1 CORINTIOS

1 Nejua Pablo namechtajkuilouilia. Cristo Jesús nechijitak* para nikchiuas tekit kemej tatitanil porin Dios ijkon kinekik. Nietok iuan tokniuj Sóstenes. 2 Namechtajkuilouilia namejuan akin nanpouij itech inechikol Dios ompa Corinto, uan no akin noyampa* kiteneujtokej itokay toTekotsin Jesucristo, ininTekotsin uan no toTekotsin. Dios namechxeloj para xisenpouikan iuan Cristo Jesús uan namechnotsak para nanyeskij naniaxkauan.*

3 Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios.

4 Nochipa niktasojkamatilia noDios porin namechnextilij itatiochiualis tein amo technamiki itechkopa Cristo Jesús. 5 Uan kemej nanpouij iuan Cristo, Dios namechmakak nochi, yejua ika kuali nankiteixmatiltiaj itajtol uan kuali nankiixmatij tein melauak, 6 uan moita ke nankiyekneltokaj tamachtilis tein ika tajtoua Cristo. 7 Yejua ika amo teyi namechpoloua axkan ke semi nankichixtokej* ijkuak toTekotsin Jesucristo kinextis ichikaualis. 8 Dios no namechpaleuis amo ximotsinkixtikan, uan ijkon amo akin uelis namechteluilis itech tonal keman toTekotsin Jesucristo ualas. 9 Dios nochipa kichiua tein kijtoua. Yejua namechnotsak para xisenpouikan iuan iKoneuj, toTekotsin Jesucristo.

10 Axkan, nokniuan, namechtataujtia itokaykopa toTekotsin Jesucristo, nanochin ximoyektenkauakan uan amo xixexeliujtokan, ta xikpiakan sayoj se tanemilil uan xikixejekokan sayoj se taman. 11 Nokniuantsitsin, namechiluia nejin porin sekin akin nemij ichan Cloe nechmatiltijkej ke namotajtolteuiaj. 12 Nikijtoua nejin porin tataman tein nankijtojtinemij. Sekin kijtouaj: “Nejua niktojtoka Pablo”, “Nejua niktojtoka Apolos”, “Sayoj ke nejua niktojtoka Cefas”,* “Uan nejua niktojtoka Cristo”. 13 ¿Nankinemiliaj ke Cristo xexeliujtok? Pablo amo namoka momikilij,* ¿melauj? ¿Oso xe namechauijkej itokaykopa Pablo? 14 Niktasojkamatilia Dios porin amo namechauij, ta sayoj nikinauij Crispo uan Gayo, 15 porin ijkon amo akin uelis kijtos ke namechauijkej notokaykopa. 16 Tein melauj, no nikinauij akin nemij ichan Estéfanas. Amo nikelnamiki maj nikinauiani oksekin. 17 Cristo amo nechtitanik maj nikinaui oksekin, ta maj nikteixmatilti kuali tanauatilmej.* Yejua amo nechtitanik maj nitanojnotsa kemej tajtouaj akin semi taixmatij. Porin komo ijkon nikchiuaskia, nenkaj momikilij Cristo itech kouit.*

18 Tein melauj, akin ixpoliuitij* kiitaj ke tamachtilis tein ika tajtoua imikilis Cristo itech kouit* amo tapaleuia, sayoj ke tejuan akin techmakixtijtokej tikitaj ke nejon kinextia ichikaualis Dios. 19 Porin ijkuiliujtok: “Nikchiuas maj tamatinij amo yektanemilikanok uan nikixtopeuas* inintanemilil akin motelmachtiaj”. 20 ¿Kani yetok tamatkej? ¿Kani yetok tajkuilojkej?* ¿Kani yetok akin kiuelita motajtolteuis itech nejin tonalmej?* ¿Xe Dios amo kinextij ke amo tapaleuia inintamatilis akin nemij nikan taltikpak? 21 Porin yejuan takuaujtamatkej itech inintamatilis, yejua ika amo kiixmatkej Dios. Tein tikteixmatiltiaj, oksekin kiitaj ke amo tapaleuia, sayoj ke ika tein tikteixmatiltiaj Dios kinmakixtij akin taneltokaj. Ijkon monextij ke Dios semi tamatkej.

22 Judíos tajtanij kiitaskej milagros uan griegos kinekij yeskij tamatinij. 23 Sayoj ke, tejuan tikteixmatiltiaj Cristo akin kikoujpampilojkej, se taman tein judíos amo kiuelitaj uan akin amo judíos kiitaj ke amo tapaleuia. 24 Sayoj ke, akin Dios kinnotsak, yeskij judíos oso griegos, kiitaj ke Dios kinextia ichikaualis uan itamatilis itechkopa Cristo. 25 Miakej uelis kijtoskej ke tein iaxka Dios amo tapaleuia uan amo chikauak, sayoj ke nejon okachi tapaleuia uan okachi chikauak ke yejuan.

26 Nokniuan, namejuan uelis nankiitaskej ke keman Dios namechnotsak, amo namiakej namechitayaj ke nantamatinij, namiakej amo nantaixyekanayaj uan namiakej amo nankatkaj ininchankauan uejueyi chiuanimej, 27 ta Dios kinijitak* akin oksekin kinitaj ke amo teyi kimatij para kinpinaujtis tamatinij. Dios kinijitak akin oksekin kinitaj ke amo chikaujkej para kinpinaujtis akin chikaujkej. 28 Uan Dios kijitak tein oksekin kiitaj ke amo tayekantok uan tein kiixtopeuaj, kijitak tein amo kipia ipatiuj para kiixpolos tein kipia ipatiuj, 29 uan ijkon amo akin uelis moueyimatis* iixpan Dios. 30 Dios kichiuak xipouikan iuan Cristo Jesús. Yejua kinextij ke Dios semi tamatkej, techpaleuia maj Dios techita ke tiyolmelaujkej, itechkopa uelis tiyeskij tichipaujkej uan yejua taxtauak para techmakixtis. 31 Ijkon uelis mochiuas tein ijkuiliujtok: “Akin moueyitalia, maj moueyitali porin kiixmati Jehová”.*

2 Yejua ika nokniuan, keman namechitato, ika namechnojnotsak tein Dios amo kitematiltijtoya,* sayoj ke amo nitajtoj kemej nanechmojkaitaskiaj oso kemej niknextiskia ke semi nitamatkej. 2 Porin keman nietoya namouan, nikixtalij sayoj ika namechnojnotsas Jesucristo, uan ke kikoujpampilojkej. 3 Keman namechitato nikuetauia, nimouia uan semi niuiuiyokaya. 4 Uan keman namechnojnotsak uan namechmachtij, amo nitajtoj kemej tajtouaj tamatinij para tetaneltoktiskej, ta tein nikijtoj kinextij tein Dios ueli kichiua ika ichikaualis 5 para xitakuaujtamatikan itech ichikaualis Dios uan amo itech tamatilis tein onkak nikan taltikpak.

