JOEL
1 Yejua nejin tein Jehová kiluij Joel* iokichpil Petuel:
2 “Taixyekananij uan nanochin akin nanemij itech nejin tal,
xikakikan nejin.
Amo keman nankiitanij maj mochiua se taman kemej nejin
nion namouejkaujtatuan kiitakej.
3 Xikintapouikan namokoneuan
uan maj namokoneuan kintapouikan namoixuiuan,
uan maj namoixuiuan kintapouikan ininkoneuan.
4 Tein kikaujkej chapolimej tein nochi kikuaj, kikuajkej chapolimej tein ajtapalejkej;
tein amo kitamijkej, kikuajkej chapolimej tein ayamo ajtapalejkej;
uan tein yejuan amo kitamijkej, kikuajkej chapolimej tein tatamiaj.
5 ¡Tauananij, xiijsakan* uan xichokakan!
Ximotayokoltikan nanochin akin nantayij vino,
porin namechtenkuilijkej vino tein tsopek.
6 Tel miakej temikoj itech noaltepeuj, tein nion ueli se kinpoua nion se kintamia.
Kipiaj inintanuan kemej se león uan takejtsomaj kemej se león.
7 Kitamikuajkej nouvajkouj, uan higojkouit sayoj kikaujkej koujten.
Kintamixipeujkej uan kintamotatoj,
kixipeujkej hasta imakoujyotsitsin.
8 Ximotayokoltikan kemej se ichpoch akin motalilia se tasal tein teajuayotia*
porin momikilij akin iuan monamiktiskia.
9 Amo kiuikajok harina nion vino ichan Jehová para kimaktiliskej.
Tiopixkamej akin kitekitiliaj Jehová tayokoxtokej.
10 Tatamik kampa tatokaj uan amo teyi mochiuaok.
Chapolimej kikuajkej tatok, amo teyiok vino tein yankuik uan aceite tamik.
11 Tekitinij amo kimatijok toni kichiuaskej uan akin tekitij kampa kitokaj uvas motayokoltiaj
porin amo teyi trigo nion cebada.
Tamik nochi tein mochiujka.
12 Uvajkouit uakik,
higojkouit kuetauik.
Granadajkouit, palmajkouit uan manzanajkouit,
nochin koujmej uakkej.
Amo akin yolpaki, ta nochin mopinaujmatij.
13 Tiopixkamej, ximotalilikan tasal tein teajuayotia uan xichokakan.*
Ximotayokoltikan, akin nantekitij itech altar.
Xiualakan uan xiaktokan nejon tasal nochi youal, namejuan akin nankitekitiliaj noDios.
Porin amo kiuikajok ichan namoDios nion teyi tachijchiuj ika harina nion vino para kimaktiliskej.
14 Xitanauatikan maj amo akin takua; xitanauatikan maj nochin mosentilikan para kiueyichiuaskej Dios.
Xikinsentilikan taixyekananij uan nochin israelitas ichan namoDios Jehová.
Uan xiktsajtsilikan Jehová maj namechpaleui.
15 ¡Tel fiero yeski nejon tonal!
Porin amo uejkaua ejkos tonal tein Jehová kiixtalij,
uan ijkuak, akin kipia nochi chikaualis taixpolos.
16 Amo tiyolpakijok ichan toDios.
Amo tikpiajok tein tikuaskej.
Amo teyi onkak kampa kisentiliaj tatok.
Kinuejuelojkej nejon kalmej porin amo teyi mochiuak.
18 ¡Hasta tapialmej tayokoyaj!
¡Kuakuejmej senenemij porin amo kipiaj sakat!
Uan ichkamej* tajyouiaj.
20 Hasta koujtajtapialmej mitstemouaj
porin uakik nochin at
uan tit kitamij sakat tein onkaya”.
2 “¡Xikpitsakan kuaomit ompa Sion!
¡Xitanauatikan itech tepet tein nimoxelouilij ke namechteuikij!
Maj uiuiyokakan* nochin akin nemij itech nejin tal.
¡Ejkoti tonal tein Jehová kiixtalij! ¡Amo uejkaua ejkos!
2 Nejon tonal semi tatayouayantias,
mixtaj yeski uan tamitatileuis,
kemej ijkuak ayamo yektanesi porin tepemej kitsakuiliajok tonaltsin.
Tel miakej ualajtokej uan amo ueli se kintani.
