JUECES

1 Satepan ke Josué momikilij, israelitas kiluijkej Jehová: “Xitechilui akonimej maj achto yakan kinteuitij cananeos”. 2 Jehová kiniluij: “Achto yaskej ichankauan Judá. Nejua namechmakati nochi inintal cananeos”. 3 Ichankauan Judá kiniluijkej ichankauan Simeón akin katkaj ininparientes: “Xitechpaleuikan maj tikinteuitij cananeos para uelis timoaxkatiliskej tal tein techmakakej.* Satepan tejuan tiaskej tamechpaleuitiuij para uelis namoaxkatiliskej tal tein namechmakakej”. Yejua ika, ichankauan Simeón kinpaleuitoj ichankauan Judá.

4 Keman ichankauan Judá yajkej tateuitoj, Jehová kinpaleuij maj kintanikan cananeos uan perizitas. Kinmiktijkej 10 mil takamej ompa Bézec. 5 Keman kintankej cananeos uan perizitas, no kiajsikej tekiuaj Adoni-Bézec ompa Bézec. Israelitas moteuijkej iuan Adoni-Bézec uan isoldados. 6 Keman Adoni-Bézec choloj, kitokatiajkej uan kikitskijkej. Satepan kitekilijkej imajpiluan uan iikxipiluan tein tomaujkej. 7 Adoni-Bézec kijtoj: “Nejua nitanauatijka maj 70 tekiuanij kintekilikan ininmajpiluan uan ininikxipiluan tein tomaujkej, uan yejuan kiololouayaj tein uetsia de nomesa uan kikuayaj. Axkan Dios no nechchiuilij tein nikinchiuilijka nejon tekiuanij”. Satepan kiuikakej Jerusalén uan ompa mikik.

8 Uan ichankauan Judá kinteuijkej akin nemiaj Jerusalén uan kintankej. Kinmiktijkej ika ininmachete tein ojkan tenej* uan kitikuiltijkej ueyi xolal. 9 Satepan, ichankauan Judá kinteuitoj cananeos akin nemiaj kampa tepeyoj, tein moixmati kemej Négueb uan Sefelá. 10 No kinteuitoj cananeos akin nemiaj Hebrón. (Hebrón achto motokaytiaya Quiryat-Arbá). Uan ichankauan Judá kintankej Sesái, Ahimán uan Talmái.

11 Satepan yajkej kinteuitoj akin nemiaj Debir. (Ueyi xolal Debir achto motokaytiaya Quiryat-Séfer). 12 Uan Caleb kijtoj: “Takat akin kintanis akin nemij Quiryat-Séfer, nikauas maj monamikti iuan nosiuapil Acsá”. 13 Uan Otniel ikoneuj Quenaz kintanik akin ompa nemiaj. Yejua ika Caleb kikauak maj monamikti iuan isiuapil. Quenaz katka iikniuj Caleb uan Caleb tayekanaya. 14 Keman Acsá yajtoyaya kampa nemiskia iuan Otniel, kitataujtij itakatsin maj kitajtani Caleb maj kimaka se tal. Acsá temok de iburro* uan Caleb kitajtanij:* “¿Toni tikneki?”. 15 Yejua kiluij: “Nimitstataujtia xinechtayokoliok teisa. Tinechmakakya se tal ompa Négueb, sayoj ke no nikneki xinechmaka Gulot-Maim”.* Yejua ika Caleb kimakak Gulot Alto uan Gulot Bajo.

16 Quenitas uan ichankauan Judá kiskej de Jericó* uan yajkej taluakyan tein yetok Judá. Nejin taluakyan amo uejka yetok den ueyi xolal Arad. Quenitas ompa yajkej uan mokaltalijkej iniuan akin ompa nemiaj. Yejuan katkaj ichankauan imontat Moisés. 17 Sayoj ke ichankauan Judá uan ichankauan Simeón akin katkaj parientes, yajkej kinteuitoj cananeos akin nemiaj Zefat uan kitamiixpolojkej ueyi xolal. Yejua ika kitokaytijkej Hormá* nejon ueyi xolal. 18 Satepan, ichankauan Judá moaxkatilijkej Gaza, Asquelón uan Ecrón, uan nochi in xolalmej tein ompa pouiaj. 19 Jehová kisentokaya kinpaleuiaya ichankauan Judá uan yejuan moaxkatilijkej talmej tein yetokej kampa tepeyoj. Sayoj ke amo uelik kintalkuilijkej akin nemiaj kampa tamanis* porin kipiayaj carros tein kikuiaj keman tateuiayaj uan ininruedas kipiayaj machetes tein ojkan tenej.* 20 Caleb kimakakej talmej tein yetokej Hebrón ijkon kemej Moisés kijtojka uan kintalkuilij eyi ikoneuan Anac.

21 Sayoj ke ichankauan Benjamín amo uelik kintalkuilijkej jebuseos akin nemiaj Jerusalén. Yejua ika jebuseos kisentokaj nemij ompa Jerusalén iniuan ichankauan Benjamín hasta axkan.

22 Uan no, ichankauan José kinteuitoj akin nemiaj Betel uan Jehová kinpaleuiaya. 23 Ichankauan José kintitankej seki takamej maj tapijpiatij ompa Betel. (Nejin ueyi xolal achto moixmatia kemej Luz). 24 Keman tapijpianij ajsikej, kiitakej se takat akin kistiaya den ueyi xolal uan kiluijkej: “Xitechnextili kanika uelis tikalakiskej itech ueyi xolal uan timitsikneliskej”.* 25 Takat kinnextilij kanika kalakiskiaj. Uan ichankauan José kalakitoj uan kinmiktijkej akin ompa nemiaj ika ininmachete tein ojkan tenej.* Sayoj kikaujkej maj cholo nejon takat iniuan nochin ichankauan. 26 Takat yajki mokaltalito itech tal tein katka ininaxka ichankauan Het. Kichijchiuak se ueyi xolal uan kitokaytij Luz. Nejon ueyi xolal ijkon moixmati hasta axkan.

27 Ichankauan Manasés amo kinixpolojkej akin nemiaj Bet-Seán, Taanac, Dor, Ibleam uan Meguidó nion akin nemiaj itech xolaltsitsin tein ompa pouij. Cananeos amo kinekkej kisaskej de ompa. 28 Keman soldados israelitas miakiakej, semi kintekitiltijkej cananeos. Sayoj ke amo uelik senkis kintalkuilijkej.

29 Ichankauan Efraín amo no kintalkuilijkej cananeos akin nemiaj Guézer. Yejuan kisentokaj nemij iniuan ichankauan Efraín ompa Guézer.

30 Ichankauan Zabulón amo no kintalkuilijkej akin nemiaj Quitrón nion akin nemiaj Nahalol, sayoj ke semi kintekitiltijkej. Nejon cananeos kisentokaj nemij iniuan ichankauan Zabulón.

31 Ichankauan Aser amo no kintalkuilijkej akin nemiaj Akkó, Sidón, Ahlab, Aczib, Helbá, Afic uan Rehob. 32 Yejua ika, kemej amo kintalkuilijkej cananeos akin nemiaj ompa, ichankauan Aser mokaltalijkej iniuan.

33 Ichankauan Neftalí amo kintalkuilijkej cananeos akin nemiaj Bet-Semes uan Bet-Anat. Mokaltalijkej iniuan cananeos akin ompa nemiaj. Sayoj ke semi kintekitiltijkej cananeos akin nemiaj Bet-Semes uan Bet-Anat.

34 Ichankauan Dan nemiaj kampa tepeyoj. Uan amo uelik temokej kampa tal tamanis* porin amorreos amo kinkaujkej. 35 Amorreos amo kinekkej kisaskej, ta kisentokaj nemij itech tepet Heres, itech ueyi xolal Ayalón uan Saalbim. Sayoj ke keman miakiakej soldados akin pouiaj iniuan ichankauan José, semi kintekitiltijkej amorreos. 36 Inintal amorreos peuaya desde Acrabim kampa tejkolis* uan oksekopa peuaya Sela uan pankisaya kampa tepeyoj.

2 Iángel Jehová tein monextijka Guilgal yajki Bokim uan kiniluij israelitas: “Namechkixtij de Egipto uan namechualkuik hasta nejin tal tein nikiniluijka namouejkaujtatuan ke nikinmakaskia. Uan namechiluijka ke nochipa nikchiuas tein nimotenkauak namouan. 2 Sayoj ke namejuan amo monekia namotenkauaskej iniuan akin nikan nemij ke amo nankinteuiskiaj, uan monekia nankinixpoloskej ininaltares. Sayoj ke amo ijkon nankichiujkej, ¿keyej amo nanechtakamatkej? 3 Yejua ika no namechiluij: ‘Amo namechpaleuisok xikinixpolokan akin nikan nemij. Yejuan mochiuaskej kemej se trampa uan namechtanejnektiskej para xikinueyichiuakan inintatadiosuan’”.*

4 Keman iángel Jehová tamitajtoj, nochin israelitas peuak chokaj. 5 Yejua ika ompa tatokaytijkej Bokim,* uan israelitas kimaktilijkej Jehová miak tapialmej.

6 Keman Josué kiniluij israelitas maj yakanya, nochin yajkej para moaxkatiliskej tal tein kinmakakaj. 7 Keman Josué yoltoyaok, israelitas kitekitilijkej Jehová. Uan kisentokakej kitekitilijkej keman yoltoyajok taixyekananij israelitas. Ijkuak, Josué ipa momikilijkaya. Nejon taixyekananij kiitakaj nochi tein Jehová kichiujka para kinpaleuis israelitas. 8 Josué itekitikauj Jehová, momikilij keman kipiaya 110 xiujmej. Yejua katka ikoneuj Nun. 9 Uan kitokatoj ompa Timnat-Heres kampa kitaxelouilijkaj. Nejin tal yetok kampa tepeyoj kampa kintaxejxelouilijkej ichankauan Efraín, ajkokopa den tepet Gaas. 10 Nochin israelitas akin nenkej keman Josué yoltoyaok, momikilijkej. Panok in tiempo uan yolkej okseki israelitas akin amo kiixmatiaj Jehová nion kimatiaj keniuj kinpaleuijka.

11 Uan israelitas kichiujkej tein Jehová amo kiyolpaktia uan peuak kinueyichiuaj tatadiosmej* tein moixmatij kemej Baal. 12 Kiixtopeujkej Jehová, Dios akin kiueyichiuayaj ininuejkaujtatuan uan akin kinkixtijka de Egipto. Peuak kinueyichiuaj tatadiosmej tein kinueyichiuayaj akin ompaka nemiaj. Motankuaketsayaj ininixpan uan kikualantijkej Jehová. 13 Kiixtopeujkej Jehová uan kiueyichiujkej Baal uan Astoret. 14 Yejua ika Jehová tel kualanik iniuan israelitas uan amo kinpaleuijok. Kikauak maj akin kinixnamikiaj kinkuilianij tein kipiayaj uan maj kintajyouiltianij. Israelitas amo uelikok mopaleuijkej. 15 Jehová kinyekiluijkaya tein kinpanoskia. Yejua ika Jehová amo kinpaleuiaya kampa yeski yayaj, ta kikauaya maj kinpano tein amo kuali ijkon kemej Jehová kiniluijka ke kinpanoskia. Uan israelitas semi tajyouiayaj. 16 Yejua ika Jehová kinixtaliaya jueces para maj kinpaleuianij israelitas maj amo kinkuilianij tein kipiayaj.

17 Sayoj ke nion jueces kinkakiaj, ta kisentokayaj kinueyichiuayaj* tatadiosmej* uan motankuaketsayaj ininixpan. Ininuejkaujtatuan kitakamatkaj tein Jehová kinnauatijka, sayoj ke yejuan amo kichiujkej kemej ininuejkaujtatuan. 18 Israelitas semi chokayaj porin kintajyouiltiayaj, uan Jehová semi kinikneliaya keman kinkakia, yejua ika kinixtaliaya jueces para kinpaleuis. Uan Jehová kipaleuiaya sejse juez. Keman yoltoya juez akin kinixyekanaya, Jehová kinpaleuiaya israelitas uan akin kinixnamikiaj amo teyi kinchiuiliayaj.

19 Sayoj ke keman juez momikiliaya, yejuan oksepa kichiuayaj tein tel amo kuali. Okachi tajtakolchiuayaj ke ininuejkaujtatuan. Kinueyichiuayaj tatadiosmej* uan motankuaketsayaj ininixpan. Kisentokayaj kichiuayaj tein amo kuali uan nion tepitsin takakiaj. 20 Yejua ika Jehová semi kualanik iniuan israelitas uan kijtoj: “Israelitas amo kichiuaj tein nikinnauatijka ininuejkaujtatuan uan amo nechtakamatij. 21 Kemej amo nechtakamatij, nejua amo nikinpaleuis maj kintalkuilikan akin nemij itech altepemej tein mokaujkejok satepan ke Josué momikilij. 22 Nejon nechpaleuis maj nikita ox israelitas kichiuaj tein nejua Jehová nikinnextilij, ijkon kemej kichiujkej ininuejkaujtatuan akin nechtakamatkej”. 23 Yejua ika Jehová amo niman kintalkuilij akin nemiaj itech nejon altepemej uan amo no kipaleuij Josué maj kintalkuili, ta kinkauak maj kisentokakan ompa nemikan.

3 Jehová kikauak maj seki altepemej mokauanijok. Ijkon kiitaskia ox israelitas kitakamatiaj, porin yejuan amo moteuijkaj iniuan akin nemiaj Canaán. 2 (Amo kinixpoloj akin nemiaj itech nejon altepemej para maj israelitas kimatinij keniuj tateuiskej porin yejuan amo keman tateuijtoyaj). 3 Mokauayajok makuil tekiuanij akin kinixyekanayaj filisteos, cananeos, sidonios uan heveos akin nemiaj kampa tepeyoj ompa Líbano, desde tepet Baal-Hermón hasta Lebó-Hamat. 4 Jehová kinkauak nejon altepemej para kiitas ox israelitas kitakamatiskiaj tanauatilmej tein kinmakaka ininuejkaujtatuan. Dios kiluijka Moisés maj kinmatilti israelitas nejon tanauatilmej. 5 Yejua ika israelitas nemiaj iniuan cananeos, hititas, amorreos, perizitas, heveos uan jebuseos. 6 Uan israelitas monamiktiayaj iniuan ininsiuapipiluan akin nemiaj itech nejon altepemej. Uan ininsiuapipiluan israelitas kinnamiktiayaj iniuan ininokichpipiluan. Nejon kichiuak maj israelitas kinueyichiuakan inintatadiosuan.*

7 Israelitas kichiujkej tein Jehová amo kiyolpaktia. Kiixtopeujkej ininDios Jehová uan peuak kinueyichiuaj tatadiosmej* tein moixmatij kemej Baal. No peuak kikuij koujmej para kiueyichiuaskej tiotsin Aserá.* 8 Yejua ika Jehová kualanik iniuan israelitas uan kikauak maj tekiuaj Cusán-Risataim kinteltekitiltiani. Nejin tekiuaj taixyekanaya Mesopotamia.* Uan israelitas kitekitilijkej Cusán-Risataim chikueyi xiuit. 9 Keman israelitas kitataujtijkej Jehová maj kinpaleui, Jehová kiixtalij Otniel, ikoneuj Quenaz maj kinmakixti. Quenaz katka iikniuj Caleb uan Caleb tayekanaya. 10 Jehová kimakak Otniel ichikaualis, uan yejua mochiuak ininjuez israelitas. Otniel kiteuito tekiuaj Cusán-Risataim, akin taixyekanaya Mesopotamia,* uan Jehová kipaleuij Otniel maj kitani. 11 Israelitas kualtsin nenkej 40 xiujmej. Panok in tiempo uan Otniel ikoneuj Quenaz mikik.

12 Uan israelitas oksepa peuak kichiuaj tein Jehová amo kiyolpaktia. Yejua ika Jehová kikauak maj tekiuaj Eglón, akin taixyekanaya Moab kintani israelitas porin kichiujtoyaj tein Jehová amo kiuelita. 13 Uan no, Eglón mokuik iniuan ammonitas uan amalequitas para kinteuiskej israelitas. Uan moaxkatilijkej ueyi xolal Jericó.* 14 Uan israelitas kitekitilijkej Eglón, akin taixyekanaya Moab, 18 xiujmej. 15 Yejua ika kitataujtijkej Jehová maj kinpaleui, uan Jehová kiixtalij Ehúd ikoneuj Guerá maj kinmakixti. Ehúd katka semej ichankauan Benjamín uan katka maopoch. Satepan, israelitas kititankej Ehúd maj kimakati tekiuaj Eglón tomin tein tajtania. 16 Ehúd mochijchiuilij se machete* kemej de 40 centímetros.* Satepan mokesilpilij* uan kitatij* tatampa de itasal.* Moilpilij nejon machete tein ojkan tenej iyekmakopa. 17 Uan kimakak tekiuaj Eglón akin semi tomauak katka tomin tein tajtanka.

