MALAQUÍAS

1 Dios kitematiltia nejin:

Yejua nejin tein Jehová kiluij Malaquías* maj kinmatilti israelitas:

2 Jehová kijtoua: “Nejua namechnextiliani ke namechtasojta”.

Sayoj ke namejuan nankijtouaj: “¿Keniuj titechnextiliani ke titechtasojta?”.

Jehová kiyekijtoua: “Esaú katka iikniuj Jacob, sayoj ke nejua niktasojtak Jacob 3 uan niktauelitak Esaú. Nikchiuak maj amo teyi onka itech tepemej tein iaxka, uan ital nikinkauilij koujtajitskuimej* tein nemij kampa tauaktok”.

4 “Edom* kijtoua: ‘Maski techtauejuelouilijkej, timokepaskej uan tikyekchijchiuaskej tein uejueliujtok’, sayoj ke Jehová akin kinixyekana iangeluan kijtoua: ‘Yejuan kichijchiuaskej, sayoj ke nejua nikxitinis, uan ompa tatokaytiskej “tal kampa nemij akin kichiuaj tein amo kuali” uan “akin Jehová amo kemanok kinyekitas”. 5 Namejuan israelitas nankiitaskej uan nankijtoskej: “Maj kiueyitalikan Jehová itech nochin talmej tein ininaxka israelitas”’”.

6 “Nejua Jehová akin nikinixyekana noangeluan namechiluia namejuan tiopixkamej akin amo nankipoujkaitaj* notokay: ‘Se okichpiI kitakachiua itat uan takeual kitakachiua iteko. Yejua ika, komo nejua namopaj, ¿keyej amo nanechtakachiuaj? Uan komo nejua namoteko, ¿keyej amo nanechmojkatokaj?’.*

”‘Sayoj ke namejuan nankijtouaj: “¿Keniuj amo tikpoujkaitanij motokay?”’.

7 ”‘Keman nankitemaktiaj itech noaltar takual* tein amo chipauak’.

”‘Uan namejuan nankijtouaj: “¿Keniuj tikchiuanij amo xichipauak?”’.

”‘Keman nankijtouaj “Amo teyi panoua komo tiktaliaj itech imesa Jehová tein yeski”. 8 Keman nankitemaktiaj se tapial tein amo tachia, nankijtouaj: “Amo teyi panoua”. Uan keman nankitemaktiaj se tapial tein koxoj oso tein mokokoua, nankijtouaj: “Amo teyi panoua”’”.

“Xikuikilikan namotaixyekankauj. ¿Namoluiaj ke yolpakis keman namechitas? ¿Namoluiaj ke kuali namechselis?”, ijkon kijtoua Jehová akin kinixyekana iangeluan.

9 Uan axkan xiktataujtikan Dios uan xiktajtanikan maj techikneli. Jehová akin kinixyekana iangeluan kijtoua: “Komo namejuan nanechinmaktiliaj nejon tapialmej, ¿namoluiaj ke kuali namechselis?”.

10 Jehová akin kinixyekana iangeluan kijtoua: “Namejuan amo nankitsakuaj puertas den templo nion nankixotaltiaj tit* itech noaltar komo amo namechtaxtauiaj. Namejuan amo nanechyolpaktiaj nion nechyolpaktia nion teyi tein namejuan nanechmaktiliaj”.

11 Jehová akin kinixyekana iangeluan kijtoua: “Porin notokay kiueyitaliskej itech nochin altepemej, desde kampa ualkisa tonaltsin hasta kampa pankalaki. Kampa yeski nechchichinouiliskej tapialmej uan nechmaktiliskej miak taman para kiueyitaliskej notokay. Tein nechtayokoliskej nechyolpaktis. Porin notokay kiueyitaliskej itech nochin altepemej.

12 ”Sayoj ke namejuan nion tepitsin nankipoujkaitaj notokay keman nankijtouaj ‘Amo teyi panoua komo tikpitsotiliaj imesa Jehová uan amo teyi panoua komo ompa tiktaliaj tein yeski takual’. 13 No nankijtouaj ‘¡Techyolajxitijya nejin tekit!’, uan amo teyi nankiuelitaj”, ijkon kijtoua Jehová akin kinixyekana iangeluan. “Namejuan nankinualkuij tapialmej tein kinichtekkej, tein koxojmej uan tein mokokouaj para nanechinmaktiliskej. ¿Namoluiaj ke nikuis tein nanechmaktiliaj?”, ijkon kijtoua Jehová.

