AMÓS
1 Yejua nejin tein kitematiltij Amós,* akin nemia Tecoa uan kinyekpiaya ichkamej.* Dios kiitaltij tein panoskia ompa Israel. Ijkuak, ompa Judá taixyekanaya tekiuaj Uzías uan ompa Israel taixyekanaya tekiuaj Jeroboán, iokichpil Joás. Dios kiitaltij nejin ome xiuit achto ke taloliniskia. 2 Yejua kijtoj:
“Jehová nanalkas kemej se león desde Sion
uan chikauak tajtos desde Jerusalén.
Sakat uakis
uan ikuapan tepet Carmelo tauakis”.
3 “Yejua nejin tein kijtoua Jehová:
‘“Kemej miakpa taixnamikkej akin nemij Damasco, amo nikpatas tein nikixtalij,
porin semi kintajyouiltijkej akin nemij Galaad, kemej yeskia ininpanko kinpanoltilijkej teposmej tein ika kichipauaj tatok.
4 Yejua ika niktikuiltis ichan Hazael,
uan tit* kintamis ipalacios Ben-Hadad.
5 Nikpostekis tein ika yektatsakuaj ompa Damasco;
nikinixpolos akin nemij Bicat-Aven
uan akin tekiuajti ompa Bet-Edén,
uan akin nemij Siria kinuikaskej temako hasta Quir”. Jehová kijtoua nejin’.
6 Yejua nejin tein kijtoua Jehová:
‘“Kemej miakpa taixnamikkej akin nemij Gaza, amo nikpatas tein nikixtalij,
porin kinkuiteujkej miakej uan kintemaktitoj Edom.
7 Yejua ika niktikuiltis tepamit tein kiyoualoua Gaza,
uan tit kintamis uejueyi kalmej kampa mopaleuiaj.
8 Nikinixpolos akin nemij Asdod
uan akin tekiuajti ompa Asquelón;
nikintatsakuiltis akin nemij Ecrón,
uan filisteos akin mokauaskej, tamiskej”. ToUeyi Teko Jehová kijtoua nejin’.
9 Yejua nejin tein kijtoua Jehová:
‘Kemej miakpa taixnamikkej akin nemij Tiro, amo nikpatas tein nikixtalij,
porin kintemaktitoj Edom akin yetoyaj temako
uan porin amo kielnamikkej tein motenkaujkej iniuan ininikniuan.
10 Yejua ika niktikuiltis tepamit tein kiyoualoua Tiro,
uan tit kintamis uejueyi kalmej kampa mopaleuiaj’.
11 Yejua nejin tein kijtoua Jehová:
‘Kemej miakpa taixnamikkej akin nemij Edom, amo nikpatas tein nikixtalij,
porin kikuikej ininespada* uan kintokatinemiaj ininikniuan
uan porin amo kiniknelijkej.
Kemej kualantokej, kisentokaj kinkokototsaj
uan nochipa kintauelitstokej.
12 Yejua ika niktikuiltis Temán,
uan tit kintamis uejueyi kalmej kampa mopaleuiaj ompa Bozrá’.
13 Yejua nejin tein kijtoua Jehová:
‘“Kemej ammonitas miakpa taixnamikkej, amo nikpatas tein nikixtalij,
porin ompa Galaad kinpoxtsayankej siuamej akin kokoxkayetoyaj para okachi kiueyiltiskej inintal.
14 Yejua ika niktikuiltis tepamit tein kiyoualoua Rabá,
uan tit kintamis uejueyi kalmej kampa mopaleuiaj;
itech tonal keman kinteuiskej, nochin chikauak tsajtsiskej,
tel chikauak taejekas uan kiouis.
15 Uan inintekiuaj ammonitas uan akin iuan taixyekanaj kinuikaskej temako”. Jehová kijtoua nejin’.
2 ”Yejua nejin tein kijtoua Jehová:
‘“Kemej miakpa taixnamikkej akin nemij Moab, amo nikpatas tein nikixtalij,
porin kichichinojkej iomiyouan tekiuaj de Edom hasta mokauak koujnex.*
2 Yejua ika niktikuiltis Moab,
uan tit* kintamis uejueyi kalmej kampa mopaleuiaj ompa Queriyot.
Akin nemij Moab mikiskej keman tel takakistitos,
keman soldados chikauak tsajtsiskej para tateuiskej uan keman kipitsaskej kuaomit.
3 Nikixpolos akin ompa taixyekana*
uan nikinmiktis nochin akin iuan taixyekanaj”. Jehová kijtoua nejin’.
4 Yejua nejin tein kijtoua Jehová:
‘Kemej miakpa taixnamikkej akin nemij Judá, amo nikpatas tein nikixtalij,
porin kiixtopeujkej itanauatil* Jehová
uan porin amo kichiujkej tein kiixtalij.