18 Keman Ehúd kitamimakak tomin tekiuaj Eglón, mokepak iniuan takamej akin iuan yajkaj kitemakatoj tomin. 19 Keman ajsik Guilgal kampa yetoyaj tatadiosmej* tein kinchijchiujkaj itech tet,* Ehúd mokepak uan oksepa kiitato tekiuaj uan kiluij: “Tekiuaj, nikneki nimitsichtakailuis teisa”. Uan tekiuaj kijtoj: “¡Xikisakan!”.* Uan nochin itakeualuan kiskej. 20 Tekiuaj Eglón iselti tokotsyetoya itech cuarto* tein kipiaya ajko, uan Ehúd kiajsito kampa yetoya uan kiluij: “Dios nechnauatij maj nimitsiluiki teisa”. Keman tekiuaj kikakik nejon, moketsak. 21 Uan Ehúd kikixtij ika iopochmay machete tein ojkan tenej* tein mokesilpilijka,* uan kipoxtokilij tekiuaj. 22 Machete* tamikalakik uan amo nesikook porin tel tomauak katka uan Ehúd amo kikixtilijok. Uan tekiuaj Eglón kuitaxkolkisak.* 23 Ehúd kuali tatsakteuak ika llave uan kisak ventanajkopa. 24 Satepan ke Ehúd kisak, itakeualuan tekiuaj mokepkej uan kiitakej ke kuali tatsaktoya ika llave. Yejua ika moiluijkej: “Xa yajki baño”. 25 Sayoj ke kemej uejkauak kichixtoyaj,* tasematkej. Uan kemej kiitakej ke tekiuaj amo kintatapouiliaya, yejuan tatapojkej ika ininllave. Keman tatapojkej kiitakej ke inintekiuaj Eglón uetstoya talpan porin mikkaya.

26 Ehúd choloj keman takeualmej kinemilijtoyaj toni kichiuaskej. Yejua kinpanauijtikisak tatadiosmej* tein kinchijchiujkaj itech tet* uan kuali ajsito hasta Seirá, 27 tein yetok kampa tepeyoj kampa kintaxejxelouilijkaj ichankauan Efraín. Keman Ehúd ajsik ompa, kipitsak kuaomit uan israelitas mosentilijkej uan iuan temokej. Ehúd kinyekantiaya nochin israelitas. 28 Uan Ehúd kiniluij: “Xinechtojtokakan* porin Jehová namechpaleuis xikintanikan moabitas akin namechtauelitaj”. Israelitas kitojtokakej* Ehúd uan kintsakuilitoj moabitas kampa uelia se kimetspanauiaya ueyiat Jordán para maj amo cholokan. Uan amo akin kikaujkej maj kipanauiani ueyiat. 29 Ijkuak, kinmiktijkej kemej 10 mil moabitas akin katkaj chikaujkej uan amo mouiaj. Israelitas amo kikaujkej maj nion akin cholo. 30 Nejon tonal israelitas kintankej moabitas, uan kualtsin nenkej 80 xiujmej itech tal tein kinmakakej.

31 Uan Samgar ikoneuj Anat kiixpatak Ehúd uan yejua mochiuak juez. Samgar kinmiktij 600 filisteos ika se kouit tenpitstik* tein ika kinpeuaj kuakuejmej. Samgar no kinmakixtij israelitas.

4 Keman Ehúd mikik, israelitas oksepa kichiujkej tein Jehová amo kiyolpaktia. 2 Yejua ika, Jehová kikauak maj tekiuaj Jabín kinteltekitiltiani. Jabín taixyekanaya Canaán uan nemia ompa Hazor. Uan Sísara akin nemia Haróset* kinixyekanaya isoldados Jabín. 3 Jabín kipiaya 900 carros tein kikuia keman tateuiaya uan ininruedas kipiayaj machetes tein ojkan tenej.* Uan 20 xiujmejya semi kintajyouiltijtoya israelitas. Yejua ika israelitas kitataujtijkej Jehová maj kinpaleui.

4 Ijkuak, Débora isiuatsin Lapidot katka tanauatijkej* uan kinmatiltiaya israelitas tein Dios kiixtaliaya keman kipiayaj kuejmolmej. 5 Débora motaliaya itsintan se palmajkouit* tein yetoya tatajko de Ramá uan Betel. Nejin uejueyi xolalmej yetokej kampa tepeyoj kampa kintaxejxelouilijkaj ichankauan Efraín. Uan israelitas ompa yayaj kiitatij keman kipiayaj kuejmolmej para maj kinmatilti tein Dios kiixtaliaya. 6 Débora tanauatij maj kinotsatij Barac ikoneuj Abinoam akin yetoya Quedes. Nejin ueyi xolal yetoya kampa kintaxejxelouilijkej ichankauan Neftalí. Keman Barac ajsik, Débora kiluij: “Jehová, ininDios israelitas mitsnauatia xikchiua nejin: ‘Xiouj tepet Tabor uan xikinuika 10 mil takamej akin pouij iniuan ichankauan Neftalí uan Zabulón. 7 Nejua nikchiuas maj Sísara akin kinixyekana isoldados Jabín youi atauit* tein moixmati kemej Cisón. No nikchiuas maj ompa yakan isoldados uan maj kiuikakan carros tein kikuij keman tateuiaj uan nimitspaleuis xiktani Sísara’”.

8 Keman Barac kikakik tein Débora kiluij, kijtoj: “Nias komo nouan tiouj, sayoj ke komo amo nouan tiouj, amo nias”. 9 Débora kijtoj: “Nias mouan keman titateuitiuj. Sayoj ke Jehová kichiuas maj se siuat kimikti Sísara, yejua ika amo tejua mitsueyitaliskej”. Satepan Débora moketsak uan yajki Quedes iuan Barac. 10 Barac tanauatij maj takamej akin pouiaj iniuan ichankauan Zabulón uan Neftalí mosentilikan ompa Quedes. Yejua ika mosentilijkej 10 mil takamej. Uan Débora no yajki iuan Barac.

11 Héber akin katka quenita, amo mokaltalij iniuan okseki quenitas akin katkaj ichankauan Hobab. Hobab katka imontat Moisés. Héber kitalijka ikaltsin* ompa Zaananim, inakastan se ueyi kouit, tein amo uejka yetok de Quedes.

12 Sísara kimatik ke Barac ikoneuj Abinoam yajki tepet Tabor. 13 Yejua ika niman kinsentilij nochin isoldados uan 900 carros tein kikuiaj para tateuiskej. Nejon carros kipiayaj machetes tein ojkan tenej* itech ininruedas. Nochin yetoyaj Haróset uan mosentilijkej para yaskej atauit* tein moixmati kemej Cisón. 14 Débora kiluij Barac: “Nejin tonal Jehová mitspaleuis xiktani Sísara. Jehová yejua akin mitsixyekana”. Barac yetoya itech tepet Tabor uan temok iniuan 10 mil takamej. 15 Keman Barac kinteuij, Jehová kichiuak maj Sísara uan isoldados amo kimatinijok toni kichiuaskej. Uan kichiuak maj icaballos no momoujtianij. Satepan Sísara temok de icarro uan choloj. 16 Barac motaloj uan kintokatiajki isoldados Sísara hasta Haróset. No kintokatiajki soldados akin yayaj itech carros tein kikuiaj keman tateuiayaj. Uan nochin isoldados Sísara kinmiktijkej ika machete tein ojkan tenej.*

17 Sísara choloj uan ajsik kampa yetoya ikaltsin Jael. Jael katka isiuatsin Héber, akin katka quenita. Ompa yajki porin ichankauan Héber kuali mouikayaj iuan tekiuaj Jabín akin taixyekanaya Hazor. 18 Jael kinamikito Sísara uan kiluij: “Xikalaki nikan noteko. Amo ximoui”. Sísara kalakik itech ikaltsin Jael uan yejua kipankentij se tasal.* 19 Sísara kiluij: “Niamiki, uelis tinechmakas tepitsin at”. Jael kitapoj se kuetaxbolsa tein kipiaya leche, kimakak Sísara uan oksepa kipankentij tasal. 20 Sísara kiluij Jael: “Ximoketsati kaltenoj uan komo aksa* mitstajtaniki* ox aksa yetok nikan, xikilui ke amo”.

21 Sayoj ke Jael, isiuatsin Héber kikuik se kouit tein tenpitstik* uan se martillo uan moichtakatokij kampa kochtoya Sísara. Yejua kuali kochtoya porin semi sioujtoya. Uan Jael kikuatokilij kouit tein tenpitstik uan kouit senpanotikisak uan motokato talpan. Ijkon mikik Sísara.

22 Keman Barac kitemoto Sísara, Jael kinamikito uan kiluij: “Xiuiki uan nimitsuikati kampa yetok takat akin tiktemojtok”. Keman Barac kalakik itech ikaltsin Jael kiitak ke Sísara ipa mikkaya. Kikuatokilijkaj se kouit tein tenpitstik* uan ompa uetstoya.

23 Nejon tonal, Dios kinpaleuij israelitas maj kitanikan tekiuaj Jabín akin taixyekanaya Canaán. 24 Israelitas okachi kiixnamikkej tekiuaj Jabín akin taixyekanaya Canaán uan kiteuijkej hasta ke kimiktijkej.

5 Nejon tonal, Débora cantaroj iuan Barac ikoneuj Abinoam nejin tatsotson:

 3 ¡Xikakikan nejin, tekiuanij! ¡Xikakikan tein nikijtoti, taixyekananij!

Nejua nicantarouiliti Jehová.

Niktatsotsoniliti Jehová, ininDios israelitas.

¡Xikueyichiuakan Jehová!

Uan itekitikauan Jehová temokej kampa yetoyaj puertas den uejueyi xolalmej.

12 ¡Xiijsa* Débora, xiijsa!

¡Xiijsa uan xicantaro!

¡Ximoketsa Barac, ikoneuj Abinoam uan xikinuika akin tikintanik!

Yejua kititankej maj youi tal tamanis* uan nejnemik hasta ompa.

Miakej ichankauan Rubén amo kimatiaj toni kichiuaskej.*

Miakej ichankauan Rubén amo kimatiaj toni kichiuaskej.

sayoj ke amo uelik mokuilijkej nion tepitsin plata.

Nikintsojtsoniksak* takamej akin kuali tateuiayaj.

25 Sísara kitajtanij at uan Jael kimakak leche.

Kimakak leche tein tetsauak itech se kaxit tein kuakualtsin.

¿Keyej ayamo ejko icarro nion mokakij icaballos?’.

Uan israelitas kualtsin nenkej 40 xiujmej.

6 Israelitas oksepa kichiujkej tein Jehová amo kiyolpaktia. Yejua ika Jehová kikauak maj akin nemiaj Madián kintajyouiltianij chikome xiuit. 2 Madianitas semi kintajyouiltijkej israelitas, yejua ika israelitas motatiayaj* itech tepemej,* tepekoyokmej uan kampa tel ouijkan. 3 Nochipa keman israelitas tatokayaj, madianitas, amalequitas uan akin nemiaj kampa ualkisa tonaltsin yayaj kinkuejmolotij. 4 Yejuan ompaka kintaliayaj ininkaltsitsin* para kinteuiskej israelitas. Kiixpolouayaj nochi tein israelitas kitokayaj desde kampa peuaya inintal hasta Gaza. Kinkuiliayaj nochi tein ueliskia kikuaskej. Uan no kinkuiliayaj ininichkauan,* ininkuakuejuan uan ininburros. 5 Madianitas, amalequitas uan akin nemiaj kampa ualkisa tonaltsin semi miakej katkaj kemej yeskia chapolimej. Keman yayaj kampa nemiaj israelitas kinuikayaj nochi inintapialuan uan ininkaltsitsin. No kinuikayaj tel miak camellos tein amo uelia se kinpouaya. Yayaj para kiixpoloskej nochi tein kipiayaj israelitas. 6 Kemej madianitas kintatamilijkej israelitas, yejuan kitataujtijkej Jehová maj kinpaleui.

7 Keman israelitas kitajtanijkej Jehová maj kinpaleui para maj madianitas amo kintajyouiltianijok, 8 Jehová kintitanilij se tanauatijkej.* Yejua kiniluij: “Jehová ininDios israelitas kijtoua nejin: ‘Nejua namechkixtij de Egipto kampa namechteltekitiltiayaj. 9 Namechpaleuij keman egipcios namechtajyouiltijtoyaj uan no namechpaleuij maj amo namechtajyouiltianijok nochin akin namechixnamikiaj. Nikinixpoloj uan namechmakak inintal. 10 Uan namechiluij: “Nejua Jehová namoDios. Amo xikinueyichiuakan inintatadiosuan* amorreos, akin yetokej itech tal kampa namejuan nanemij”. Sayoj ke namejuan amo nanechtakamatkej’”.*

11 Satepan, iángel Jehová motalito itampa ueyi kouit tein yetoya Ofrá. Nejin kouit yetoya ital Joás akin katka ichankauj Abí-Ézer. Gedeón ikoneuj Joás kiuitektoya trigo kampa kipatskaj uvas. Ompa kiuitektoya trigo para maj madianitas amo kiitanij iteyo. 12 Iángel Jehová monextij kampa yetoya Gedeón uan kiluij: “Jehová mitstatiochiuijtok,* soldado akin semi tichikauak”. 13 Gedeón kiluij: “Keyej ijkon tikijtoua noteko, ta komo Jehová techtatiochiuijtoskia amo techpanotoskia nochi nejin. Totatuan techiluijkej ke Dios kichiuak miak taman tein kuali, sayoj ke tejuan amo tikitanij. Yejuan techiluiayaj: ‘Jehová techkixtij de Egipto’. Sayoj ke axkan Jehová amo techpaleuijtok, ta kikauak maj techtajyouiltikan akin nemij Madián”. 14 Jehová kiixitak uan kiluij: “Tejua tichikauak, yejua ika xiouj uan xikinpaleui israelitas para maj madianitas amo kintajyouiltikanok. Xiouj porin nejua nimitstitani”. 15 Uan Gedeón kiluij Jehová: “Sayoj ke nejua amo uelis nikinmakixtis israelitas. Nochankauan amo uejueyi chiuanimej kemej oksekin ichankauan Manasés, uan nejua amo teyi nichiujkej ichan nopaj”. 16 Sayoj ke Jehová kiluij: “Nejua nimitspaleuis uan niman tikintanis madianitas kemej yeskia sayoj setsin iuan timoteuiskia”.

17 Uan Gedeón kiluij: “Komo yekmelauj tinechpaleuiti,* xinechnextili ke yekmelauj tejua tinechnojnotstok. 18 Nimitstataujtia ayamo xiouj. Xinechchia hasta maj nikualkui tein nikneki nimitsmaktilis”. Iángel Dios kiluij: “Nikan nimitschia”. 19 Uan Gedeón yajki kichijchiuato se chivo. No kikuik 11 kilos* de harina para kichijchiuas pantsin tein amo kisamaualtiayaj.* Kitalij nakat itech se chikiuit uan iayo itech se olla. Uan kiuikilij ángel tatampa den ueyi kouit uan kitakualtekij.

20 Iángel toTajtsin Dios kiluij: “Xiktali nakat uan pantsin itech ne ueyi tet uan xikpantekili iayo nakat”. Uan Gedeón ijkon kichiuak. 21 Uan iángel Jehová kitsoponij nakat uan pantsin ika kouit tein maaktoya. Uan itech tet taxotatikisak uan nakat uan pantsin tatak.* Keman panok nejon, iángel Jehová poliujtikisak. 22 Ijkuak, Gedeón kiajsikamatik ke akin monextijka katka iángel Jehová.

Yejua ika kijtoj: “¡¿Toni nechpanos NoUeyi Teko Jehová? Nikixitak iángel Jehová!”. 23 Sayoj ke Jehová kiluij: “Amo ximotekipacho nion ximoui,* porin amo timikis”. 24 Yejua ika Gedeón kichijchiuilij Jehová se altar uan kitokaytij Jehová-Salom.* Nejon altar ijkon kisentoka moixmati hasta axkan uan yetokok Ofrá kampa nemij ichankauan Abí-Ézer.

25 Nejon youak, Jehová kiluij Gedeón: “Xikualkui se kuakuejkonet tein iaxka mopaj, semej kuakuejkonemej* tein kipia chikome xiuit. Satepan xikuejuelo altar tein mopaj kichijchiuilij Baal. No xiktamota kouit tein kikuij para taueyichiuaskej* tein ijkatok inakastan altar. 26 Satepan, xikinnejnepano temej uan xikchijchiua se altar nikan ajko para Jehová moDios. Xiktejteki kouit tein kikuij para taueyichiuaskej uan ompa xiktali kuakouej uan xikchichinouili Dios”. 27 Yejua ika Gedeón kiniluij majtakti itakeualuan maj kipaleuikan uan kichiuak nochi tein Jehová kinauatijka. Sayoj ke amo kichiuak tonayan, ta youak porin kinmouiliaya ichankauan itat uan takamej akin nemiaj itech ueyi xolal.

28 Keman takamej akin nemiaj itech ueyi xolal kualkan meujkej, kiitakej ke aksa* kiuejuelojka ialtar Baal uan kitamotka kouit tein kikuiaj para taueyichiuaskej tein yetoya inakastan. No kiitakej ke kichichinojkaj se kuakouej itech se yankuik altar. 29 Yejua ika kijtojkej: “¿Akoni kichiuak nejin?”. Satepan ke tatsintokakej, kijtojkej: “Nejin kichiuak Gedeón ikoneuj Joás”. 30 Takamej akin nemiaj itech ueyi xolal kiluijkej Joás: “Xikualkui mokoneuj para maj tikmiktikan porin kiuejueloj ialtar Baal, uan kitamotak kouit tein tikuij para titaueyichiuaskej tein yetoya inakastan”. 31 Sayoj ke Joás kinnankilij nejon takamej: “¿Xe moneki nankitajtouiskej Baal? ¿Xe moneki nankipaleuiskej? Akin kitajtouis yekintsin kimiktiskej. Komo Baal yekmelauj se dios maj yejua motajtoui, ta yejua ialtar kiuejuelouilijkej”. 32 Ijkuak, Joás kipatilij itokay Gedeón uan kitokaytij Jerubaal.* Joás kijtouaya: “Maj Baal motajtoui, ta yejua ialtar kiuejuelouilijkej”.

