MIQUEAS
1 Jehová kiitaltij Miqueas,* akin kayot Moréset, tein panoskia ompa Samaria uan Jerusalén. Kiluij maj kitematilti nejin keman tekiuanij Jotán, Acaz uan Ezequías taixyekantoyaj ompa Judá:
2 “¡Xikakikan, namejuan akin nanemij itech nochi xolalmej!
Tejua taltikpak uan nochi tein itech nemi, xikakikan.
ToUeyi Teko Jehová kijtoti tein amo kuali tein nankichiujtokej.
Jehová yetok itech itemplo.
3 ¡Xikitakan! Jehová kistok de kampa nemi;
ualpantemos uan tajtaksas* itech tepemej.
4 Tepemej atiaskej imetstampa
kemej cera atia keman kauani.
Uan kampa tamanis* in tal ixtapanis
kemej ijkuak mopantaloua miak at.
5 Nochi nejin panoti porin Jacob taixnamiki,
porin ikoneuan* Israel tajtakolchiuaj.
¿Akoni kichiua maj Jacob taixnamiki?
Samaria.
¿Uan kani kinueyichiua tiotsitsin* Judá?
Ompa Jerusalén.
6 Nikchiuas maj ompa Samaria tauejueliujto,
uan maj ompa kitokakan uvas;
uan tet tein ika chijchiujtoya nikpantamotas hasta kampa tamanis.
Sayoj mokauas kampa kitsinpeualtijkej.
7 Nochin itiotsitsin kintamiskej
uan nochi tein motanilij kichichinoskej.
Nikinixpolos nochin itiotsitsin;
porin kinsentilij keman monamakak para auilnemis,
uan nejon kikuiskej okseko para kintaxtauiskej akin no monamakaj”.
8 Yejua ika nitayokoltsajtsis;
nimokixtilis notekak uan notasal uan ijkon ninentinemis.
Nitsajtsis kemej se koujtajitskuinti;*
nichochokas kemej se avestruz.
9 Porin Samaria kitelkokojkej uan amo pajtisok;
hasta Judá no kimachilijtok.
Nejon ajsikya hasta ikalakyan Jerusalén, kampa nemij nokniuan.
10 “Amo xikteixmatiltikan ompa Gat;
nion xiknemilikan nanchokaskej.
Ximoixkeptinemikan talpan ompa Bet-Afrá.*
11 Akin nanemij Safir, ijkon xiakan maski nanxipetstikej* uan namechpinaujtijkej.
Akin nemij Zaanán amo kistokej.
Namejuan namopaleuiayaj ompa Bet-Ezel, sayoj ke ompa sayoj tayokolchokatoskej.
12 Porin akin nemij Marot kichiayaj tein kuali,
sayoj ke Jehová kiualtitanik tein amo kuali hasta ikalakyan Jerusalén.
13 Akin nanemij Lakís, xiktsikokan carro itech caballos.
Namejuan nankichiujkej maj peua tajtakolchiuakan akin nemij Sion,
porin akin nemij Sion nechixnamikkej kemej ompa Israel.
14 Yejua ika keman yas Moréset-Gat tejua tiktayokolis miak taman.
Akin nemij Aczib kinkajkayaujkej tekiuanij de Israel.
15 Akin nanemij Maresá, nikchiuasok maj namechajsiti akin tetakuilia.
Tein kiueyitalia Israel ajsis hasta Adulam.
16 Xiktekikan namotson uan ximokuaximakan* porin namokoneuan akin nankintasojtaj tajyouitij.
Xikuaxipetstikej kemej se tsojpilot,
porin namechkuilijkej namokoneuan para kinuikaskej temako”.
2 “¡Teikneltijkej akin itech inincama
kinenemilijtokej keniuj kichiuaskej tein amo kuali!
Keman tanesi kichiuaj tein kiixtalijkej,
porin ueli kichiuaj.
2 Keman kinekij se tal tekuiliaj;
keman kiuelitaj se kali mokauiliaj;
kikajkayauaj se takat para kikuiliskej ichan
uan tein kikauilijteujkej itatuan.
3 Yejua ika Jehová kijtoua nejin:
‘Xikitakan, niknemilijtok keniuj namechtajyouiltis uan amo uelis namopaleuiskej.
Amo oksepa namoueyimatiskej, porin nejon tonalmej nantajyouijtoskej.
4 Nejon tonal, kampa yeski namechtenkuitoskej
uan motayokoltiskej keman kiitaskej tein namechpanotos.
