HABACUC
1 Nejua nitanauatijkej* Habacuc.* Yejua nejin tein Dios kichiuak maj nikita. Nejua nikijtoj:
2 Jehová, uejkaujya nimitstsajtsilijtok xinechpaleui, ¿kanachpaok moneki nimitstataujtis para tinechkakis?
Uejkaujya nimitstataujtijtok xinechmakixti, ¿keyej ayamo tikixpoloua tein amo kuali?
3 ¿Keyej tikaua maj nikita miak taman tein amo kuali?
¿Keyej tikaua maj sekin tetajyouiltikan?
¿Keyej tikaua maj nikinita akin tauejuelouaj uan kichiuaj tein amo kuali?
¿Uan keyej miakej moteuiaj uan takuejmolchiuaj?
4 Yejua ika nenkaj yetok tanauatil
uan amo keman kitatsakuiltiaj akin kichiua tein amo kuali.
Akin amo yolkualmej kintajyouiltiaj akin kichiuaj tein kuali,
uan amo kintatsakuiltiaj kemej kinnamiki.
5 “¡Xikinitakan akin nemij itech altepemej
uan xikitakan tein panoti!
Semi nanmojkatachiaskej porin mochiuas teisa itech nejin tonalmej,
uan nion nankineltokaskej maski miakej namechiluiskej tein panok.
6 Porin nikinualkuis caldeos,
akin semi tetajyouiltiaj uan kichiujtiuetsij tein kinekij.
Yejuan ajsij itech miak talmej para moaxkatiliskej kalmej.
7 Yejuan semi temoujtiaj.
Kiixtaliaj inintanauatiluan uan amo kitakamatij nion akin.
8 Inincaballos okachi ijsiujka motalouaj ke leopardos.
Caldeos okachi tamouililmej ke koujtajitskuimej tein takitskiaj de youak.
Caballos tein kinkuij keman tateuiaj tel tsikuinij,
inincaballos de uejka kinualkuikej.
Caldeos ijsiujka kinteuiaj akin kintauelitaj, ijkon kemej se águila ijsiujka ualtemoua para kikitskis tein kikuas.
9 Nochin caldeos kinekij tateuiskej.
Ijkon kemej tonalejekat tein ualeua de kampa ualkisa tonaltsin tauatstiuj, yejuan senyouij uan tauejuelojtiouij,
uan tel miakej kinkitskiaj kemej yeskia kisentiliskiaj xal.
10 Kinkejkelouaj tekiuanij
uan kinueuetskiliaj* uejueyi chiuanimej.
Mokejkelouaj den uejueyi xolalmej kampa kuali tatsaktok,
porin kimontontemaj tal para ompaka kalakiskej uan moaxkatiliskej.
11 Yejuan ijsiujka panouaj ijkon kemej ejekat uan kipanauiaj nejin altepet.
Sayoj ke kinamiki maj kintatsakuiltikan
porin kijtouaj ke kinpaleuijtok inindios”.
12 Jehová, tejua nochipa tinemini.
NoDios akin senkis tichipauak, amo keman timikis.
Jehová, tejua tikinixtalij caldeos para maj kichiuakan tein tikijtojya ke tikseliskej.
Tejua kemej se ueyi tet kampa ueli nimomatampauia.
Tikinixtalij caldeos para titechtatsakuiltis.*
13 Moixtololouan semi chipaujkej uan amo tikuelita tikitas tein amo kuali,
nion tikxikoua tein amo kuali.
Yejua ika, ¿keyej amo tikintatsakuiltia akin takajkayauaj?
¿Uan keyej amo teyi tikijtoua keman akin amo yolkuali kitajyouiltia akin kichiua tein kuali?
14 ¿Keyej tikaua maj takamej kinchiuakan kemej pescados den mar?
¿Keyej tikaua maj takamej kinchiuakan kemej okuilimej tein moxoxolatsaj tein amo akin kinpaleuia?
