OSEAS
1 Jehová kiluij Oseas* iokichpil Beerí, tein kinekia maj kitematilti. Ijkuak, ompa Judá taixyekantoyaj tekiuaj Uzías, Jotán, Acaz uan Ezequías, uan ompa Israel taixyekanaya tekiuaj Jeroboán, iokichpil Joás. 2 Keman Jehová peuak kiluia Oseas tein kinekia maj kitematilti, Jehová kiluij: “Xiouj uan ximonamikti iuan se siuat akin auilnemis.* Yejua kinpias konemej iniuan okseki takamej uan tikiniskaltis kemej mokoneuan. Nejon siuat kichiuas kemej kichiujtokej akin nemij Israel. Yejuan senkis kikaujkej Jehová porin peuak auilnemij”.
3 Yejua ika Oseas yajki uan monamiktij iuan Gómer, isiuapil Diblaim. Uan Gómer mokokoxkatalij uan kipiak se iokichpil Oseas.
4 Uan Jehová kiluij: “Xiktokayti Jezreel,* porin amo uejkaua nikintatsakuiltiti ikoneuan Jehú porin kinmiktijkej tel miakej ompa Jezreel. Uan nikchiuas maj amo akinok tekiuajti ompa Israel. 5 Nejon tonal nikpostekis iarco* Israel itech tal tamanis* tein moixmati kemej Jezreel”.
6 Gómer oksepa mokokoxkatalij uan kipiak se siuapiltsin. Uan Dios kiluij Oseas: “Xiktokayti Lo-Ruhamá,* porin amo nikiniknelisok akin nemij ompa Israel, ta nikinkixtiti. 7 Sayoj ke nikiniknelis akin nemij ompa Judá. Nejua, ininDios Jehová, nikinmakixtis. Amo nikuis arco, espada,* caballos nion soldados para nikinmakixtis”.
8 Keman Gómer amo kichichitijok Lo-Ruhamá, oksepa mokokoxkatalij uan kipiak se okichpiltsin. 9 Uan Dios kiluij: “Xiktokayti Lo-Ammí,* porin namejuan amo nannoaxkauan uan nejua amo niyeski namoDios.
10 ”Uan ikoneuan Israel tel miakej yeskij kemej xal tein onkak itech mar, tein amo ueli se kipoua. Uan kampa nikiniluij ‘Namejuan amo nannoaxkauan’, ompa nikiniluis ‘Namejuan nanikoneuan Dios akin nochipa yoltok’. 11 Uan ikoneuan Judá uan ikoneuan Israel mosentiliskej uan kualtsin senyetoskej. Kiixtaliskej se akin kinixyekanas uan kisaskej den altepet, porin nejon tonal tel kualtsin yeski para Jezreel.
2 ”Xikiniluikan namokniuan takamej ‘¡Namejuan nannoaxkauan!’*
uan namokniuan siuamej ‘¡Tejua tisiuat akin kiiknelijkej!’.*
2 Itajtakol namomaj maj amo nosiuauj
uan maj nejua amo niitakauj; yejua xiktajtakoltikan.
Maj amo auilnemiok*
uan maj amo nechkajkayauaok.
3 Komo ijkon kisentoka, nikixtilis itasal uan nikauas kemej ijkuak yolik,
nikauas kemej se tal kampa amo teyi onkak,
kemej se tal kampa tauaktok,
uan nikauas maj miki porin amo kipias at tein tayis.
4 Uan amo nikiniknelis ikoneuan,
porin kinpiak iniuan okseki takamej.
5 Porin ininnan auilnemik.*
Yejua kichiuak tein tepinaujtij, porin kijtoj:
‘Nikinajsitiuj takamej akin nechtasojtaj,
akin nechmakaj tein nikuas uan nitayis,
tein nimotalilis, aceite uan vino’.
6 Yejua ika niktatsakuiti ika uitsti;
nikchijchiuas se tepamit para maj amo pano,
para amo kimatis kanika yas.
7 Kintokatias takamej akin kitasojtaj, sayoj ke amo kinajsitiuj;
kintemos sayoj ke amo kinajsis.
Satepan kijtos: ‘Nimokepas iuan yekinika takat akin iuan nimonamiktij,
porin keman iuan nietoya okachi kuali ninemia’.
8 Amo kiitak ke nejua nikmakatoya trigo, vino tein yankuik uan aceite,
uan ke nejua nikmakatoya miak plata
uan oro, tein kikuik para kiueyichiuas Baal.
9 ‘Yejua ika nimokepas keman kisentiliaj trigo uan nikuilis,
uan keman yetosya vino tein yankuik no nikuilis,
uan nikixtilis tasal tein motalilia.
10 Uan axkan nikxipetsoti* ininixpan takamej akin kitasojtaj,
uan nion se takat uelis nechmakuilis para kimakixtis.
11 Nikuilis tein kiyolpaktia, iluimej tein kichiua,
keman peua selik metsti, tonal sábado uan nochi tataman iluimej.
12 Nitatamis kampa kipia uvajkouit uan higojkouit
tein kijtoua ke ika kitaxtauijkej takamej akin kitasojtaj.
Nikchiuas maj ompa sayoj kouijtik,
uan koujtajtapialmej tatamiskej.
13 Uan niktatsakuiltis porin kimaktiliaya Baal miak taman.
Itech nejon tonalmej, mochijchiuaya uan motaliliaya anillos uan yaya kinajsiti takamej akin kitasojtaj,
uan amo nechelnamikia’. Jehová kiyekijtoua nejin.
14 ‘Yejua ika, niknojnotsati para maj yektanemili,
nikuikas itech tal kampa tauaktok,
uan kualtsin niknojnotsas.
15 Uan satepan nikepilis uvajkoujmej tein kipiaya
uan nikchiuas maj pano itech tal tamanis* tein moixmati kemej Acor, para kipias tein kichia;
ompa nechkakis kemej ijkuak ichpoch katka,
kemej itech tonal keman kisak de Egipto.