Yejuan mokajkayaujtokej ijkon kemej ininuejkaujtatuan.
5 Yejua ika niktikuiltis Judá,
uan tit kintamis uejueyi kalmej kampa mopaleuiaj ompa Jerusalén’.
6 Yejua nejin tein kijtoua Jehová:
‘Kemej miakpa taixnamikkej akin nemij Israel, amo nikpatas tein nikixtalij,
porin kiixpatakej ika plata akin amo teyi kichiujtoya
uan pobre kiixpatakej ika ome tekak.
Se tetat uan ikoneuj motekaj iuan sayoj se siuat,
uan ijkon kichiuaj maj amo kuali noka tajtokan.
8 Keman kitaneujtiaj teisa se pobre, kikuiliaj ipantaken hasta maj kikepa tein kitaneujtijkej. Satepan mopechtiaj nejon taken tanakastan de nochin altares.
Uan ika tomin tein kinkixtiliaj akin kinmultarouaj, kikouaj vino tein tayij itech templo kampa kinueyichiuaj inindioses’.
9 ‘Sayoj ke nejua nikinixpoloj amorreos para namechpaleuis.
Yejuan tel uejkapantijkej katkaj kemej cedrojkoujmej uan tel takuaujkej kemej auakoujmej;
niktamij inintakilo uan ininnaluayo.
10 Nejua namechkixtij de Egipto
uan nikchiuak xinentinemikan 40 xiujmej kampa tauaktok
para namokuiliskiaj inintal amorreos.
11 Seki namookichpipiluan nikinixtalij kemej tanauatianij,*
uan seki namotelpochuan nikinixtalij kemej nazareos.*
Israelitas, namejuan nankimatij ke melauj nejin’. Jehová kijtoua nejin.
12 ‘Sayoj ke akin katkaj nazareos nankintayiltiayaj vino
uan tanauatianij nankiniluiayaj: “Amo teyi xikijtojtokan”.
13 Namechpechis kampa nanyetokej,
ijkon kemej se carreta tein kimama trigo uan kipechijtiuj nochi.
14 Akin kuali tsikuini amo kipias kani cholos,
akin chikauak, tamis ichikaualis
uan nion se soldado makisas.
15 Akin kitamota flechas amo taxikos uan kisteuas,
akin kuali tsikuini amo uelis cholos
uan akin youi itech caballo amo makisas.
16 Hasta soldado akin okachi yolchikauak
cholojteuas xipetstik* nejon tonal’. Jehová kiyekijtoua nejin”.
3 “Israelitas, xikakikan tein Jehová kijtoj ke namechpanos nanochin akin namechkixtij de Egipto:
2 ‘Maski yetokej oksekin itech taltikpak, sayoj namechijitak* namejuan.
Yejua ika namechtatsakuiltis porin nankichiuanij miak taman tein amo kuali.
3 ¿Nankinemiliaj ke omen sennentinemiskej komo amo ijkon motenkaujkej?
4 Ne koujtaj se león amo nanalka komo amo kipia tein kikuati.
Se ueyi león amo nalsosolkatos desde kampa kochi komo amo teyi kikitskiani.
5 Amo akin kikitskis se totot komo amo kitalilia se trampa.
Se trampa amo moajokui komo amo teyi uetsi.
6 Keman kipitsaj kuaomit itech se ueyi xolal, nochin uiuiyokaj.*
Keman panoua teisa tein amo kuali itech se ueyi xolal, Jehová kichiua maj pano.
8 Keman se león nanalka nochin mouij.
Keman toUeyi Teko Jehová tajtoua, nochin tanauatianij kitematiltiaj tein kijtoua’.
9 ‘Xiktematiltikan nejin itech uejueyi kalmej kampa mopaleuiaj ompa Asdod
uan Egipto.
Xikijtokan: “Ximosentilikan itech tepemej tein yetokej Samaria.
Xikitakan keniuj takuejmolchiuaj ompa
uan keniuj takajkayauaj para tachtekiskej.
10 Yejuan amo kimatij kichiuaskej tein kuali.
Kisentilijtokej miak taman itech kalmej kampa mopaleuiaj, porin kinteuiaj oksekin uan kinkuiliaj tein kipiaj”. Jehová kiyekijtoua nejin’.
11 Yejua ika toUeyi Teko Jehová kijtoua nejin:
‘Akin namechtauelitaj kiyoualoskej altepet,
namechkuiliskej namochikaualis,
uan tamitakixtiskej itech uejueyi kalmej kampa namopaleuiaj’.