Amo keman moitstoya se taman ijkon,
uan amo kemanok nesiskej oksekin kemej yejuan
maski panoskej miak xiujmej.
3 Ininixpan se tit* tatamijtiuj,
uan nejon tit kitamia nochi tein onkak taikampa.
Tal kampa ajsij tamati kemej xochital tein yetoya ompa Edén,
sayoj ke keman kisaj mokaua kemej se tal kampa tauaktok,
uan amo teyi kikauaj.
4 Yejuan moitaj kemej caballos
uan motalouaj kemej caballos tein kinkuij keman tateuiaj.
5 Keman ajkotsikuintiouij itech tepemej kakistij kemej carros,
kemej ijkuak tata xiuit tein uakik.
Tamatij kemej soldados tein chikaujkej uan tejtekpantokej para tateuiskej.
6 Kichiuaskej maj nochin akin nemij itech xolalmej moteltekipachokan.
Nochin ixpochiniaskej porin mouiskej.
7 Tateuiaj uan tejkoj* itech tepamit kemej soldados,
sejse youi kampa moneki yas
uan amo akin youi oksekopa.
8 Amo motojtopeuaj;
sejse youi kampa moneki yas.
Komo semej kitamotiliaj se flecha uan kikuiltiaj,
oksekin kisentokaj youij.
9 Sentakuij itech ueyi xolal, motalouaj itech tepamit.
Tejkoj itech kalmej, kalakij itech ventanas kemej se tachtekkej.
10 Keman yejuan ajsij, tal uan iluikak uiuiyokaj.
Tonaltsin uan metsti tileuij
uan sitalimej amo tauiajok.
11 Yejuan kemej yeskia isoldados Jehová. Yejua chikauak tajtos keman kinyekantias, porin tel miakej.
Dios akin kichiua tein kijtoua semi chikauak.
Tonal tein Jehová kiixtalij semi ueyi uan semi se kimojkaitas.
Amo akin uelis taxikos nejon tonal”.
12 Jehová kiyekijtoua nejin: “Uelisok namokepaskej, yekmelauj xiknekikan nouan namokepaskej,
xikixtalikan amo nantakuaskej seki tonalmej, xichokakan uan ximoyolkokokan.
13 Amo sayoj xiktsayanakan namotasal, ta ximoyolpatakan,*
uan ximokepakan iuan namoDios Jehová,
porin yejua yolkuali uan teiknelia, amo niman kualani* uan nochipa tetasojta.
Ijkon kiyeknemilis tein kiixtalijka uan amo namechtatsakuiltis.
14 Xa motanemililpatas, kiyeknemilis tein kiixtalijka
uan namechtatiochiuis
para xikmaktilikan namoDios Jehová seki taman tachijchiuj ika harina uan vino.
15 ¡Xikpitsakan kuaomit ompa Sion!
Xitanauatikan maj amo akin takua; xitanauatikan maj nochin mosentilikan para kiueyichiuaskej Dios.
16 Xikinsentilikan nochin; xikchiuakan tein monekis para maj nochin chipaujkej.
Xikinsentilikan takamej akin xiuejkejya. Xikinuikakan pipilkonemej uan konemej tein chichijok.
Maj takat akin yekin monamiktij kisa de icuarto iuan isiuatsin.
17 Maj chokakan tiopixkamej akin kitekitiliaj Jehová
taixpan de ipuerta templo kampa yetok altar, uan maj kijtokan:
‘Jehová, xikinikneli akin tikinxeloj.
Amo xikaua maj okseki tekiuanij kinixyekanakan akin moaxkauan,
komo ijkon yeskia, kinuetskiliskiaj.
Ijkon itech okseki xolalmej amo kijtoskej: “¿Kani yetok namoDios?”’.
18 Uan Jehová amo kikauas maj nion akin kalaki italpan
uan kiniknelis akin ompa pouij.
19 Uan Jehová kiniluis akin iaxkauan:
‘Nikchiujtok xikpiakan tatok, vino tein yankuik uan aceite,
uan namejuan kuali nanixuiskej.
Amo nikauas maj akin nemij itech okseki altepemej kisentokakan namechpijpinaujtikan.
20 Namechinajchiuilis uan tel uejka nikinkauatiuj nochin tein ualeuaskej ajkokopa.*
Nikinkauatiuj kampa tateuaktok uan tafierojkan,
tein yaskej taixpan tamitiuij itech mar Salado*
uan tein yaskej taikampa tamitiuij itech mar Grande.*
Kemej mikiskej, tatsojyayas
uan kisentokas tel tatsojyaxtos ompa.