6 Tejuan ika titajtouaj tamatilis iniuan akin semi takuaujtamatij. Sayoj ke amo ika titajtouaj inintamatilis akin nemij itech nejin tonalmej,* nion ika inintamatilis taixyekananij, tein ixpoliuiti. 7 Tejuan ika titajtouaj tein Dios amo kitematiltijtoya,* nejin yejua itamatilis tein amo nochin kiixmatij. Dios kiixtalij nejin achto ke nikan taltikpak peuaskia mochiuaskia tein amo kuali, para maj techueyitalikan. 8 Yejua nejin tamatilis tein amo kiixmatik nion se taixyekankej akin nemi itech nejin tonalmej;* porin komo kiixmatiskiaj, amo kimiktiskiaj* toueyi Tekotsin. 9 Ijkon kemej ijkuiliujtok: “Amo akin kiitani, amo akin kikakini uan nion akin kinemiliani tein Dios kinmakati akin kitasojtaj”. 10 Dios ika ichikaualis techmatiltij nochi nejin, porin ichikaualis Dios kiyeknextia nochi, hasta itanemililuan Dios tein amo ueli se kitamiajsikamati.

11 Porin amo ueli se kimati tein okse kinemilijtok. Sayoj yejua kimati tein kipia itech iyolo. No ijkon, amo akin kiixmati itanemililuan Dios, ta sayoj ichikaualis Dios. 12 Tejuan amo timoyekanaj ika tein kinemiliaj oksekin, ta timoyekanaj ika ichikaualis Dios, para maj tikixmatikan tein Dios techmakani ika nochi iyolo. 13 Tejuan no ika titajtouaj nejin, sayoj ke amo tikuij tajtolmej tein techmachtij se tamatkej, ta tein Dios techmachtij ika ichikaualis. Yejua ika, tikmelauaj itanemililuan Dios keman tikteixmatiltiaj tein Dios techmachtij ika ichikaualis.

14 Sayoj ke akin moyekana ika tein kinejneki inakayo amo kiselia tein Dios kiteixmatiltia ika ichikaualis, porin yejua kiita ke amo tapaleuia, uan amo no ueli kiajsikamati porin moneki kipias ichikaualis Dios para kiyektemos. 15 Sayoj ke akin moyekana ika ichikaualis Dios kiyektemoua nochi, sayoj ke amo akin ueli kiixejekoua ox tein kichiua kuali yetok oso amo. 16 Porin “¿akoni ueli kiixmati itanemililuan Jehová?* ¿Akoni uelis kimachtis Dios?”. Sayoj ke tejuan kemaj titanemiliaj kemej Cristo.

3 Yejua ika, nokniuan, amo uelik namechnojnotsak kemej akin moyekanaj ika ichikaualis Dios, ta kemej akin moyekanaj ika tein kinejneki ininnakayo, kemej pipilkonemej akin amo kiyekajsikamatij keniuj kitojtokaskej Cristo. 2 Kemej ayamo semi nanchikaujkej nankatkaj namechmakak leche porin ayamo uelia nantakuayaj. Tein melauj, axkan amo no semi nanchikaujkej, 3 porin nankisentokaj namoyekanaj ika tein kinejneki namonakayo. Kemej namonenexikoluiaj uan namoteuiaj, ¿amo kinextia nejon ke namoyekanaj ika tein kinejneki namonakayo? Nankichiujtinemij tein oksekin kichiuaj. 4 Keman se kijtoua “Nejua niktojtoka Pablo”, sayoj ke okse kijtoua “Nejua niktojtoka Apolos”, ¿amo kinextia nejon ke nankichiujtinemij tein oksekin kichiuaj?

5 ¿Toni chiujkej Apolos? ¿Toni chiujkej Pablo? Yejuan sayoj takeualmej akin kichiuaj tekit tein toTekotsin kinmakak. Sayoj tapaleuijkej maj namejuan xitaneltokakan, ijkon kemej toTekotsin kinpaleuij sejse. 6 Nejua nitatokak, Apolos kiatekij tein niktokak, sayoj ke Dios kisentokak kichiuak maj moskalti. 7 Yejua ika akin tatoka amo teyi chiujkej nion akin kiatekia tatok, ta Dios, akin kichiua maj moskalti. 8 Akin tatoka uan akin kiatekia tatok sentekitij,* sayoj ke sejse Dios kitatiochiuis ijkon kemej tekitis. 9 Porin tiitekitikaikniuan* Dios. Namejuan kemej yeskia italpan Dios kampa yejua tatoktok, kemej yeskia se kali tein Dios kichijchiujtok.

10 Dios nechmakak itatiochiualis tein amo technamiki, yejua ika niktalij tatsineualoni kemej se akin kimati kuali kalchijchiuas,* sayoj ke okse itech tachijchiujtok. Maj sejse kiyekita keniuj kiketsa kali. 11 Porin amo akin ueli kitalia okse tatsineualoni porin yetokya Jesucristo. 12 Aksa* uelis kichijchiuas se kali itech tatsineualoni uan kikuis oro, plata uan tetsitsin tein patiyojkej, oso kouit uan miak taman xiuit. 13 Keman ejkos tonal moitas toni ika chijchiujtok tein kichiuak sejse. Ika tit* monextis ox tein sejse kichijchiuak kuali chijchiujtok oso amo. 14 Komo taxikoua tein aksa kichijchiuak itech tatsineualoni, kitatiochiuiskej. 15 Komo tata* tein kichijchiuak aksa, kipolos tein kichijchiujkaya, sayoj ke yejua momakixtis; sayoj ke kipanos kemej akin momakixtia kampa tachichinaujtok.

16 ¿Amo nankimatij ke namejuan kemej yeskia itemplo Dios uan ke ichikaualis yetok namotech? 17 Komo aksa kiixpoloua itemplo Dios, Dios kiixpolos yejua, porin itemplo Dios yejua moxelouilij, uan namejuan nankiixnextiaj nejon templo.

18 Maj amo akin mokajkayaua: komo semej kinemilia ke tamatkej ininixpan oksekin, maj mochiua kemej akin amo teyi kimati para maj mochiua tamatkej. 19 Porin Dios kiita ke inintamatilis akin nemij nikan taltikpak amo tapaleuia, porin ijkuiliujtok: “Dios kichiua maj tamatinij uetsikan itech ininamo kuali tanemilil”. 20 No ijkuiliujtok: “Jehová* kimati ke tein kinemiliaj tamatinij amo tapaleuia”. 21 Yejua ika, maj amo akin moueyimati* ika tein kichiuaj oksekin, porin nochi namoaxka: 22 yeski Pablo, Apolos, Cefas,* tein onkak nikan taltikpak, tonemilis, mikilis, tein axkan mochiujtok uan tein mochiuas satepan. Nochi namoaxka. 23 Uan namejuan naniaxkauan Cristo, uan Cristo iaxka Dios.

4 Nochin moneki techitaskej kemej tekitinij akin techixyekana Cristo uan kemej tayekankatakeualmej akin kinkauilijkej tein Dios amo kitematiltijtoya.* 2 Sayoj ke, tayekankatakeual moneki kiyekchiuas itekiuj. 3 Amo semi nechtekipachoua maj namejuan oso tamelauanij kiixejekokan ox tein nikchiua kuali yetok oso amo kuali yetok. Tein melauj nion nejua nikixejekoua nejon. 4 Porin nikmattok ke amo nikchiujtok nion teyi tein amo kuali. Sayoj ke amo nikijtosneki ke niyolmelauak, porin sayoj Jehová* kiixejekoua ox tein nikchiua kuali yetok oso amo kuali yetok. 5 Yejua ika, amo teyi xikixejekokan achto ke ejkos tonal, ta ximochiakan hasta keman ualas toTekotsin. Yejua kichiuas maj monexti tein yetok tayouayan uan kichiuas maj momati tein nochin kiyolnemiliaj. Ijkuak, Dios kiueyitalis sejse kemej kinamiki.