33 Madianitas, amalequitas uan akin nemiaj kampa ualkisa tonaltsin mosentilijkej para kinteuiskej israelitas. Yejuan kipanauijkej ueyiat Jordán uan kitalijkej ininkaltsitsin ompa tal tamanis* tein moixmati kemej Jezreel. 34 Uan Jehová kimakak Gedeón ichikaualis. Yejua kipitsak kuaomit uan ichankauan Abí-Ézer mosentilijkej para kipaleuiskej. 35 Uan no tanauatij maj kinnotsatij okseki takamej akin no ichankauan Manasés uan yejuan ualajkej kipaleuikoj. No kinnotsatoj takamej akin pouiaj iniuan ichankauan Aser, Zabulón uan Neftalí uan yejuan no kipaleuikoj.

36 Satepan Gedeón kiluij toTajtsin Dios: “Komo tinechpaleuiti maj nikinmakixti israelitas ijkon kemej tinechiluijka, 37 xikchiua nejin: nikauati ipantojmiyo se ichkat kampa kichipauaj xinach; komo mosta kualkan nochi tauaktok uan sayoj apaltik ipantojmiyo ichkat, nikmatis ke tinechpaleuiti maj nikinmakixti israelitas ijkon kemej timotenkauak”. 38 Uan keman meuak mostika kualkan, kiitak ke apaliujka* ipantojmiyo ichkat. Kimapatskak uan kisak tel miak at tein ika ueliskia kipexontis* se ueyi kaxit. 39 Sayoj ke Gedeón kiluij toTajtsin Dios: “Nikneki nimitstajtanis okse taman sayoj ke amo xikualani. Nikneki oksepa nikitas ox yekmelauj tinechpaleuiti. Axkan maj tajtanakastan taapaliui* uan sayoj maj amo apaliui ipantojmiyo ichkat”. 40 Uan yejua nejon tein Dios kichiuak nejon youak. Keman tanesik nochi taapaliujka* uan sayoj ipantojmiyo ichkat amo apaliujka.

7 Uan Gedeón akin no moixmatia kemej Jerubaal uan soldados akin iuan yetoyaj kualkantsin meujkej. Yejuan kinketskej ininkaltsitsin* inakastan ameyal* tein moixmati kemej Harod. Madianitas kitalijkaj ininkaltsitsin ajkokopa de kampa yetoyaj israelitas. Yetoyaj inakastan tepet Moré kampa tamanis.* 2 Uan Jehová kiluij Gedeón: “Nantelmiakej, yejua ika amo uelis namechpaleuis xikintanikan madianitas, porin uelis nankijtoskej ke namoselti nankintankej uan ika peuas namoueyimatiskej.* 3 Yejua ika xikinilui mosoldados: ‘Komo aksa* tel moui maj mokepa ichan’”. Gedeón kiniluij nejin para kiitas akonimej tel mouiaj. Yajkej 22 mil takamej uan mokaujkej 10 mil.

4 Sayoj ke Jehová kiluij Gedeón: “Nantelmiakejok. Xikinilui soldados maj temokan kampa onkak at uan ompa nejua nikinijitas.* Komo nimitsiluia ‘Nejin takat mouan yas’, yejua mouan yas. Sayoj ke komo nimitsiluia ‘Nejin takat amo mouan yas’, yejua amo mouan yas”. 5 Yejua ika Gedeón kiniluij soldados maj temokan kampa onkaya at.

Satepan Jehová kiluij Gedeón: “Xikinita akonimej motankuaketsaj uan moixpilouaj para tayiskej at* uan xikinxelo akin amo motankuaketsaj para tayiskej”. 6 Uan 300 soldados amo motankuaketskej para tayiskej at. Nochin okseki soldados motankuaketskej uan moixpilojkej.

7 Uan Jehová kiluij Gedeón: “Nimitspaleuis xikintani madianitas. Mitspaleuiskej 300 soldados akin amo motankuaketskej para tayiskej at. Nochin okseki soldados maj mokepakan ininchan”. 8 Gedeón kiniluij okseki soldados maj mokepakan. Sayoj ke achto ke mokepaskiaj ininchan kinmakateujkej takual uan kuaomimej soldados akin mokaujkej. Sayoj 300 soldados mokaujkej iuan Gedeón. Madianitas yetoyaj kampa tamanis,* tanikopa* de kampa yetoya Gedeón.

9 Nejon youak, Jehová kiluij Gedeón: “Xikinteuiti akin mitsixnamikij porin nimitspaleuiti xikintani. 10 Sayoj ke komo timoui tikinteuitiuj, xiouj kampa yetokej akin namechixnamikij uan xikuika Purá, akin mitspaleuia. 11 Keman tikakis tein kijtojtokej, amo timouisok* tikinteuitiuj”. Gedeón uan Purá, akin kipaleuiaya, motokijkej hasta kampa yetoyaj akin kinixnamikiaj.

12 Madianitas, amalequitas uan akin nemiaj kampa ualkisa tonaltsin sentakuitoyaj itech nochi tamanis,* kemej yeskia tel miak chapolimej. Uan kinpiayaj tel miak camellos tein amo uelia se kinpouaya kemej yeskia xal tein onkak martenoj. 13 Keman Gedeón ajsik kampa yetoyaj akin kinixnamikiaj, kikakik ke se takat kitapouijtoya okse takat tein kikochitaka.* Yejua kiluiaya: “Nikochitak ke se pantsin* youaltik motetekuinojtiualaj* hasta nikan kampa tietokej, uan moteloko* itech se kaltsin. Kemej tel chikauak moteloko, kiixkepak kaltsin uan kiuejueloj”. 14 Uan takat akin kikaktoya kiluij: “Nejon pantsin yejua imachete Gedeón tein ojkan tenej.* Dios kipaleuiti Gedeón ikoneuj Joás akin israelita maj kintani madianitas uan nochin ininsoldados”.

15 Keman Gedeón kikakik tein nejon takat kikochitaka* uan kimatik toni kijtosnekia, motankuaketsak uan peuak kiueyichiua Dios. Satepan mokepak kampa yetoyaj okseki israelitas uan kiniluij: “Tiouij tikinteuitij madianitas porin Jehová techpaleuiti maj tikintanikan”. 16 Gedeón kinxejxeloj nejon 300 soldados uan kintalij ciejcien. Kinmajmakak se kuaomit uan se komit tein taijtik kipiaya okot tein xotatoya. 17 Uan kiniluij: “Xikitakan tein nikchiua uan no ijkon xikchiuakan. Keman niajsis kampa yetokej madianitas, no xikchiuakan tein nejua nikchiuas. 18 Tinochin tikinyoualoskej madianitas, uan keman nejua uan 100 soldados akin nouan youij tikpitsaskej kuaomit, namejuan no moneki nankipitsaskej kuaomit kampa nanijkatoskej. Uan moneki chikauak nankijtoskej: ‘¡Jehová uan Gedeón tateuijtokej!’”.

19 Ajsitoyaya tajkoyouan* keman Gedeón uan 100 soldados akin iuan yayaj ajsikej kampa yetoyaj madianitas. Ijkuak, yekin moixpatakaj tajpianij. Uan Gedeón uan 100 soldados kipitskej kuaomimej uan kitatapatskej konmej tein kiuikayaj. 20 Nochin soldados akin Gedeón kinxejxelojka kipitskej kuaomimej uan kitatapatskej konmej. Ika ininopochmay kikitskijtoyaj okot tein xotatoya uan ika ininyekmay kikitskijtoyaj kuaomit tein kipitstoyaj. Ijkuak chikauak kijtojkej: “¡Jehová uan Gedeón tateuijtokej!”. 21 Soldados israelitas amo moolinijkej, sayoj ke nochin soldados madianitas cholojteujkej uan tsajtsitiayaj keman tsikuintiayaj. 22 Uan 300 soldados kisentokayaj kipitsayaj kuaomimej, uan Jehová kichiuak maj momijmiktianij akin kinixnamikiaj israelitas. Sekin cholojkej hasta Bet-Sitá uan hasta Zererá. Uan ajsitoyajya Abel-Meholá, tein amo uejka yetok de Tabat.

23 Yejua ika Gedeón kinnotsak takamej akin pouiaj iniuan ichankauan Neftalí, Aser uan Manasés. Uan yejuan kintokatiajkej soldados madianitas. 24 Gedeón kintitanik seki takamej maj kinitatij ichankauan Efraín akin nemiaj kampa tepeyoj. Yejuan kiniluitoj: “Xikinteuitij soldados madianitas. Xiajsikan ueyiat Jordán uan ueyiamej tein yetokej Bet-Bará. Ximoketsakan kampa madianitas uelis kimetspanauiskej ueyiat uan amo xikinkauakan maj panokan”. Yejua ika nochin takamej akin pouiaj iniuan ichankauan Efraín mosentilijkej. Satepan yajkej ueyiat Jordán uan ueyiamej tein yetokej Bet-Bará para amo kinkauaskej madianitas maj panokan. 25 Uan kinkitskijkej Oreb uan Zeeb akin taixyekanayaj Madián. Kimiktijkej Oreb itech se ueyi tet tein satepan kitokaytijkej Oreb. Uan Zeeb kimiktijkej kampa kipatskayaj uvas tein satepan moixmatik kemej Zeeb. Israelitas kisentokakej kintokatiajkej madianitas. Satepan kiitatoj Gedeón, akin amo uejka yetoya den ueyiat Jordán, uan kiuikilijkej itsontekon Oreb uan Zeeb.

8 Takamej akin pouiaj iniuan ichankauan Efraín semi kualantoyaj. Yejua ika kiixiluijkej Gedeón: “¿Keyej amo titechiluij ke yaya tikinteuiti madianitas? ¿Keyej ijkon tikchiuak?”. 2 Sayoj ke Gedeón kiniluij ichankauan Efraín: “Tein namejuan nankichiujkej okachi kuali ke tein nejua nikchiuak. Uvas tein nankikaujtiouij keman nankitekij, okachi kuajkuali ke nochi uvas tein kisentiliaj ichankauan Abí-Ézer. 3 Dios namechpaleuij xikinmiktikan Oreb uan Zeeb akin taixyekanayaj Madián. Tein nankichiujkej namejuan okachi kuali ke tein nejua nikchiuak”. Keman kiniluij nejin, yejuan yolseujkej.*

4 Satepan, Gedeón ajsik ueyiat Jordán uan kipanauij. Maski semi sioujtoya uan 300 soldados akin iuan yayaj no semi sioujtoyaj, kisentokakej kintokatiajkej akin kinixnamikiaj. 5 Yejua ika Gedeón kiniluij takamej akin nemiaj Sucot: “Namechtataujtia xikinmakakan pantsin takamej akin nouan uitsej porin semi sioujtokej. Tejuan tikintokatiuitsej Zébah uan Zalmuná akin tekiuajtij Madián”. 6 Sayoj ke uejueyi chiuanimej akin nemiaj Sucot kiluijkej: “¿Keyej titechtajtania maj tikintamakakan mosoldados? ¿Xe tikinkitskijya Zébah uan Zalmuná?”. 7 Uan Gedeón kiniluij: “Keman Jehová nechpaleuis maj nikinkitski Zébah uan Zalmuná, namechuijuitekis ika uitsti tein onkak taluakyan hasta maj namechtsajtsayana, porin amo nankichiujkej tein namechtajtanij”. 8 Satepan pankisak Penuel uan no kintajtanij pantsin takamej akin ompa nemiaj. Sayoj ke yejuan no kinankilijkej kemej akin nemiaj Sucot. 9 Yejua ika kiniluij takamej akin nemiaj Penuel: “Keman nitatanis uan nimokepas, nikxitinis nejin uejkapan kali”.

10 Zébah uan Zalmuná yetoyaj Carcor iniuan ininsoldados. Sayoj mokauayaj 15 mil soldados porin kinmiktijkajya 120 mil. Yejuan ualeuayaj kampa ualkisa tonaltsin uan kiuikayaj ininmachete tein ojkan tenej.* 11 Gedeón pankistiajki kampa moojtijkaj akin nentinemiaj itech kaltsitsin.* Nejon ojti panouaya tanakastan* de Nóbah uan Jogbehá. Gedeón ajsik kampa yetoyaj akin kinixnamikiaj uan kinteuij porin nion kimatiaj ke ajsiskia. 12 Zébah uan Zalmuná akin tekiuajtiaj Madián cholojteujkej. Sayoj ke Gedeón kintokatiajki uan kinkitskij. Keman akin kinixnamikiaj kiitakej nejon motelmoujtijkej.

13 Satepan ke tatanik, Gedeón ikoneuj Joás mokepak uan yajki itech ojti tein ajsia hasta Heres. 14 Keman pankistiaya kitsakuilij se okichpil akin ualeuaya Sucot uan kitajtanij* akonimej taixyekanayaj ompa. Nejon okichpil kijkuilouilij akonimej katkaj uejueyi chiuanimej uan taixyekananij ompa Sucot. Sennochia katkaj 77 takamej. 15 Gedeón kinitato takamej akin nemiaj Sucot uan kiniluij: “Nikan yetokej Zébah uan Zalmuná. Namejuan nanechkejkelojkej porin nankinemiliayaj ke amo ueliskia nikinkitskis, uan nanechiluijkej: ‘¿Keyej titechtajtania maj tikintamakakan mosoldados akin sioujtokej? ¿Xe tikinkitskijya Zébah uan Zalmuná?’”. 16 Satepan Gedeón kinkitskij akin taixyekanayaj Sucot uan kinuijuitekik ika uitsti tein onkak taluakyan para kintatsakuiltis. 17 Uan no, kixitinij uejkapan kali tein yetoya Penuel uan kinmiktij takamej akin ompa nemiaj.

18 Gedeón kintajtanij Zébah uan Zalmuná: “¿Keniuj katkaj takamej akin nankinmiktijkej itech tepet Tabor?”. Yejuan kiluijkej: “Katkaj kemej tejua. Moitayaj kemej ikoneuan se tekiuaj”. 19 Uan Gedeón kiniluij: “Katkaj nokniuan, ikoneuan nomaj. Namechyekiluia itokaykopa Jehová ke komo amo nankinmiktiskiaj, nejua amo no namechmiktiskia”. 20 Yejua ika Gedeón kinauatij Jéter, ikoneuj akin tayekanaya: “¡Xikinmikti!”. Sayoj ke kemej Jéter okichpilok katka semi mouia, yejua ika amo kikixtij imachete tein ojkan tenej.* 21 Zébah uan Zalmuná kiluijkej: “Tejua xitechmikti komo yekmelauj titakat”. Uan Gedeón kinmiktij Zébah uan Zalmuná uan mokuilij tein kinkechtaliliayaj* inincamellos para kinkualtsintiliskej.

22 Satepan, takamej israelitas kiluijkej Gedeón: “Tejua xitechixyekana uan no maj techixyekana mokoneuj uan moixuiuj porin titechpaleuij maj madianitas amo techtajyouiltikanok”. 23 Sayoj ke Gedeón kiniluij: “Nion nejua uan nion nokoneuj tamechixyekanaskej, ta yejua Jehová akin namechixyekanas”. 24 Gedeón no kiniluij: “Nikneki namechtajtanis teisa: maj sejse takat nechmaka se anillo tein se moyekatsoltalilia”. (Kemej akin kintankaj katkaj ismaelitas, kipiayaj anillos tein chijchiujtoyaj ika oro tein moyekatsoltaliliayaj). 25 Yejuan kiluijkej: “Timitsmakaskej”. Kisoujkej se tasal* uan sejse takat ompa kitalijtiajki se anillo tein kinkuilijkaj akin kintankaj. 26 Sennochia, kiajxitijkej 19 kilos.* Uan amo kitamachiujkej koskamej nion pipilolmej. Uan amo no kitamachiujkej moradojtasal* tein motaliliayaj akin taixyekanayaj Madián nion tein kinkechtaliliayaj camellos para kinkualtsintiliskej.

27 Gedeón kichijchiuak se koton tein kiluiaj efod* ika oro tein kimakakej. Kitalij ompa Ofrá kampa nemia para maj nochin kiitakan. Uan nochin israelitas kiueyichiujkej* nejon koton. Nejon kichiuak maj Gedeón uan ichankauan mokuejmolkalakianij.

28 Israelitas kintankej madianitas uan madianitas amo kemanok kinekkej kintajyouiltiskej. Uan israelitas kualtsin nenkej 40 xiujmej keman Gedeón kinixyekanaya.

29 Jerubaal* ikoneuj Joás mokepak ichan uan ompa mokauak.

30 Kemej Gedeón kinpiaya miakej siuamej, kinpiak 70 ikoneuan. 31 Uan Gedeón no kipiaya okse isiuatsin* akin nemia Siquem. Yejua no kipiak se ikonetsin akin kitokaytij Abimélec. 32 Uan Gedeón kualtsin nemik miak xiujmej. Satepan mikik uan kitokkej ompa Ofrá kampa nemij ichankauan Abí-Ézer. Kitokkej kampa toktoya Joás akin katka itat.