14 Jehová akin kinixyekana iangeluan kijtoua: “Kipanos tein amo kuali akin kitemoua kikajkayauas Jehová, porin kimaktilia se tapial tein mokokoua keman motenkaua teisa maski kipia se tapial tein kuali. Porin nejua niueyi Tekiuaj, uan akin nemij itech okseki altepemej kimojkatokaskej notokay”.

2 “Uan axkan, namechmakati se tanauatil tiopixkamej. 2 Komo amo nanechkakij uan amo nankiixtaliaj nankiueyichiuaskej notokay, namechtatsakuiltis, uan keman nantajtaniskej maj israelitas kinpano tein kuali, nejua nikchiuas maj kinpano tein amo kuali. Uan ijkon nikchiujtokya porin amo nankikakij tein namechiluia”. Yejua nejin tein kijtoua Jehová akin kinixyekana iangeluan.

3 “¡Xikakikan! Kemej nankichiujkej tein amo monekia, nikchiuas maj amo ixua tein kitokaskej israelitas. Namechixkajkauilis kuitat, ininkuit tapialmej tein nankintemaktiaj keman naniluichiuaj, uan namejuan namechtamotatiuij kampa tentok kuitat. 4 Uan ijkon nankimatiskej ke nejua namechmakak nejin tanauatil para maj amo ixpoliui tein nimotenkauak iuan Leví”. Yejua nejin tein kijtoua Jehová akin kinixyekana iangeluan.

5 “Tein nimotenkauak iuan, tapaleuij para maj amo miki uan maj kualtsin nemi. Kemej ijkon niktatiochiuij, yejua nechmojkatokaya. Uan kemej semi kipoujkaitaya* notokay, amo kichiuaya nion teyi tein amo nechyolpaktia. 6 Yejua tamachtiaya tein melauj uan amo keman kijtouaya tein amo kuali. Kuali mouikaya nouan uan kichiuaya tein kuali, uan kinpaleuij miakej maj amo kichiuanijok tein amo kuali. 7 Porin se tiopixkat moneki kinmachtis israelitas maj kuali kiixmatikan Dios uan moneki yejua kiitatiuij para maj kinilui toni kijtoua tanauatil, porin yejua kijtoua tein nikneki nejua Jehová akin nikinixyekana noangeluan”.

8 Jehová akin kinixyekana iangeluan kijtoua: “Sayoj ke namejuan nankiskej den ojti tein monekia nankitojtokaskej, uan namotajtakol maj miakej amo kitakamatikanok notanauatil. Namejuan nankichiujkej maj amo kualtiaok tein nimotenkaujka iuan Leví. 9 Yejua ika nikchiuas maj amo kuali namechitakan uan namechpinaujtis ininixpan nochin israelitas, porin amo nankitakamatkej notanauatiluan uan nankinchichikouiayaj israelitas keman nankiixtaliayaj toni kinnamikia kiseliskej”.

10 “Tinochin tikpiaj sayoj se topaj, tinochin techchijchiuak sayoj se Dios. Yejua ika, ¿keyej timokajkayauaj uan timochiuiliaj tein amo kuali? Keman ijkon tikchiuaj, tikixtopeuaj tein Dios motenkauak iniuan touejkaujtatuan. 11 Akin nemij Judá amo tatakamatinij uan ompa Israel uan Jerusalén kichiuanij tein tel pitsotik. Akin nemij Judá nion tepitsin kitakachiuanij Jehová akin semi kiyolpaktia tein senkis chipauak, uan monamiktiaj iniuan siuamej akin kinueyichiuaj dioses den okseki altepemej. 12 Jehová kinixpolos israelitas* akin kichiuaskej nejin, kiixpolos akin yeski, maski teisa kimaktiliskej Jehová akin kinixyekana iangeluan”.

