, tiopixkamej akin kiuikayaj tatiochiualkaxon tein iaxka Jehová uelik moketskej tatajko uan nochin israelitas uelik panokej. Uan tiopixkamej ompa mokaujkej hasta keman tamipanokej nochin israelitas.

4 Keman nochin israelitas kitamipanauijkej ueyiat Jordán, Jehová kinauatij Josué: 2 “Xikinijitakan* 12 takamej israelitas akin pouij itech 12 uejueyi kalyetonij, 3 uan xikiniluikan: ‘Xiakan tatajko den ueyiat Jordán kampa ijkatokej tiopixkamej uan xikuikan 12 temej. Xikinuikakan kampa axkan nanyoualpanoskej’”.

4 Uan Josué kinnotsak 12 takamej israelitas akin kinijitak* akin pouij itech 12 uejueyi kalyetonij, 5 uan kiniluij: “Xiakan tatajko den ueyiat kampa yetok tatiochiualkaxon* tein iaxka toDios Jehová. Maj sejse takat kiajokui se tet porin moajsij 12 uejueyi kalyetonij. 6 Nejin temej namechelnamiktis tein Dios kichiuak. Komo satepan namokoneuan namechtajtaniaj:* ‘¿Keyej nikan nankitalijkej nejin temej?’, 7 moneki nankiniluiskej nejin: ‘Keman tatiochiualkaxon tein iaxka Jehová kipanoltijkej itech ueyiat Jordán, at tein moualtalojtoya motsakuilij. Nejin temej kinpaleuis israelitas maj nochipa kielnamikikan tein Dios kichiuak’”.

8 Nejon 12 israelitas kichiujkej nochi tein Josué kinnauatij. Kikuitoj 12 temej tatajko den ueyiat Jordán porin moajsiaj 12 uejueyi kalyetonij. Kinuikakej uan kintalijkej kampa youalpanoskiaj. Kichiujkej ijkon kemej Jehová kinauatij Josué.

9 Josué no kintalij 12 temej tatajko den ueyiat Jordán kampa moketskaj tiopixkamej akin kiuikayaj tatiochiualkaxon. Nejon temej ompa yetokejok hasta axkan.

10 Tiopixkamej akin kiuikayaj tatiochiualkaxon ijkatoyaj tatajko den ueyiat hasta keman israelitas kitamichiujkej nochi tein Jehová kinnauatijka. Yejua kinauatijka Moisés maj kimatilti Josué nochi tein israelitas monekia kichiuaskej. Keman tiopixkamej ijkatoyaj tatajko den ueyiat, israelitas panotiuetskej. 11 Keman nochin israelitas panokej, tiopixkamej akin kiuikayaj tatiochiualkaxon tein iaxka Jehová no panokej. Uan nochin israelitas kinitstoyaj. 12 Uan ichankauan Rubén, ichankauan Gad uan ichankauan* Manasés akin achto kinxejxelouilijkajya inintal kinyekantiajkej israelitas. Yejuan kiuikayaj nochi tein ika tateuiskej uan kichiujkej nochi tein Moisés kinnauatijka. 13 Kemej 40 mil soldados yajkej taluakyan tein yetok nikampatsin de Jericó uan Jehová kinitstoya. Yejuan kiuikayaj tein ika tateuiskej.

14 Nejon tonal, israelitas kiitakej ke Jehová kipaleuiaya Josué, yejua ika nochipa kitakachiujkej* ijkon kemej kitakachiujkaj Moisés.

15 Uan Jehová kiluij Josué: 16 “Xikinnauati tiopixkamej akin kiuikaj tatiochiualkaxon maj kisakan den ueyiat Jordán”. 17 Uan Josué kinnauatij tiopixkamej: “Xikisakan den ueyiat Jordán”. 18 Keman tiopixkamej akin kiuikayaj tatiochiualkaxon tein iaxka Jehová kiskej den ueyiat uan moketskej atenoj, at tein motsakuilijka oksepa peuak motaloua uan moskaltij kemej achto.

19 Israelitas kipanauijkej ueyiat Jordán itech tonal 10 metsti abib* uan kitalijkej ininkaltsitsin* ompa Guilgal. Nejin ueyi xolal moajsia nepakatsin de Jericó kampa ualkisa tonaltsin.

20 Uan 12 temej tein kinkuiteujkej den ueyiat Jordán, Josué kinkauak ueyi xolal Guilgal. 21 Uan kiniluij israelitas: “Keman namokoneuan namechtajtaniskej: ‘¿Keyej nikan nankitalijkej nejin temej?’, 22 namejuan moneki nankiniluiskej: ‘Keman tikpanauijkej ueyiat Jordán, 23 toDios Jehová kichiuak maj motsakuili ueyiat hasta keman tinochin titamipanokej. ToDios Jehová no ijkon kichiujka itech mar Rojo keman kitsakuilij para ueliskia tipanoskej. 24 Ijkon kichiuak para maj nochin akin nemij nikan taltikpak kimatikan ke Jehová semi chikauak uan no para xikueyichiuakan* toDios Jehová nochipaya’”.

5 Jehová ijkon kichiuak maj ueyiat Jordán motsakuiliani hasta maj israelitas tamipanouanij. Keman tekiuanij akin kinixyekanayaj amorreos uan cananeos kimatkej nejon, motelmoujtijkej uan amo kinekkej* kinixnamikiskej israelitas porin semi kinmouiliayaj. Amorreos nemiaj tanakastan den ueyiat Jordán kampa pankalaki tonaltsin, uan cananeos nemiaj tanakastan den mar Mediterráneo.

2 Ijkuak, Jehová kiluij Josué: “Xiktenti seki temej* para maj kintekikan* takamej israelitas”. 3 Yejua ika Josué kitentij seki temej uan ika peujkej kintekij takamej israelitas ompa Guibeat-Haaralot. 4 Josué tanauatij maj kintekikan porin nochin takamej akin kiskaj de Egipto uan katkaj soldados* momikilijkajya taluakyan. 5 Nochin takamej akin kiskaj de Egipto kintekkaj. Sayoj ke nochin akin yolkej keman yajtoyaj taluakyan, ayamo kintekiaj. 6 Israelitas nentinenkej taluakyan 40 xiujmej, hasta keman momikilijkej nochin takamej akin kiskaj de Egipto. Nejon takamej katkaj soldados uan amo kitakamatkaj Jehová. Yejua ika Jehová kinyekiluij ke amo keman kinkauaskia maj kiitakan tal tein Jehová kiniluijka touejkaujtatuan ke techmakaskia, se kualtsin tal kampa onkak miak leche uan nekti.* 7 ToDios kinixpatak nejon takamej ika ininkoneuan akin ayamo kintekiaj. Yejua ika Josué tanauatij maj kintekikan.

8 Keman kintamitekkej nochin takamej, israelitas mokaujkej kampa kitalijkaj ininkaltsitsin* hasta keman pajtikej.

9 Uan Jehová kiluij Josué: “Axkan nikchiuak maj egipcios amo namechpinaujtikanok porin namechtekkejya”. Yejua ika nejon ueyi xolal moixmati kemej Guilgal* hasta axkan.

10 Israelitas kisentokakej ompa Guilgal. Kitalijkej ininkaltsitsin itech taluakyan tein yetok nikampatsin de Jericó. Uan kichiujkej iluit tein monotsa Pascua itech tonal 14 metsti abib* keman tapoyauik. 11 Mostika, keman tamik iluit, peujkej kikuaj nochi tein onkaya ompa Canaán: pantsin tein amo kipiaya levadura uan cebada tateuats. 12 Uan nejon tonal keman peuak kikuaj tein onkaya ompa Canaán, tamik maná. Amo onkayaok maná, sayoj ke nejon xiuit israelitas peuak kikuaj nochi tein onkaya ompa Canaán.

13 Keman Josué yetoya nikampatsin de Jericó, sepasan kiitak se takat. Nejon takat ijkatoya iixpan uan maaktoya se machete tein ojkan tenej.* Josué motokij kampa yetoya uan kitajtanij:* “¿Titechpaleuijtok tejuan oso tikinpaleuijtok akin techixnamikij?”. 14 Takat kinankilij: “Amo, ta nejua nikinixyekana isoldados* Jehová”. Keman Josué kikakik nejon, motankuaketsak uan moixpiloj hasta talpan. Uan kiluij: “Tejuatsin, ¿toni tikneki maj nikchiua?”. 15 Akin kinixyekana isoldados Jehová kiluij Josué: “Ximokixtili motekakuan porin tal kampa tiijkatok Dios moxelouilij”. Josué nimantsin kichiuak nejon.

6 Akin nemiaj Jericó kuali kitsakkaj puertas tein kipiaya ueyi xolal porin kinmouiliayaj israelitas. Amo akin kisaya nion kalakia.

2 Jehová kiluij Josué: “Nimitsmakati ueyi xolal Jericó uan nimitspaleuis xiktani akin ompa tekiuajti uan isoldados akin kuali tateuiaj. 3 Tejua uan soldados moneki mojmostaj nankimamalakachoskej* ueyi xolal sayoj sepa. Ijkon moneki nankichiuaskej chikuasen tonal. 4 Maj chikome tiopixkamej kiuikakan chikome kuaomimej* uan maj kiyekantiakan tatiochiualkaxon.* Sayoj ke chikometika tonal, moneki chikome viaje nankimalakachoskej ueyi xolal uan tiopixkamej kipitstiaskej kuaomimej. 5 Keman tiopixkamej kipitstoskej kuaomimej, nochin soldados moneki chikauak tsajtsiskej kemej yeskia tateuitijya. Uan tepamit tein kiyoualoua ueyi xolal xitinis. Ijkuak soldados moneki kalaktikisaskej”.

6 Yejua ika Josué ikoneuj Nun kinsentilij tiopixkamej uan kiniluij: “Xikuikakan tatiochiualkaxon tein iaxka Jehová. Uan maj chikome tiopixkamej kiuikakan chikome kuaomimej uan maj tayekantiakan”. 7 Josué no kiniluij soldados: “Xiakan xikmalakachotij* ueyi xolal, uan maj seki soldados kiyekantiakan tatiochiualkaxon tein iaxka Jehová”. 8 Nochin kichiujkej tein Josué tanauatijka. Chikome tiopixkamej akin kiuikayaj chikome kuaomimej yayaj iixpan Jehová* uan kipitstiayaj kuaomimej. Taikan yayaj tiopixkamej akin kiuikayaj tatiochiualkaxon tein iaxka Jehová. 9 Hasta taixpan yayaj seki soldados uan kintojtokatiayaj* tiopixkamej akin kipitstiayaj kuaomimej. Uan okseki soldados kitojtokatiayaj tatiochiualkaxon. Tiopixkamej kipitstiajkej kuaomimej nochi in ojti.

10 Uan Josué kinnauatijka soldados: “Amo xitsajtsikan nion xikakistikan. Amo teyi xikijtokan hasta tonal keman namechiluis ‘¡Xitsajtsikan!’ uan ijkuak xitsajtsikanya”. 11 Josué tanauatij maj kimalakachotij ueyi xolal se viaje uan maj kiuikakan tatiochiualkaxon tein iaxka Jehová. Satepan mokepkej kampa israelitas kitalijkaj ininkaltsitsin* uan ompa mokaujkej nejon youak.

12 Mostika, Josué kualkan meuak uan tiopixkamej kiuikakej tatiochiualkaxon tein iaxka Jehová. 13 Hasta taixpan yayaj seki soldados, kintojtokatiayaj* chikome tiopixkamej akin kipitstiayaj chikome kuaomimej. Satepan yayaj akin kiuikayaj tatiochiualkaxon tein iaxka Jehová. Uan hasta taikan yayaj okseki soldados. Yejuan no kitojtokatiayaj tatiochiualkaxon tein iaxka Jehová. 14 Mostika, oksepa kimalakachojkej ueyi xolal sayoj sepa uan mokepkej kampa kitalijkaj ininkaltsitsin. Israelitas chikuasen tonal kimalakachojkej ueyi xolal sayoj sepa.

15 Chikometika tonal kualkantsisan meujkej. Uan kimalakachotoj* ueyi xolal kemej ipa kichiujkajya. Sayoj ke ijkuak, chikome viaje kimalakachojkej. 16 Keman chikome viajejya kimalakachojkaj ueyi xolal, tiopixkamej kipitskej kuaomimej uan Josué kiniluij soldados: “¡Xitsajtsikan, porin Jehová namechpaleuiti ximoaxkatilikan ueyi xolal! 17 Xikixpolokan ueyi xolal uan xikinmiktikan akin ompa nemij uan no xikinmiktikan nochi inintapialuan. Nochi ueyi xolal uan tein ompa onkak iaxka Jehová. Sayoj momakixtis Rahab, siuat akin monamakaya iniuan takamej uan nochin akin yetokej ichan, porin kintatij* israelitas akin tapijpiakoj. 18 Sayoj ke nion xikitakan tein moneki nankiixpoloskej, para amo nankinejnekiskej uan namokuiliskej. Komo nankikuij tein ompa onkak, nankinkuejmolkalakiskej nochin israelitas uan nankichiuaskej maj tamiixpoliuikan. 19 Nochi plata, oro uan tein chijchiujtok de cobre oso tepos iaxka Jehová porin yejua moxelouilijya. Moneki nankieuatiuij* ichan Jehová kampa yetok nochi tein iaxka”.

20 Keman tiopixkamej kipitskej kuaomimej, soldados tsajtsikej. Niman keman tsajtsikej, tepamit xitinik. Uan soldados kalaktikiskej itech ueyi xolal uan kiixpolojkej. 21 Ika ininmachete tein ojkan tenej* kinmiktijkej nochin takamej, siuamej, akin xiuejkejya uan akin amo. No kinmiktijkej kuakuejmej, ichkamej* uan burros.

22 Josué kiniluij ome takamej akin yajkaj tachiatoj Canaán: “Xikuitij Rahab akin monamakaya iniuan takamej uan nochin akin yetokej ichan, ijkon kemej nankiluijkaj ke nankichiuaskiaj”. 23 Yejua ika, tapijpianij kikixtitoj Rahab, itat, inan, iikniuan uan nochin akin yetoyaj ichan uan kinuikakej kampa amo teyi kinpanoskia, nepakatsin de kampa israelitas kitalijkaj ininkaltsitsin.

24 Satepan kitikuiltijkej ueyi xolal uan nochi tein ompa onkaya. Sayoj ke plata, oro uan tein chijchiujtok de cobre oso tepos, kikauatoj ichan Jehová kampa yetok nochi tein iaxka. 25 Josué amo kikauak maj kimiktikan Rahab, siuat akin monamakaya iniuan takamej, nochin akin nemiaj ichan itat uan nochin akin yetoyaj ichan Rahab. Sayoj yejuan momakixtijkej. Uan Rahab kisentoka nemi iniuan israelitas hasta axkan, porin kintatij* akin Josué kintitanka maj tachiatij Jericó.

26 Ijkuak, Josué kiyekijtoj* nejin: “Maj Jehová kitatsakuilti akin kiyekchijchiuas ueyi xolal Jericó. Keman kichijchiuas cimientos, momikilis ikoneuj akin tayekana uan keman kitalis puertas momikilis ixokoyouj”.

27 Jehová kipaleuij Josué uan miakkan kiixmatkej.*

7 Dios kiniluijka israelitas maj kiixpolokan seki taman, sayoj ke yejuan amo tatakamatkej. Acán akin iuejkaujtat katka Judá, kiichtekik seki taman tein monekia kiixpoloskej. Itat Acán katka Carmí, iueyitat katka Zabdí uan katka semej ichankauan Zérah. Kemej tachtekik, Jehová semi kualanik iniuan israelitas.

2 Keman israelitas yetoyaj Jericó, Josué kintitanik seki takamej maj yakan Hai. Nejin ueyi xolal amo uejka yetok de Bet-Aven uan tanakastan de Betel, kampa ualkisa tonaltsin. Josué kiniluij: “Xiakan xitachiatij ueyi xolal Hai uan xikitatij inintal akin ompa nemij”. Nejon takamej yajkej uan kichiujkej tein kiniluij. 3 Keman mokepkej kiluijkej Josué: “Amo moneki maj yakan nochin soldados porin amo miakej akin nemij Hai. Uelis tikintaniskej sayoj ika ome mil oso eyi mil soldados. Yejua ika amo xikintitani nochin takamej porin nenkajsan tikinsioujtis”.