Kijtoskej: “¡Techtamijkej!
Techkuilijkej tein toaxka katka uan kinmakakej oksekin.
Kinmakakej totaluan akin amo kitekitiliaj Dios”.
5 Yejua ika, amo akin kitamachiuas tal,
amo akin kinxejxelouilis akin iaxkauan Jehová.
6 Yejuan kijtojtinemij “¡Amo xikteixmatiltikan nion teyi!”.
“Amo moneki se kijtojtinemis nejin.
¡Amo timopinaujtiskej!”.
7 Namejuan ikoneuan Jacob nankijtojtinemij:
“Jehová amo niman kualani.*
Yejua amo kichiuaskia nejin”.
Namejuan nankimatij ke nejua nimotenkaua nikinmakas tein kuali akin nechtakamatij.
8 Sayoj ke axkan, nokoneuan nechixnamikij kemej akin nechtauelitaj.
Namejuan nankikuiliaj ipantaken tein kualtsin akin nankinamikij itech ojti,
porin yejua kinemilia ke amo teyi kipanos.
9 Nankinkixtiaj siuamej de ininchan kampa kualtsin nemij;
uan ininkoneuan nankinkuiliaj nochi tein kuali tein nikinmakani uan amo nankinkepiliajok.
10 Ximoketsakan uan xiakan, porin nikan amo namochanok nion namoaxkaok nejin tal.
Kemej mochiua tein pitsotik, miakej ixpoliuitij uan sekin tajyouitij.
11 Xa se takat kitemojtinemis tein amo tapaleuia, takajkayauas uan namechiluis nejin tein amo melauj:
“Nankipiaskej miak vino uan okseki tayil tein teuintij”.
Komo namechiluiskia nejon, ¡niman nankiitaskiaj kemej se tanauatijkej!*
12 Namejuan ikoneuan Jacob, xikyekmatikan ke nejua namechsentilis nanochin;
kemaj, nikinsentilis ikoneuan Israel akin mokauaskej.
Nikinsentilis uan kualtsin senyetoskej kemej ichkamej* itech se corral,
kemej miak ichkamej tein senyetokej ixtauat;
ompa mokakis keniuj miakej kakistitokej’.
13 Akin tatapoua kinyekantias;
amo teyi kintsakuilisok, panoskej itech puerta uan ompa kisaskej.
Inintekiuaj kinyekantias
uan Jehová yas hasta taixpan”.
3 Nejua nikijtoj: “Namejuan akin nankinixyekanaj ikoneuan Jacob,
uan akin nantaixyekanaj ompa Israel, namechtataujtia xikakikan.
Monekiskia nankimatiskej toni kuali yetok.
2 Sayoj ke namejuan nankiixtopeuaj tein kuali uan nankiteluelitaj tein amo kuali;
nankinxipeuaj nokniuan, nankinkixtiliaj ininnakayo uan sayoj mokaua omit.
3 Satepan ke nankinxipeuaj
no nankikuaj ininnakayo;
nankinpostekiliaj ininomiyouan, nankinkojkotonaj,
kemej nakat uan omit tein kimolontiaj* itech se ueyi komit.
4 Keman kitsajtsiliskej Jehová maj kinpaleui,
yejua amo kinnankilis.
Amo kinpaleuis
porin kitelchiuaj tein amo kuali.
5 Yejua nejin tein Jehová kijtoua ke kinpanoti tanauatianij* akin kinpojpolojtokej nokniuan.
Yejuan kiniluiaj ke kuali nemiskej akin kinmakaj toni kikuaskej
uan kiniluiaj ke kinteuiskej akin amo teyi kinmakaj.
6 ‘Kemej yeskia tayouayan nanyetoskej; Dios amo teyi namechitaltis;
tayouayanijtik nanemiskej, amo nanyeskijok nanadivinos.
Amo teyi kintauilis tanauatianij, kemej ijkuak tonaltsin pankalaki,
uan nochipa youak yeski para yejuan.
7 Akin kijtouaj ke Dios kinitaltia teisa, mopinaujtiskej,
uan adivinos tayokoyaskej porin amo mochiuas tein kichiayaj.
Nochin monekis motenpikiskej,
porin Dios amo kinnankilis’”.
8 Sayoj ke nejua nichikauak porin Jehová nechmaka ichikaualis.
Yejua ika ueli nikchiua tein kuali yetok uan niyolchikauak.
Ijkon ueli nikmatiltia Jacob keniuj taixnamiktok, uan Israel keniuj tajtakolchiujtok.