16 Nejon tonal nejua Jehová nikiluis:
“Tejua tinechiluisya noTakatsin, uan amo tinechiluisok noTeko”’.*
17 ‘Amo nikauas maj kiteneuaok Baal,
uan amo akinok kielnamikis itokayuan.
18 Nejon tonal nimotenkauas maj koujtajtapialmej,
totomej uan tapialmej tein moxoxolatsaj amo teyi kinchiuilikan akin noaxkauan.
Nikchiuas maj amo akin kinteuiti kampa nemiskej
uan nikchiuas maj kualtsin moseuikan.*
19 Nimotenkauas ke nochipa niyeski nimotakatsin,
amo keman nimitschiuilis tein amo kuali,
nochipa nimitstasojtas uan nimitsiknelis.
20 Nimotenkauas mouan ke nochipa nimitspaleuis,
uan tejua yekmelauj tikixmatis Jehová’.
21 ‘Nejon tonal nejua Jehová,
nikmakas iluikak tein tajtani,
uan iluikak kimakas tal tein tajtani;
22 uan tal kimakas tein tajtani in tatok, uvajkouit uan olivojkouit;
uan yejuan kimakaskej tein tajtani Jezreel.*
23 Ijkon kemej xinach, nimotokilis itech tal,
uan nikiknelis akin amo kiiknelijkej;*
akin amo noaxkauan* nikiniluis “Namejuan nannoaxkauan”,
uan yejuan kijtoskej “Tejua tinoDios”’”.
3 Uan Jehová nechiluij: “Oksepa xiktasojta siuat akin mitskauak, akin okse takat kitasojta uan iuan auilnentok. Xiktasojta ijkon kemej nejua Jehová nikintasojta israelitas. Nejua nikintasojta maski yejuan kinueyichiuaj okseki dioses uan kiteluelitaj kitemaktiskej uvas tein tauatsal”.*
2 Yejua ika nikouak Gómer ika 171 gramos* de plata uan 195 kilos* de cebada. 3 Uan nikiluij: “Nouan tietos miak tonalmej. Amo xiauilnemi.* Amo ximoteka iuan okse takat, uan nejua amo no nimotekas mouan”.
4 Ijkon mochiuas porin miak tonalmej israelitas amo kipiaskej se tekiuaj nion se taixyekankej.* Amo teyi kitemaktiskej, amo ijkatos nion se tet para ika taueyichiuaskej, amo onkaskej tiopixkamej* nion tiotsitsin.* 5 Satepan israelitas mokepaskej uan kitemoskej ininDios Jehová uan inintekiuaj David. Uan itech tonalmej keman tantiasya tein mochiujtok kimojkatokaskej Jehová uan kitemoskej para maj kintatiochiui.
4 Israelitas, xikakikan tein kijtoua Jehová,
porin Jehová kiixtaliti tein kinnamiki kiseliskej akin nemij itech nejin altepet,
porin takajkayauaj, amo tetasojtaj uan kichiuaj kemej yeskia amo kiixmatij Dios.
2 Miakej kiyekijtouaj teisa maski amo melauj, xolopijtij, temiktiaj,
tachtekij, auilnemij,
uan kampa yeski tektok esti.
3 Yejua ika itech nochi altepet motayokoltiskej
uan nochin tel kuetauiskej hasta mikiskej;
koujtajtapialmej, totomej
uan hasta pescados mikiskej.
4 “Sayoj ke maj nion akin kitemo namechyolmajxitis,
porin namejuan nankichiuaj kemej akin motajtolteuia iuan se tiopixkat.
5 Yejua ika nanuetsiskej tonayan,
uan tanauatijkej* no uetsis kemej yeskia de youak.
Uan nikixpolos namomaj.
6 Nikinixpoloti nokoneuan porin amo nechixmatij.
Kemej amo kinekkej nechixmatiskej,
amo no niknekis maj nechtekitilikan kemej tiopixkamej.
Uan kemej kielkaujkej tein ininDios tanauatia,*
nejua no nikinelkauas ininokichpipiluan.
7 Ijkon kemej okachi momiakiliayaj, okachi tajtakolchiuayaj uan nechixnamikiaj.
Nikinpinaujtis uan amo nikauas maj kinueyitalikan.
8 Keman nokoneuan tajtakolchiuaj, tiopixkamej kikuaj nakat
uan kitelnekij maj okachi tajtakolchiuakan.
9 Yejuan uan tiopixkamej kinpanos sayoj se taman;
nikintatsakuiltis por nochi tein kichiuaj
uan tajyouiskej porin motemolijkej.
10 Takuaskej sayoj ke amo ixuiskej;
auilnemiskej sayoj ke amo kinpiaskej konemej,
porin nion tepitsin kitakamatij Jehová.
11 Keman tayij vino uan no auilnemij
amo kinekijok kichiuaskej tein kuali.
12 Nokoneuan kintemouaj inintiotsitsin* de kouit
uan kichiuaj tein kiniluia kouit tein kikui se adivino.
Kemej kitelnekij auilnemiskej, kichiuaj tein amo kuali
uan kemej auilnemij, amo kinekij kitakamatiskej Dios.
13 Kitemaktiaj seki taman tepekuapan
uan kichichinouaj tein kitemaktiaj itech lomas,
itsintan auakouit uan kouit tein monotsa estoraque, uan tein yeski ueyi kouit,
porin kualtsin teyekauiliaj.
Yejua ika namosiuapipiluan auilnemij*
uan namosiuamouan motekaj iniuan okseki takamej.
14 Amo nikintatsakuiltis namosiuapipiluan porin auilnemij*
nion namosiuamouan porin motekaj iniuan okseki takamej.
