2 SAMUEL

1 Itech nejon tonalmej Saúl mikkaya. Satepan ke David kintanik amalequitas mokepak Ziclag uan ompa mokauak ome tonal. 2 Uiptika, ajsik Ziclag se takat akin ualeujka de kampa yetoyaj Saúl uan isoldados. Yejua kitsayanka itasal uan mokuatemilijka tal. Keman kiitak David, motankuaketsak uan moixpiloj hasta talpan.

3 David kitajtanij:* “¿De kani tiuitse?”. Takat kinankilij: “Niualcholojteuak de kampa yetoyaj soldados israelitas”. 4 Uan David kiluij: “Xinechilui toni panok”. Takat kiluij: “Soldados israelitas cholojkej uan miakej mikkej. Saúl uan iokichpil Jonatán no mikkej”. 5 Uan David kitajtanij takat: “¿Keniuj tikmati ke mikkej Saúl uan iokichpil Jonatán?”. 6 Takat kiluij: “Nejua nietoya itech tepet Guilboa uan nikitak ke Saúl motakitskilijtoya itech ilanza,* uan kiajsitoyajya carros tein filisteos kikuij para tateuiskej uan soldados akin yayaj itech caballos. 7 Keman Saúl moixkepak uan nechitak, nechnotsak maj nikajsiti. Nejua nikiluij: ‘Nikan nietok, ¿toni tikneki maj nikchiua?’. 8 Saúl nechtajtanij: ‘¿Tiakoni?’. Nejua niknankilij: ‘Nejua niamalequita’. 9 Yejua nechiluij: ‘Nimitstataujtia xinechmikti porin semi nitajyouijtok, sayoj ke amo ueli nimiki’. 10 Yejua ika nikmiktij. Kemej semi kikokojkaj, nikmatia ke amo taxikoskiaok. Nikuakixtilij icorona uan nikixtilij pulsera tein kipiaya iajkolko para nimitsualkuilis, tejuatsin”.

11 Keman David kikakik nejon, kitsayanak itasal uan nochin takamej akin iuan yetoyaj no kitsayankej inintasal. 12 Yejuan ajkotsajtsikej, chokakej uan amo takuajkej hasta tiotak porin momikilijka Saúl, Jonatán akin katka iokichpil Saúl uan miakej israelitas akin pouiaj itech ixolal Jehová. Nochin kinmiktijkaj ika machete tein ojkan tenej.*

13 David kitajtanij nejon takat: “¿Kani tikayot?”. Takat kinankilij: “Nejua niikoneuj se amalequita akin nemiko kampa nemij israelitas”. 14 David kiluij: “¿Keyej tikmiktij* akin Jehová kijitak?”. 15 Satepan kiluij semej isoldados: “Xiuiki uan xikmikti”. Uan soldado kimiktij. 16 Achto ke kimiktiskiaj nejon takat, David kiluij: “Tejua moselti timotatsakuiltij porin tikijtoj ke tikmiktij akin Jehová kijitak”.

17 David semi tayokoxtoya porin momikilijkaj Saúl uan Jonatán akin katka iokichpil uan peuak kincantarouilia se tatsotson. 18 Nejon tatsotson monotsa “Arco”* uan David kijtoj maj kinnextilianij nochin akin nemiaj Judá. Ijkuiliujtok itech amatajkuilol tein moixmati kemej Jasar uan kijtoua:

19 “¡Teikneltijkej akin nemij itech xolal Israel!

Takamej akin ueyichiuanimej mikkej itech tepemej tein yetokej ompa.

¡Mikkej akin semi kuali tateuiayaj!

25 ¡Akin semi kuali tateuiayaj!

¡Jonatán mikik itech tepemej! mikkej keman tateuitoj

sayoj ke okachi nikpatiuita keniuj tiknextij ke tinechtasojtaya.*

2 Satepan, David kitajtanij* Jehová: “¿Maj nipankisa semej uejueyi xolalmej tein yetokej Judá?”. Jehová kiluij: “Kemaj, xipankisa”. Yejua ika David oksepa kitajtanij: “¿Kani maj niouj?”. Yejua kinankilij: “Xiouj Hebrón”. 2 Yejua ika David pankisak Hebrón uan kinuikak isiuauan. Se monotsaya Ahinoam akin kayot Jezreel uan okse monotsaya Abigaíl akin katka isiuatsin Nabal akin kayot Carmelo. Sayoj ke Nabal momikilijkaya. 3 Takamej akin kipaleuiayaj David no yajkej uan kinuikakej ininchankauan. Nochin mokaltalijkej itech uejueyi xolalmej tein yetokej ompa Hebrón. 4 Satepan, seki takamej akin pouiaj iniuan ikoneuan Judá kiitatoj David uan kikuatekilijkej aceite para maj yejua kinixyekana nochin ikoneuan Judá.

Nejon takamej kiluijkej David: “Keman mikik Saúl, takamej akin nemij Jabés-Galaad kitokkej”. 5 Yejua ika David kintitanik seki takamej maj kinitatij akin nemiaj Jabés-Galaad uan maj kiniluitij: “Maj Jehová namechtatiochiui porin nankitokkej namoteko Saúl, ijkon nankinextilijkej ke semi nankitasojtayaj. 6 Maj Jehová nochipa namechnextili ke namechtasojta. Nejua no namechnextilis ke namechtasojta porin nankitokkej Saúl. 7 Namoteko Saúl amo nemiok uan akin pouij iniuan ikoneuan Judá nechixtalijkej kemej inintekiuaj. Yejua ika namechiluia xiyolchikaujkej uan amo ximouikan”.

8 Sayoj ke Abner,* akin kinixyekanaya isoldados Saúl kiuikak Is-Bóset hasta Mahanaim, oksekopa den ueyiat Jordán. Is-Bóset katka iokichpil Saúl. 9 Abner kiixtalij Is-Bóset kemej tekiuaj para maj kinixyekana asuritas uan akin nemiaj Galaad uan Jezreel. Is-Bóset no tekiuajtiskia kampa kintaxejxelouilijkaj ikoneuan Efraín uan Benjamín, uan nochi talmej tein moajsiaj Israel. 10 Is-Bóset iokichpil Saúl, kipiaya 40 xiujmej keman kiixtalijkej kemej tekiuaj ompa Israel, uan tekiuajtik ome xiuit. Sayoj ke akin pouiaj iniuan ikoneuan Judá kipaleuijkej David porin yejua katka inintekiuaj. 11 David kinixyekanak akin pouiaj iniuan ikoneuan Judá chikome xiuit uan chikuasen metsti. Yejua nemia Hebrón uan desde ompa tekiuajtia.

12 Abner uan isoldados Is-Bóset yetoyaj Mahanaim. Satepan kiskej uan yajkej Gabaón. Abner katka iokichpil Ner uan Is-Bóset katka iokichpil Saúl. 13 Joab iokichpil Zeruyá uan isoldados David akin yetoyaj Hebrón no yajkej Gabaón. Yejuan moajsitoj iuan Abner uan isoldados Is-Bóset kampa yetoya se ueyi talkoyok kampa kisentiliayaj at. Sekin motalijkej sekopa den ueyi talkoyok uan oksekin oksekopa. 14 Uan Abner kiluij Joab: “Maj soldados moketsakan uan maj moteuikan* toixpan”. Joab kinankilij: “Maj moteuikan”. 15 Yejua ika, soldados moketsatoj tatajko. Katkaj 12 isoldados Is-Bóset akin pouiaj iniuan ikoneuan Benjamín uan 12 isoldados David. 16 Nochin soldados peuak moteuiaj. Sejse soldado kikuik imachete tein ojkan tenej* uan kielchikiujtokilij akin iuan moteuijtoya uan nochin momijmiktijkej. Yejua ika, kampa moteuijkej tatokaytijkej Helcat-Hazurim* uan yetok ompa Gabaón.

17 Nejon tonal semi momijmiktijkej. Isoldados David kitankej Abner uan soldados israelitas. 18 Ompa yetoyaj ikoneuan Zeruyá: Joab, Abisái uan Asahel. Asahel ijsiujka motalouaya kemej se masat. 19 Uan Asahel motaloj para kitokateuas Abner, uan kitokatiaya kampa yeski yaya. 20 Keman Abner moixkepak, kitajtanij: “¿Tejua Asahel?”. Asahel kinankilij: “Kemaj, nejua”. 21 Abner kiluij: “Xinechkauaya. Xikitskiti semej soldados uan xikuili nochi tein kipia”. Sayoj ke Asahel kisentokak kitokatiajki. 22 Yejua ika Abner oksepa kiluij Asahel: “Xinechkauaya, amo nikneki nimitsmiktis. Porin komo nimitsmiktia amo uelisok nikixitas mokniuj Joab”. 23 Sayoj ke Asahel amo kikakik, yejua ika Abner kipoxtokilij ilanza* uan nalkisato ipanko. Asahel uetsito uan mikik. Uan nochin akin panouayaj kampa uetstoya Asahel moketsayaj para kiitaskej.

24 Uan Joab uan Abisái motalojkej para kitokatiaskej Abner. Keman tapoyauik, ajsikej tepetsin Amá tein yetok taixpan de Guíah. Nejin tepetsin yetok itech ojti tein ajsi taluakyan tein poui Gabaón. 25 Uan soldados akin pouiaj iniuan ikoneuan Benjamín mosentilijkej iikan Abner. Uan nochin moketsatoj ikuapan se tepetsin. 26 Abner kitsajtsilij Joab: “Xikinilui mosoldados maj amo kintokatiakanok ininikniuan. ¿Xe tikneki maj tiksentokakan timomijmiktikan ika tomachete tein ojkan tenej? ¿Xe amo tikita ke nejin kichiuas maj okachi timotauelitakan?”. 27 Uan Joab kijtoj: “Nimitsyekiluia itokaykopa toTajtsin Dios akin nochipa yoltok ke komo amo teyi tikijtoskia, soldados kisentokaskiaj kintokatiaskiaj ininikniuan hasta mosta kualkan”. 28 Yejua ika Joab kipitsak kuaomit uan isoldados amo motalojkejok para kintokatiaskej soldados israelitas. Uan ijkuak amo moteuijkejok.

29 Abner uan isoldados nejnenkej nochi youal. Panokej Arabá uan kipanauijkej ueyiat Jordán. Satepan nejnenkej ataujkopa* uan ajsikej Mahanaim. 30 Joab kinsentilij isoldados David keman amo kitokatiajkejok Abner. Uan keman kinpoujkej kiitakej ke momikilijkaj 19 isoldados David uan no momikilijka Asahel. 31 Sayoj ke isoldados David kintankaj soldados akin pouiaj iniuan ikoneuan Benjamín uan oksekin isoldados Abner. Sennochia momikilijkej 360. 32 Joab uan isoldados kiuikakej Asahel uan kitokkej ompa Belén kampa kitokkaj itat. Satepan nejnenkej nochi youal uan ajsikej Hebrón keman tanestiayaya.

3 Akin kinpaleuiayaj ikoneuan Saúl uan akin kipaleuiayaj David kisentokayaj moteuiayaj. Mojmostaj okachi momiakiliayaj akin kipaleuiayaj David, sayoj ke akin kinpaleuiayaj ikoneuan Saúl tsinkistiayaj.

2 Keman David nemia ompa Hebrón, yolkej nejin ikoneuan: akin tayekanaya monotsaya Amnón uan inan monotsaya Ahinoam akin kayot Jezreel. 3 Okse iokichpil David akin kitojtokaya* Amnón monotsaya Kileab uan inan monotsaya Abigaíl. Abigaíl katka isiuatsin Nabal akin kayot Carmelo, sayoj ke Nabal momikilijkaya. Okse iokichpil David monotsaya Absalón uan inan monotsaya Maacá. Maacá katka iichpoch Talmái akin tekiuajtia Guesur. 4 Okse iokichpil David monotsaya Adonías uan inan monotsaya Haguit. Okse iokichpil monotsaya Sefatías uan inan monotsaya Abital. 5 Uan okse iokichpil David monotsaya Itream uan inan monotsaya Eglá. Yejuan nejin ikoneuan David akin yolkej Hebrón.

6 Akin kinpaleuiayaj ikoneuan Saúl uan akin kipaleuiayaj David kisentokayaj moteuiayaj. Uan Abner kitemoj maj okachi miakej ichankauan Saúl kipaleuianij. 7 Saúl kipiak okse isiuatsin* akin monotsaya Rizpá akin katka iichpoch Ayá. Se tonal, Is-Bóset kiixiluij Abner: “¿Keyej timotekak iuan Rizpá akin katka isiuatsin nopaj?”. 8 Abner tel kualanik keman Is-Bóset kiluij nejon uan kinankilij: “¿Xe tinechita kemej se itskuinti* tein nemi Judá? Nejua nochipa niknextiani ke nikintasojta ikoneuan mopaj Saúl. No niknextiani ke nikintasojta iikniuan uan akin kuali iuan mouikayaj. Uan amo nimitstemaktiani iuan David para maj mitsmikti. Maski ijkon nikchiuani, axkan tinechajuatok porin nimotekak iuan se siuat. 9 Maj Dios semi nechtatsakuilti* komo amo nikpaleuia David para maj mochiua tein Jehová iuan motenkauak. 10 Yejua motenkauak ke ikoneuan Saúl amo tekiuajtiskiajok, ta kiixtaliskia David maj tekiuajti. David kinixyekanaskia akin nemiaj Israel uan Judá, desde Dan hasta Beer-Seba”. 11 Is-Bóset amo teyi kinankilijok Abner porin kimouiliaya.

12 Abner niman kintitanik seki takamej maj kiluitij David: “¿Xe amo nejua nitaixyekana nikan Israel?”. Uan no kiluijkej: “Ximotenkaua nouan ke kuali timouikaskej, uan nimitspaleuis maj mitstojtokakan nochin akin nemij nikan Israel”. 13 David kinankilij: “Kuali yetok, nikchiuas tein tikijtoua. Sayoj nikneki nimitstajtanis se taman. Uelis tinechitakiuj sayoj komo tikualkui Mical, iichpoch Saúl”. 14 Satepan David kintitanik seki takamej maj kiluitij Is-Bóset akin katka iokichpil Saúl: “Xinechmaka nosiuatsin Mical. Nejua uelik iuan nimonamiktij keman nikinmiktij 100 filisteos uan nikuikak tein kinextij* ke nikinmiktijka”. 15 Mical kinamiktijkaj iuan Paltiel iokichpil Lais. Keman David kiluij maj kikepili isiuatsin, Is-Bóset tanauatij maj kikuilitij. 16 Sayoj ke Paltiel kitojtokatiajki uan kichokilijtiajki hasta Bahurim. Yejua ika Abner kiluij: “Ximokepa mochan”. Uan Paltiel mokepak ichan.

17 Abner tanauatijka maj kiniluitij taixyekananij israelitas: “Uejkaujya nankinekij maj David namechixyekana. 18 Uan axkan, xikixtalikan maj mochiua namotekiuaj porin Jehová kiluij David: ‘Nikchiuas maj notekitikauj David kinmakixti nochin israelitas. Yejua kinpaleuis israelitas maj filisteos amo teyi kinchiuilikanok nion oksekin akin kintauelitaj’”. 19 Satepan Abner kinnojnotsato akin pouiaj iniuan ikoneuan Benjamín. No yajki Hebrón kiitato David para kiluis tein motenkaujkaj akin nemiaj Israel uan nochin akin pouiaj iniuan ikoneuan Benjamín.

20 Keman Abner kiitato David ompa Hebrón no iuan yajkej 20 takamej. Uan David kichiuak se tatakualis para Abner uan takamej akin iuan yayaj. 21 Uan Abner kiluij David: “Notekiuaj, xinechkaua maj nikinsentiliti nochin akin nemij Israel para maj motenkauakan ke tejua mitstojtokaskej. Uan sayoj tejua titaixyekanas itech nochi xolal Israel”. David kikauak maj youi uan Abner yajki.

22 Joab uan isoldados David yajkaj tateuitoj keman Abner kiitato David. Keman Abner yajki, yejuan mokeptoyajya uan kiualkuiaj miak taman tein kinkuilijkaj akin kinteuitoj. Abner amo yetoyaok Hebrón porin David kikaujka maj youi. 23 Keman Joab uan nochin soldados ajsikej, aksa* kiluij Joab: “Abner iokichpil Ner kiitako tekiuaj David. Yejua amo teyi kichiuilij uan kikauak maj youi”. 24 Yejua ika Joab kiitato tekiuaj uan kiluij: “Abner mitsitako uan amo teyi tikchiuilij, ta tikauak maj youi. ¿Keyej amo teyi tikchiuilij? 25 ¿Xe amo tikixmati Abner iokichpil Ner? Yejua ualaj mitskajkayauako. Kinekia kimatis toni tikchiujtok uan toni tiknemilijtok tikchiuas”.

26 Satepan Joab yajki uan kintitanik seki takamej maj kitemotij Abner. Yejuan kiajsitoj ompa Sirá kampa yetok se ueyi talkoyok tein kichijchiujkaj para kisentiliskej at uan Abner iniuan mokepak. Sayoj ke David amo kimatik tein Joab kichiuak. 27 Keman Abner ajsik Hebrón, Joab kiluij maj kalaki itech ueyi xolal para iuan tajtos kampa amo akin kinkakiskia. Sayoj ke keman ompa yetoyajya, kipoxtokilij imachete tein ojkan tenej* uan Abner mikik. Yejua kimiktij porin Abner kimiktijka Asahel, akin katka iikniuj Joab. 28 Keman David kimatik tein Joab kichiujka, kijtoj: “Jehová kimati ke nejua uan akin nikinixyekana amo titapaleuijkej keman kimiktijkej Abner iokichpil Ner. 29 Maj nochipa kitatsakuiltikan Joab uan nochin ichankauan itat. Maj semej takamej akin ichankauj kipia lepra oso okse taman kokolis,* oso maj amo ueli nejnemi,* oso maj kimiktikan ika machete tein ojkan tenej oso maj amo kipia tein kikuas”. 30 Keman moteuijkej ompa Gabaón, Abner kimiktij Asahel ininikniuj Joab uan Abisái. Yejua ika yejuan kimiktijkej Abner.

31 David kiluij Joab uan takamej akin iuan yetoyaj: “Xiktsayanakan namotasal, ximotalilikan tasal tein teajuayotia uan xikchokilikan Abner”. Uan tekiuaj David no kintojtokatiaya akin kimamajtiayaj Abner para kitokaskej. 32 Kitokkej Abner ompa Hebrón uan tekiuaj David peuak chikauak kichokilia ompa. Uan nochin israelitas no peuak chokaj. 33 Tekiuaj David kicantarouilij Abner nejin tatsotson:

“Amo kinamikia kimiktiskej Abner ijkon kemej kimiktijkej.

Mitsmiktijkej kemej akin kiichtakauiaj temiktianij”.

Keman tamicantaroj, nochin oksepa peuak chokaj.