9 Namejuan akin nankinixyekanaj ikoneuan Jacob,
uan akin nantaixyekanaj ompa Israel, namechtataujtia xikakikan nejin.
Namejuan nion tepitsin nankinekij nankichiuaskej tein kuali yetok uan nankikejkepaj nochi tein melauak.
10 Nantemiktiaj para nankichijchiuaskej Sion uan nankichiuaj tein amo kuali yetok para nankichijchiuaskej Jerusalén.
11 Akin namechixyekanaj kiyektaliaj namokuejmol sayoj komo nankintayokoliaj teisa,
tiopixkamej tamachtiaj sayoj komo nankintaxtauiaj
uan tanauatianij tajtanij tomin para namechiluiskej toni namechpanos satepan.
Maski ijkon, kiyekijtouaj ke Jehová kinpaleuia uan kijtouaj:
“Jehová touan yetok.
Amo teyi techpanos”.
12 Yejua ika, por namotajtakol
Sion kiixpoloskej. Mokauas kemej se tal kampa tayuntajuijkej.
Ompa Jerusalén sayoj tentos tet
uan tepet kampa yetok templo kouijtik yeski.
4 Itech tonalmej keman tantiasya tein mochiujtok,
tepet kampa yetok ichan Jehová
kuali ijkatos uan okachi ueyi yeski ke okseki tepemej
uan okachi uejkapan yetos ke lomas,
uan ompa mosentiliskej miakej akin seseko kayomej.
2 Uan tel miakej yaskej uan kijtoskej:
“Tiouij, maj tipankisakan itech tepet tein iaxka Jehová,
kampa yetok ichan Dios akin Jacob kiueyichiua.
Yejua techmachtis keniuj kineki maj tinemikan,
uan tejuan tinemiskej kemej yejua kineki”.
Porin desde Sion motematiltis tanauatil,*
uan desde Jerusalén motematiltis tein kijtoua Jehová.
3 Dios yeski ininjuez akin nemij itech miak altepemej
uan kiyektalis nochi para maj kuali mouikakan akin ueuejka nemij.
Kiuejueloskej ininespadas* uan ika kichijchiuaskej teposmej tein ika tayuntajuiskej
uan ika ininlanzas* kichijchiuaskej teposmej tein ika tamaximaskej.
Yejuan amo kinteuiskej akin nemij itech okse altepet
nion momachtiskejok keniuj tateuiskej.
4 Sejse motalis* itsintan uvajkouit uan higojkouit tein kitoktos,
uan amo akin kinmoujtis,
porin ijkon kijtoj Jehová akin kinixyekana iangeluan.
5 Porin nochin kiueyichiuaskej inindioses,
sayoj ke tejuan tikueyichiuaskej toDios Jehová nochipaya.
6 Jehová kiyekijtoua nejin:
7 Nikinmakixtis sekin akin koxojnejnentoyaj,
uan akin kinuikakej uejka nikchiuas maj ueyichiuanimej;
uan Jehová kinixyekanas itech tepet Sion
desde axkan uan nochipaya.
8 Uan tejua Jerusalén, ueyi kali kampa kinpanitaj ichkamej,*
tepet kampa yetok Sion,
oksepa tikpias se tekiuaj kemej achto,
kemaj, se tekiuaj akin kinamiki taixyekanas.
9 ¿Keyej chikauak titsajtsitok?
¿Amo tikpia se tekiuaj
oso akin mitsyolmajxitiaya momikilijya?
Tikchiujtok kemej se siuat akin tajyouijtok porin kipiati ikonetsin.
10 Tejua akin tinemi Sion, titeltajyouis
kemej se siuat akin kipiati ikonetsin,
porin amo tietosok itech ueyi xolal uan tinemis kalampa.
Tiajsis hasta Babilonia
uan ompa mitsmakixtiskej;
ompa Jehová mitsmakixtis* para maj amo mitspiakanok akin mitstauelitaj.
11 Uan miakej akin nemij itech tataman altepemej mosentiliskej para mitsteuiskej;
yejuan kijtoskej: ‘Maj kiixpolokan* Sion
uan tiknekij tikitaskej keman mochiuas nejon’.
12 Sayoj ke amo kimatij tein kinemilia Jehová
nion kiajsikamatij tein kiixtalijtok,
porin kinsentilis uan kinuikas kampa kichipauaj trigo.
13 Tejua akin tinemi Sion ximoketsa uan ipan xitajtaksa* trigo;
porin nimitschiuas kemej se kuakouej tein kipia cuernos de tepos
uan iistiuan de cobre,
uan tejua kemej yeskia tikinkuechos akin nemij itech miak xolalmej.