Porin takamej youij iniuan siuamej akin monamakaj
uan kitemaktiaj seki taman iniuan siuamej akin monamakaj para taueyichiuaskej.
Akin tel amo tanemiliaj kemej yejuan, amo kuali tamiskej.
15 Maski tejua Israel tiauilnemi,
maj Judá amo tajtakolchiua.
Amo xiualakan Guilgal nion Bet-Aven,
nion xikyekijtokan teisa itokaykopa Jehová, Dios akin nochipa yoltok.
16 Porin Israel amo takaki ijkon kemej se kuakouej tein amo takaki.
Nejua Jehová, amo nikyekpias ijkon kemej kiyekpiaj se ichkatsin* keman kinemiltitij ixtauat.
17 Efraín kinueyichiua tiotsitsin.
¡Xikaua!
18 Keman kitamia cerveza,
peua auilnemi.
Akin kiixyekanaj kiteluelitaj kichiuaskej tein tepinaujtij.
19 Ejekat kiuikas
uan mopinaujmatis por nochi tein kitemaktij”.
5 “Tiopixkamej, xikakikan nejin,
kuali xitakakikan israelitas,
xikakikan, akin nanpouij ichan tekiuaj,
moixtaliti tein namechnamiki nankiseliskej;
porin tein nankichiuaj ompa Mizpá uan Tabor
kichiua maj oksekin tajtakolchiuakan.
2 Akin nechkaujkej tel tamijmiktiaj,
uan nochin yejuan nikinnejmachtijtok.*
3 Nejua nikixmati Efraín,
ueli nikita Israel.
Porin axkan tejua Efraín tiauilnentok;*
Israel mopitsotilij.
4 Kemej kichiujtokej nejon, amo ueli mokepaj iuan ininDios,
porin kitelnejnekij auilnemiskej,
uan amo kiitaj ke Jehová ininDios.
5 Israel moueyimati uan nejon kinextia ke amo yolkuali;
Israel uan Efraín uetskej porin tajtakolchiujkej,
uan Judá no uetsik iniuan.
6 Kiuikilijkej Jehová inintapialuan para kimaktiliskej,
sayoj ke yejua amo kinkuilij.
Yejua kinkaujkaya.
7 Kikajkayaujkej Jehová
porin kinpiakej konemej iniuan akin amo israelitas.
Uan axkan, itech sayoj se metsti tamiskej yejuan uan tein kipiaj.*
8 ¡Xikpitsakan kuaomit ompa Guibeá uan xikpitsakan trompeta ompa Ramá!
Xitsajtsikan ompa Bet-Aven: “¡Xikinyekantiuj Benjamín!”.
9 Nochin mojkamikiskej keman kiitaskej keniuj mitstatsakuiltiaj Efraín.
Nikinmatiltijya nochin israelitas tein panoti.
10 Akin taixyekanaj* ompa Judá tamatij kemej akin kioliniaj linderos para tetalkuiliskej.
Semi nikintatsakuiltis, kemej yeskia ininpan uetsiskia miak at.
11 Efraín tajyouijtok uan kiixpoloskej kemej kinamiki,
porin kiixtalijka mokuis iniuan akin kitauelitaj.
12 Yejua ika nikchiuilij Efraín tein okuilimej kichiuiliaj tasal keman kikuaj,
uan nikchiuak maj Judá kemej yeskia palani ijkon kemej palani se kouit.
13 Keman Efraín kiitak ke mokokouaya uan Judá kiitak ke takokol katka,*
Efraín yajki Asiria uan tatitanik maj kiitatij se tekiuaj tein ueyichiujkej.
Sayoj ke nejon tekiuaj amo uelik namechpajtij,
amo uelik kiixpajtij kampa nantakokolmej.
14 Nimochiuati kemej se león para Efraín
uan kemej se ueyi león para Judá.
Nejua nikinkokototsas uan nias;
nikinuikas uan amo akin kinmakixtis.
15 Nias uan nimokepas kampa nietoya hasta maj taxtauakan por nochi inintajtakoluan,
uan ijkuak nechtemoskej para maj nikinpaleui.
Keman moteltekipachojtoskej, nechtemoskej”.
6 “Xiualakan, maj timokepakan iuan Jehová,
porin maski techkokototsak, techpajtis;
maski techkojkokoj, kipikis kampa titakokolmej.
2 Ome tonal satepan, yejua techchikauas.
Eyi tonal satepan techajokuis,
tinemiskej uan yejua techitas.
3 Tikixmatiskej Jehová, tikteltemoskej okachi kuali tikixmatiskej.
Yekmelauj ualas ijkon kemej nochipa kisa tonaltsin;
ualas kemej kiouit,
kemej ijkuak chikauak kioui uan kuechauaya in tal”.
4 “¿Toniok uelis nikchiuas para nimitspaleuis Efraín?
¿Toniok uelis nikchiuas para nimitspaleuis Judá?
Niman tinechkaua, ijkon kemej mixti tein monextia kualkan,
kemej ajuach tein niman uaki.
5 Yejua ika, nikchiuas maj tanauatianij* kemej yeskia namechuetsiltikan,
tein nejua namechiluis namechmiktis.
Uan keman Dios namechtatsakuiltis nochin kiitaskej.
6 Porin nechyolpaktia maj nochipa nechtasojtakan,* amo tein nechmaktiliaj.
Nechyolpaktia maj nechixmatikan, amo tein nechchichinouiliaj.
7 Sayoj ke kemej tajtakolejkej, amo kichiujkej tein timotenkaujkej.
Amo nechtakamatkej.
8 Akin nemij Galaad kichiuaj tein amo kuali,
itech nejin ueyi xolal kinmiktianij tel miakej.
9 Tiopixkamej tamatij kemej tachtekinij tein mosenkuij para kiichtakauiskej aksa.*
Temiktiaj itech ojti, amo uejka de Siquem,
porin tein kichiuaj tepinaujtij.