35 Keman tonayanok katka, nochin kiitatoj David para kitataujtiskej maj takua, sayoj ke David kijtoj: “¡Maj Dios semi nechtatsakuilti komo nikua pantsin oso okse taman achto ke tapoyauis!”. 36 Nochin kikakkej tein kijtoj uan kiuelitakej. Nochi tein kichiuaya tekiuaj David kiuelitayaj. 37 Nejon tonal, nochin akin nemiaj Judá uan Israel kimatkej ke tekiuaj David amo tapaleuij maj kimiktianij Abner iokichpil Ner. 38 Uan tekiuaj kiniluij itakeualuan: “Nejin tonal mikik se taixyekankej akin semi ueyichiujkej katka. 39 Maski nechixtalijkej kemej tekiuaj, nikmachilia ke amo nichikauak para nikinixnamikis ikoneuan Zeruyá. Nejin takamej semi amo yolkualmej. Maj Jehová kitatsakuilti akin kichiua tein amo kuali”.

4 Is-Bóset iokichpil Saúl semi mouik keman kikakik ke kimiktijkaj Abner ompa Hebrón. Uan nochin israelitas semi motekipachojkej. 2 Ome takamej kitekitiliayaj Is-Bóset, se monotsaya Baaná uan okse Recab. Yejuan kinixyekanayaj seki tachtekinij. Inintat Baaná uan Recab katka Rimón akin kayot Beerot uan pouiaj iniuan ikoneuan Benjamín. (Ueyi xolal Beerot no yetoya kampa kintaxejxelouilijkaj ikoneuan Benjamín. 3 Akin nemiaj Beerot cholojkej uan yajkej Guitaim uan ompa nemij hasta axkan maski amo ompa kayomej).

4 Jonatán iokichpil Saúl kipiaya se iokichpil akin monotsaya Mefibóset. Keman Mefibóset kipiaya makuil xiuit, seki takamej akin ualeujkaj Jezreel kitematiltikoj ke Saúl uan Jonatán mikkaj. Siuatsin akin kiiskaltijtoya Mefibóset kinapalojteuak uan choloj. Sayoj ke kemej semi moujtoya uan motalojtoya kimapetskoj uan okichpiltsin semi mometskokoj. Yejua ika amo uelikok nejnemik.*

5 Se tonal, Recab uan Baaná ikoneuan Rimón akin kayot Beerot, yajkej ichan Is-Bóset. Yajkej nepantaj keman semi tonaya uan Is-Bóset tepitsin moseuijtoya. 6 Recab uan Baaná kalakkej ichan Is-Bóset kemej yeskia kikuitoj trigo. Sayoj ke keman ompa yetoyajya kipoxtokilijkej ininmachete tein ojkan tenej* uan cholojteujkej. 7 Keman kalakkej ichan Is-Bóset, yejua yetoya kampa kochia uan uetstoya itech icama. Kipoxtokilijkej ininmachete uan mikik, satepan kikechkotonkej uan kikuiteujkej itsontekon. Nochi youal nejnenkej itech ojti tein ajsi Arabá. 8 Recab uan Baaná ajsikej Hebrón kampa yetoya David. Yejuan kiuikilijkej itsontekon Is-Bóset uan kiluijkej: “Timitsualkuilijkej itsontekon Is-Bóset iokichpil Saúl, akin mitstauelitaya uan kinekia mitsmiktis. Noteko, nejin tonal Jehová mitspaleuij xikintaxtaualti Saúl uan ikoneuan”.

9 Sayoj ke David kiluij Recab uan iikniuj Baaná, ikoneuan Rimón akin kayot Beerot: “Jehová, Dios akin nochipa yoltok uan akin nochipa nechpaleuij* keman nitajyouijtoya, kuali kimati ke melauj tein nimitsiluia. 10 Se takat nechiluiko ke Saúl mikik. Yejua kinemilij ke nikuelitaskia tein kichiuak uan ke niktaxtauiskia, sayoj ke nikitskij uan nikmiktij ompa Ziclag. 11 No ijkon nikinchiuilis akin kiichtakauitoj se takat kampa kochtoya uan kimiktijkej maski amo teyi kichiujka. Yejua ika namechtaxtaualtiti por tein nankichiujkej, namechixpoloti porin nankimiktijkej”. 12 David kinnauatij isoldados maj kinmiktikan Recab uan Baaná. Kinmakojkotonkej uan kinmetskojkotonkej uan kinpilojkej tanakastan den ueyi talkoyok kampa kisentiliaj at tein yetok Hebrón. Uan itsontekon Is-Bóset kitokatoj Hebrón kampa kitokkaj Abner.

5 Panok tiempo uan nochin uejueyi kalyetonij israelitas ualajkej Hebrón kiitakoj David uan kiluijkej: “Tejua titopariente,* yejua ika tiualajkej timitsitakoj. 2 Keman Saúl tekiuajtitoya, ipa tejua tikinixyekanaya soldados israelitas keman yayaj tateuitij. Uan Jehová mitsiluij: ‘Tejua tikinyekpias israelitas akin pouij itech noxolal uan tikinixyekanas’”. 3 Nochin taixyekananij israelitas ualajkej Hebrón kiitakoj tekiuaj David. David kiniluij ke yejua yeskia inintekiuaj uan Jehová kikaktoya tein kijtoj. Satepan kikuatekilijkej aceite uan kiixtalijkej kemej inintekiuaj israelitas.

4 David kipiaya 30 xiujmej keman kiixtalijkej kemej tekiuaj, uan taixyekanak 40 xiujmej. 5 Keman yetoya Hebrón kinixyekanak ikoneuan Judá chikome xiuit uan chikuasen metsti. Uan ompa Jerusalén kinixyekanak 33 xiujmej ikoneuan Judá uan nochin okseki uejueyi kalyetonij. 6 Tekiuaj David uan isoldados yajkej Jerusalén kinteuitoj jebuseos akin ompa nemiaj. Sayoj ke jebuseos kikejkelojkej David uan kiluijkej: “¡Amo keman timoaxkatilis nejin ueyi xolal! Hasta koxojmej uan akin amo ueli tachiaj mitstokaskej”.* Jebuseos moluiayaj ke David amo keman ueliskia mokuilis ininueyi xolal. 7 Sayoj ke David moaxkatilij ueyi xolal Sion kampa kuali tatsaktoya, tein axkan moixmati kemej ueyi xolal tein iaxka David. 8 Nejon tonal David kijtoj: “Maj soldados akin kinteuitij jebuseos nalpanokan kampa moojtia at. Maj ompa panokan para kinmiktiskej ‘koxojmej uan akin amo tachiaj’, akin nikintauelita”. Yejua ika nochin peuak kijtouaj desde ijkuak: “Koxojmej uan akin amo tachiaj amo keman kalakiskej kalijtik”. 9 David mokaltalij itech nejon ueyi xolal kampa kuali tatsaktoya, tein kitokaytijkej* ueyi xolal tein iaxka David. No kichijchiuak uejueyi tepamit uan uejueyi kalmej itech nochi ueyi xolal hasta tepetsin tein moixmati kemej Miló.* 10 David mochiuak se tekiuaj akin semi ueyichiujkej uan Jehová, Dios akin kinixyekana iangeluan nochipa kipaleuiaya.

11 Hiram akin tekiuajtia Tiro kintitanik seki takamej maj kiitatij David. No kititanilij cedrojkouit uan kintitanik koujxijximanij uan kalchiuanij para kichijchiuaskej uejueyi tepamit. Yejuan peuak kichijchiuiliaj David se ueyi kali. 12 Uan David kiajsikamatik ke Jehová kiixtalijkaya maj nochipa yejua tekiuajti itech xolal Israel, uan ke kintatiochiuijtoya israelitas akin kinixyekanaya. Dios kichiuak nejon para kinpaleuis israelitas.

13 Keman David kisak de Hebrón uan mokaltalij Jerusalén monamiktij iniuan okseki siuamej.* No mochiujkej isiuauan seki siuamej akin kitekitiliayaj. Iniuan kinpiak okseki iokichpipiluan uan isiuapipiluan. 14 Ikoneuan David akin yolkej Jerusalén monotsayaj Samúa, Sobab, Natán, Salomón, 15 Ibhar, Elisúa, Néfeg, Jafía, 16 Elisamá, Eliadá uan Elifélet.

17 Keman filisteos kimatkej ke israelitas kiixtalijkaj David kemej tekiuaj itech xolal Israel, pankiskej para kiteuiskej. Keman David kimatik, yajki* kampa amo teyi kichiuiliskiaj. 18 Filisteos ajsikej itech tal tamanis* tein moixmati kemej Refaím uan moxejxelojkej para tateuiskej. 19 David kitajtanij* Jehová: “¿Maj nipankisa nikinteuiti filisteos? ¿Tinechpaleuis maj nikintani?”. Jehová kinankilij: “Kemaj, xipankisa xikinteuiti filisteos uan nimitspaleuis xikintani”. 20 Yejua ika David yajki Baal-Perazim para kinteuis filisteos uan kintanik. Uan David kijtoj: “Jehová kintanik akin nechtauelitaj, kemej se tepamit tein xitini porin at kikuitikisa”. Yejua ika ompa tatokaytij Baal-Perazim.* 21 Filisteos ompa kinkaujteujkej inintatadiosuan,* uan David uan isoldados kinuikakej para kinixpoloskej.

22 Satepan filisteos oksepa pankiskej para kinteuiskej israelitas uan moxejxelojkej itech tal tamanis tein moixmati kemej Refaím. 23 David oksepa kitajtanij Jehová toni maj kichiua, sayoj ke yejua kinankilij: “Amo xipankisa para tikinixnamiktias, ta xitayoualoti kampa yetokej koujmej bacá* para tikinteuis desde ompa. 24 Uan keman tikakis ke ininkuapan koujmej bacá mokaki kemej yeskia miak soldados tajtaksatiuitsej,* ijkuak peua xikinteui soldados filisteos porin nejua Jehová nimitsyekantias para tikintanis”. 25 Uan David kichiuak nochi tein Jehová kinauatij. Kinteuijtiajki filisteos desde Gueba hasta Guézer uan kintanik.

6 David oksepa kinsentilij soldados israelitas akin okachi kuali tateuiayaj. Katkaj 30 mil. 2 Satepan, David uan nochin takamej akin iuan yetoyaj yajkej Baale-Judá kikuitoj tatiochiualkaxon* tein iaxka toTajtsin Dios para kipankixtiskej. Nochin israelitas yayaj kampa yetoya tatiochiualkaxon para kiueyichiuaskej itokay Jehová, Dios akin kinixyekana iangeluan uan tokotsyetok tapani* den querubines. 3 Tatiochiualkaxon tein iaxka toTajtsin Dios yetoya ichan Abinadab akin nemia itech se tepetsin. Keman kiuikakej, kitejkoltijkej* itech se carreta tein yankuik. Uzá uan Ahió ikoneuan Abinadab kiuikayaj nejon carreta.

4 Desde ichan Abinadab kiuikakej tatiochiualkaxon tein iaxka toTajtsin Dios, uan Ahió tayekantiaya. 5 David uan nochin israelitas kiiluichiuilijtiayaj Jehová. Yejuan mijtotijtiayaj uan cantarojtiayaj. Kitsotsontiayaj arpas, cítaras* uan miak taman tein chijchiujtoya ika enebrojkouit. No kitsilinijtiayaj tambortsitsin,* kitsetselojtiayaj sistros* uan kikakistiltijtiayaj címbalos.* 6 Sayoj ke keman ajsitoj ital Nacón kampa kichipauayaj xinach, Uzá kikitskij tatiochiualkaxon tein iaxka toTajtsin Dios porin kuakuejmej yaya kitsonkepatij. 7 Uan Jehová tel kualanik iuan Uzá uan niman kimiktij porin tajtakolchiuak. Uzá mikik inakastan tatiochiualkaxon tein iaxka toTajtsin Dios. 8 Sayoj ke David kualanik porin Jehová kualanik iuan Uzá uan kimiktij. Uan ompa kampa momikilij Uzá tatokaytijkej Pérez-Uzá* uan ijkon moixmati hasta axkan. 9 Uan nejon tonal David kimouilij Jehová uan kijtoj: “Ijkon amo uelis nikualkuis tatiochiualkaxon tein iaxka Jehová”. 10 David amo kinekik kiualkuis tatiochiualkaxon tein iaxka Jehová kampa yejua nemia, itech ueyi xolal tein iaxka David, ta tanauatij maj kiuikanij ichan Obed-Edom akin kayot Gat.*

11 Tatiochiualkaxon tein iaxka Jehová yetoya eyi metsti ichan Obed-Edom akin nemia Gat, uan Jehová semi kitatiochiuiaya Obed-Edom uan nochin akin nemiaj ichan. 12 Seki takamej kiluitoj tekiuaj David: “Kemej tatiochiualkaxon tein iaxka toTajtsin Dios yetok ichan Obed-Edom, Jehová semi kintatiochiuiani nochin akin nemij ichan uan kichiuani maj momiakili nochi tein kipia”. Uan David yajki ichan Obed-Edom uan semi yolpaktiaya. Kikuito tatiochiualkaxon tein iaxka toTajtsin Dios para kipankixtis hasta ueyi xolal tein iaxka David. 13 Keman akin kimamajtiayaj tatiochiualkaxon tein iaxka Jehová tepitsin nejnenkej,* David kimaktilij Dios se kuakouej uan se tapial tein tomauak.

14 David semi yolpakia, yejua ika mijtotiaya uan momamalakachouaya para kiueyichiuas Jehová. Yejua motalilijka se koton tein kiluiaj efod* tein chijchiujtoya ika lino. 15 David uan nochin israelitas kiualkuiaj tatiochiualkaxon tein iaxka Jehová uan ajkotsajtsitiualayaj keman ualpankistiayaj porin semi yolpakiaj. No mokakia kuaomit tein kipitstiualayaj. 16 Keman tatiochiualkaxon tein iaxka Jehová kiejkoltijkej itech ueyi xolal tein iaxka David, Mical iichpoch Saúl pantachixtoya desde iventana. Keman kiitak ke tekiuaj David mijtotijtiualaya, ajkotsikuintiualaya uan momamalakachojtiualaya para kiueyichiuas Jehová, peuak kitauelita. 17 David kichijchiujka se kaltsin* para ompa kitalis tatiochiualkaxon tein iaxka Jehová. Yejua ika ompa kitalijkej tatiochiualkaxon. David kichichinouilij Jehová tapialmej uan kimaktilij okseki taman para sentakuaskej,* uan Dios kiitstoya tein kichiujtoya. 18 Keman David kitamichichinouilij Dios nejon tapialmej uan kimaktilij okseki taman para sentakuaskej, kitajtanij Jehová akin kinixyekana iangeluan maj kintatiochiui israelitas. 19 Uan no kinmajmakak nochin takamej uan siuamej israelitas se pantsin youaltik, se taxkaltsin tein chijchiujtoya ika dátiles* uan se taxkaltsin tein chijchiujtoya ika pasas. Satepan, nochin yajkej ininchan.

20 Keman David mokepak ichan para kitataujtis Dios maj no kintatiochiui ichankauan, Mical akin katka iichpoch Saúl kinamikito uan kiixiluij: “Semi timopinaujtij axkan. Timokixtilij motasal ininixpan siuamej akin kintekitiliaj motakeualuan. Tikchiuak ijkon kemej kichiua aksa* akin kuatapolojtok maski tejua titekiuaj”. 21 Uan David kiluij Mical: “Nimijtotijtoya uan nicantarojtoya porin nikueyichiujtoya Jehová. Yejua nechijitak para maj nikinixyekana israelitas akin pouij itech ixolal Jehová, uan kiixtopeuak mopaj uan ichankauan. Yejua ika nimijtotis uan nicantaros para nikueyichiuas Jehová. 22 Uan nikchiuas okseki taman tein okachi tepinaujtij, porin nejua amo teyi nichiujkej. Sayoj ke siuamej akin ininka titajtoj nechueyitaliskej”. 23 Uan Mical akin katka iichpoch Saúl amo keman kinpiak konemej.

7 Keman tekiuaj David yetoyaya ichan uan kualtsin nemiaya porin Jehová kichiujka maj amo kiixnamikikanok akin kitauelitayaj, 2 kiluij tanauatijkej* Natán: “Nejua kualtsin ninemi itech se kali tein chijchiujtok ika cedrojkouit, sayoj ke tatiochiualkaxon* tein iaxka toTajtsin Dios yetok itech se kaltsin”.* 3 Natán kinankilij tekiuaj: “Xikchiua tein tiknemilijtok porin Jehová mitspaleuia”.

4 Sayoj ke nejon youak Jehová kinojnotsak Natán uan kiluij: 5 “Xiouj xikiluiti notekitikauj David: ‘Yejua nejin tein kijtoua Jehová: “¿Tiknemilia ke tejua mitsnamiki xinechchijchiuili se kali kampa nechueyichiuaskej? 6 Desde ke nikinkixtij israelitas de Egipto hasta axkan, amo keman nikpiani se kali kampa nechueyichiuaskej, ta nochipa nechueyichiuanij* itech se kaltsin tein miakkan kiuikatinemij. 7 Nochi nejon tiempo keman nikinixyekanak israelitas, nejua nikixtalij katiyejua de nochin uejueyi kalyetonij taixyekanaskia itech noxolal. ¿Kemansa tikakik maj nikintajtaniani semej nejon uejueyi kalyetonij maj nechchijchiuilikan se kali de cedrojkouit?”’. 8 No xikilui notekitikauj David: ‘Yejua nejin tein kijtoua Jehová akin kinixyekana iangeluan: “Tejua tikinpixtinemia ichkamej* ne ixtauat, sayoj ke nimitskixtij de ompa para tikinixyekanas israelitas akin pouij itech noxolal. 9 Uan nochipa nimitspaleuis kampa yeski tias. Moixpan nikinixpolos nochin akin mitstauelitaj. Uan nikchiuas maj no miakkan mitsixmatikan ijkon kemej kinixmatij okseki uejueyi chiuanimej. 10 Nikinmakas israelitas akin pouij itech noxolal se tal tein yeski ininaxka. Yejuan kualtsin nemiskej ompa uan amo akin kinkuejmolosok. Akin amo yolkualmej amo kintajyouiltiskejok kemej achto kintajyouiltijkaj. 11 Israelitas akin pouij itech noxolal kintajyouiltijkej desde keman nikinixtalij jueces para maj kinixyekanakan. Uan nikchiuas maj amo teyi mitschiuilikanok akin mitstauelitaj.

”’”Uan nejua Jehová no nimitsiluij ke nejua Jehová nikchiuas maj mokoneuan nochipa tekiuajtikan.* 12 Keman timikis,* nikixtalis semej mokoneuan maj mitsixpata uan maj mochiua tekiuaj, uan nikchiuas maj nochipa yejua tekiuajti. 13 Yejua nechchijchiuilis se kali para kiueyichiuaskej notokay uan nikchiuas maj nochipa yejua tekiuajti. 14 Nejua niyeski niitat uan yejua yeski nokoneuj. Keman kichiuas tein amo kuali, nejua nikmagas para niktatsakuiltis ijkon kemej tetatsakuiltiaj takamej.* 15 Nejua nochipa niktasojtas* uan amo keman nikauas ijkon kemej nikauak Saúl, akin nikixpatak kemej tekiuaj para nimitsixtalis tejua. 16 Nikchiuas maj mokoneuan nochipa tekiuajtikan, uan motaixyekanalis amo keman ixpoliuis”ʼ”.