15 Yejua* kinkitskia miakej ika tepos tein ika kinkitskiaj pescados,
kinkitskia miakej ika iatarraya tein ueyi
uan kinsentilia ika iatarraya tein tsikitsin,
yejua ika tel yolpaki.
16 Uan kimaktilia miak taman iatarraya tein ueyi para kiueyichiuas
uan no kitapopochuilia iatarraya tein tsikitsin,
porin kisentilia miak taman tein kikuas keman kinkui iatarrayas
uan tein kikua kichikaua.
17 Yejua ika, ¿tikauas maj kisentoka kinsentili tel miakej ika iatarraya tein ueyi?
¿Tikauas maj amo kinikneli akin nemij itech altepemej, ta maj kinmikti?
2 Niksentokas niijkatos kampa ipa nitajpia
uan nimoketsatiuj ikuapan tepamit tein kiyoualoua ueyi xolal.
Nimochias para nikmatis toni kineki* maj niktematilti
uan niksentokas niknemilis toni nikijtos keman nechtakaualtis.
2 Uan Jehová nechnankilij:
“Xikijkuilo itech lajas tein nimitsitaltij, xikijkuilo kemej kuali moajsikamatis,
para maj amo kiouijmaka akin kileros sentaixpan.
3 Porin ayamo ejko tonal para maj mochiua tein nimitsitaltij,
sayoj ke ijsiujka moualtokijtok nejon tonal, uan yekmelauj mochiuas.
Maski moitaskia ke amo niman ejkos, ¡xiksentoka xikchia!
Porin yekmelauj mochiuas.
¡Nejon tonal ejkos keman ixyetok!
4 Kuali xikita akin moueyimati:
yejua amo yolkuali.
Sayoj ke akin yolkuali nemis porin kitakamati Dios.*
5 Vino uelis kikuatapololtis aksa,*
yejua ika akin moueyimati amo uelis kichiuas tein kiixtalijtok.
Nochipa kinektok miak taman uan amo keman pexoni* ijkon kemej Miketekoch.*
Amo keman ixui ijkon kemej mikilis amo keman ixui.
Kisentoka kinsentilia akin nemij itech okseki altepemej
uan moinaxkatilia akin nemij itech nochi xolalmej.
6 Nochin yejuan mokejkeloskej* uan kijtoskej miak taman tein ouij se kiajsikamati.
Yejuan kijtoskej:
‘¡Teikneltij akin kisentilia miak taman tein amo iaxka
porin okachi motauikaltia!
¿Hasta kemanian kichiujtos nejon?
7 Sepasan ejkoskej akin tikintauikilia.
Yejuan ijsaskej,* moketsaskej, eliuis mitstsetseloskej
uan mitskuiliskej tein tikpia.
8 Kemej tejua titachtekik itech miak altepemej,
akin mokauaskej de nejon altepemej no mitstachtekiskej,
porin miakej tikinmiktij
uan tikinixpoloj altepemej,
uejueyi xolalmej uan tikinixpoloj akin ompa nemiaj.
9 ¡Teikneltij akin kichiua tein amo kuali para kinixpanoltis ichankauan,
para uejkapan kichijchiuas ichan
uan ijkon amo kipanos tein amo kuali!
10 Tein tikixtaliani tikchiuas kinpinaujtiani mochankauan.
Titajtakolchiuak keman tikinixpoloj akin nemiaj itech miak xolalmej.
11 Se tet den tepamit kemej yeskia tsajtsis
uan se viga den kali kemej yeskia kinankilis.
12 ¡Teikneltij akin kinmiktij miakej para kichijchiuas se ueyi xolal
uan kichiua tein amo kuali yetok para kipeualtis se ueyi xolal!
13 Akin nemij itech altepemej tel tekitij, sayoj ke Jehová akin kinixyekana iangeluan kiixtalij maj chichinaui nochi tekit tein kichiuaj.