4 Yejua ika pankiskej kemej eyi mil takamej, sayoj ke cholojkej keman kinixnamikikoj akin nemiaj Hai. 5 Yejuan kinmiktijkej 36 israelitas. Kintokatiajkej uan kinmiktijtiajkej desde puertas tein kipiaya ueyi xolal hasta Sebarim.* Temotiajkej uan kisentokakej kinmiktijtiajkej. Yejua ika israelitas peuak yoltitikuikaj* porin semi moujtoyaj.

6 Keman Josué kimatik tein panok, kitsayanak itasal.* Motankuaketsak uan moixpiloj hasta talpan iixpan tatiochiualkaxon* tein iaxka Jehová, uan ompa tankuaijkatoya hasta tiotak. Josué uan taixyekananij israelitas kisentokakej mokuatemilijkej talnex. 7 Josué kijtoj: “¡ToUeyi Teko Jehová! ¿Keyej titechualkuik uan titechpanoltij itech ueyiat Jordán? ¿Sayoj titechualkuik para maj techtanikan uan maj techmiktikan amorreos? Okachi kuali maj amo tikpanauianij ueyiat, ta maj timokauanij kampa tietoyaj. 8 Jehová, israelitas cholojkej porin akin techixnamikij kintankej. Amo nikmatiok toni nikijtos. 9 Keman akin nemij Canaán uan akin nemij itech okseki xolalmej kimatiskej tein panok, ualaskej uan techtamiixpoloskej uan amo akin techelnamikisok. ¿Uan toni tikchiuas para maj amo kijijtokan motokaytsin?”.

10 Jehová kiluij Josué: “¡Ximoketsa! ¿Keyej tiksentoka ampon titankuaijkatok? 11 Israelitas tajtakolchiujkej. Yejuan amo kichiujkej tein nikinnauatijka porin kikuikej tein monekia kiixpoloskej. Kiichtekkej uan kitatijkej* kampa kitalijtokej tein kipiaj. 12 Yejua ika israelitas choloskej uan amo uelis kintaniskej akin kinixnamikij. Ijkon kinpanos porin nejua nikijtoj ke israelitas moneki ixpoliuiskej. Komo amo nankiajchiuaj akin nikijtoj ke moneki ixpoliuis, amo namechpaleuisok. 13 Xikinilui israelitas maj kichiuakan nejin: ‘Xikchiuakan nochi tein moneki para uelis nankiueyichiuaskej toDios* Jehová mosta, porin yejua nejin tein kijtoua: “Israelitas, namouan yetok se takat akin moneki nankiixpoloskej. Komo amo nankiajchiuaj, amo uelis nankintaniskej akin namechtauelitaj. 14 Nanochin kualkan ximosentilikan. Uan Jehová kijitas* semej uejueyi kalyetonij, uan de ompa kijitas se familia, uan de nejon familia Jehová kinijitas akin sennemij itech se kali. Uan de akin nemij itech nejon kali, Jehová kijitas takat akin tajtakolchiuak. 15 Uan keman nankimatiskej akoni mokuilij tein monekia nankiixpoloskej, moneki nankichichinoskej. Uan no moneki nankichichinoskej nochi tein kipia porin amo kichiuak tein Jehová kinnauatijka israelitas. Semi tepinaujtij tein kichiuak”’”.

16 Mostika, Josué kualkan meuak uan kinsentilij nochi uejueyi kalyetonij israelitas uan Dios* kijitak* Judá. 17 Satepan motokijkej nochin ichankauan Judá uan de ompa Dios kinijitak* ichankauan Zérah. Panotiajkej sejse uan Dios kijitak Zabdí. 18 Satepan motokijkej nochin akin nemiaj ichan Zabdí, panotiajki sejse uan Dios kijitak* Acán. Itat Acán katka Carmí, iueyitat katka Zabdí uan katka semej ichankauan Zérah uan iuejkaujtat katka Judá. 19 Josué kiluij Acán: “Nokonetsin, xikueyitali Jehová, ininDios israelitas uan xikilui tein tikchiuak. Nimitstataujtia amo xinechtatili* tein tikchiuak”.

20 Acán kinankilij Josué: “Kemaj, nejua nikchiuak tein Jehová, ininDios israelitas kijtoj maj amo tikchiuakan. Yejua nejin tein nikchiuak: 21 Kampa yetoya nochi tein patiyoj tein mosentilijka nikitak se kualtsin tasal tein kichijchiujkaj ompa Sinar. No nikitak ome kilo* plata uan tajko kilo* oro. Kemej semi nikinuelitak, nimoinuikilij uan nikintalpachoto kampa niktalij nokaltsin.* Ompa yetok tasal uan hasta tatampa yetok tomin”.

22 Josué niman kintitanik seki israelitas maj yakan kampa yetoya ikaltsin Acán. Yejuan kisteujkej uan ompa kiajsikej tasal uan hasta tatampa kitatijka tomin. 23 Kikixtijkej nochi uan kiuikilijkej Josué uan nochin israelitas. Kitalitoj iixpan tatiochiualkaxon tein iaxka Jehová.* 24 Josué uan nochin israelitas kiuikakej Acán ikoneuj Zérah hasta tal tamanis* tein moixmati kemej Acor. Ompa no kiuikakej plata, tasal, oro, nochin ikoneuan, ikuakuejuan, iburros, iichkauan* uan okseki itapialuan. No kiuikakej ikaltsin uan nochi tein kipiaya. 25 Uan Josué kiluij Acán: “Jehová mitstatsakuiltiti porin titechkuejmolkalakij”. Nochin israelitas kitetenkej* Acán uan no kintetenkej ichankauan hasta kinmiktijkej, uan satepan kinchichinojkej. 26 Kampa yetoya Acán kinejnepanojkej miak tet uan nejon tet ompa nepaniujtok hasta axkan. Nochi nejon tapaleuij maj Jehová amo kualantook. Yejua ika motanotsa tal tamanis* Acor* hasta axkan.

8 Jehová kiluij Josué: “Amo ximojkakalaki. Xiouj ueyi xolal Hai iniuan nochin soldados xikinteuitij akin ompa nemij. Nimitspaleuis xiktani akin tekiuajti Hai uan akin ompa nemij. Nimitsmakas nochi ueyi xolal uan talmej tein kipiaj. 2 Xikixpolo Hai uan akin ompa tekiuajti ijkon kemej tikixpoloj ueyi xolal Jericó uan akin ompa tekiuajtia. Sayoj ke axkan uelis timokauilis nochi tein kipiaj uan inintapialuan. Xikintitani seki soldados maj motatitij* taikankopa den ueyi xolal”.

3 Yejua ika Josué uan nochin soldados pankiskej kinteuitoj akin nemiaj Hai. Josué kinijitak* 30 mil soldados akin kuali tateuiayaj uan kintitanik de youak. 4 Josué kiniluij: “Xiakan ximotatitij* taikankopa den ueyi xolal. Amo uejka xiakan para uelis niman nankalaktikisaskej. 5 Uan nejua uan okseki soldados timotokijtiaskej taixpankopa. Keman yejuan techixnamikikiuij kemej achto kichiujkej, tejuan tikisteuaskej. 6 Kemej ticholoskej, yejuan techtokateuaskej uan tikchiuaskej maj kikaujteuakan ueyi xolal, porin kinemiliskej ke oksepa ticholojtokej kemej achto tikchiujkaj. 7 Ijkuak, namejuan akin namotatijtoskej taikankopa, moneki nankalaktikisaskej. Porin toDios Jehová namechpaleuis xikixpolokan ueyi xolal. 8 Keman nankalakiskej uan nankintaniskej akin ompa nemij, xiktikuiltikan ueyi xolal. Moneki nankichiuaskej tein Jehová kijtoua. Xikchiuakan nochi tein namechiluij”.

9 Josué kintitanik soldados maj yakan motatitij,* uan yejuan motatitoj tatajko de Betel uan Hai, kampa pankalaki tonaltsin. Uan nejon youak Josué mokauak iniuan okseki soldados.

10 Mostika, Josué kualkan meuak uan kinsentilij nochin soldados. Josué uan taixyekananij israelitas kinyekantiajkej hasta ueyi xolal Hai. 11 Uan nochin soldados yajkej uan kitalijkej ininkaltsitsin* taixpan* den ueyi xolal Hai. Sayoj kinxelouaya tal tamanis* tein ompa yetoya. 12 Uan kemej makuil mil soldados motatitoj para uelis kalaktikisaskej itech ueyi xolal. Motatitoj tatajko de Betel uan Hai, kampa pankalaki tonaltsin. 13 Yejua ika, okachi miak soldados kintitankej taixpan* den ueyi xolal, uan oksekin motatitoj taikan.* Uan nejon youak, Josué nejnemik hasta tal tamanis.

14 Keman akin taixyekanaya Hai kiitak nejon, yejua uan isoldados kualkan meujkej uan yajkej tal tamanis* kampa yetoyaj israelitas para kinteuitiuij. Sayoj ke akin taixyekanaya Hai amo kimatia ke okseki soldados israelitas motatijtoyaj taikampa den ueyi xolal. 15 Keman takamej akin nemiaj Hai yaya kinteuitijya israelitas, Josué uan nochin israelitas cholojteujkej uan kikuikej ojti tein youi taluakyan.* 16 Uan takamej akin mokaujkajok ompa Hai no kiniluijkej maj motalokan para kintokatiaskej Josué uan israelitas. Kemej takamej akin nemiaj Hai kintokateujkej, kikaujteujkej ueyi xolal. 17 Nochin takamej akin nemiaj Hai uan Betel tamiyajkej uan kintokatiajkej israelitas. Amo mokauak nion se para tajpias.

18 Ijkuak, Jehová kiluij Josué: “Xikui lanza* tein tikitskijtok uan ika xiknexti kani yetok Hai porin nimitspaleuiti xikixpolo”. Uan Josué kichiuak tein Dios kiluij. 19 Keman soldados akin motatijtoyaj kiitakej ke Josué kikuik ilanza uan ika kinextij kani yetok Hai, kalaktikiskej itech ueyi xolal uan moaxkatilijkej. Satepan kitikuiltijkej.

20 Keman takamej akin nemiaj Hai ikantachiakej, kiitakej ke uejkapan pankistoya pokti porin tatatoyaya* ininueyi xolal. Uan israelitas akin yajtoyaj taluakyan mokepkej para kinixnamikiskej. Ijkuak, akin nemiaj Hai amo uelikok cholojkej. 21 Keman Josué uan nochin israelitas kiitakej ke ueyi xolal popokatoya, kimatkej ke soldados akin motatijtoyaj kalakkajya ueyi xolal. Yejua ika mokepkej uan kinteuijkej akin nemiaj Hai. 22 Uan soldados akin kalakkajya ueyi xolal kiskej uan no yajkej kinteuitoj. Akin nemiaj Hai amo uelikok cholojkej porin mokaujkej tatajko de nochin israelitas. Uan israelitas kintamimiktijkej uan amo kikaujkej maj nion akin cholo. 23 Kikitskijkej akin tekiuajtia Hai uan kiuikilijkej Josué.

24 Israelitas kinmiktijkej nochin takamej akin kintokatiajkaj ompa taluakyan. Satepan mokepkej ueyi xolal uan kinmiktijkej nochin akin mokaujkajok ika ininmachete tein ojkan tenej.* 25 Nejon tonal kinmiktijkej 12 mil takamej uan siuamej akin nemiaj Hai. 26 Josué amo momatemoltij, ta kisentokak kimaajkoketstoya ilanza hasta keman kinmiktijkej nochin akin nemiaj Hai. 27 Sayoj ke israelitas mokauilijkej nochi tein kipiayaj akin ompa nemiaj uan inintapialuan, ijkon kemej Jehová kinauatijka Josué.

28 Josué kitikuiltij Hai uan kixitinij. Uan tet tein mokauak kisentoka ompa nejnepaniujtok hasta axkan. 29 Uan kimiktij akin tekiuajtia Hai, kipiloj itech se kouit uan ompa pilkatoya hasta keman tapoyauik. Ijkuak, Josué tanauatij maj kitemouikan. Satepan kitamotatoj puertajtenoj den ueyi xolal uan ompa kinepanojkej miak tet. Nejon tet kisentoka ompa hasta axkan.

30 Josué no kichijchiuilij se altar Jehová ininDios israelitas ompa tepet Ebal. 31 Kichiujkej ijkon kemej Moisés itekitikauj Jehová kinnauatijka israelitas maj kichiuakan uan kemej ijkuiliujtok itech iTanauatil Moisés: “Xikchijchiuakan se altar ika tet tein ajajsitok* uan tein amo kitapananij ika se tepos. Ompa kichichinouilijkej Jehová seki tapialmej uan kimaktilijkej seki taman para sentakuaskej”.*

32 Uan itech nejon temej kimaijkuiloj Tanauatil tein Moisés kijkuilojka ininixpan israelitas. 33 Nochin israelitas, taixyekananij, uejueyi chiuanimej, jueces uan akin amo israelitas mosentilijkej tatajko den tepet Guerizim uan tepet Ebal. Tatajko de nejon tepemej yetok se tal tamanis* uan ompa ijkatoyaj tiopixkamej* akin kiuikayaj tatiochiualkaxon* tein iaxka Jehová. Nochin akin mosentilijkaj ojkan xeliujtoyaj, tajko yetoyaj de se lado den tatiochiualkaxon uan oksekin den okse lado. Kichiujkej kemej tanauatijka Moisés, itekitikauj Jehová para maj kintiochiuakan israelitas. 34 Keman ompa yetoyajya, Josué chikauak kileroj iTanauatil Moisés, kampa kijtoua keniuj Dios kintatiochiuaskia uan keniuj kintatsakuiltiskia ijkon kemej ijkuiliujtok itech Tanauatil. 35 Josué chikauak kileroj nochi tein Moisés tanauatijka. Kinlerouilij nochin israelitas, siuamej, konemej uan akin amo katkaj israelitas akin nemiaj iniuan.

9 Nochin akin tekiuajtiaj tanakastankopa* den ueyiat Jordán kikakkej nochi tein kichiujkej israelitas. Yejuan tekiuajtiaj kampa tepeyoj kampa moixmati kemej Sefelá, tanakastankopa den mar Mediterráneo uan taixpan den Líbano. Uan kinixyekanayaj hititas, amorreos, cananeos, perizitas, heveos uan jebuseos. 2 Keman yejuan kikakkej tein panoka, mosentilijkej para kinteuiskej Josué uan israelitas.

3 Akin nemiaj Gabaón no kimatkej ke Josué kiixpolojka ueyi xolal Jericó uan Hai. 4 Yejua ika, kuali kinemilijkej tein kichiuaskiaj uan yajkej kinitatoj israelitas. Itech seki koxtalmej tein soltikejya kikalakijkej tein kikuaskiaj, uan no kipexontijkej* de vino seki kuetaxbolsas tein tsayankajya uan oksepa kinijtsonkaj. Nochi nejon kinmamaltijkej* ininburros. 5 No mometstalilijkej inintekakuan tein soltikejya uan kinyekchijchiujkajya uan motalilijkej inintasal* tein soltikya. No kiuikayaj pantsin tein tajtakuaktikya katka uan momoxtiakaya. 6 Yejuan yajkej Guilgal kiitatoj Josué kampa israelitas kitalijkaj ininkaltsitsin.* Uan kiluijkej Josué uan taixyekananij israelitas: “Tel uejka tiualeujkej, yejua ika tamechtataujtiaj ximotenkauakan ke amo nantechteuiskej”. 7 Sayoj ke taixyekananij israelitas kiniluijkej heveos:* “Amo uelis timotenkauaskej ke amo tamechteuiskej porin xa nikauin nanemij”. 8 Akin nemiaj Gabaón kiniluijkej: “Tejuan tamechtekitiliskej”.