33 Satepan ke Gedeón mikik, israelitas oksepa peuak kinueyichiuaj* tatadiosmej* tein moixmatij kemej Baal. Uan kiitayaj Baal-Berit kemej inindios. 34 Israelitas amo kielnamikkej ininDios Jehová, maski yejua kinpaleuijka keman kintajyouiltijtoyaj akin kinixnamikiaj. 35 Uan amo no kiniknelijkej ichankauan Gedeón, akin no moixmatia kemej Jerubaal, maski yejua semi kinpaleuijka israelitas.

9 Satepan, Abimélec ikoneuj Jerubaal yajki Siquem kinitato itíos, iikniuan imomaj, uan nochin ichankauan iueyitat. Uan kiniluij: 2 “Xikiniluikan akin taixyekanaj Siquem: ‘¿Toni nankinemiliaj ke okachi kuali? ¿Nankinemiliaj ke okachi kuali maj namechixyekanakan 70 ikoneuan Jerubaal oso maj sayoj se takat namechixyekana? Uan xikelnamikikan ke namejuan uan nejua tiparientes’”.*

3 Yejua ika itíos Abimélec kiniluitoj akin taixyekanayaj Siquem tein kijtojka. Uan akin taixyekanayaj Siquem kiixtalijkej kipaleuiskej Abimélec porin moiluiayaj: “Abimélec topariente”. 4 Uan kimakakej Abimélec 800 gramos* de plata tein kikuikej itech templo kampa kiueyichiuayaj Baal-Berit. Ika nejon tomin, Abimélec kintakeuak seki takamej para maj kipaleuianij. Nejon takamej tatsiujkanentinemiaj uan tel amo yolkualmej katkaj. 5 Satepan, Abimélec yajki ichan itat ompa Ofrá uan kinmiktij 70 ikoneuan Jerubaal. Yejuan katkaj iikniuan Abimélec. Kinmiktij nochin itech se tet. Sayoj makisak Jotán akin xokoyot, porin motatij.*

6 Nochin akin taixyekanayaj Siquem uan nochin akin nemiaj Bet-Miló mosentilijkej ompa Siquem, tein amo uejka yetok de se ueyi kouit uan se kalikxit. Uan ompa kiixtalijkej Abimélec kemej tekiuaj.

7 Keman Jotán kimatik nejon, niman yajki ikuapan tepet Guerizim uan kinpantsajtsilij akin mosentilijkaj: “¡Namejuan akin nantaixyekanaj Siquem, xinechkakikan uan Dios no namechkakis!

8 ”Se tonal, seki koujmej mosentilijkej para kiixtaliskej akoni kinixyekanas. Yejua ika kiluijkej olivojkouit: ‘Tiknekij tejua xitechixyekana’. 9 Sayoj ke olivojkouit kinnankilij: ‘Nejua amo nikneki namechixyekanas,* porin komo namechixyekana amo niktemakasok aceite tein ika kiueyitaliaj Dios uan no ika kinueyitaliaj takamej’. 10 Kemej olivojkouit amo kinekik, koujmej kiitatoj higojkouit uan kiluijkej: ‘Tejua xitechixyekana’. 11 Sayoj ke higojkouit kinnankilij: ‘Nejua amo nikneki namechixyekanas, porin komo namechixyekana amo niktemakasok notakilo tein semi uelik uan tsopek’. 12 Satepan koujmej kiluijkej uvajkouit: ‘Tejua xitechixyekana’. 13 Sayoj ke uvajkouit kinnankilij: ‘Nejua amo nikneki namechixyekanas,* porin komo namechixyekana amo niktemakasok vino tein kiyolpaktia Dios uan tein kinyolpaktia takamej’. 14 Satepan, nochin koujmej kiluitoj kouit tein uitsyoj: ‘Tejua xitechixyekana’. 15 Uan kouit tein uitsyoj kinnankilij: ‘Komo yekmelauj nankinekij maj nejua namechixyekana, ximokalakikij nomatampa uan nejua namechpaleuis. Sayoj ke komo amo nanyektajtojtokej, maj nixotatikisa uan maj nikinchichino nochin cedrojkoujmej tein onkakej Líbano’”.

16 Jotán no kiniluij: “¿Nankinemiliaj ke kuali yetok tein nankichiujkej keman nankiixtalijkej Abimélec kemej tekiuaj? ¿Nankiniknelijkej Jerubaal uan ichankauan? ¿Kinextij nejon ke nankitakachiuaj* Jerubaal? 17 Keman madianitas namechtajyouiltijtoyaj, nopaj kinteuij para namechpaleuis maski ueliskia kimiktiskej. 18 Sayoj ke axkan namejuan nankinixnamikij ichankauan nopaj uan nankinmiktijkej 70 ikoneuan itech se tet. Uan kemej Abimélec namopariente nankiixtalijkej maj taixyekana Siquem, maski yejua ikoneuj se siuat akin katka itakeual nopaj. 19 Komo nankinemiliaj ke kuali yetok tein nankichiujtokej porin ijkon nankitakachiuaj* Jerubaal uan ichankauan, xiyolpakikan iuan Abimélec uan maj yejua no yolpaki namouan. 20 Sayoj ke komo amo kuali yetok tein nankichiujtokej, maj Abimélec namechchichino namejuan akin nantaixyekanaj Siquem uan nochin akin nanemij Bet-Miló. Uan namejuan no xikchichinokan Abimélec”.

21 Jotán choloj uan yajki Beer uan ompa mokaltalij porin kimouiliaya Abimélec akin katka iikniuj.

22 Abimélec kinixyekanak israelitas eyi xiuit. 23 Sayoj ke Dios kichiuak maj Abimélec uan akin taixyekanayaj Siquem motauelitakan.* Uan akin taixyekanayaj Siquem peuak kiixnamikij. 24 Ijkon Dios kitaxtaualtiskia Abimélec porin fiero kinmiktij 70 ikoneuan Jerubaal, akin katkaj iikniuan. Uan no kintaxtaualtiskia akin taixyekanayaj Siquem porin kipaleuijkaj maj kinmikti. 25 Yejua ika, akin taixyekanayaj Siquem kinnauatijkej seki takamej maj motatitij* tepekuapan para kiichtakauiskej Abimélec. Nejon takamej kintachtekiayaj nochin akin ompaka panouayaj. Satepan, kiluijkej Abimélec tein kichiujtoyaj nejin takamej.

26 Itech nejon tonalmej, Gaal ikoneuj Ébed uan iikniuan ajsikej Siquem uan ompa mokaujkej. Uan akin taixyekanayaj Siquem kinemilijkej ke yejuan ueliskiaj kinpaleuiskej. 27 Akin taixyekanayaj Siquem yajkej kitekitoj uvas uan kimetspatkej para kikixtiliskej iayo. Keman kitamichiujkej nejon no iluichiujkej. Satepan yajkej templo kampa kiueyichiuayaj inintatadios* uan ompa takuajkej, tatayikej uan peuak kiuijuikaltiaj* Abimélec. 28 Uan Gaal ikoneuj Ébed kijtoj: “¿Toni chiujkej Abimélec ikoneuj Jerubaal? ¿Uan toni chiujkej Zebul akin Abimélec kiixtalij maj taixyekana nikan Siquem? ¿Toni chiuanimej yejuan para maj tikintekitilijtokan? Amo moneki tiktekitiliskej Abimélec, okachi kuali maj tikintekitilikan ikoneuan Hamor. 29 Komo nejua nikinixyekanaskia akin nikan nemij, niktakuiliskia Abimélec”. Uan hasta kijtoj: “¡Xikinmiakilti mosoldados Abimélec uan xitechteuiki!”.

30 Uan keman Zebul kimatik tein kijtojka Gaal ikoneuj Ébed, tel kualanik. 31 Yejua ika kinichtakatitanik seki takamej para maj kiluitij Abimélec: “Gaal ikoneuj Ébed uan iikniuan yetokej nikan Siquem uan kichiujtokej maj mitsixnamikikan akin nikan nemij. 32 Xiuiki de youak iniuan takamej akin mitspaleuiaj uan ximochiakan kalampa de Siquem. 33 Uan niman keman tanesis, xikalakikan itech ueyi xolal uan xikinteuikan akin nikan nemij. Keman Gaal uan akin kipaleuiaj kisaskej para mitsteuiskej, xikchiua tein yeski para tikintanis”.

34 Uan Abimélec uan nochin akin kipaleuiayaj yajkej Siquem nejon youak. Yejua naujkan kinxejxeloj uan mochiakej kalampa de Siquem. 35 Mostika, Gaal ikoneuj Ébed kalankisak uan moketsak kalampa de Siquem. Ijkuak, Abimélec uan akin iuan yetoyaj kiskej de kampa motatijtoyaj. 36 Keman Gaal kinitak, kiluij Zebul: “¡Xikita! Ne tepeyoj ualtemotokej seki takamej”. Sayoj ke Zebul kiluij: “Timoixpolojtok. Tein tikitstok amo takamej, ta ininyekauil tepemej”.

37 Satepan Gaal kiluij: “¡Xikita! Seki takamej ualtemotokej ne tatajkoyampa uan oksekin ualajtokej itech ojti tein panoua kampa yetok ueyi kouit Meonenim”. 38 Zebul kiluij Gaal: “Tikelnamiki ke tikijtoj ‘¿Toni chiujkej Abimélec para maj tiktekitilikan?’. Nejin takamej yejuan akin tikinijijtojtoya. Nikan yetokejya, xikisa uan xikinteuiti”.

39 Uan akin taixyekanayaj Siquem kitojtokakej* Gaal keman kiteuito Abimélec. 40 Gaal choloj uan Abimélec kitokatiajki. Miakej kinmiktijkej nejon tonal. Kinmiktijtiajkej itech nochi ojti hasta kalampa den ueyi xolal.

41 Satepan Abimélec mokepak Arumá kampa yetoya ichan. Uan Zebul akin taixyekanaya Siquem kintokak* Gaal uan iikniuan. 42 Mostika, Abimélec kimatik ke akin nemiaj Siquem kisayaj kalampa den ueyi xolal. 43 Yejua ika, Abimélec yajki iniuan takamej akin kipaleuiayaj uan exkan kinxejxeloj. Yejuan mokaujkej kalampa den ueyi xolal uan mochiakej hasta maj kisanij akin nemiaj Siquem. Keman yejuan kistiayaj, kinteuitoj uan kinmiktijkej. 44 Abimélec uan takamej akin iuan yetoyaj tateuijtiajkej uan ajsikej kampa yetoya puerta den ueyi xolal. Uan okseki takamej akin no kipaleuiayaj kinteuitoj uan kinmiktitoj nochin akin yetoyaj kalampa den ueyi xolal. 45 Nochi nejon tonal, Abimélec kinteuij akin nemiaj Siquem hasta ke kintanik. Kinmiktij akin ompa nemiaj uan kiixpoloj ueyi xolal. Satepan kitsonpachoj ika istat nochi ueyi xolal.

46 Nochin taixyekananij akin nemiaj itech uejkapan kali tein yetoya ompa Siquem kimatkej tein kichiuak Abimélec. Yejua ika yajkej templo kampa kiueyichiuayaj El-Berit* uan motatijkej itech se cuarto kampa kuali tatsaktoya. 47 Abimélec kimatik ke nochin akin taixyekanayaj itech uejkapan kali tein yetoya ompa Siquem mosentilijkaj itech nejon cuarto. 48 Yejua ika niman yajki tepet Zalmón iniuan takamej akin kipaleuiayaj. Kiuikak se hacha uan kitekik imakoujyo se kouit. Satepan momamaltij uan kiniluij akin iuan yayaj: “Namejuan no xiktektiuetsikan se imakoujyo kouit”. 49 Nochin takamej kitekkej imakoujyo kouit uan kitojtokakej* Abimélec. Ika nochi nejon koujmej kiyoualojkej cuarto kampa motatijtoyaj akin taixyekanayaj itech uejkapan kali uan kitikuiltijkej. Ijkon kinmiktijkej nochin akin nemiaj itech uejkapan kali tein yetoya Siquem. Katkaj kemej mil takamej uan siuamej.

50 Satepan Abimélec yajki kinteuito akin nemiaj Tebez uan kintanik. 51 Tatajko den ueyi xolal yetoya se uejkapan kali uan ompa motatitoj* nochin takamej, siuamej uan akin taixyekanayaj itech ueyi xolal. Kuali tatsakkej uan tejkokej* kampa okachi uejkapan. 52 Uan Abimélec ajsik hasta kampa yetoya uejkapan kali para kitikuiltis. Keman yaya kitikuiltitia, 53 se siuatsin kipankajkauak se ueyi tet tein ika takuechouaj. Nejon tet uetsito ikuako* Abimélec uan kikuatapanak. 54 Abimélec niman kinotsak takat akin kimamaliaya tein ika tateuiaya uan kiluij: “Xikixti momachete tein ojkan tenej* uan xinechmikti para maj amo kijtokan ke nechmiktij se siuat”. Nejon takat kitokilij imachete tein ojkan tenej uan Abimélec mikik.

55 Keman israelitas kiitakej ke Abimélec mikik, mokepkej ininchan. 56 Ijkon Dios kitaxtaualtij Abimélec tein amo kuali tein kichiuilijka itat porin kinmiktij 70 iikniuan. 57 Uan Dios no kintaxtaualtij nochi tein amo kuali tein kichiujkaj akin nemiaj Siquem. Ijkon mochiuak tein Jotán, ikoneuj Jerubaal, kinnejnekilijka.

10 Satepan ke Abimélec mikik, Dios kiixtalij Tolá maj mochiua ininjuez israelitas para maj kinmakixti. Tolá katka iokichpil Pua, iueyitat katka Dodó uan pouia iniuan ichankauan Isacar. Nemia kampa tepeyoj, itech ueyi xolal Samir tein yetok kampa kintaxejxelouilijkaj ichankauan Efraín. 2 Tolá katka ininjuez israelitas 23 xiujmej. Satepan mikik uan kitokkej ompa Samir.

3 Satepan Dios kiixtalij Jaír akin ualeuaya Galaad maj mochiua ininjuez israelitas. Uan yejua kinixyekanak 22 xiujmej. 4 Jaír kinpiak 30 ikoneuan. Sejse ikoneuj iaxka katka se ueyi xolal uan no kipiayaj sejse burro. Hasta axkan nejon 30 uejueyi xolalmej moixmatij kemej Havot-Jaír uan pouij ompa Galaad. 5 Jaír mikik uan kitokkej itech ueyi xolal Camón.

6 Uan israelitas oksepa kichiujkej tein Jehová amo kiyolpaktia. Uan peuak kinueyichiuaj tatadiosmej* tein moixmatij kemej Baal uan Astoret. No peuak kinueyichiuaj inintatadiosuan akin nemiaj Aram,* Sidón uan Moab. No kinueyichiuayaj inintatadiosuan ammonitas uan filisteos. Kiixnamikkej Jehová uan amo kiueyichiujkejok. 7 Yejua ika, Jehová semi kualanik iniuan israelitas uan kikauak maj filisteos uan ammonitas kinteltekitiltianij. 8 Nejon xiuit semi kintajyouiltijkej israelitas akin nemiaj Galaad. Uan kisentokakej kintajyouiltijkej 18 xiujmej. Yejuan nemiaj kampa achto nemiaj amorreos, oksekopa den ueyiat Jordán. 9 Uan no, ammonitas kipanauiayaj ueyiat Jordán para kinteuiskej ichankauan Judá, Benjamín uan Efraín. Yejua ika, israelitas semi tajyouiayaj. 10 Uan kitataujtijkej Jehová maj kinpaleui. Yejuan kiluiayaj: “Tikchiujkej tein semi amo kuali porin timitsixnamikkej uan tikinueyichiujkej Baales”.

11 Sayoj ke Jehová kiniluij israelitas: “Nejua namechpaleuij keman namechtajyouiltijkej egipcios, amorreos, ammonitas uan filisteos. 12 No namechpaleuij keman namechtajyouiltijkej sidonios, amalequitas uan madianitas. Keman nanechtataujtiayaj maj namechpaleui, nejua namechmakixtiaya. 13 Sayoj ke, kemej nanechixnamikkej uan nankinueyichiujkej tatadiosmej,* amo sepaok namechmakixtis. 14 Xikiniluikan tatadiosmej maj namechpaleuikan, ta nankiixtalijkej yejuan nankinueyichiuaskej; maj yejuan namechpaleuikan keman nantajyouijtoskej”. 15 Sayoj ke israelitas kiluijkej Jehová: “Tikchiujkej tein semi amo kuali. Xitechtatsakuilti kemej tikitas ke kuali yetok. Sayoj ke timitstataujtiaj xitechmakixti maski sayoj axkan”. 16 Uan kinixpolojkej tatadiosmej* uan oksepa peuak kiueyichiuaj Jehová. Yejua ika, Dios semi kiniknelij israelitas uan amo taxikojok. Yejua amo kinekiaok kiitas maj tajyouikan.

17 Satepan ammonitas mosentilijkej ompa Galaad para kinteuiskej israelitas. Uan israelitas no mosentilijkej ompa Mizpá. 18 Israelitas akin nemiaj Galaad uan akin kinixyekanayaj moiluiayaj: “¿Akoni techixyekanas keman timoteuiskej iniuan ammonitas? Akin techixyekanas maj no kinixyekana nochin akin nemij Galaad”.