Nochi tein kiichtekkej tikmakas Jehová,
uan tein kipiaj tikmakas toTeko akin taixyekana itech nochi taltikpak”.
5 “Akin nanemij itech ueyi xolal kampa kinteuijtokej,
axkan namotejtektokej;
techyoualojkej.
Ika se takot kiixuijuitekij juez ompa Israel.
2 Uan tejua, Belén Efrata,
maski okachi titsikitsin ke okseki xolalmej* tein pouij Judá,
motech kisas se tekiuaj akin taixyekanas Israel, akin kichiuas tein nikneki.
Yejua tel uejkaujya peuak nemi, desde ne kemanya.
3 Dios kinkauas
hasta ke siuat akin kokoxkayetok kipias ikonetsin.
Okseki iikniuan akin mokauaskejok mokepaskej Israel.
4 Yejua moketsas uan kinyekpias iichkauan* ika chikaualis tein Jehová kimakas,
ika tanauatil tein kimakas toDios Jehová akin itokay semi ueyi.
Uan yejuan amo teyi kinkuejmolos,
porin itech nochi taltikpak kimatiskej ke yejua se ueyi taixyekankej.
5 Uan yejua kichiuas maj yolseujkanemikan.
Komo asirios kalakikij kampa tinemij uan kinxitiniaj uejueyi kalmej kampa timopaleuiaj,
tikinixtaliskej chikome ichkatajpianij, kemaj, chikueyi takamej akin taixyekanaj para maj kinteuikan.
6 Kikuiskej espada* para kinteuiskej asirios
uan ajsiskej hasta italtenoj Nemrod.
Uan tekiuaj techpaleuis para maj asirios amo teyi techchiuilikan
keman kalakikiuij kampa tinemij uan techteuiskej.
7 Uan ikoneuan Jacob akin mokauaskejok
yetoskej itech miak xolalmej.
Yejuan yeskij kemej ajuach tein Jehová kiualtitani,
kemej chikauak kiouit tein uetsi itech xiuit,
tein takamej amo ueli kichiuaj maj uetsi nion kitsakuiliaj.
8 Uan ikoneuan Jacob akin mokauaskejok
yetoskej itech miak xolalmej.
Yejuan yeskij kemej se león tein nemi koujtaj iniuan okseki tapialmej,
kemej se leonkonet tein yetok iniuan ichkamej,
tein panoua, kinkitskia uan kinkokototsa.
Uan amo akin kinpaleuia.
9 Tikintanis akin mitsixnamikiskej;
nochin akin mitstauelitaj ixpoliuiskej”.
10 Jehová kiyekijtoua nejin:
“Nejon tonal, nikintamis mocaballos uan nikintamiuejuelos mocarros.
11 Nikinixpolos uejueyi xolalmej kampa tinemi
uan nikinxitinis uejueyi kalmej kampa timopaleuia.
12 Nikinixpolos naualmej uan nochi tein kichiuaj,
uan amo mokauas nion se akin kikuis magia.
13 Nikinixpolos tiotsitsin* uan tet tein tikejketsak para ika titaueyichiuas,
uan amo timoixpilosok iixpan nion se taman tein tikmachijchiuak.
14 Nikintamotas koujmej tein ika titaueyichiua*
uan nikinixpolos mouejueyi xolaluan.
15 Niknextis noueyi kualanyo keman nikintatsakuiltis
akin amo nechtakamatinij”.
6 Namechtataujtia xikakikan tein Jehová kijtoua.
Ximoketsakan, xiakan kampa yetokej tepemej uan ompa ximotenpaleuikan,
uan maj tepetsitsin namechkakikan.
2 Tepemej uan uejueyi temej kampa tsineujtok taltikpak,
xikakikan tein Jehová kijtoti;
porin Jehová kiixtaliti tein kinnamiki kiseliskej akin iaxkauan;
kijtoti tein amo kuali tein kichiujtok Israel.
3 “Nokoneuan, ¿toni namechchiuilij?
¿Keyej namechyolajxitij?
Xikijtokan tein namechchiuilij.
4 Porin nejua namechkixtij de Egipto,
namechmakixtij para amo xietonijok temako;
nikinixtalij Moisés, Aarón uan Míriam para maj namechixyekanakan.
5 Nokoneuan, namechtataujtia xikelnamikikan tein kinekia Balac akin tekiuajtia Moab
uan tein kinankilij Balaam iokichpil Beor.
