NAHÚM
1 Nikan moijtoua tein kipanos Nínive. Nejin amatajkuilol ika tajtoua tein Dios kiitaltij Nahúm* akin kayot Elcós.
2 ToDios Jehová tanauatia maj sayoj yejua kiueyichiuakan.
Jehová kintatsakuiltia akin kiixnamikij.
Kielnamiktok tein amo kuali tein kichiuaj uan tel kualantok iniuan.
Jehová kintaxtaualtia akin kiixnamikij.
3 Jehová amo niman kualani* uan tel chikauak,
sayoj ke Jehová kintatsakuiltis kemej kinamiki akin tajtakolchiuaj. Amo ijkon kikauas.
Kampa nejnemi chikauak taejeka uan tatamijtiuj.
Mixti kemej yeskia talnex tein moajokui imetstampa.
4 Keman chikauak kinojnotsa mar, kiuatsa;
kinuatsa uejueyi amej.
Ompa Basán uan Carmelo tauaki
uan xochimej tein onkak ompa Líbano kuetauij.
5 Tepemej uiuiyokaj* keman yejua motokia
uan tepetsitsin atiaj.
Taltikpak sesepokas keman iixpan yetos,
uan no tal uan akin ompa nemij.
6 Amo akin ueli kiixnamiki keman kualantok.
Amo akin uelis taxikos keman tel kualantos.
Ikualanyo xotas kemej tit*
uan kintatapatsas uejueyi temej.
7 Jehová yolkuali. Yejua kemej se ueyi kali kampa ueli se mopaleuia keman se moteltekipachojtok.
Kinyekpia* akin iuan mopaleuitij.
8 Kichiuas maj miak at tachpantikisa ompa Nínive,
uan akin kiixnamikij yetoskej kampa tayouayan.
9 ¿Toni nankinemiliaj nankichiuiliskej Jehová?
Yejua namechtamiixpolos.
Amo monekis oksepa kichiuas.
10 Porin yejuan kemej uitsti tein ijilpitok,
kemej akin tauanaj ika cerveza,
sayoj ke tataskej kemej sakat tein uakik.
11 Motech kisas se akin kinemilis teisa kichiuilis Jehová,
kisas se akin tayolmajxitis tein amo tapaleuis.
12 Yejua nejin tein kijtoua Jehová:
“Maski yejuan chijchikaujkej uan tel miakej,
kinixpoloskej uan tamiskej.
Nimitstajyouiltij Judá, sayoj ke amo nimitstajyouiltisok.
13 Uan axkan nimitsmakixtiti para maj amo mitspiaok akin mitstauelita
uan nikotonas cadenas tein ika tiilpitok.*
14 Yejua nejin tein Jehová kiixtalij maj kipano Asiria:
‘Ixpoliuis motokay porin amo tikinpiasok mokoneuan.
Nikinixpolos nochi tiotsitsin* de kouit, de tet uan de tepos tein yetokej itech templo kampa tikinueyichiua modioses.
Nitachkuas para nimitstokas porin amo nikneki nimitsitas’.
15 ¡Xikita! Itech tepemej nejnentiuj akin kiteixmatiltia kuali tanauatilmej,
akin kijtojtinemi ke yolseujkanemij.
Tejua Judá, xikchiua iluimej tein ixyetok uan tein timotenkauak,
porin akin amo yolkuali amo sepaok mitskuejmolos.
Senkis ixpoliuis”.
2 Akin namechmoyauas* namechajsitoya para namechteuis namejuan akin nanemij Nínive.
Xitajpiakan itech tepamit.
Kuali xitachiakan itech ojti.
Ximoyekketsakan uan ximochichikilokan.
2 Jehová kichiuas maj Jacob oksepa kiueyitalikan,
kichiuas maj Israel moueyitali,
porin akin taixpolouaj tatamijkejya
uan kinpojpostekkej ininuvajkouj.
