AGEO

1 Itech yekinika tonal den metsti elul* keman Darío yajtoyaya para ome xiuit kemej tekiuaj, tanauatijkej* Ageo* kinnojnotsak Zorobabel uan Josué. Zorobabel taixyekanaya Judá uan itat katka Sealtiel, uan Josué katka tayekankatiopixkat uan itat katka Jehozadac. Ageo kiniluij nejin tein Jehová kimatiltijka:

2 “Yejua nejin tein kijtoua Jehová akin kinixyekana iangeluan: ‘Namejuan nankijtouaj: “Ayamo tiempo para tikchijchiuaskej* ichan* Jehová”’”.

3 Uan Jehová oksepa kinojnotsak tanauatijkej Ageo para maj kitematilti nejin: 4 “Namejuan nankichijchiujkej namochan uan nankikualtsintilijkej ika kouit, sayoj ke nochan uejueliujtok, ¿nankinemiliaj ke axkan moneki namochantijtoskej? 5 Yejua ika, nejua Jehová akin nikinixyekana noangeluan namechiluia nejin: ‘Kuali xiknemilikan toni nankichiujtokej.* 6 Maski semi nantatokaj, amo miak nankisentiliaj. Maski nantakuaj, amo nanixuij. Maski nantayij vino, amo miak vino nankipiaj. Maski namotaliliaj tasal, amo namototoxtiaj.* Uan keman kitaxtauiaj akin tetekitilia, yejua kikalakia itomin itech se bolsita tein kojkoyoktik’”.

7 “Nejua Jehová akin nikinixyekana noangeluan namechiluia nejin: ‘Kuali xiknemilikan toni nankichiujtokej’”.*

8 Nejua Jehová nikijtoua nejin: “Xipankisakan kampa tepeyoj,* xikuitij kouit uan xikchijchiuakan nochan. Komo ijkon nankichiuaj, nikuelitas nejon kali uan ompa nechueyitaliskej”.

9 “Nejua Jehová akin nikinixyekana noangeluan namechiluia nejin: ‘Nankichiayaj nankisentiliskej miak tatok, sayoj ke amo miak nankisentilijkej. Uan keman tein nankisentilijkej nankiuikakej namochan, nikpitsak para maj ixpoliui. Nikchiuak nejin porin namejuan nantekititokej para nankikualtsintiliskej namochan, sayoj ke nochan uejueliujtok. 10 Yejua ika desde iluikak amo uetsik ajuach, uan itech taltikpak amo motachiuak. 11 Uan nikchiuak maj tauaki itech taltikpak uan tepemej. Nejon kichiuak maj tasojti trigo,* vino, aceite uan okseki taman tatok. Yejua ika namejuan uan namotapialuan nantajyouiaj uan nenkaj chikauak nantekitij’”.

12 Zorobabel,* tayekankatiopixkat Josué* uan okseki judíos kikakkej tein ininDios Jehová kiniluij uan tein kinmatiltij tanauatijkej Ageo, porin ininDios Jehová kititanka. Uan judíos peuak kimojkatokaj Jehová.

13 Uan Ageo itanauatijkauj Jehová, kiniluij judíos tein Jehová kinauatijka maj kitematilti. “Nejua Jehová namechiluia: ‘Nejua namechpaleuijtok’”.

14 Uan Jehová kiyolchikauak Zorobabel* akin taixyekanaya Judá, tayekankatiopixkat Josué* uan okseki judíos. Uan yejuan yajkej uan peuak kiyekchijchiuaj ichan ininDios Jehová akin kinixyekana iangeluan. 15 Yejuan peuak tekitij itech tonal 24 den metsti elul,* keman Darío yajtoyaya para ome xiuit kemej tekiuaj.

2 Itech tonal 21 den metsti tisri,* tanauatijkej* Ageo kitematiltij nejin tein Jehová kiluijka: 2 “Nimitstajtania xiknojnotsati Zorobabel iokichpil Sealtiel akin taixyekana Judá, tayekankatiopixkat Josué iokichpil Jehozadac uan okseki judíos uan xikintajtani:* 3 ‘¿Akoni kiitak keniuj achto tel kualtsin chijchiujtoya nejin kali? ¿Keniuj nankiitaj axkan? ¿Nankinemiliaj ke nion tepitsin kualtsin moita?’.

4 ”Yejua nejin tein kiyekijtoua Jehová: ‘Ximoyolchikaua Zorobabel uan ximoyolchikaua tayekankatiopixkat Josué iokichpil Jehozadac’.

”Jehová kiyekijtoua nejin: ‘Uan nochi namejuan akin nikan nanemij no ximoyolchikauakan uan xitekitikan’.