11 Jefté katka kayot Galaad uan katka se soldado akin semi kuali tateuiaya. Inan katka se siuat akin monamakaya iniuan takamej uan itat monotsaya Galaad. 2 Sayoj ke isiuauj Galaad no kinpiak konemej. Keman yejuan moskaltijkej, kitokakej* Jefté uan kiluijkej: “Amo timitsmakaskej nion se tal tein iaxka topaj porin tiikoneuj okse siuat”. 3 Yejua ika Jefté kincholuij* iikniuan uan mokaltalito ompa Tob. Uan iuan yajkej seki takamej akin amo kipiayaj tekit.

4 Seki tonalmej satepan, ammonitas peuak kinteuiaj israelitas. 5 Keman akin taixyekanayaj Galaad kiitakej nejon, yajkej kikuitoj Jefté ompa Tob. 6 Keman ajsikej kiluijkej: “Tiknekij tejua xikinixyekana soldados para tikinteuiskej ammonitas”. 7 Sayoj ke Jefté kinnankilij akin taixyekanayaj* Galaad: “Namejuan semi nanechtauelitakej uan nanechtokakej* de ichan nopaj. Uan axkan ke nantajyouijtokej nankinekijya maj namechpaleui”. 8 Uan yejuan kiluijkej Jefté: “Kemaj, tiknekij xitechpaleui maj tikinteuikan ammonitas. Komo titechpaleuia, timitsixtaliskej tejua xikinixyekana nochin akin nemij Galaad”. 9 Uan Jefté kiniluij: “Nias namouan nikinteuitiuj ammonitas porin namejuan nankinekij maj niouj. Uan komo Jehová nechpaleuia maj nikintani, nejua namechixyekanas”. 10 Uan akin taixyekanayaj Galaad kiluijkej Jefté: “Jehová techkaktok. Maj yejua techtatsakuilti komo amo tikchiuaj tein tikijtoj”. 11 Uan Jefté yajki iniuan, uan israelitas kiixtalijkej maj kinixyekana soldados uan maj no kinixyekana nochin israelitas. Uan ompa Mizpá, Jefté oksepa kijtoj tein motenkaujka iniuan akin taixyekanayaj Galaad. Oksepa kijtoj para maj Jehová uan nochin israelitas kikakikan.

12 Jefté tanauatij maj kiitatij inintekiuaj ammonitas uan maj kiluikan: “¿Toni nimitschiuilij para titateuikiuj nikan kampa ninemi?”. 13 Uan inintekiuaj ammonitas kiniluij akin kiitatoj: “Nimitsteuiko porin israelitas nechtalkuilijkej keman kiskej de Egipto. Mokuilijkej tal tein peua ueyiat* Arnón uan tein tami hasta ueyiat Jaboc. Nejin tal no monamiki iuan ueyiat Jordán. Xinechkepili uan amo nimitsteuisok”. 14 Sayoj ke Jefté oksepa kintitanik seki takamej maj kiitatij inintekiuaj ammonitas. 15 Yejuan kiluijkej:

“Yejua nejin tein kijtoua Jefté: ‘Israelitas amo kintalkuilijkej moabitas nion ammonitas. 16 Keman israelitas kiskej de Egipto, nejnenkej taluakyan hasta mar Rojo uan ajsikej Cadés. 17 Uan israelitas kintitankej seki takamej maj kiitatij akin taixyekanaya Edom uan maj kiluikan: “Timitstataujtiaj xitechkaua maj tipanokan motalpankopa”. Sayoj ke akin taixyekanaya Edom amo kinkauak maj panokan. Uan akin taixyekanaya Moab amo no kinkauak maj panokan. Yejua ika israelitas mokaujkej ompa Cadés. 18 Keman nejnenkej taluakyan kitayoualuijkej* inintal edomitas uan inintal moabitas. Panokej tanakastan de inintal moabitas kampa kisa tonaltsin uan kitalijkej ininkaltsitsin* tanakastan den ueyiat* Arnón. Amo panokej kampa yetoya inintal moabitas porin inintal tamia hasta ueyiat Arnón.

19 ”’ Satepan israelitas kintitankej seki takamej maj kiitatij Sehón inintekiuaj amorreos akin nemia Hesbón. Yejuan kiluijkej: “Timitstataujtiaj xitechkaua maj tipanokan motalpankopa para tiajsiskej kampa tiouij”. 20 Sayoj ke Sehón amo kineltokak ke israelitas sayoj ompaka panoskiaj, yejua ika amo kinkauak maj panokan, ta kinsentilij isoldados uan yajkej Jáhaz. Ompa kitalijkej ininkaltsitsin uan kinteuijkej israelitas. 21 Keman Jehová ininDios israelitas kiitak nejon, kinpaleuij israelitas maj kitanikan tekiuaj Sehón uan nochin isoldados. Israelitas kintankej nochin amorreos uan kintalkuilijkej. 22 Ijkon mokuilijkej inintal amorreos tein peuaya desde ueyiat Arnón uan tamia hasta ueyiat* Jaboc. Oksekopa peuaya taluakyan uan tamia hasta ueyiat Jordán.

23 ”’Jehová ininDios israelitas kintalkuilij amorreos para kinmakas israelitas. ¿Keyej axkan tikneki tikinkuilis tein Dios kinmakak? 24 ¿Xe amo timokauilia nochi tein modios Kemós mitsmaka? Tejuan ijkon tikchiuaj, timokauiliaj nochin talmej tein toDios Jehová techmaka. 25 Balac ikoneuj Zipor amo keman motajtolteuij iniuan israelitas para maj kikepilikan tal tein achto katka iaxka. Komo yejua amo kichiuak uan okachi ueyichiujkej katka, ¿keyej tejua tikneki* tikintalkuilis? 26 Israelitas 300 xiujmejya neminij Hesbón uan Aroer uan itech xolaltsitsin tein ompa pouij. No neminij itech nochi uejueyi xolalmej tein yetokej tatenoj den ueyiat* Arnón. ¿Keyej hasta yekintsin nantateuijtokej para maj tamechkepilikan nejin talmej? 27 Nejua amo teyi nimitschiuiliani para xinechteuiki. Maj Jehová akin sayoj yejua Juez, kiyektali* kuejmol tein kipiaj israelitas uan ammonitas’”.

28 Sayoj ke inintekiuaj ammonitas amo kikakik tein Jefté kijtoj.

29 Jehová kimakak Jefté ichikaualis. Uan yejua kipanauij Galaad uan tal tein ininaxka katka ichankauan Manasés uan ajsik Mizpé tein poui Galaad. Uan desde Mizpé kisteuak para kinteuitiuj ammonitas.

30 Uan Jefté kiluij* Jehová: “Komo tinechpaleuia maj nikintani ammonitas, 31 nimotenkaua ke keman nikintanis uan nimokepas nochan, nimitsmaktilis akin yekinika nechnamikikiuj. Nimitsmaktilis tejua Jehová kemej yeskia nimitschichinouiliskia se tapial”.*

32 Jefté kinteuito ammonitas uan Jehová kipaleuij maj kintani. 33 Yejua kinmiktijtiajki desde Aroer hasta Minit uan ajsik hasta Abel-Keramim. Semi miakej kinmiktij uan moinaxkatilij 20 uejueyi xolalmej. Ijkon israelitas kintankej ammonitas.

34 Keman Jefté mokepak ichan ompa Mizpá, isiuapil kinamikito. Yejua mijtotijtiaya uan kitejtelojtiaya* se tambortsin.* Amo kinpiaya okseki ikoneuan ta ipa sayoj setsin isiuapil. 35 Keman Jefté kiitak isiuapil, kitsayanak itasal* uan kiluij: “Nokonetsin, fiero nikmachilia porin amo nouan tietosok uan amo nimitsitasok. Nimotenkauak iuan Jehová ke nikchiuaskia teisa uan amo ueliok nimotenkepa”.

36 Sayoj ke isiuapil kiluij: “Paj, komo timotenkauak iuan Jehová ke tinechtemaktiskia, xikchiua tein tikiluij porin Jehová mitspaleuij xikintani ammonitas”. 37 Uan no kiluij: “Xinechkaua maj niouj ome metsti kampa tepeyoj. Nias nichokatiuj iniuan okseki siuapipil* porin amo keman nimonamiktis”.

38 Jefté kiluij: “Kemaj, xiouj”. Kikauak maj youi ome metsti kampa tepeyoj. Uan yejua chokato iniuan okseki siuapipil porin amo keman monamiktiskia. 39 Isiuapil Jefté mokepak ichan keman panok ome metsti uan Jefté kichiuak tein kijtojka. Siuapil amo keman motekak iuan se takat. Uan israelitas peujkej kichiuaj nejin: 40 ininsiuapipiluan israelitas xijxiujtika yayaj naui tonal* kiyolchikauatij isiuapil Jefté akin katka kayot Galaad.

12 Uan takamej akin pouiaj iniuan ichankauan Efraín mosentilijkej uan kipanauijkej ueyiat para yaskej ueyi xolal Zafón.* Keman ompa ajsikej, kiajuakej Jefté uan kiluijkej: “¿Keyej amo titechnauatij ke tiaskia tikinteuitiuj ammonitas para timitspaleuiskiaj? Timitskalakitij mochan uan tiktikuiltitij para ximiki”. 2 Jefté kiniluij: “Nosoldados uan nejua timoteuijkej iniuan ammonitas. Maski namechiluij xinechpaleuikij, amo nanechpaleuikoj para maj nikintani. 3 Kemej nikitak ke ipa amo nanualaskiaj, nimoteuij iniuan ammonitas maski ueliskia nechmiktiskej. Sayoj ke Jehová nechpaleuij maj nikintani. Yejua ika ¿keyej axkan nanechteuisnekij?”.

4 Jefté kinsentilij nochin takamej akin nemiaj Galaad uan kinteuijkej ichankauan Efraín. Takamej akin nemiaj Galaad kintankej ichankauan Efraín, maski yejuan kijtojkaj: “¿Toni nanchiuanimej namejuan galaaditas akin nanemij kampa kintaxejxelouilijkej ichankauan Efraín uan Manasés? Amo teyi nanchiuanimej, ta sayoj nankincholuijtinemij* ichankauan Efraín”. 5 Takamej akin nemiaj Galaad yajkej kampa uelia se kimetspanauiaya ueyiat Jordán uan ompa moketsatoj para maj ichankauan Efraín amo cholokan. Uan keman aksa* kinekia panos, takamej akin nemiaj Galaad kitajtaniayaj:* “¿Tipoui iniuan ichankauan Efraín?”. Keman kijtouaya ke amo, 6 kiluiayaj: “Xikijto xibolet”. Sayoj ke yejua kijtouaya “Sibolet”, porin amo uelia kiyekijtouaya tajtol. Yejua ika takamej akin nemiaj Galaad kikitskiayaj uan ompa kimiktiayaj itech ueyiat Jordán. Ijkuak kinmiktijkej 42 mil ichankauan Efraín.

7 Jefté akin nemia Galaad katka ininjuez israelitas chikuasen xiuit. Satepan momikilij uan kitokkej ompa Galaad.

8 Satepan ke Jefté mikik, Ibzán mochiuak ininjuez israelitas. 9 Kipiak 30 okichpipil uan 30 siuapipil. Kinnamiktij isiuapipiluan iniuan takamej akin amo pouiaj iniuan ichankauan, uan no ijkon kichiuak iniuan iokichpipiluan. Kinnamiktij iniuan 30 siuamej akin amo pouiaj iniuan ichankauan. Ibzán katka ininjuez israelitas chikome xiuit. 10 Ibzán mikik uan kitokkej ompa Belén.

11 Keman Ibzán mikik, Elón akin pouia iniuan ichankauan Zabulón mochiuak ininjuez israelitas uan kinixyekanak majtakti xiuit. 12 Uan Elón akin pouia iniuan ichankauan Zabulón mikik uan kitokkej ompa Ayalón. Nejin ueyi xolal yetok kampa kintaxejxelouilijkaj ichankauan Zabulón.

13 Keman Elón mikik, Abdón mochiuak ininjuez israelitas. Yejua katka ikoneuj Hilel, akin katka kayot Piratón. 14 Kipiak 40 ikoneuan uan 30 iixuiuan. Nochin ikoneuan uan iixuiuan kipiayaj sejse ininburro. Abdón katka ininjuez israelitas chikueyi xiuit. 15 Abdón ikoneuj Hilel akin katka kayot Piratón mikik uan ompa kitokkej. Piratón yetoya kampa kintaxejxelouilijkaj ichankauan Efraín, itech tepet kampa achto nemiaj amalequitas.

13 Uan israelitas oksepa kichiujkej tein Jehová amo kiyolpaktia. Yejua ika Jehová kikauak maj filisteos kintajyouiltianij 40 xiujmej.

2 Ijkuak, nemia se takat akin monotsaya Manóah. Yejua nemia Zorá uan pouia iniuan ichankauan Dan. Isiuatsin Manóah amo uelia kinpiaya konemej. 3 Se tonal, iángel Jehová monextij kampa yetoya isiuatsin Manóah uan kiluij: “Maski amo uelini tikinpiani konemej, timokokoxkataliti uan tikpiati se okichpiltsin. 4 Amo xitayi vino nion okse tayil tein teuintij uan amo xikua nion teyi tein Dios kijtoua ke amo chipauak. 5 Timokokoxkatalis uan tikpias se okichpiltsin. Maj amo keman kitekilikan itson porin Dios kixeloj para maj sayoj yejua kitekitili uan yeski nazareo desde keman yolis.* Yejua kinpaleuis israelitas para maj filisteos amo kintajyouiltikanok”.

6 Uan siuatsin yajki kiluito itakatsin: “Se itekitikauj toTajtsin Dios nechitako. Semi kualtsin kemej moitaya, kemej yeskia se iángel toTajtsin Dios. Amo niktajtanij* kani ualeuaya uan amo no nechiluij keniuj monotsa. 7 Sayoj nechiluij: ‘Timokokoxkataliti uan tikpiati se okichpiltsin. Amo xitayi vino nion okse tayil tein teuintij uan amo xikua nion teyi tein Dios kijtoua ke amo chipauak. Porin Dios kixeloj para maj sayoj yejua kitekitili uan yeski nazareo desde keman yolis hasta keman mikis’”.

8 Manóah kiluij Jehová: “Jehová, nimitstataujtia oksepa xikualtitani motekitikauj para maj techiluiki keniuj moneki tikiskaltiskej okichpiltsin tein tikpiatij”. 9 ToTajtsin Dios kikakik Manóah uan oksepa kititanik iángel. Uan iángel toTajtsin Dios monextij keman isiuatsin Manóah tokotsyetoya kalampa den ueyi xolal. Sayoj ke Manóah amo iuan yetoya. 10 Siuatsin niman kisteuak uan kiluito itakatsin: “¡Oksepa ualaj takat akin nechitako okse tonal!”.

11 Manóah moketstikisak uan yajki iuan isiuatsin kiitatoj nejon takat. Manóah kitajtanij takat: “¿Tejua tiualajka tiknojnotsako nosiuatsin?”. Yejua kiluij: “Kemaj, nejua niknojnotsako”. 12 Manóah kiluij: “¡Maj mochiua tein tikiluij nosiuatsin! Sayoj ke xitechilui, ¿keniuj moneki tikiskaltiskej okichpiltsin? ¿Uan toni kichiuas keman moskaltis?”. 13 Uan iángel Jehová kiluij Manóah: “Maj mosiuatsin kichiua nochi tein nikiluij. 14 Maj amo kikua uvas uan nion teyi tein kichijchiuaj ika uvas. Maj amo tayi vino nion okse tayil tein teuintij uan maj amo kikua nion teyi tein Dios kijtoua ke amo chipauak. Moneki kichiuas nochi tein niknauatij”.

15 Manóah kiluij iángel Jehová: “Ximochia, ayamo xiouj, timitschijchiuilitij se chivo”. 16 Sayoj ke iángel Jehová kiluij Manóah: “Maski nimokauas, ipa amo nitakuas. Sayoj ke komo tikneki uelis tikchichinouilis Jehová se tapialtsin”. Manóah amo kimatia ke nejon takat katka iángel Jehová. 17 Uan Manóah kiluij iángel Jehová: “¿Keniuj timonotsa? Tiknekij tikmatiskej para timitsueyitaliskej keman mochiuas tein titechiluij”. 18 Sayoj ke iángel Jehová kiluij: “¿Keyej tinechtajtania keniuj nimonotsa? Amo nimitsiluis porin notokay semi kualtsin uan amo uelis tikmatis”.

19 Uan Manóah kimaktilij Jehová in chivo, trigo uan okseki taman itech se ueyi tet. Manóah uan isiuatsin kiitakej ke Dios kichiuak se taman tein amo keman kiitstoyaj. 20 Keman chivo, trigo uan okseki taman chichinaujtoyaj uan tit* uejkapan ajsia, Manóah uan isiuatsin kiitakej ke iángel Jehová mokalakij itech tit uan pankistiajki iluikak. Yejuan niman motankuaketskej uan moixpilojkej hasta talpan. 21 Ijkuak, Manóah kimatik ke nejon takat katka iángel Jehová. Uan Manóah uan isiuatsin amo oksepa kiitakej iángel Jehová porin amo monextijok. 22 Manóah kiluij isiuatsin: “¡Timikitij porin tikitakej Dios!”. 23 Sayoj ke isiuatsin kiluij: “Komo Jehová kinekiskia techmiktis, amo kiyolpaktiskia maj tikchichinouilianij se tapial nion maj tikmaktilianij trigo uan okseki taman. Amo no technextiliskia nochi tein tikitakej uan nion techiluiskia nochi tein techiluij”.