10 Nikitak teisa tein fiero ompa Israel.
Efraín auilnemi ompa;
Israel mopitsotilij.
11 Namejuan akin nanemij Judá, ixyetokya tonal keman namechsentiliskej, ijkon kemej kisentiliaj tatok.
Oksepa nikinsentilis akin noaxkauan akin kinuikakaj temako”.
7 “Keman nikneki nikpajtis Israel,
okachiok nikita itajtakoluan Efraín
uan tein amo kuali tein kichiua Samaria.
Porin yejuan takajkayauaj;
tachtekinij kalakij techan uan miakej mosenkuij para tachtekiskej itech ojti.
2 Sayoj ke yejuan nion kinemiliaj ke nikelnamikis nochi tein amo kuali tein kichiuaj.
Nochi tein kichiuaj kemej yeskia kinyoualojtok;
nejua nochi nikitstok.
3 Kiyolpaktiaj tekiuaj keman kichiuaj tein amo kuali
uan kinyolpaktiaj taixyekananij* keman takajkayauaj.
4 Nochin auilnemij,
tamatij kemej se horno kampa se panchiujkej taxotaltij,
tein amo moneki kitatokilis desde ke peua kiatilia tixti hasta ke mosamaua.*
5 Itech tonal keman kiiluichiuijkej tekiuaj, taixyekananij* kokolispeujkej:*
vino tein tayikej kichiuak maj tel kualantokan.
Tekiuaj kinmatajpaloj akin tepijpinaujtiaj.
6 Ininyolo xotatok kemej se horno.*
Panchiujkej kochi nochi youal;
mostika kualkan, horno totoktik uan kuali xotatok.
7 Nochin yejuan xotatokej kemej se horno
uan kinmiktiaj akin kinixyekanaj.*
Nochin tekiuanij amo kuali tankej;
nion se nechtajtania maj nikpaleui.
8 Efraín mokui iniuan akin nemij itech okseki altepemej.
Efraín tamati kemej se taxkaltsin tein sayoj sekopa kiyokxitijkej.
9 Akin amo israelitas kikuilijkej ichikaualis, sayoj ke yejua amo kimati.
Uan kuapochiniakya, sayoj ke amo momaka cuenta.
10 Israel moueyimati uan nejon kinextia ke amo yolkuali,
sayoj ke maski ijkon yetokej amo mokepaj iuan ininDios Jehová,
nion kitemouaj.
11 Efraín kemej se paloma tein nochi kineltoka, amo yektanemilia.
Kitemoto Egipto; kiitato Asiria para maj kinpaleui.
12 Kampa yeski yaskej, nikintamotilis se red.
Nikchiuas maj panuetsikan kemej totomej.
Nikintatsakuiltis ijkon kemej nikinnejmachtij.
13 ¡Semi teikneltijkej, porin nechcholuijkej!
¡Kinixpoloskej porin tajtakolchiujkej uan ijkon nechixnamikkej!
Nejua yaya nikinmakixtiti, sayoj ke yejuan nechtakajkayauilijkej.
14 Maski motayokoltiayaj itech inincamas,
sayoj taixkajkayaujtoyaj keman nechtajtanijkej maj nikinpaleui.
Motejtekiaj para kitelpiaskej tatok uan vino tein yankuik.
Yejuan nechixnamikij.
15 Maski nikinmachtij uan nikinchikauak,
kinenemiliaj keniuj kichiuaskej tein amo kuali uan ijkon nechixnamikij.
16 Mopatakej, sayoj ke amo para mokepaskej nouan;
nion tepitsin tapaleuiayaj kemej se arco* tein kaxaltik.
Kinmiktiskej akin kinixyekanaj* porin nechijijtouaj.
Yejua ika kinpijpinaujtiskej ompa Egipto”.
8 “¡Xikpitsa se kuaomit!
Aksa* sepasan tateuikiuj ichan Jehová kemej se águila,
porin amo kichiujkej tein timotenkaujkej uan amo kitakamatkej notanauatiluan.
2 Yejuan nechtsajtsiliaj: ‘¡ToDios! ¡Tejuan tiisraelitas timitsixmatij!’.
3 Israelitas amo kinekij kichiuaskej tein kuali.
Maj akin kintauelitaj kintanikan.
4 Kinixtalijkej tekiuanij, sayoj ke amo kemej nejua niknekia.
Kinixtalijkej taixyekananij, sayoj ke amo nechixpantilijkej.
Ika ininplata uan oro kinchijchiujkej tiotsitsin,*
uan nejon kichiuas maj kinixpolokan.
5 Nikixtopeuak kuakuejkonet tein tikueyichiua tejua Samaria.
Semi nanechkualantiaj.
¿Hasta kemanian oksepa nanchipaujkej nanyeskij?
6 Porin nejon kuakuejkonet kichijchiujkej ompa Israel.
Aksa kuali kimachijchiuak; nejon amo Dios.
Kuakuejkonet de Samaria kitamitatapatsaskej.
7 Kemej yeskia kitoktokej ejekat,
yejua ika kisentiliskej chikaujkaejekat.
Trigo amo chikauaya;
tein ixua amo ueli kikixtia harina.
Uan komo teisa mochiuaskia, akin okseko kayomej kitamikuaskiaj.
8 Israelitas kinixpoloskej.
Axkan yetoskej itech okseki altepemej
kemej se tapalkat tein amo akin kineki.
9 Porin pankiskej hasta Asiria kemej se burro tein iselti nentinemi kampa tauaktok.
Efraín kintaxtauij seki siuamej para maj iuan auilnemikan.
10 Maski nejon siuamej kayomej itech okseki altepemej,
axkan nikinsentiliti;
peuas tajyouiskej por nochi tein tekiuaj uan taixyekananij kinchiualtiaj.