Porin Dios kichiuas miak taman ika iueyi chikaualis’.
21 Taltsin, amo ximoui.
Ximouelita uan xiyolpaki, porin Jehová kichiuas miak taman ika iueyi chikaualis.
22 Tapialmej, amo ximouikan,
porin sakat tein onkak kampa tauaktok oksepa selias
uan koujmej takiskej.
Motelchiuas higos uan uvas.
23 Namejuan, nanikoneuan Sion, ximouelitakan uan xiyolpakikan porin namoDios Jehová kichiuati miak taman.
Yejua kichiuas maj kioui kemej moneki keman nantatokaskej.
Kichiuas maj tel kioui,
maj mixkioui uan maj chikauak kioui kemej achto.
24 Nankitelpiaskej tatok tein tachipauj
uan no nankitelpiaskej vino tein yankuik uan aceite.
25 Nejua namechkepilis tatok
tein nankipolojkej nochi xiujmej keman kikuajkej chapolimej tein ajtapalejkej, tein ayamo ajtapalejkej, tein nochi kikuaj uan tein tatamiaj,
nochi nejon chapolimej tein namechtitanilij.
26 Xikyekmatikan ke nantakuaskej hasta nanixuiskej
uan nankiueyitaliskej itokay namoDios Jehová,
akin kichiuak miak taman tein se kimojkaita para namechpaleuis.
Nokoneuan amo keman oksepa kinpinaujtiskej.
27 Uan namejuan monekis nankimatiskej ke nejua nietok iniuan israelitas
uan nejua namoDios Jehová. ¡Amo moajsi okse!
Nokoneuan amo keman oksepa kinpinaujtiskej.
28 Satepan nikinmakas* nochikaualis akin pouij itech nochi tataman xolalmej.
Namookichpipiluan uan namosiuapipiluan kitematiltiskej tein nikiniluis,
akin xiuejkejya takochitaskej*
uan namotelpochuan nikinitaltis seki taman.
29 Hasta notakeualuan takamej uan siuamej
nikinmakas nochikaualis itech nejon tonalmej.
30 Uan nikchiuas miak taman tein se kimojkaita iluikak uan taltikpak:
onkas esti, tit uan pankistos miak pokti.
31 Tonaltsin tileuis uan metsti chichileuis kemej esti
achto ke ejkos ueyi tonal tein Jehová kiixtalij uan tein se kimojkaitas.
32 Uan akin kitataujtis Jehová maj kipaleui uan kinotsas ika itokay, makisas.
Itech tepet Sion uan Jerusalén yetoskej akin choloskej, ijkon kemej kijtoj Jehová.
Makisaskej akin Jehová kinnotsa”.
3 “¡Xikitakan! Itech nejon tonalmej,
oksepa nikinualkuis akin kinkuiteujkaj de Judá uan Jerusalén.
2 Ijkuak, no nikinsentilis akin nemij itech nochin altepemej
Ompa nikintatsakuiltis
porin ininka mauiltijkej israelitas akin noaxkauan.
Porin yejuan kinmoyaujkej* itech miak altepemej
uan moxejxelouilijkej notal.
3 Porin kitatamotkej tetsitsin* para moxejxelouiliskej akin noaxkauan;
kinamakayaj se okichpiltsin para motekaskej iuan se siuat akin monamaka,
uan kinamakayaj se siuapiltsin para kikouaskej vino uan tauanaskej.
4 Tiro uan Sidón uan nochi xolalmej tein pouij Filistea,
¿keyej nanechixnamikij?
¿Toni namechchiuilij?
¿Keyej namomakeptokej?
Komo ijkon, nejua nimantsin namechtaxtaualtis.
5 Porin namejuan nankiuikakej noplata uan nooro
uan nankikauatoj tein okachi kuali tein nikpiaya ininchan namodioses.
6 Uan akin nemij Judá uan Jerusalén nankinnamakiltijkej griegos
para maj kinuikakan uejka.
7 Nejua nikinkuitiuj kampa nankinnamakakej,
uan namechtaxtaualtis.
8 Uan namookichpipiluan uan namosiuapipiluan nikinnamakiltis akin nemij Judá,
uan yejuan kinnamakiltiskej akin nemij Saba,* kampa tel uejka,
porin Jehová ijkon kijtoj.