Uan Josué kintajtanij:* “¿Kani nanualeujkej?”. 9 Yejuan kiluijkej: “Tejuan uejka tiualeujkej. Tiualajkej porin tiktakachiuaj* itokay namoDios Jehová. Tikakinijya ke semi chikauak uan tikmatkej nochi tein kichiuak ompa Egipto. 10 Uan no tikmatkej ke achto ke nankipanauiskiaj ueyiat Jordán,* kiixpoloj tekiuaj Sehón akin taixyekanaya Hesbón uan tekiuaj Og akin taixyekanaya Basán uan nemia Astarot. Yejuan kinixyekanayaj amorreos. 11 Yejua ika akin techixyekanaj uan nochin akin nemij itech toxolal techiluijkej ‘Xikuikan tein nankikuaskej uan xiakan xikinitatij israelitas uan xikiniluikan: “Ximotenkauakan ke amo nantechteuiskej uan tejuan tamechtekitiliskej”’. 12 Nejin pantsin yekin kiska keman tikualkuiteujkej de tochan, uan axkan xikitakan, sentakuauayakya uan momoxtiakya. 13 Uan nejin kuetaxbolsas yankuikej katkaj keman tikinpexontijkej* de vino, sayoj ke axkan tsajtsayankejya. Uan kemej semi uejka tiualnejnenkej totasal uan totekakuan patkejya”.

14 Takamej israelitas kiitakej tein kiuikayaj gabaonitas, sayoj ke yejuan amo kitajtanijkej Jehová toni monekia kichiuaskej. 15 Yejua ika, Josué motenkauak ke amo kinteuiskiaj uan taixyekananij israelitas no kinyekiluijkej ke ijkon kichiuaskiaj.

16 Nejon tonal israelitas motenkaujkej ke amo kinteuiskiaj gabaonitas. Sayoj ke uiptika kimatkej ke amo uejka ualeuayaj, ta ke ompaka nemiaj. 17 Yejua ika israelitas yajkej kampa gabaonitas chanchiuayaj. Uiptika ajsikej Gabaón, Kefirá, Beerot uan Quiryat-Jearim. 18 Sayoj ke amo kinteuijkej porin taixyekananij israelitas motenkaujkaj itokaykopa Jehová, ininDios israelitas ke amo kichiuaskiaj. Uan nochin israelitas peuak kinijijtouaj akin kinixyekanayaj. 19 Yejua ika, taixyekananij israelitas kiniluijkej nochin: “Timotenkaujkej itokaykopa Jehová, ininDios israelitas ke amo tikinteuiskiaj. 20 Kemej tikiniluijkej nejon, amo tikinmiktiskej para maj Dios amo touan kualani”. 21 Uan no kiniluijkej nejin: “Amo tikinmiktiskej, sayoj ke maj yejuan techsakilikan kouit uan maj techtemolikan at para tinochin”. Yejua nejin tein kiixtalijkej taixyekananij israelitas.

22 Josué kinnotsak uan kiniluij: “¿Keyej nantechkajkayaujkej? ¿Keyej nantechiluijkej ke uejka nanualeujkej, ta amo uejka nanchanchiuaj? 23 Desde axkan nochipa nantechtekitiliskej uan ijkon nankiixtauaskej tein nankichiujkej. Namejuan nankisakaskej kouit uan nankitemoskej at para ichan noDios”. 24 Yejuan kiluijkej Josué: “Tejuan tikmatkej ke namoDios Jehová kiluij itekitikauj Moisés ke kinmakaskia nochi nejin talmej. Uan no kiluij maj kinixpolo nochin akin nikan nemij. Yejua ika tikchiujkej nejin porin timoujkej xitechmiktikan. 25 Uan axkan namejuan xikixtalikan toni nankichiuaskej. Tejuan tikchiuaskej nochi tein tikitas ke moneki uan tein tikitas ke kuali yetok”. 26 Uan Josué ijkon kichiuak. Yejua kinpaleuij gabaonitas uan amo kikauak maj israelitas kinmiktikan. 27 Sayoj ke nejon tonal Josué kiixtalij maj yejuan kisasakakan kouit uan maj kitemokan at para nochin israelitas uan para ialtar Jehová. Monekia kiuikaskej kampa Dios kiixtaliskia maj mochijchiua altar. Uan yejua nejon tein kisentokaj kichiuaj hasta axkan.

10 Tekiuaj Adoni-Zédec akin taixyekanaya Jerusalén kimatik ke Josué kintanik akin nemiaj Hai uan ke kiixpoloj ueyi xolal ijkon kemej kiixpoloj Jericó. No kimatik ke kimiktij akin tekiuajtia Hai ijkon kemej kimiktij akin tekiuajtia Jericó. Uan ke gabaonitas kiniluitoj israelitas maj motenkauakan ke amo kinteuiskiaj, uan ke israelitas kinkaujkej maj iniuan nemikan. 2 Keman kimatik nochi nejon semi mouik porin Gabaón katka se ueyi xolal. Semi ueyi katka ijkon kemej uejueyi xolalmej kampa taixyekana se tekiuaj. Gabaón okachi ueyi katka ke xolal Hai uan nochin takamej akin ompa nemiaj katkaj soldados. 3 Yejua ika Adoni-Zédec akin tekiuajtia Jerusalén tanauatij maj kiitatij Hoham akin tekiuajtia Hebrón, Piram akin tekiuajtia Jarmut, Jafía akin tekiuajtia Lakís uan Debir akin tekiuajtia Eglón uan tanauatij maj kiniluikan: 4 “Xinechpaleuikij maj tikinteuikan akin nemij Gabaón, porin yejuan kitataujtitoj Josué uan israelitas maj amo kinmiktikan”. 5 Yejua ika tekiuanij akin taixyekanayaj Jerusalén, Hebrón, Jarmut, Lakís uan Eglón mosentilijkej iniuan nochin ininsoldados. Nejin makuil tekiuanij akin kinixyekanayaj amorreos yajkej kiyoualotoj ueyi xolal Gabaón para kinteuiskej akin ompa nemiaj.

6 Akin nemiaj Gabaón kintitankej seki takamej maj kiitatij Josué akin yetoya iniuan israelitas ompa Guilgal uan maj kiluitij: “¡Niman xiuiki! ¡Amo xitechsenkaua! Xitechpaleuiki porin techteuikoj nochin akin kinixyekanaj amorreos akin no nemij nikan kampa tepeyoj”. 7 Yejua ika Josué akin yetoya Guilgal pankisak iniuan nochin soldados uan no kinuikak soldados akin kuali tateuiayaj.

8 Jehová kiluij Josué: “Amo xikinmouili porin nimitspaleuis xikintani. Amo akin uelis mitstanis”. 9 Yejua ika Josué uan soldados kiskej de Guilgal uan nejnenkej nochi youal hasta Gabaón. Yejuan kinichtakauitoj akin kintauelitayaj uan kinteuijkej. 10 Jehová kichiuak maj amorreos momoujtikan uan amo kimatiajok toni kichiuaskej keman kinitakej israelitas. Uan israelitas peuak kinmiktiaj miakej amorreos ompa Gabaón. Motalojkej uan kintokatiajkej itech ojti tein pankisa Bet-Horón uan kinmiktijtiajkej hasta Azecá uan Maquedá. 11 Keman amorreos kincholuijtoyaj* israelitas uan temotiayaj itech ojti tein youi Bet-Horón, Jehová peuak kinpankajkauilia uejueyi tesiuit hasta Azecá uan miakej mikkej. Maski israelitas miakej kinmiktijkej ika ininmachete tein ojkan tenej,* okachi miakej kinmiktij tesiuit.

12 Nejon tonal israelitas kiitakej keniuj Jehová kintanik amorreos. Uan Josué kitataujtij Jehová ininixpan israelitas:

13 Tonaltsin uan metsti amo moolinijkej hasta keman israelitas kintankej akin kintauelitayaj. Yejua nejon tein kijtoua amatajkuilol tein moixmati kemej Jasar. Nochin tonal tatanestoya porin tonaltsin amo moolinij nion pankalakik. 14 Amo keman mochiujtoya tein mochiuak nejon tonal nion oksepa ijkon mochiuak. Jehová kichiuak tein kitataujtij se takat porin Jehová kinpaleuijtoya maj tatanikan.

15 Satepan Josué uan nochin soldados mokepkej Guilgal, kampa israelitas kitalijkaj ininkaltsitsin.*

16 Sayoj ke nochi in makuil tekiuanij akin kinixyekanayaj amorreos motatijkej* itech se tepekoyok ompa Maquedá. 17 Uan seki takamej kiluitoj Josué: “Makuil tekiuanij motatijtokej* itech se tepekoyok ompa Maquedá”. 18 Yejua ika Josué kiniluij seki soldados: “Xiktentsakuakan tepekoyok ika uejueyi temej, uan xikiniluikan seki takamej maj ompa tajpiakan”. 19 Uan no kiniluij okseki soldados: “Namejuan akin namokauajok amo ximotsakuilikan, ta ximotalokan uan xikintokatiakan akin cholojtokej uan xikinmiktikan. Amo xikinkauakan maj ajsikan ininueyi xolal porin toDios Jehová techpaleuiti maj tikintanikan”.

20 Josué uan isoldados kinmiktijkej tel miakej amorreos uan yaya kintamiixpolotijya. Sayoj mokaujkej akin mokalakitoj itech uejueyi xolalmej kampa tatsaktoya ika uejueyi tepamit. 21 Satepan nochin soldados mokepkej Maquedá kampa Josué uan nochin israelitas kitalijkaj ininkaltsitsin. Yejuan kualtsin mokepkej porin amo teyi kinpanok. Amo akinok kinekik* kinteuis israelitas nion kiniluis teisa. 22 Uan Josué kijtoj: “Xikinajchiuakan temej tein ika nankitentsakkej tepekoyok. Xikinkixtikan nejon makuil tekiuanij uan xikinualkuikan”. 23 Yejua ika kinkixtijkej nejon makuil tekiuanij uan kinuikilijkej Josué. Yejuan tekiuajtiaj Jerusalén, Hebrón, Jarmut, Lakís uan Eglón. 24 Keman kinualkuikej, Josué kiniluij nochin soldados israelitas maj mosentilikan. Uan akin kinixyekanayaj soldados akin iuan yajkaj tateuitoj kiniluij: “Ximotokikan uan xikinkechtsoniksakan* nejin tekiuanij”. Yejuan motokijkej uan kinkechtsoniksakej. 25 Uan Josué kiniluij: “Amo ximojkakalakikan, ta xiyolchikaujkej porin yejua nejin tein Jehová kinchiuilis nochin akin namechteuiskej”.

26 Josué kinmiktij uan kinpiloj itech sejse kouit uan ompa pilkatoyaj hasta tiotak. 27 Keman tapoyauik, Josué tanauatij maj kintemouikan uan maj kinnaltamotakan itech tepekoyok kampa motatijkaj.* Satepan tatsakkej ika uejueyi temej. Nejon temej ompa yetokejok hasta axkan.

28 Nejon tonal, Josué kintamiixpoloj ika imachete* nochin akin nemiaj Maquedá uan kimiktij akin ompa tekiuajtia. Ijkon moaxkatilij ueyi xolal. Kimiktij akin tekiuajtia Maquedá ijkon kemej kimiktij akin tekiuajtia Jericó.

29 Satepan Josué uan nochin isoldados yajkej Libná kinteuitoj akin ompa nemiaj. 30 Jehová kinpaleuij israelitas maj kintanikan akin nemiaj Libná uan akin ompa tekiuajtia. Israelitas kintamimiktijkej ika ininmachete nochin akin ompa nemiaj. Kimiktijkej akin tekiuajtia Libná ijkon kemej kimiktijkej akin tekiuajtia Jericó.

31 Satepan, Josué uan nochin isoldados yajkej Lakís. Ompa kitalijkej ininkaltsitsin uan kinteuijkej akin ompa nemiaj. 32 Jehová kinpaleuij israelitas maj kintanikan akin nemiaj Lakís. Uan mostika kintamimiktijkej ika ininmachete nochin akin ompa nemiaj ijkon kemej kinmiktijkej akin nemiaj Libná.

33 Tekiuaj Horam akin taixyekanaya Guézer kinpaleuito akin nemiaj Lakís. Sayoj ke Josué kimiktij nejin tekiuaj uan nochin isoldados.

34 Satepan, Josué uan nochin isoldados yajkej Eglón. Ompa kitalijkej ininkaltsitsin uan kinteuijkej akin ompa nemiaj. 35 Nejon tonal moaxkatilijkej ueyi xolal uan kintamimiktijkej ika ininmachete* nochin akin ompa nemiaj. Kinmiktijkej akin ompa nemiaj ijkon kemej kinmiktijkej akin nemiaj Lakís.

36 Satepan, Josué uan nochin isoldados pankiskej Hebrón uan kinteuijkej akin ompa nemiaj. 37 Moaxkatilijkej ueyi xolal uan kinmiktijkej ika ininmachete nochin akin ompa nemiaj. No kimiktijkej akin ompa tekiuajtia uan akin nemiaj itech xolalmej tein ompaka yetokej. Josué kinmiktij nochin akin ompa nemiaj ijkon kemej kinmiktij akin nemiaj Eglón.

38 Uan Josué uan nochin isoldados mokepkej uan yajkej Debir uan kinteuijkej akin ompa nemiaj. 39 Josué moaxkatilij ueyi xolal uan kimiktij ika imachete akin ompa tekiuajtia. Yejua uan isoldados kinmiktijkej nochin akin nemiaj itech xolalmej tein ompaka yetokej. Josué kinmiktij nochin akin nemiaj Debir ijkon kemej kinmiktij akin nemiaj Hebrón uan Libná. Uan kimiktij akin tekiuajtia Debir ijkon kemej kimiktij akin tekiuajtia Libná.

40 Josué moinaxkatilij in talmej tein yetokej kampa tepeyoj, kampa takes, ompa Négueb uan kampa moixmati kemej Sefelá. Uan kintanik nochin akin ompa tekiuajtiaj. Kichiuak nochi tein tanauatijka Jehová ininDios israelitas uan kinmiktij nochin akin ompa nemiaj. 41 Josué moaxkatilij nochi in talmej desde Cadés-Barnea hasta Gaza uan nochi in talmej tein yetokej Gosén hasta Gabaón. 42 Josué kintanik nochin akin ompa tekiuajtiaj uan kintalkuilij. Amo monekik yas miakpa tateuitiuj porin Jehová ininDios israelitas kinpaleuijtoya maj tatanikan. 43 Satepan Josué uan nochin isoldados mokepkej Guilgal kampa israelitas kitalijkaj ininkaltsitsin.

11 Keman tekiuaj Jabín akin taixyekanaya Hazor kimatik tein kichiujkaj israelitas, kinnotsak seki tekiuanij para maj mosentilikan. Kinotsak tekiuaj Jobab akin taixyekanaya Madón, no kinotsak akin tekiuajtia Simrón uan akin tekiuajtia Acsaf. 2 No kinnotsak akin tekiuajtiaj kampa tepeyoj* uan kampa tamanis* tein yetok tanikopa* den mar Kinéret.* No kinnotsak akin tekiuajtiaj kampa moixmati kemej Sefelá uan itech tepetsitsin tein yetokej itech ueyi xolal Dor, kampa pankalaki tonaltsin. 3 Kiniluij maj mosentilikan nochin cananeos,* amorreos, hititas, perizitas, jebuseos akin nemiaj kampa tepeyoj uan heveos akin nemiaj itsintan tepet Hermón kampa motanotsa Mizpá. 4 Yejua ika nochin nejon tekiuanij uan ininsoldados yajkej kampa mosentiliskiaj. Semi miakej katkaj kemej xal tein onkak martenoj uan kinuikayaj miak caballos uan carros tein kikuiaj keman tateuiayaj. 5 Nejon tekiuanij mosentilijkej uan kitalijkej ininkaltsitsin* itech ueyi xolal Merom para kinteuiskej israelitas. Itech nejon ueyi xolal onkaya miak at.

6 Jehová kiluij Josué: “Amo xikinmouili, porin mosta kemej nejin hora namechpaleuis xikinmiktikan* nochin. Tikinkoxojkuiltis* inincaballos uan tikinchichinos inincarros”. 7 Josué uan nochin isoldados kinichtakauitoj tanakastan de Merom.* 8 Jehová kinpaleuij israelitas maj kintanikan uan maj kinmiktikan nochin. Motalojkej uan kintokatiajkej hasta ueyi xolal Sidón, hasta Misrefot-Maim uan tal tamanis* tein moixmati kemej Mizpé.* 9 Josué kichiuak ijkon kemej Jehová kiluij: kinkoxojkuiltij* inincaballos uan kinchichinoj inincarros.