13 “Uan no, namejuan nankichiuaj okse taman tein kichiua maj ialtar Jehová apachiui* porin tel chokaj hasta tsijtsiknouaj. Yejua ika, yejua amo kiseliaok tein nankimaktiliaj nion kiyolpaktiaok nion teyi tein nankiuikiliaj. 14 Uan namejuan nantajtanij: ‘¿Uan keyej?’. Porin Jehová kiitstok tein amo kuali tein nankichiujtokej. Nankikajkayaujtokej namosiuatsin akin namouan yetoni desde keman katkaj nantelpochmej. Nankikaujtokej siuatsin akin iuan namonamiktijkej* uan akin namechpaleuiani. 15 Sayoj ke sekin kiixtalijkej amo ijkon kichiuaskej porin kinekij kinpiaskej konemej akin yekmelauj yeskij ikoneuan Dios. Yejuan mokauajok maj Dios kinixyekana ika ichikaualis. Yejua ika xikyekitakan toni nankinemilijtokej nankichiuaskej uan xikixtalikan amo keman nankikauaskej namosiuatsin akin iuan namonamiktijkej keman katkaj nantelpochmej. 16 Porin Jehová akin kinixyekana israelitas kijtoua ‘Semi nechkualantia keman se takat kikaua isiuatsin akin iuan monamiktijka* uan keman aksa* kiuelita tateuis’, ijkon kijtoua Jehová akin kinixyekana iangeluan. Yejua ika, xikyekitakan toni nankinemilijtokej nankichiuaskej uan amo ximokajkayauakan nion ximochiuilikan tein amo kuali.

17 ”Namejuan nankiyolajxitijkejya Jehová ika tein nankijtouaj. Sayoj ke namejuan nantajtanij: ‘¿Keniuj tikyolajxitianij?’. Keman nankijtouaj ‘Jehová kuali kinita uan kintatiochiuia akin kichiuaj tein amo kuali’, oso keman nantajtanij ‘¿Kani yetok Dios akin kichiua tein kuali yetok?’”.

3 Jehová akin kinixyekana iangeluan kijtoua: “¡Xikakikan! Niktitaniti se akin kitematiltis tein nikneki, uan yejua tayekantias uan kitapojtias ojti achto ke nipanos. Uan namoTeko akin namejuan nankitemouaj, sepasan ejkotiuetsis itech itemplo. Uan ualas akin nankitelnekij maj ejko, akin itech mochiua tein Dios motenkauak. Xikyekmatikan ke yekmelauj ualas”.

2 “¿Uan akoni taxikos keman yejua ualas uan akoni uelis ijkatos keman nesikiuj? Porin yejua yeski kemej tit* tein aksa kikui para kichipauas tepos uan kemej xapoj tein kikuij tapakanij. 3 Uan ijkon kemej aksa motalia para kiatilis plata uan kuali kichipauas, namoTeko motalis uan kinchipauas ikoneuan Leví. Kinchipauas kemej se kichipaua oro uan plata, uan yejuan kichiuaskej tein kuali yetok uan kimaktiliskej Jehová miak taman. 4 Uan Jehová semi kiyolpaktis tein kimaktiliskej akin nemij Judá uan Jerusalén, ijkon kemej kiyolpaktiaya tein kimaktiliayaj ne uejkauj.

5 ”Niualas para nikixtalis toni kinamiki nankiseliskej, uan niman nikinteluilis naualmej, akin kikajkayauaj ininsiuatsin oso inintakatsin, akin motenkauaj teisa tein amo kichiuaskej uan akin amo kinekij kipaleuiskej akin okseko ualeua. No niman nikinteluilis akin takajkayauaj para kitachtekiskej se tekitikej, se siuatsin akin amo nemiok itakatsin oso se konet akin amo kipiaok itat. Yejuan amo nechmojkatokanij”, ijkon kijtoua Jehová akin kinixyekana iangeluan.

6 “Nejua niJehová uan amo nimopata. Namejuan nanikoneuan Jacob uan ayamo nanixpoliuinij. 7 Desde keman nemiaj namouejkaujtatuan, namejuan ipa amo nankitakamatinij notanauatiluan. Ximokepakan nouan uan nejua nimokepas namouan”, ijkon kijtoua Jehová akin kinixyekana iangeluan.

Sayoj ke namejuan nankijtouaj: “¿Uan keyej moneki timokepaskej?”.

8 Dios kijtoua: “¿Ueli se takat kitachtekia Dios? Sayoj ke namejuan nanechtachtekijtokej”.

Uan namejuan nantajtanij: “¿Keniuj timitstachtekianij?”.