17 Natán kimatiltij David nochi tein Dios kiluijka uan kinextilijka.

18 Keman Natán tamitajtoj, tekiuaj David yajki uan motalij para kitataujtis Jehová uan kiluij: “NoUeyi Teko Jehová, tejua semi tinechpaleuiani maski nejua uan nochankauan amo teyi tichiuanimej. 19 Uan amo sayoj yejua tikchiuani noUeyi Teko Jehová, ta no tikijtoua ke nokoneuan miak tiempo tekiuajtiskej. Uan amo akin uelis kipatas nejon noUeyi Teko Jehová. 20 Tejua kuali tinechixmati nejua David nimotekitikauj. Yejua ika ¿toni uelisok nimitsiluis noUeyi Teko Jehová? 21 Tikchiuani nochi nejin tein semi kualtsin uan tinechmatiltiani porin yejua tein tikneki. Uan yejua nejon tein timotenkauak. 22 Tejua semi tichikauak noUeyi Teko Jehová. Amo akin kemej tejua. Sayoj tejua yekmelauj tiDios. Nochi tein tikakinij kinextia ke melauj nejin. 23 Amo onkak okse xolal kemej moxolal Israel. NoDios, tejua tikinmakixtito de Egipto porin tikinijitak para maj mochiuakan moxolal. Tikchiuak miak milagros keman tikinkixtijtiajki akin nemiaj itech okseki altepemej para maj ompa nemikan akin pouij itech moxolal, uan no tikinixpoloj inintatadiosuan.* Ijkon tikchiuak maj miakej mitsixmatikan uan maj mitstakachiuakan. 24 Tikchiuak maj israelitas mochiuakan moxolal nochipaya, uan tejua Jehová timochiuak ininDios.

25 ”Jehová Dios, tikijtoj ke nejua uan nokoneuan titekiuajtiskej, yejua ika amo keman xikpata tein timotenkauak uan nimitstataujtia ijkon xikchiua. 26 Maj nochin kiueyitalikan motokay nochipaya uan maj kijtokan: ‘Jehová akin kinixyekana iangeluan yejua ininDios israelitas’. Uan xikinpaleui nokoneuan para maj miak tiempo tekiuajtikan. 27 Porin tejua Jehová, ininDios israelitas akin tikinixyekana moangeluan, tinechmatiltij ke tikchiuas maj nokoneuan nochipaya tekiuajtikan.* Yejua ika noteko amo nimoui nimitstataujtis. 28 NoUeyi Teko Jehová, tejua yekmelauj tiDios uan nochipa tikijtoua tein melauj. Uan timotenkauani nouan ke tikchiuas nochi nejin tein tinechiluij. 29 Yejua ika nimitstataujtia xikintatiochiui nochankauan uan maj nochipa mitsyolpakti tein kichiuaj, porin tejua noUeyi Teko Jehová timotenkauak ke ijkon tikchiuas. Uan nochipaya xikintatiochiui nochankauan para maj nochipa kuali nemikan”.

8 Panok tiempo uan David kinteuij filisteos uan kintanik. No kinkuilij tal tein moixmati kemej Meteg-Amá.

2 David no kintanik moabitas uan kiniluij maj motekanij talpan uan exkan kinxejxeloj.* Ome oloch kinmiktiskiaj uan okse oloch amo teyi kinchiuiliskiaj. Moabitas peuak kitekitiliaj David uan kimakayaj tomin uan okseki taman tein kiixtalijka maj kimakakan.

3 Keman Hadadézer yaya oksepa moinaxkatiliti talmej tein yetokej tanakastan den ueyiat Éufrates, David kiteuij uan kitanik. Itat Hadadézer katka Rehob uan tekiuajtia Zobá. 4 David kikuilij Hadadézer 1,700 soldados akin yayaj itech caballos uan 20 mil soldados akin metsnejnemiaj. No kinkoxojkuiltij* caballos tein kitilantiayaj carros uan sayoj 100 caballos amo teyi kinchiuilij.

5 Keman sirios akin nemiaj Damasco kipaleuikoj Hadadézer akin tekiuajtia Zobá, David kinmiktij 22 mil sirios. 6 Uan David kintitanik seki soldados maj tajpiatij Siria tein poui Damasco. Uan sirios peuak kitekitiliaj David uan kimakayaj tomin uan okseki taman tein kiixtalijka maj kimakakan. David nochipa tatania kampa yaya tateuiti porin Jehová kipaleuiaya.* 7 Uan no, David kinkuilij ininescudos itekitikauan Hadadézer. Nejon escudos tein katkaj de oro uan youaltikej kinuikak Jerusalén. 8 Uan tekiuaj David no kiuikak miak cobre tein onkaya Bétah uan Berotái. Tekiuaj Hadadézer achto taixyekanaya itech nejon uejueyi xolalmej.

9 Satepan, Toi akin tekiuajtia Hamat kitekakilij ke David kintanka nochin isoldados Hadadézer. 10 Yejua ika Toi kiualtitanik Joram akin katka iokichpil maj kiitaki tekiuaj David uan maj kitajtani ox paktok. No kinauatij maj kilui ke yolpakia porin kiteuijka Hadadézer uan kitanka. (Toi semi yolpakia porin Hadadézer miakpa kiteuijka). Joram kiualkuilij David miak taman tein chijchiujtoya ika plata, oro uan cobre. 11 Tekiuaj David kimaktilij Jehová nochi nejon plata, oro uan cobre, ijkon kemej kichiujka ika plata uan oro tein kinkuilijka akin nemiaj itech okseki altepemej. 12 Yejua kinkuilijka ininplata uan ininoro sirios, moabitas, ammonitas, filisteos uan amalequitas. No kikuilijka miak taman Hadadézer iokichpil Rehob akin tekiuajtia Zobá. 13 David no miakkan kiixmatkej porin kinmiktij 18 mil edomitas itech tal tamanis* tein moixmati kemej Sal. 14 David kintitanik seki soldados ompa Edom para maj tajpiakan itech nochi ueyi xolal, uan nochin edomitas peuak kitekitiliaj. David nochipa tatania kampa yaya tateuiti porin Jehová kipaleuiaya.*

15 David kisentokak kinixyekanak nochin israelitas. Keman israelitas kiixpantiliayaj teisa, kuali kiixtaliaya tein kinamikia mochiuas uan kichiuaya tein kuali. 16 Joab iokichpil Zeruyá kinixyekanaya nochin isoldados David, uan Jehosafat iokichpil Ahilud kijkuilouaya nochi tein mochiuaya itech altepet. 17 Sadoc uan Ahimélec katkaj tiopixkamej uan Seraya katka tajkuilojkej. Itat Sadoc katka Ahitub uan itat Ahimélec katka Abiatar. 18 Benaya iokichpil Jehoiadá kinixyekanaya soldados akin kiyekpiayaj tekiuaj.* Uan ikoneuan David katkaj uejueyi chiuanimej.*

9 David kijtoj: “¿Xa nankimatij ox mokauaok se ichankauj Saúl? Komo mokauaok aksa* nikneki niknextilis ke niktasojta porin nikiluij Jonatán ke ijkon nikchiuaskia”. 2 Moajsia se takat akin kintekitilijka ichankauan Saúl. Nejon takat monotsaya Zibá. Yejua ika, David tanauatij maj kinotsatij uan kitajtanij:* “¿Tejua tiZibá?”. Zibá kinankilij: “Kemaj noteko”. 3 Tekiuaj no kiluij: “¿Tikmati ox mokauaok se ichankauj Saúl akin uelis niknextilis ke niktasojta ijkon kemej Dios tetasojta?”. Zibá kiluij David: “Yetokok se iokichpil Jonatán akin amo ueli nejnemi”.* 4 Tekiuaj David kitajtanij: “¿Kani yetok?”. Zibá kinankilij: “Nemi ichan Makir iokichpil Amiel ompa Lo-Debar”.

5 Tekiuaj David kintitanik seki takamej maj kinotsatij. Yejua ika takamej yajkej Lo-Debar, kampa yetoya ichan Makir iokichpil Amiel. 6 Mefibóset, akin katka iokichpil Jonatán uan iixuiuj Saúl ajsik kampa yetoya David. Keman ajsik, motankuaketsak uan moixpiloj hasta talpan. David kiluij: “¡Mefibóset!”, uan yejua kinankilij: “Xinechilui noteko”. 7 David kiluij: “Amo ximoui, porin nimitsnextilis ke nimitstasojta ijkon kemej nikiluijka Jonatán ke nikchiuaskia. Nimitsmakas nochi in talmej tein katka iaxka moueyitat Saúl uan nochipa nouan titakuas”.*

8 Satepan Mefibóset oksepa moixpiloj hasta talpan uan kiluij David: “Noteko, nejua amo teyi nichiujkej ta sayoj kemej se itskuinmiket, ¿keyej tikneki tinechpaleuis?”. 9 Tekiuaj David tanauatij maj kinotsatij Zibá akin kitekitilijka Saúl. David kiluij: “Nochi tein katka iaxka Saúl uan ichankauan, nikmaka iixuiuj Saúl akin katka moteko. 10 Tejua, mokoneuan uan motakeualuan nankitekitiliskej Mefibóset. Nankitatokiskej uan nankitekiskej tein mochiuas para maj ichankauan kipiakan tein kikuaskej. Sayoj ke Mefibóset, iixuiuj Saúl, nochipa nouan takuas”.

Zibá kipiaya 15 ikoneuan uan 20 itakeualuan. 11 Zibá kinankilij tekiuaj David: “Noteko, nikchiuas nochi tein tinechnauatis”. Desde ijkuak, Mefibóset peuak youi takuati iuan tekiuaj David,* kemej yeskia semej ikoneuan. 12 Mefibóset kipiaya se okichpiltsin akin monotsaya Micá. Nochin akin nemiaj ichan Zibá peujkej kitekitiliaj Mefibóset. 13 Uan Mefibóset akin amo uelia nejnemia, nemia Jerusalén porin nochipa yaya takuati iuan tekiuaj.

10 Satepan, tekiuaj akin kinixyekanaya ammonitas momikilij uan Hanún akin katka iokichpil peuak tekiuajti. 2 Yejua ika David kijtoj: “Nahás nochipa nechnextilij ke nechtasojtaya, yejua ika no niknextiliti Hanún iokichpil Nahás ke niktasojta”. Yejua ika David kintitanik seki itakeualuan maj kiyolchikauatij Hanún porin momikilijka itat. Itakeualuan David yajkej kampa nemiaj ammonitas. 3 Sayoj ke keman ajsikej, akin kinixyekanayaj ammonitas kiluijkej tekiuaj Hanún: “¿Tiknemilia ke David kinualtitanik itakeualuan porin yekmelauj kineki mitsyolchikauas? Yejua amo yekmelauj kineki kitakachiuas* mopaj, ta xa kinualtitanik maj tachiakij toueyi xolal para kiitaskej keniuj uelis techtaniskej”. 4 Yejua ika Hanún tanauatij maj kinkitskikan itakeualuan David uan maj tajko kintenximakan. No tanauatij maj kintekilikan inintasal hasta inintajkoyan uan kintokak.* 5 Keman kiluitoj tekiuaj David tein kinchiuilijkaj itakeualuan, niman kintitanik seki takamej maj kinnamikitij porin semi kinpinaujtijkaj. David tanauatij maj kiniluikan: “Ximokauakan Jericó uan ximokepakan hasta keman oksepa moskaltis namotentson”.

6 Kemej ammonitas kichiujkej nejon, kiitakej ke David peuak kintauelita. Yejua ika ammonitas kintitankej seki takamej maj yakan Bet-Rehob uan Zobá maj kintakeuatij sirios para maj kinpaleuikan. Kintakeujkej 20 mil soldados. No kitakeujkej akin tekiuajtia Maacá uan mil soldados. No yajkej Istob* uan ompa kintakeujkej 12 mil soldados. 7 Keman David kimatik tein kichiujkej ammonitas, kititanik Joab uan nochin isoldados para kinteuiskej. No kintitanik isoldados akin okachi kuali tateuiayaj. 8 Ammonitas kiskej de ininueyi xolal uan motejtekpankej kalampa para tateuiskej. Uan soldados sirios akin katkaj de Zobá, Rehob, Istob* uan Maacá moketsatoj hasta ixtauat.

9 Joab kiitak ke seki soldados ualayaj taikan uan oksekin ualayaj taixpan para kiteuiskej. Yejua ika kinijitak seki soldados israelitas akin okachi kuali tateuiayaj uan kiniluij maj motejtekpanakan para kinteuiskej soldados sirios. 10 Joab no kiixtalij Abisái maj kinixyekana okseki soldados uan kinnauatij maj motejtekpanakan para kinteuiskej ammonitas. 11 Uan Joab kiluij Abisái: “Komo tikita ke sirios techtantokej, xitechpaleuiki. Uan komo nikita ke ammonitas namechtantokej, tejuan tamechpaleuitiuij. 12 Moneki tiyeskij tiyolchikaujkej uan amo timouiskej para tikinpaleuiskej israelitas uan para amo techkuiliskej uejueyi xolalmej tein toDios techmakak. Uan Jehová kichiuas tein kiitas ke okachi tapaleuis”.

13 Uan Joab uan isoldados peuak kinteuiaj sirios uan sirios cholojkej. 14 Keman ammonitas kiitakej ke sirios cholojkaj, yejuan no kicholuijkej Abisái uan kalakitoj ininueyi xolal. Satepan ke Joab kinteuij ammonitas mokepak Jerusalén.

15 Keman sirios kiitakej ke israelitas kintankaj, oksepa mosentilijkej. 16 Hadadézer kinnotsak sirios akin nemiaj tanakastan den ueyiat Éufrates. Yejuan mosentilijkej ompa Helam uan Sobac kinixyekantiaya. Nochin isoldados Hadadézer kinixyekanaya Sobac.

17 Keman David kimatik ke sirios mosentilijkej, no niman kinsentilij nochin soldados israelitas. Yejuan kipanauijkej ueyiat Jordán uan ajsikej Helam. Uan sirios motejtekpankej para kiixnamikiskej David uan iuan moteuijkej. 18 Sayoj ke sirios kincholuijkej israelitas. David kinmiktij 700 soldados sirios akin kiuikayaj carros tein kikuiaj keman tateuiayaj uan 40 mil akin yayaj itech caballos. Uan no kimiktij Sobac akin kinixyekanaya isoldados Hadadézer. 19 Keman nochin tekiuanij akin kinixyekanaya Hadadézer kiitakej ke israelitas kintankaj, niman kiniluijkej israelitas ke amo kinteuiskiajok uan peuak kintekitiliaj. Uan sirios amo kinekkejok* kinpaleuiskej ammonitas.

11 Ipeujyan xiuit* keman tekiuanij youij tateuitij, David kititanik Joab, itakeualuan uan nochin soldados israelitas maj kintamiixpolotij ammonitas. Yejuan kitamiyoualojkej Rabá para kinteuiskej akin ompa nemiaj, sayoj ke David mokauak Jerusalén.

2 Se tonal keman David yetoya ichan uan tapoyaujtiayaya, meuak uan peuak nenemi kalkuako.* Desde ompa kiitak ke mopaktoya se siuat akin semi kuakualtsin katka. 3 David kititanik aksa* maj tatsintokati akoni katka nejon siuat, uan kiluijkej: “Nejon siuat monotsa Bat-Seba, iichpoch Eliam, uan itakatsin monotsa Urías. Yejua poui iniuan ichankauan Het”. 4 David kintitanik seki takamej maj kikuitij. Uan siuat yajki kampa yetoya David uan David iuan motekak. (Ijkuak, nejon siuat mochipaujtoya ijkon kemej kijtouaya Tanauatil).* Satepan, Bat-Seba mokepak ichan.

5 Bat-Seba kimatik ke kokoxkayetoya, yejua ika tanauatij maj kiluitij David: “Nikpiati se konetsin”. 6 Keman David kimatik, kititanik aksa maj kiluiti Joab: “Xikilui Urías* maj nechitaki”. Yejua ika Joab kititanik Urías maj kiitati David. 7 Keman Urías ajsik ichan David, David kitajtanij* keniuj yetoyaj Joab uan isoldados. No kitajtanij ox tatantiayaj. 8 Uan David kiluij Urías: “Xitemo mochan uan ximoseuiti”.* Keman Urías kisak de ichan David, seki takamej kitojtokateujkej* para kimakaskej tein tekiuaj kitayokoliaya.* 9 Sayoj ke Urías amo temok ichan, ta kochik itech se kali tein yetoya tanakastan de ichan tekiuaj iniuan nochin okseki takeualmej. 10 Uan kinauatitoj David: “Urías amo temok ichan”. Yejua ika David kitajtanij Urías: “Uejka tiualeuak uan yekin tiejko. ¿Keyej amo titemok mochan?”. 11 Urías kinankilij David: “¿Keniuj nejua nias nochan nitakuatiuj, niatitiuj uan nimotekatiuj iuan nosiuatsin, ta in tatiochiualkaxon* yetok itech se kaltsin?* Uan takamej de Israel uan Judá mokaujtokej itech kaltsitsin uan noteko Joab uan itakeualuan no kitalijkej ininkaltsitsin senpanian. ¡Nimitsyekiluia ke ipa amo nikchiuas nejon!”.

12 Uan David kiluij Urías: “No nikan ximokaua axkan, uan mosta tias”. Yejua ika Urías mokauak Jerusalén nejon tonal uan mostika. 13 Satepan, David kiyoleuak Urías maj iuan takuati uan maj iuan tatayiti. Urías yajki takuato uan tatayito iuan David uan kiuintij. Sayoj ke keman tapoyauik, Urías amo temok ichan, ta kochito iniuan itakeualuan tekiuaj. 14 Mostika kualkan, David kijkuilouilij Joab se amat uan kimakak Urías maj kiuikili. 15 David kijkuilouilij nejin: “Xiktalikan Urías hasta taixpan kampa okachi fiero tateuiaj uan ompa xikauakan iselti para maj kimiktikan”.