11 Porin Efraín kinchijchiuani miak altares para tajtakolchiuas.
Kikui nejon altares para okachi kichiuas tein amo kuali.
12 Nikijkuilouilij miak tanauatilmej,
sayoj ke amo kichiuak cuenta.
13 Nechmaktiliaj tapialmej uan kikuaj nakat,
sayoj ke nejua Jehová nion tepitsin nechyolpaktia.
Axkan nikelnamikis tein amo kuali tein kichiuanij uan nikintatsakuiltis porin tajtakolchiuanij.
Yejuan mokepkej* Egipto.
14 Israel kinkejketsak templos uan kielkauak akin kichiuak maj nemi,
uan Judá kinchijchiuak uejueyi xolalmej kampa tajtatsaktok ika tepamit.
Sayoj ke nikintikuiltis nejon xolalmej,
uan tit* kintamis uejueyi kalmej kampa mopaleuiaj tein yetokej itech sejse xolal”.
9 “Amo xiyolpaki Israel,
ijkon kemej yolpakij akin nemij itech okseki altepemej.
Porin kemej tiauilnemi tikauak moDios.
Tikteluelita maj mitstaxtauikan para tiauilnemis. Mitstaxtauiaj kampa kichipauaj tatok.
2 Sayoj ke amo kipiaskej tatok nion vino para takuaskej,
uan amo kipiaskej vino tein yankuik.
3 Amo nemiskejok itech tal tein iaxka Jehová,
ta mokepaskej Egipto,
uan ompa Asiria kikuaskej tein amo chipauak.
4 Amo kimaktiliskejok vino Jehová;
uan tein kimaktiliskej amo kiyolpaktis.
Nejon yeski kemej pantsin tein kikuaj keman aksa* momikilia:
nochin akin kikuaskej mopitsotiliskej.
Porin nejon pantsin sayoj para yejuan;
amo uelis kikalakiskej ichan Jehová.
5 ¿Toni nankichiuaskej keman ejkos tonal para namosentiliskej
oso para nankiiluichiuiskej Jehová?
6 Monekis choloskej para maj amo kinixpolokan.
Ompa Egipto kinsentiliskej uan ompa Menfis kintokaskej.
Xiuit kitamipachos nochi tein patiyoj tachijchiuj ika plata,
uan ininchan moskaltis xiuit tein uitsyoj.
7 Ejkos tonal keman kintaxtaualtiskej,
ejkos tonal keman kintatsakuiltiskej,
uan Israel kimatis.
Moitas ke tanauatijkej amo kuatamati uan akin kijtoua ke Dios kinojnotsa kuatapolos;
mitsteltauelitaj porin tikchiuak tein tel amo kuali”.
8 Akin kiyekpixtoya Efraín yetoya iuan Dios.
Sayoj ke axkan, nochi tein kichiuaj tanauatianij tamati kemej trampa tein kikui akin kinkitskia totomej;
motatauelitaj ichan Dios.
9 Israelitas fiero tachiujtokej ijkon kemej kichiujkaj akin nemiaj Guibeá.
Dios kielnamikis tein amo kuali tein kichiuanij uan kintatsakuiltis porin tajtakolchiuanij.
10 “Nikinajsik israelitas kemej uvas itech se tal kampa tauaktok.
Nikinitak namouejkaujtatuan kemej yekinika higos de se higojkouit.
Sayoj ke yejuan kitemojkej Baal tein kiueyichiuayaj ompa Peor;
kiueyichiujkej nejon* tein tepinaujtij
uan nechtajyaltiayaj ijkon kemej nechtajyaltia nejon tein kitasojtayaj.
11 Nochi tein Efraín kipatiuitaya patanik kemej se totot;
nion se siuat mokokoxkatalis nion tayolitis.
12 Maski kiniskaltiskej ininkoneuan,
nikinkuilijtias hasta maj amo mokaua nion se;
kemaj, ¡teikneltijkej yeskij keman amo nikinpaleuisok!
13 Efraín yetoya itech se ixtauat. Nechelnamiktiaya keniuj yetoya Tiro;
axkan Efraín moneki kintemakas ikoneuan para maj kinmiktikan”.
14 NoDios Jehová, xikinmaka tein kinnamiki:
maj siuamej piluetsikan uan maj amo kipiakan leche para tachichitiskej.
15 “Kichiujkej miak taman tein amo kuali ompa Guilgal uan yejua ika ompa peuak nikintauelita.
Nikinkixtis de nochan por nochi tein amo kuali tein kichiujkej.
Amo nikintasojtasok;
akin kinixyekanaj* tel amo takakij.
16 Efraín kiixpoloskej.
Inaluayo uakis uan amo teyi kitemakas.
Uan komo taskaltiaj, nikchiuas maj mikikan ininkoneuan maski kintasojtaj”.
17 NoDios kinixtopeuas
porin amo kitajtolkakij,
uan cholojtinemiskej itech okseki altepemej.
10 “Israel kemej se uvajkouit tein chauisyoj* uan taktok.
Ijkon kemej okachi taki, okachi kinchijchiua altares;
ijkon kemej okachi kuali motachiua italpan, okachi kikualtsintilia tet tein kikejketsa para taueyichiuas.
2 Peuak taixkajkayauaj;
axkan kiixtaliskej tein kinnamiki kiseliskej.
Kiixpoloskej ininaltares uan tet tein kikejketsaj para ika taueyichiuaskej.
3 Uan kijtoskej: ‘Amo tikpiaj se tekiuaj porin amo tikmojkatokaj Jehová.
Uan maski tikpiaskiaj se tekiuaj, amo ueliskia techpaleuis’.
4 Amo teyi ueli se kinneltokilia, kiyekijtouaj teisa maski amo melauj uan motenkauaj miak taman;
yejua ika tein kiixtaliaj tamati kemej xiuit tein tepajuia tein moskaltia kampa tatokaj.