“Keman namokuiliaj diezmos* uan tein nechmaktiliaj. 9 Namejuan namechpanos miak taman tein amo kuali porin nanechtachtekijtokej. Nochin israelitas ijkon kichiujtokej. 10 Xikualkuikan diezmo tein ajsitok kampa mosentilia tein nechtayokoliaj para maj nochan onka takual. Namechtajtania ijkon xikchiuakan para nankiitaskej tein nikchiuati. Namejuan nankiitaskej ke nitatapoua iluikak uan namechpantoyauilia miak tatiochiualismej hasta maj amo teyi namechpolo”, ijkon kijtoua Jehová akin kinixyekana iangeluan.

11 Jehová akin kinixyekana iangeluan kijtoua: “Amo nikauas maj okuiltsitsin tatamikan kampa nantatokaj, uan kampa nankipiaj uvajkoujmej motachiuas”.

12 Jehová akin kinixyekana iangeluan kijtoua: “Akin nemij itech nochin altepemej kijtoskej ke semi nanyolpakij, porin nanemiskej itech se tal tein kichiua maj se yolpaki”.

13 Jehová kijtoua: “Namejuan amo kuali noka nantajtouaj”.

Uan namejuan nankijtouaj: “¿Kemanian tejuan amo kuali moka titajtouanij?”.

14 “Namejuan nankijtouaj: ‘Nenkaj se kitekitilia Dios. Nenkaj tikchiuaj tekit tein techmakatok ta amo teyi tiktanij, uan nenkaj tiknextiliaj Jehová akin kinixyekana iangeluan ke titayokoyaj porin titajtakolchiujkej. 15 Desde axkan tikijtoskej ke yolpakij akin moueyimatij, uan ke kuali kinyoui akin kichiuaj tein amo kuali. Yejuan kiixnamikij Dios para kiitaskej toni kichiua uan amo teyi kinpanoua’”.

16 Ijkuak, akin kimojkatokayaj Jehová peuak monojnotsaj, sejse peuak monojnotsa iuan itasojikniuj. Uan Jehová kisentokaya kuali kinkaktoya. Uan iixpan Jehová peuak moijkuiloua se amatajkuilol para kinelnamikis akin kimojkatokaj uan itech tanemiliaj* itokay.

17 Jehová akin kinixyekana iangeluan kijtoua: “Itech tonal keman nimoinaxkatilis, yejuan mochiuaskej noaxkauan akin semi nikintasojtas.* Uan nikiniknelis ijkon kemej se tepopaj kiiknelia ikoneuj akin kitakamati. 18 Namejuan oksepa nankiitaskej keniuj semi taman se akin yolkuali uan se akin amo yolkuali, uan keniuj semi taman se akin kitekitilia Dios uan se akin amo kitekitilia”.

4 Jehová akin kinixyekana iangeluan kijtoua: “¡Xikakikan! Ejkos tonal tein yeski kemej se horno tein tel xotatok. Uan ijkuak, nochin akin kichiuaj tein amo kuali uan nochin akin moueyimatij yeskij kemej xiuit tein uakik. Nejon tonal tein ualajtok kintamichichinos uan amo mokauas nion se ininmaxiujyo uan nion se ininmakoujyo. 2 Sayoj ke namejuan akin nankipoujkaitaj* notokay, namotech milinis tonaltsin tein kiualkui tein kuali yetok, uan itanex* namechpajtis. Uan namejuan nanajkotsikuiniskej kemej kuakuejkonemej tein tomaujkej”.

3 Jehová akin kinixyekana iangeluan kijtoua: “Uan namejuan ininpan nantajtaksaskej* akin amo yolkualmej, porin itech tonal keman nikchiuas tein nikixtalijtok, yejuan yeskij kemej talnex tein ipan nantaksaj”.

4 “Xikelnamikikan Tanauatil tein nikmakak notekitikauj Moisés ompa Horeb, kampa ixnesi nochi tein nitanauatia uan tein nikixtalia, tein nikiniluij nochin israelitas maj kitakamatikan.

5 ”¡Xikakikan! Namechtitaniliti tanauatijkej* Elías achto ke ejkos ueyi tonal tein Jehová kiixtalij uan tein se kimojkaitas. 6 Uan Elías kichiuas maj ininyolo tetatmej mochiua kemej ininyolo ininkoneuan uan maj ininyolo konemej mochiua kemej ininyolo tetatmej. Komo amo ijkon mochiua, niualas uan nikuitekis tal para maj ixpoliui”.

(Nikan tami iTajtol Dios tein moijkuilojka itech tajtol hebreo uan arameo, uan peua iTajtol Dios tein moijkuilojka itech tajtol griego).