16 Joab kuali kimatia kanika yetoyaj soldados ammonitas akin kuali tateuiayaj, yejua ika ompa kititanik Urías. 17 Keman ammonitas kiskej uan kiteuitoj Joab uan isoldados, kinmiktijkej seki itakeualuan David uan no kimiktijkej Urías.* 18 Satepan, Joab kititanik se takat maj kiluiti David nochi tein panok keman moteuijkej iniuan ammonitas. 19 Joab kiluij takat: “Keman tiktamitapouis tekiuaj nochi tein panok, 20 tekiuaj xa kualanis uan mitsiluis: ‘¿Keyej namoteltokijkej ueyi xolal? ¿Xe amo nankimatiaj ke yejuan yetoskiaj tepankuako uan ke desde ompa namechtamotiliskiaj flechas? 21 ¿Xe amo nankielnamikij akoni kimiktij Abimélec iokichpil Jerubéset?* Se siuatsin akin yetoya tepankuako ompa Tebez kipankajkauilij se ueyi tet tein ika takuechouaj uan kimiktij. ¿Keyej namoteltokijkej kampa yetok tepamit tein kiyoualoua ueyi xolal?’. Komo ijkon mitsiluia, xiknankili: ‘Motakeual Urías akin poui iniuan ichankauan Het no kimiktijkej’”.

22 Takat akin Joab kititanik yajki kiitato David para kiluis nochi tein Joab kiluijka. 23 Keman ajsik, takat kiluij David: “Akin techixnamikiaj okachi chikaujkej katkaj. Yejuan kiskej de ininueyi xolal uan techteuitoj ixtauat, sayoj ke tejuan tikchiujkej maj tsinkisakan uan ajsikej hasta kampa yetok puerta. 24 Sayoj ke soldados akin kitamotaj flechas yetoyaj tepankuako uan kintamotilijkej flechas motakeualuan. Yejua ika notekiuaj sekin mikkej. Uan motakeual Urías* no kimiktijkej”. 25 Keman David kikakik nejon, kiluij takat: “Xiouj xikyolchikauati Joab uan xikilui: ‘Amo ximotajtakolti tein panok, ta ipa sekin mikij keman youij tateuitij. Okachi xikinteui akin nemij itech ueyi xolal uan ximoaxkatili’”.

26 Keman Bat-Seba kimatik ke momikilijka Urías akin katka itakatsin, peuak kichokilia. 27 Keman Bat-Seba amo kichokilijok Urías, David niman tanauatij maj kikuitij. David monamiktij iuan Bat-Seba uan kipiakej se konetsin. Sayoj ke Jehová nion tepitsin kiuelitak* tein David kichiuak.

12 Yejua ika Jehová kititanik Natán maj kiitati David. Keman Natán ajsik kampa yetoya David, kiluij: “Itech se ueyi xolal nemiaj ome takamej. Se katka tominpixkej uan okse katka pobre. 2 Takat tominpixkej kinpiaya miak ichkamej* uan kuakuejmej. 3 Sayoj ke takat akin pobre mokouilijka sayoj se ichkatsin uan semi kiyekpiaya. Ichkatsin moskaltijtiajki ichan nejon takat uan ikoneuan. Yejua kiuantia tepitsin tapalol tein kipiaya, kiamakaya itech ivaso uan kochia imako. Kiitaya kemej se isiuapil. 4 Se tonal, se takat kikalpanoko takat tominpixkej. Yejua kinekia kitamakas, sayoj ke amo kinekik kimiktilis nion semej iichkauan nion ikuakuejuan, ta kikuilito iichkatsin takat akin pobre uan kimiktilij takat akin kikalpanoko”.

5 Keman David kikakik nejon semi kualanik, uan kiluij Natán: “¡Nimitsyekiluia itokaykopa Jehová, Dios akin nochipa yoltok ke nejon takat kinamiki maj kimiktikan! 6 Uan kemej kichiuak tein tel amo kuali uan amo kiiknelij takat akin pobre, moneki kikepilis naui ichkamej para kiixtauas tein kikuilij”.

7 Natán kiluij David: “¡Tejua tikchiuak nejon! Yejua nejin tein mitsiluia Jehová ininDios israelitas: ‘Nejua nimitsixtalij kemej tekiuaj para tikinixyekanas israelitas uan nimitspaleuij para maj Saúl amo teyi mitschiuili. 8 Uan nimitsmakak nochi tein kipiaya moteko uan no nimitsinmakak isiuauan moteko. No nimitsixtalij tejua xikinixyekana ikoneuan Judá uan okseki israelitas. Uan amo sayoj nejon, ta yaya nimitsmakati okseki taman. 9 ¿Keyej tikixnamikik Jehová* uan tikchiuak tein amo kiyolpaktia? ¡Tikmiktij Urías akin pouia iniuan ichankauan Het! Tikmiktij ika ininmachete ammonitas tein ojkan tenej.* Uan satepan tikuilij isiuatsin uan iuan timonamiktij. 10 Kemej tinechixnamikik keman tikuilij isiuatsin Urías* uan iuan timonamiktij, desde axkan mochankauan nochipa tajyouiskej uan sekin fiero kinmiktiskej’.* 11 Jehová no mitsiluia nejin: ‘Desde axkan nikchiuas maj mochankauan mitstajyouiltikan. Uan nimitsinkuilis mosiuauan uan moixtenoj nikinmakas okse takat. Uan yejua motekas iniuan kampa nochin uelis kiitaskej. 12 Maski tejua nochi tikichtakachiuak, nejua nikchiuas nochi nejin ininixpan nochin israelitas’”.

13 David kiluij Natán: “Nitajtakolchiuak. Nikchiuak tein Jehová amo kiyolpaktia”. Uan Natán kiluij David: “Jehová mitstapojpoluia uan amo timikis. 14 Sayoj ke mokonetsin akin yekin yolik momikilis porin nion tepitsin tiktakachiuak* Jehová”.

15 Satepan Natán yajki ichan.

Uan Jehová kichiuak maj kokolispeuani* ikonetsin David tein kipiak iuan isiuatsin Urías. 16 David peuak kitataujtia Dios maj kipaleui ikonetsin. Mokaltentsakuak uan amo takuaya. Uan nochi youal uetstoya talpan. 17 Itakeualuan akin tatajtsitsinya yajkej kiitatoj uan kinekiaj kiajokuiskej, sayoj ke David amo kinekik. Uan amo no kinekik takuas iniuan. 18 Chikome tonal satepan konetsin mikik. Sayoj ke itakeualuan David mouiaj kiluiskej ke ikonetsin momikilijkaya. Yejuan moiluiayaj: “Keman konetsin yoltoyaok, tekiuaj amo kinekia techkakis komo teisa tikiluisnekiaj. Komo axkan tikiluiaj ke ikonetsin momikilijya, xa mochiuilis teisa”.

19 Keman David kiitak ke itakeualuan moichtakanojnotstoyaj, niman kimatik ke ikonetsin momikilijkaya. Yejua ika kintajtanij:* “¿Momikilijya nokonetsin?”. Yejuan kinankilijkej: “Kemaj, momikilijya”. 20 Uan David meuak, mopakak, moojxilij aceite, motapatilij uan yajki ichan Jehová para kiueyichiuas. Satepan mokepak ichan, tajtanik maj kitamakakan uan peuak takua. 21 Itakeualuan kitajtanijkej: “¿Keyej ijkon tikchiua? Keman konetsin yoltoyaok amo titakuaj uan titelchokaya. Sayoj ke keman momikilij, niman timeuak uan titakuaj”. 22 David kinnankilij: “Keman nokonetsin yoltoyaok amo nitakuaj uan nitelchokaya porin niknemiliaya ke Jehová xa nechikneliskia, uan amo kikauaskia maj momikili nokonetsin. 23 Sayoj ke axkan nokonetsin momikilijya uan nenkaj yeski maj amo nitakua. Amo uelis nikchiuas maj oksepa nemi. Nikyekmati ke nejua se tonal no nimikis kemej nokonetsin, sayoj ke axkan nokonetsin ipa amo nemisok”.

24 Uan David kiyolseuito Bat-Seba. Iuan motekak uan satepan kipiakej se konetsin akin kitokaytijkej Salomón.* Uan Jehová kitasojtaya in okichpiltsin. 25 Kemej Jehová kitasojtaya, kititanik tanauatijkej* Natán maj kiniluiti maj kitokaytikan Jedidías.*

26 Joab kisentokaya kinteuijtoya ammonitas akin nemiaj Rabá uan moaxkatilij se cacho den ueyi xolal kampa yetoya ichan tekiuaj. 27 Yejua ika Joab kintitanik seki takamej maj kiluitij David: “Nikinteuij akin nemij Rabá uan nimoinaxkatilij ameyalmej* tein onkak itech ueyi xolal. 28 Xikinsentili nochin soldados akin mokaujkejok uan xikinteui akin nemij ueyi xolal. Tejua ximoaxkatili para maj amo kijtokan ke nejua nikintanik”.

29 Yejua ika David kinsentilij nochin isoldados uan yajkej Rabá. Kinteuij akin ompa nemiaj uan moaxkatilij ueyi xolal. 30 Satepan kikuakixtilij icorona tatadios Malcam.* Nejin corona kikuatalilijkej David. Chijchiujtoya ika oro uan etik katka 34 kilos* uan no kikualtsintilijkaj ika tetsitsin tein patiyoj. David mokuilij nochi tein patiyoj tein kipiayaj akin ompa nemiaj. 31 Uan no, kinuikak akin ompa nemiaj para kintekitiltis. Kintajtapanaltiskia tet ika sierras, uan no kinmakaskia hachas uan okseki teposmej tein ika tatejtekiskiaj. Uan oksekin kinnauatij maj kichijchiuakan tabiques. David ijkon kinchiuilij nochin ammonitas akin nemiaj itech uejueyi xolalmej tein moinaxkatilij. Satepan David uan nochin isoldados mokepkej Jerusalén.

13 Absalón akin katka iokichpil David kipiaya se iikniuj akin monotsaya Tamar. Nejin ichpoch semi kuakualtsin katka uan Amnón okse iokichpil David kitasojtaya. 2 Amnón semi motekipachojtoya porin kitasojtaya Tamar* uan hasta kokolispeuak.* Kemej Tamar amo keman motektoya iuan se takat, Amnón kinemiliaya ke amo keman ueliskia senyetoskej. 3 Amnón kuali mouikaya iuan Jehonadab, iokichpil Simeá akin katka iikniuj David. Uan Jehonadab semi tamatkej katka uan kuali kinemiliaya keniuj kichiuas teisa. 4 Jehonadab kiluij Amnón: “Tejua tiiokichpil tekiuaj, ¿keyej mojmostaj titayokoxtok? Xinechilui toni mitspanoua”. Amnón kiluij: “Nitayokoxtok porin niktasojta Tamar, iikniuj nokniuj Absalón”. 5 Yejua ika Jehonadab kiluij Amnón: “Ximoteka uan xikchiua kemej yeskia timokokoua. Keman mopaj mitsitakiuj, xikilui: ‘Xikualtitani nokniuj Tamar maj nechchijchiuiliki tapalol tein kinchijchiuiliaj akin mokokouaj. Komo yejua nechtatekiuia,* nitakuas’”.

6 Yejua ika Amnón motekak uan kichiuak kemej yeskia mokokoua, uan tekiuaj kiitato ichan. Uan Amnón kiluij tekiuaj: “Xikilui nokniuj Tamar maj nechitaki. Maj nikan nechchijchiuili ome pantsitsin* uan maj nechtamaka”. 7 Tamar yetoya ichan keman David tanauatij maj kiluitij nejin: “Xiouj ichan mokniuj Amnón xiktakualchiuiti”. 8 Yejua ika Tamar yajki ichan Amnón uan kiitato kampa uetstoya. Kimaneloj tixti uan ompa iixpan kichijchiuilij seki pantsitsin. 9 Tamar kikuik pantsitsin uan kimakak Amnón, sayoj ke yejua amo kinekik kikuas. Amnón kiniluij nochin: “¡Xikisakan!”. Yejua ika nochin tamikiskej.

10 Uan Amnón kiluij Tamar: “Xinechualkuili pantsitsin kampa niuetstok uan nikan xinechtamaka”. Yejua ika Tamar kikuik pantsitsin tein kichijchiujka uan kiuikilij iikniuj Amnón kampa uetstoya. 11 Keman Tamar motokij para kitamakas, Amnón kikitskij uan kiluij: “Ximoteka nouan noknitsin”. 12 Sayoj ke Tamar kiluij: “¡Amo noknitsin! Amo xinechpinaujti. Nikan Israel amo ijkon tikchiuaj. Amo xikchiua tein tiknemilijtok porin semi fiero. 13 Komo tinechchiuilia nejin tein semi tepinaujtij, nochipa ika nechelnamikiskej uan tejua mitsitaskej kemej se takat akin tel amo yolkuali. Nimitstataujtia xitajto iuan tekiuaj porin yejua techkauas maj tisenyetokan”. 14 Sayoj ke Amnón amo kinekik kikakis. Uan kemej yejua okachi chikauak katka ke Tamar, kikitskij uan ika mauiltij. 15 Satepan ke Amnón ika mauiltij Tamar, peuak semi kitauelita. Uan maski achto kitasojtaya axkan semi kitauelitaya. Yejua ika kiluij: “¡Ximeua uan xiouj!”. 16 Tamar kiluij: “¡Amo noknitsin, amo xinechtoka!* ¡Nejon okachi fiero ke tein tinechchiuilijya!”. Sayoj ke Amnón amo kinekik kikakis.

17 Satepan kinotsak itakeual uan kiluij: “Xikalankixti nejin siuat uan xitatsakua ika llave”. 18 (Tamar aktiaya se kualtsin tasal tein kikuiaj isiuapipiluan tekiuaj akin ayamo monamiktiayaj).* Takeual kikalankixtij uan tatsakuak ika llave. 19 Uan Tamar mokuatemilij koujnex uan kitsayanak itasal. Yejua mokuakitskijtiaya uan tsajtsitiaya.

20 Keman iikniuj Absalón kiitak, kitajtanij:* “Mokniuj Amnón moka mauiltij, ¿melauj? Amo teyi xikijto noknitsin porin yejua mokniuj. Amo xiknenemilijtook tein mitspanok”. Desde ijkuak, Tamar peuak nemi ichan Absalón uan amo kisakok. 21 Keman tekiuaj David kimatik tein Amnón kichiuilijka Tamar, tel kualanik. Sayoj ke amo kinekia kiyolkokos iokichpil Amnón porin yejua tayekanaya uan semi kitasojtaya. 22 Absalón kitauelitaya Amnón porin kipinaujtijka iikniuj Tamar, yejua ika amo kinotsayaok.

23 Ome xiuit satepan, itakeualuan Absalón kinpanxintoyaj iichkauan* ompa Baal-Hazor. Yejua ika Absalón kinyoleuak nochin ikoneuan tekiuaj maj tatakuatij. Baal-Hazor yetoya tanakastan de kampa kintaxejxelouilijkaj ichankauan Efraín. 24 Absalón kiitato tekiuaj uan kiluij: “Nikinpanxintok noichkauan. Yejua ika notekiuaj, nimitstataujtia xiakan xitakuatij tejua uan motakeualuan”. 25 Sayoj ke tekiuaj kinankilij: “Amo nokonetsin, porin komo titamiyouij timitsteltekimakaskej”. Maski Absalón semi kitataujtiaya maj youi, tekiuaj amo kinekik yas. Sayoj ke kiluij maj kualtsin youi. 26 Yejua ika Absalón kiluij: “Komo amo tias, nimitstataujtia xikilui nokniuj Amnón maj youi”. Tekiuaj kitajtanij: “¿Uan keyej tikneki maj yejua youi?”. 27 Sayoj ke kemej Absalón semi kitataujtij tekiuaj, yejua kititanik Amnón uan no kintitanik okseki ikoneuan.

28 Satepan Absalón kinnauatij itakeualuan: “Xikitstokan Amnón uan keman nankiitaskej ke yolpaktokya porin tayitok vino, namechiluis: ‘¡Xikmiktikan Amnón!’. Keman namechiluis nejon niman xikmiktikan. Xiyolchikaujkej uan amo ximouikan porin nejua namechnauatijtok ijkon xikchiuakan”. 29 Itakeualuan Absalón kichiujkej tein kinnauatijka uan kimiktijkej Amnón. Keman okseki ikoneuan tekiuaj kiitakej nejon, moketstikiskej, mopantalijkej itech ininmula uan cholojkej. 30 Keman ikoneuan tekiuaj cholojtoyaj, kiluitoj David: “Absalón kinmiktij nochin mokoneuan, uan amo makisak nion se”. 31 Keman tekiuaj kikakik nejon, moketstikisak, kitsayanak itasal uan motekak talpan. Uan nochin itakeualuan no kitsayankej inintasal uan moketskej inakastan.

32 Sayoj ke Jehonadab, iokichpil Simeá akin katka iikniuj David, kijtoj: “Notekiuaj, amo xiknemili ke kinmiktijkej nochin mokoneuan, ta sayoj kimiktijkej Amnón. Absalón tanauatij maj kimiktikan. Yejua ipa kiixtalijkaya kimiktis porin ika mauiltij iikniuj Tamar. 33 Yejua ika notekiuaj, amo xikneltoka ke nochin mokoneuan mikkej, ta sayoj mikik Amnón”.

34 Uan Absalón choloj. Satepan, tajpixkej moixkepak uan kiitak ke miakej ualajtoyaj itech ojti tein yetok tanakastan den tepet. 35 Yejua ika Jehonadab kiluij tekiuaj David: “Notekiuaj, mokoneuan mokepkejya. Melauj tein nimitsiluij”. 36 Keman Jehonadab tamitajtoj, ikoneuan tekiuaj kalakitoj uan semi chokatiayaj. Tekiuaj uan itakeualuan no semi chokakej. 37 Absalón choloj Guesur kampa taixyekanaya Talmái, iokichpil Amihud. Uan David miak tonalmej kichokilij iokichpil Amnón. 38 Uan Absalón mokauak eyi xiuit ompa Guesur.

39 Satepan, tekiuaj David moyolseuij uan amo kichokilijok iokichpil Amnón. Yejua ika kinekiaya kiitas Absalón.

14 Joab iokichpil Zeruyá kimatik ke tekiuaj semi kinekia kiitas Absalón. 2 Yejua ika Joab kintitanik seki takamej maj yakan Tecoa maj kitemotij se siuatsin akin semi tamatkej. Uan Joab kiluij nejon siuatsin: “Xikchiua kemej yeskia tikchokilijtok aksa* akin momikilij. Ximotalili tasal tein se motalilia keman semi se tayokoxtok uan amo ximoojxili aceite. Xikchiua kemej yeskia uejkaujya tikchokilijtok aksa akin momikilij. 3 Satepan xiouj xikitati tekiuaj uan xikilui nochi tein nimitsiluiti”. Uan Joab kiluij tein monekia kijtos.

4 Siuatsin akin kayot Tecoa kiitato tekiuaj, motankuaketsak, moixpiloj hasta talpan uan kitataujtij: “¡Xinechpaleui noteko!”. 5 Tekiuaj kitajtanij:* “¿Toni mitspanoua?”. Siuatsin kiluij: “¡Niteikneltij! Notakatsin momikilij uan nimokauak noselti. 6 Nikinpiaya ome nookichpipiluan. Sayoj ke keman yejuan yetoyaj ixtauat, peuak moteuiaj uan kemej amo akin kintsakuilij, se nookichpil kimiktij iikniuj. 7 Uan axkan nochin nochankauan nechixnamikij uan nechiluiaj: ‘¡Xiktemakti mookichpil para maj tikmiktikan! Maski yejua kikauiliskiaj nochi tein iaxka itat, maj taxtaua porin kimiktij iikniuj’. Kinekij kimiktiskej nookichpil maski sayoj yejua mokaua. Komo kimiktiaj, kiixpoloskej itokay notakatsin uan amo mokauasok nion se iokichpil nikan taltikpak”.