12 Yejua nejin tein kijtoua Jehová:
‘Ompa Samaria, israelitas motaliaj itech kualtsitsin camas uan kuajkuali bancas.*
Tel amo miakej momakixtiskej.
Panos kemej ijkuak se ichkatajpixkej ueli kitenkuilia se león sayoj imetsuan se ichkat* oso inakas’.
13 ToUeyi Teko Jehová, Dios akin kinixyekana iangeluan kiyekijtoua nejin: ‘Xikakikan uan xikinnejmachtikan ikoneuan Jacob’.
14 ‘Porin kemej israelitas miakpa nechixnamikkej, itech tonal keman nikintatsakuiltis,
no nikinixpolos altares tein yetokej Betel.
Nikpostekis cuernos tein kipiaj altares uan uetsiskej talpan.
15 Nejua nikinxitinis kalmej tein nankikuij keman taseseya uan no tein nankikuij keman taxiujtata’.
‘Kinuejueloskej kalmej tein kinkualtsintilijkej ika inintenomiyo elefantes
uan uejueyi* kalmej tamiskej’. Jehová kiyekijtoua nejin”.
4 “Xikakikan nejin, siuamej akin nanemij itech tepet tein yetok Samaria,
namejuan akin nantamatij kemej kuakuejmej de Basán,
akin nankintachtekiaj uan nankintajyouiltiaj pobres,
uan nankiniluiaj namotakauan:* ‘¡Xitechualkuilikan tein titayiskej!’.
2 Yejua nejin tein kiyekijtoj toUeyi Teko Jehová akin senkis chipauak:
‘“¡Xikitakan! Ejkos tonal keman namechpiloskej kemej kipilouaj nakat
uan akin mokauaskej kinpiloskej ika tepos tein ika kinkitskiaj pescados.
3 Namejuan namechkixtiskej itech tepamit kampa takoyontos,
uan namechkauatiuij hasta Harmón”. Jehová kiyekijtoua nejin’.
4 ‘Xiualakan Betel uan xitaixnamikikan,
xiualakan Guilgal, ¡uan okachiok xitaixnamikikan!
Kualkampa, xikualkuikan tein nankitemaktiaj
uan uiptika, xikualkuikan namodiezmo.*
5 Xikchichinouilikan Dios pantsin tein kipia levadura para nankitasojkamatiliskej.
¡Chikauak xikijtojtinemikan nochi tein nankitayokoliaj!
Porin namejuan israelitas, nankiteluelitaj nankichiuaskej nejon’. ToUeyi Teko Jehová kiyekijtoua nejin.
6 ‘Nejua nikchiuak ximayantokan itech nochi xolalmej,
uan nikchiuak maj amo onka takual itech nochin kalmej,
sayoj ke namejuan amo namoyolpatakej’. Jehová kiyekijtoua nejin.
7 ‘No nikchiuak maj amo kioui eyi metsti achto ke nankitekiskiaj tatok.
Nikchiuak maj kioui itech se ueyi xolal, sayoj ke itech okse amo.
Kiouia itech se cacho tal,
sayoj ke kampa amo kiouia tauakia.
8 Akin nemij itech ome oso eyi uejueyi xolalmej uiuixkatiayaj itech okse ueyi xolal para tayiskej at
uan amo amikseuiaj,
sayoj ke namejuan amo namoyolpatakej’. Jehová kiyekijtoua nejin.
9 ‘Nikchiuak maj chikauak tonalejeka uan maj tachauisyoua.
Namejuan okachiok nankitokkej uvas uan okachiok namotatojtokijkej,
sayoj ke chapolimej kitamimakuajkej higojkouit uan olivojkouit,
uan maski ijkon, amo namoyolpatakej’. Jehová kiyekijtoua nejin.
10 ‘Nikchiuak maj namechkui se ueyi kokolis* kemej tein kinkuik ompa Egipto.
Nikinmiktij namotelpochuan ika espada,* namechkuilij namocaballos
uan eliuis tatsojyayak kampa nanyetoyaj.
Maski ijkon, namejuan amo namoyolpatakej’. Jehová kiyekijtoua nejin.
11 ‘Nitatamij itech namotal
ijkon kemej nitatamij ompa Sodoma uan Gomorra.
Akin namomakixtijkej nantamatij kemej se kouit tein kikixtiaj den tit,*
sayoj ke amo namoyolpatakej’. Jehová kiyekijtoua nejin.
12 ‘Yejua ika israelitas, oksepa namechtatsakuiltiti.
Xikchiuakan tein monekis para timoitaskej
porin oksepa namechtatsakuiltiti’.
13 Porin Dios kinchijchiuak tepemej uan ejekat.
Yejua kiluia takat tein kinemilia,
kichiua maj tatayouayantia keman tanestok,
yejua nentinemi ininkuapan tepemej.