10 Uan Josué uan isoldados mokepkej uan yajkej Hazor. Moaxkatilijkej Hazor uan kimiktijkej akin ompa tekiuajtia. Ueyi xolal Hazor okachi moixmatia ke okseki uejueyi xolalmej kampa taixyekanaya se tekiuaj. 11 Kintamimiktijkej nochin akin ompa nemiaj ika ininmachete tein ojkan tenej,* uan amo akin makisak. Satepan kitikuiltijkej ueyi xolal Hazor. 12 Josué moinaxkatilij nochi nejin uejueyi xolalmej uan kinmiktij nochin akin ompa tekiuajtiaj. Kinmiktij nochin, ijkon kemej Moisés itekitikauj Jehová tanauatijka. 13 Sayoj ke israelitas amo kintikuiltijkej uejueyi xolalmej tein yetokej tepekuapan, ta sayoj kitikuiltijkej Hazor. 14 Israelitas mokuilijkej nochi tein kipiayaj akin nemiaj itech nejon uejueyi xolalmej uan inintapialuan. Uan kintamimiktijkej nochin akin ompa nemiaj ika ininmachete tein ojkan tenej uan amo akin makisak. 15 Jehová kinauatijka itekitikauj Moisés toni monekia kichiuas uan Moisés kiluij Josué nochi tein Dios kinauatijka. Yejua ika Josué kichiuak nochi tein Jehová tanauatijka.

16 Josué moinaxkatilij nochi in talmej tein yetokej kampa tepeyoj. No moaxkatilij tal tein moixmati kemej Négueb, talmej tein moixmatij kemej Gosén, Sefelá, Arabá uan kampa tepeyoj* ompa Israel. 17 Moinaxkatilij in talmej desde tepet Halac tein amo uejka yetok de Seír hasta Baal-Gad, tein yetok itsintan tepet Hermón. Ueyi xolal Baal-Gad no moajsi itech tal tamanis* tein yetok Líbano. Kintanik nochin akin ompa tekiuajtiaj uan kinmiktij. 18 Josué uejkauak moteuijtoya iniuan nejin tekiuanij. 19 Israelitas monekik kinteuiskej nochin akin nemiaj itech okseki uejueyi xolalmej para moinaxkatiliskej. Sayoj heveos akin nemiaj Gabaón kintataujtitoj israelitas maj amo kinmiktikan. 20 Jehová kichiuak maj amo moyolpatakan nochin akin nemiaj itech okseki uejueyi xolalmej para maj yanij kinteuitij israelitas. Ijkon amo kinikneliskia ta kintamiixpoloskia. Monekia ixpoliuiskej ijkon kemej Jehová kinauatijka Moisés.

21 Josué no kinmiktij ikoneuan Anaq akin nemiaj kampa tepeyoj uan akin nemiaj Hebrón, Debir uan Anab. No kinmiktij akin nemiaj kampa tepeyoj ompa Judá uan Israel uan kinixpoloj nochi uejueyi xolalmej kampa nemiaj. 22 Sayoj mokaujkej seki ikoneuan Anaq ompa Gaza, Gat uan Asdod. Sayoj ke kampa nemiaj israelitas amo mokauak nion se ikoneuj Anaq. 23 Josué moinaxkatilij nochi in talmej, ijkon kemej Jehová kiluijka Moisés. Josué kinmakak nochin israelitas nejon talmej uan kinxejxelouilij nochin uejueyi kalyetonij. Kinmakak ijkon kemej ixyetoya kipiaskej sejse. Uan desde ijkuak peuak kualtsin nemij porin amo akinok kinteuij.

12 Israelitas moinaxkatilijkej in talmej tein yetokej nikampa* den ueyiat Jordán, desde ueyiat* Arnón hasta tepet Hermón uan nochi in talmej tein yetokej Arabá kampa ualkisa tonaltsin. Yejuan kinmiktijkej nochin akin ompa tekiuajtiaj. 2 Kitankej tekiuaj Sehón akin kinixyekanaya amorreos uan nemia Hesbón. Yejua tekiuajtia itech ueyi xolal Aroer, tein yetok tanakastan den ueyiat Arnón. Iaxka katka in talmej tein moajsij tatenoj den ueyiat Arnón hasta ueyiat* Jaboc, tein tamiti kampa peua inintal ammonitas. No tekiuajtia itech seki uejueyi xolalmej tein pouij Galaad.* 3 Sehón no tekiuajtia Arabá kampa ualkisa tonaltsin, desde mar Kinéret* hasta mar Salado,* panouaya Bet-Jesimot uan ajsia hasta tepet Pisgá kampa ixtemolis.*

4 Uan no moaxkatilijkej Basán kampa tekiuajtia Og akin nemia Astarot uan Edréi. Tekiuaj Og katka semej refaím akin nemiaok. 5 Yejua tekiuajtia desde tepet Hermón, Salecá, Basán uan hasta kampa peua inintal guesuritas uan maacatitas. No tekiuajtia itech seki uejueyi xolalmej tein pouij Galaad* uan hasta kampa peuaya tekiuajtia Sehón akin nemia Hesbón.

6 Moisés, itekitikauj Jehová uan israelitas kinmiktijkej nejin tekiuanij. Satepan Moisés itekitikauj Jehová kinxejxelouilij in talmej ichankauan Rubén, ichankauan Gad uan seki* ichankauan Manasés. Talmej tein kinmakak katka ininaxka nochi nejon tekiuanij.

7 Josué uan israelitas kinixpolojkej miakej tekiuanij tanakastan den ueyiat Jordán kampa pankalaki tonaltsin. Nejon tekiuanij tekiuajtiaj Baal-Gad tein moajsi itech tal tamanis* tein yetok Líbano, hasta tepet Halac tein amo uejka yetok de Seír. Satepan Josué kinxejxelouilij uejueyi kalyetonij israelitas nejin talmej. Kinmakak sejse ijkon kemej ixyetoya kipiaskej. 8 Nejin talmej moajsij kampa tepeyoj, kampa moixmati kemej Sefelá uan Arabá, kampa takes, taluakyan uan ompa Négueb. Nejin talmej katka ininaxka hititas, amorreos, cananeos, perizitas, heveos uan jebuseos. Yejuan nejin tekiuanij akin israelitas kintankej:

13 Josué semi tatajtsinya katka uan amo uejkaua yaya momikilitia. Yejua ika Jehová kiluij: “Titatajtsinya, sayoj ke mitspolouaok timoaxkatilis miak talmej. 2 Yejua nejin talmej tein ayamo timoaxkatilia: nochi in talmej tein ininaxka filisteos uan nochi in talmej tein ininaxka guesuritas. 3 (Nejin talmej peuaj desde kampa moxeloua ueyiat Nilo,* tein yetok kampa ualkisa tonaltsin* ompa Egipto hasta kampa peua Ecrón.* Nejin talmej moijtouaya ke katka ininaxka cananeos). No mitspolouaok tikintalkuilis makuil tekiuanij akin kinixyekanaj filisteos. Mitspolouaok tikintalkuilis gazeos, asdoditas, asquelonitas, guititas uan ecronitas. No monekiok tikintalkuilis avim tein yetokej tanikopa,* 4 uan timoaxkatilis nochi inintaluan cananeos; tal Meará tein ininaxka sidonios hasta Afec kampa peua inintal amorreos. 5 No mitspoloua tikintalkuilis guebalitas uan timoaxkatilis nochi Líbano tein yetok kampa ualkisa tonaltsin, desde Baal-Gad tein yetok itsintan tepet Hermón hasta Lebó-Hamat.* 6 Uan no, mitspolouaok tikintalkuilis sidonios akin nemij kampa tepeyoj, desde Líbano hasta Misrefot-Maim. Nejua nikinkuilis nochi nejin talmej uan nikinmakas israelitas. Tejua sayoj moneki tikinxejxelouilis tal tein nikinmakas ijkon kemej nimitsnauatij. 7 Nejin talmej moneki tikinxejxelouilis chiknaui uejueyi kalyetonij uan ichankauan* Manasés akin ayamo kipiaj inintal”.

8 Moisés, itekitikauj Jehová kinxejxelouilijkaya inintal seki* ichankauan Manasés, ichankauan Rubén uan ichankauan Gad nepaka den ueyiat Jordán, kampa ualkisa tonaltsin. 9 Talmej tein kinmakak peua desde Aroer, tein yetok tanakastan den ueyiat* Arnón. Uan no kinmakak ueyi xolal tein yetok tatenoj den ueyiat uan nochi Medebá hasta Dibón kampa tamanis.* 10 Uan no kinmakak nochi uejueyi xolalmej tein katka iaxka tekiuaj Sehón akin kinixyekanaya amorreos. Yejua taixyekanaya desde Hesbón uan tamia hasta kampa peua inintal ammonitas; 11 no kinmakak Galaad uan inintal guesuritas uan maacatitas. Kinmakak tepet Hermón uan nochi tal Basán hasta Salecá; 12 uan nochi in talmej tein katka iaxka tekiuaj Og. (Tekiuaj Og katka semej refaím akin nemiaok). Yejua taixyekanaya Astarot uan Edréi tein pouij Basán. Moisés kinixpoloj nochin akin ompa nemiaj uan kintalkuilij. 13 Sayoj ke israelitas amo moaxkatilijkej Guesur nion Maacat. Guesuritas uan maacatitas nemijok hasta axkan itech xolalmej kampa kintaxejxelouilijkej israelitas.

14 Sayoj ke Moisés amo kinmakak talmej ichankauan Leví. Jehová ininDios israelitas kiniluij ke ininaxka yeskia tepitsin de nochi tein israelitas kimaktiliaj Dios uan kichichinouiliaj.

15 Satepan Moisés kinxejxelouilij talmej ichankauan Rubén, kinmajmakak por familias. 16 Talmej tein kinmakak peua desde Aroer, tein yetok tanakastan den ueyiat Arnón. Uan no kinmakak ueyi xolal tein yetok tatenoj den ueyiat uan nochi tal tamanis* tein yetok tanakastan de Medebá. 17 No kinxejxelouilij Hesbón uan nochi xolalmej tein ompa pouij, tein yetokej kampa tamanis. Uan Dibón, Bamot-Baal, Bet-Baal-Meón, 18 Jáhaz, Quedemot, Mefaat, 19 Quiryataim, Sibmá, Zéret-Sáhar tein yetok itech tepet. Nejin tepet yetok tatenoj den tal tamanis. 20 No kinxejxelouilij Bet-Peor, tepet Pisgá kampa tel ixtemolis* uan Bet-Jesimot. 21 No kinmakakej nochi uejueyi xolalmej tein yetokej kampa tamanis uan nochi Hesbón, tein katka iaxka tekiuaj Sehón akin kinixyekanaya amorreos. Moisés kiixpoloj nejin tekiuaj uan taixyekananij madianitas Eví, Réquem, Zur, Hur uan Reba. Sehón kinixyekanaya nejin tekiuanij akin nemiaj ompa. 22 Israelitas no kimiktijkej Balaam, ikoneuj Beor ika ininmachete tein ojkan tenej.* Balaam katka adivino. 23 Inintal ichankauan Rubén ajsi hasta ueyiat Jordán. Nochi nejon talmej uan nochi uejueyi xolalmej uan xolaltsitsin tein ompa pouij kinxejxelouilijkej ichankauan Rubén, kinmajmakakej por familias.

24 Uan no, Moisés kinxejxelouilij talmej ichankauan Gad, kinmajmakak por familias. 25 Kinmakak tal Jazer, nochi uejueyi xolalmej tein pouij Galaad uan seki* inintaluan ammonitas hasta Aroer tein yetok taixpan de Rabá; 26 uan no kinmakak Hesbón hasta Ramat-Mizpé uan Betonim uan Mahanaim hasta kampa peua Debir. 27 Uan kampa yetok tal tamanis* kinmakak Bet-Haram, Bet-Nimrá, Sucot uan Zafón kampa no taixyekanaya tekiuaj Sehón akin nemia Hesbón. Talmej tein kinmakakej yetokej nikampa den ueyiat Jordán, kampa ualkisa tonaltsin hasta mar Kinéret.* 28 Nochi nejon talmej uan uejueyi xolalmej uan xolaltsitsin tein ompa pouij kinxejxelouilijkej ichankauan Gad, kinmajmakakej por familias.

29 Uan Moisés no kinxejxelouilij talmej seki* ichankauan Manasés, kinmajmakak por familias. 30 Kinmakak Mahanaim uan nochi talmej tein pouij Basán, kampa taixyekanaya tekiuaj Og. Uan no kinxejxelouilij nochi xolaltsitsin tein iaxka Jaír ompa Basán, 60 xolalmej. 31 Uan seki* ikoneuan Makir, ikoneuj Manasés kinmakak seki uejueyi xolalmej tein pouij Galaad.* No kinxejxelouilij uejueyi xolalmej Astarot uan Edréi tein pouij Basán, kampa taixyekanaya tekiuaj Og. Kinxejxelouilij sejse ininchankauan.

32 Moisés kinxejxelouilij nochi nejin talmej keman yetoyaj taluakyan ompa Moab, nepaka den ueyiat Jordán, kampa ualkisa tonaltsin.

33 Sayoj ke Moisés amo kinmakak talmej ichankauan Leví. Jehová ininDios israelitas motenkauak ke kinmakaskia nochi tein monekiskia.

14 Tiopixkat Eleazar, Josué ikoneuj Nun uan akin kinixyekanayaj uejueyi kalyetonij kinxejxelouilijkej israelitas talmej tein yetokej Canaán. 2 Yejuan kitatamotkej tetsitsin* para kimatiskej keniuj kinxejxelouiliskej. Jehová kinauatijka Moisés maj ijkon kinxejxelouili chiknaui uejueyi kalyetonij uan seki* ichankauan Manasés akin ayamo kinmakayaj inintal. 3 Achto ke kipanauiskiaj ueyiat Jordán,* Moisés kinxejxelouilijkaya talmej ome uejueyi kalyetonij uan okseki ichankauan Manasés. Sayoj ke ichankauan Leví amo kinmakak talmej. 4 Ichankauan José kinpoujkej kemej ome uejueyi kalyetonij: Manasés uan Efraín. Ichankauan Leví amo kinmakakej talmej, ta sayoj kinmakakej uejueyi xolalmej kampa nemiskej uan ixtauat tein kinyoualoua kampa ueliskia kinpiaskej inintapialuan. 5 Yejua ika israelitas kixejxelojkej tal ijkon kemej Jehová kinauatijka Moisés.

6 Satepan, seki takamej akin katkaj ichankauan Judá kiitatoj Josué ompa Guilgal. Semej katka Caleb, ikoneuj Jefuné akin katka quenizita.* Yejua kiluij Josué: “Xa tikelnamikiok tein Jehová motenkauak touan ompa Cadés-Barnea. Ijkuak, Dios kinojnotsak Moisés akin katka itekitikauj. 7 Nikpiaya 40 xiujmej keman tietoyaj Cadés-Barnea. Ijkuak, Moisés itekitikauj Jehová nechtitanik maj nitachiati Canaán. Uan keman nimokepak nikijtoj nochi tein nikitak. 8 Uan maski okseki takamej akin nouan yajkaj kichiujkej maj israelitas momoujtianij, nejua niksentokak* niktakamatik toDios Jehová. 9 Nejon tonal Moisés kiyekijtoj: ‘Tal kampa tinentinemik yeski moaxka uan kisentokas yeski ininaxka mokoneuan porin tiksentoka tiktakamati toDios Jehová’. 10 Ijkon kemej Jehová motenkauak iuan Moisés, amo nimikik. Panokya 45 xiujmej desde ke Jehová motenkauak nejon keman israelitas nentinemiaj taluakyan uan axkan nikajxitijya 85 xiujmej. 11 Uan nitelchikauakok kemej ijkuak Moisés nechtitanik maj nitapijpiati. Ijkon kemej uelia nitateuiaya uan uelia nikchiuaya okseki taman, axkan ueliok nikchiua nochi nejon. 12 Yejua ika, xinechmaka tal kampa tepeyoj tein Jehová motenkauak nejon tonal ke nechmakaskia. Tejua tikmati ke ompa nemij anaquim uan no tikmati ke uejueyi xolalmej kampa nemij kuali tatsaktok ika uejueyi tepamit. Sayoj ke nikyekmati ke Jehová nechpaleuis maj nikintalkuili, ijkon kemej Jehová motenkauak”.