8 Uan tekiuaj kiluij siuatsin: “Xiouj mochan uan nejua nikitas maj mitspaleuikan”. 9 Siuatsin akin kayot Tecoa kiluij tekiuaj: “Notekiuaj, maj amo mitstajtakoltikan tejua nion mochankauan* tein kichiuak nokoneuj, ta maj titaxtauakan nejua uan ichankauan nopaj”. 10 Tekiuaj kiluij: “Komo aksa oksepa mitsiluia teisa, xikilui maj nechitaki uan tikitas ke amo kemanok mitskuejmolos”. 11 Uan siuatsin kijtoj: “Nimitstataujtia notekiuaj, ximotenkaua itokaykopa* toDios Jehová ke amo kimiktiskej nokoneuj. Komo akin kinamiki momakepas kimiktia nokoneuj okachi nitajyouis”. Tekiuaj kiluij: “Nimitsyekiluia itokaykopa Jehová akin nochipa yoltok ke amo teyi kichiuiliskej mokoneuj”. 12 Siuatsin kiluij: “Noteko, nikneki nimitsiluisok teisa”. Tekiuaj kinankilij: “Xinechilui”.

13 Siuatsin kijtoj: “Noteko ¿keyej tikchiuak tein kintajyouiltia israelitas? Tejua timotajtakolmakatok porin tiktokak* mokoneuj uan amo tikauani maj mokepa. 14 Tinochin timikij uan timochiuaj kemej at tein se kimimiloua* uan amo ueli oksepa se kisentilia. Sayoj ke Dios amo kineki maj aksa miki, ta kiita tein kuali tein kinextiaj akin kintokakej porin kineki kinpaleuis maj mokepakan. 15 Notekiuaj, niualaj nimitsiluiko nejin porin nechmojmoujtijkej. Yejua ika nikijtoj: ‘Xinechkauakan maj nitajto iuan tekiuaj. Xa nechkakis uan kichiuas tein niktajtanisneki. 16 Tekiuaj xa nechkakis uan xa kinekis nechpaleuis, uan xa no kinekis kipaleuis nokoneuj akin mokauaok. Ijkon, takat akin kineki momakepas amo techkuilis tein Dios techtayokolij’. 17 Yejua ika nimitsiluij: ‘Notekiuaj, nimitstataujtia xinechilui tein nechyolseuis’, porin tejuatsin tikmati toni kuali uan toni amo kuali, ijkon kemej se iángel toTajtsin Dios. Maj toDios Jehová nochipa mitspaleui”.

18 Tekiuaj kiluij siuatsin: “Nimitstajtaniti teisa uan nikneki xinechyekilui”. Siuatsin kinankilij: “¿Toni tikneki maj nimitsilui notekiuaj?”. 19 Tekiuaj kitajtanij siuatsin: “¿Joab mitsiluij xinechiluiki nochi nejin?”. Siuatsin kinankilij: “Kemaj notekiuaj, yejua nechualtitanik. Joab nechiluij toni maj nikchiua uan no nechiluij toni maj nimitsilui. 20 Motekitikauj Joab ijkon kichiuak porin kineki mitspaleuis xikpata kemej titanemilia. Sayoj ke tejuatsin semi titamatkej ijkon kemej se iángel toTajtsin Dios, uan tikmati nochi tein mochiujtok nikan Israel”.

21 Satepan, tekiuaj kiluij Joab: “Nikchiuas tein tikneki. Xiouj xikuiti nokoneuj Absalón”. 22 Joab niman motankuaketsak uan moixpiloj hasta talpan uan peuak kiueyitalia tekiuaj. Uan Joab kiluij tekiuaj: “Noteko, axkan nikmati ke mitsyolpaktia tein nikchiua, porin tikchiuak tein nimitstajtanij”. 23 Satepan Joab moketsak uan yajki Guesur. Kikuito Absalón uan kiuikak Jerusalén. 24 Sayoj ke tekiuaj kijtoj: “Maj youi ichan. Amo uelis nechitakiuj”. Yejua ika Absalón yajki ichan uan amo yaya kiitati tekiuaj.

25 Absalón kiueyitaliayaj itech nochi xolal Israel porin semi kuakualtsin katka uan amo moajsia okse takat kemej yejua. Amo kipiaya nion teyi tein amo kuali, ta desde itsontekon hasta imetsuan amo teyi kipolouaya. 26 Itamian xiuit monekia motekilis itson porin semi kikuaetiliaya. Keman kitekiliayaj, itson etik katka kemej ome kilo uan tajko,* ijkon kemej tatamachiuayaj* akin nemiaj ichan tekiuaj. 27 Absalón kinpiak eyi okichpipil uan se siuapil akin monotsaya Tamar. Nejin siuapil semi kuakualtsin katka.

28 Uan Absalón nemik ompa Jerusalén ome xiuit, sayoj ke amo yaya kiitati tekiuaj. 29 Yejua ika Absalón tanauatij maj kinotsatij Joab porin kinekia maj kitajtouiti iixpan tekiuaj, sayoj ke Joab amo kinekik kiitatiuj. Absalón oksepa tanauatij maj kinotsatij Joab, sayoj ke yejua amo kinekik yas. 30 Satepan Absalón kiniluij itakeualuan: “Ital Joab yetok tanakastan de notal, uan kitoktok tepitsin cebada. Xiakan xiktikuiltitij”. Uan itakeualuan Absalón kitikuiltitoj ital Joab. 31 Yejua ika, Joab kiitato Absalón uan kiluij: “¿Keyej motakeualuan kitikuiltijkej notal?”. 32 Absalón kinankilij Joab: “Nejua nitanauatij maj mitsiluitij nejin: ‘Xiuiki, porin nikneki xikiluiti tekiuaj: “Okachi kuali maj nimokauani Guesur. Nenkaj nechkuitoj. Notekiuaj, xinechkaua maj nimitsitati uan komo teisa nikchiuak, xinechmikti”’”.

33 Joab kiitato tekiuaj uan kiluij nochi tein kiluijka Absalón. Yejua ika, tekiuaj tanauatij maj kinotsatij Absalón. Keman Absalón ajsik, motankuaketsak iixpan tekiuaj uan moixpiloj hasta talpan. Satepan tekiuaj kimakak Absalón se beso.

15 Satepan, Absalón tanauatij maj kichijchiuilikan se carro uan mointemolij caballos. No kinixtalij 50 takamej para maj tsikuintiakan iixpan carro. 2 Absalón kualkan meuaya uan yaya moketsati itech ojti tein ajsia ueyi xolal. Keman se takat yaya kiitati tekiuaj para maj kipaleui maj kiyektali se kuejmol, Absalón kitsakuiliaya uan kitajtaniaya:* “¿Kani tikayot?”. Uan takat kiluiaya ke pouia itech semej uejueyi kalyetonij israelitas. 3 Absalón kiluiaya: “Kuali yetok tein tikneki, sayoj ke nion se itekitikauj tekiuaj uelis mitskakis uan mitspaleuis”. 4 Uan Absalón no kijtouaya: “Komo nejua nechixtaliskiaj kemej juez, nochin akin kipiaskiaj se kuejmol oso moteteluiliskiaj, ueliskiaj nechitakiuij uan nejua nikinpaleuiskia”.

5 Keman se takat yaya motankuaketsati iixpan, Absalón kimatilanaya, kiketsaya uan kimakaya se beso. 6 Absalón kinchiuiliaya nejin nochin israelitas akin yayaj kiitatij tekiuaj para maj kinpaleui. Kemej israelitas kiuelitayaj tein kichiuaya Absalón, peuak kitojtokaj.*

7 Naui xiuit* satepan, Absalón kiluij tekiuaj: “Nimitstataujtia xinechkaua maj niouj Hebrón para nikchiuas tein nimotenkauak iuan Jehová. 8 Keman ninemia Guesur ompa Siria, nimotenkauak nejin: ‘Komo Jehová nechpaleuia maj nimokepa Jerusalén, nias nikueyichiuatiuj* Jehová’”. 9 Tekiuaj kiluij: “Kualtsin xiouj”. Uan Absalón yajki Hebrón.

10 Absalón kinichtakatitanik seki takamej maj yakan kinitatij uejueyi kalyetonij israelitas uan kinnauatij maj kichiuakan nejin: “Keman nankikakiskej ke kipitsaj kuaomit, xiktematiltikan nejin: ‘¡Absalón kiixtalijkej kemej tekiuaj ompa Hebrón!’”. 11 Absalón kinyoleuak 200 takamej akin nemiaj Jerusalén maj iuan yanij Hebrón. Yejuan iuan yajkej, sayoj ke amo kimatiaj toni yaya kichiuati Absalón. 12 Uan keman Absalón kimaktilijtoya Dios in tapialmej, tanauatij maj kinotsatij Ahitofel. Ahitofel katka kayot Guiló uan David kiixejekoltiaya tein yaya kichiuati. Tein Absalón kichiujtoya para mochiuas tekiuaj kuali yajtoya uan okachi momiakiliayaj akin kipaleuiayaj.

13 Se tonal, se takat kiluito David: “Israelitas kipaleuijtokej Absalón para maj mochiua tekiuaj”. 14 David niman kiniluij nochi itakeualuan akin iuan yetoyaj ompa Jerusalén: “¡Maj niman tikcholuikan Absalón, porin komo nikan techajsiki amo uelisok ticholoskej! ¡Ximoijsiuilikan, porin komo techajsiki techmiktis ika imachete tein ojkan tenej* uan no kinmiktis akin nemij itech ueyi xolal!”. 15 Itakeualuan tekiuaj kinankilijkej: “Tikchiuaskej nochi tein tikijtos totekiuaj”. 16 Uan tekiuaj yajki uan nochin akin nemiaj ichan iuan yajkej. Sayoj ke tekiuaj kinkaujteuak ichan majtakti isiuauan* para maj tajpiakan. 17 Tekiuaj yajki uan akin iuan yayaj kitojtokatiayaj uan moketsatoj Bet-Merhac.

18 Nochin akin yayaj iuan tekiuaj panotiajkej iixpan. Uan David kiitaya maj amo akin mokauani. Panotiajkej iixpan nochin itakeualuan uan soldados akin kiyekpiayaj tekiuaj.* No panotiajkej 600 takamej akin nemiaj Gat uan kitojtokayaj David. 19 Uan tekiuaj kiitak Ittái akin kayot Gat uan kiluij: “¿Keyej tikneki nouan tias? Ximokepa uan xikpaleui yankuik tekiuaj. Ipa amo nikan tikayot uan amo ueli timokepaok moxolal. 20 Nejua amo nikmati kani niajtinemis uan tejua yankuixtok tiejkok. Yejua ika amo kinamiki xinechtojtokatinemi. Ximokepa uan xikinuika takamej akin mouan uitsej. ¡Maj Jehová nochipa mitstasojta uan maj nochipa mitspaleui!”. 21 Sayoj ke Ittái kiluij tekiuaj: “¡Nimitsyekiluia itokaykopa Jehová, Dios akin nochipa yoltok, uan no nimitsyekiluia tejuatsin notekiuaj ke kampa tias no ompa nias. Mouan nietos maski uelis nechmiktiskej!”. 22 Yejua ika David kiluij Ittái: “Kuali yetok, tiouij”. Uan Ittái uan takamej akin iuan yayaj panokej iniuan ininchankauan.

23 Nochin akin ompaka nemiaj semi chikauak chokayaj keman panotiayaj akin iuan yayaj tekiuaj. Tekiuaj ijkatoya tanakastan den tal tamanis* tein moixmati kemej Cedrón, uan nochin akin iuan yayaj kipanauijtiayaj tal tamanis uan kikuikej ojti tein ajsi taluakyan. 24 Tiopixkat Sadoc no iuan yaya David uan nochin levitas no iuan yajkej. Yejuan kiuikayaj tatiochiualkaxon* tein iaxka toTajtsin Dios. Levitas moketskej uan talpan kitalijkej tatiochiualkaxon. Uan tiopixkat Abiatar ompa yetoya hasta keman nochin akin kiskej de Jerusalén kitamipanauijkej tal tamanis Cedrón. 25 Sayoj ke tekiuaj kiluij Sadoc: “Ximokepa Jerusalén uan xikuika tatiochiualkaxon tein iaxka toTajtsin Dios. Komo tein nikchiua kiyolpaktia Jehová, yejua nechpaleuis maj nimokepa uan maj oksepa nikita tatiochiualkaxon uan kaltsin* kampa kitalijkej. 26 Sayoj ke komo amo kiyolpaktia tein nikchiua, maj nechchiuili tein kiitas ke nechnamiki”. 27 Tekiuaj kiluij tiopixkat Sadoc: “Tejua tikajsikamati tein Dios kineki. Tejua uan Abiatar ximokepakan Jerusalén, uan xikuika mokoneuj Ahimáaz uan Jonatán iokichpil Abiatar. 28 Nejua nimochias tanakastan den taluakyan, kampa ueli se kimetspanauia ueyiat Jordán. Ompa nietos hasta keman nanechmatiltiskej toni panotok itech ueyi xolal”. 29 Yejua ika Sadoc uan Abiatar mokepkej Jerusalén uan kiuikakej tatiochiualkaxon tein iaxka toTajtsin Dios uan ompa mokaujkej.

30 David chokatiaya keman pankistiaya Olivojtepet. Metsxipetstik* yaya uan kuapiktiaya.* Uan nochin akin yayaj iuan no kuapiktiayaj uan chokatiayaj keman pankistiayaj. 31 Uan kiluitoj David: “Ahitofel no kipaleuijtok Absalón para maj mitsixpata”. Keman David kikakik nejon, kijtoj: “¡Jehová, nimitstataujtia maj Ahitofel tayolmajxiti kemej aksa* akin amo kuatamati!”.

32 David ajsik tepekuapan kampa israelitas yayaj kiueyichiuatij Dios, uan ompa kichixtoya Husái akin arkita. Husái kitsayanka itasal uan mokuatemilijka tal. 33 Sayoj ke David kiluij: “Komo nouan tiouj, amo uelis tinechpaleuis. 34 Okachi tinechpaleuis komo timokepa Jerusalén uan tikiluia Absalón ‘Nejua nimotekitikauj notekiuaj. Maski achto niktekitiliaya mopaj, axkan tejua nimitstekitilis’. Uan keman Ahitofel teisa kiyolmajxitis uelis tinechpaleuis para maj Absalón amo kichiua tein kiluis. 35 Ompa no mokaujkej tiopixkamej Sadoc uan Abiatar. Yejuan xikinilui nochi tein tikakis ichan tekiuaj. 36 Uan no mokaujkej ininkoneuan, Ahimáaz iokichpil Sadoc uan Jonatán iokichpil Abiatar. Maj yejuan nechiluikij nochi tein nankikakiskej”. 37 Yejua ika Husái akin kuali mouikaya iuan David, kalakik Jerusalén keman Absalón ajsitiaya.

16 Keman David pantemotiayaya den tepet monamikito iuan Zibá, itekitikauj Mefibóset. Yejua ompa kichixtoya uan kiuikilij ome burros tein kinmamaltij ome ciento pantsitsin, se ciento taxkaltsitsin tein chijchiujtoyaj ika pasas, se ciento taxkaltsitsin tein chijchiujtoyaj ika higos uan dátiles* uan se ueyi komit tein kipiaya vino. 2 Tekiuaj kitajtanij* Zibá: “¿Keyej tikualkuik nochi nejin?”. Zibá kinankilij: “Burros nikinualkuik para maj ininpanko yakan ichankauan tekiuaj, pantsin uan taxkaltsitsin tein chijchiujtok ika higos uan dátiles nikualkuik para maj takuakan motekitikauan. Uan vino nikualkuik para maj tayikan akin siouiskej keman nanyajtoskej taluakyan”. 3 Uan tekiuaj kitajtanij: “¿Uan kani yetok Mefibóset iixuiuj* moteko?”. Zibá kinankilij: “Mokauak ompa Jerusalén porin moluij: ‘Kemej noueyitat* katka tekiuaj, axkan israelitas nejua nechixtaliskej kemej tekiuaj’”. 4 Tekiuaj kiluij Zibá: “Nochi tein kipia Mefibóset moaxka yeski desde axkan”. Uan Zibá motankuaketsak uan kiluij: “Nimitsueyitalia uan nimitstasojkamatilia notekiuaj. Nochipa nikchiuas tein mitsyolpaktia”.

5 Keman tekiuaj David ajsik Bahurim kinamikito se takat akin katka ichankauj Saúl. Nejin takat monotsaya Simeí iokichpil Guerá. Yejua semi chikauak kiuijuikaltiaya* David. 6 Simeí peuak kitetema* David uan nochin akin iuan yetoyaj. Kintetemak itakeualuan uan isoldados akin kuali tateuiayaj akin yetoyaj iyekmakopa uan iopochmakopa. 7 Simeí kiluiaya nejin keman kiuijuikaltiaya: “¿Toni tikchiua nikan? ¡Xiouj! Tejua miakej tikinmiktiani uan amo tikualtia. 8 Jehová mitstaxtaualtijtok porin tikinmiktij ichankauan Saúl akin tikajchiuak kemej tekiuaj para tejua timoixtalis. Yejua ika Jehová kiixtalij maj mokoneuj Absalón taixyekana. ¡Axkan titaxtaujtok porin miakej tikinmiktij!”.

9 Uan Abisái iokichpil Zeruyá kiluij tekiuaj: “Nejin takat kemej yeskia se itskuinmiket, ¿toni chiujkej para maj mitsuijuikaltijto notekiuaj? Xinechkaua maj nikechkotona”. 10 Sayoj ke tekiuaj kinankilij: “¿Keyej namokalakiaj namejuan ikoneuan Zeruyá? Xikauakan maj nechuijuikalti, porin yejua Jehová kiluij: ‘¡Xikuijuikalti David!’. Yejua ika amo akin uelis kitakaualtis komo Dios kiluijtok maj kichiua”. 11 David no kiluij Abisái uan nochin itakeualuan: “Xikauakan maj nechuijuikalti. Komo Absalón akin nokoneuj kineki nechmiktis, okachi taixejekol maj kineki nechmiktis se takat akin poui iniuan ichankauan Benjamín. ¡Xikauakan maj nechuijuikalti porin Jehová kinauatij maj kichiua! 12 Xa Jehová kiitas ke semi nitajyouijtok uan xa Jehová nechtatiochiuis uan amo kikauas maj nechpano tein kijtojtok Simeí”. 13 David uan nochin akin iuan yayaj kisentokakej nejnenkej uan Simeí kintojtokatiaya* tepekuapan. Yejua kiuijuikaltijtiaya David, kitetentiaya* uan kipantepeuilijtiaya miak talnex.