Yejua monotsa Jehová, Dios akin kinixyekana iangeluan”.
5 “Israelitas, xikakikan tein namechpanoti. Nejin tein namechiluiti, chijchiujtok kemej se canción tein cantarouaj keman aksa* momikilia:
2 ‘Israel kemej yeskia se ichpoch akin uetsik.
Amo ueliok moketsa.
Nochin kikaujkej.
Amo akin kiajokui’.
3 ”Yejua nejin tein kijtoua toUeyi Teko Jehová:
‘Mil akin kisaj de se ueyi xolal para tateuitiuij sayoj makisaskej cien
uan kampa kisaj cien sayoj makisaskej majtakti. Ijkon kinpanos israelitas’.
4 ”Yejua nejin tein Jehová kiniluia israelitas:
‘Xinechtemokan uan nankisentokaskej nanyoltoskej.
5 Amo xiakan* Betel,
amo xiakan Guilgal nion xinalpanokan hasta Beer-Seba.
Porin xikyekmatikan ke akin nemij Guilgal kinuikaskej temako
uan Betel ixpoliuis.
6 Xiktemokan Jehová uan nankisentokaskej nanyoltoskej.
Ijkon yejua amo namechixpolos namejuan nanikoneuan José, ijkon kemej se tit* tatamia
uan maj amo kitikuilti Betel hasta maj tatami.
7 Namejuan nakintajyouiltiaj akin monekiskia nankinpaleuiskej
porin amo nankinekij nankichiuaskej tein kuali yetok.
8 Akin kichijchiuak oloch sitalimej tein moixmatij kemej Kimá* uan Kesil,*
akin kichiua maj tatanesi keman tayouayanijtik,
akin kichiua maj tatayouayantia keman tonayan,
akin kisentilia at tein onkak itech mar
para kichiuas maj kioui itech taltikpak,
yejua monotsa Jehová.
9 Yejua kichiuas maj sepasan kinixpolokan akin chikaujkej,
uan ijkon kinixpolos uejueyi kalmej kampa mopaleuiaj.
10 Namejuan nankintauelitaj jueces akin kinextiaj ikalakyan ueyi xolal akoni kichiujtok tein amo kuali,
uan no nankintauelitaj akin amo takajkayauaj.
11 Namejuan nankintaxtaualtiaj akin pobres para nankinmakaskej kani tatokaskej
uan namokauiliaj inintatok.
Yejua ika amo nankisentokaskej nanemiskej itech kalmej tein nankinchijchiujkej ika tet tein kualtsin tatejtek,
uan maski nankitoktoskej kuajkuali uvas amo nantayiskej vino.
12 Nikitani keniuj tel miakpa nantaixnamikij
uan keniuj nanteltajtakolchiuaj:
nankinkuejmolouaj akin amo teyi kichiujtokej,
namokauaj maj namechtaxtauikan para amo teyi nankijtoskej
uan amo nankipaleuiaj akin pobre ikalakyan ueyi xolal kemej kijtoua tanauatil.
13 Yejua ika, itech nejon tonalmej akin yektanemiliaj amo teyi kijtoskej,
porin ijkuak nantajyouijtoskej.
14 Xikchiuakan tein kuali uan amo tein amo kuali
para nankisentokaskej nanyoltoskej.
Ijkon Jehová, Dios akin kinixyekana iangeluan yetos namouan,
ijkon kemej nankijtouaj ke namouan yetok.
15 Xikixtopeuakan tein amo kuali uan xikchiuakan tein kuali ika nochi namoyolo;
xikitakan maj mochiua tein kuali yetok ikalakyan ueyi xolal.
Ijkon Jehová, Dios akin kinixyekana iangeluan
xa kiniknelis ikoneuan José akin mokauaskejok’.
16 ”Yejua ika, yejua nejin tein kijtoua Jehová, Dios akin kinixyekana iangeluan, Jehová kijtoua:
‘Itech nochin plazas tayokolchokaskej
uan itech nochin ojmej kijtoskej: “¡Titeikneltijkej!”.
Kinnotsaskej akin tatokaj para maj motayokoltikan
uan kinnotsaskej akin kintaxtauiaj para maj chokakan’.
17 ‘Itech nochin talmej kampa toktos uvas tayokolchokaskej,
porin nejua nipanos itech namotal para namechtatsakuiltis’. Jehová kijtoua nejin.
18 ‘¡Teikneltijkej akin kitelnekij maj ejkoya tonal tein Jehová kiixtalij!
¿Toni nankichiaj maj pano itech tonal tein Jehová kiixtalij?
Nejon tonal tatayouayantias uan amo tatanestos.