6 Nokniuan, nikuik notokay uan no ika nitajtoj Apolos para namechnextilis toni ika nitajtojtok uan ijkon namechpaleuis xikmatikan nejin: “Sayoj xikchiuakan tein ijkuiliujtok”. Ijkon amo namoueyimatiskej* uan amo nankipaleuiskej se uan nankiixnamikiskej okse. 7 Porin ¿akoni kichiua okachi xiueyichiujkej ke oksekin? Tein melauj, ¿amo Dios mitsmakak nochi tein tikpia? Komo yejua mitsmakak nochi, ¿keyej timoueyimattinemi* kemej yeskia amo teyi mitsmakak?

8 ¿Nankipiajya nochi tein nankinekij? ¿Amo teyi namechpolouaok? ¿Nanpeujkejya nantekiuajtij? Yekmelauj niknekiskia xipeuanijya xitekiuajtikan, para maj tejuan no titekiuajtikan namouan. 9 Porin niknemilia ke tejuan titatitanilmej, Dios techualkuik para maj nochin techitakan kemej akin ixyetok kinmiktitij keman tatamitiya. Porin timochiuanij kemej akin kinixpetaniaj miakej uan ángeles. 10 Techitaj ke amo tiyektanemiliaj porin tiktojtokaj Cristo, sayoj ke namejuan nanyektanemiliaj porin nankitojtokaj Cristo; tejuan amo tichikaujkej, sayoj ke namejuan nanchikaujkej; namejuan namechtakachiuaj* sayoj ke tejuan techixtopeuaj. 11 Hasta nejin tonal tiksentokaj amo tikpiaj tein tikuaskej uan tein titayiskej, uan amo semi tikpiaj tein timotaliliskej,* techteuiaj, amo tikpiaj tochan 12 uan chikauak titekitij. Keman techuijuikaltiaj,* kualtsin titanankiliaj; keman techtajyouiltiaj, titaxikouaj ika nejmachkayot; 13 keman techtakajkayauiliaj, kualtsin tikinnojnotsaj. Hasta axkan, nochin techitaj kemej tajsol, uan kemej tein kitamotajya.

14 Amo namechijkuilouilijtok nejin para namechpinaujtis, ta para namechyolmajxitis kemej yeskia nannokoneuan akin nikintasojta. 15 Porin maski namejuan nankinpiaskej 10 mil tamachtianij akin namechnextiliaj keniuj nankitojtokaskej Cristo, tein melauj amo miakej namotatuan. Sayoj ke nimochiuak namopaj porin namechixmatiltij kuali tanauatilmej* tein ika tajtoua Cristo Jesús. 16 Yejua ika namechtataujtia xikchiuakan kemej nejua. 17 Yejua ika namechtitanilia Timoteo, porin yejua nokoneuj akin niktasojta uan kitekitilijtok toTekotsin ika nochi iyolo. Yejua namechelnamiktis keniuj nikchiua seki taman para niktekitilis Cristo Jesús, ijkon kemej nejua nikinmachtijtinemi tokniuan itech sejse nechikol.

18 Sekin kinemiliaj ke amo namechitatiuj uan yejua ika semi moueyimatij.* 19 Sayoj ke, komo Jehová* kineki, amo uejkaua namechitatiuj. Nikneki nikinitas nejon akin semi moueyimatij, amo para nikmatis tein kijtojtokej, ta para nikmatis ox kipiaj ichikaualis Dios. 20 Porin iTaixyekanalis Dios amo monextia ika tein tikijtouaj, ta ika ichikaualis Dios. 21 ¿Toni nankinekij? ¿Maj namechkalpanoti ika se takot, oso maj niknexti ke namechtasojta uan maj namechyemankanojnotsa?

5 Tein melauj, nechmatiltijkej ke namouan yetok se takat akin auilnentok.* Yejua nemi iuan* itakpanan, uan nejon tajtakol nion moita iniuan akin amo taneltokaj. 2 ¿Uan namechyolpaktia nejon? ¿Amo monekiskia nantayokoxtoskej uan nankikalankixtiskej nejon takat? 3 Maski nejua amo nietok namouan, namotech nitanemilijtok, uan nikixtalijya tein moneki nankichiuiliskej nejon takat, kemej yeskia ompa nietoskia namouan. 4 Namejuan nankimatij ke toTekotsin Jesús nechmakak tanauatil uan ke namotech nitanemilijtok. Yejua ika, keman namosentiliskej itokaykopa toTekotsin Jesús, 5 xikmaktilikan Satanás nejon takat para maj ixpoliui tein amo kuali tein kikalakij itech nechikol, para maj inintanemilil tokniuan momakixti itech itonal toTekotsin.

6 Amo kuali yetok ximoueyimatikan.* ¿Amo nankimatij ke tepitsin levadura kixokoltia nochi in tixti? 7 Xikixtikan tein xokoyakya para uelis nanyeskij kemej se yankuik tixti tein amo xokok, ijkon kemej axkan nanyetokej. Tein melauj, Cristo kimiktijkej, uan ijkon mochiuak kemej ichkatsin* tein kitemaktiaj itech Pascua. 8 Yejua ika, maj amo tiiluitikan ika tixti tein amo yankuik tein kipia levadura, nion maj tikuikan levadura tein kiixnextia tajtakol uan tein tel amo kuali. Ta sayoj maj tikuakan pantsin tein amo kipia levadura tein kiixnextia tein kuali uan tein melauak.

9 Itech amatajkuilol tein namechtitanilij, namechijkuilouilij ke amo ximouikakanok iniuan akin auilnemij.* 10 Ika nejin, amo nikijtosnekik ke senkis amo ximonelokanok iniuan akin auilnemij, akin semi kiixnejnekij tein teaxka,* akin tachtekij, oso akin kinueyichiuaj tatadiosmej.* Komo ijkon yeskia, namejuan monekiskia senkis namoxeloskej para amo nanyetoskejok iniuan. 11 Sayoj ke axkan namechijkuilouilia ke komo se tokniuj auilnemi,* semi kiixnejneki tein teaxka,* kinueyichiua tatadiosmej,* teuijuikaltia,* tauana oso tetachtekia, amo iuan ximouikakanok nion iuan xitamajseuakan. 12 ¿Porin keyej moneki maj nejua nikixtali tein kinchiuiliskej akin amo pouij itech nechikol? ¿Amo namejuan nankiixtaliaj tein nankinchiuiliskej akin pouij itech nechikol 13 uan Dios kiixtalia tein kinchiuilis akin amo pouij itech nechikol? “Xikalankixtikan nejon tajtakolchiujkej* akin yetok namouan”.