Yejua kiixtalij maj nenkaj mosioujtikan.
14 Ijkon kemej itech mar onkak miak at,
no ijkon itech taltikpak onkaskej miakej akin kimatiskej ke Jehová semi ueyichiujkej.
16 Amo mitsueyitaliskej, ta semi mitspinaujtiskej.
Tejua no ximouinti para maj kiitakan ke amo mitstekkej.*
Jehová kichiuas xitayi den copa tein kipia iyekmakopa
uan semi mitspinaujtiskej.
17 Yejuan mitsixpoloskej ijkon kemej tikixpoloj Líbano,
uan ijkon kemej tikinmojmoujtij uan tikinmiktij tapialmej, no ijkon mitsmiktiskej,
porin miakej tikinmiktij
uan tikinixpoloj altepemej,
uejueyi xolalmej uan tikinixpoloj akin ompa nemiaj.
18 ¿Keniuj uelis tapaleuis se tiotsin* tein aksa kichijchiuak?
¿Keniuj uelis mitspaleuis se tiotsin de tepos
uan se akin tamachtia tein amo melauj?
Akin tamachijchiuaj kineltokaj ke kinpaleuis tein kichijchiujkej.
¡Sayoj ke yejuan kinchijchiuaj tiotsitsin tein amo kualtiaj nion tajtouaj!
19 ¡Teikneltij akin kiluia se koujtatejtek “¡Xiijsa!”,
oso akin kiluia se tet tein amo tajtoua “¡Xiijsa! ¡Xitechmachti!”!
Yejuan kinpepechouiliaj oro uan plata,
sayoj ke nion mijyotiaj.*
20 Sayoj ke Jehová yetok itech itemplo.
¡Maj nochin akin nemij itech taltikpak amo teyi kijtokan iixpan!’”.
3 Yejua nejin tein tanauatijkej* Habacuc kitataujtij Dios. Inetataujtil kichiuak kemej se canción tein cantarouaj keman tayokoxtokej:
2 Jehová, nikakini tein tikchiuani uan semi nikmojkaita.
Jehová, nimitstataujtia oksepa xikchiua nejon itech nejin tonalmej*
uan xikchiua maj moteixmatilti itech nejin tonalmej.*
Xitechelnamiki uan xitechikneli itech tonal keman onkas miak ouijkayomej.
3 Dios akin senkis chipauak ualaj desde Temán
uan desde tepet Parán. (Sélah).*
Ichikaualis momoyauak ne iluikak
uan nochin akin nemij nikan taltikpak kiueyichiujkej.
4 Tel milinia kemej tonaltsin.
Ichikaualis yetoya imako
uan de ompa kisak tanex.
5 Yejua kichiuak maj kokolispeuakan* akin yayaj iixpan,
uan akin yayaj taikan kichiuak maj kintelkui totonik.
6 Yejua moketsak uan kichiuak maj talolini.
Keman kinitak altepemej kichiuak maj uiuiyokakan.*
Tepemej tein ne uejkaujya yetokej xitinkej
uan lomas tein ne kemanya yetokej xitinkej.
Dios kichiuas kemej ne uejkauj kichiujka.
7 Nikitak ke akin nemiaj itech kaltsitsin* ompa Cusán tajyouijtoyaj.
Tasal tein ika chijchiujtoyaj kaltsitsin ompa Madián chikauak motsetselojkej.
8 Jehová, ¿tikualantok iniuan ueyiamej?
¿Mitskualantijkej ueyiamej,
oso iuan tikualantok mar?
Yejua ika tiajtinemik itech mocaballos
uan carros tein tikui keman titateuia, tatankej.
9 Tikixtijya moarco uan tikixtilanakya para tiktamotas flechas.
Tikpiaya tein ika titateuia* para tikchiuas tein timotenkauak. (Sélah).
Tikchiuak maj ueyiamej kixejxelokan taltikpak.
10 Tepemej motsetselojkej keman mitsitakej.
Se ueyi kiouit kiuejueloj taltikpak.