19 Namechpanos kemej ijkuak se takat kicholuia se león uan monamikilia se oso,
uan keman kalaki ichan uan momatalia itech tepamit, kitipinia se kouat.
20 Itech tonal tein Jehová kiixtalij, tatayouayantias uan amo tatanestos.
Uan amo teyi moitas.
21 Nechkualantia iluimej tein nankichiuaj
uan amo nikajuiyakmati tein nanechmaktiliaj keman namosentiliaj para nanechueyichiuaskej.
22 Maski nanechchichinouiliskej tapialmej uan nanechmaktiliskej okseki taman,
nejon amo nechyolpaktis.
Uan amo nikselis tapialmej tojtomaujkej tein nankitemaktiskej para tisentakuaskej.*
23 Amo xinechkuejsokan ika namocanciones
uan amo nikneki nikakis namotatsotson.
24 Maj nochipa mochiua tein kuali yetok kemej yeskia at tein nochipa motalojtok
uan amo keman uaki.
25 Israelitas, itech 40 xiujmej tein nanentinemiaj itech tal kampa tauaktok,
amo nanechmaktilijkej tapialmej nion okseki taman.
26 Axkan monekis nankiuikaskej namotekiuaj Sakut uan Keván,*
nejon tiotsitsin* tein namochijchiuilijkej para nankiueyichiuaskej se sitalin.
27 Uan nejua nikchiuas maj namechuikakan temako, uejka de Damasco’.
Yejua nejin tein kijtoua akin monotsa Jehová, Dios akin kinixyekana iangeluan”.
6 “¡Teikneltijkej akin nemij Sion akin sayoj inintech takuaujtamatij,
uan akin nemij itech tepet tein yetok Samaria akin kinemiliaj ke amo teyi kinpanos,
ueyichiuanimej akin nemij itech altepet tein motelixmati,
akin israelitas kinitatij!
2 Xinalpanokan hasta Calné uan xikitakan.
Uan de ompa xiakan hasta ueyi xolal Hamat,
uan xitemokan hasta ueyi xolal Gat tein poui Filistea.
¿Okachi kuali nemij ompa ke nikan Israel uan Judá?
¿Okachi ueyi inintal ke tein namejuan nankipiaj?
3 Amo namechtekipachoua tein amo kuali tein namechpanoti
uan nankichiuaj maj kampa yeski moteuikan.
4 Namotekaj itech camas tein kinkualtsintilijkej ika inintenomiyo elefantes uan namoseuiaj itech kuajkuali bancas
uan nankikuaj ichkaueuetkej* uan kuakuejkonemej tein tojtomaujkej.
5 Nankitsotsonaj arpa uan nankichijchiuaj canciones,
uan ijkon kemej David, nankichijchiuaj tein ika nantatsotsonaskej.
6 Nantayij vino itech uejueyi kaxit
uan namotaliliaj kuajkuali aceites.
Sayoj ke amo namechtekipachoua maj ikoneuan José tajyouikan.
7 Yejua ika, keman nochin kinuikaskej temako, achto namejuan namechkuiteuaskej,
uan amo iluitiskejok akin moseuiaj itech kuajkuali bancas.
8 Yejua nejin tein kijtoua Jehová, Dios akin kinixyekana iangeluan: ‘ToUeyi Teko Jehová kiyekijtoua nejin itokaykopa:
“Nechkualantia maj Jacob moueyimati,
nion nikneki nikinitas uejueyi kalmej kampa mopaleuiaj,
uan niktemaktis ueyi xolal uan nochi tein ompa onkak.
9 ”’”Uan komo mokauaj majtakti takamej itech se kali, yejuan no mikiskej. 10 Itío* semej nejon takamej kinkuikiuj uan kinchichinos sejse. Kikalankixtis ininomiyo uan kitajtanis* akin yetos kalijtik: ‘¿Yetokok aksa* mouan?’. Yejua kinankilis: ‘¡Amo akinok!’. Uan tetío kiluis: ‘¡Amo teyi xikijto! Amo xiktokayti Jehová porin axkan amo ueliok’”.
11 Porin Jehová tanauatia nejin,
uan yejua kiuetsiltis ueyi kali hasta maj sayoj mokaua tet
uan kitamixitinis kali tein tsikitsin.
12 Caballos amo tsikuinij kampa tepejxiyoj,
uan amo akin kinuika kuakuejmej ompa para tayuntajuis.
Namejuan amo nankichiuaj tein kuali yetok,
yejua ika nochin tajyouiaj.
13 Namechyolpaktia tein amo nankipiaj
uan nankijtouaj: “Titataninij porin tichikaujkej”.