6 Keman nankipiaj se kuejmol iuan okse, ¿keyej namoteteluilitij iniuan akin amo kitakamatij itanauatiluan Dios? ¿Keyej amo nanyouij iniuan akin Dios moinxelouilij?* 2 ¿Amo nankimatij ke akin Dios moinxelouilij* kiixtaliskej tein kinnamiki kiseliskej akin nemij nikan taltikpak? Uan komo namejuan nankichiuaskej nejon, ¿keyej amo ueli nankiixejekouaj tein amo semi moneki? 3 ¿Amo nankimatij ke tikixtaliskej tein kinnamiki kiseliskej ángeles? Komo ijkon, ¿keyej amo ueli nankiyektaliaj kuejmolmej tein axkan onkak? 4 Yejua ika, komo moneki nankiyektaliskej kuejmolmej tein axkan onkak, ¿keyej nankinitatij maj namechpaleuikan akin tokniuan amo kintakachiuaj?* 5 Namechiluia nejin para ximopinaujmatikan. ¿Xe amo moajsi namouan nion se tamatkej akin uelis kiixejekos keniuj momelauas kuejmolmej tein nankipiaskej? 6 Sayoj ke amo nankichiuaj nejon, ta se tokniuj kiteluiliti okse tokniuj ininixpan jueces akin amo taneltokaj.

7 Namoselti namopinaujtiaj keman namoteteluilijtokej ininixpan jueces. Okachi kuali maj namechchiuilikan tein amo kuali oso maj namechkuilikan tein namoaxka. 8 Sayoj ke namejuan nankinchiuiliaj tein amo kuali oksekin uan nantachtekij, ¡uan nejin nankinchiuiliaj namokniuan!

9 ¿Xe amo nankimatij ke akin amo yolkualmej amo kalakiskej itech iTaixyekanalis Dios? Amo ximokajkayauakan.* Akin auilnemij,* akin kinueyichiuaj tatadiosmej,* akin kikajkayauaj ininnamik, takamej akin mokauaj maj inintakaikniuan iniuan motekakan, takamej akin kitemouaj auilnemiskej* iniuan inintakaikniuan, 10 tachtekinij, akin semi kiixnejnekij tein teaxka,* tauananij, akin teuijuikaltiaj* uan akin takajkayauaj para tachtekiskej amo kalakiskej itech iTaixyekanalis Dios. 11 Uan nansekimej nankichiuayaj nejon. Sayoj ke Dios namechchipauak, namechxeloj uan namechita ke nanyolmelaujkej itokaykopa toTekotsin Jesucristo uan ika ichikaualis Dios.

12 Nochi ueli nikchiua, sayoj ke amo nochi tapaleuia. Nochi ueli nikchiua, sayoj ke amo nikauas maj nion teyi nechxijxiko. 13 Takual chijchiujtok para topox uan topox chijchiujtok para takual, sayoj ke Dios kitamis nochin omen. Uan tonakayo amo chijchiujtok para se auilnemis,* ta para se kitekitilis toTekotsin, uan toTekotsin kiyekpia tonakayo. 14 Sayoj ke Dios ika ichikaualis kichiuak maj toTekotsin oksepa nemi* uan no kichiuas maj oksepa tinemikan tejuan.

15 ¿Amo nankimatij ke namonakayo poui iuan inakayo Cristo uan mochiua sayoj se? ¿Nankinemiliaj ke nikuiti tepitsin inakayo Cristo uan niksentilis iuan se siuaauilnenkej? ¡Amo! 16 ¿Amo nankimatij ke akin mosentilia* iuan se siuaauilnenkej mochiua sayoj se iuan? Porin yejua kijtoua: “Nejon omen mochiuaskej sayoj se”. 17 Sayoj ke akin mosentilia iuan toTekotsin, kipia sayoj se tanemilil iuan. 18 ¡Amo xiauilnemikan!* Okseki tajtakolmej amo kipitsotilia se inakayo, sayoj ke akin auilnemi kipitsotilia inakayo. 19 ¿Amo nankimatij ke namonakayo kemej yeskia se templo kampa yetok ichikaualis Dios tein namechmakak? Uan no, namonakayo amo namoaxka, 20 porin Dios namechkouak. Yejua ika, xikuikan namonakayo para nankiueyitaliskej Dios.

7 Axkan namechnankiliti tein nanechtajtanijkej* keman nanechtajkuilouilijkej. Okachi kuali maj se takat amo kimatoka* nion se siuat. 2 Sayoj ke kemej tel miakej auilnemij,* maj sejse takat kipia isiuatsin uan sejse siuat maj kipia itakatsin. 3 Maj takat kimaka isiuatsin tein moneki,* uan siuat maj no ijkon kichiua iuan itakatsin. 4 Siuatsin amo kipia tanauatil para kiixtalis toni kichiuas ika inakayo, ta sayoj itakatsin. No ijkon, takat amo kipia tanauatil para kiixtalis toni kichiuas ika inakayo, ta sayoj isiuatsin. 5 Amo xikixtalikan ke amo namosentekaskej. Sayoj ke komo nanomen namoyektenkaujkej ke seki tonalmej amo namosentekaskej para uelis nankichiuaskej netataujtil, nejon kuali yetok. Uan satepan oksepa uelis namosentekaskej. Porin komo amo ijkon nankichiuaj, uelis amo nankitsakuiliskej tein nankinejnekij uan Satanás ika kitemos ximotajtakolmakakan. 6 Tein namechiluij amo se tanauatil, ta sayoj se taman tein uelis nankichiuaskej. 7 Sayoj ke niknekiskia maj nochin yetokan ininselti kemej nejua. Sayoj ke sejse, Dios kimaka se tatiochiualis, sekin maj monamiktikan uan sekin amo.

8 Akin amo kipiaj ininnamik uan siuatsitsin akin momikilijya inintakatsin, nikiniluia ke okachi kuali maj kisentokakan kemej nejua. 9 Sayoj ke komo amo ueli kitsakuiliaj tein kinejnekij, maj monamiktikan, porin okachi kuali maj se monamikti ke se kitelnektos se motekas iuan aksa.*

10 Akin monamiktijkejya nikinnauatia, amo nejua, ta toTekotsin, maj siuatsin amo kikaua itakatsin. 11 Sayoj ke, komo siuatsin kikaua, maj amo oksepa monamikti, uan komo amo kineki yetos iselti, maj mokepa iuan itakatsin. Uan takatsin maj amo kikaua isiuatsin.

12 Sayoj ke, oksekin nikiniluia, kemaj nejua, amo toTekotsin, ke komo se tokniuj kipia isiuatsin akin amo taneltoka uan siuatsin kineki iuan yetos, maj amo kikaua. 13 Uan komo se siuatsin kipia itakatsin akin amo taneltoka uan yejua kineki iuan yetos, maj amo kikaua itakatsin. 14 Porin komo se takatsin amo taneltoka sayoj ke isiuatsin kemaj, yejua kitatiochiuiskej* porin isiuatsin taneltoka. No ijkon siuatsin akin amo taneltoka kitatiochiuiskej* porin itakatsin taneltoka. Komo amo ijkon yeskia, ininkoneuan amo kintatiochiuiskiaj,* sayoj ke yejuan axkan kintatiochiuijkejya.* 15 Sayoj ke komo akin amo taneltoka kineki yas,* maj youi. Komo mochiua nejon, nion tokniuj takat nion tokniuj siuat moneki iuan kisentokas. Dios kichiujtok xiyolseujtokan. 16 Porin tejua siuatsin, ¿keniuj tikmati ox uelis tikmakixtis motakatsin? Oso tejua takatsin, ¿keniuj tikmati ox uelis tikmakixtis mosiuatsin?

