SOFONÍAS
1 Keman Josías iokichpil Amón tekiuajtitoya Judá, Jehová kinojnotsak Sofonías.* Itat Sofonías katka Cusí, itat Cusí katka Guedalías, itat Guedalías katka Amarías uan itat Amarías katka Ezequías. Yejua nejin tein kiluij:
2 “Niktamiixpolos nochi tein onkak itech taltikpak”, ijkon kiyekijtoua Jehová.
3 “Nikinixpolos takamej uan tapialmej,
totomej uan pescados.
Nikixpolos nochi tein tatsakuilia* uan akin amo yolkualmej.
Nikinixpolos akin nemij itech taltikpak”, ijkon kiyekijtoua Jehová.
4 “Nikintatsakuiltis akin nemij Judá uan nochin akin nemij Jerusalén,
uan niktamiixpolos nochi tein nikan kikuij para kiueyichiuaskej Baal.
Nikchiuas maj amo kinelnamikikanok tiopixkamej akin kintekitiliaj tiotsitsin*
uan maj amo no kinelnamikikanok okseki tiopixkamej.
5 Nejua Jehová nikinixpolos akin youij kalkuako* kiueyichiuatij tonaltsin, metsti uan sitalimej,
uan akin motankuaketsaj noixpan uan motenkauaj ke nochipa nechueyichiuaskej,
sayoj ke no motenkauaj iuan tiotsin Malcam* ke nochipa kiueyichiuaskej.
6 Nejua Jehová nikinixpolos akin nechkauaj
uan akin amo kitemouaj maj nejua Jehová nikinixyekana nion nechtajtaniaj maj nikinyolmajxiti”.
7 Amo teyi xikijtokan iixpan toUeyi Teko Jehová, porin amo uejkaua ejkos tonal tein Jehová kiixtalij.
Jehová kiixtalijya toni kitemaktiti. Yejua moinxelouilijya akin kinyoleuak.
8 “Nejua Jehová nikintatsakuiltis uejueyi chiuanimej, ikoneuan tekiuaj uan nochin akin motakentiaj kemej akin nemij itech okseki altepemej.
Nikintatsakuiltis itech tonal keman niktemaktis tein nikixtalijya.
9 Nejon tonal nikintatsakuiltis nochin akin tejkoskej* itech tarima para taueyichiuaskej,
uan no nikintatsakuiltis akin tateuiaj uan takajkayauaj para kipaleuiskej akin kitekitiliaj”.
10 Jehová kiyekijtoua: “Nejon tonal,
desde puerta tein monotsa Pescado chikauak tsajtsiskej,
tayokolchokaskej kampa yankuixtok kinketskej kalmej itech ueyi xolal
uan chikauak takakistis itech lomas.
11 Ximotayokoltikan akin nanemij Mactés,*
porin kinixpolojkejya nochin tanamakanij,
kinixpolojkejya nochin akin tanamakayaj uan takouayaj.*
12 Ijkuak, nikuis candilmej ompa Jerusalén para kuali nitatemos
uan nikintatsakuiltis akin kinyolpaktia kemej nemij uan moiluiaj:
‘Jehová amo teyi kichiuas, nion tein kuali nion tein amo kuali’.
13 Yejuan kinkuiliskej nochi tein patiyoj tein kipiaj uan kinuejuelouiliskej ininchan.
Kinchijchiuaskej kalmej, sayoj ke amo ompa nemiskej.
Kitokaskej uvajkoujmej, sayoj ke amo tayiskej vino tein kikixtiskej.
14 ¡Amo uejkaua ejkos tonal tein nejua Jehová nikixtalijya!
¡Ijsiujka moualtokijtok uan amo uejkaua ejkos!
Semi temojmoujtis tein mokakis itech tonal tein nejua Jehová nikixtalijya.
Itech nejon tonal hasta soldados mojkatsajtsiskej.
15 Nejon tonal nitelkualantos,
nejon tonal akin nemij itech taltikpak semi tajyouiskej uan tayokoyaskej.
Nejon tonal mochiuas tetsauit uan tauejueliuis,
nejon tonal semi tatayouayantias,
nejon tonal mixtaj yeski uan tamitatileuis.