13 Josué kitajtanij Dios maj kitatiochiui Caleb ikoneuj Jefuné, uan kimakak tal tein moixmati kemej Hebrón. 14 Yejua ika hasta axkan Hebrón iaxka Caleb ikoneuj Jefuné akin katka quenizita. Kimakakej nejon tal porin kisentokak kitakamatik Jehová, ininDios israelitas. 15 Hebrón achto monotsaya Quiryat-Arbá. (Arbá katka anaquim uan yejua akin okachi ueyichiujkej katka). Uan desde ijkuak, israelitas peuak kualtsin nemij porin amo akinok kinteuij.

15 Talmej tein kinxejxelouilijkej* sejse ichankauan Judá ajsi hasta taluakyan Zin kampa peua Edom, uan tami hasta tanikopa* den Négueb. 2 Tanikopa,* tal tein kinmakakej peua atenoj den mar Salado.* 3 Youi hasta Acrabim kampa tejkolis,* panoua Zin uan ajsi hasta Cadés-Barnea. De ompa youi Hezrón, pankisa hasta Addar, tamalakachoua uan ajsi hasta Carcá. 4 De ompa youi Azmón hasta atauit* tein yetok Egipto uan tami hasta mar Mediterráneo. Ompa peua uan ompa tami talmej tein kinmakakej ichankauan Judá tanikopa.*

5 De kampa ualkisa tonaltsin, tal tein kinmakakej youi tanakastankopa den mar Salado* hasta kampa tami ueyiat Jordán. No ompa peua tal tein kinmakakej parajkokopa, 6 pankisa hasta Bet-Hoglá uan panoua parajkokopa de Bet-Arabá hasta kampa yetok tet tein moixmati kemej Bohán. Bohán katka semej ikoneuan Rubén. 7 De ompa youi Debir kampa yetok tal tamanis* tein moixmati kemej Acor, tamalakachoua uan ajsi hasta Guilgal. Ueyi xolal Guilgal yetok parajkokopa, taixpan de se ojti tein pankisa tein moixmati kemej Adumim. Nejin ojti yetok tanikopa* de se atauit.* Tal tein kinmakakej kisentoka hasta En-Semes kampa meya at uan tami hasta En-Roguel. 8 De ompa kisentoka hasta tal tamanis* tein moixmati kemej Hinón, panoua Jerusalén kampa nemij jebuseos uan pankisa ikuapan se tepet. Nejon tepet yetok tanakastan den tal tamanis tein moixmati kemej Hinón kampa pankalaki tonaltsin uan ajkokopa den tal tamanis tein moixmati kemej Refaím. 9 Uan no, inintal peua desde ikuapan tepet hasta ameyal* tein moixmati kemej Neftóah, uan ajsi hasta uejueyi xolalmej tein yetokej itech tepet Efrón. De ompa ajsi hasta Baalá tein no monotsa Quiryat-Jearim, 10 tamalakachoua uan ajsi hasta tepet Seír tein yetok kampa pankalaki tonaltsin. De ompa youi ajkokopa den tepet Jearim tein no monotsa Kesalón kampa ixtemolis,* temoua Bet-Semes uan ajsi hasta Timná. 11 Uan inintal ajsi ajkokopa de Ecrón kampa ixtemolis,* youi Sikerón, panoua kampa yetok tepet Baalá uan ajsi hasta Jabneel. Nochi inintal tami hasta in mar.

12 Uan de kampa pankalaki tonaltsin, inintal tami tanakastankopa den mar Mediterráneo. Ompa peua uan ompa tami talmej tein kinxejxelouilijkej ichankauan Judá, kinmajmakakej por familias.

13 Jehová kinauatijka Josué maj kimaka Caleb ikoneuj Jefuné se tal tein moajsi kampa kintaxejxelouilijkaj ichankauan Judá. Yejua ika Josué kimakak Quiryat-Arbá tein no monotsa Hebrón (Arbá katka itat Anac). 14 Uan Caleb yajki Quiryat-Arbá kintalkuilito eyi ikoneuan Anac. Ikoneuan katkaj Sesái, Ahimán uan Talmái. 15 Satepan kinteuito akin nemiaj Debir (ueyi xolal Debir achto motokaytiaya Quiryat-Séfer). 16 Caleb kijtoj: “Takat akin kintanis akin nemij Quiryat-Séfer, nikauas maj monamikti iuan nosiuapil Acsá”. 17 Uan Otniel ikoneuj Quenaz, akin katka iikniuj Caleb kintanik akin ompa nemiaj. Yejua ika, Caleb kikauak maj monamikti iuan isiuapil akin monotsa Acsá. 18 Keman Acsá yajtoyaya kampa nemiskia iuan Otniel, kitataujtij itakatsin maj kitajtani Caleb maj kimaka se tal. Acsá temok de iburro* uan Caleb kitajtanij:* “¿Toni tikneki?”. 19 Yejua kiluij: “Nimitstataujtia xinechtayokoliok teisa. Tinechmakakya se tal ompa Négueb, sayoj ke no nikneki xinechmaka Gulot-Maim”.* Yejua ika Caleb kimakak Gulot Alto uan Gulot Bajo.

20 Yejua nejin talmej tein kinxejxelouilijkej ichankauan Judá, kinmajmakakej por familias.

21 Tanikopa* kampa peua Edom kinmakakej nejin uejueyi xolalmej: Cabzeel, Éder, Jagur, 22 Quiná, Dimoná, Adadá, 23 Quedes, Hazor, Itnán, 24 Zif, Télem, Bealot, 25 Hazor-Hadatá uan Queriyot-Hezrón tein no monotsa Hazor, 26 Amam, Sema, Moladá, 27 Hazar-Gadá, Hesmón, Bet-Pélet, 28 Hazar-Sual, Beer-Seba, Biziotías, 29 Baalá, Iyim, Ézem, 30 Eltolad, Kesil, Hormá, 31 Ziclag, Madmaná, Sansaná, 32 Lebaot, Silhim, Ain uan Rimón. Sennochia katkaj 29 uejueyi xolalmej uan xolaltsitsin tein ompa pouij.

33 Uejueyi xolalmej tein yetokej kampa moixmati kemej Sefelá katkaj Estaol, Zorá, Asná, 34 Zanóah, En-Ganim, Tapúah, Enam, 35 Jarmut, Adulam, Socó, Azecá, 36 Saaraim, Aditaim uan Guederá uan Guederotaim.* Katkaj 14 uejueyi xolalmej uan xolaltsitsin tein ompa pouij.

37 No ompa yetokej Zenán, Hadasá, Migdal-Gad, 38 Dileán, Mizpá, Jocteel, 39 Lakís, Bozcat, Eglón, 40 Cabón, Lahmam, Kitlís, 41 Guederot, Bet-Dagón, Naamá uan Maquedá. Katkaj 16 uejueyi xolalmej uan xolaltsitsin tein ompa pouij.

42 Uan no Libná, Éter, Asán, 43 Iftá, Asná, Nezib, 44 Queilá, Aczib uan Maresá. Katkaj chiknaui uejueyi xolalmej uan xolaltsitsin tein ompa pouij.

45 No ompa yetok Ecrón uan xolalmej uan xolaltsitsin tein ompa pouij. 46 Kinmakakej desde Ecrón hasta talmej tein yetokej tanakastan de Asdod kampa pankalaki tonaltsin uan xolaltsitsin tein ompa pouij.

47 Ompa Sefelá no yetok Asdod uan xolalmej uan xolaltsitsin tein ompa pouij; Gaza uan xolalmej uan xolaltsitsin tein ompa pouij, uan ajsi hasta atauit* tein yetok Egipto, mar Mediterráneo uan atenoj.

48 Uan kampa tepeyoj yetokej uejueyi xolalmej Samir, Jatir, Socó, 49 Daná, Quiryat-Saná tein no monotsa Debir, 50 Anab, Estemó, Anim, 51 Gosén, Holón uan Guiló. Katkaj 11 uejueyi xolalmej uan xolaltsitsin tein ompa pouij.

52 No ompa yetok Arab, Dumá, Esán, 53 Janim, Bet-Tapúah, Afecá, 54 Humtá, Quiryat-Arbá tein no monotsa Hebrón uan Zior. Katkaj chiknaui uejueyi xolalmej uan xolaltsitsin tein ompa pouij.

55 No ompa yetok Maón, Carmelo, Zif, Jutá, 56 Jezreel, Jocdeam, Zanóah, 57 Cayín, Guibeá uan Timná. Katkaj majtakti uejueyi xolalmej uan xolaltsitsin tein ompa pouij.

58 No ompa yetok Halhul, Bet-Zur, Guedor, 59 Maarat, Bet-Anot uan Eltecón. Katkaj chikuasen uejueyi xolalmej uan xolaltsitsin tein ompa pouij.

60 Uan no Quiryat-Baal tein no monotsa Quiryat-Jearim uan Rabá. Katkaj ome uejueyi xolalmej uan xolaltsitsin tein ompa pouij.

61 Uan taluakyan yetokej uejueyi xolalmej Bet-Arabá, Midín, Secacá, 62 Nibsán, Ir-Hamélaj* uan En-Guedí. Katkaj chikuasen uejueyi xolalmej uan xolaltsitsin tein ompa pouij.

63 Ichankauan Judá amo uelik kintalkuilijkej jebuseos akin nemiaj Jerusalén, yejua ika jebuseos kisentokaj nemij iniuan ichankauan Judá hasta axkan.

16 Talmej tein kinmakakej ikoneuan José* peua atenoj den ueyiat Jordán, tein yetok tanakastan de Jericó. De ompa ajsi hasta ameyal* tein yetok kampa ualkisa tonaltsin ompa Jericó. Kipanauia taluakyan tein yetok taixpan de Jericó uan ajsi hasta kampa tepeyoj ompa Betel. 2 Peua Betel tein amo uejka yetok den ueyi xolal Luz uan panoua hasta Atarot kampa peua inintal arkitas. 3 De ompa temoua kampa peua inintal jafletitas tein yetok kampa pankalaki tonaltsin uan ajsi hasta kampa peua Bet-Horón Baja uan Guézer. Nochi inintal tami hasta mar Mediterráneo.

4 Uejueyi kalyetonij Manasés uan Efraín akin katkaj ikoneuan José moaxkatilijkej tal tein kinmakakej. 5 Ijkon xeliujtok tal tein kinmajmakakej por familias ichankauan Efraín: de kampa ualkisa tonaltsin peua Atarot-Addar, panoua Bet-Horón Alta 6 uan tami hasta mar Mediterráneo. Parajkokopa peua desde Micmetat uan tamalakachoua hasta Taanat-Siló uan Janóah. Nejin xolalmej yetokej kampa ualkisa tonaltsin. 7 De Janóah temoua Atarot uan Naará, ajsi Jericó uan tami hasta ueyiat Jordán. 8 Desde xolal Tapúah youi hasta atauit* tein yetok Caná, tein yetok kampa pankalaki tonaltsin uan tami hasta mar Mediterráneo. Nejin yejua tal tein kinmajmakakej por familias ichankauan Efraín. 9 No kinmakakej seki uejueyi xolalmej uan xolaltsitsin tein yetokej itech tal tein kinmakakej ichankauan Manasés.

10 Sayoj ke ichankauan Efraín amo kintalkuilijkej cananeos akin nemiaj Guézer. Yejua ika cananeos iniuan nemijok hasta axkan uan ichankauan Efraín semi kintekitiltiaj.

17 Keman kitatamotkej tetsitsin* nesik katiyejua talmej kinmakaskiaj ichankauan Manasés. Manasés katka ikoneuj José akin tayekanaya. Makir, ikoneuj Manasés akin tayekanaya, kimakakej Galaad uan Basán porin katka soldado. Makir katka itat Galaad. 2 Uan no kinmajmakakej inintal ichankauan Manasés akin ayamo kintaxejxelouiliayaj. Kinmajmakakej talmej ikoneuan Abí-Ézer, ikoneuan Hélec, ikoneuan Asriel, ikoneuan Siquem, ikoneuan Héfer uan ikoneuan Semidá. Yejuan katkaj takamej akin kinixyekanayaj ichankauan Manasés, ikoneuj José. 3 Sayoj ke Zelofehad ikoneuj Héfer amo kinpiak okichpipil ta sayoj siuapipil. Yejuan monotsayaj Mahlá, Noá, Hoglá, Milcá uan Tirzá. Itat Zelofehad katka Héfer uan iueyitat katka Galaad. Itat Galaad katka Makir uan iueyitat katka Manasés. 4 Isiuapipiluan Zelofehad kiitatoj tiopixkat Eleazar, Josué ikoneuj Nun uan taixyekananij israelitas. Yejuan kiniluijkej: “Jehová kinauatijka Moisés maj no techmakani talmej kampa kintaxejxelouiliskiaj tochankauan”. Yejua ika kinmakakej talmej kampa kintaxejxelouilijkaj inintíos, ijkon kemej Jehová tanauatijka.

5 Ichankauan Manasés kinmakakejok majtakti talmej. Achto kinxejxelouilijkajya Galaad uan Basán tein yetokej oksekopa* den ueyiat Jordán. 6 Yejuan kinmakakejok nejin talmej porin siuamej akin katkaj ichankauan Manasés no kintaxejxelouilijkej ijkon kemej kintaxejxelouilijkej takamej. Sayoj ke okseki ichankauan Manasés ininaxkaya katka Galaad.

7 Inintal ichankauan Manasés peua desde Aser uan ajsi hasta Micmetat, tein yetok taixpan de Siquem. Youi tanikopa* uan ajsi hasta inintal akin nemij En-Tapúah. 8 Ueyi xolal Tapúah ininaxka ichankauan Efraín, sayoj ke nochi in tal tein kiyoualoua ueyi xolal ininaxka ichankauan Manasés. Inintal ichankauan Manasés tami ompa Tapúah. 9 De ompa youi tanikopa* den atauit* tein yetok Caná. Kampa kintaxejxelouilijkej ichankauan Manasés yetokej seki uejueyi xolalmej tein ininaxka ichankauan Efraín. Inintal ichankauan Manasés peua ajkokopa den atauit tein yetok Caná uan tami hasta mar Mediterráneo. 10 Talmej tein yetokej tanikopa* ininaxka ichankauan Efraín, uan tein yetokej ajkokopa ininaxka ichankauan Manasés. Inintal ichankauan Manasés tami hasta in mar. Ajkokopa, talmej tein kinmakakej ichankauan Manasés ajsi hasta Aser, uan oksekopa kampa ualkisa tonaltsin ajsi hasta Isacar.

11 Seki uejueyi xolalmej tein kinmakakej ichankauan Manasés yetokej kampa kintaxejxelouilijkej ichankauan Isacar uan Aser. Ichankauan Manasés kinmakakej Bet-Seán uan Ibleam uan xolaltsitsin tein ompa pouij. No kinmakakej Dor, En-Dor, Taanac uan Meguidó uan nochin akin ompa nemij. No kinmakakej xolaltsitsin tein ompa pouij. Eyi nejon uejueyi xolalmej yetokej kampa tepeyoj.

12 Sayoj ke ichankauan Manasés amo uelik moinaxkatilijkej nejon uejueyi xolalmej porin cananeos amo kinekkej kisaskej de ompa. 13 Keman soldados israelitas miakiakej, semi kintekitiltijkej cananeos. Sayoj ke amo uelik senkis kintalkuilijkej.