17 Sayoj ke, maj sejse kisentoka nemi kemej Jehová* kikaujtok uan kemej nemia keman Dios kinotsak. Yejua nejin tanauatil tein nikinmaka tokniuan itech nochi nechikolmej. 18 ¿Kinotskej se takat keman kitekkajya?* Maj ijkon kisentoka. ¿Kinotskej se takat akin amo kitekkej? Maj amo moteki. 19 Tein okachi moneki yejua se kitakamatis itanauatiluan Dios uan amo ox se moteki* oso amo. 20 Maj sejse kisentoka nemi kemej nemia keman Dios kinotsak. 21 ¿Temako tietoya keman mitsnotskej? Amo ximotekipacho ika nejon. Sayoj ke, komo ueli tikchiua maj mitskajkauakan, xiouj. 22 Porin akin moajsia temako keman kinotskej maj poui iuan toTekotsin, axkan amo moajsiok temako uan iaxkaya toTekotsin. No ijkon, akin amo moajsia temako keman kinotskej, axkan moajsi imako Cristo. 23 Dios namechkouak; amo xikauakanok maj oksekin mochiuakan namotekouan. 24 Nokniuan, maj sejse kisentoka nemi iixpan Dios ijkon kemej nemia keman kinotskej.

25 ToTekotsin amo teyi nechnauatij maj namechilui namejuan akin amo keman namonamiktianij, sayoj ke namechiluia tein niknemilia. Uan kemej toTekotsin nechiknelij uelis nantakuaujtamatiskej itech tein nikijtoua. 26 Yejua ika, kemej mochiujtok miak kuejmolmej, niknemilia ke okachi kuali maj se takat oso siuat kisentoka kemej yetok. 27 Takat, ¿tikpia mosiuatsin? Amo xiktemojto tikauas. ¿Amo tikpia mosiuatsin? Amo xiktemojto timonamiktis. 28 Sayoj ke komo timonamiktia, amo tikchiujtok nion se tajtakol. Uan komo monamiktia se akin amo keman monamiktiani, amo kichiujtok nion se tajtakol. Sayoj ke akin monamiktiskej, kipiaskej kuejmolmej. Namechiluia nejin porin amo niknekiskia xikpanokan nejon.

29 Uan no, nokniuan, namechiluia ke amo miak tonalmejok mokauaj. Desde axkan, akin kipiaj ininsiuatsin, maj mochiuakan kemej yeskia amo kipiaskiaj, 30 uan akin chokaj maj mochiuakan kemej akin amo chokaj; akin yolpakij maj mochiuakan kemej akin amo yolpakij; akin takouaj maj mochiuakan kemej akin amo kipiaj tein kikoujkej, 31 uan akin kikuij tein onkak nikan taltikpak maj mochiuakan kemej akin amo senkis kikuij. Porin tein mochiujtok itech taltikpak mopatatok. 32 Tein melauj, amo nikneki maj namechtekipachojto teisa. Takat akin amo kipia isiuatsin, kitekipachoua keniuj kitekitilis toTekotsin, porin kineki kiyolpaktis toTekotsin. 33 Sayoj ke takat akin kipia isiuatsin kitekipachoua tein onkak nikan taltikpak, porin kineki kiyolpaktis isiuatsin 34 uan xeliujtok itanemilil. Uan siuat akin amo kipia itakatsin, ijkon kemej akin amo keman monamiktiani, kitekipachoua keniuj kitekitilis toTekotsin, para maj inakayo uan itanemilil chipaujkej iixpan Dios. Sayoj ke siuat akin kipia itakatsin kitekipachoua tein onkak nikan taltikpak, porin kineki kiyolpaktis itakatsin. 35 Sayoj ke nikijtoua nejin para namechpaleuis. Amo nikijtoua para namechtsakuilis,* ta para namechyolchikauas xikchiuakan tein kuali uan mojmostaj xiktekitilikan toTekotsin ika nochi namoyolo.

36 Sayoj ke, komo aksa kinemilia ke amo ueli kitsakuilia tein kinejneki inakayo, uan amo tel piliok, yejua nejin tein moneki kichiuas: maj monamikti, komo yejua nejon tein kineki, amo kichiua se tajtakol. 37 Sayoj ke komo aksa kiixtalijtok itech iyolo kisentokas iselti uan kimachilia ke amo moneki monamiktis, uan ueli kitsakuilia tein kinejneki inakayo, kuali yetok tein kiixtalia. 38 Yejua ika, komo aksa monamiktia kuali yetok, sayoj ke komo amo monamiktia okachi kuali.

39 Siuatsin moneki kisentokas nemis iuan itakatsin keman yejua yoltos. Sayoj ke komo itakatsin momikilia* uelis monamiktis iuan akin kinekis, sayoj komo yejua no kitojtoka toTekotsin. 40 Sayoj ke nejua niknemilia ke okachi yolpakis komo kisentoka kemej yetok. Uan nejua nikyekmati ke no nikpia ichikaualis Dios.

8 Axkan ika nitajtoti takual tein kinmaktiliaj tatadiosmej,* tikmatij ke tinochin tikixmatij nejin. Akin kinemilia ke semi kiixmati miak taman, moueyimati,* sayoj ke akin tetasojta, teyolchikaua. 2 Komo aksa* kinemilia ke kimati teisa, ayamo kiixmati nochi kemej monekiskia. 3 Sayoj ke, komo aksa kitasojta Dios, yejua kiixmati.

4 Axkan maj ika titajtokan ox uelis se kikuas takual tein kinmaktiliaj tatadiosmej.* Tikmatij ke se tatadios senkis amo tapaleuia, uan ke onkak sayoj se Dios. 5 Porin maski kijtouaj ke onkakej miakej dioses ne iluikak uan nikan taltikpak, uan tein melauj onkakej miakej tein kiniluiaj dioses uan tekomej, 6 tejuan tikmatij ke onkak sayoj se Dios akin melauak, toTajtsin, akin nochi itech ualeua uan tiiaxkauan. Uan sayoj onkak se toTekotsin, Jesucristo, akin itechkopa mochijchiuak nochi uan akin itechkopa tiyoltokej.

7 Sayoj ke amo nochin kiixmatij nejon. Sekin achto kinueyichiuayaj tatadiosmej,* yejua ika kinemiliaj ke keman kimajseuaj nejon takual kemej yeskia kiueyichiujtokej se tatadios, uan kemej kiitaj ke nejon amo kuali yetok, kinyolkuejmoloua.* 8 Sayoj ke, takual amo kichiua maj okachi timotokikan iuan Dios. Komo amo tikmajseuaj amo timotajtakolmakatokej, uan komo tikmajseuaj amo moneki maj ika techueyitalikan. 9 Uan maski uelis nankichiuaskej seki taman, ximoyekpiakan para amo nankichiuaskej teisa tein ika nankinuetsiltiskej* akin amo chikaujkej. 10 Porin tejua akin tikixmati tein melauak, komo se akin amo chikauak mitsitaskia ke titamajseujtok kampa kinueyichiuaj tatadiosmej,* ¿amo kiyolchikauaskia nejon maj no kikua tein kinmaktiliaj tatadiosmej, maski kiitas ke nejon amo kuali yetok? 11 Ika nochi tein tikixmati tikchiua maj ixpoliui akin amo chikauak, se mokniuj akin Cristo ika momikilij. 12 Keman namejuan ijkon nankinchiuiliaj tein amo kuali namokniuan, uan nankinyolchikauaj maj kichiuakan tein yejuan kiitaj* ke amo kuali yetok, nantajtakojtokej iixpan Cristo. 13 Yejua ika, komo tein nikua kiuetsiltia* nokniuj, amo kemanok nikuas nakat, para amo nikuetsiltis nokniuj.