24 Siuatsin kipiak se okichpiltsin uan kitokaytij Sansón. Uan ijkon kemej moskaltijtiaya okichpiltsin, Jehová kitatiochiuiaya. 25 Panok in tiempo uan Jehová kimakak ichikaualis uan Sansón peuak kichiua miak taman ompa Mahané-Dan, tein yetok tatajko de Zorá uan Estaol.

14 Sansón yajki Timná uan ompa kiitak se siuat filistea.* 2 Keman mokepak ichan kiniluij itatuan: “Nikueuelitak se filistea ompa Timná. Xinechijtanilitij para maj iuan nimonamikti”. 3 Sayoj ke itatuan kiluijkej: “Nikan no onkakej siuapipil, uelis semej iuan timonamiktis. ¿Keyej tikneki timonamiktis iuan semej ininsiuapipiluan filisteos ta yejuan amo kitekitiliaj Dios?”. Sayoj ke Sansón kiluij itat: “Xinechijtaniliti, porin yejua akin nikueuelita”. 4 Itatuan amo kimatiaj ke Jehová kichiujtoya maj kinekini monamiktis iuan se ininsiuapil filisteos. Yejua* kitemojtoya keniuj kintatsakuiltis filisteos porin miak xiujmejya kintajyouiltijtoyaj israelitas.

5 Sansón yajki Timná iniuan itatuan. Keman ajsik kampa toktoyaj uvas ompa Timná, ualkisak se león tein nanalkatiualaya. 6 Ijkuak, Jehová kimakak Sansón ichikaualis uan Sansón kiixtapanak león ika imauan. Kiixtapanak kemej ipa kiixtapanaj se chivo. Sayoj ke amo kiniluij itatuan tein kichiujka. 7 Satepan Sansón yajki Timná kinojnotsato siuat filistea porin kisentokaya kiueuelitaya.

8 Satepan, keman oksepa kitemoto siuat para kiuikas ichan, kinalitato león tein kimiktijka. Seki nektsitsin* motachijchiuijkaj iijtik león uan onkaya nekti.* 9 Sansón kikixtij nekti* ika imauan uan kikuajtiajki. Uan keman kinajsito itatuan, no kinuantik.* Sayoj ke amo kiniluij ke kikixtijka de se león tein kimiktijka.

10 Sansón uan itat yajkej kampa nemia siuat uan ompa iluichiujkej, porin yejua nejon tein kichiuayaj takamej akin yaya monamiktitij. 11 Keman akin ompa nemiaj kiitakej Sansón, kiualkuilijkej 30 takamej para maj kipaleuikan. 12 Sansón kiniluij: “Namechtapouiti se taman uan komo nankimatij toni ika nitajtojtok namechmakas 30 linojtasal* uan okseki 30 tataman tasal. Sayoj ke moneki nanechiluiskej toni ika nitajtojtok achto ke tamis nejin iluit. 13 Komo amo nankimatij, namejuan nanechmakaskej 30 linojtasal uan okseki 30 tataman tasal”.* Yejuan kiluijkej: “Kemaj, xitechtapoui”. 14 Sansón kijtoj:

Panokaya eyi tonal uan yejuan ayamo kimatiaj toni kijtosnekia. 15 Mostika kiluijkej isiuatsin* Sansón: “Xikajkayaua motakatsin para maj techilui toni kijtosneki tein techtapouij. Komo amo titechpaleuia, timitschichinoskej uan no tikinchichinoskej nochin akin nemij ichan mopaj. Amo tiiluitikoj para nantechkuiliskej tein tikpiaj”. 16 Yejua ika isiuatsin Sansón chokaya uan kiteliluiaya: “Tikijtoua ke tinechtasojta, sayoj ke amo nimitsneltokilia porin amo tinechiluiani toni kijtosneki tein tikintapouij takamej akin ualajkej”. Sansón kiluij: “Keyej tikneki maj nimitsilui, ta nion nopaj nion nomaj nikiniluiani toni kijtosneki”. 17 Sayoj ke isiuatsin Sansón amo mosenkauak, ta mojmostaj kichokilijtoya hasta keman yaya tamitia iluit. Nejon iluit uejkauaya chikome tonal. Keman yaya tamitia iluit, Sansón kiluij isiuatsin toni kijtosnekia tein kintapouij takamej porin kiyolajxitijkaya. Uan isiuatsin nimantsin kiniluito takamej. 18 Chikometika tonal keman yaya tamitia iluit, takamej kiluijkej Sansón achto ke tapoyauiskia:*

Sansón kiniluij:

19 Jehová kimakak Sansón ichikaualis uan Sansón yajki Asquelón. Uan kemej semi chikauak katka kinmiktij 30 filisteos, kinkuilij inintasal* uan kinmakak takamej akin kimatkej toni kijtosnekia tein kintapouijka. Satepan mokepak ichan itat uan tel kualantiaya.

20 Uan isiuatsin Sansón kinamiktijkej iuan se takat akin kipaleuijka Sansón keman iluichiuak.

15 Panok in tiempo uan peuak kitekij trigo. Ijkuak, Sansón kiitato isiuatsin uan kiuikiliaya se chivo. Yejua kiluij imontat: “Nikneki nikalakis kampa moseuia nosiuatsin”. Sayoj ke yejua amo kikauak maj kalaki. 2 Imontat kiluij: “Nimoluij ke tiktauelitaya nosiuapil, yejua ika niknamiktij iuan takat akin mitspaleuijka keman tiiluichiuak. Sayoj ke uelis timonamiktis iuan iikniuj akin xokoyot. Yejua okachi kuakualtsin”. 3 Sayoj ke Sansón kijtoj: “Filisteos motemolijkej nochi tein nikinchiuiliti”.

4 Sansón kinkitskito 300 kuekmej. Ojomen kinkuitapililpij* uan ininkuitapilko kikalakij se kouit tein kikuatalilijka aceite. 5 Kinxotaltij* nejon koujmej uan kinkajkauak kuekmej kampa tatokkaj filisteos. Kichichinoj nochi tatok tein kitekkajya uan kijilpijkajya,* uan tein ayamo kitekiaj. No kinchichinoj uvajkoujmej uan olivojkoujmej.

6 Filisteos tajtankej:* “¿Akoni kichiuak nejin?”. Uan akin kintajtanijkej kijtojkej: “Nejin kichiuak Sansón, imontikauj takat akin nemi Timná. Imontat kikuilij isiuatsin uan kinamiktij iuan se takat akin kipaleuijka keman iluichiuak”. Keman filisteos kimatkej nejon, yajkej Timná uan kichichinojkej isiuatsin Sansón uan imontat. 7 Uan Sansón kiniluij: “Komo ipa ijkon nankichiuaj, nejua amo no nimoseuis hasta maj namechtaxtaualti tein nankichiujkej”. 8 Uan peuak kinmaga* hasta kinmiktij. Tel miakej kinmiktij. Satepan temok uan mokauak itech se tepekoyok tein moixmati kemej Etam.

9 Filisteos yajkej Judá uan ompa kitalijkej ininkaltsitsin.* Yejuan miakkan yajtinenkej ompa Lehí. 10 Uan takamej akin nemiaj Judá kintajtanijkej: “¿Keyej nanualajkej? ¿Toni tamechchiuilijkej?”. Uan filisteos kinnankilijkej: “Tiualajkej tikitskikoj* Sansón para no tikchiuiliskej tein yejua techchiuilij”. 11 Yejua ika, eyi mil takamej akin nemiaj Judá yajkej kiitatoj Sansón. Yejua yetoya itech se tepekoyok tein moixmati kemej Etam. Keman ompa ajsikej kitajtanijkej: “¿Keyej titechchiuilij nejin? ¿Xe amo tikmati ke filisteos techixyekanaj?”. Sansón kiniluij: “Nejua sayoj nikintaxtaualtij tein nechchiuilijkej”. 12 Yejuan kiluijkej: “Tiualajkej timitskitskikoj* para timitsuikaskej iniuan filisteos”. Uan Sansón kiniluij: “Sayoj namechtajtania amo teyi xinechchiuilikan namejuan”. 13 Yejuan kiluijkej: “Amo teyi timitschiuiliskej, ta sayoj tiknekij timitsilpiskej* uan timitsuikaskej iniuan filisteos. Amo timitsmiktiskej”.

Yejua ika kiilpijkej* ika ome lazos tein yankuikej, kikixtijkej den tepejxit uan kiuikakej. 14 Keman kiajxitijkej Lehí, filisteos tel yolpakkej uan peuak ajkotsajtsij. Ijkuak, Jehová kimakak Sansón ichikaualis uan kemej semi chikauak katka, kikokototsak lazos tein ika kiilpijkaj.* Kikokototsak kemej yeskia se hilo tachijchiuj ika lino tein tatak.* Uan cadenas tein kimatalilijkaj, kojkopinkej. 15 Sansón kiajsik itenomiyo se burro tein yekin mikka, uan ika kinmiktij mil takamej. 16 Uan Sansón kijtoj:

“¡Ika itenomiyo se burro, nikinmiktij akin nechtauelitayaj.

Ika itenomiyo se burro, nikinmiktij mil takamej uan nikinnejnepanoj!”.

17 Keman kitamiijtoj nejon, kitamotak itenomiyo burro uan ompa tatokaytij Ramat-Lehí.* 18 Sansón tel amikik uan yejua ika kitataujtij Jehová: “Tejua tinechpaleuij maj nitatani.* Uan axkan ke niamiki, amo xinechkaua maj nimiki. Amo no xikaua maj nechkitskikan akin amo mitstekitiliaj”. 19 Dios kichiuak maj se tekoyok tein yetok ompa Lehí okachi motapouani uan peuak kisa at. Keman Sansón tayik at, moyolkuik uan kiyekmatik.* Yejua ika nejon ameyal* tein yetok Lehí hasta axkan motokaytia En-Hacore.*

20 Uan Sansón katka ininjuez israelitas 20 xiujmej keman filisteos taixyekanayaj.

16 Se tonal, Sansón yajki Gaza. Ompa kiitak se siuat akin monamakaya iniuan takamej uan kalakik ichan. 2 Akin nemiaj Gaza kimatkej ke Sansón ompa yetoya. Yejua ika kiyoualojkej nochi ueyi xolal. Uan sekin mokaujkej nochi youal kampa yetoya puerta tein kipia ueyi xolal. Yejuan kinekiaj kiichtakauiskej Sansón uan moiluiayaj: “Tikmiktiskej keman tanesis”.

3 Sansón kochtiajki uan ijsak* tajkoyouan. Meuak uan kiejkeuak puerta tein ika tatsaktoya ueyi xolal. No kinejkeuak kalikximej kampa pilkatoya puerta uan kouit tein kiixtapaltaliayaj para tatsakuaskej. Momamaltij uan kiuikak nochi hasta ikuapan tepet tein yetok iixpan Hebrón.

4 Panok in tiempo uan Sansón semi kiueuelitak se siuat akin monotsaya Dalila. Yejua nemia kampa tal tamanis* tein moixmati kemej Sorec. 5 Uan akin kinixyekanayaj filisteos kiitatoj Dalila uan kiluijkej: “Xikchiua* maj mitsilui keyej tel chikauak. Maj mitsilui keniuj tiktaniskej uan keniuj uelis tikilpiskej.* Komo titechiluia, sejse timitsmakaskej 12 kilos uan tajko* de plata”.

6 Uan Dalila kiluij Sansón: “Nimitstataujtia xinechilui keyej titelchikauak, uan ika toni uelis mitsilpiskej* para amo uelisok tikchiuas nion teyi”. 7 Sansón kiluij: “Komo nechilpiaj ika chikome mekat tein yankuikej uan apaltikej, tamis nochikaualis uan ijkon niyeski kemej okseki takamej”. 8 Akin kinixyekanayaj filisteos kiuikilijkej Dalila chikome mekat. Yejua kiilpij* Sansón ika nejon mekat tein yankuikej uan apaltikej. 9 Keman kichiujtoya nejon, seki filisteos motatijtoyaj* itech okse cuarto para kiichtakauiskej Sansón. Uan Dalila kitsajtsilij: “¡Sansón, filisteos mitskitskitij!”. Sansón niman kikokototsak mekat tein ika kiilpijkaj.* Nejon mekat kotonik kemej ijkuak se hilo tachijchiuj ika lino kipanoltiaj itech tit.* Uan amo kimatkej keyej tel chikauak katka.

10 Uan Dalila kiluij Sansón: “¡Tinechkajkayauak! ¡Nouan timauiltijtok! Nimitstataujtia xinechilui ika toni uelis mitsilpiskej”. 11 Sansón kiluij: “Komo nechilpiaj ika lazos tein yankuikej, tamis nochikaualis”. 12 Yejua ika, Dalila kiilpij* ika seki lazos tein yankuikej, uan kitsajtsilij: “¡Sansón, filisteos mitskitskitij!”. Yejua nimantsin kikokototsak lazos tein ika kiilpijkaj.* Kinkokototsak kemej yeskia hilos. (Filisteos akin kinekiaj kiichtakauiskej Sansón yetoyajok itech cuarto).

13 Dalila kiluij Sansón: “Oksepa tinechkajkayauak uan nouan timauiltijtok. Xinechilui ika toni uelis mitsilpiskej”. Sansón kiluij: “Moneki tikijkitis chikome notrenzas ika hilos tein ika tajkitij”. 14 Dalila kichiuak nejon. Yejua kiijkitik itrenzas uan kitijtilintij ika se kouit tein ika tajkitij. Keman matamik kitsajtsilij: “¡Sansón, filisteos mitskitskitij!”. Sansón ijsatikisak,* uan kikixtij kouit tein ika tajkitij de itson uan kikokototsak hilos tein ika kikuaijilpijkaj.

15 Dalila kiluij: “Tikijtoua ke tinechtasojta, sayoj ke amo nochi tinechiluiani. Expaya tinechkajkayauak uan amo tinechiluia keyej titelchikauak”. 16 Kemej Dalila mojmostaj kikuejmolouaya, kikuasioujtij uan kitelyolajxitij. 17 Yejua ika Sansón kiluijya keyej tel chikauak: “Amo keman nechtekilianij notson, porin Dios nechijitak* desde ke niyolik* para yeski ninazareo. Komo nechkuatekiskiaj,* tamiskia nochikaualis”.

18 Dalila kiitak ke Sansón amo kikajkayaujtoyaok, ta kiyekiluijtoyaya keyej semi chikauak. Yejua ika niman tanauatij maj kinnotsatij akin kinixyekanayaj filisteos. Dalila kiniluij: “Xiualakan porin axkan nechyekiluijya keyej tel chikauak”. Yejuan yajkej kiitatoj uan kiuikilijkej tomin tein kimakaskiaj. 19 Dalila kikochtij Sansón itankuako. Satepan kinotsak se takat para maj kitekili chikome itrenzas. Ijkon Dalila kichiuak maj amo chikauakok. 20 Uan Dalila kitsajtsilij: “¡Sansón, filisteos mitskitskitij!”. Sansón ijsatikisak* uan moiluij: “Nikchiuas kemej ipa nikchiuani uan amo teyi nechchiuiliskej”. Sayoj ke amo kimatia ke Jehová amo kipaleuijtoyaok. 21 Filisteos kikitskijkej uan kikixtilijkej iixtololouan. Satepan kiuikakej Gaza uan kiilpijkej* ika ome cadenas tein chijchiujtoyaj de cobre. Uan kampa tsaktoya kichiujkej maj kimamalakacho se tet tein ika takuechouaj. 22 Sayoj ke itson oksepa moskaltij.

23 Akin kinixyekanayaj filisteos mosentilijkej para kimaktiliskej tapialmej inintatadios* Dagón. No mosentilijkej para iluichiuaskej porin tatankej. Yejuan kijtouayaj: “¡Todios techpaleuij maj tiktanikan Sansón, akin techtauelita!”. 24 Keman akin mosentilijkaj kiitakej inintatadios, peuak kiueyichiuaj. Yejuan kijtouayaj: “Todios techpaleuij maj tiktanikan akin techtauelita. Yejua semi tauejueloj nikan kampa tinemij uan kinmiktij miakej”.

25 Kemej semi yolpakiaj, peuak moiluiaj: “Xikualkuikan Sansón para maj tikejkelokan”. Yejuan kikixtitoj Sansón kampa tsaktoya para kikejkeloskej. Kiuikakej uan kiketsatoj tatajko den kalikximej. 26 Sansón kiluij okichpil tein kimakitskijtiaya: “Xinechpaleui maj nikmaajsi ikalikxiuan nejin kali para maj ompa nimotakitskili”. 27 (Itech nejon kali mosentilijkaj tel miakej takamej uan siuamej. No ompa yetoyaj nochin akin kinixyekanayaj filisteos. Uan kalkuako* yetoyaj eyi mil takamej uan siuamej akin kiueuetskilijtoyaj* Sansón).

28 Sansón kitataujtij Jehová: “NoUeyi Teko Jehová, nimitstataujtia xinechchikaua maski sayoj axkan. Filisteos nechinkixtilijkej nochi ome noixtololouan, xinechpaleui maj nikinixtaualti maski sayoj se noixtololo”.

29 Sansón motakitskilij itech kalikximej tein yetoyaj tatajko kali. Ika se imay kikitskij se kalikxit uan ika okse imay kikitskij okse. 30 Sansón chikauak kijtoj: “¡Maj iniuan nimiki filisteos!”. Uan chikauak kintopeuak kalikximej uan kali uetsik. Kinpechij nochin akin kinixyekanayaj filisteos uan akin ompa mosentilijkaj. Sansón ipa kinmiktijkaya miakej filisteos sayoj ke nejon tonal kinmiktij okachi miakej. Uan ijkuak yejua no mikik.