Xikelnamikikan tein panok desde Sitim hasta Guilgal,
para xikmatikan ke Jehová kichiua tein kuali yetok”.
6 ¿Toni nikuikilis Jehová keman nikitatiuj?
¿Toni nikuikas keman nimoixpilotiuj iixpan Dios akin yetok ne iluikak?
¿Nikchichinouilis tapialmej
uan kuakuejkonemej tein kipiaj se xiuit?
7 ¿Yolpakis Jehová komo nikmaka tel miak ichkaueuetkej,*
oso tel miak aceite?
¿Nechtapojpoluis komo nikmaktilia nookichpil akin tayekana porin nikixnamikik?
¿Kiixpolos notajtakol komo nikmaktilia nokonetsin?
8 Jehová mitsiluijya toni tein kuali.
Yejua sayoj mitstajtania
xikchiua tein kuali yetok,* nochipa xitetasojta*
uan xiyolyemanik ijkon kemej moDios kineki.
9 Jehová chikauak kinnojnotsa akin nemij itech ueyi xolal.
Akin tamatinij kiueyitaliskej itokay.*
Xikakikan keniuj kakisti takot uan akin kiixtalij maj namechtatsakuiltikan.
10 ¿Yetokok ininchan akin amo yolkualmej nochi tein kiichtekkej?
¿No ompa yetokok chikiuit tein ika takajkayauaj? Dios amo kiuelita nejon.
11 ¿Kuali yetoskia maj amo niyektatamachiua,
maj nikui tataman pesas de tet para nitakajkayauas?
12 Akin tominpiaj itech ueyi xolal nochipa tateuijtokej
uan akin ompa nemij takajkayauaj;
inintenoj sayoj kisa xolopijyot.
13 “Yejua ika nimitstatsakuiltiti,
nikchiuas maj amo akin nemi kampa tietok porin titajtakolchiujtok.
14 Titakuas, sayoj ke amo tiixuis;
nochipa timayantos.
Maski tikixtis tein moaxka, amo kanaj uelis tikpixtos,
uan tein uelis timouikilis, nikinmakas akin mitstauelitaj.
15 Titatokas, sayoj ke amo teyi tiksentilis.
Tikmetspatas itakilo olivojkouit, sayoj ke amo tikpias aceite,
uan tikmetspatas uvas, sayoj ke amo titayis vino.
16 Porin namejuan nankitakamatij tein tanauatij Omrí uan nankichiuaj tein kichiuayaj ichankauan Acab,
uan no nankichiuaj tein kijtojkej.
Yejua ika nimitstatsakuiltiti uan tein nimitschiuiliti kintelmoujtis oksekin
uan kinuetskiliskej* akin nemij itech ueyi xolal;
uan namejuan kampa yeski namechixtopeuaskej”.
7 ¡Niteikneltij! Nimochiuak kemej akin mayana
uan amo kiajsi uvas
uan nion se higo tein uelik tein semi kikuasneki,
porin kitamitekkejya uvas
uan takilot tein chikauaya keman taxiujtata.
2 Amo akinok takuaujtamach;
amo akin kichiua tein kuali yetok.
Nochin moichtakataliaj para temiktiskej.
Yejuan kemej yeskia kintaliliaj se trampa ininikniuan para kinkitskiskej.
3 Kitelmatij keniuj kichiuaskej tein amo kuali;
akin taixyekana tajtantok maj kimakakan tein kineki,
juez tajtani maj kitaxtauikan,
akin ueyichiujkej kijtoua tein kineki kipias,
uan nochin mosenkuij.
4 Akin nesi ke yolkuali tamati kemej uitsti,
akin nesi ke amo takajkayaua, okachi tetajyouiltia ke uitsti tein ika tacorraltiaj.
Sayoj ke ejkos tonal keman moixtalis tein kinnamiki, ijkon kemej kijtojkej akin tanejmachtiaj.
Uan nejon tonal mojkamikiskej.
5 Amo xitakuaujtamatikan iuan namokniuj
nion iuan akin kuali iuan namouikaj.
Kuali xiknemili toni tikiluia mosiuatsin.
6 Porin okichpil amo kitakachiua itat,
siuapil kiixnamiki inan
uan tesiuamon kiixnamiki imonan;
kalijtik yetok akin kintauelita.
7 Sayoj ke nejua niksentokas nimochias para nikitas toni kichiua Jehová.
Amo nitasematis uan nimochias hasta maj Dios nechmakixti.