9 ¿Xe amo uelis nikchiuas tein niknekis? ¿Xe amo nitatitanil? ¿Xe amo nikitak toTekotsin Jesús? ¿Amo nantaneltokaj porin nikchiua itekiuj toTekotsin? 2 Maski oksekin amo nechitaj kemej tatitanil, nikyekmati ke namejuan kemaj ijkon nanechitaj. Porin namotech monextia ke yekmelauj niitatitanil toTekotsin.

3 Akin nechijijtouaj nikinnankilia ijkuin: 4 uelis* tikuaskej uan titayiskej tein techmakaskej, ¿melauj? 5 Uelis tikuikatinemiskej tosiuatsin taneltokakej,* kemej okseki tatitanilmej, ijkon kemej iikniuan toTekotsin uan Cefas,* ¿melauj? 6 ¿Oso xe sayoj Bernabé uan nejua moneki titekitiskej para timotekipanoskej? 7 ¿Akoni youi kemej soldado uan motaxtauilia nochi? ¿Akoni kitoka uvas uan amo kikua itakilo? ¿Oso akoni kinyekpia iichkauan* uan amo tayi tepitsin ininleche?

8 ¿Nikijtojtok nejin kemej tanemiliaj nikan taltikpak? ¿Xe Tanauatil amo no kijtoua nejin? 9 Porin itech iTanauatil Moisés ijkuiliujtok: “Amo xiktenilpi* kuakouej keman ipan tajtaksatok* trigo”. ¿Xe Dios sayoj motekipachoua ininka kuakuejmej? 10 ¿Oso moijkuiloj para techpaleuis tejuan? Kemaj, porin akin tayuntajuia uan akin kixeloua tatok moneki tekitiskej porin kichiaj kisentiliskej uan kikuaskej tatok.

11 Komo tiktokkej itajtol Dios itech namoyolo, ¿amo kuali yetoskia xitechpaleuikan ika tein techpoloua? 12 Komo oksekin kinnamiki xikinpaleuikan, ¿amo okachi technamiki tejuan xitechpaleuikan? Tein melauj, maski technamiki* xitechpaleuikan, amo teyi tamechtajtaniaj, ta tikxikouaj nochi para maj amo teyi kitsakuili maj moteixmatiltijto kuali tanauatilmej* tein ika tajtoua Cristo. 13 ¿Amo nankimatij ke akin tekitij itech templo kikuaj tein onkak itech templo? Uan akin nochipa tekititokej itech altar kinmakaj tepitsin tein motemaka itech altar. 14 No ijkon, toTekotsin tanauatij maj akin kiteixmatiltiaj kuali tanauatilmej moixpanoltikan ika kuali tanauatilmej.

15 Sayoj ke nejua amo teyi namechtajtaniani. Tein melauj, nejin amo namechijkuilouilia para xinechpaleuikan ika teisa, porin okachi kuali maj nimiki ke nikchiuas nejon. ¡Amo akaj nechkuilis nejin tein ika semi niyolpaki! 16 Sayoj ke, komo nikteixmatiltia nejin kuali tanauatilmej, amo onkak keyej nimoueyimatis,* porin yejua tein moneki nikchiuas. ¡Niteikneltij komo amo nikteixmatiltiskia kuali tanauatilmej! 17 Komo nikchiua nejon ika nochi noyolo, nimotanilis tein kuali; sayoj ke, komo nikchiua maski amo nikneki, ipa yejua nejon tekit tein nechiluijkej maj nikchiua. 18 Komo ijkon, ¿toni nimotanilia? Maj nikteixmatilti kuali tanauatilmej uan maj amo nechtaxtauikan, para amo namechtajtanis tein ueliskia nitajtanis porin nikteixmatiltia kuali tanauatilmej.

19 Porin, maski amo nietok temako, nimochiuak kemej inintakeual nochin para nikintaneltoktis nochin akin uelis. 20 Iniuan judíos nimochiuak kemej judío para nikintaneltoktis judíos. Iniuan akin kitakamatij tanauatil* nimochiuak kemej akin kitakamati tanauatil para nikintaneltoktis akin kitakamatij tanauatil, maski nejua amo niktakamati tanauatil. 21 Iniuan akin amo kitakamatij tanauatil nimochiuak kemej akin amo kitakamatij tanauatil para nikintaneltoktis akin amo kitakamatij tanauatil, maski nejua niktakamati itanauatil Dios uan Cristo. 22 Iniuan akin amo chikaujkej nimochiuak kemej akin amo chikauak para nikintaneltoktis akin amo chikaujkej. Nimochiuak kemej nochin uan nikchiuak nochi tein niuelik para nikinmakixtis maski sayoj sekin. 23 Sayoj ke nikchiua nochi para nikinixmatiltis oksekin kuali tanauatilmej.

24 ¿Amo nankimatij ke maski nochin motalouaj* keman motatanij, sayoj se tatani? Xitsikuinikan kemej uelis nantataniskej. 25 Sayoj ke, nochin akin motatanij kinextiaj ke ueli kitsakuiliaj tein kinejnekij itech nochi. Yejuan kichiuaj nejon para kitaniskej se corona tein kuetaui, sayoj ke tejuan, para tiktaniskej se tein amo kuetaui. 26 Yejua ika, nimotaloua porin nikmati kani niajsiti, uan ijkon kemej akin moteuiaj, nomauan amo sayoj ejekaixko panouaj. 27 Okachi kuali, niktakaualtia* nonakayo uan nikchiua kemej notakeual, uan ijkon satepan ke nikinmachtis oksekin, Dios amo nechixtopeuas ika teisa.

10 Nokniuan, nikneki xikmatikan ke nochin touejkaujtatuan yetoyaj mixtampa, nochin kipanauijkej ueyiat, 2 nochin kinauijkej kemej itatojtokakauan Moisés keman yetoyaj mixtampa uan keman kipanauijkej ueyiat, 3 nochin kikuajkej tein Dios kinmakak 4 uan nochin tayikej tein Dios kinmakak. Porin nochin tayiaj at tein kisaya itech tepejxit tein Dios kinmakak, uan nejon tepejxit kiixnextiaya* Cristo. 5 Sayoj ke, tel miakej amo kiyolpaktijkej Dios, yejua ika mikkej itech taluakyan.

6 Nejin tein panok, techmachtia maj amo tiknekikan tikchiuaskej tein amo kuali, kemej yejuan kichiujkej. 7 Maj amo no tikinueyichiuakan tatadiosmej,* kemej sekin kichiujkej, ijkon kemej ijkuiliujtok: “Israelitas takuajkej uan tatayikej, uan moyolpaktijkej”. 8 Maj amo no tiauilnemikan,* kemej sekin auilnenkej,* yejua ika mikkej 23 mil itech sayoj se tonal. 9 Maj amo no tikyejyekokan Jehová,* kemej sekin kiyejyekojkej uan ompa mikkej porin kintipinijkej kouamej. 10 Maj amo no titeijijtokan, kemej sekin teijijtojkej uan se ángel kinmiktij. 11 Nochi nejin mochiuak para techmachtis, uan moijkuiloj para technejmachtis tejuan akin tinemij itech nejin tonalmej* keman tatamitiya.