31 Satepan, ichankauan Sansón yajkej Gaza kikuitoj uan kitokatoj kampa kitokkaj Manóah akin katka itat. Miketekoch yetoya tatajko de Zorá uan Estaol. Sansón kinixyekanak israelitas 20 xiujmej.

17 Itech tal kampa tepeyoj kampa kintaxejxelouilijkaj ichankauan Efraín, nemia se takat akin monotsaya Miqueas. 2 Yejua kiluij inan: “Nejua nimitskuilij 12 kilos uan tajko* de plata tein tikpiaya. Nikelnamiki ke hasta tiknekia maj Dios kitatsakuilti akin mitsichtekilij”. Uan inan kiluij: “Maj Jehová mitstiochiua nokonetsin porin tinechiluij tein tikchiuak”. 3 Miqueas kikepilij inan 12 kilos uan tajko* de plata. Uan inan kiluij: “Nikmaktiliti Jehová nejin plata. Ximokauilia uan xikui para ika timochijchiuilis ome tatadiosmej* de plata”.

4 Miqueas kikepilij plata uan inan kixeloj ome kilo* plata uan kiuikilij akin tekitia ika plata. Nejon takat kichijchiuak ome tatadiosmej* uan kinkauatoj ichan Miqueas. 5 Yejua kipiaya se kali kampa kinueyichiuaya tatadiosmej.* Miqueas mochijchiuilij se koton tein kiluiaj efod* uan seki tatadiosmej,* uan kiixtalij semej ikoneuan maj mochiua itiopixkauj. 6 Ijkuak amo akin tekiuajtia ompa Israel. Sejse israelita kichiuaya tein kinemiliaya ke kuali yetok.

7 Ijkuak, moajsia se okichpil akin katka levita uan nemia ompa Belén tein poui Judá. Yejua mokaltalijka seki tonalmej iniuan ichankauan Judá. 8 Nejin okichpil kisak de Belén tein poui Judá uan kitemoto kani nemis. Yejua ajsito ichan Miqueas tein yetoya itech tal kampa tepeyoj kampa kintaxejxelouilijkaj ichankauan Efraín. 9 Miqueas kiluij nejon okichpil: “¿Kani tiualeuak?”. Okichpil kinankilij: “Nejua nilevita, nikisak de Belén tein poui Judá uan niktemojtinemi kani nichanchiuas”. 10 Miqueas kiluij: “Nikan ximokaua para tinechyolmajxitis uan timochiuas tinotiopixkauj. Xijxiujtika nimitsmakas 100 gramos* de plata, nimitsmakas tasal* uan nimitstamakas”. Yejua ika levita ompa mokauak. 11 Levita mokauak ichan Miqueas uan mochiuak kemej semej iokichpipiluan. 12 Miqueas kiixtalij maj mochiua itiopixkauj uan yejua kisentokak ompa chanchiuak. 13 Miqueas moluij: “Axkan Jehová nechtatiochiuis porin nejin levita notiopixkauj”.

18 Itech nejon tonalmej, amo akin tekiuajtia ompa Israel. Uan ichankauan Dan kitemojtinemiaj kani nemiskej. Yejuan ayamo uelia moaxkatiliayaj tal tein israelitas kinxejxelouilijkaj.

2 Ichankauan Dan kintitankej makuil takamej maj kiitatij tal kampa ueliskia nemiskej. Yejuan katkaj takuaujtamachmej uan ualeuayaj Zorá uan Estaol. Ichankauan Dan kiniluijkej: “Xiakan xitachiatij kani uelis tinemiskej”. Yejuan ajsikej ichan Miqueas uan ompa mokaujkej nejon youak. Ichan Miqueas yetoya kampa tepeyoj kampa kintaxejxelouilijkaj ichankauan Efraín. 3 Keman ajsitiayajya ompa, kitenixmatkej okichpil akin katka levita. Yejua ika kitajtanitoj:* “¿Toni tikchiujtok nikan? ¿Akoni mitsualkuik? ¿Uan keyej timokauako?”. 4 Yejua kiniluij keniuj Miqueas kipaleuijka uan no kiniluij ke kiyoleujka maj kitekitili kemej itiopixkauj. 5 Yejuan kiluijkej: “Timitstataujtiaj xiktajtani Dios maj techmatilti ox tikajsiskej kani tinemiskej”. 6 Tiopixkat kiniluij: “Amo ximotekipachokan porin Jehová namechpaleuis kampa nanyaskej”.

7 Uan nejon makuil takamej yajkej uan ajsitoj Lais. Yejuan kiitakej ke akin ompa nemiaj katkaj kemej sidonios, porin amo mouikayaj iniuan akin nemiaj itech okseki xolalmej. Sidonios uejka yetoyaj uan akin nemiaj Lais kualtsin nemiaj uan amo akin kinteuiaya. Uan ompaka amo onkaya nion se taixyekankej akin ueliskia kintalkuilis uan kintajyouiltis.

8 Yejuan mokepkej Zorá uan Estaol kampa yetoyaj nochin ichankauan Dan. Keman ompa ajsikej, kintajtanijkej: “¿Toni nankiitakej?”. 9 Yejuan kiniluijkej: “Tikitakej ke ueyi xolal Lais semi takualtsinkan, yejua ika tiouij tikinteuitij akin ompa nemij. Maj timoijsiuilikan uan maj tiakan timoaxkatilitij nejon talmej. 10 Keman ompa tiajsiskej, nankiitaskej ke kualtsin nemij, ke taueyika uan ke semi taonkak. Dios techpaleuis maj timoaxkatilikan nejon talmej”.

11 Uan ichankauan Dan kintitankej 600 soldados maj tateuitij. Yejuan kiskej de Zorá uan Estaol. 12 Yajkej Judá uan kitalijkej ininkaltsitsin* amo uejka de Quiryat-Jearim kampa pankalaki tonaltsin. Yejua ika ompa moixmati kemej Mahané-Dan* hasta axkan. 13 Satepan yajkej kampa tepeyoj kampa kintaxejxelouilijkaj ichankauan Efraín uan ajsikej ichan Miqueas.

14 Uan makuil takamej akin yajkaj tapijpiatoj Lais, kiniluijkej oksekin ichankauan Dan: “Itech nejin kalmej kipiaj se koton tein kiluiaj efod,* ome tatadiosmej* tein chijchiujtokej ika plata uan okseki tatadiosmej.* Xikixejekokan toni nankichiuaskej”. 15 Yejuan moketskej kaltenoj uan makuil takamej yajkej kiitatoj levita akin nemia ichan Miqueas. Keman kiajsitoj, kitajtanijkej ox kuali yetoya. 16 Uan oksekin 600 soldados, mochixtoyaj* kaltenoj. 17 Uan makuil takamej akin yajkaj tapijpiatoj Lais, kalakitoj kalijtik para kiuikaskej koton,* ome tatadiosmej tein chijchiujtoyaj ika plata uan okseki tatadiosmej.* (Tiopixkat ijkatoya kaltenoj iniuan 600 soldados). 18 Yejuan kalakitoj ichan Miqueas uan mokuilijkej koton,* ome tatadiosmej tein chijchiujtoyaj ika plata uan okseki tatadiosmej. Uan tiopixkat kiniluij: “¿Keyej namouikilijtokej?”. 19 Yejuan kiluijkej: “¡Ximotentsakua! Amo teyi xikijto. Touan xiouj para titechyolmajxitis uan timochiuas titotiopixkauj. ¿Toni okachi tikuelitaskia? ¿Tiyeski tiitiopixkauj sayoj se takat? ¿Oso tikneki tiyeski tiinintiopixkauj miakej israelitas akin pouij itech se ueyi kalyetonij?”. 20 Tiopixkat kiuelitak nejon; yejua ika kikuik koton,* ome tatadiosmej* tein chijchiujtoyaj ika plata uan okseki tatadiosmej uan yajki iniuan.

21 Yejuan kisteujkej uan kintayekanaltijkej ininkoneuan, inintapialuan uan nochi tein kipiayaj. 22 Ivecinos Miqueas mosentilijkej para kintokatiaskej ichankauan Dan, sayoj ke yejuan uejka yajtoyajya. Maski ijkon kinajsitoj. 23 Keman kinajsitoj, kinikantsajtsilijkej. Ichankauan Dan moixkepkej uan kiluijkej Miqueas: “¿Toni timitschiuilijkej? ¿Keyej miakej tikinsentilij?”. 24 Miqueas kiniluij: “Nanechkuilijkej tatadiosmej* tein nimoinchijchiuilij, uan no nankiuikakej notiopixkauj. ¿Keniuj maj amo teyi nikchiua ta amo teyi nanechkauilijkej?”. 25 Ichankauan Dan kiluijkej: “Amo xitechtsajtsili, amokan namechteuijkej* seki takamej akin niman kualanij. Yejuan uelis mitsmiktiskej uan no kinmiktiskej nochin akin nemij mochan”. 26 Keman kitamiiluijkej nejon, ichankauan Dan yajkej. Miqueas kiitak ke amo ueliskia kintanis porin okachi miakej katkaj, yejua ika mokepak ichan.

27 Ichankauan Dan mouikilijkej itatadiosuan* uan itiopixkauj Miqueas uan yajkej Lais. Akin nemiaj Lais kualtsin nemiaj uan amo akin kinteuiaya. Keman ichankauan Dan ompa ajsitoj, kinmiktijkej nochin akin ompa nemiaj ika ininmachete tein ojkan tenej.* Uan satepan kitikuiltijkej ueyi xolal. 28 Amo akin kinpaleuij akin nemiaj Lais porin yejuan amo mokuiaj iniuan akin nemiaj itech okseki xolalmej uan uejka yetoya de Sidón. (Ueyi xolal Lais yetok itech tal tamanis* tein poui Bet-Rehob). Satepan ichankauan Dan oksepa kiyekchijchiujkej ueyi xolal uan ompa mokaltalijkej. 29 Uan no, kipatilijkej itokay ueyi xolal Lais uan kitokaytijkej Dan. Kitokaytijkej kemej motokaytiaya ininuejkaujtat akin katka ikoneuj Israel. 30 Satepan, ichankauan Dan ompa kitachijchiuilijkej tatadios* para kiueyichiuaskej. Uan Jonatán uan ikoneuan mochiujkej inintiopixkauan ichankauan Dan hasta keman israelitas kinkixtijkej de kampa nemiaj uan kinuikakej okseko. Iuejkaujtat Jonatán katka Guersom uan itat Guersom katka Moisés. 31 Uan ompa itech ueyi xolal kitachijchiuilijkej tatadios tein Miqueas kichijchiujka. Nochi in tonalmej keman ikaltsin toTajtsin Dios* yetoya Siló, ichankauan Dan kiueyichiujkej tatadios tein Miqueas kichijchiujka.

19 Itech nejon tonalmej amo akin tekiuajtia ompa Israel. Se tonal, se takat levita monamiktij iuan se siuatsin* akin kayot Belén tein poui Judá. Nejon levita nemia kampa tepeyoj kampa kintaxejxelouilijkaj ichankauan Efraín, uan ichan semi uejka yetoya. 2 Sayoj ke isiuatsin kikajkayauak uan kikaujteuak. Siuatsin mokepak ichan itat akin nemia Belén tein poui Judá uan ompa mokauak naui metsti. 3 Yejua ika, nejon levita yajki Belén uan kitataujtito isiuatsin maj iuan mokepa. Iuan yajki se itakeual uan kinuikak ome burros. Keman ompa ajsik, siuatsin kiluij maj kalaki ichan itat. Uan itat semi mouelitak keman kiixmatik imontikauj. 4 Yejua ika imontat levita kitataujtij maj mokaua eyi tonal. Yejua mokauak uan takuajkej uan tatayikej.

5 Keman levita kichiuaskiaya naui tonal ompa, kualkan meuak iuan isiuatsin para mokepaskej ichan. Sayoj ke itat siuatsin kiluij imontikauj: “Xitakuajteua para titaxikos uan satepan tias”. 6 Yejuan motalijkej, sentakuajkej uan tatayikej. Satepan itat siuatsin kiluij imontikauj: “Nimitstataujtia nikan ximokauaok nejin youak uan ximoseui”. 7 Keman takat moketsak para yas, imontat kitataujtij maj mokauaok. Uan yejua oksepa mokauak nejon youak.

8 Keman levita kichiuaskiaya makuil tonal ompa, kualkan meuak iuan isiuatsin para yaskej. Sayoj ke itat siuatsin kiluij imontikauj: “Xitakuaujteuaok para titaxikos”. Nochin omen peuak takuaj uan sentonaltijkej. 9 Keman levita moketsak uan kikuiteuayaya isiuatsin uan itakeual, imontat kiluij: “Xikita, tiotakya. Okachi kuali nikan ximokauakan uan ximoseuikan. Mosta kualkan nameuaskej uan nanyaskej namochan”.* 10 Sayoj ke levita amo kinekikok mokauas. Kikuiteuak isiuatsin, itakeual uan ome iburros uan yajki Jebús, tein no moixmati kemej Jerusalén.

11 Keman ajsitiayajya Jebús, tapoyaujtoyaya. Yejua ika itakeual kiluij: “Maj nejin youak timokauakan kampa nemij jebuseos”. 12 Sayoj ke levita kiluij: “Amo uelis timokauaskej kampa nemij akin amo israelitas. Tiaskej hasta Guibeá”. 13 Levita kiluij itakeual: “Maj timoijsiuilikan para tiajsiskej Guibeá oso Ramá uan ompa timokauaskej”. 14 Yejuan kisentokakej nejnenkej. Uan keman ajsitoyajya Guibeá motayoualtijtoyajya. Guibeá yetoya kampa kintaxejxelouilijkaj ichankauan Benjamín.

15 Yejuan ajsitoj ueyi xolal Guibeá uan kalakkej para ompa mokauaskej nejon youak. Motalitoj plaza, sayoj ke amo akin kinyoleuaya maj mokauatij ininchan. 16 Nejon youak ajsito se takat akin tatajtsinya katka, akin yajka tekitito milaj. Yejua achto nemia kampa tepeyoj kampa kintaxejxelouilijkaj ichankauan Efraín, sayoj ke axkan mokaltalijka Guibeá. Nochin takamej akin nemiaj Guibeá pouiaj iniuan ichankauan Benjamín. 17 Nejon takat akin tatajtsinya kiitak ke levita yetoya itech plaza, yejua ika motokij uan kitajtanij:* “¿De kani tiuitse uan kani tiouj?”. 18 Levita kiluij: “Tiuitsej de Belén tein poui Judá uan tiouij nochan. Nejua ninemi kampa tepeyoj kampa kintaxejxelouilijkej ichankauan Efraín. Nochan semi uejka yetok. Niajka Belén uan axkan niouj kampa kiueyichiuaj Jehová.* Tiualajkej nikan plaza, sayoj ke ayamo akin techyoleua maj timokauatij ichan. 19 Tikpiaj tein kikuaskej toburros. Uan no tikualkuij pantsin tein tikuaskej uan vino tein titayiskej. Amo teyi techpoloua, ta sayoj tiktemojtokej kani timokauaskej”. 20 Takat akin tatajtsinya katka kiluij: “Ximokauatij nochan uan nejua namechmakas nochi tein namechpolosok. Amo xikochikan nikan plaza”. 21 Takat kinuikak ichan uan yejuan mometspajpakkej, takuajkej uan tatayikej. Uan takat no kintamakak burros.

22 Keman yejuan kualtsin takuajtoyaj, seki takamej akin amo yolkualmej katkaj kiyoualotoj ichan takat akin tatajtsinya. Yejuan peuak kitejtelouaj* puerta uan kiluiayaj takat akin tatajtsinya: “¡Xikixti takat akin tikalakij mochan para iuan timotekaskej!”. 23 Takat akin tatajtsinya katka kisak uan kiniluij: “Nokniuan, namechtataujtia amo xikchiuakan nejin tein tel amo kuali. Nejua nikyoleuak nejin takat maj mokaua nochan. Tein nankinemiliaj nankichiuaskej tepinaujtij, amo xikchiuakan. 24 Nikpia se nosiuapil akin ayamo moteka iuan se takat, uan no nikan yetok isiuatsin nejin takat. Nikinkixtis para ininka ximauiltikan komo amo ueli namotsakuiliaj uan nankitelnekij namotekaskej iuan aksa.* Sayoj ke amo teyi xikchiuilikan nejin takat”.

25 Sayoj ke takamej amo kinekkej kikakiskej. Yejua ika levita kikalankixtij isiuatsin uan kinmakak nejon takamej. Uan yejuan ika mauiltijkej nochi youal uan kikaujkej maj youi hasta keman yaya tanesitia. 26 Siuatsin kualkantsisan ajsito ichan takat akin tatajtsinya. Uetsito puertajtenoj uan ompa mokauak hasta keman yektanesik. 27 Itakatsin nejon siuatsin kualkan meuak para yas ichan. Keman tatapoj, kiitak ke isiuatsin uetstoya kaltenoj uan kikitskijtoya puerta ika ome imauan. 28 Yejua kiluij: “Ximeua, tiouijya”. Sayoj ke siuatsin amo tanankilij porin ipa momikilijkaya. Levita kiajokuik, kiajkotalij itech iburro uan yajki ichan.