16 Nejon tonal kipitsaskej kuaomit uan chikauak tsajtsiskej para tateuiskej.
Kinixpoloskej uejueyi xolalmej kampa tatsaktok ika uejueyi tepamit uan no kinixpoloskej uejkapan kalmej.
17 Nejua Jehová, nikchiuas maj akin nemij itech taltikpak motayokoltikan,
uan yejuan nentinemiskej kemej yeskia amo tachiaj,
porin nechixnamikkej.
18 Itech tonal keman nejua Jehová nitelkualantos, amo uelis kinmakixtis nion ininplata nion ininoro.
Kemej nitelkualantos, nikixpoloti nochi tein onkak itech taltikpak ijkon kemej se ueyi tit* tamitachichinoua.
Tel amo kuali tein panos nejon tonal porin nikinixpolos nochin akin nemij taltikpak”.
2 Ximosentilikan nanochin, ximonechikokan,
namejuan akin nanemij itech altepet kampa amo akin ixpinaua.
2 Achto ke mochiuas tein Dios kiixtalijya,
achto ke tonal ijsiujka panos ijkon kemej ejekat ijsiujka kiuika in teujti,*
achto ke Jehová namechtatsakuiltis keman tel kualantos,
achto ke ejkos tonal keman Jehová kualantos uan namechtatsakuiltis,
3 xiktemokan Jehová nochin akin nanyolyemankej* akin nanemij nikan taltikpak,
nochin akin nankitakamatij tein kuali tein kiixtalia.
Nochipa xikchiuakan tein kuali yetok uan nochipa xiyolyemankej.
Ijkon xa nankiajsiskej kani namotatiskej* itech tonal keman Jehová tel kualantos.
4 Amo akin nemisok itech ueyi xolal Gaza
uan Asquelón taseltijkan mokauas.
Akin nemij Asdod kintokaskej* nepantaj
uan Ecrón senkis kiixpoloskej.
5 “¡Nanteikneltijkej namejuan keretitas, akin nanemij martenoj!
Jehová kijtojya ke namechtatsakuiltiti.
‘Namechixpoloti namejuan filisteos akin nanemij Canaán,
uan amo akinok nemis ompa’.
6 Uan martenoj mochiuas ixtauat,
kampa onkaskej atekochmej para maj ichkatajpianij kikixtikan at
uan no onkaskej corralmej de tet para ompa kinkalakiskej ichkamej.*
7 Nejon talmej yeski ininaxka ikoneuan Judá akin kemej yeskia ichkamej.
Yejuan ompa motamakaskej.
Uan tiotakpa motekaskej itech kalmej tein yetokej Asquelón.
Porin ininDios Jehová kinyekpias
uan akin okseko kinuikakaj kichiuas maj mokepakan”.
8 “Nikakini keniuj mokejkelouaj akin nemij Moab
uan keniuj tauijuikaltiaj* akin nemij Ammón.
Yejuan kinkejkelouanij nokoneuan israelitas,
moueyimatij uan kinmojmoujtianij ke kinkuiliskej inintal”.
9 Yejua ika, Jehová akin kinixyekana iangeluan uan ininDios israelitas kijtoua:
“Ijkon kemej nejua yekmelauj niyoltok, nikyekijtoua ke Moab mokauas kemej Sodoma,
uan Ammón mokauas kemej Gomorra.
Itech nejon talmej uitstaj yeski, onkas miak istat uan nion kemanok ompa nemiskej.
Nokoneuan israelitas akin makisaskej mokuiliskej nochi tein yejuan kipiaj,
nokoneuan israelitas akin makisaskej mokuiliskej inintal”.
10 Yejua nejin tein kinpanos porin moueyimatkej,
porin moueyitalijkej, kinkejkelojkej uan kintajyouiltijkej akin iaxkauan Jehová akin kinixyekana iangeluan.
11 Jehová kichiuas miak taman tein kimojkaitaskej.
Kichiuas maj mayanpanokan nochin dioses de nikan taltikpak,
uan nochin akin nemij itech talmej tein kinyoualojtok mar kiueyichiuaskej,
kiueyichiuaskej desde kampa yetoskej.