12 Yejua ika, akin kinemilia ke kuali ijkatok, maj moyekpia porin uelis uetsis. 13 Nochi tein namechyoltilana para ximotajtakolmakakan no yejua tein kinyoltilana nochin. Sayoj ke Dios nochipa kichiua tein kijtoua, uan yejua amo namechkauas xikixnamikikan nejon kuejmol kemej amo uelis nankixikoskej, ta keman namechyoltilanas teisa para ximotajtakolmakakan, yejua namechpaleuis xitaxikokan.

14 Yejua ika nokniuantsitsin, amo xikueyichiuakan tein kiueyichiuaj nikan taltikpak. 15 Namejuan kuali nantaixejekouaj, yejua ika namejuan xikitakan ox tein nikijtoua kuali yetok oso amo. 16 Copa tein ika tiktasojkamatiliaj Dios kiixnextia iesyo Cristo, ¿melauj? Pantsin tein tiktajtapanaj kiixnextia inakayo Cristo, ¿melauj? 17 Sayoj onkak se pantsin, yejua ika maski timiakej, timochiuaj sayoj se, porin tinochin tikuaj sayoj se pantsin.

18 Xikinelnamikikan israelitas. Keman kikuaj tein motemaktia itech altar, ¿melauj ke kemej yeskia takuajtokej iuan Dios? 19 Komo ijkon, ¿toni nikijtosneki? ¿Ke nakat tein kimaktiliaj se tatadios* okachi chipauak ke okseki nakat? ¿Oso nikijtosneki ke se tatadios yekmelauj se dios? 20 Amo. Tein nikijtosneki yejua ke tein kitemaktiaj akin kinueyichiuaj tatadiosmej,* kinmaktiliaj amokuali ejekamej uan amo Dios; uan amo nikneki xiteuantikan iniuan amokuali ejekamej. 21 Amo uelis nantayitoskej itech icopa Jehová* uan itech inincopa amokuali ejekamej. Amo no uelis nantakuajtoskej itech “imesa Jehová”* uan itech ininmesa amokuali ejekamej. 22 ¿Oso tiknekij ‘tikuajkualantiskej Jehová’?* Tejuan amo okachi tichikaujkej ke yejua, ¿melauj?

23 Nochi ueli nikchiua, sayoj ke amo nochi tapaleuia. Nochi ueli nikchiua, sayoj ke amo nochi teyolchikaua. 24 Maj amo akin kitemo sayoj tein yejua kipaleuis, ta tein kinpaleuis oksekin.

25 Xikuakan nochi nakat tein nankiajsiskej kampa kinamakaj uan amo xitatsintokatokan para amo teyi namechyolkuejmolos, 26 porin “taltikpak uan nochi tein onkak nikan taltikpak iaxka Jehová”.* 27 Komo se akin amo taneltoka namechyoleua xitakuatij uan namejuan nanyasnekij, xikuakan tein yeski takual tein namechuantis* uan amo xitatsintokakan para amo teyi namechyolkuejmolos. 28 Sayoj ke komo namechiluiaj “Nejin kinmaktilijkej tatadiosmej”,* amo xikuakan para amo nankiuetsiltiskej* akin namechiluij nejon uan para amo akin kiyolkuejmolos teisa. 29 Amo ika nitajtojtok tein tejua mitsyolkuejmolos, ta tein kiyolkuejmolos okse. Porin ¿keyej amo ueli nikchiua tein niknemilia ke kuali yetok sayoj porin okse kinemilia ke amo kuali yetok? 30 Komo niktasojkamatilia Dios keman nitakua, ¿kuali yetok maj ijkon nikchiua komo nejon kichiua maj nechijijtokan?

31 Yejua ika, ijkuak nantakuajtoskej, nantatayitoskej oso nankichiujtoskej tein yeski, nochi xikchiuakan para nankiueyitaliskej Dios. 32 Amo xikinuetsiltikan* judíos, griegos uan akin pouij itech inechikol Dios, 33 ijkon kemej amo niktemojtok tein nejua nechpaleuis, ta tein kinpaleuis miakej, kemaj, nikchiujtok nochi nejin para nikinyolpaktis nochin uan ijkon uelis makisaskej.

11 Xikchiuakan kemej nejua, ijkon kemej nejua nikchiua kemej Cristo.

2 Namechtasojkamatilia porin nochipa nanechelnamikij uan nankichiuaj nochi tein namechmachtij. 3 Sayoj ke nikneki xikmatikan ke itaixyekankauj* takat yejua Cristo, ke itaixyekankauj siuat yejua takat uan ke itaixyekankauj Cristo yejua Dios. 4 Takat akin mokuapiki* keman kichiua netataujtil oso keman kiteixmatiltia tein Dios kiluia, kipinaujtia itaixyekankauj, 5 uan siuat akin amo mokuapiki keman kichiua netataujtil oso keman kiteixmatiltia tein Dios kiluia, kipinaujtia itaixyekankauj, porin kemej yeskia mokuaximaskia.* 6 Porin komo siuat amo mokuapiki, moneki kitekis nochi itson. Sayoj ke komo mopinaujmati kitekis nochi itson oso mokuaximas, moneki mokuapikis.

7 Takat maj amo mokuapiki, porin yejua tamati kemej Dios uan kiueyitalia, uan siuat kiueyitalia takat. 8 Porin Dios amo kichijchiuak takat ika inakayo siuat, ta kichijchiuak siuat ika inakayo takat. 9 Tein melauj, Dios amo kichijchiuak takat para in siuat, ta kichijchiuak siuat para in takat. 10 Yejua ika siuat moneki mokuapikis para ika kinextis ke mokaua maj kiixyekana itakauj, porin ángeles tachixtokej.

11 Sayoj ke itech inechikol toTekotsin, takamej amo nemiskiaj komo amo onkaskiaj siuamej, uan siuamej amo nemiskiaj komo amo onkaskiaj takamej. 12 Porin ijkon kemej siuat ualeuak itech takat, no ijkon takat yoli de se siuat. Sayoj ke nochi ualeua imako Dios. 13 Xikixejekokan namejuan: ¿kuali yetok maj siuat amo mokuapiki keman kichiua netataujtil? 14 ¿Amo nankimatij ke tepinaujtij maj se takat tsonueueyak, 15 sayoj ke komo se siuat tsonueueyak kikualnextia? Porin yejua kipia itson para ika mokuapikis. 16 Uan komo aksa* kinemilia ke amo kuali yetok nejin, maj kimati ke tejuan uan tokniuan akin pouij itech inechikoluan Dios amo tikchiuaj okse taman.

17 Sayoj ke ika nejin tein namechnauatijtok, amo namechtasojkamatilia, porin keman namosentiliaj amo namoyolchikauaj, ta namoixnamikij. 18 Yekinika, nikmatik ke keman namosentiliaj, nanxexeliujtokej, uan xa kemaj. 19 Porin nikyekmati ke namouan onkaskej akin kimoyauaskej* tamachtilis tein amo melauak, para maj no moyeknexti akonimej kiyolpaktiaj Dios.