NoDios nechkakis.
8 Tejua akin tinechtauelita, amo xiyolpaki porin amo kuali nietok.
Maski niuetsik, nimoketsas;
maski ninemi tayouayan, Jehová nechtauilis.
9 Nitaxikos maski Jehová tel kualantos
porin nitajtakolchiuak uan ijkon nikixnamikik.
Satepan, yejua nechtajtouis uan kichiuas maj moyektali nokuejmol kemej moneki.
Nechuikas kampa tatanestok;
nikitas keniuj kichiua tein kuali yetok.
10 Akin nechtauelita no kiitas nejon,
uan mopinaujtis akin nechiluiaya
“¿Kani yetok moDios Jehová?”.
Nejua nikitas keniuj ipan tajtaksaj*
kemej sokit tein onkak ne ojti.
11 Nejon tonal kichijchiuaskej tepamit tein mitsyoualoua;
nejon tonal motal okachi ueyi yeski.
12 Nejon tonal miakej mitsajsikiuij.
Ualeuaskej desde Asiria uan uejueyi xolalmej de Egipto,
desde Egipto hasta ueyiat Éufrates,
desde se mar hasta okse mar uan desde se tepet hasta okse tepet.
13 Uan itech altepet tatamis por inintajtakol akin ompa nemij;
ijkon mokauas porin kichiujkej tein amo kuali.
14 Xikinyekpia akin moaxkauan ika takot tein tikpia, yejuan kemej yeskia moichkauan*
tein nemiaj ininselti ne koujtaj uan kampa tatokalaj.
Maj takuakan ompa Basán uan Galaad kemej achto.
15 “Namechnextilis miak taman tein nankimojkaitaskej
kemej ijkuak nankiskej de Egipto.
16 Akin nemij itech okseki altepemej kiitaskej tein nikchiuas, uan mopinaujtiskej maski kinemiliayaj ke amo akin ueli kinixnamiki.
Motenmajpachoskej;
nakastsajtsakuiskej.
17 Kikuaskej talnex kemej kouamej;
mojkakisaskej desde kampa mopaleuiaj kemej okuilimej tein moxoxolatsaj.
Keman motokiskej iuan toDios Jehová tel moujtoskej
uan mitsmouiliskej”.
18 Nion se Dios kemej tejua.
Tejua tikintapojpoluia akin moaxkauan tein mokauajok keman kichiuaj tein amo kuali uan amo tatakamatij.
Amo nochipa tikualantos,
porin semi mitsyolpaktia titetasojtas.
19 Oksepa titechiknelis; ipan titajtaksas* totajtakoluan.
Tikinpantamotas nochi totajtakoluan itech mar hasta kampa okachi uejkatan.
20 Melauj nochi tein tikiluij Jacob,
uan nochipa tiktasojtak Abrahán.
Tikmatij ke no ijkon tikchiuas touan porin yejua nejon tein timotenkauak iniuan touejkaujtatuan.
Itech tajtol hebreo tokayit ajsitok moijtoua Miguel (tein kijtosneki ‘¿akoni kemej Dios?’) oso Micaya (tein kijtosneki ‘¿akoni kemej Jehová?’).
Oso “tatejteliksas”.
Oso “takomol”.
Itech hebreo, “ichan”.
Oso “tatadiosmej”.
Oso “chacal”.
Oso “ichan Afrá”.
Oso “nanxitatstikej”.
Oso “ximokuaxijximakan”.
Oso “amo yolijsiui”.
Xikonita tanauatijkej.
Oso “borregos”.
Oso “kiposoniaj”.
Xikonita tanauatijkej.
Oso “tamachtilis”.
Nejin tamati kemej se machete tein ojkan tenej.
Nejin katka se kouit tein ueyak tein itempan kipiaya se tepos tein puntajyej.
Oso “nemis”.
Oso “xintokej”.
Oso “borregos”.
Oso “oksepa mitskouas”.
Oso “kipitsotilikan”.
Oso “xiktejteliksa”.
Oso “familias”.
Oso “iborregos”.
Nejin tamati kemej se machete tein ojkan tenej.
Oso “tatadiosmej”.
Xikonita koujmej tein ika taueyichiuayaj.
Oso “borregos”.
Oso “amo xitechichikoui”.
Oso “xikualtakat”, “xiteikneli”.
Itech hebreo, “kimojkatokaskej motokay”.
Itech hebreo, “kinkikixiliskej”.
Oso “kitejteliksaj”.
Oso “moborregos”.
Oso “tiktejteliksas”.