5 Akin nemij Samaria ika motekipachoskej kuakuejkonet tein kiueyichiuaj uan yetok Bet-Aven.
Nochin kichokiliskej;
tiopixkamej akin kintekitiliaj okseki dioses no kichokiliskej, porin kiuikaskej uejka.
Nejon kuakuejkonet kichiuaya maj yolpakikan uan ika moueyitaliayaj porin kualtsin moitaya.
6 Kiuikaskej Asiria para kitayokoliskej se ueyi tekiuaj.
Efraín kipinaujtiskej,
uan Israel mopinaujtis porin tetajtolkakik.
7 Akin nemij Samaria uan inintekiuaj kinixpoloskej.
Kinpanos kemej se koujtsin tein kitamotaj itech at uan poliui.
8 Tatamiskej kampa taueyichiuayaj ompa Bet-Aven, kampa israelitas tajtakolchiuayaj.
Itech ininaltares ixuas uitsti uan xiuijtik yeski.
Kiniluiskej tepemej ‘¡Xitechtatikan!’,*
uan kiniluiskej tepetsitsin ‘¡Totech xiuetsikan!’.
9 Tejua Israel titajtakolchiuani desde keman tajtakolchiujkej akin nemiaj Guibeá.
Kisentokanij ijkon kichiuanij.
Keman moteuijkej ompa Guibeá, amo kintamiixpolojkej akin kichiuayaj tein amo kuali yetok.
10 Nikintatsakuiltis keman nejua niknekis.
Akin nemij itech okseki xolalmej mosenkuiskej para kinteuiskej.
Nikchiuas maj kiuikakan ininkechko ome tajtakolmej tein kichiujkej.
11 Efraín katka kemej se kuakouej tein ayamo taskaltiani, tein kimachtijkaj keniuj kichipauas tatok;
yejua ika amo teyi nikechtalilij porin kechkuakualtsin katka.
Axkan nikchiuas maj aksa* ipanko youi Efraín.
Judá tayuntajuis; Jacob kiixalaxos in tal.
12 Xikchiuakan tein kuali yetok uan nejua nochipa namechtasojtas.
Ximoyolyemanikan uan xiktemokan Jehová, axkan ke ueliok,
hasta maj uiki uan maj namechmachti tein kuali yetok.
Porin akin talkaxania uan kitoka kuali xinach, kisentilia kuali tatok.
13 Sayoj ke namejuan nankitokkej tein amo kuali,
nankisentilijkej miak tajtakol,
uan nantaxtaujtokej porin namokajkayaujkej;
sayoj motech titakuaujtamatik
uan iniuan mosoldados porin tel miakej.
14 Takakistis keman mitsteuitiuij,
uan fiero tachiuaskej itech nochi uejueyi xolalmej kampa kuali tajtatsaktok.
Tachiuaskej ijkon kemej Salmán fiero tachiuak ompa Arbel keman kinteuito,
keman siuamej uan ininkoneuan kinkokototskej.
15 Yejua nejin tein mitschiuiliskej tejua Betel, porin tikchiuak tein tel amo kuali.
Xikyekmati ke keman tanesis, kiixpoloskej akin taixyekana Israel”.
11 “Niktasojtak Israel keman okichpilok katka,
uan niknotsak nookichpiltsin para maj kisa de Egipto.
2 Keman okachi kinnotsayaj israelitas,
yejuan okachi mouejkatiliayaj.
Miakpa kimaktiliayaj Baal miak taman
uan no kinchichinouiliayaj tiotsitsin* miak taman.
3 Sayoj ke, nejua niknextilij Efraín maj nejnemi uan niknapaloj;
uan yejuan amo kiitakej ke nejua nikinpajtijka.
4 Niksentokak nikintasojtak uan kualtsin nikinnojnotsak para maj nechajsikij, kemej yeskia nikintilantoya ika se mekatsin;*
nejua nikinkixtilij kouit* tein kinkechtalilijkaj,
uan kualtsin niktamakak sejse.
5 Amo mokepaskej Egipto, sayoj ke imako yetoskej tekiuaj de Asiria,
porin amo kinekkej mokepaskej nouan.
6 Akin kintauelitaj kalakiskej itech ininxolaluan para kinteuiskej,
uan kitamiuejueloskej tein ika tatsakuaj uan tatamiskej porin kiixtalijkej kichiuaskej tein amo kuali.
7 Nokoneuan kiixtalijkej nechkauaskej.
Maski kiniluijkej maj mokepakan nouan, nion se mokepak.
8 Amo uelis nimitskauas Efraín,
Israel, amo uelis nimitstemaktis okseko.
Amo uelis nimitschiuilis tein nikchiuilij Admá,
amo uelis nimitskauas kemej Zeboyim.
Amo nikchiuasok tein niknemilijtoya;
uan no nimitsiknelijya.
9 Maski nitelkualantok amo teyi nimitschiuilis.
Amo oksepa nimitstatsakuiltis Efraín,
porin nejua niDios, amo se takat.
Akin senkis chipauak mouan yetok;
keman nimitsitakiuj amo nikualantiualas.
10 Oksepa kiueyichiuaskej Jehová, uan yejua nanalkas kemej se león;
keman nanalkas, ikoneuan uiuiyokatiualaskej* desde kampa pankalaki tonaltsin.
11 Keman kisaskej de Egipto, uiuiyokaskej kemej se totot;
keman kisaskej de Asiria, uiuiyokaskej kemej se paloma;
uan nikchiuas maj nemikan ininchan”. Jehová kiyekijtoua nejin.
12 “Efraín sayoj nechkajkayaua;
kampa yeski nitachia, nikita keniuj Israel takajkayaua.
Sayoj ke Judá ayamo kikaua Dios,*
uan nochipa kitakamati Dios akin senkis chipauak”.
12 “Efraín kemej yeskia kikua ejekat.