”‘Porin nejua namechpaleuijtok’, ijkon kiyekijtoua Jehová akin kinixyekana iangeluan. 5 ‘Xikelnamikikan tein nimotenkauak namouan keman nankiskej de Egipto, uan hasta axkan niksentoka namechixyekana ika nochikaualis.* Yejua ika, amo ximouikan’”.

6 “Porin yejua nejin tein kijtoua Jehová akin kinixyekana iangeluan: ‘Amo uejkaua oksepa niktsetselos iluikak uan taltikpak, mar uan tal’.

7 ”Yejua nejin tein kijtoua Jehová akin kinixyekana iangeluan: ‘Nikintsetselos nochin altepemej, uan nochi tein patiyoj tein onkak itech altepemej kalakis itech nejin kali, uan nikchiuas maj okachi kualtsin moita’.

8 ”Yejua nejin tein kiyekijtoua Jehová akin kinixyekana iangeluan: ‘Nochi plata uan nochi oro noaxka’.

9 ”Jehová akin kinixyekana iangeluan kijtoua: ‘Nejin kali okachi kuakualtsin yeski ke tein achto yetoya’.

”Jehová akin kinixyekana iangeluan kiyekijtoua: ‘Uan nikchiuas maj nikan nochin kuali momachilikan’”.

10 Itech tonal 24 den metsti kislev,* keman Darío yajtoyaya para ome xiuit kemej tekiuaj, Jehová kinojnotsak tanauatijkej Ageo uan kimatiltij nejin: 11 “Jehová akin kinixyekana iangeluan kijtoua: ‘Nimitstajtania xikintajtani tiopixkamej toni kijtoua Tanauatil de nejin: 12 “Komo se takat kikalakia itech itasal nakat tein chipauak porin kimaktilij Dios uan nejon tasal monetechoua itech pantsin, tapalol, vino, aceite oso okseki taman takual, ¿no yeski chipauak nochi nejin tein kinetechoj?”’”.

Tiopixkamej kinankilijkej: “¡Amo!”.

13 Ageo oksepa kintajtanij: “Komo se akin amo chipauak porin kimatokak* se miket* kikitskia nochi nejin takual, ¿kipitsotilis?”.

Tiopixkamej kinankilijkej: “Kemaj, kipitsotilis”.

14 Uan Ageo kijtoj: “Yejua nejin tein Jehová kijtoua: ‘Ijkon nikinita akin nikan nemij, ijkon nikinita akin nemij itech nejin altepet uan no ijkon nikita nochi tein kichiuaj ika ininmauan. Nochi tein kitemaktiaj amo chipauak’.

15 ”‘Sayoj ke namechtajtania kuali xiknemilikan nejin desde axkan: keman ayamo kisajsalouayaj tet para kiyekchijchiuaskej templo tein nejua Jehová noaxka, 16 ¿toni panouaya? Ijkuak, keman aksa* yaya kampa kisentiliaya trigo uan kinemiliaya ke kipexontiskia* 20 chikiujmej, sayoj kipexontiaya majtakti. Uan keman aksa yaya kampa mosentiliaya vino uan kinemiliaya ke kipexontiskia 50 konmej, sayoj kipexontiaya 20. 17 Nejua namechtatsakuiltij. Kampa nantatokkej nikchiuak maj tonalejeka, maj tachauisyoua uan maj tesiui. Sayoj ke namejuan amo namoyolpatakej’. Ijkon kiyekijtoua Jehová.

18 ”‘Itech nejin tonal 24 den metsti kislev* nankitsineualtijkej templo tein nejua Jehová noaxka. Namechtajtania kuali xiknemilikan nejin desde axkan. 19 ¿Onkakok xinach kampa ipa nankisentiliaj? ¿Melauj ke ayamo kitemakaj inintakilo uvajkoujmej, higojkoujmej, granadajkoujmej uan olivojkoujmej? Sayoj ke desde axkan namechtatiochiuis’”.

20 No itech nejon tonal 24 den metsti kislev, Jehová oksepa kinojnotsak Ageo. Yejua kiluij: 21 “Xikilui Zorobabel akin taixyekana Judá: ‘Niktsetseloti iluikak uan taltikpak. 22 Nikinixpolos nochin tekiuanij uan amo nikauasok maj taixyekanakan. No nikinixpolos nochin soldados akin nemij itech altepemej uan tein kikuij para tateuiskej. Nikinixpolos inincarros tein kikuij keman tateuiaj uan akin kiuikaj nejon carros. Nochin caballos mikiskej uan akin inintech youij momijmiktiskej ika espada’”.*

23 “Jehová akin kinixyekana iangeluan kiyekijtoua: ‘Notekitikauj Zorobabel akin tiiokichpil Sealtiel, nejon tonal nikchiuas ximochiua kemej se anillo tein patiyoj, porin tejua nimitsixtalij’. Ijkon kiyekijtoua Jehová. Yejua nejin tein kiyekijtoua Jehová akin kinixyekana iangeluan”.