14 Yejua ika israelitas, namechtitanilis akin nemij itech okse altepet para maj namechteuitij,
uan namechtajyouiltiskej desde Lebó-Hamat* hasta atauit* de Arabá’. Yejua nejin tein kijtoua Jehová, Dios akin kinixyekana iangeluan”.
7 Yejua nejin tein toUeyi Teko Jehová nechnextilij. Nikitak ke yejua kintitanik miakej chapolimej keman peuak moskaltia tatok. Nejin kitokkaj keman taseseyaya* uan keman ipa kitekkajya sakat para itapialuan tekiuaj. 2 Keman chapolimej kitamikuajkej xiuit tein onkaya itech altepet, nikijtoj: “¡NoUeyi Teko Jehová, nimitstataujtia xikintapojpolui! ¡Jacob amo taxikos!* ¡Tel amo chikauak!”.
3 Yejua ika Jehová kiyeknemilij tein yaya kichiuati, uan Jehová kijtoj: “Amo mochiuas nejon”.
4 Yejua nejin tein toUeyi Teko Jehová nechnextilij. Nikitak ke toUeyi Teko Jehová kititanik se tit* para tetatsakuiltis. Nejon tit kitamiuatsak mar uan kitamichichinoj se cacho de nejon tal. 5 Uan nikijtoj: “NoUeyi Teko Jehová, nimitstataujtia xiktsakuili nejon. ¡Jacob amo taxikos!* ¡Tel amo chikauak!”.
6 Yejua ika Jehová kiyeknemilij tein yaya kichiuati, uan toUeyi Teko Jehová kijtoj: “Amo no mochiuas nejon”.
7 Yejua nejin tein nechnextilij. Nikitak ke Jehová ijkatoya inakastan se tepamit tein kichijchiujkaj ika se plomada uan maaktoya se plomada. 8 Uan Jehová nechtajtanij: “¿Toni tikita Amós?”. Nejua niknankilij: “Nikita se plomada”. Uan Jehová kijtoj: “Nikintalilijtok nokoneuan israelitas se plomada. Amo nikintapojpoluisok. 9 Kampa tachijchiujkaj para taueyichiuaskej ikoneuan Isaac tafierojkan yeski, uan inintemplos ikoneuan Israel ixpoliuiskej. Uan nikinixpolos ika espada* nochin ichankauan Jeroboán”.
10 Amasías akin katka tiopixkat ompa Betel, tatitanik maj kimatiltitij Jeroboán akin tekiuajtia Israel nejin: “Amós kinemilijtok keniuj mitsixnamikis nikan Israel. Uan akin nikan nemij kinyolajxitijya nochi tein kijtoua. 11 Porin yejua nejin tein kijtoua Amós: ‘Xikyekmatikan ke Jeroboán kimiktiskej ika espada uan israelitas kinuikaskej temako’”.
12 Uan Amasías kiluij Amós: “Xicholo uan xiouj Judá uan ompa ximotekipano. Ompa uelis tiktematiltis tein Dios mitsitaltia. 13 Sayoj ke amo teyi xiktematiltiok ompa Betel, porin tekiuaj ompa taueyichiuati, uan mochiuak kemej se templo kampa nochin mosentiliaj”.
14 Uan Amós kiluij Amasías: “Nejua amo katka nitanauatijkej* nion nopaj katka se tanauatijkej. Nejua nikinyekpiaya ichkamej* uan nikinkoyoniaya higos. 15 Sayoj ke Jehová nechnotsak keman nikinyekpixtoya ichkamej, uan Jehová nechiluij: ‘Xikinmatiltiti israelitas tein kinpanos’. 16 Axkan xikaki tein Jehová kijtoua: ‘Tejua tinechiluia: “Amo xiktematilti ke ikoneuan Israel kinpanoti tein amo kuali, uan amo xikijtojtinemi ke kintatsakuiltitij ikoneuan Isaac”. 17 Axkan xikaki tein kijtoua Jehová: “Mosiuauj yeski kemej se siuat akin monamakatinemi itech ueyi xolal, uan nochin mokoneuan kinmiktiskej ika espada. Kitamachiuaskej motal uan moxejxelouiliskej, uan tejua timikis itech se tal tein amo chipauak, uan israelitas kinuikaskej temako”’”.
8 Yejua nejin tein toUeyi Teko Jehová nechnextilij. Nikitak se chikiuit tein kipiaya takilot tein chikauakya.* 2 Uan yejua nechiluij: “¿Toni tikita Amós?”. Nejua niknankilij: “Se chikiuit tein kipia takilot tein chikauakya”. Uan Jehová nechiluij: “Nokoneuan israelitas tamitij. Amo nikintapojpoluisok. 3 ‘Nejon tonal itech templo amo akin cantaros, ta nochin chokatoskej. Kampa yeski tentoskej mikemej, yejua ika amo akin kakistis’. Yejua nejin tein kiyekijtoua toUeyi Teko Jehová.