14 Tekiuaj uan nochin akin kitojtokakej ajsikej kampa yayaj. Yejuan semi sioujtoyaj, yejua ika ompa moseuijkej.

15 Uan Absalón uan nochin israelitas akin kipaleuiayaj ajsikej Jerusalén. Ahitofel no iuan yaya. 16 Keman Husái akin arkita akin kuali mouikaya iuan David kiitato Absalón, peuak kiluia: “¡Maj Dios nochipa kitiochiua totekiuaj! ¡Maj Dios nochipa kitiochiua totekiuaj!”. 17 Yejua ika Absalón kitajtanij Husái: “¿Ijkon tiknextilia motasojikniuj ke tiktasojta? ¿Keyej amo iuan tiajki motasojikniuj?”. 18 Husái kinankilij Absalón: “Ipa amo niaskia iuan, porin nejua nikpaleuia akin Jehová kijitak, uan akin kijitakej nejin takamej akin mouan yetokej uan nochin okseki israelitas. Nejua mouan nimokauas. 19 Tejua tiiokichpil notasojikniuj, yejua ika oksepa nimitsyekiluia ke amo niktekitilis okse ta tejua nimitstekitilis. Ijkon kemej niktekitilij mopaj, no ijkon nimitstekitilis tejua”.

20 Satepan, Absalón kiluij Ahitofel: “Xinechilui toni maj tikchiuakan”. 21 Ahitofel kiluij Absalón: “Ximoteka iniuan isiuauan* mopaj, akin kinkaujteuak para maj tajpiakan kalijtik. Keman israelitas kimatiskej ke tikchiuak nejin uan ke amo tiktakachiuak* mopaj, okachi kinekiskej mitspaleuiskej”. 22 Yejua ika kitalilijkej Absalón se kaltsin* kalkuako* uan ompa motekak iniuan isiuauan itat. Uan nochin israelitas kiitakej tein kichiuak.

23 Itech nejon tonalmej, tein Ahitofel tayolmajxitiaya kiitayaj kemej yeskia Dios tayolmajxitiaya.* Yejua ika David uan Absalón kikakiaj nochi tein Ahitofel kijtouaya.

17 Ahitofel kiluij Absalón: “Xinechkaua maj nikinijita 12 mil soldados para maj tiktemotij David nejin youak. 2 Nikichtakauitiuj keman sioujtos, uan nikchiuas maj mojkakalaki. Uan nochin akin iuan yetokej choloskej uan sayoj nikmiktis tekiuaj. 3 Komo tikmiktiaj takat akin tiktemojtok, nochin uelis mokepaskej uan nikchiuas maj tejua mitstojtokakan.* Ijkon tinochin kualtsin tinemiskej”. 4 Absalón uan nochin taixyekananij israelitas kiuelitakej tein kiniluij Ahitofel.

5 Sayoj ke Absalón kijtoj: “No xiknotsatij Husái akin arkita para maj techilui tein yejua kinemilia”. 6 Yejua ika Husái kiitato Absalón, uan Absalón kiluij tein Ahitofel kinyolmajxitijka. Uan kitajtanij* Husái: “¿Keniuj tikita? ¿Maj tikchiuakan tein kijtoj? Komo amo, tejua xitechilui toni moneki tikchiuaskej”. 7 Husái kiluij Absalón: “Amo kuali yetok tein axkan namechyolmajxitij Ahitofel”.

8 Husái no kiluij: “Tejua tikmati ke mopaj uan isoldados semi kuali tateuiaj. Uan semi kualantokej ijkon kemej se tapial* tein kinpoloj ipiluan. Uan no xikelnamiki ke mopaj se soldado uan amo kochitiuj kampa kochiskej itakeualuan. 9 Xa yekintsin motatijtos* itech se tepekoyok oso okseko. Uan komo yejua achto namechteuia, akin kitekakiliskej kijtoskej: ‘¡Kintankej akin kipaleuiaj Absalón!’. 10 Hasta takat akin semi yolchikauak ijkon kemej se león,* mojkakalakis. Porin nochin israelitas kimatij ke mopaj semi kuali tateuia uan ke isoldados amo mouij. 11 Nejua niknemilia maj tikchiuakan nejin: maj tikinsentilikan nochin takamej israelitas akin nemij Dan hasta Beer-Seba. Maj tel miakej tikinsentilikan kemej xal tein onkak martenoj uan tejua xitechixyekana keman titateuitiuij. 12 Tikteuitiuij David kampa yeski yetos, uan ijkon kemej ajuach tamitaapaloua talpan, tejuan no ompa titamitemitiuij uan tiksenkuiskej David. Nion se makisas. Yejua uan nochin itakeualuan mikiskej. 13 Uan komo David motatiti itech se ueyi xolal, tiaskej iniuan nochin israelitas uan tikixpoloskej nejon ueyi xolal. Tikuikaskej lazos para tikilpiskej* temej tein ika kiyoualojkaj ueyi xolal uan tiktitilatsaskej hasta ueyiat. Amo mokauas nion se tet”.

14 Absalón uan nochin takamej israelitas kijtojkej: “¡Tein Husái kijtoua maj tikchiuakan okachi kuali ke tein kijtoj Ahitofel!”. Maski Ahitofel kuali kinyolmajxitijka, Jehová kiixtalijka* maj amo kichiuanij tein Ahitofel kijtojka. Ijkon Jehová kichiuaskia maj Absalón kipano tein tel amo kuali.

15 Satepan Husái kiluito tiopixkat Sadoc uan Abiatar tein Ahitofel kiyolmajxitijka Absalón uan taixyekananij israelitas. Uan no kiniluij tein yejua kinyolmajxitij. 16 Uan Husái kijtoj: “Niman xiakan xikiluitij David: ‘Nejin youak amo ximokaua tanakastan den taluakyan kampa ueli se kimetspanauia ueyiat. Moneki tikpanauis ueyiat. Komo amo tikpanauia notekiuaj, tejua uan nochin akin mouan yetokej namechmiktiskej’”.

17 Jonatán uan Ahimáaz yetoyaj ompa En-Roguel kalampa den ueyi xolal Jerusalén. Amo kalakkej porin amo kinekiaj maj kinitakan, yejua ika se siuatsin kiniluito tein Husái kijtojka. Uan yejuan yajkej kinauatitoj tekiuaj David. 18 Sayoj ke se okichpil kinitak uan kiluito Absalón. Yejua ika Jonatán uan Ahimáaz niman kisteujkej uan ajsikej Bahurim. Ajsitoj ichan se takat akin kichijchiujka se ueyi atekoch ikalixpan uan yejuan ompa mokalakijkej para motatiskej. 19 Uan isiuatsin takat kitentsakuak atekoch ika se tasal uan tapani kitemak trigo takuechol. Amo akin kimatik ke ompa kintatijkaj. 20 Itakeualuan Absalón ajsikej ichan nejon siuatsin uan kitajtanijkej: “¿Kani yetokej Ahimáaz uan Jonatán?”. Siuatsin kinnankilij: “Yejuan panokej nikauin uan yajkej ueyiat”. Takamej kintemotoj sayoj ke amo kinajsikej, yejua ika mokepkej Jerusalén.

21 Keman takamej yajkej, Jonatán uan Ahimáaz kiskej den atekoch. Satepan yajkej kiluitoj tekiuaj toni tayolmajxitijka Ahitofel. Uan no kiluijkej: “Niman xikpanauikan ueyiat”. 22 Yejua ika David uan nochin akin iuan yayaj nimantsin kipanauijkej ueyiat Jordán. Keman tanesik, nochin kitamipanauijkajya ueyiat.

23 Keman Ahitofel kiitak ke Absalón amo kichiujka tein kiyolmajxitijka, mopantalij itech iburro uan yajki ichan ompa Guiló. Keman kinnauatij ichankauan toni monekia kichiuaskej satepan ke momikiliskia, mokechpiloj uan mikik. Kitokkej kampa kintokkaj iuejkaujtatuan.

24 David yajki ueyi xolal Mahanaim uan Absalón kipanauij ueyiat Jordán iniuan nochin israelitas. 25 Absalón kiixpatak Joab uan kiixtalij Amasá para maj kinixyekana nochin soldados israelitas. Itat Amasá katka Itrá akin katka israelita uan inan katka Abigaíl iichpoch Nahás. Abigaíl katka iikniuj Zeruyá akin katka inan Joab. 26 Absalón uan takamej israelitas kitalijkej ininkaltsitsin* ompa Galaad.

27 Keman David ajsik Mahanaim kiitatoj seki takamej. Kiitato Sobí iokichpil Nahás akin kayot Rabá kampa nemiaj ammonitas. No kiitato Makir iokichpil Amiel akin kayot Lo-Debar uan no yajka Barzilái akin galaadita uan kayot Roguelim. 28 Yejuan kiuikilijkej David seki petat, seki kaxit, konmej, trigo, cebada, harina, trigo tateuats, habas, lentejas uan okseki xinach tateuats. 29 No kiuikilijkej nekti,* mantequilla, ichkamej* uan queso. Nochi nejon kiuikilijkej David uan akin iuan yayaj porin moiluiayaj: “Nochin akin yetokej taluakyan mayanaj, amikij uan sioujtokej”.

18 David kinpouak takamej akin iuan yetoyaj uan kinxejxeloj mijmil uan ciejcien. No kinixtalij seki takamej maj kinixyekanakan. 2 Uan David exkan kinxejxeloj takamej akin iuan yetoyaj. Uan kinixtalij maj kinixyekanakan Joab, Abisái iokichpil Zeruyá uan Ittái akin kayot Gat. Abisái katka iikniuj Joab. Tekiuaj no kiniluij: “Nejua no nias nitateuitiuj namouan”. 3 Sayoj ke takamej kiluijkej: “Amo touan xiouj, porin yejuan amo kinkuejmolos komo tejuan ticholouaj oso tajko de nochin akin titateuitij timikij. Amo tejuan techtemouaj, ta tejua, porin komo mitsmiktiaj kemej yeskia kinmiktiskiaj 10 mil takamej. Okachi kuali ximokaua itech ueyi xolal uan xitechtitanili tein monekis”. 4 Tekiuaj kiniluij: “Nikchiuas tein nankijtouaj”. Yejua ika tekiuaj moketsato puertajtenoj den ueyi xolal uan nochin takamej kistiajkej ijkon kemej kinxejxelojka. Kistiajkej de ciejcien uan mijmil. 5 Tekiuaj no kinauatij Joab, Abisái uan Ittái: “Amo teyi xikchiuilikan Absalón porin yejua nokonetsin”. Uan nochin takamej kikakkej tein tekiuaj kinnauatij.

6 Nochin isoldados David yajkej kalampakopa den ueyi xolal para moteuiskej iniuan israelitas akin kipaleuiayaj Absalón. Uan moteuijkej koujtaj kampa kintaxejxelouilijkaj ikoneuan Efraín. 7 Isoldados David kintankej israelitas akin kipaleuiayaj Absalón uan tel miakej kinmiktijkej. Nejon tonal kinmiktijkej 20 mil takamej. 8 Uan miakkan momoyaujkej* keman moteuijtoyaj. Uan no, maski miakej kinmiktijkej ika machete tein ojkan tenej,* okachi miakej mikkej koujtaj.

9 Absalón moixnamikito iniuan isoldados David. Yejua yaya itech imula uan keman kinitak cholojteuak. Sayoj ke imula panotikisak itampa se ueyi kouit tein tel makoujyoj. Uan Absalón ompa mokuaijilpij* uan mopiloj* porin imula kisentokak motaloj. 10 Se soldado kiitak Absalón uan kiluito Joab: “Yekin nikitak Absalón pilkatok itech se ueyi kouit”. 11 Joab kiluij soldado: “¿Uan keyej amo tikmiktij komo tikitak? Komo tikmiktiskia nimitsmakaskia 100 gramos* de plata uan se cinturón”. 12 Sayoj ke soldado kiluij Joab: “Ipa amo nikmiktiskia iokichpil tekiuaj maski nechmakaskiaj* 11 kilos uan tajko* de plata. Tejuan tikakkej keman tekiuaj mitsnauatij maj amo teyi tikchiuilikan Absalón porin ikonetsin, uan no kinnauatij Abisái uan Ittái. 13 Komo nikmiktiskia amo niktakamatiskia tekiuaj uan ipa amo ueliskia niktatilis* ke nikmiktij iokichpil. Uan tejua amo tinechpaleuiskia maj tekiuaj amo teyi nechchiuili”. 14 Keman Joab kikakik nejon, kiluij: “¡Nenkajsan nimitsnojnotstok!”. Joab kikuik eyi koujmej tein puntajyejkej* uan kitokilij Absalón iyolixko.* Absalón pilkatoya itech imakoujyo ueyi kouit uan yoltoyaok keman Joab kichiuak nejon. 15 Satepan ajsikej majtakti takamej akin kimamaliayaj Joab tein ika tateuiaya. Yejuan motokijkej kampa yetoya Absalón uan kimagakej hasta ke kimiktijkej. 16 Joab kipitsak kuaomit para maj amo moteuianijok uan soldados amo kintokatiajkejok israelitas akin kipaleuiayaj Absalón. 17 Satepan kipantamotkej Absalón itech se talkoyok tein yetoya koujtaj uan ompa kipantalilijkej miak tet. Uan nochin israelitas akin kipaleuiayaj Absalón cholojkej uan mokepkej ininchan.

18 Keman Absalón nemiaok, tanauatij maj kiketsakan se ueyi tet itech tal tamanis* tein iaxka tekiuaj. Absalón moluiaya: “Amo nikpia nion se nokoneuj para maj niktokayti kemej nejua uan maj amo ixpoliui notokay”. Yejua ika nejon ueyi tet kitokaytij Absalón. Hasta axkan moixmati kemej tet tein kiketsak Absalón.

19 Ahimáaz iokichpil Sadoc kiluij Joab: “Nimitstataujtia xinechkaua maj nikiluiti tekiuaj tein panok, porin Jehová kimakixtij uan amo teyi kichiuilijkej akin kitauelitaj”. 20 Sayoj ke Joab kiluij: “Axkan amo tias tiktematiltitiuj teisa. Uelis tias okse tonal, sayoj ke axkan amo porin ikonetsin tekiuaj mikik”. 21 Uan Joab kiluij se takat akin kayot Cus:* “Xiouj xikiluiti tekiuaj tein tikitak”. Nejon takat cusita moixpiloj iixpan Joab uan tsikuinteuak. 22 Ahimáaz iokichpil Sadoc oksepa kiluij Joab: “Nimitstataujtia xinechkaua maj no nimotalo taikan den takat cusita, maski tein yeski nechpanos”. Sayoj ke Joab kiluij: “¿Keyej no tiasneki nokonetsin, ta amo onkakok toni tiktematiltis?”. 23 Maski Joab kiluij nejon, Ahimáaz kisentokak kitataujtij: “Xinechkaua maj niouj maski tein yeski nechpanos”. Yejua ika Joab kiluij: “Komo tiktelneki tias, xiouj”. Ahimáaz tsikuinteuak uan kikuik ojti tein panoua tal tamanis tein poui Jordán. Kemej ijsiujka motaloj, kipanauijtikisak takat cusita.

24 Ueyi xolal kampa yetoya David kipiaya ome puertas, se taijtikkopa uan okse kalampakopa. Uan David tokotsyetoya tatajko den ome puertas. Tajpixkej pankisak kalkuako,* ajkokopa den puerta. Nejon puerta pepechiujtoya iuan tepamit tein kiyoualoua ueyi xolal. Tajpixkej kiitak ke se takat iselti ualtsikuintoya. 25 Uan tajpixkej chikauak tsajtsik para kinauatis tekiuaj tein kiitstoya. Uan tekiuaj kiluij: “Komo iselti uitse kijtosneki ke techmatiltiki teisa”. Takat akin ualtsikuintoya ejkotoyaya ueyi xolal. 26 Satepan tajpixkej kiitak okse takat akin no ualtsikuintoya, uan chikauak kitsajtsilij akin tajpixtoya puertajtenoj: “¡Okse takat iselti ualtsikuintok!”. Tekiuaj kijtoj: “Nejin takat no techmatiltiki teisa”. 27 Tajpixkej kijtoj: “Takat akin ualtayekana tsikuini kemej Ahimáaz iokichpil Sadoc”. Yejua ika tekiuaj kijtoj: “Ahimáaz se takat yolkuali, xa techmatiltiki teisa tein kuali”. 28 Uan Ahimáaz chikauak kiluij tekiuaj: “¡Titatankej!”. Satepan motankuaketsak uan moixpiloj hasta talpan uan kiluij tekiuaj: “Noteko, maj tikueyitalikan toDios Jehová akin mitspaleuij xikintani takamej akin mitsixnamikiaj”.

29 Sayoj ke tekiuaj kitajtanij:* “¿Kuali yetok nokonetsin Absalón?”. Ahimáaz kiluij: “Keman Joab nechualtitanik maj nimitsitaki uan no kiualtitanik okse motakeual, nikitak ke miakej mosentilijtoyaj, sayoj ke amo nikmatik keyej”. 30 Tekiuaj kiluij: “Ximoketsaki nonakastan”. Uan Ahimáaz moketsato inakastan.

31 Satepan kisako takat cusita uan kijtoj: “Notekiuaj, nimitsmatiltiko tein mochiuak. Axkan Jehová mitspaleuij xikintani takamej akin mitsixnamikiaj”. 32 Sayoj ke tekiuaj kitajtanij takat cusita: “¿Kuali yetok nokonetsin Absalón?”. Takat kinankilij: “Notekiuaj, maj nochin akin mitstauelitaj uan nochin akin mitsixnamikkej no mikikan kemej Absalón”.

33 Keman tekiuaj kikakik nejon, fiero kimatik. Yejua pankisak kalkuako kampa yetoya se cuarto ajkokopa den puerta uan peuak choka. Peuak nenemi uan kijtojtiaya: “¡Nokonetsin Absalón! ¡Nokonetsin! ¡Nokonetsin Absalón! ¡Maj nejua nimikini uan amo tejua! ¡Nokonetsin Absalón, nokonetsin!”.

19 Uan kiluitoj Joab: “Tekiuaj tayokoxtok uan chokatok porin mikik Absalón”. 2 Yejua ika, maski nejon tonal tatankaj, nochin soldados peuak tayokoyaj keman kimatkej ke tekiuaj semi tayokoxtoya porin mikik ikonetsin. 3 Soldados ichtakakalaktiajkej ueyi xolal. Ajsikej kemej akin tapolouaj keman tateuitij uan mopinaujmatij keman mokepaj. 4 Tekiuaj moixpikik* uan chikauak kijtouaya: “¡Nokonetsin Absalón! ¡Nokonetsin Absalón, nokonetsin!”.