3 Escudos tein kipiaj soldados chichiltikej
uan inintasal no chichiltik.
Kiajokuij ininlanzas* de enebrojkouit para tateuiskej.
Teposmej tein kipiaj inincarros tein kikuij keman tateuiaj
milinij kemej tit.*
4 Nejon carros eliuis motalouaj itech ojti.
Pankisaj uan temouaj itech plaza.
Kemej yeskia xotatiuij uan keman panouaj kemej yeskia tapepetani.
5 Yejua kinsentilis akin taixyekanaj.
Yejuan uejuetstiaskej.
Tsikuintiaskej hasta kampa yetok tepamit tein kiyoualoua ueyi xolal;
tajtatsakuaskej.
6 Motaposkej uejueyi amej
uan palacio xitinis.
7 Ixyetokya nejin: akin nemij itech nejin ueyi xolal kinpinaujtiaj
uan kinuikaj temako; siuamej chokaj.
Mokakij kemej palomas tein chokatokej.
8 Desde ne uejkauj, Nínive tamati kemej se ueyi tanque kampa mosentilia miak at,
sayoj ke axkan nochin cholojtokej de ompa.
“¡Ximochiakan! ¡Amo xikisakan!”.
Sayoj ke amo akin mokepa.
9 ¡Ximokuilikan plata! ¡Ximokuilikan oro!
Nochi tein mopialiaj moita ke amo keman tamis.
Onkak miak taman tein patiyoj.
10 ¡Tamitakixtijkej itech ueyi xolal, amo teyi onkakok! ¡Tatamijkej!
Nochin mojkamikij, tankuakuejkuetauij uan nochi kinkokoua;
tamiixpochiniaj.
11 ¿Kani yetok ininchan leones?
Ompa takuayaj uan desde ompa kisayaj iniuan ininpiluan.
Amo akin kinmojmoujtiaya.
12 León kinkokototsaya miak tapialmej para ipiluan
uan kinmiktiaya tapialmej para leonas.
Ichan nochipa kipiaya tapialmikemej,
kipiaya miak nakat.
13 Jehová akin kinixyekana iangeluan kiyekijtoua nejin: “¡Xikita! Nimitstatsakuiltiti.
Nikintamichichinoti nochi mocarros tein tikui para titateuis
uan kinmiktiskej takamej tein tikinpia.
Amo uelisok titekuilijtinemis tein teaxka itech taltikpak,
uan amo akin kitematiltis nion teyi”.
3 ¡Tel amo kuali tein panoti itech ueyi xolal kampa temiktiaj!
Tel takajkayauaj uan tachtekij.
¡Nochipa temiktijtokej!
2 Mokaki keniuj kinuitektiouij caballos uan kakalakatiouij llantas,
moitaj caballos uan carros tein tsikuintiouij.
3 Takamej youij ininpanko caballos, espadas* uan lanzas* milinij,
kampa yeski nepaniujtokej tel miakej mikemej,
uan nion ueli se kinpoua.
Hasta tametstsajtsakuiliaj.
4 Ijkon panok porin Nínive miakpa mochiuani kemej se siuat kuakualtsin akin monamaka.
Kemej kuakualtsin, ika kintanejnektia altepemej uan tel ueli tenaualuia.
Iniuan auilnemi uan kinkajkayaua; kinnaualuia para kinpojpolos.
5 Jehová akin kinixyekana iangeluan kiyekijtoua nejin: “¡Xikita! Nimitstatsakuiltiti Nínive.
Nimitsajokuiliti mokuey hasta moixko;
nikchiuas maj kiitakan ke tixipetstik,*
uan timopinaujmatis keman tekiuanij mitsitaskej.
6 Nimitspantemilis tajsol
uan nikchiuas maj amo akin mitsneki;
nikchiuas maj nochin mitsitakan.
7 Nochin akin mitsitaskej cholojteuaskej uan kijtoskej:
‘¡Kiixpolojkejya Nínive!