4 Xikakikan nejin, namejuan akin nankintajyouiltiaj pobres
uan fiero nankinchiuaj akin yolyemankej itech namoaltepeuj,
5 namejuan akin nankijtouaj: ‘¿Kemanian tamis selik metsti para uelis timonamakiliskej totatok?
¡Majkan tamiya tonal sábado!
Ijkon uelis titatamachiuaskej ika se chikiuit tein tsikitsin,
tiknamakaskej okachi patiyoj
uan amo ajsitok titatamachiuaskej para titachtekiskej.
6 Ijkon uelis tikouaskej ika plata akin amo teyi kipia
uan tikouaskej ika ome tekak akin pobre,
uan tiknamakaskej tein tikixtiliaj tatok keman tikchipauaj’.
7 Jehová, akin Jacob ika moueyitalia, kiyekijtoua nejin:
‘Amo keman nikelkauas nochi tein kichiujkej.
8 Yejua ika tal kemej yeskia uiuiyokas*
uan nochin akin ompa nemij tel tayokoxtoskej.
Tein mochiuas yeski kemej ueyiat Nilo ompa Egipto keman moajkotatamota’.
9 ToUeyi Teko Jehová kiyekijtoua nejin:
‘Nejon tonal nikchiuas maj tonaltsin pankalaki nepantaj,
uan keman kualtsin tonatos, nikchiuas maj tatayouayantia.
10 Amo naniluitiskejok, ta nikchiuas xiteltayokoyakan,
uan no nikchiuas sayoj xikpiakan canciones tein cantarouaj keman aksa* momikilia.
Nikchiuas ximotajkotalilikan tasal tein teajuayotia* uan ximokuaximakan.*
Nikchiuas xiteltayokoyakan kemej yeskia momikiliskia namookichpil tein ipa setsin,
uan keman tamis nejon tonal, nanteltajyouijtoskej’.
11 ToUeyi Teko Jehová kiyekijtoua nejin:
‘¡Xikita! Ejkotij tonalmej keman nikchiuas maj nochin mayantokan uan maj amiktokan itech altepet;
amo porin kinekiskej taxkaltsin* nion at,
ta porin kinekiskej kikakiskej tein Jehová kijtoua.
12 Uiuixkatinemiskej desde se mar hasta okse
uan desde parajkokopa* hasta kampa ualkisa tonaltsin.
Sennenemiskej porin kitemojtinemiskej tein Jehová kijtoua, sayoj ke amo kanaj kiajsiskej.
13 Nejon tonal, ichpochmej akin kuakualtsitsin
uan telpochmej ixtayouaskej porin amikiskej.
14 Akin kiyekijtouaj teisa inintokaykopa dioses de Samaria,
itokaykopa tiotsin* tein kiueyichiuaj ompa Dan
uan inintokaykopa tiotsitsin de Beer-Seba,
uetsiskej uan amo keman moketsaskej’”.
9 Nikitak ke Jehová ijkatoya kampa yetok altar. Yejua kijtoj: “Xikinkuauiteki kalikximej para maj mouiuixo hasta tatsintan. Xikinkuakotona, uan nejua nikinmiktis ika espada* akin mokauaskej. Amo akin uelis cholos.
2 Komo tachkuaj uan motatitij* taltampa,
ompa nikinkixtitiuj;
komo pankisaj iluikak,
ompa nikintemouis.
3 Komo motatitij ikuapan tepet Carmelo,
ompa nikintemotiuj uan nikinkepas.
Komo motatitij hasta taijtik den mar,
ompa niknauatis kouat maj kintipini.
4 Komo akin kintauelitaj kinuikaj temako,
nitanauatis maj ompa kinmiktikan ika espada;
nikintatsakuiltis uan amo nikintatiochiuis.
5 Porin toUeyi Teko Jehová, akin kinixyekana iangeluan kitalia imay itech tal,
uan tal motsetseloua; nochin akin ompa nemij tel tayokoxtoskej.
Tein mochiuas itech nejon tal
yeski kemej ueyiat Nilo ompa Egipto keman moajkotatamota.
6 ‘Akin mochijchiuilia se escalera iluikak
uan kikuachantia taltikpak,
akin kisentilia at tein onkak itech mar
para kichiuas maj kioui itech taltikpak,
yejua monotsa Jehová’.
7 Jehová kijtoua nejin: ‘Israelitas, nejua namechita kemej yeskia nanpouiskiaj Etiopía’.*
‘Nejua nikinkixtij israelitas de Egipto,
nikinkixtij filisteos de Creta uan akin nemiaj Siria nikinkixtij de Quir’.