14 Ichankauan José kiluijkej Josué: “Tejuan semi timiakej porin Jehová techtatiochiuijtok hasta axkan, sayoj ke amo titechmakak okachi talmej ta sayoj tein kisak keman nankitatamotkej tetsitsin, tal tein titechxejxelouilij amo ueyi uan amo techajsi”. 15 Josué kiniluij: “Komo semi namiakej uan amo namechajsi tal kampa tepeyoj tein kinxejxelouilijkej ichankauan Efraín, xiakan inintal perizitas uan inintal refaím, xikintamotakan* koujmej uan xitachipauakan para ompa uelis nanemiskej”. 16 Ikoneuan José kiluijkej: “Amo techajsis talmej tein yetokej kampa tepeyoj. Uan nochin cananeos akin nemij kampa yetok tal tamanis* kipiaj carros tein kikuij keman tateuiaj uan ininruedas kipiaj machetes tein ojkan tenej.* Uan hasta cananeos akin nemij Bet-Seán uan xolaltsitsin tein ompa pouij uan akin nemij tal tamanis Jezreel kipiaj nochi nejon”. 17 Yejua ika Josué kiniluij uejueyi kalyetonij Efraín uan Manasés, akin ichankauan José: “Semi namiakej uan semi nanchikaujkej. Amo sayoj namechmakaskej se cacho tal, 18 ta no namoaxka yeski nochi in talmej tein yetokej kampa tepeyoj. Maski koujtaj, nantachipauaskej uan ompa tamitiuj nochi tal tein namoaxka. Nankintalkuiliskej cananeos maski yejuan semi chikaujkej. Nankintaniskej maski kipiaj carros tein kikuij keman tateuiaj uan maski ininruedas kipiaj machetes tein ojkan tenej”.

18 Kemej israelitas moaxkatilijkajya nochi in talmej tein pouij Canaán, nochin mosentilijkej itech ueyi xolal Siló uan ompa kitalijkej kaltsin kampa yayaj kiueyichiuatij Dios.* 2 Sayoj ke chikome uejueyi kalyetonij israelitas ayamo kinmakayaj inintal. 3 Yejua ika Josué kiniluij: “¿Keyej ayamo namoaxkatiliaj in tal tein namechmakak Jehová, ininDios touejkaujtatuan? 4 Xikinixtalikan eyi takamej akin pouij itech sejse uejueyi kalyetonij para nikintitanis maj kiitatij tal. Nikinnauatis maj kijkuilokan keniuj moita tal uan maj kichijchiuakan dibujos.* Nejon kinextis keniuj xejxeliujtos tal tein kinmakaskej uejueyi kalyetonij. Uan keman matamiskej maj oksepa ualakan. 5 Moneki nankixejxeloskej tal para chikome uejueyi kalyetonij. Ichankauan Judá mokauaskej tanikopa* uan ichankauan José mokauaskej ajkokopa. 6 Xikijkuilokan keniuj moita tal uan xikxejxelokan para chikome uejueyi kalyetonij. Satepan xinechualkuilikan tein nankijkuiloskej uan nikan niktatamotas tetsitsin* para tikmatiskej toni kijtoua Jehová.* 7 Sayoj ke ichankauan Leví amo kinmakaskej nion se tal, porin Jehová kinijitak* para maj mochiuakan tiopixkamej. Uan ichankauan Gad, ichankauan Rubén uan seki* ichankauan Manasés kipiajya inintal oksekopa* den ueyiat Jordán. Nejon talmej kinxejxelouilij Moisés akin katka itekitikauj Jehová”.

8 Keman takamej yajtoyajya, Josué kinnauatij: “Xiakan xikitatij tal uan xikijkuilokan keniuj moita. Keman namatamiskej oksepa xinechitakij nikan Siló. Nejua niktatamotas tetsitsin para tikmatiskej toni kijtoua Jehová”. 9 Takamej yajkej kiitatoj nochi in talmej uan kijkuilojkej keniuj moitaya. No kijkuilojkej kanachi uejueyi xolalmej yetoyaj itech nejon talmej. Nochi kixejxelojkej para chikome uejueyi kalyetonij uan sekosan kiamatalijkej. Keman matankej oksepa kiitatoj Josué ompa Siló. 10 Keman yetoyajya Siló, Josué kitatamotak tetsitsin para kimatiskej toni kijtoua Jehová. Ijkon Josué kinxejxelouilij israelitas tal tein kinmakaskiaj.

11 Keman kitatamotkej tetsitsin, nesik kani kinmakaskiaj inintal ichankauan Benjamín por familias. Tal tein kinmakakej yetok kampa kintaxejxelouilijkej ichankauan Judá uan ichankauan José. 12 Ajkokopa, inintal peua tanakastan den ueyiat Jordán uan youi ajkokopa de Jericó. Uan de kampa pankalaki tonaltsin panoua kampa tepeyoj uan ajsi hasta taluakyan tein yetok Bet-Aven. 13 De ompa youi hasta tanikopa* den ueyi xolal Luz tein no monotsa Betel uan temoua Atarot-Addar itech tepet tein yetok tanikopa de Bet-Horón Baja. 14 Uan desde tepet tein yetok tanikopa de Bet-Horón tamalakachoua tanikopa uan tami hasta Quiryat-Baal tein no monotsa Quiryat-Jearim. Nejin ueyi xolal yetok itech tal tein kinmakakej ichankauan Judá. Ijkon xejxeliujtok tal tein kinmakakej ichankauan Benjamín de kampa pankalaki tonaltsin.

15 Tanikopa,* inintal peua kampa tami Quiryat-Jearim uan youi hasta ameyal* tein moixmati kemej Neftóah tein yetok kampa pankalaki tonaltsin. 16 De ompa temoua tatsintan den tepet tein yetok taixpan den tal tamanis* tein moixmati kemej Hinón. Nejin tepet no yetok ajkokopa den tal tamanis tein moixmati kemej Refaím. Tal tein kinmakakej youi hasta tal tamanis Hinón, tanikopa* de kampa nemij jebuseos uan temoua hasta En-Roguel. 17 De ompa youi ajkokopa uan ajsi hasta En-Semes. Satepan panoua Guelilot, tein yetok taixpan den ojti tein moixmati kemej Adumim. De ompa temoua kampa yetok tet tein moixmati kemej Bohán. Bohán katka semej ikoneuan Rubén. 18 Uan youi ajkokopa hasta tepetsitsin tein yetokej taixpan den Arabá uan ajsi hasta Arabá. 19 Uan tal tein kinmakakej youi hasta ajkokopa de Bet-Hoglá. Uan tami atenoj tein yetok ajkokopa den mar Salado* kampa monamiki iuan ueyiat Jordán. Ompa peua uan ompa tami tal tein kinmakakej ichankauan Benjamín tanikopa.* 20 Uan de kampa ualkisa tonaltsin, inintal tami tanakastankopa den ueyiat Jordán. Ompa peua uan ompa tami nochi in tal tein kinmajmakakej ichankauan Benjamín por familias.

21 Yejua nejin uejueyi xolalmej tein kinmajmakakej ichankauan Benjamín por familias: Jericó, Bet-Hoglá, Émec-Queziz, 22 Bet-Arabá, Zemaraim, Betel, 23 Avim, Pará, Ofrá, 24 Kefar-Amoní, Ofní uan Gueba. Katkaj 12 uejueyi xolalmej uan xolaltsitsin tein ompa pouij.

25 No kinmakakej Gabaón, Ramá, Beerot, 26 Mizpé, Kefirá, Mozá, 27 Réquem, Irpeel, Taralá, 28 Zelá, Ha-Élef, Jebusí tein no monotsa Jerusalén, Guibeá uan Quiryat. Katkaj 14 uejueyi xolalmej uan xolaltsitsin tein ompa pouij.

Yejua nejin talmej tein kinmajmakakej ichankauan Benjamín por familias.

19 Keman oksepa* kitatamotkej tetsitsin,* nesik kani kinmajmakaskiaj inintal ichankauan Simeón por familias. Tal tein kinmakakej yetok kampa kintaxejxelouilijkej ichankauan Judá. 2 Kinmakakej Beer-Seba uan Seba, Moladá, 3 Hazar-Sual, Balá, Ézem, 4 Eltolad, Betul, Hormá, 5 Ziclag, Bet-Marcabot, Hazar-Susá, 6 Bet-Lebaot uan Saruhén. Katkaj 13 uejueyi xolalmej uan xolaltsitsin tein ompa pouij. 7 No kinmakakej Ain, Rimón, Éter uan Asán. Katkaj naui uejueyi xolalmej uan xolaltsitsin tein ompa pouij. 8 No kinmakakej okseki xolaltsitsin tein ajsij hasta Baalat-Beer, tein no moixmati kemej Ramá tein yetok tanikopa.* Yejua nejin talmej tein kinmajmakakej ichankauan Simeón por familias. 9 Tal tein kinmakakej ichankauan Judá semi ueyi katka, yejua ika yejuan kinmakakej seki talmej ichankauan Simeón. Yejua ika talmej tein kinxejxelouilijkej ichankauan Simeón yetok kampa kintaxejxelouilijkej ichankauan Judá.

10 Keman oksepa* kitatamotkej tetsitsin, nesik kani kinmakaskiaj inintal ichankauan Zabulón por familias. Inintal tami hasta Sarid. 11 De ompa youi Mareal tein yetok kampa pankalaki tonaltsin, panoua Dabéset uan ajsi hasta tal tamanis* tein yetok taixpan de Jocneam. 12 Desde Sarid youi kampa peua Kislot-Tabor tein yetok kampa ualkisa tonaltsin, satepan youi Daberat uan ajsi hasta Jafía. 13 De ompa youi ueyi xolal Gat-Héfer kampa ualkisa tonaltsin, panoua Et-Cazín, youi Rimón uan ajsi hasta Neá. 14 De ompa tamalakachoua uan youi ajkokopa hasta Hanatón uan ajsi hasta tal tamanis* tein moixmati kemej Iftá-El. 15 Kampa kintaxejxelouilijkej yetokej nejin uejueyi xolalmej: Catat, Nahalal, Simrón, Idalá uan Belén. Katkaj 12 uejueyi xolalmej uan xolaltsitsin tein ompa pouij. 16 Yejua nejin talmej, uejueyi xolalmej uan xolaltsitsin tein kinmajmakakej ichankauan Zabulón por familias.

17 Keman oksepa* kitatamotkej tetsitsin, nesik kani kinmajmakaskiaj inintal ichankauan Isacar por familias. 18 Inintal peua Jezreel uan panoua Kesulot, Sunem, 19 Hafaraim, Shion, Anaharat, 20 Rabit, Quisión, Ébez, 21 Rémet, En-Ganim, En-Hadá uan Bet-Pazez. 22 Inintal ajsi hasta tepet Tabor, Sahazuma, Bet-Semes uan tami hasta ueyiat Jordán. Katkaj 16 uejueyi xolalmej uan xolaltsitsin tein ompa pouij. 23 Yejua nejin talmej, uejueyi xolalmej uan xolaltsitsin tein kinmajmakakej ichankauan Isacar por familias.

24 Keman oksepa* kitatamotkej tetsitsin, nesik kani kinmajmakaskiaj inintal ichankauan Aser por familias. 25 Inintal peua Helcat uan panoua Halí, Beten, Acsaf, 26 Alamélec, Amad uan Misal. De kampa pankalaki tonaltsin inintal youi hasta tanakastan den tepet Carmelo uan ajsi hasta ueyiat Sihor-Libnat. 27 De kampa ualkisa tonaltsin panoua Bet-Dagón uan ajsi hasta kampa kinmakakej inintal ichankauan Zabulón. Uan ajkokopa peua de kampa yetok tal tamanis* tein moixmati kemej Iftá-El, panoua Bet-Émec uan Neiel uan youi hasta tanakastan de Cabul. 28 Inintal panoua Ebrón, Rehob, Hamón, Caná uan ajsi hasta ueyi xolal Sidón. 29 Inintal youi Ramá uan ajsi hasta ueyi xolal Tiro kampa tatsaktok ika uejueyi tepamit. Inintal oksepa peua desde ueyi xolal Hosá uan ajsi hasta atenoj kampa yetok ueyi xolal Aczib, 30 Umá, Afec uan Rehob. Katkaj 22 uejueyi xolalmej uan xolaltsitsin tein ompa pouij. 31 Yejua nejin talmej, uejueyi xolalmej uan xolaltsitsin tein kinmajmakakej ichankauan Aser por familias.

32 Keman oksepa* kitatamotkej tetsitsin, nesik kani kinmajmakaskiaj inintal ichankauan Neftalí por familias. 33 Inintal peua desde Hélef, desde Zaananim kampa yetok se ueyi kouit, panoua Adamí-Néqueb uan Jabneel. De ompa ajsi Lacum uan tami hasta ueyiat Jordán. 34 De kampa pankalaki tonaltsin youi Aznot-Tabor uan panoua Hucoc. Tanikopa* iuan monamiki tal tein kinmakakej ichankauan Zabulón. De kampa pankalaki tonaltsin yetok tal tein kinmakakej ichankauan Aser. Uan de kampa ualkisa tonaltsin monamiki iuan tal tein kinmakakej ichankauan Judá.* Nejin tal yetok tanakastan den ueyiat Jordán. 35 Uan uejueyi xolalmej kampa tatsaktok ika uejueyi tepamit tein kinmakakej katkaj Zidim, Zer, Hammat, Racat, Kinéret, 36 Adamá, Ramá, Hazor, 37 Quedes, Edréi, En-Hazor, 38 Yirón, Migdal-El, Horem, Bet-Anat, uan Bet-Semes. Katkaj 19 uejueyi xolalmej uan xolaltsitsin tein ompa pouij. 39 Yejua nejin talmej, uejueyi xolalmej uan xolaltsitsin tein kinmajmakakej ichankauan Neftalí por familias.

40 Keman oksepa* kitatamotkej tetsitsin, nesik kani kinmajmakaskiaj inintal ichankauan Dan por familias. 41 Uan inintal peua Zorá uan panoua Estaol, Ir-Semes, 42 Saalabín, Ayalón, Itlá, 43 Elón, Timná, Ecrón, 44 Eltequé, Guibetón, Baalat, 45 Jehúd, Bene-Berac, Gat-Rimón, 46 Me-Jarcón, Racón uan ajsi hasta taixpan de Jope. 47 Sayoj ke ichankauan Dan amo kinajsia tal tein kinmakakej. Yejua ika kinteuitoj akin nemij Lésem uan kintamimiktijkej ika ininmachete tein ojkan tenej.* Moaxkatilijkej ueyi xolal uan ompa mokaltalijkej. Uan kemej ininuejkaujtat monotsaya Dan, kipatilijkej itokay ueyi xolal Lésem uan kitokaytijkej Dan. 48 Yejua nejin talmej, uejueyi xolalmej uan xolaltsitsin tein kinmajmakakej ichankauan Dan por familias.

49 Ijkon kintamixejxelouilijkej israelitas talmej tein kinmakaskiaj. Uan israelitas kimakakej Josué ikoneuj Nun se tal tein ininaxkaya katka. 50 Jehová tanauatij maj kimakanij Timnat-Sérah, ueyi xolal tein yejua tajtanik. Nejin ueyi xolal yetok kampa tepeyoj, kampa kintaxejxelouilijkej ichankauan Efraín. Josué kiyekchijchiuak Timnat-Sérah uan ompa mokaltalij.

51 Tiopixkat Eleazar, Josué iokichpil Nun uan akin kinixyekanayaj uejueyi familias ijkon kintamixejxelouilijkej talmej israelitas. Yejuan mosentilijkaj kaltenoj den kaltsin kampa yayaj kiueyichiuatij Dios* ompa Siló, uan kitatamotkej tetsitsin para kimatiskej toni kijtoua Jehová.*

20 Uan Jehová kiluij Josué: 2 “Xikinilui israelitas: ‘Xikixtalikan uejueyi xolalmej kampa israelitas uelis choloskej, ijkon kemej nikiluijka Moisés maj namechnauati xikchiuakan. 3 Komo se israelita kichiua teisa uan kiualmiktia aksa,* uelis cholos ompa porin amo kinekia kimiktis. Keman yetos itech semej nejon uejueyi xolalmej, ichankauj akin kimiktijkej* amo teyi uelis kichiuilis. 4 Uan akin temiktis monekis yas semej nejin uejueyi xolalmej. Keman ompa ajsis, moneki moketsas kaltenoj den ueyi xolal uan kiniluis taixyekananij israelitas tein kichiuak. Satepan, taixyekananij kikauaskej maj kalaki uan moneki kiluiskej kani nemis, uan desde ijkuak ompaya chanchiuas. 5 Keman ichankauj akin kimiktijkej ajsis ompa, taixyekananij amo moneki kikauiliskej maj kimikti porin yejua amo kinekia temiktis. Uan amo no kitauelitaya akin kimiktij. 6 Moneki yetos itech nejon ueyi xolal hasta keman tamelauanij kiixejekoskej ox yekmelauj amo kinekia temiktis. Uan komo kiitaj ke amo kinekia temiktis, uelis kisentokas ompa chanchiuas hasta keman momikilis tayekankatiopixkat. Ijkuak uelis mokepas kampa ualeuak uan oksepa nemitiuj ichan’”.