12 “Namejuan akin nanemij Etiopía no namechmiktis ika noespada”.*
13 Yejua ajkokopa* momamelauas uan kiixpolos Asiria.
Kichiuas maj amo akin nemiok ompa Nínive,
kichiuas maj mokaua kemej taluakyan.
14 Ompa motekaskej tataman tapialmej tein nemij koujtaj,
pelícano uan puercoespín kochiskej itech kalikximej tein uetsiskej.
Desde ventana mokakis ke cantarojtokej.
Kampa achto kalakiaj tauejueliujtos.
Cedrojkouit tein kipia tonaltatas uan apachiuis.*
15 Akin nemiaj itech nejin ueyi xolal moueyimatiaj
uan kinemiliayaj ke amo teyi kinpanoskia.
Yejuan moluiayaj: ‘Amo onkak okse ueyi xolal kemej nejin’.
¡Uan axkan nochin kimojkaitaj keniuj mokauak!
¡Ompa kochij tapialmej tein nemij koujtaj!
Nochin akin ompa panoskej kikisiskej uan majmasoskej.
3 ¡Akin nemij itech ueyi xolal Jerusalén kinpanos tein tel amo kuali!
Yejuan taixnamikij, mopitsotiliaj porin tajtakolchiuaj uan tetajyouiltiaj.
2 Amo akin kitakamatinij nion mokauanij maj kintakaualtikan.
Yejuan amo takuaujtamatinij iuan Jehová nion iuan motokianij ininDios.
3 Uejueyi chiuanimej akin nemij itech ueyi xolal kemej yeskiaj leones tein nanalkatinemij.
Jueces akin ompa chanchiuaj kemej yeskiaj koujtajitskuimej tein takitskiaj de youak,
yejuan amo kikauaj nion se omit para kitetexoskej mostika.
4 Tanauatianij* akin ompa nemij moueyimatij uan amo iniuan takuaujtamatij.
Tiopixkamej akin ompa chanchiuaj kipitsotiliaj tein chipauak
uan kiixtopeuaj itanauatiluan Dios.
5 Sayoj ke Jehová yolkuali uan yetok itech ueyi xolal.
Yejua amo kichiua nion teyi tein amo kuali.
Ijkon kemej mojmostaj tatanesi, yejua kitematiltia itanauatiluan mojmostaj kualkan.
Sayoj ke akin amo yolkuali amo ixpinaua.
6 “Nikinixpoloj altepemej, nikinxitinij uejkapan kalmej tein ompa yetoyaj.
Nikintamiuejueloj ininojuan para maj amo akin ompa ojtokani.
Uejueyi xolalmej tein ompa yetoyaj nikintamiuejueloj, uan amo akin ompa mokauakok.
7 Nejua nikiniluij akin nemij itech ueyi xolal:*
‘Moneki nanechmojkatokaskej uan namokauaskej maj namechtakaualti’.
Ijkon amo nikintatsakuiltiskia porin semi tajtakolchiuaj nion nikixpoloskia ininueyi xolal.
Sayoj ke yejuan okachi kinekiaj kichiuaskej tein amo kuali.
8 Yejua ika, nejua Jehová nikyekijtoua:
‘Amo xiyolijsiuikan, ta ximochiakan hasta keman nikintatsakuiltis uan nikinkuilis nochi tein kipiaj,
porin nikixtalijya nikinsentilis altepemej, tekiuanij uan akin nemij kampa yejuan taixyekanaj
para nikintatsakuiltis porin semi nikualantok.
Kemej nitelkualantok, nikixpoloti nochi tein onkak itech taltikpak ijkon kemej se ueyi tit* tamitachichinoua.
9 Uan nikinmachtis nochin maj tajtokan se yankuik tajtol, se tajtol tein chipauak,
para maj nochin ueli kiueyitalikan notokay, nejua Jehová
uan maj nechsentekitilikan’.*
10 Akin nechueyichiuaj uan miakkan moyaujtokej,*
nechtayokoliskej teisa tein kiualkuiskej desde Etiopía kampa ika yetokej ueyiamej.