Sentonal kitokatinemi tonalejekat.
Okachi takajkayaua uan tateuia.
Motenkaua teisa iuan tekiuaj de Asiria uan kiuika aceite ompa Egipto.
2 Jehová kiixtaliti tein kinamiki kiselis Judá;
kitatsakuiltis Jacob por nochi tein kichiujtok;
kimakas tein kinamiki por nochi tein kichiuani.
3 Keman yetoya iijtik inan, kikotskitskij iikniuj.
Uan kinextij nochi ichikaualis iixpan Dios.
4 Se ángel kikitskij uan kinekia kiuetsiltis, sayoj ke amo kitanik.
Chokak uan kitataujtij maj kitiochiua”.
Dios monamikilij ompa Betel, uan ompa touan tajtoj.
5 Jehová, Dios akin kinixyekana iangeluan;
Jehová, ika nejon tokayit kiixmatij.*
6 “Yejua ika ximokepa iuan moDios,
xitetasojta uan xikchiua tein kuali yetok,
uan nochipa xitakuaujtamati iuan Dios.
7 Sayoj ke akin tanamaka amo yektatamachiua;
kiteluelita tetachtekis.
8 Efraín nochipa kijtoua: ‘Tein melauj niteltominpia;
nikpia tel miak taman.
Niteltekitini uan amo akin uelis kijtos ke nikchiuak se ueyi tajtakol’.
9 Sayoj ke nejua nimoDios Jehová desde keman tietoya ompa Egipto.
Nikchiuati oksepa xinemi itech kaltsitsin*
kemej ijkuak tiiluitia.
10 Nikinnojnotsak tanauatianij,*
nikinitaltij okachi miak taman
uan nikiniluij tanauatianij tein monekia mitstapouiskej para nimitsmachtis.
11 Ompa Galaad amo kijtouaj tein melauj* uan takajkayauaj.
Ompa Guilgal kintemaktianij kuakuejmej,
uan ininaltares tetekpantokej kemej tet tein kimontontaliaj kampa tatokaj.
12 Jacob choloj hasta Aram;*
Israel ompa tekitik para maj kisiuamakakan,
uan kinyekpiak ichkamej* por se siuat.
13 Jehová kikuik se tanauatijkej para kinkixtis israelitas de Egipto,
uan kikuik se tanauatijkej para kinyekpias.
14 Efraín semi kikualantij Dios;
moneki kitaxtaualtiskej porin temiktij;
iTeko kimakas tein kinamiki porin kichiuak maj amo kuali ika tajtokan”.
13 “Keman Efraín tajtouaya, nochin uiuiyokayaj;*
yejua katka ueyichiujkej ompa Israel.
Sayoj ke kemej peuak kiueyichiua Baal, tajtakolchiuak uan momikilij.
2 Axkan okachi tajtakolchiuaj
uan ika ininplata kinchijchiuaj tiotsitsin;*
kintechijchiualtiaj iniuan akin kuali tamachijchiuaj.
Uan kijtouaj: ‘Maj takamej akin kitemaktiaj miak taman kinmakakan se beso kuakuejkonemej tein kinmachijchiujkej’.
3 Yejua ika, yeskij kemej mixti tein monextia kualkan,
kemej ajuach tein kualkan uaki,
kemej itajsolyo trigo tein chikaujkaejekat kiuika
uan kemej pokti tein kisa itech se kali.
4 Sayoj ke nejua nimoDios Jehová desde keman tietoya ompa Egipto;
amo tikixmatik okse Dios, ta sayoj nejua,
uan sayoj nejua ueli nitemakixtia.
5 Nimitsixmatik itech tal kampa amo teyi onkak, kampa tauaktok.
6 Yejuan ixuitoyaj porin kitelpiayaj tein kikuaskej,
kemej kipiayaj nochi, peuak moueyimatij.
Yejua ika nechelkaujkej.
7 Niyeski kemej se león para yejuan,
kemej se leopardo tein tayoualojtinemi ojti.
8 Nikintsontamotas kemej se osa tein kinpoloj ipiluan
uan nikinyolixtsayanas.
Ompa nikinkuas kemej se león;
se koujtajtapial kinkokototsas.
9 Mitsixpoloskej Israel, porin tinechixnamikik,
tikixnamikik akin mitspaleuia.
10 ¿Kani yetok motekiuaj? Maj yejua mitspaleui para maj amo kiixpolokan uejueyi xolalmej kampa tinemi.
¿Kani yetokej akin mitsixyekanaj?*
Tejua tinechiluij: ‘Xikixtali se tekiuaj uan taixyekananij’.*
11 Nejua nimitsmakak se tekiuaj keman nikualantoya,
uan nikajchiuas porin nitelkualantok.
12 Amo nikelkauas tein amo kuali tein kichiuak Efraín;
nikinpouak nochi itajtakoluan uan nikijkuiloj.
13 Inan tajyouis keman kiyolitis.
Sayoj ke yejua se okichpil akin amo kuatamati:
keman monekiskiaya yolis, amo kineki yolis.
14 Nejua nikinmakixtis den Miketekoch* uan mikilis.
Mikilis, ¿kani yetok mochikaualis tein ika titetajyouiltia?
Miketekoch, ¿kani yetok mochikaualis tein ika titaixpoloua?
Sayoj ke Efraín amo nikiknelis.
15 Maski Efraín xochiouas kemej akat,
Jehová kititanis se tonalejekat tein ualeuas itech tal kampa tauaktok,
uan kiuatsas atekoch kampa kikui at uan ameyalmej.
Kikuiliskej nochi tein patiyoj tein kipia.
16 Samaria taxtauas porin kiixnamikik iDios.
Kinmiktiskej ika espada,*
kinkokototsaskej ikoneuan
uan siuamej akin kokoxkayetokej kinpoxtsayanaskej”.