Mar chikauak kakistik
uan kemej yeskia uejkapan momaajokuik.
11 Tonaltsin uan metsti motatijkej,* amo kiskej para tauiskej.
Tiktamotak moflechas tein milinij.
Molanza* tauijtikisak kemej ijkuak tapetani.
12 Tikualantiaya keman tikpanauij taltikpak.
Semi tikualantoya keman ininpan titajtaksak* altepemej.
13 Tikisak para tikinmakixtis akin moaxkauan, para tikmakixtis akin tikixpejpenak.
Tikixpoloj akin taixyekanaya itech kali tein iaxka akin amo yolkuali.
Tiktamixitinij kali desde ajko* hasta kampa tsineujtok. (Sélah).
14 Isoldados motatijkej para kinichtakauiskej akin tajyouijtokej.
Kinyolpaktiaya uan kitelnekiaj kinmiktiskej.
Isoldados ijsiujka nechixnamikikoj kemej se kiouaejekat,
sayoj ke tikinmiktij ika ininteposuan tein ika tateuiaj.
15 Sayoj ke tejua toDios tikpanauij mar ika mocaballos.
Tikpanauij mar tein semi moajkotamotaya.
16 Keman nikakik tein motematiltij, nisepoujtikisak.
Keman nikakik nejon, nitenxipaluiuiyokak.
Nitamikuetauik* uan peuak nimetsuiuiyoka.
Sayoj ke niyolseujtos uan nimochias
hasta maj ejko tonal keman tajyouiskej akin techixnamikij.
17 Maski higojkouit amo xochiouas
uan uvajkouit amo kitemakas uvas,
maski olivojkouit amo kitemakas itakilo*
uan amo motachiuas kampa tatokkej,
maski amo onkaskejok ichkamej* itech corral
nion kuakuejmej kampa kintsakuaj,
18 maski mochiuas nochi nejon,
semi niyolpakis porin nikixmati Jehová,
semi niyolpakis porin noDios nechmakixtia.
19 NoUeyi Teko Jehová nechchikaua,
yejua kichiuas maj ueli nimotalo kemej se masat,*
uan kichiuas maj ninejnemi kampa takes.
Para akin kinixyekana akin cantarouaj: Nejin canción moneki cantaroskej ika noarpas.
Xikonita tanauatijkej.
Tokayit tein xa kijtosneki ‘tenaua’.
Oso “kinpakitaj”.
Oso “titechtakaualtis”.
Nikan ininka tajtojtok caldeos.
Nesi ke nikan ika tajtojtok Dios.
Oso xa “porin takuaujtamati”.
Oso “akin”, “akaj”.
Oso “temi”.
Oso “Seol”, kampa moseuijtokej mikemej. Xikonita miketekoch.
Oso “kijtoskej proverbios”. Xikonita proverbio.
Oso “tachiaskej”, “ixpetaniskej”.
Oso “xitatstikej”.
Oso “amo mitschiuilijkej circuncisión”. Xikonita circuncisión.
Oso “tatadios”.
Oso “nion ijsikaj”.
Xikonita tanauatijkej.
Itech hebreo, “ijkon kemej panouaj xiujmej”.
Itech hebreo, “ijkon kemej panouaj xiujmej”.
Xikonita sélah.
Oso “kokoxkakuikan”.
Oso “kuekuetakakan”, “kuekuechkakan”.
Nejin kaltsitsin chijchiujtoyaj ika tasal oso ininpankuetaxyo tapialmej.
Oso xa “flechas”.
Oso “mocholtijkej”.
Nejin katka se kouit tein ueyak tein itempan kipiaya se tepos tein puntajyej.
Oso “keman tikintejteliksak”.
Itech hebreo, “ikech”.
Itech hebreo, “Noomiyouan peuak palanij”.
Oso “aceitunas”.
Oso “borregos”.
Oso “masalamat”.