5 Joab kalakito kampa yetoya tekiuaj uan kiluij: “Tein tikchiujtok kichiuak maj nochin mosoldados mopinaujmatikan, maski yejuan mitsmakixtijkej nejin tonal. Uan no kinmakixtijkej mookichpipiluan, mosiuapipiluan uan nochin mosiuauan.* 6 Tejua tikintasojta akin mitstauelitaj uan tikintauelita akin mitstasojtaj. Tikyeknextij ke amo tikintasojta mosoldados nion akin kinixyekanaj mosoldados. Nikyekmati ke tiyolpakiskia komo axkan yoltoskia Absalón maski nochin tejuan timikiskiaj. 7 Yejua ika axkan ximoketsa uan xiouj xikinyolchikauati mosoldados. Nimitsyekiluia itokaykopa Jehová ke komo amo tiouj, nejin youak nochin mosoldados mitskaujteuaskej. Uan maski semi titajyouiani desde keman tiokichpilok katka, nejin okachi mitstajyouiltis”. 8 Tekiuaj moketsak uan motalito puertajtenoj den ueyi xolal. Uan nochin akin ompa nemiaj kiniluijkej ke ompa tokotsyetoya. Yejua ika nochin kiitatoj tekiuaj.

Sayoj ke israelitas akin kipaleuiayaj Absalón cholojkej uan yajkej ininchan. 9 Uan noyan* nochin israelitas motajtolteuiayaj uan moiluiayaj: “Tekiuaj techpaleuij maj amo techtanikan akin techtauelitaj uan techmakixtij para maj amo techtajyouiltianij filisteos. Sayoj ke axkan yajki okseko porin kicholuij Absalón. 10 Uan Absalón, akin tikixtalijkej maj techixyekana, mikik keman tiajkaj titateuitoj. Yejua ika, ¿keyej ayamo teyi tikchiuaj para tikualkuiskej tekiuaj?”.

11 Tekiuaj David tanauatij maj kinitatij tiopixkamej Sadoc uan Abiatar uan maj kiniluikan: “Xikiniluitij akin taixyekanaj Judá: ‘Hasta nikan kampa ninemi niktekakilijya tein kijtojtinemij israelitas. ¿Keyej nankichixtokej maj oksekin nechpaleuikan maj nimokepa nochan? 12 Namejuan nanoparientes,* uan nankichixtokej maj oksekin nechpaleuikan maj nimokepa’. 13 Uan xikiluikan Amasá: ‘Tejuan tiparientes. Desde axkan nimitsixtalia xikinixyekana nosoldados uan xikixpata Joab. Maj Dios semi nechtatsakuilti komo amo ijkon nikchiua’”.

14 Nochin takamej akin nemiaj Judá semi kiuelitakej tein kijtoj tekiuaj, uan tanauatijkej maj kiluitij: “Ximokepa iniuan nochin motakeualuan”.

15 Keman tekiuaj mokeptoyaya ichan uan ajsik ueyiat Jordán, takamej akin nemiaj Judá kinamikitoj ompa Guilgal para iuan kipanauiskej ueyiat. 16 Keman takamej akin nemiaj Judá kinamikitoj tekiuaj, Simeí iokichpil Guerá no niman temok iniuan. Simeí pouia iniuan ikoneuan Benjamín uan nemia Bahurim. 17 Iuan Simeí yayaj mil takamej akin pouiaj iniuan ikoneuan Benjamín. Zibá, akin kitekitilijka Saúl no ijsiujka temok para ajsis ueyiat Jordán achto ke tekiuaj. Kinuikaya 20 itakeualuan uan nochin ikoneuan akin katkaj 15. 18 Zibá kipanauij* ueyiat kampa uelia se kimetspanauiaya. Yajki kinpaleuito akin iuan yajkaj tekiuaj para maj kipanauikan ueyiat, uan no yajki para kichiuas nochi tein kinauatiskia tekiuaj. Sayoj ke keman tekiuaj yaya kipanauitia ueyiat Jordán, Simeí iokichpil Guerá motankuaketsato iixpan. 19 Uan kiluij tekiuaj: “Noteko, xinechtapojpolui porin nikchiuak tein amo kuali keman ticholojtoya de Jerusalén. Amo xinechelnamikili tein nikchiuak 20 porin nikyekmati ke nitajtakoj notekiuaj. Yejua ika achto nejua niualtemok nimitsnamikiko de nochin ichankauan José”.

21 Abisái iokichpil Zeruyá niman kiluij tekiuaj David: “Simeí moneki mikis porin mitsuijuikaltij* maski Jehová mitsixtalij xitaixyekana”. 22 Sayoj ke David kinankilij: “¿Keyej namokalakiaj namejuan ikoneuan Zeruyá? ¿Keyej nanechixnamikij? Axkan oksepa nikinixyekanati nochin israelitas. Yejua ika amo monekiok maj tikmiktikan”. 23 Satepan tekiuaj kiyekiluij Simeí: “Amo timikis”.

24 Mefibóset iixuiuj Saúl no temok kinamikito tekiuaj. Mefibóset amo mometspajpaktoya nion motekilijka itentson. Amo no motapatilijka nion kipakak itasal desde keman tekiuaj yajki hasta tonal keman mokepak. 25 Keman ajsik* Jerusalén para kitajpalos tekiuaj, tekiuaj kitajtanij:* “¿Keyej amo nouan tiajka Mefibóset?”. 26 Mefibóset kinankilij: “Notekiuaj, tejuatsin tikmati ke amo ueli ninejnemi,* yejua ika nikiluij notakeual: ‘Xikpejpechti* noburro para ompa nimopantalis uan iuan nias tekiuaj’. Sayoj ke notakeual nechkajkayauak. 27 Notekiuaj, yejua mitsiluito miak taman tein amo melauj. Sayoj ke tejuatsin semi titamatkej ijkon kemej se iángel toTajtsin Dios. Yejua ika xikchiua tein tikitas ke kinamiki. 28 Tejuatsin ueliskia tikinmiktis nochin ichankauan noueyitat. Sayoj ke amo tinechmiktij, ta tinechyoleuak maj nitakua mouan uan iniuan okseki motakeualuan. Amo kinamiki maj nimitstajtaniok teisa”.

29 Sayoj ke tekiuaj kiluij: “Amo teyi xikijtook. Nikixtalij ximoxejxelouilikan talmej tejua uan Zibá”. 30 Mefibóset kiluij tekiuaj: “Maj Zibá kikui nochi in talmej. Nejua niyolpaki porin kualtsin timokepak notekiuaj”.

31 Satepan Barzilái kinamikito tekiuaj David uan iuan temok hasta ueyiat Jordán. Barzilái katka galaadita uan nemia Roguelim. 32 Barzilái semi tatajtsinya katka, kipiaya 80 xiujmej. Keman tekiuaj yetoto Mahanaim, Barzilái kiuikilij tein kikuas porin semi tominpiaya. 33 Yejua ika tekiuaj kiluij Barzilái: “Xikpanaui ueyiat uan nouan xiouj Jerusalén. Amo teyi mitspolos ompa porin nochipa nouan titakuas”. 34 Sayoj ke Barzilái kiluij tekiuaj: “Nejua amo miak xiujmejok ninemis. Nenkajsan komo mouan nipankisa Jerusalén. 35 Nikpiaya 80 xiujmej uan amo ueliok nikixejekoua ox teisa kuali yetok oso amo, nion nitenueliaok. Amo niyektakakiok uan amo uelisok nikinkakis akin cantarouaj. Nenkaj maj mouan niouj notekiuaj porin sayoj nimitstekimakas. 36 Semi niyolpaki porin mouan niualajya hasta ueyiat Jordán. Amo monekiok tinechtayokolis teisa notekiuaj. 37 Nimitstataujtia xinechkaua maj nimokepa nochan. Xinechkaua maj nimiki kampa nikayot, kampa kintokkej nopaj uan nomaj. Nejua amo uelis nias, sayoj ke nikan yetok motekitikauj Kimham. Maj yejua mouan youi notekiuaj uan maj mouan kipanaui ueyiat. Xikmaka nochi tein tejuatsin tiknekis”.

38 Uan tekiuaj kiluij Barzilái: “Maj Kimham nouan youi uan maj nouan kipanaui ueyiat. Nejua nikpaleuis ijkon kemej tinechiluis. Uan komo tikneki maj nikchiua okse taman no nikchiuas”. 39 Nochin akin iuan yayaj tekiuaj peuak kipanauiaj ueyiat Jordán. Uan keman tekiuaj yaya kipanauitia ueyiat, kimakak Barzilái se beso uan kitajtanij Dios maj kitatiochiui. Satepan Barzilái mokepak ichan. 40 Keman tekiuaj kipanauij ueyiat uan yajki Guilgal, Kimham iuan yajki. Nochin akin nemiaj Judá uan sekin* akin nemiaj Israel kipanauijkej ueyiat iuan tekiuaj.

41 Okseki takamej akin nemiaj Israel kitajtanijkej tekiuaj: “¿Keyej mitsichtakaualkuikej toparientes, takamej akin pouij iniuan ikoneuan Judá? Yejuan kichiujkej xikpanaui ueyiat Jordán iniuan nochin akin mouan yajkaj uan iniuan nochin mosoldados”. 42 Nochin takamej akin nemiaj Judá kinnankilijkej takamej akin nemiaj Israel: “Tikchiujkej porin tekiuaj topariente. ¿Uan keyej nankualanij? ¿Xe namoluiaj ke teisa tikuilianij tekiuaj para titakuaskej? ¿Oso namoluiaj ke teisa techtayokoliani?”.

43 Sayoj ke takamej akin nemiaj Israel kiniluijkej takamej akin nemiaj Judá: “Tejuan tipouij iniuan majtakti uejueyi kalyetonij, yejua ika okachi technamikia maj tikualkuikan David uan amo namejuan. ¿Keyej amo nantechtakachiujkej?* Kinamikia maj tejuan tianij tikuitij tekiuaj”. Sayoj ke takamej akin nemiaj Judá kintajtoltankej takamej akin nemiaj Israel.

20 Se takat akin monotsaya Seba peuak takuejmolchiua. Yejua katka iokichpil Bicrí uan pouia iniuan ikoneuan Benjamín. Seba kipitsak kuaomit uan kijtoj: “¡Nokniuan israelitas! Tejuan amo tipouij iniuan ichankauan David. Iokichpil Jesé amo teyi techmakas. ¡Tiouij oksepa tikinueyichiuatij totatadiosuan!”.* 2 Uan nochin takamej israelitas kikaujteujkej tekiuaj David uan kitojtokakej* Seba iokichpil Bicrí. Sayoj ke takamej akin nemiaj Judá amo kikaujkej inintekiuaj uan iuan yajkej desde ueyiat Jordán hasta Jerusalén.

3 Keman David cholojteuak, kinkaujteuak majtakti isiuauan* maj tajpiakan ichan. Keman mokepak, kinkauato nejon majtakti siuamej itech okse kali uan kinnauatij seki soldados maj tajpiakan ompa. Tanauatiaya maj kinuikilikan tein kikuaskej sayoj ke amo keman motekakok iniuan. Ompa yetoyaj hasta keman momikilijkej. Maski inintakatsin yoltoyaok, yejuan nemiaj kemej yeskia momikilijkaya inintakatsin.

4 Satepan tekiuaj kiluij Amasá: “Xikinnauatiti nochin takamej akin nemij Judá maj uipta ualakan nechitakij uan tejua no xiuiki”. 5 Uan Amasá yajki kinitato takamej akin nemiaj Judá, sayoj ke amo ajsik uiptika kemej kinauatijka tekiuaj. 6 Yejua ika David kiluij Abisái: “Seba iokichpil Bicrí xa okachi techkuejmolkalakis ke Absalón. Yejua ika xikinuika nosoldados uan xiktemoti, porin uelis mokalakitiuj itech semej xolalmej kampa kuali tatsaktok uan amo tikajsiskejok”. 7 Uan soldados akin kinixyekanaya Joab, soldados akin kiyekpiayaj tekiuaj* uan soldados akin kuali tateuiayaj kitojtokateujkej.* Kisteujkej de Jerusalén para kitemotiuij Seba iokichpil Bicrí. 8 Amasá kinnamikito keman ajsitoyajya kampa yetok se ueyi tet ompa Gabaón. Joab aktiaya itasal tein ika tateuiaya uan motajkoilpilijka* imachete tein ojkan tenej.* Keman Joab kiajsito Amasá, kikauak maj uetsi imachete.

9 Joab kiluij Amasá: “¿Kuali tietok noknitsin?”. Satepan kitentsonkitskij Amasá ika iyekmay uan kichiuak kemej yeskia yaya kimakati se beso. 10 Amasá amo kiitak ke Joab maaktoya imachete. Keman Joab okachi motokij, kipoxtokilij Amasá imachete. Amasá kuitaxkolkisak* uan nochi pachanito talpan. Sayoj sepa kipoxtokilij porin kiitak ke miktoyaya. Satepan, Joab uan iikniuj Abisái kitemotoj Seba iokichpil Bicrí.

11 Semej isoldados Joab moketsak kampa uetstoya Amasá uan peuak kijtoua: “¡Nochin akin nankinpaleuiaj Joab uan David, xiktojtokakan Joab!”. 12 Uan Amasá motetekuinojtoya* itech iesyo tatajko ojti. Keman nejon soldado kiitak ke nochin moketsayaj kampa uetstoya Amasá, kixoxolatsak uan kikauato ojtenoj. No kipankentij se tasal porin kiitak ke nochin akin ompaka panouayaj moketsayaj para kiitaskej. 13 Satepan ke kiajchiuak, nochin soldados iuan yajkej Joab kitemotoj Seba iokichpil Bicrí.

14 Seba panotiajki kampa nemiaj nochin uejueyi kalyetonij israelitas uan ajsik Abel-Bet-Maacá. Uan ichankauan Bicrí kitojtokakej Seba hasta ueyi xolal uan no iuan kalakitoj.

15 Joab uan isoldados ajsitoj Abel-Bet-Maacá. Nejon ueyi xolal kiyoualojtoya se ueyi tepamit. Yejua ika kitamiyoualojkej ueyi xolal para kinteuiskej akin ompa nemiaj uan kimontontenkej tal para kitamotaskej tepamit. Uan okseki soldados peujkej tachkuaj itsintan ueyi tepamit para maj uetsi. 16 Uan se siuatsin akin semi tamatkej akin yetoya itech ueyi xolal, peuak kintsajtsilia isoldados Joab: “¡Xinechkakikan! ¡Xinechkakikan! Xikiluikan Joab maj uiki porin nikneki iuan nitajtos”. 17 Joab motokij para kikakis uan siuatsin kitajtanij:* “¿Tejua tiJoab?”. Joab kinankilij: “Kemaj, nejua”. Siuatsin kiluij: “Noteko, nimitstataujtia xinechkaki”. Joab kiluij: “¿Toni tikneki tinechiluis?”. 18 Siuatsin kijtoj: “Ne uejkauj miakej kijtouayaj ke komo aksa* kineki kiyektalis se kuejmol, ‘maj kinilui akin nemij ueyi xolal Abel maj kiyolmajxitikan’. 19 Nejua nikintajtouia nochin akin nemij Israel, akin amo takuejmolchiuaj uan tatakamatij. Tejua tikneki tikixpolos se ueyi xolal tein motelixmati nikan Israel. ¿Keyej tikinixpolosneki akin pouij itech ixolal* Jehová?”. 20 Joab kinankilij: “Nejua amo keman nikixpoloskia ueyi xolal. 21 Amo nikneki nikixpolos, ta niktemojtok se takat akin monotsa Seba iokichpil Bicrí akin kiixnamikik tekiuaj David. Yejua nemia kampa tepeyoj kampa kintaxejxelouilijkej ikoneuan Efraín. Xikixtikan nejon takat uan amo namechkuejmolosok”. Uan siuatsin kiluij Joab: “¡Timitsajkotamotiliskej itsontekon!”.

22 Siuatsin akin semi tamatkej yajki kinnojnotsato akin nemiaj itech ueyi xolal. Yejua ika yejuan kikechkotonkej Seba iokichpil Bicrí uan itsontekon kiajkotamotilijkej Joab. Satepan Joab kipitsak kuaomit uan isoldados yajkej ininchan. Uan Joab yajki Jerusalén kampa yetoya tekiuaj.

23 Joab kinixyekanaya nochin soldados israelitas, uan Benaya iokichpil Jehoiadá kinixyekanaya soldados akin kiyekpiayaj tekiuaj.* 24 Adoram kinixyekanaya akin tekiuaj kinixtalijka maj kitekitilikan uan Jehosafat iokichpil Ahilud kijkuilouaya nochi tein mochiuaya itech altepet. 25 Sevá katka itajkuilojkauj tekiuaj, uan Sadoc uan Abiatar katkaj tiopixkamej. 26 Irá katka se ueyichiujkej* akin kitekitiliaya David. Iuejkaujtat Irá katka Jaír.

21 Keman David katka tekiuaj, israelitas amo kipiakej tein kikuaskej eyi xiuit. Yejua ika David kitajtanij Jehová maj kinpaleui, uan Jehová kinankilij: “Tein namechpanotok inintajtakol Saúl uan ichankauan porin kinmiktijkej gabaonitas”. 2 Yejua ika tekiuaj David tanauatij maj kinnotsatij gabaonitas para iniuan tajtos. (Gabaonitas amo katkaj israelitas, ta katkaj amorreos. Yejuan makiskej porin israelitas motenkaujkej ke amo kinmiktiskiaj. Sayoj ke Saúl kinekia kintamimiktis gabaonitas porin amo kiuelitaya maj yetonij iniuan akin nemiaj Israel uan Judá). 3 David kintajtanij* gabaonitas: “¿Toni uelis tikchiuaskej para xitechtapojpoluikan? ¿Keniuj uelis tamechtaxtauiskej para uelis nankitajtaniskej Jehová maj kintatiochiui akin pouij itech ixolal?”.* 4 Gabaonitas kinankilijkej tekiuaj: “Plata uan oro amo ajsi para tikixtauas tein techchiuilijkej Saúl uan ichankauan. Uan tejuan amo ueli tikmiktiaj nion se israelita”. Tekiuaj David kiniluij: “Xinechiluikan keniuj nankinekij maj namechtaxtaui”. 5 Gabaonitas kiluijkej tekiuaj: “Nejon takat kinmiktij miakej tochankauan uan kinekia techtamimiktis para maj amo tinemikanok nikan Israel. 6 Yejua ika tiknekij xitechinmaktili chikome ikoneuan para maj tikinmiktikan. Tikinpiloskej* ompa Guibeá para maj Jehová kinita, itech ueyi xolal kampa nemia Saúl akin Jehová kiixtalijka maj taixyekana”. Tekiuaj kiniluij: “Namechinmaktilis”.