7 Yejua ika kixelojkej para Dios nejin uejueyi xolalmej kampa israelitas ueliskia choloskej: kampa kintaxejxelouilijkaj ichankauan Neftalí kixelojkej ueyi xolal Quedes tein yetok ompa Galilea kampa tepeyoj. Kampa kintaxejxelouilijkaj ichankauan Efraín kixelojkej ueyi xolal Siquem tein yetok kampa tepeyoj. Uan kampa kintaxelouilijkaj ichankauan Judá kixelojkej ueyi xolal Quiryat-Arbá tein no monotsa Hebrón tein yetok kampa tepeyoj. 8 Uan yejua nejin uejueyi xolalmej tein israelitas kixelojkej oksekopa den ueyiat Jordán taixpan de Jericó:* kampa kintaxejxelouilijkaj ichankauan Rubén kixelojkej ueyi xolal Bézer tein yetok taluakyan kampa tamanis.* Kampa kintaxelouilijkaj ichankauan Gad kixelojkej ueyi xolal Ramot tein yetok Galaad. Uan kampa kintaxejxelouilijkaj ichankauan Manasés kixelojkej ueyi xolal Golán tein yetok Basán.

9 Kiixtalijkej nejin uejueyi xolalmej para uelis ompa choloskej israelitas uan akin amo israelitas akin iniuan nemij. Komo se israelita oso se akin amo israelita kiualmiktia aksa, uelis cholos ompa para maj ichankauj akin kimiktijkej* amo teyi kichiuili. Keman ompa yetos, tamelauanij kiixejekoskej ox yekmelauj amo kinekia temiktis.

21 Akin kinixyekanayaj uejueyi familias tein pouij iniuan ichankauan Leví kiitatoj tiopixkat Eleazar, Josué ikoneuj Nun uan akin kinixyekanayaj uejueyi kalyetonij israelitas. 2 Kinitatoj ompa Siló tein poui Canaán uan kiniluijkej: “Jehová kinauatijka Moisés maj techmakakan uejueyi xolalmej kampa tichanchiuaskej uan ixtauat tein kinyoualoua kampa uelis tikinpiaskej totapialuan”. 3 Yejua ika, kinmakakej levitas uejueyi xolalmej uan ixtauat tein kinyoualoua kampa ueliskia kinpiaskej inintapialuan. Israelitas kinmakakej kampa yejuan kintaxejxelouilijkajya. Kichiujkej ijkon kemej Jehová kinnauatijka.

4 Keman kitatamotkej tetsitsin,* nesik akonimej achto kinmakaskiaj uejueyi xolalmej. Achto kinmakakej ikoneuan tiopixkat Aarón akin katkaj ichankauan Cohat. Kinmakakej 13 uejueyi xolalmej. Nejin uejueyi xolalmej yetokej kampa kintaxejxelouilijkaj ichankauan Judá, ichankauan Simeón uan ichankauan Benjamín.

5 Okseki levitas akin katkaj ichankauan Cohat kinmakakej majtakti uejueyi xolalmej. Nejin uejueyi xolalmej yetokej kampa kintaxejxelouilijkaj ichankauan Efraín, ichankauan Dan uan seki* ichankauan Manasés.

6 Uan levitas akin katkaj ichankauan Guersón kinmakakej 13 uejueyi xolalmej. Nejin uejueyi xolalmej yetokej kampa kintaxejxelouilijkaj ichankauan Aser, ichankauan Neftalí uan ichankauan* Manasés akin nemij Basán.

7 Levitas akin katkaj ichankauan Merarí kinmakakej 12 uejueyi xolalmej tein yetokej kampa kintaxejxelouilijkaj ichankauan Rubén, ichankauan Gad uan ichankauan Zabulón. Nejin uejueyi xolalmej kinmajmakakej ichankauan Merarí por familias.

8 Israelitas kinmakakej levitas nejin uejueyi xolalmej uan ixtauat tein kinyoualoua kampa ueliskia kinpiaskej inintapialuan porin ijkon nesik keman kitatamotkej tetsitsin. Jehová kinauatijka Moisés maj ijkon kichiuakan.

9 Ichankauan Judá uan ichankauan Simeón no kinmakakej levitas seki uejueyi xolalmej. 10 Achto kinmakakej ikoneuan Aarón akin katkaj ichankauan Cohat porin keman kitatamotkej tetsitsin nesik ke achto yejuan kinmakaskiaj. 11 Kinmakakej ueyi xolal Quiryat-Arbá, tein no monotsa Hebrón (Arbá katka itat Anac). No kinmakakej ixtauat tein kiyoualoua kampa ueliskia kinpiaskej inintapialuan. Nejin ueyi xolal yetok kampa tepeyoj kampa kintaxejxelouilijkej ichankauan Judá. 12 Sayoj ke talmej uan xolaltsitsin tein pouij Quiryat-Arbá, kimakakej Caleb ikoneuj Jefuné.

13 Uan ikoneuan tiopixkat Aarón kinmakakej Hebrón se ueyi xolal kampa aksa* ueli choloua komo temiktia. No kinmakakej ueyi xolal Libná, 14 Jatir, Estemoa, 15 Holón, Debir, 16 Ain, Jutá, uan Bet-Semes. Ichankauan Judá uan ichankauan Simeón kinmakakej nejon chiknaui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

17 Uan ichankauan Benjamín kinmakakej Gabaón, Gueba, 18 Anatot uan Almón. Katkaj naui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

19 Yejua nejin uejueyi xolalmej uan ixtauat tein kinmakakej tiopixkamej akin katkaj ichankauan Aarón. Sennochia katkaj 13 uejueyi xolalmej uan ixtauat tein kinyoualoua kampa ueliskia kinpiaskej inintapialuan.

20 Okseki levitas akin katkaj ichankauan Cohat kinmakakej uejueyi xolalmej tein yetokej kampa kintaxejxelouilijkaj ichankauan Efraín. 21 Kinmakakej Siquem se ueyi xolal kampa aksa ueli choloua komo temiktia. Nejin ueyi xolal yetok kampa tepeyoj kampa kintaxejxelouilijkaj ichankauan Efraín. No kinmakakej Guézer, 22 Quibzaim uan Bet-Horón. Katkaj naui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

23 Uan ichankauan Dan kinmakakej Eltequé, Guibetón, 24 Ayalón uan Gat-Rimón. Katkaj naui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

25 Uan seki* ichankauan Manasés kinmakakej Taanac uan Gat-Rimón. Katkaj ome uejueyi xolalmej uan ixtauat tein kinyoualoua kampa ueliskia kinpiaskej inintapialuan.

26 Yejua nejin uejueyi xolalmej uan ixtauat tein kinmakakej okseki ichankauan Cohat. Sennochia katkaj majtakti uejueyi xolalmej uan ixtauat tein kinyoualoua kampa ueliskia kinpiaskej inintapialuan.

27 Uan okseki* ichankauan Manasés kinmakakej levitas akin katkaj ichankauan Guersón ome uejueyi xolalmej uan ixtauat tein kinyoualoua kampa ueliskia kinpiaskej inintapialuan. Kinmakakej Golán tein poui Basán uan Beesterá. Golán se ueyi xolal kampa aksa ueli choloua komo temiktia.

28 Uan ichankauan Isacar kinmakakej Quisión, Daberat, 29 Jarmut uan En-Ganim. Katkaj naui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

30 Uan ichankauan Aser kinmakakej Misal, Abdón, 31 Helcat uan Rehob. Katkaj naui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

32 Uan ichankauan Neftalí kinmakakej eyi uejueyi xolalmej uan ixtauat tein kinyoualoua kampa ueliskia kinpiaskej inintapialuan. Kinmakakej Quedes tein yetok ompa Galilea, Hamot-Dor uan Cartán. Quedes se ueyi xolal kampa aksa ueli choloua komo temiktia.

33 Yejua nejin uejueyi xolalmej uan ixtauat tein kinmajmakakej ichankauan Guersón por familias. Sennochia katkaj 13 uejueyi xolalmej uan ixtauat tein kinyoualoua kampa ueliskia kinpiaskej inintapialuan.

34 Ichankauan Zabulón kinmakakej levitas akin ichankauan Merarí nejin uejueyi xolalmej: Jocneam, Cartá, 35 Dimná uan Nahalal. Katkaj naui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

36 Uan ichankauan Rubén kinmakakej Bézer, Jáhaz, 37 Quedemot uan Mefaat. Katkaj naui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

38 Uan ichankauan Gad kinmakakej Ramot tein yetok Galaad uan Mahanaim. Ramot se ueyi xolal kampa aksa ueli choloua komo temiktia. 39 No kinmakakej Hesbón uan Jazer. Katkaj naui uejueyi xolalmej uan ixtauat tein kinyoualoua kampa ueliskia kinpiaskej inintapialuan.

40 Yejua nejin uejueyi xolalmej tein kinmajmakakej levitas akin ichankauan Merarí por familias. Yejuan poliuiaok kintaxejxelouiliskej. Sennochia kinmakakej 12 uejueyi xolalmej.

41 Israelitas kinmakakej levitas 48 uejueyi xolalmej tein yetokej kampa kintaxejxelouilijkej israelitas. No kinmakakej ixtauat tein kinyoualoua kampa ueliskia kinpiaskej inintapialuan. 42 Nochi nejon uejueyi xolalmej kinyoualoua ixtauat kampa ueliskia kinpiaskej inintapialuan.

43 Jehová kinmakak israelitas nochi in talmej tein motenkaujka iniuan ininuejkaujtatuan ke kinmakaskia. Israelitas moaxkatilijkej nejon talmej uan ompa mokaltalijkej. 44 Uan no, Jehová kichiuak maj kualtsin nemikan ompa, ijkon kemej motenkaujka iniuan ininuejkaujtatuan. Uan akin kinixnamikiaj amo uelik kintankej. Jehová kinpaleuij israelitas maj kintanikan akin kinixnamikiaj. 45 Jehová kichiuak nochi tein motenkaujka iniuan israelitas. Kichiuak nochi tein kiniluijka.

22 Satepan, Josué kinsentilij ichankauan Rubén, ichankauan Gad uan seki* ichankauan Manasés, 2 uan kiniluij: “Namejuan nankichiujkej nochi tein Moisés, itekitikauj Jehová namechnauatij. Uan no nankichiujkej nochi tein nejua namechnauatij. 3 Nochi nejin xiujmej nankinpaleuijkej okseki israelitas* uan nankisentokaj nankinpaleuiaj. No nankichiujkej tein toDios Jehová tanauatij. 4 ToDios Jehová kichiuak maj okseki israelitas kualtsin nemikanya, ijkon kemej motenkaujka. Yejua ika, axkan uelisya namokepaskej oksekopa* den ueyiat Jordán kampa nankitalijkej namokaltsitsin.* Ompa namechtaxelouilij Moisés, itekitikauj Jehová. 5 Sayoj ke amo xikixpanauikan nion se taman tein kijtoua Tanauatil tein namechmakak Moisés, itekitikauj Jehová. Xiktasojtakan toDios Jehová, nochipa xikchiuakan tein kineki, xiktakamatikan tein tanauatia, amo keman xikauakan uan xiknextikan ke yekmelauj nankinekij nankitekitiliskej”.*

6 Satepan Josué kitajtanij Dios maj kintatiochiui uejueyi kalyetonij akin kinsentilijka, uan yejuan mokepkej kampa kitalijkaj ininkaltsitsin. 7 Moisés kinxejxelouilijka talmej seki* ichankauan Manasés ompa Basán. Uan Josué kinmakak talmej okseki* ichankauan Manasés nikampa* den ueyiat Jordán. Ompa no kintaxejxelouilijkaj okseki israelitas.* Uan no, keman Josué kiniluij maj mokepakan kampa kitalijkaj ininkaltsitsin, kitajtanij Dios maj kintatiochiui. 8 Uan kiniluij: “Ximokepakan kampa yetokej namokaltsitsin uan xikuikakan tein nankinkuilijkej akin namechixnamikiaj. Xikuikakan tapialmej, plata, oro, cobre, tepos uan tasal.* Uan no xikinxejxelouilikan okseki israelitas* akin mokaujkej”.

9 Ichankauan Rubén, ichankauan Gad uan seki* ichankauan Manasés kinkaujteujkej okseki israelitas akin yetoyaj Siló ompa Canaán. Yejuan mokepkej Galaad kampa kintaxejxelouilijkaj. Jehová kinauatijka Moisés maj kinmakani nejon tal, uan yejuan ompa mokaltalijkaj. 10 Keman ichankauan Rubén, ichankauan Gad uan ichankauan Manasés ajsikej atenoj den ueyiat Jordán tein yetok Canaán, kichijchiujkej se altar. Nejon altar tel ueyi katka. 11 Satepan, okseki israelitas kitekakilijkej nejin: “Ichankauan Rubén, ichankauan Gad uan seki ichankauan Manasés kichijchiujkej se altar kampa peua tal tein techmakakej nikan Canaán, nikampa den ueyiat Jordán”. 12 Keman israelitas kimatkej nejon, nochin mosentilijkej ompa Siló para yaskej kinteuitiuij.

13 Yejua ika israelitas kititankej Finehás, ikoneuj tiopixkat Eleazar, maj kinitati ichankauan Rubén, ichankauan Gad uan seki ichankauan Manasés ompa Galaad. 14 Majtakti taixyekananij israelitas iuan yajkej. Nejon takamej taixyekanayaj itech sejse uejueyi kalyetonij uan kinixyekanayaj uejueyi familias kampa pouiaj mil israelitas. 15 Yejuan ajsikej Galaad kampa yetoyaj ichankauan Rubén, ichankauan Gad uan seki ichankauan Manasés uan kiniluijkej:

16 “Nochin israelitas akin pouij itech ixolal Jehová kijtouaj: ‘¿Keyej nantajtakolchiujkej? Amo nankitakamatkej toDios* Jehová porin nankichijchiujkej se altar uan nankiixnamikkej Jehová. 17 ¿Amo nankielnamikij tein panok ompa Peor? Jehová techtatsakuiltij porin titajtakolchiujkej uan hasta axkan tiksentokaj titajyouiaj. 18 Uan maski panok nejon, namejuan oksepa nankinekij nankiixnamikiskej Jehová. Komo nankiixnamikij, Jehová kualantikisas iniuan nochin israelitas. 19 Sayoj ke komo nankinemiliaj ke Dios kiita ke tal kampa nanemij amo chipauak,* uan yejua ika nankichijchiujkej okse altar tein toDios Jehová amo tanauatij maj tikchijchiuakan, ximokaltalikij itech tal tein iaxka Jehová uan touan xinemikan. Ompa yetok ikaltsin Jehová kampa tikueyichiuaj.* Sayoj ke amo xikixnamikikan Jehová uan amo xikchiuakan maj kinemili ke tinochin tikixnamikij. 20 ¿Amo nankielnamikij tein panok keman Acán ikoneuj Zérah tajtakolchiuak? Dios kualanik iniuan nochin israelitas porin Acán kiichtekik seki taman tein monekia kiixpoloskej, uan amo sayoj yejua mikik’”.