11 Nejon tonal, namejuan akin nanemij Jerusalén
amo nanpinauaskejok por nochi tein nankichiujkej para nanechixnamikiskej,
porin ijkuak nikinajchiuas de nejin ueyi xolal akin semi moueyimatij,
uan amo kemanok namoueyimatiskej itech tepet tein nimoxelouilij.
12 Sayoj nikinkauas maj nemikan itech nejin ueyi xolal akin yolyemankej uan amo moueyimatij,
uan yejuan kitemoskej maj nejua Jehová nikinpaleui.
13 Israelitas akin makisaskej amo kichiuaskej tein amo kuali,
amo takajkayauaskej nion yejuan mokajkayauaskej.
Ijkon kemej ichkamej,* yejuan motamakaskej, motekaskej uan amo akin kinmojmoujtis”.
14 ¡Akin nanemij Sion, xiajkotsajtsikan porin semi nanyolpakij!
¡Israelitas, xiajkotsajtsikan porin nantatankej!
¡Akin nanemij Jerusalén, semi ximouelitakan uan xiyolpakikan!
15 Jehová amo namechtatsakuiltiaok.
Kinajchiuakya akin namechtauelitaj.
Jehová inintekiuaj israelitas, namouan yetok.
Amo kemanok nankimouiliskej maj namechpano tein amo kuali.
16 Nejon tonal kiniluiskej akin nemij Jerusalén:
“Amo ximouikan akin nanemij Sion.
Amo ximosenkauakan.*
17 Nejua Jehová namoDios namouan nietok.
Nejua semi nichikauak uan namechmakixtis.
Semi nimouelitas uan niyolpakis porin kualtsin nanemiskej.
Kuali nimomachilis porin namechnextiliani ke namechtasojta.
Nimouelitas porin kualtsin nanemiskej uan niajkotsajtsis porin niyolpaktos.
18 Nikinsentilis akin tayokoxtokej porin amo ueli youij iluimej tein mochiuaj Sion,
uejka yetoyaj porin okseko kinuikakaj uan akin kintauelitaj kinkejkelouayaj.
19 Ijkuak nikintajyouiltis akin mitstajyouiltiaj,
nikinmakixtis akin koxojnejnemij
uan nikinsentilis akin moyaujtokej.
Nikchiuas maj kinueyitalikan uan maj kintelixmatikan*
itech nochin altepemej kampa kinpinaujtijkej.
20 Ijkuak nikchiuas ximokepakan, ijkuak namechsentilis.
Porin nikchiuas maj nochin akin nemij itech okseki xolalmej namechtelixmatikan
uan maj namechueyitalikan keman nikinualkuis akin okseko kinuikakaj.
Namejuan nankiitaskej keniuj mochiua nejin”. Yejua nejin tein Jehová kijtoua.
Tokayit tein kijtosneki ‘Akin Jehová kitatij oso kicholtij (kipatiuitak)’.
Nesi ke nikan ika tajtojtok tein kichiuayaj uan tein kikuiaj para kinueyichiuaskej tiotsitsin.
Oso “tatadiosmej”.
Oso “kaltipan”, “kalpani”.
Xikonita Malcam.
Oso “pankisaskej”.
Nesi ke nejin yetoya Jerusalén, tanakastan den puerta tein monotsa Pescado.
Itech hebreo, “nochin akin kitamachiuayaj plata”.
Oso “tein se kiteliksa”.
Oso “ininijtikyo”.
Oso “tekol”.
Oso “ieuayo xinach”.
Oso “nanyolnejmachmej”.
Oso “namocholtiskej”.
Oso “kineualtiskej”.
Oso “borregos”.
Oso “tatejtelchiuaj”, “taijijtouaj”.
Nejin tamati kemej se machete tein ojkan tenej.
Itech hebreo, “norte”.
Oso “ayouas”.
Xikonita tanauatijkej.
Nikan ika tajtojtok Jerusalén.
Oso “tekol”.
Oso “nechsenueyichiuakan”.
Oso “xintokej”.
Oso “borregos”.
Itech hebreo, “Amo ximomatemoltikan”.
Itech hebreo, “kipiakan se tokayit”.