14 “Israel, ximokepa iuan moDios Jehová.
Tiuetsik porin tikchiuak tein amo kuali.
2 Ximokepakan iuan Jehová uan xikiluikan:
‘Xitechtapojpolui porin tikchiujkej tein amo kuali uan xikita tein kuali tein tikchiuaj,
uan timitsueyitaliskej ika totenoj kemej yeskia timitsmaktiliskiaj kuakuejmej tein yekin moskaltijtokej.
3 Asiria amo techmakixtis.
Amo titakuaujtamatiskej itech caballos
nion oksepa tikijtoskej ke tein tikmachijchiuanij yejua toDios.
Porin tejua tikiknelia akin amo kinpiaok itatuan’.*
4 Nikinpajtis uan amo nechkauaskejok.
Nikintasojtas porin ijkon nikneki,
porin amo nikualantokok iniuan.
5 Niyeski kemej ajuach para Israel;
yejua kualtsin xochiouas
uan uejkatan monaluayotis kemej koujmej tein onkakej ompa Líbano.
6 Imakoujyo uejka ajsis,
kualtsin moitas kemej se olivojkouit,
uan ajuiyak yeski kemej taajuiyaya ompa Líbano.
7 Oksepa nikinpaleuis kemej yeskia nikinyekauilijtoskia.
Kionkaltiskej tatok uan seliaskej kemej uvajkoujmej.
Kitelixmatiskej kemej vino tein kikixtiaj ompa Líbano.
8 Efraín kijtos: ‘Amo nikinkuitokok tiotsitsin’.*
Nejua niknankilis uan nikyekpias.
Niyeski kemej se enebrojkouit tein kualtsin maxiujyoj.
Nimitsmakas notakilo”.
9 ¿Akoni tamatkej? Maj kiajsikamati nochi tein nikijtoj.
¿Akoni kuali taixejekoua? Maj kimati toni kijtosneki.
Ojmej kampa Jehová teuika melaujkej
uan akin kichiuaj tein kuali yetok ompa yaskej,
sayoj ke akin tajtakolchiuaj uetsiskej ompa.
Oseas ualeua den tajtol Hosaya, tein kijtosneki ‘Jah kimakixtij’ oso ‘Jah tamakixtij’.
Oso “kinpapatas takamej”.
Tokayit tein kijtosneki ‘Dios kitokas xinach’.
Oso “tein ika kitamota flechas”.
Oso “takomol”.
Tokayit tein kijtosneki ‘amo kiiknelijkej’.
Nejin tamati kemej se machete tein ojkan tenej.
Tokayit tein kijtosneki ‘amo noaxkauan’.
Xikonita Os 1:9, nota.
Xikonita Os 1:6, nota.
Oso “Maj amo kinpapataok takamej”.
Oso “kinpapatak takamej”.
Oso “nikxitatsoti”.
Oso “takomol”.
Oso “noBaal”.
Oso “nemikan”.
Tokayit tein kijtosneki ‘Dios kitokas xinach’.
Xikonita Os 1:6, nota.
Xikonita Os 1:9, nota.
Nejin kipajpatachouayaj uan mokauaya kemej se taxkal tilauak tein kinmaktiliayaj inindioses.
Oso “15 siclos”. Xikonita B14.
Itech hebreo, “se homer uan tajko”. Xikonita B14.
Oso “Amo xikinpapata takamej”.
Oso “ikoneuj tekiuaj”.
Itech hebreo, “efod”. Xikonita efod.
Oso “tatadiosmej”. Itech hebreo, “terafim”.
Xikonita tanauatijkej.
Oso “tamachtia”.
Oso “inintatadiosuan”.
Oso “kinpapataj takamej”.
Oso “kinpapataj takamej”.
Oso “borregojkonet”.
Oso “nikintatsakuiltiti”.
Oso “tikinpapata siuamej”.
Oso “tatamis inintalpan”.
Oso “Ikoneuan tekiuaj”.
Oso “xoleujtoya”.
Xikonita tanauatijkej.
Oso “tetasojtakan”, “teiknelikan”.
Oso “akin”, “akaj”.
Oso “ikoneuan tekiuaj”.
Oso “posoni”, “soneui”.
Oso “ikoneuan tekiuaj”.
Oso “kokoxkakuikej”.
Oso xa “kemej se horno keman motokiaj para takajkayauaskej”.
Itech hebreo, “jueces”.
Oso “tein ika kitamotaj flechas”.
Oso “ikoneuan tekiuaj”.
Oso “Akin”, “Akaj”.
Oso “tatadiosmej”.
Oso xa “mokepaskej”.
Oso “tekol”.
Oso “akin”, “akaj”.
Oso “nejon dios”.
Oso “ikoneuan tekiuaj”.
Oso xa “tein sentakuik”.
Oso “¡Xitechcholtikan!”.
Oso “akin”, “akaj”.
Oso “tatadiosmej”.
Nikan xa ika tajtojtok mekatsin tein kikuia se tetat para kimachtis ikonetsin maj nejnemi.
Oso “yugo”.
Oso “kuekuetakatiualaskej”, “kuekuechkatiualaskej”.
Itech hebreo, “nentinemiok iuan Dios”.
Oso “kielnamikij”.
Nejin kaltsitsin chijchiujtoyaj ika tasal oso ininpankuetaxyo tapialmej.
Xikonita tanauatijkej.
Oso “onkakej naualmej”.
Oso “Siria”.
Oso “borregos”.
Oso “kuekuetakayaj”, “kuekuechkayaj”.
Oso “tatadiosmej”.
Oso “ikoneuan tekiuaj”.
Itech hebreo, “jueces”.
Oso “Seol”, kampa moseuijtokej mikemej. Xikonita miketekoch.
Nejin tamati kemej se machete tein ojkan tenej.
Oso “iknotsin”, “mikakaual”.
Oso “tatadiosmej”.