ABDÍAS
1 ToUeyi Teko Jehová kiitaltij Abdías* tein kipanoti Edom.
Yejua nejin tein kijtoua Abdías:
“Tikakkej ke Jehová kijtoj se taman,
uan kititankej aksa* maj kiniluiti akin nemij itech altepemej nejin:
‘Xiualakan. Maj timosenkuikan para tikteuitiuij Edom’”.
2 “¡Xikita! Nikchiuak maj itech okseki altepemej mitsitakan ke amo teyi tichiujkej;
senkis mitsixtopeuaj.
3 Timokajkayaujtok porin timoueyimati,
tejua tinemi tepejxitampa kampa amo teyi mitspanoua,
tinemi ininkuapan tepemej uan timoyoliluia:
‘Amo akin uelis nechtemoltis’.
4 Maski timochantiskia* tel uejkapan kemej se águila
oso tikchijchiuaskia motapajsol kampa yetokej sitalimej,
nejua nimitstemoltiskia de ompa”. Jehová kiyekijtoua nejin.
5 “Komo mitstachtekiskiaj de youak,
sayoj kiuikaskiaj tein kinekiskiaj.
Oso komo yaskiaj motalpan akin kitekij uvas,
ipa kikauaskiaj seki.
¡Sayoj ke tejua senkis mitsixpoloskej!
6 ¡Kitatemolijkej Esaú!
¡Kiajxilijkej nochi tein patiyoj tein kitatijtoya* uan kikuilijkej!
7 Akin iniuan timopaleuiaya mitskixtijkej de inintal.
Yejuan mitskajkayaujkej.
Akin kuali mouikaj mouan mitstankej.
Akin mouan takuaj mitstaliliskej se trampa,
sayoj ke amo tikitas”.
8 Jehová kiyekijtoua nejin:
“Nejon tonal nikintamis tamatinij de Edom
uan akin kuali taixejekouaj uan yetokej itech tepemej kampa nemij ikoneuan Esaú.
9 Uan tejua Temán, mosoldados mojkamikiskej
porin nochin ikoneuan Esaú kinmiktiskej.
10 Kemej tikchiuilij tein amo kuali mokniuj Jacob,
timopinaujtis
uan tiixpoliuis uan amo keman tinesisok.
11 Keman ualajkej akin kitauelitaj* mokniuj uan kinkuiteujkej isoldados,
uan keman kalakkej Jerusalén uan kitatamotkej tetsitsin* para moxejxelouiliskej nochi,
tejua amo tikpaleuij.
Nejon tonal tejua tikchiuak kemej akin kitauelitaj.
12 ¿Keyej timouelitak keman mokniuj kipanok tein amo kuali?
¿Keyej tiyolpakik keman kinmiktijkej akin nemiaj Judá?
¿Keyej tikinpijpinaujtij keman tajyouijtoyaj?
13 ¿Keyej tikalakik kampa nemij nokoneuan keman kinpanotoya tein amo kuali?
¿Keyej tiyolpakik keman tajyouijtoya mokniuj
uan nejon tonal tikuilij nochi tein kipiaya?
14 ¿Keyej tikinchiato itech ojti para tikinmiktis akin cholojtoyaj
uan tikintemaktij akin momakixtijkaj keman tajyouijtoyaj?
15 Porin motokijtok tonal keman Jehová kintatsakuiltis akin nemij itech nochin altepemej.
Mitschiuaskej ijkon kemej tikinchiuak.
16 Ijkon kemej namejuan nantayikej vino itech tepet tein nimoxelouilij,
akin nemij itech nochin altepemej no nochipa tayitoskej.
Tayiskej hasta aixuiskej,
uan ixpoliuiskej kemej yeskia amo keman nemiskiaj.
17 Sayoj ke akin momakixtis yetos itech tepet Sion,
uan nejon tepet yeski iaxka Dios;
ikoneuan Jacob oksepa kikuiskej tein kinkuilijkaj.
18 Ikoneuan Jacob yeskij kemej se tit;*
ikoneuan José yeskij kemej se tit tein mokeketsa.
Sayoj ke ikoneuan Esaú yeskij kemej sakat tein uakik.
Yejuan kintikuiltiskej uan tamiskej;
nion se ikoneuj Esaú momakixtis
porin ijkon kijtoj Jehová.
19 Mokuiliskej tal tein moixmati kemej Négueb uan tepemej kampa nemij ikoneuan Esaú.
No takuiskej kampa moixmati kemej Sefelá uan inintal filisteos,
ital Efraín uan Samaria,
uan Benjamín takuis Galaad.
20 Israelitas, akin kinkixtijkej de kampa mopaleuiayaj,
ininaxka yeski inintal cananeos hasta Sarepta.
Uan akin kinkixtijkej de Jerusalén uan yetoyaj Sefarad, mokuiliskej uejueyi xolalmej tein yetokej Négueb.
21 Akin temakixtiaj pankisaskej itech tepet Sion
para taixyekanaskej itech tepemej kampa nemij ikoneuan Esaú,
uan Jehová taixyekanas kemej tekiuaj”.
Tokayit tein kijtosneki ‘itekitikauj Jehováʼ.
Oso “akin”, “akaj”.
Oso xa “tipataniskia”.
Oso “kicholtijtoya”.
Oso “akin amo israelitas”.
Xikonita tetsitsin tein kitatamotayaj.
Oso “tekol”.