21 Uan ichankauan Rubén, ichankauan Gad uan seki ichankauan Manasés kinnankilijkej taixyekananij israelitas: 22 “¡Jehová, Dios akin chikauak kimati nochi! ¡Kemaj, Jehová Dios akin chikauak kimati keyej ijkon tikchiujkej! Dios kimati uan namejuan no nankimatiskej. Maj Jehová amo techmakixti komo tikixnamikkej uan amo tiktakamatkej. 23 Komo tikchijchiujkej se altar porin amo tiknekij tikueyichiuaskej Jehová uan para ompa tikinueyichiuaskej tatadiosmej* uan tikinmaktiliskej miak taman, Jehová techtatsakuiltis porin amo tiktakamatkej. 24 Sayoj ke amo yejua ika tikchijchiujkej, ta tikchijchiujkej porin tiknemilijkej ke satepan namokoneuan kiniluiskej tokoneuan: ‘Namejuan amo moneki touan nankiueyichiuaskej Jehová, ininDios israelitas. 25 Jehová kichiuak maj ueyiat Jordán techxelo. Namejuan, ichankauan Rubén uan ichankauan Gad, amo moneki nankiueyichiuaskej Jehová’. Uan namokoneuan amo kinkauaskej tokoneuan maj kiueyichiuakan Jehová.

26 ”Yejua ika timoiluijkej: ‘Maj tikchijchiuakan se altar, sayoj ke amo tikuiskej para ompa tiktemaktiskej miak taman, 27 ta kinextis ke tiknekij tiktekitiliskej Jehová. Uan no kinextis ke tiknekij tikchichinouiliskej tapialmej uan okseki taman para tikueyichiuaskej. Nejon altar namechmatiltis namejuan uan tokoneuan* ke ijkon tikchiuaskej. Uan satepan namokoneuan amo kiniluiskej tokoneuan: “Namejuan amo moneki nankiueyichiuaskej Jehová”’. 28 Yejua ika timoiluijkej: ‘Komo satepan yejuan techiluiaj nejon uan no kiniluiaj tokoneuan,* tejuan tikiniluiskej: “Xikitakan altar tein touejkaujtatuan kichijchiuilijkej Jehová. Nejin altar chijchiujtok kemej altar tein axkan yetok Siló. Nejin altar amo kichijchiujkej para tikinueyichiuaskej tatadiosmej* uan tikinmaktiliskej miak taman, ta techelnamiktia ke tejuan tiktekitiliskej Dios”’. 29 ¡Tejuan amo keman tikchijchiuaskiaj se altar para tikinueyichiuaskej tatadiosmej* uan tikinmaktiliskej miak taman, porin toDios Jehová kipia ialtar itech kaltsin kampa tikueyichiuaj. Amo keman tikixnamikiskiaj Jehová nion tikauaskiaj Jehová!”.

30 Tiopixkat Finehás uan takamej israelitas akin kinixyekanayaj ininchankauan kiuelitakej tein kijtojkej ichankauan Rubén, ichankauan Gad uan seki ichankauan Manasés. 31 Yejua ika Finehás ikoneuj tiopixkat Eleazar kiniluij ichankauan Rubén, ichankauan Gad uan seki ichankauan Manasés: “Axkan tikmatij ke Jehová touan yetok porin amo nankiixnamikkej Jehová. Yejua ika Jehová amo techtatsakuiltis”.

32 Satepan, Finehás ikoneuj tiopixkat Eleazar uan taixyekananij israelitas mokepkej Canaán. Yejuan kiniluitoj okseki israelitas tein kiniluijkej ichankauan Rubén uan ichankauan Gad ompa Galaad. 33 Israelitas kiuelitakej tein kiniluijkej uan kiueyichiujkej Dios. Uan amo kinemilijkejok kinteuitiuij ichankauan Rubén uan ichankauan Gad para kinixpoloskej.

34 Uan ichankauan Rubén uan ichankauan Gad kitalilijkej se tokayit altar* tein kichijchiujkaj, porin kinextia ke Jehová yejua yekmelauj Dios.

23 Israelitas kualtsin nemiaj porin Jehová kinpaleuijka maj kinixpolouanij akin kinixnamikiaj. Miak xiujmej satepan keman Josué semi tatajtsinya katka uan amo uejkaua yaya momikilitia, 2 kinsentilij nochin israelitas. No kinsentilij taixyekananij israelitas, jueces uan ueyichiuanimej uan kiniluij: “Semi nitatajtsinya uan amo uejkaua nimomikilitia. 3 Uan namejuan nankiitakej keniuj toDios Jehová namechpaleuij keman kinixpoloj nochin akin nemiaj itech nejin altepemej. Jehová namechpaleuij xikintanikan. 4 Tikinixpolojkej nochin akin nemiaj nikampa* den ueyiat Jordán hasta mar Mediterráneo uan nejua namechtaxejxelouilij ijkon kemej nesik keman tiktatamotkej tetsitsin.* Nochi nejon talmej namoaxka maski sekin ompa nemijok. 5 Uan toDios Jehová kinkixtijtiajki akin ompa nemiaj uan kintalkuilij para ompa xinemikan. ToDios Jehová motenkaujka ke ijkon kichiuaskia.

6 ”Amo ximouikan uan xiktakamatikan nochi tein ijkuiliujtok itech Tanauatil tein namechmakak Moisés. Amo xikixpanauikan nion se tanauatil. 7 Amo ximouikakan iniuan akin nemijok itech nejin altepemej. Amo xikintokaytikan inintatadiosuan* nion xikijtokan ke nankichiuaskej teisa inintokaykopa. Amo xikintekitilikan nion xikinueyichiuakan. 8 Nochipa xiktekitilikan sayoj toDios Jehová ijkon kemej nankichiuanij hasta axkan. 9 Akin nemij itech uejueyi altepemej kinpiaj soldados akin semi kuali tateuiaj, sayoj ke Jehová kintalkuilis nochin akin ompa nemij. Hasta axkan amo akin namechtanini keman iniuan namoteuianij. 10 Uan sayoj se de namejuan kintanis mil akin namechixnamikiskej, porin toDios Jehová namechpaleuis xitatanikan ijkon kemej motenkauak. 11 Yejua ika nochipa xiknextikan ke nankitasojtaj toDios Jehová uan amo xikchiuakan tein amo kuali.

12 ”Sayoj ke komo amo nankitakamatijok Dios uan namouikaj iniuan akin mokauajok itech nejin altepemej, komo nankinnajnamiktiaj namokoneuan iniuan ininkoneuan uan miak taman nankichiuaj iniuan, 13 xikyekmatikan ke toDios Jehová amo namechpaleuisok xikintalkuilikan akin nikan nemij. Yejuan kichiuaskej xiixpoliuikan uan amo xinemikanok itech nejin kualtsin tal tein toDios Jehová namechmakak porin mochiuaskej kemej se trampa, kemej se kuetaxmekat tein nochipa ika namechpankuetaxuijtoskej* uan mochiuaskej kemej uitsti tein namechixtsojtsoponijtos.

14 ”Nejua amo niuejkauatiok uan namejuan kuali nankimatij* ke mochiuak nochi tein toDios Jehová motenkaujka. Kichiuak nochi tein namechiluijka ke kichiuaskia para namechpaleuis. Nochi tein namechiluij, mochiuak. 15 Ijkon kemej toDios Jehová kichiuak nochi tein motenkaujka para namechpaleuis, no ijkon Jehová kichiuas maj namechpano tein amo kuali tein kijtojka. Namechixpolos uan amo nanemiskejok itech nejin kualtsin tal tein toDios Jehová namechmakak. 16 Jehová semi kualanis namouan uan namechixpolojtiuetsis komo amo nankitakamatij tein toDios Jehová namechnauatij uan komo nankintekitiliaj uan nankinueyichiuaj tatadiosmej.* Uan amo nanemiskejok itech nejin kualtsin tal tein namechmakak”.

24 Josué kinsentilij nochin uejueyi kalyetonij israelitas. Uan kiniluij maj motokikan taixyekananij israelitas, jueces uan uejueyi chiuanimej. Yejuan motokijkej para kikakiskej tein toTajtsin Dios kiniluiskia. 2 Josué kiniluij nochin israelitas: “ToDios* Jehová kijtoua: ‘Namouejkaujtatuan nemiaj oksekopa den ueyiat Éufrates. No ompa nemia namouejkaujtat Taré inintat Abrahán uan Nacor, uan nochin yejuan kinueyichiuayaj tatadiosmej.*

3 ”’Keman namouejkaujtat Abrahán nemia oksekopa den ueyiat Éufrates niknauatij maj kisa de ompa uan maj yajtinemi nochi Canaán. Nikchiuak maj kinpia konemej uan maj momiakilikan. Niktatiochiuij uan yolik Isaac. 4 No niktatiochiuij Isaac uan yolkej Jacob uan Esaú. Esaú nikmakak tepet Seír; uan Jacob uan ikoneuan yajkej Egipto. 5 Satepan nikintitanik Moisés uan Aarón maj namechpaleuitij uan akin nemiaj Egipto nikintatsakuiltij ika miak taman. Ijkon namechkixtij de ompa. 6 Keman nikinkixtijtoya namotatuan de Egipto, egipcios motalojkej uan kintokatiajkej hasta mar Rojo ika inincarros tein kikuiaj keman tateuiayaj uan ika inincaballos. Uan keman ajsikej atenoj 7 namotatuan peuak nechtataujtiaj maj nikinpaleui. Uan nejua, Jehová, nikchiuak maj tatayouayantia ika se mixti para maj egipcios amo teyi kinchiuilianij. Satepan nikchiuak maj mar kintsonpacho egipcios uan yejuan mikkej. Yejuan kiitakej nochi tein nikinchiuilij egipcios. Uan satepan nanenkej taluakyan miak xiujmej.

8 ”’Namechuikak oksekopa* den ueyiat Jordán kampa nemiaj amorreos. Yejuan namechteuijkej, sayoj ke namechpaleuij xikintanikan. Nejua nikinixpoloj para ueliskia nankintalkuiliskej. 9 Satepan namechixnamikik tekiuaj Balac akin taixyekanaya Moab. Yejua katka ikoneuj Zipor. Balac kintitanik seki takamej maj kinotsatij Balaam ikoneuj Beor para maj kitajtaniani Dios maj namechpano tein amo kuali. 10 Sayoj ke amo niknekik nikakis Balaam. Yejua ika nikchiuak maj miakpa namechtiochiua uan amo teyi namechpanok.

11 ”’Satepan nankipanauijkej ueyiat Jordán. Uan keman nanajsikej Jericó namechixnamikkej akin taixyekanayaj ompa. Uan no namechixnamikkej amorreos, perizitas, cananeos, hititas, guirgaseos, heveos uan jebuseos. Sayoj ke nejua namechpaleuij xikintanikan. 12 Nikchiuak maj semi mouikan* uan maj cholokan, ijkon kemej kichiujkej ome tekiuanij akin kinixyekanayaj amorreos. Nion namomachete tein ojkan tenej* nion namoarco* namechpaleuij xitatanikan. 13 Ijkon nikchiuak ximoaxkatilikan in talmej kampa axkan nanemij. Amo namejuan namochikaujkej para nankipiaskej nejon talmej nion namejuan nankinchijchiujkej uejueyi xolalmej. Uan axkan nankikuajtokejya uvas uan tein kitemaka olivojkouit, maski amo namejuan nankitokkejʼ.

14 ”Yejua ika xikmojkatokakan Jehová. Xiktekitilikan ika nochi namoyolo uan yekmelauj ijkon xikchiuakan. Xikinixpolokan tatadiosmej* tein namouejkaujtatuan kinueyichiujkej oksekopa den ueyiat Éufrates uan keman yetoyaj Egipto. Xikixtalikan nankitekitiliskej Jehová. 15 Sayoj ke komo amo nankinekij nankitekitiliskej Jehová, axkanya xikixtalikan akoni nankitekitiliskej. ¿Nankinekij nankintekitiliskej tatadiosmej tein namouejkaujtatuan kinueyichiujkej oksekopa den ueyiat Éufrates? ¿Oso nankinekij nankintekitiliskej tatadiosmej tein kinueyichiuaj amorreos akin ininaxka tal kampa nanemij? Sayoj ke xikyekmatikan ke nejua uan nochankauan tiktekitiliskej Jehová”.

16 Uan israelitas kijtojkej: “Amo keman tiknemiliskiaj tikixtopeuaskej Jehová uan tikintekitiliskej tatadiosmej.* 17 ToDios Jehová techkixtij de Egipto kampa semi techtekitiltiayaj uan no kinkixtij totatuan. Tikitakej keniuj kichiuak uejueyi milagros uan techpaleuij maj amo teyi techpanouani kampa tipanotiajkej. No techpaleuij maj amo teyi techchiuilianij akin nemiaj itech xolalmej kampa tipanokej. 18 Jehová kinixpoloj nochin akin nemiaj itech nejon xolalmej, hasta amorreos akin nemiaj itech nejin tal. Yejua ika, tejuan no tiktekitiliskej Jehová porin yejua toDios”.

19 Uan Josué kiniluij israelitas: “¿Yekmelauj uelis nankisentokaskej nankitekitiliskej Jehová? Porin yejua se Dios yektik uan kineki maj sayoj yejua se kiueyichiua. Amo namechtapojpoluis komo nankiixnamikij nion komo nantajtakolchiuaj. 20 Komo nankiixtopeuaj Jehová uan nankinueyichiuaj tatadiosmej,* yejua namechtatsakuiltis uan namechixpolos maski achto kichiuak miak taman para namechpaleuis”.

21 Sayoj ke israelitas kiluijkej Josué: “¡Amo tikchiuaskej nejon, ta tejuan tiktekitiliskej Jehová!”. 22 Uan Josué kiniluij: “Namejuan nankiyekijtojkejya ke nankitekitiliskej Jehová. Amo akin namechchikaujkauij, ta namejuan ijkon nankiixtalijkej”. Uan israelitas kijtojkej: “Kemaj, tejuan tikijtojkej”.

23 Uan Josué kiniluij: “Komo ijkon, xikinixpolokan tatadiosmej* tein yetokejok kampa nanemij uan sayoj xikueyichiuakan* toDios* Jehová”. 24 Israelitas kiluijkej Josué: “¡Tiktekitiliskej toDios Jehová uan tiktakamatiskej!”.

25 Ijkuak, Josué uan israelitas motenkaujkej kitekitiliskej Dios. Uan Josué kiixtalij kemej se tanauatil nochi tein israelitas motenkaujkej ompa Siquem ke kichiuaskej. 26 Uan Josué kijkuiloj itech amatajkuilol tein kipia iTanauatil Dios nochi tein kijtojkej uan tein kichiujkej. Satepan kitalij se ueyi tet itampa se ueyi kouit. Nejon ueyi kouit yetok itech se cacho tal tein kixelojkej para Jehová.

27 Uan Josué no kiniluij israelitas: “Nejin tet techpaleuis maj tikelnamikikan tein tikakkej axkan, porin kemej yeskia no kikakik nochi tein Jehová techiluij. Uan nejin tet namechpaleuis xikelnamikikan tein nikan nankijtojkej para amo xikixtopeuakan toDios”. 28 Satepan, Josué kiniluij israelitas maj yakan itech talmej kampa kintaxejxelouilijkaj uan yejuan yajkej.

29 Satepan, Josué itekitikauj Jehová momikilij keman kipiaya 110 xiujmej. Yejua katka ikoneuj Nun. 30 Uan kitokatoj ompa Timnat-Sérah kampa kitaxelouilijkaj. Nejin tal yetok kampa tepeyoj kampa kintaxejxelouilijkej ichankauan Efraín, ajkokopa den tepet Gaas. 31 Keman Josué yoltoyaok, israelitas kitekitilijkej Jehová uan kisentokakej kitekitilijkej keman yoltoyajok taixyekananij israelitas, satepan ke Josué ipa momikilijkaya. Nejon taixyekananij kiitakaj nochi tein Jehová kichiujka para kinpaleuis israelitas.

32 Iomiyouan José tein israelitas kiualkuikaj de Egipto kitokkej itech tal tein Jacob kikoujka ompa Siquem. Nejon tal kinkouilijka ikoneuan Hamor itat Siquem ika se kilo* plata. Nejon tal yetok kampa kintaxejxelouilijkaj ikoneuan José.

33 No mikik Eleazar ikoneuj Aarón uan kitokkej itech tepetsin tein kimakakaj Finehás. Finehás katka ikoneuj Eleazar. Nejon tepetsin yetok kampa tepeyoj kampa kintaxejxelouilijkej ichankauan Efraín.