8 Jehová kiyekijtoua nejin: ‘¡Xikitakan! ToUeyi Teko Jehová kiitstok nochi tajtakolmej tein kichiuaj itech nejin ueyi altepet,
uan yejua kinixpolos uan amo akin mokauas itech taltikpak.
Sayoj ke amo nikintamiixpolos ikoneuan Jacob’.
9 ‘Porin nitanauatis maj israelitas kinmoyauakan*
itech nochin altepemej,
nikintsetselos kemej se kitsetseloua cedazo
uan nion se tetsin uetsi talpan.
10 Kinmiktiskej ika espada nochin nokoneuan akin tajtakolchiuaj,
akin kijtouaj “Amo techpanos nion teyi tein amo kuali”’.
11 ‘Nejon tonal niketsas ikaltsin David tein uetsik.
Nitayektalis kampa tatapouik
uan nikyekchijchiuas tein xitinik.
Uan mokauas kemej ne uejkauj yetoya.
12 Ijkon uelis kintalkuiliskej edomitas akin mokauajok
uan kinixyekanaskej akin nemij itech nochin altepemej akin kinixmatij ika notokay’. Nejin kiyekijtoua Jehová, akin kichiuati nochi nejin.
13 Jehová kiyekijtoua nejin: ‘¡Xikitakan!
Ejkotij tonalmej keman achto ke kitamitekiskej tatok monekis tameuaskejya,
uan achto ke kitamimetspataskej uvas monekis tatokaskejya.
Itech tepemej kemej yeskia chalantos vino tein tsopek
uan tel onkas itech nochi lomas.
14 Oksepa nikinualkuis nokoneuan israelitas akin kinuikaskej temako
uan yejuan kiyekchijchiuaskej uejueyi xolalmej kampa tauejueliujtos uan ompa nemiskej.
Kitokaskej uvas uan tayiskej vino,
tatojtokaskej uan kikuaskej tein mochiuas’.
15 ‘Nikintalis itech inintal
uan amo keman oksepa kinkixtiskej
de nejon tal tein nikinmakak’. MoDios Jehová kijtoua nejin”.
Tokayit tein kijtosneki ‘se tamamal’ oso ‘akin tamama’.
Oso “borregos”.
Oso “tekol”.
Nejin tamati kemej se machete tein ojkan tenej.
Itech hebreo, “tenex”.
Oso “tekol”.
Itech hebreo, “juez”.
Oso “tein tamachtia”.
Oso “tatejteliksaj”.
Oso “yolnejmachmej”.
Xikonita tanauatijkej.
Xikonita nazareo.
Oso “xitatstik”.
Itech hebreo, “namechixmatik”.
Oso “kuekuetakaj”, “kuekuechkaj”.
Xikonita tanauatijkej.
Oso “amo kitematiltijtoya”.
Oso “bancas tein kinchijchiujkej Damasco”.
Oso “borrego”.
Oso xa “miak”.
Oso “namotekouan”.
Xikonita diezmo.
Oso “kokoxkayot”.
Nejin tamati kemej se machete tein ojkan tenej.
Oso “tekol”.
Oso “akin”, “akaj”.
Itech hebreo, “Amo xiktemokan”.
Oso “tekol”.
Nejin sitalimej xa yejua tein kinixmatij kemej Pléyades.
Oso “Orión”.
Xa nejin ome dioses yejua planeta Saturno tein kiueyichiuayaj kemej se dios.
Oso “tatadiosmej”.
Oso “borregos”.
Itech hebreo, “Iikniuj itat”.
Oso “kitajtoltis”.
Oso “akin”, “akaj”.
Oso “kampa peua Hamat”.
Oso “ojpanat”.
Nejin kitokayaj enero uan febrero.
Itech hebreo, “amo moketsas”.
Oso “tekol”.
Itech hebreo, “amo moketsas”.
Nejin tamati kemej se machete tein ojkan tenej.
Xikonita tanauatijkej.
Oso “borregos”.
Nejin xa katka higos uan dátiles, tein chikauaya keman taxiujtata.
Oso “kuekuetakas”, “kuekuechkas”.
Oso “akin”, “akaj”.
Xikonita tasal tein teajuayotia.
Oso “ximokuaxijximakan”.
Itech hebreo, “pantsin”.
Oso “norte”. Komo se moixkepa kampa ualkisa tonaltsin, nejin mokaua se iopochmakopa.
Oso “tatadios”.
Nejin tamati kemej se machete tein ojkan tenej.
Oso “mocholtitij”.
Oso “Cus”.
Oso “kinxinikan”.