Amo akin kiiknelia’.
¿Akoni uelis mitsyolseuis?
8 ¿Tiknemilia ke okachi kuali tietok ke No-Amón,* tein yetoya tanakastan den ueyiat Nilo?
Miak at kiyoualojtoya;
kikuia mar para motomintis uan mar katka kemej se tepamit tein kipaleuiaya.
9 Etiopía uan Egipto kimakayaj chikaualis tein amo tamia.
Akin nemiaj Put uan Libia kipaleuiayaj.
10 Maski ijkon akin nemiaj No-Amón kinkixtijkej
uan kinuikakej temako.
Itech nochi esquinas kinmagakej ininkoneuan hasta ke kinmiktijkej.
Kitatamotkej tetsitsin* para moinxejxelouiliskej taixyekananij,
uan kinilpijkej* ika cadena nochin ueyichiuanimej.
11 Tejua Nínive no timouintis;
timotatitiuj.*
Tiktemotiuj kani timopaleuis para maj amo mitsmikti akin mitstauelita.
12 Tepamit tein ika timopaleuia tamati kemej higojkouit tein kipia higos tein chikauakya;
komo tiktsetseloua, itakilo uetsitiuj itenoj akin kitamikuas.
13 ¡Xikita! Mosoldados tamatij kemej siuamej.
Tamitatapotos kampa tinemi uan akin mitstauelitaj kalakiskej.
Tatikuiltiskej uan tataskej koujmej tein ika tiyektatsakua.
14 ¡Xiksentili at para keman amo mitskauaskej xikisa!
Xikchikaua tepamit tein mitsyoualoua.
Ximokalaki kampa sokitaj uan ipan xitajtaksa* sokit;
xikmanelo uan ika xikchijchiua tabiques.
15 Maski ijkon titamitatas.
Ika espada mitsmiktiskej.
Mitstamiskej kemej chapolimej kitamikuaj xiuit.
¡Ximomiakilikan kemej chapolimej!
¡Kemaj, ximiakiakan kemej chapolimej!
16 Tikinmiakiltijya akin tanamakaj uan axkan okachi miakej ke sitalimej tein yetokej iluikak.
Chapolin moeuayojpata uan patanteua.
17 Tajpianij tein tikinpia tamatij kemej chapolimej
uan akin kinixyekanaj soldados tamatij kemej tel miakej chapolimej.
Mokalakitij itech corralmej de tet keman taseseya,
sayoj ke keman peua tona patanteuaj
uan amo akin kimati kani youij.
18 Tekiuaj de Asiria, ichkatajpianij kochisnekij;
akin tekitij itech mopalacio amo kisaj de ininchan.
Akin tikinixyekana moyaujtokej* itech tepemej
uan amo akin kinsentilia.
19 Amo akin mitspaleuis keman mitsixpoloskej.
Amo tipajtisok kampa mitskokoskej.
Nochin akin kikakiskej tein mitspanos momataxkaloskej
porin tikinteltajyouiltij nochin”.
Tokayit tein kijtosneki ‘akin teyolseuia’.
Oso “amo yolijsiui”.
Oso “kuekuetakaj”, “kuekuechkaj”.
Oso “tekol”.
Itech hebreo, “Kinixmati”.
Oso “titsikaujtok”.
Oso “tatadiosmej”.
Oso “namechxinis”.
Nejin katka se kouit tein ueyak tein itempan kipiaya se tepos tein puntajyej.
Oso “tekol”.
Nejin tamati kemej se machete tein ojkan tenej.
Nejin katka se kouit tein ueyak tein itempan kipiaya se tepos tein puntajyej.
Oso “tixitatstik”.
Oso “Tebas”.
Xikonita tetsitsin tein kitatamotayaj.
Oso “kintsikojkej”.
Oso “timocholtitiuj”.
Oso “xiktejteliksa”.
Oso “xintokej”.