9 Xitanauatikan nejin itech nochin altepemej:
‘¡Xikchiuakan tein moneki para nantateuitiuij! ¡Maj kisakan takamej akin kuali tateuiaj!
¡Maj motokikan nochin soldados! Xikiniluikan maj yakanya.
10 Ika tepos tein ika nantayuntajuiaj xikchijchiuakan espadas* uan tein ika nantauitekij xikchijchiuakan lanzas.*
Akin amo chikauak maj kijto: “Nichikauak”.
11 Namejuan akin nanemij itech tataman altepemej ¡xiualakan uan ximosenpaleuikan! ¡Ximosentilikan!’”.
Jehová, xikchiua maj akin mouan tateuiaj temokan ompa.
12 “Akin nemij itech altepemej maj mosentilikan uan maj pankisakan itech tal tamanis de Jehosafat.
Ompa nimotalis para nikintatsakuiltis nochin.
13 Xiktekikanya tatok ika namotepos porin chikauakya.
Xitemokan uan xikmetspatakan uvas, porin onkak tel miak.
Kampa motekati iayo uva amo akiok; akin nemij itech altepemej kitelchiuaj tein amo kuali.
14 Yetokej tel miakej itech tal tamanis kampa mochiuas tein moixtalij,
porin amo uejkaua ejkos tonal tein Jehová kiixtalij.
15 Tonaltsin uan metsti tileuiskej
uan sitalimej amo tauiskejok.
16 Jehová nanalkas kemej se león desde Sion,
chikauak tajtos desde Jerusalén.
Uan iluikak uan taltikpak uiuiyokaskej;*
sayoj ke Jehová kinyekpias israelitas akin iaxkauan.
Yejua yeski kemej se ueyi tepamit kampa mopaleuiskej.
17 Uan namejuan moneki nankimatiskej ke nejua namoDios Jehová; nejua ninemi Sion, itech tepet tein nimoxelouilij.
Jerusalén xeliujtos para nejua,
uan akin amo israelitas amo kemanok panoskej ompa.
18 Nejon tonal, itech tepemej kemej yeskia chalantos vino tein tsopek,
itech lomas kemej yeskia kisas leche
uan itech ataujmej* motalojtos miak at.
Ichan Jehová kistos at
uan nejon at ajsis hasta atauit kampa onkakej acaciajkoujmej.
19 Sayoj ke ompa Egipto amo teyi onkas
uan ompa Edom tel tauaktos
porin kintajyouiltijkej akin nemij Judá,
kampa kinmiktijkej akin amo teyi kichiujtoyaj.
20 Sayoj ke Judá uan Jerusalén amo ijkon yeski,
ta desde axkan ompa nochipa nemiskej.
21 Nikintapojpoluis maski achto amo niknemiliaya nikintapojpoluis.
Uan nejua Jehová ninemis Sion”.
Tokayit tein kijtosneki ‘Jehová yejua Dios’.
Oso “xitachiakan”, “xiixpetanikan”.
Xikonita tasal tein teajuayotia.
Oso “ximoyolixkojkomonikan”.
Oso xa “Higos”.
Itech hebreo, “palajtampa”.
Oso “borregos”.
Oso “tekol”.
Oso “kuekuetakakan”, “kuekuechkakan”.
Oso “tekol”.
Oso “pankisaj”.
Itech hebreo, “ximoyoltsayanakan”.
Oso “amo yolijsiui”.
Oso “norte”. Komo se moixkepa kampa ualkisa tonaltsin, nejin mokaua se iopochmakopa.
Oso “mar oriental”. Nejin no moixmati kemej mar Muerto.
Oso “mar occidental”. Nejin no moixmati kemej mar Mediterráneo.
Itech hebreo, “nikintoyauilis”.
Oso “tatejtemikiskej”.
Oso “takomol”.
Tokayit tein kijtosneki ‘Jehová yejua juezʼ.
Oso “kinxinijkej”.
Xikonita tetsitsin tein kitatamotayaj.
Oso “Seba”.
Nejin tamati kemej se machete tein ojkan tenej.
Nejin katka se kouit tein ueyak tein itempan kipiaya se tepos tein puntajyej.
Oso “kuekuetakaskej”, “kuekuechkaskej”.
Oso “ojpanamej”.