29 Keman ajsik ichan, kikuik se cuchillo* uan peuak kitejteki isiuatsin. Kikixtij 12 cachos uan kintitanilij sejse cacho 12 uejueyi kalyetonij israelitas. 30 Keman israelitas kiitakej tein levita kintitanilij, kijtojkej: “Desde keman israelitas kiskej de Egipto, amo keman tikitstoyaj maj mochiua nejin. Maj timonojnotsakan uan maj tikyekitakan tein mochiuak para tikixtaliskej toni tikchiuatij”.

20 Yejua ika, nochin takamej israelitas kiixtalijkej mosentiliskej ompa Mizpá keman Jehová kinitstoya. Mosentilijkej nochin akin nemiaj Dan hasta Beer-Seba uan nochin akin nemiaj Galaad. 2 Taixyekananij israelitas uan akin kinixyekanayaj uejueyi kalyetonij yetoyaj itech nechikol tein kichiujkej itekitikauan Dios. Ijkuak, mosentilijkej 400 mil soldados akin kiuikayaj ininmachete tein ojkan tenej.*

3 (Ichankauan Benjamín kimatkej ke nochin takamej israelitas mosentilijkej ompa Mizpá).

Takamej israelitas kintajtanijkej* akin mosentilijkej: “Xitechiluikan, ¿toni panok? ¿Keyej kimiktijkej nejin siuatsin?”. 4 Uan levita akin kimiktilijkej isiuatsin,* kijtoj: “Niajsik iuan nosiuatsin ompa Guibeá tein poui Benjamín para ompa timokauaskej nejon youak. 5 Uan akin nemiaj Guibeá kiyoualokoj kali kampa timokaujkaj. Yejuan kinekiaj nechmiktiskej. Uan kemej amo uelkej, ika mauiltijkej nosiuatsin uan yejua mikik. 6 Yejuan kichiujkej tein tel amo kuali uan tein tepinaujtij. Uan kemej niknekia maj nochin kimatikan, niktejtekik nosiuatsin uan nikintitanilij sejse cacho nochin uejueyi kalyetonij israelitas. 7 Uan axkan, namejuan israelitas xikixejekokan toni nankichiuatij”.

8 Nochin moketskej uan kisenijtojkej: “Amo akin mokepas ichan, 9 ta tiktatamotatij tetsitsin* para tikitaskej akonimej yaskej kinteuitiuij akin nemij Guibeá. 10 Nochin uejueyi kalyetonij israelitas moneki kintitaniskej soldados. Uan tikinijitaskej* sekin para maj kitemokan tein kikuaskej nochin soldados. Komo kintitanij 100, tikinijitaskej 10, komo kintitanij mil, tikinijitaskej 100 uan komo kintitanij 10 mil tikinijitaskej mil. Ijkon okseki soldados uelis kinteuiskej akin nemij Guibeá para kintatsakuiltiskej porin kichiujkej tein tel amo kuali”. 11 Uan nochin soldados israelitas kiixejekojkej mosenpaleuiskej para kinteuiskej akin nemiaj Guibeá.

12 Nochin israelitas tanauatijkej maj kinitatij ichankauan Benjamín, uan maj kiniluikan takamej: “¿Keyej nankikaujkej maj mochiua nejin tein tel amo kuali kampa nanemij? 13 Xikinkixtikan nejon takamej akin amo yolkualmej para maj tikinmiktikan. Uan ijkon ixpoliuiskej akin kichiujkej tein amo kuali”. Sayoj ke ichankauan Benjamín amo kinekkej kichiuaskej tein kiniluijkej okseki israelitas.

14 Nochin takamej akin pouiaj iniuan ichankauan Benjamín mosentilijkej ompa Guibeá para kinteuiskej okseki israelitas. 15 Nejon tonal, ichankauan Benjamín kinsentilijkej 26 mil takamej akin kiuikayaj ininmachete tein ojkan tenej.* No kinsentilijkej 700 soldados akin semi kuali tateuiayaj akin nemiaj Guibeá. 16 De nochin soldados akin mosentilijkej, yetoyaj 700 akin semi kuali tateuiayaj ika ininopochmay. Nochin nejon soldados uelia kitamotayaj se tet ika ateuitats* uan niman kikuiltiayaj se tsonti.

17 Okseki israelitas kinsentilijkej 400 mil soldados akin kiuikayaj ininmachete tein onkan tenej.* Nochin tel kuali tateuiayaj. 18 Yejuan yajkej Betel para kitajtaniskej Dios: “¿Akonimej tayekanaskej keman tikinteuitiuij ichankauan Benjamín?”. Jehová kiniluij: “Tayekanaskej ichankauan Judá”.

19 Mostika, israelitas kualkan meujkej uan kitalitoj ininkaltsitsin* amo uejka de Guibeá para tateuiskej.

20 Soldados israelitas motejtekpankej taixpan de Guibeá para kinteuiskej ichankauan Benjamín. 21 Nejon tonal, ichankauan Benjamín akin yetoyaj Guibeá, kinixnamikitoj israelitas uan kinmiktijkej 22 mil. 22 Sayoj ke soldados israelitas amo moujkej, ta oksepa motejtekpankej para tateuiskej. Motejtekpankej kampa mosentilijkaj yekinika tonal. 23 Uan no, israelitas yajkej chokatoj Betel uan kitataujtijkej Jehová hasta keman tayouak. Yejuan kitajtanijkej Jehová: “¿Maj oksepa tikinteuitij ichankauan Benjamín akin toparientes?”. Uan Jehová kiniluij: “Xiakan xikinteuitij”.

24 Israelitas oksepa yajkej kampa yetoyaj ichankauan Benjamín. 25 Uan ichankauan Benjamín kiskej de Guibeá para kinteuiskej. Nejon tonal kinmiktijkejok 18 mil israelitas, akin kiuikayaj ininmachete tein ojkan tenej. 26 Satepan soldados israelitas yajkej Betel. Ompa motalitoj, chokakej uan kitataujtijkej Jehová uan amo takuajkej hasta keman tayouak. Yejuan kichichinouilijkej Jehová seki tapialmej uan kimaktilijkej seki taman para sentakuaskej.* 27 Ijkuak, tatiochiualkaxon* tein iaxka toTajtsin Dios yetoya Betel. Yejua ika, israelitas kitajtanijkej Jehová toni monekia kichiuaskej. 28 (Ijkuak, Finehás katka tiopixkat. Yejua katka ikoneuj Eleazar uan iixuiuj Aarón). Israelitas kitajtanijkej Dios: “¿Maj oksepa tikinteuitij ichankauan Benjamín akin toparientes? ¿Oso maj amo teyi tikinchiuilikanok?”. Jehová kinnankilij: “Xiakan xikinteuitij. Mosta namechpaleuis xikintanikan”. 29 Yejua ika, seki israelitas yajkej Guibeá uan ompaka motatitoj.*

30 Israelitas oksepa* yajkej Guibeá kinteuitoj ichankauan Benjamín. Motejtekpankej para tateuiskej kemej ipa kichiujkaj achto. 31 Keman ichankauan Benjamín kinixnamikitoj, israelitas cholojkej para maj ichankauan Benjamín kintokatianij. Yejuan motalojkej uan kintokatiajkej itech ueyi ojti tein pankisa Betel uan oksekin kintokatiajkej itech ojti tein ualeua Guibeá. Ichankauan Benjamín oksepa peuak kinteuiaj uan kinmiktijkej kemej 30 soldados israelitas. 32 Ichankauan Benjamín moiluiayaj: “Oksepa tikintantokej”. Sayoj ke israelitas moiluiayaj: “Maj timotalokan uan maj techtokatiakan hasta uejueyi ojmej para maj kikaujteuakan ininueyi xolal”. 33 Soldados israelitas yajkej Baal-Tamar uan motejtekpankej para kinteuiskej ichankauan Benjamín. Uan okseki israelitas akin motatijtoyaj kiskej para kinteuiskej akin mokaujkaj Guibeá. 34 Uan 10 mil soldados israelitas akin semi kuali tateuiayaj ajsitoj Guibeá uan peuak kinteuiaj ichankauan Benjamín. Sayoj ke, ichankauan Benjamín amo kimatiaj tein yaya kinpanoti.

35 Jehová kichiuak maj israelitas kintanikan ichankauan Benjamín. Nejon tonal, israelitas kinmiktijkej 25,100* takamej akin kiuikayaj ininmachete tein ojkan tenej.

36 Keman ichankauan Benjamín kiitakej ke soldados israelitas cholojtoyaj kinemilijkej ke kintaniskiaj. Sayoj ke yejuan cholojkej porin kiyekmatiaj ke okseki soldados motatijtoyaj* para kinteuiskej akin mokaujkaj Guibeá. 37 Soldados akin motatijtoyaj niman kalakitoj Guibeá. Momoyaujkej* itech nochi ueyi xolal uan kinmiktijkej nochin akin ompa nemiaj ika ininmachete tein ojkan tenej.

38 Nochin soldados israelitas motenkaujkaj ke soldados akin motatiskiaj,* kitikuiltiskiaj ueyi xolal. Keman okseki soldados kiitaskiaj pokti, kimatiskiaj ke kalakkajya ueyi xolal.

39 Keman israelitas cholojteujkej, ichankauan Benjamín peuak kinteuiaj. Kinmiktijkej kemej 30 soldados israelitas. Ichankauan Benjamín moiluiayaj: “Oksepa tikintantokej”. 40 Sayoj ke israelitas kiitakej pokti tein kinextiaya ke okseki soldados kalakkajya Guibeá. Uan keman ichankauan Benjamín ikantachiakej, kiitakej ke nochi ininueyi xolal chichinaujtoya uan uejkapan mokeketsaya tit.* 41 Ijkuak, soldados akin cholojtoyaj mokepkej uan peuak kinteuiaj ichankauan Benjamín. Yejuan motelmoujtijkej keman kiitakej ke tapolojkajya. 42 Yejua ika yajkej taluakyan porin kinekiaj choloskej. Sayoj ke soldados israelitas motalojkej uan kintokatiajkej. Uan no, takamej israelitas akin nemiaj itech okseki uejueyi xolalmej, no kinmijmiktijkej ichankauan Benjamín. 43 Ichankauan Benjamín amo uelikok cholojkej porin kampa yeski kintsakuiliayaj. Soldados israelitas kintankej ichankauan Benjamín taixpan de Guibeá, kampa ualkisa tonaltsin. 44 Kinmiktijkej 18 mil ichankauan Benjamín. Nochin nejon takamej katkaj soldados akin semi kuali tateuiayaj.

45 Okseki ichankauan Benjamín cholojteujkej taluakyan, kampa yetok tepejxit tein moixmati kemej Rimón. Soldados israelitas kinmiktijkej makuil mil ichankauan Benjamín itech uejueyi ojmej. Motalojkej uan kintokatiajkej hasta Guidom uan kinmiktijkej okseki ome mil takamej. 46 Nejon tonal kinmiktijkej 25 mil soldados akin pouiaj iniuan ichankauan Benjamín. Nochin nejon soldados kiuikayaj ininmachete tein ojkan tenej uan semi kuali tateuiayaj. 47 Sayoj ke 600 soldados cholojteujkej taluakyan. Yejuan motatijkej* naui metsti itech tepejxit tein moixmati kemej Rimón.

48 Uan soldados israelitas mokepkej uan kinmiktijkej nochin ichankauan Benjamín akin mokauayajok itech nochi uejueyi xolalmej. No kinmiktijkej inintapialuan uan kintikuiltijtiayaj uejueyi xolalmej kampa panotiayaj.

21 Keman israelitas mosentilijkaj ompa Mizpá, kijtojkaj ke kichiuaskiaj nejin: “Amo akin kinamiktis isiuapil iuan semej takamej akin pouij iniuan ichankauan Benjamín”. 2 Yejua ika israelitas yajkej Betel. Ompa motalijkej uan tel chokakej hasta keman tayouak uan Dios kinitstoya. 3 Yejuan kijtouayaj: “ToDios* Jehová, semi amo kuali tein techpanok. Axkan ixpoliuik semej uejueyi kalyetonij”. 4 Mostika, israelitas kualkan meujkej uan kichijchiujkej se altar. Ompa kichichinouilijkej Dios tapialmej uan kimaktilijkej seki taman para sentakuaskej.*

5 Israelitas kijtojkaj ke kimiktiskiaj akin amo yaskia Mizpá. Nejon tonal Jehová kiitak keman mosentilijkej. Yejua ika israelitas kijtojkej: “¿Akonimej amo mosentilijkaj touan ompa Mizpá keman Jehová techitstoya?”. 6 Israelitas semi motayokoltijkej porin ichankauan Benjamín kinpanoka tein tel amo kuali. Yejua ika moiluiayaj: “Axkan ixpoliuik semej uejueyi kalyetonij. 7 Uan tejuan timotenkaujkej itokaykopa Jehová ke amo tikinnamiktiskej tosiuapipiluan iniuan ichankauan Benjamín. ¿Kani tikinkuitiuij siuamej para maj monamiktikan iniuan takamej akin mokauajok?”.

8 Israelitas tajtankej:* “¿Akonimej amo mosentilijkaj touan ompa Mizpá keman Jehová techitstoya?”. Keman israelitas mosentilijkaj ompa Mizpá kiitakej ke amo yajkaj akin kayomej Jabés-Galaad. 9 Porin keman kinpoujkaj nochin akin mosentilijkaj amo kinitakej akin kayomej Jabés-Galaad. 10 Yejua ika israelitas kintitankej ompa 12 mil soldados akin semi kuali tateuiayaj. Uan kiniluijkej: “Xikuikan namomachete tein ojkan tenej* uan xikinteuitij nochin akin nemij Jabés-Galaad, hasta siuamej uan konemej. 11 Xikinmiktikan nochin takamej uan no xikinmiktikan nochin siuamej akin motekanij iuan se takat”. 12 Keman soldados yajkej Jabés-Galaad kinajsikej 400 ichpochmej akin amo keman motektoyaj iuan se takat. Soldados kinuikakej nejon ichpochmej ompa Siló, tein yetok Canaán kampa kitalijkaj ininkaltsitsin.*

13 Satepan, israelitas tanauatijkej maj kiniluitij ichankauan Benjamín ke amo kinteuiskiajok. Nejon takamej motatijtoyaj* itech tepejxit tein moixmati kemej Rimón. 14 Yejua ika, takamej akin pouiaj iniuan ichankauan Benjamín mokepkej kampa kintaxejxelouilijkaj. Uan israelitas kinmajmakakej ichpochmej akin kinualkuikaj de Jabés-Galaad para maj iniuan monamiktikan. Sayoj ke amo ajsikej para nochin takamej. 15 Uan israelitas semi kiniknelijkej ichankauan Benjamín porin Jehová kichiujka maj uejueyi kalyetonij moxexelokan. 16 Taixyekananij israelitas kijtojkej: “Nochin siuamej akin pouiaj iniuan ichankauan Benjamín kinmiktijkej, uan yetokejok seki takamej akin ayamo monamiktiaj. ¿Kani tikinkuitiuij siuamej para maj iniuan monamiktikan?”. 17 Sekin tanankilijkej: “Ichankauan Benjamín moneki kipiaskej ininkoneuan* para maj amo ixpoliui semej uejueyi kalyetonij. 18 Sayoj ke tejuan timotenkaujkej ke amo tikinnamiktiskiaj tosiuapipiluan iniuan. Tinochin tikijtojkaj: ‘Maj Dios kitatsakuilti akin kinamiktis isiuapil iuan semej takamej akin pouij iniuan ichankauan Benjamín’”.

19 Taixyekananij israelitas no kijtojkej: “Xijxiujtika kiiluichiuiliaj Jehová ompa Siló, tein yetok tatajko de Betel uan Leboná. Ueyi xolal Siló yetok kampa ualkisa tonaltsin, tanakastan den ueyi ojti tein peua Betel uan ajsi hasta Siquem”. 20 Yejua ika kiniluijkej takamej akin pouiaj iniuan ichankauan Benjamín: “Xiakan kampa kitokaj uvas uan ompa ximotatikan.* 21 Uan keman nankiitaskej ke ichpochmej peua mijtotiaj ompa Siló, xikisakan uan ximouikilikan sejse ichpoch para iuan namonamiktiskej. Satepan, ximokepakan kampa namechtaxejxelouilijkej. 22 Komo inintatuan oso ininikniuan techiluikij teisa, tikiniluiskej: ‘Tejuan sayoj tiknekiaj tikinpaleuiskej porin keman titateuitoj amo nochin uelik tikinajxilijkej se siuat para iuan monamiktiskej. Uan namejuan namotenkaujkej ke amo nankinnamiktiskej namoichpochuan iniuan. Yejua ika nejon takamej kinichtekkej namoichpochuan para namejuan amo ximotajtakolmakakan porin amo nankichiujkej tein namotenkaujkej’”.

23 Uan takamej akin pouiaj iniuan ichankauan Benjamín kichiujkej tein kiniluijkej. Sejse takat mouikilij se ichpoch akin mijtotijtoya para iuan monamiktis. Satepan mokepkej kampa kintaxejxelouilijkaj, kinyekchijchiujkej uejueyi xolalmej uan ompa mokaltalijkej.

24 Uan israelitas yajkej de Siló uan mokepkej kampa kintaxejxelouilijkaj, kampa yetoyaj ininchankauan.

25 Ijkuak amo akin tekiuajtia ompa Israel. Sejse israelita kichiuaya tein kinemiliaya ke kuali yetok.