7 Sayoj ke tekiuaj David kiiknelij Mefibóset akin katka iokichpil Jonatán uan iixuiuj Saúl, porin motenkaujka iuan Jonatán ke kinikneliskia ichankauan. Motenkaujka nejon itokaykopa Jehová. 8 Yejua ika kinijitak Armoní uan Mefibóset ikoneuan Rizpá akin achto katka isiuauj Saúl. Itat Rizpá katka Ayá. No kinijitak makuil ikoneuan Mical* tein kinpiak iuan Adriel. Mical katka isiuapil Saúl uan Adriel iokichpil Barzilái akin nemia Meholá.* 9 Satepan kinmaktilij gabaonitas nejon chikome ichankauan Saúl. Yejuan kinsenmiktijkej uan kinpilojkej itech tepet para maj Jehová kinita. Kinmiktijkej keman israelitas peuaya kitekij cebada. 10 Uan Rizpá iichpoch Ayá kiuikak se ueyi tasal kampa pilkatoyaj ichankauan Saúl uan kisouak itech tet. Nejon tasal motaliliaj keman kichokiliaj aksa* akin momikilij. Rizpá ompa mokauak desde tonalmej keman peuak kitekij cebada hasta tonalmej keman peuak tel chikauak kioui. Rizpá amo kikauaya maj totomej kinkuakan mikemej de tonayan uan de youak amo kikauaya maj motokikan koujtajtapialmej.

11 David kimatik tein kichiuak Rizpá akin katka isiuauj* Saúl uan iichpoch Ayá. 12 Yejua ika, David yajki Jabés-Galaad kikuito iomiyouan Saúl uan iomiyouan Jonatán akin katka iokichpil Saúl. Filisteos kitankaj Saúl ompa Guilboa uan kipilotoj yejua uan Jonatán taixpan den plaza tein yetok Bet-San. Sayoj ke akin taixyekanayaj Jabés-Galaad kinichtakakuitoj Saúl uan Jonatán* kampa kinpilojkaj. 13 David kiualkuik iomiyouan Saúl uan Jonatán* uan no kinkuito ininomiyouan takamej akin gabaonitas kinmiktijkaj.* 14 Satepan kitokkej ininomiyouan Saúl uan Jonatán* ompa Zelá kampa kitokkaj Quis, itat Saúl. Ueyi xolal Zelá yetok itech talmej kampa kintaxejxelouilijkej ikoneuan Benjamín. Keman mochiuak nochi tein tekiuaj tanauatijka, Dios kinkakik israelitas keman kitataujtiayaj maj kintatiochiui.

15 Filisteos uan israelitas oksepa peuak moteuiaj. Yejua ika David temok iniuan isoldados para kinteuis filisteos. Sayoj ke semi siouik keman tateuijtoya. 16 Isbí-Benob semej akin pouia iniuan refaím yaya kimiktitia David. Yejua kipiaya se lanza tein ikuapan chijchiujtoya de cobre uan tein etik katka kemej eyi kilo uan tajko.* No kipiaya se machete tein ojkan tenej* tein yankuik katka. 17 Sayoj ke Abisái iokichpil Zeruyá niman kipaleuito David. Kiteuij filisteo uan kimiktij. Yejua ika isoldados David kiyekiluijkej:* “Amo timitskauaskejok touan xitateuiti, porin komo timiki seuis tauil tein kintauilia israelitas”.*

18 Satepan, israelitas oksepa peuak moteuiaj iniuan filisteos ompa Gob. Ijkuak, Sibecái akin katka kayot Husá* kimiktij Saf akin pouia iniuan refaím.

19 Uan israelitas oksepa moteuijkej iniuan filisteos ompa Gob. Ijkuak, Elhanán iokichpil Jaaré-Oreguim akin kayot Belén kimiktij Goliat akin kayot Gat. Goliat kiuikaya se lanza* tein ikoujyo semi ueyi katka kemej se kouit tein ika tajkitij.

20 Uan israelitas oksepa moteuijkej iniuan filisteos ompa Gat. Itech nejon ueyi xolal nemia se ueyi takat akin no pouia iniuan refaím. Kipiaya chikuasen imajpiluan itech sejse imay uan chikuasen iikxipiluan itech sejse imets. Sennochia kipiaya 12 imajpiluan uan 12 iikxipiluan. 21 Kemej kisentokaya kinixnamikia israelitas, Jonatán iokichpil Simeí kimiktij. Simeí katka iikniuj David.

22 Nejin naui takamej pouiaj iniuan refaím uan nemiaj Gat. David uan isoldados kinmiktijkej nejin naui takamej.

22 Jehová kipaleuij David para maj Saúl amo teyi kichiuiliani nion oksekin akin kitauelitayaj. Yejua ika nejon tonal kicantarouilij Jehová nejin tatsotson. 2 David kijtoj:

“Jehová kemej yeskia se tepejxit kampa nimomatampauia,

kemej yeskia se ueyi xolal kampa kuali tatsaktok kampa ueli nimotatia.*

Yejua nechmakixtia.

NoDios nechmakixtia, nechpaleuia para maj amo teyi nechchiuilikan akin nechtauelitaj.

Yejuan mosentilijkej ijkon kemej at tein tel ueyixtok.

11 Ualaya ipanko se querubín tein patantiualaya.

Ualaya iajtapalko se ángel.

13 Kemej yejua semi petania, kichiuak maj tekol xota.

Yejua kemej yeskia se escudo kampa ueli mopaleuiaj akin iuan takuaujtamatij.

32 Jehová sayoj yejua Dios.

Sayoj toDios kemej yeskia se ueyi tet kampa ueli timomatampauiaj.

44 NoDios, tinechtajtouis keman nechijijtoskej akin nemij kampa ninemi.

47 ¡Jehová yoltok! ¡Maj tikueyitalikan noDios!

¡Yejua se ueyi tet kampa ueli nimomatampauia!

¡Maj tikueyitalikan noDios, ueyi tet tein nechmakixtia!

23 David kijtoj nejin achto ke momikiliskia:

 5 Dios kiita ke nejua ijkon nitekiuajti uan ke nochankauan no ijkon tekiuajtiskej.

8 David kinpiaya eyi soldados akin kuali tateuiayaj. Se monotsaya Joseb-Basébet akin tahkemonita uan kinixyekanaya okseki ome soldados. Se tonal Joseb-Basébet kinmiktij 800 takamej ika ilanza. 9 Okse isoldado David katka Eleazar. Itat Eleazar katka Dodó iokichpil Ahohí. Eleazar no katka semej soldados akin kuali tateuiayaj akin iuan yetoyaj David keman kinixnamikkej filisteos. Ijkuak, filisteos mosentilijkaj para kinteuiskej israelitas uan soldados israelitas cholojkej. 10 Sayoj ke Eleazar amo choloj, ta peuak kinmiktia filisteos. Kemej uejkauak kikitskijtoya imachete tein ojkan tenej* matakatstiak uan amo uelikok momamejmelauak. Nejon tonal, Jehová kinpaleuij israelitas maj tatanikan. Eleazar kinmiktijtiaya filisteos uan okseki soldados israelitas kinkuilijtiayaj tein kipiayaj.

11 Okse isoldado David katka Samá iokichpil Agué akin hararita. Keman filisteos mosentilijkej ompa Lehí itech se tal kampa kitokkaj lentejas, soldados israelitas kincholuijkej filisteos. 12 Sayoj ke yejua mokauak tatajko de nejon tal uan kinteuij filisteos para maj amo moaxkatilianij. Kinmiktij filisteos uan ijkon Jehová kinmakixtij israelitas.

13 David kinixtalijka 30 takamej para maj kinixyekanakan isoldados, uan eyi de nejon takamej temokej ompa Adulam kiitatoj David keman motatijtoya* itech se tepekoyok. Kiitatoj keman israelitas kisentilijtoyaj trigo. Ijkuak, seki soldados filisteos kitalijkaj ininkaltsitsin* itech tal tamanis* tein moixmati kemej Refaím. 14 David motatijtoya itech tepekoyok uan seki soldados filisteos kitalijkaj ininkaltsitsin ompa Belén. 15 Uan David kielnamikik ke puertajtenoj de Belén yetoya se ueyi talkoyok tein kichijchiujkej para kisentiliskej at. Yejua ika kijtoj: “¡Majkan nitayiskia* tepitsin at den ueyi talkoyok tein yetok Belén!”. 16 Keman eyi soldados akin kuali tateuiayaj kikakkej tein kijtoj David, yajkej kampa filisteos kitalijkaj ininkaltsitsin. Kinteuijtiajkej filisteos hasta ke ajsikej itech ueyi talkoyok tein yetok tanakastan den puerta ompa Belén, kikixtijkej at uan kiuikilijkej David. Sayoj ke David amo kinekik tayis uan kimimiloj* para kimaktilis Jehová. 17 David kijtoj: “¡Jehová, nejua ipa amo nitayiskia in at! Nejin takamej yajkaj nechkuilitoj maski ueliskia kinmiktiskej. Komo nitayiskia, kemej yeskia nitayitoskia ininesyo”. Yejua ika David amo kinekik tayis. Yejua nejon tein kichiujkej eyi isoldados akin kuali tateuiayaj.

18 Abisái akin katka iikniuj Joab kinixyekanaya okseki eyi soldados. Abisái uan Joab katkaj ikoneuan Zeruyá. Abisái kinmiktij 300 takamej ika ilanza uan semi moteixmatiltijka ijkon kemej Joseb-Basébet, Eleazar uan Samá. 19 Abisái okachi moteixmatiltijka ke okseki ome soldados akin yejua kinixyekanaya. Sayoj ke amo semi kiixmatiaj kemej Joseb-Basébet, Eleazar uan Samá.

20 Benaya akin katka iokichpil Jehoiadá semi yolchikauak katka* uan kichiuak miak taman tein se kimojkaita ompa Cabzeel. Kinmiktij nochin ome ikoneuan Ariel akin kayot Moab, uan se tonal keman tasekuetstoya mokalakij itech se ueyi talkoyok kampa kisentiliayaj at uan kimiktij se león. 21 No kimiktij se ueyi takat kayot Egipto. Benaya sayoj kipiaya se kouit, sayoj ke ueyi takat kipiaya se lanza. Maski Benaya maaktoya sayoj se kouit moteuij iuan egipcio, kikuilij ilanza uan ika kimiktij. 22 Yejua nejin tein kichiuak Benaya iokichpil Jehoiadá, uan no semi kiixmatiaj kemej Joseb-Basébet, Eleazar uan Samá. 23 Maski Benaya okachi moteixmatiltijka ke okseki 30 soldados, kitaniaj Joseb-Basébet, Eleazar uan Samá porin yejuan okachi kinixmatiaj. Sayoj ke David kiixtalij Benaya maj kinixyekana soldados akin kiyekpiayaj.

24 Sekin akin pouiaj iniuan 30 isoldados David katkaj Asahel akin katka iikniuj Joab, Elhanán iokichpil Dodó akin katka kayot Belén, 25 Samá uan Elicá akin katkaj kayomej Harod, 26 Hélez akin katka kayot Bet-Pélet,* Irá iokichpil Iqués akin katka kayot Tecoa, 27 Abí-Ézer akin katka kayot Anatot, Mebunái akin katka kayot Husá,* 28 Zalmón iokichpil Ahoá, Maharái akin katka kayot Netofá, 29 Héleb iokichpil Baaná akin katka kayot Netofá, Ittái iokichpil Ribái akin katka kayot Guibeá. Nejin ueyi xolal kinmakakaj ikoneuan Benjamín. 30 Okseki soldados katkaj Benaya akin katka kayot Piratón, Hidái akin katka kayot Gaas kampa yetoyaj seki ataujmej, 31 Abí-Albón akin katka kayot Bet-Arabá, Azmávet akin katka kayot Bahurim, 32 Eliahbá akin katka kayot Saalbim, ikoneuan Jasén, Jonatán, 33 Samá akin katka hararita, Ahiam iokichpil Sarar akin no katka hararita, 34 Elifélet iokichpil Ahasbái akin katka kayot Maacat, Eliam iokichpil Ahitofel akin katka kayot Guiló, 35 Hezró akin katka kayot Carmelo, Paarái akin katka kayot Arab, 36 Igal iokichpil Natán akin katka kayot Zobá, Baní akin katka kayot Gad, 37 Zélec akin katka kayot Ammón uan Naharái akin katka kayot Beerot. (Naharái kimamaliaya Joab tein ika tateuiaya. Joab katka iokichpil Zeruyá). 38 Okseki soldados katkaj Irá uan Gareb akin katkaj itritas 39 uan Urías akin pouia iniuan ichankauan Het. Sennochia katkaj 37 soldados.

24 Jehová oksepa kualanik iniuan israelitas keman aksa* kichiuak maj David tanauati nejin: “Xikinpoua akin nemij Israel uan Judá”. 2 Joab akin kinixyekanaya soldados yetoya iuan tekiuaj David, yejua ika David kiluij: “Xiouj kampa nemij nochin uejueyi kalyetonij israelitas uan xikinpoua para nikmatis kanachimej.* Xipeua xikinpoua akin nemij Dan uan xitamiti Beer-Seba”. 3 Sayoj ke Joab kiluij tekiuaj David: “Maj toDios Jehová miakpa* kinmiakilti israelitas uan maj kichiua xikitaok. Notekiuaj, ¿keyej tikneki tikinpouas israelitas?”.

4 Sayoj ke tekiuaj amo kikakik Joab nion oksekin akin no kinixyekanayaj soldados. Yejua ika Joab uan akin kinixyekanayaj soldados yajkej kinpouatoj israelitas. 5 Kipanauijkej ueyiat Jordán uan kitalijkej ininkaltsitsin* ompa Aroer, tanakastan* den ueyi xolal tein yetok tatenoj den ueyiat.* Satepan yajkej kampa kintaxejxelouilijkaj ikoneuan Gad uan de ompa yajkej Jazer. 6 Satepan yajkej Galaad uan no yajkej Tahtim-Hodsí. De ompa yajkej Dan-Jaán uan tamalakachojkej para yaskej Sidón. 7 Satepan yajkej ueyi xolal Tiro kampa kuali tatsaktoya. No panokej itech nochi uejueyi xolalmej kampa nemiaj heveos uan kampa nemiaj cananeos. Uan tamitoj ompa Beer-Seba, ueyi xolal tein yetok kampa kintaxejxelouilijkaj ikoneuan Judá tein no moixmati kemej Négueb. 8 Joab uan akin kinixyekanayaj soldados yajkej itech nochi xolalmej kampa nemiaj israelitas. Yejuan ajsitoj Jerusalén keman panokaya chiknaui metsti uan 20 tonalmej. 9 Joab kiluito tekiuaj kanachimej israelitas kinijkuilojka. Ompa Israel nemiaj 800 mil takamej akin ueliaj tateuiayaj ika machete tein ojkan tenej* uan ompa Judá nemiaj 500 mil takamej.

10 Sayoj ke keman kintamipoujkej israelitas, David peuak kiyolkuejmoloua tein kichiuak. Yejua ika kiluij Jehová: “Semi nitajtakolchiuak keman nitanauatij maj kinpouakan israelitas. Noteko Jehová, nimitstataujtia xinechtapojpolui porin niknextij ke amo nitamati”. 11 Ijkuak, tanauatijkej* Gad kimatiltiaya David tein Dios kiitaltiaya. Yejua ika, mostika kualkan keman David meuak, Jehová kinojnotsak Gad uan kiluij: 12 “Xiouj xikiluiti David: ‘Yejua nejin tein kijtoua Jehová: “Nimitstatsakuiltiti. Onkak eyi taman tein uelis nimitschiuilis. Xinechilui katiyejua tikneki”’”. 13 Yejua ika Gad kiitato David uan kiluij: “¿Keniuj tikneki maj Dios mitstatsakuilti? ¿Tikneki maj israelitas chikome xiuit amo kipiakan tein kikuaskej? ¿Tikneki tikincholuijtinemis eyi metsti akin mitstauelitaj? ¿Oso tikneki maj eyi tonal israelitas tamikokolispeuakan?* Kuali xiknemili uan xinechilui toni tikneki maj niknankili akin nechualtitanik”. 14 David kinankilij Gad: “Amo nikmati toni nikchiuas, fiero tein panotok. Okachi kuali maj techtatsakuilti Jehová porin yejua semi teiknelia, sayoj ke maj amo nechtatsakuiltikan takamej”.

15 Uan Jehová kichiuak maj kokolispeuanij israelitas akin nemiaj Dan hasta Beer-Seba. Peuak nejon kualkan uan amo motsakuilij hasta keman Dios kiixtalij, uan mikkej 70 mil israelitas. 16 Keman iángel Dios momamelauak para kinixpolos akin nemiaj Jerusalén, Jehová kiniknelij israelitas* porin kichiuak maj kokolispeuakan. Yejua ika kiluij ángel tein kinixpolojtoya israelitas: “¡Ijkon xikauaya, amo xikinmiktiok!”. Iángel Jehová amo uejka yetoya de ital Arauna kampa kichipauayaj trigo. Arauna katka kayot Jebús.

17 Keman David kiitak ángel tein kinixpolojtoya israelitas, kiluij Jehová: “Nejua nitajtakolchiuak, nejua nimopoloj. In israelitas* amo teyi kichiujkej, ta nejua nitanauatij maj kinpouanij. Yejua ika, nimitstataujtia nejua xinechtatsakuilti uan xikintatsakuilti ichankauan nopaj”.

18 Nejon tonal Gad kiitato David uan kiluij: “Xipankisa ital Arauna akin kayot Jebús, uan xikchijchiuili Jehová se altar kampa kichipauaj xinach”. 19 Uan David pankisak ital Arauna ijkon kemej kinauatijka Gad uan ijkon kemej kinauatijka Jehová. 20 Keman tekiuaj uan itakeualuan pankistoyaj, Arauna kinpanitak, niman kinnamikito uan motankuaketsak iixpan tekiuaj uan moixpiloj hasta talpan. 21 Arauna kitajtanij* tekiuaj: “¿Keyej tinechitako noteko?”. David kinankilij: “Nimitskouiliko tal kampa tikchipaua trigo para nikchijchiuilis Jehová se altar uan maj amo kisentokaok techtatsakuilti”. 22 Sayoj ke Arauna kiluij David: “Nimitstayokolia notekiuaj uan xikchiua tein tikixtalijtok tikchiuas.* No nimitsintayokolia kuakuejmej para tikinchichinouilis Dios uan kouit* para titaxotaltis.* 23 Nimitstayokolia* nochi nejin notekiuaj”. Uan Arauna no kijtoj: “Maj toDios Jehová mitstatiochiui”.

24 Sayoj ke tekiuaj kinankilij Arauna: “Amo xinechtayokoli motal, ta maj nimitsixtauili. Amo nikchichinouilis toDios Jehová tapialmej tein amo nikinixtauani”. Yejua ika David kikouilij Arauna ital uan ikuakuejuan uan kiixtauak tajko kilo* plata. 25 Uan David kichijchiuilij Jehová se altar, kichichinouilij tapialmej uan kimaktilij okseki taman para sentakuaskej.* Jehová kikakik David keman kitataujtij maj amo kintatsakuiltiok israelitas. Uan israelitas amo mikkejok.