20 Keman namejuan namosentiliaj, tein melauj amo para nantakuaskej itech iTakualis toTekotsin. 21 Porin keman nantakuatij, sejse ipa takuajkaya, uan ijkon se mayantok uan okse uintitok. 22 ¿Xe amo nankipiaj namochan kampa nantakuaskej uan nantatayiskej? ¿Oso nankiixtopeuaj inechikol Dios uan nankinpinaujtiaj akin amo teyi kipiaj? ¿Toni uelis namechiluis? ¿Ke kuali tein nankichiujtokej? Amo.

23 Porin ijkon kemej nechmachtij toTekotsin no ijkon namechmachtia: ke toTekotsin Jesús, itech youak keman yaya kitemaktitij, kikuik se pantsin, 24 kitasojkamatilij Dios, kitajtapanak uan kijtoj: “Nejin kiixnextia nonakayo, tein niktemaka para namechpaleuis. Xiksentokakan xikchiujtokan nejin uan ika xinechelnamikikan”. 25 Keman tamitakuajkej nejon tiotak, no kikuik copa uan kijtoj: “Nejin copa kiixnextia yankuik taman tein Dios motenkaua, tein peuas keman mimilauis noesyo. Xiksentokakan xikchiujtokan nejin uan ika xinechelnamikikan nochipa keman nantayiskej nejin”. 26 Porin nochipa keman nankikuaskej nejin pantsin uan nantayiskej vino itech nejin copa, nankiteixmatiltijtoskej ke toTekotsin momikilij hasta keman yejua ualas.

27 Yejua ika, akin kikuas pantsin uan tayis vino itech icopa toTekotsin maski amo kinamiki, motajtakolmaka porin amo kitakachiujtok* inakayo uan iesyo toTekotsin. 28 Maj achto kiyekita iyolo, para kiyekmatis ox tein kichiujtok kuali yetok uan sayoj ijkuak uelis kikuas pantsin uan tayis vino. 29 Porin akin takua uan tatayi uan amo kiita ke nejon kiixnextia inakayo toTekotsin, motanilijtok maj kitatsakuiltikan. 30 Yejua ika namiakej amo nanchikaujkej uan namokokouaj uan namiakej namomikilijkejya.* 31 Sayoj ke, komo tejuan tikyekitaskiaj keniuj yekmelauj titamatij, Dios amo kiixtaliskia ke amo kuali tein tikchiujtokej. 32 Sayoj ke keman Jehová* kiixtalia ke amo kuali tein tikchiujtokej, techtakaualtia para maj amo techtatsakuilti iniuan oksekin. 33 Yejua ika nokniuan, keman namosentiliskej para nankikuaskej nejon takual, ximochiakan hasta maj nochin ajsikan. 34 Komo aksa mayana, maj takua ichan, para maj Dios amo kiixtali ke moneki maj namechtatsakuilti keman namosentiliskej. Sayoj ke okseki taman tein poliui, nikyektalis keman ompa niajsis.

12 Nokniuan, nikneki xikyekmatikan toni Dios techtayokolia. 2 Namejuan nankimatij ke keman ayamo nantaneltokayaj, nankinueyichiuayaj tatadiosmej* tein amo tajtouaj, uan nankichiuayaj nochi tein yejuan kinekiaj. 3 Yejua ika, nikneki xikmatikan ke nion se akin Dios kiixyekana ika ichikaualis uelis kijtos “Maj kitatsakuiltikan Jesús”, uan amo akin uelis kijtos “Jesús toTekotsin” komo Dios amo kipaleuia ika ichikaualis.

4 Maski ueli tikchiuaj miak taman, sayoj Dios ika ichikaualis* techpaleuia maj tikchiuakan; 5 maski onkak miak taman tekit tein ika uelis tiktekitiliskej Dios, toTekotsin sayoj se. 6 Maski Dios kikui ichikaualis para techpaleuis maj tiuelikan tikchiuakan miak taman, onkak sayoj se Dios. 7 Sayoj ke, Dios ika ichikaualis kinpaleuia sejse maj uelikan kichiuakan miak taman tein ika kinpaleuiskej nochin, uan nejon moyekita. 8 Ichikaualis Dios kinpaleuia sekin maj tamattokan; uan nejon chikaualis no kinpaleuia sekin maj kijtokan tein oksekin amo kimatij; 9 nejon chikaualis no kinpaleuia sekin maj takuaujtamatikan; oksekin maj tapajtikan; 10 oksekin maj kichiuakan milagros; oksekin maj kiteixmatiltikan tein Dios kiniluia; oksekin maj kimatikan ox tein motamachtia yekmelauj Dios kijtoj; oksekin maj tajtokan itech tataman tajtolmej, uan oksekin maj kijtokan tein kijtosneki se tajtol oso se tajkuilol. 11 Nochi nejin ueli kichiua sayoj ichikaualis Dios, tein kinpaleuia sejse ijkon kemej Dios* kineki.

12 Tonakayo kipia miak taman. Uan maski kipia miak taman mochiua sayoj se, no ijkon Cristo. 13 Porin tinochin, judíos oso griegos, akin moajsij temako oso amo, techauijkej sayoj ika ichikaualis Dios para maj tisenpouikan, uan tinochin techmakakej nejon chikaualis.

14 Tein melauj, tonakayo amo chijchiujtok ika sayoj se taman, ta ika miak taman. 15 Komo tomets kijtoskia “Kemej amo nimomay, amo nipoui itech monakayo”, nejon amo kichiuaskia maj amo pouiok itech tonakayo. 16 Uan komo tonakas kijtoskia “Kemej amo nimoixtololo, amo nipoui itech monakayo”, nejon amo kichiuaskia maj amo pouiok itech tonakayo. 17 Komo nochi tonakayo sayoj tekitiskia kemej toixtololo ¿keniuj titakakiskiaj? Komo nochi tonakayo sayoj tekitiskia kemej tonakas ¿keniuj titajnekuiskiaj? 18 Sayoj ke Dios kitalij sejse taman tein kipia tonakayo ijkon kemej kinekik.

19 Komo nochi yeskia sayoj se taman, ¿keniuj yeskia tonakayo? 20 Sayoj ke, maski tikpiaj miak taman, sayoj tikpiaj se tonakayo. 21 Toixtololo amo uelis kiluis tomay “Amo tinechpaleuia”, nion totsontekon uelis kiniluis tometsuan “Amo nanechpaleuiaj”. 22 Ta tein tikpiaj itech tonakayo tein moita ke amo semi tapaleuia, tein melauj semi tapaleuia, 23 uan tein tikpiaj itech tonakayo tein tiknemiliaj ke amo semi kualtsin,* kuali tiktakentiaj; uan ijkon tein tikpiaj itech tonakayo tein ika timopinaujmatij, okachi tikualtsintiliaj, 24 sayoj ke tein tikitaj ke okachi kualtsin, amo moneki maj se kikualtsintili. Sayoj ke Dios kichijchiuak tonakayo uan okachi kikualtsintilij tein amo semi kualtsin, 25 para maj tonakayo amo xexeliujto uan nochi tein kipia motekipachoskia se iuan okse. 26 Komo semej tajyouia, nochin oksekin no iuan tajyouiaj. Komo semej kiueyitaliaj, nochin iuan yolpakij.

27 Namejuan nanpouij itech inakayo Cristo, uan nansejsemej nantapaleuiaj. 28 Uan Dios kinixtalij akin pouij itech nechikol ijkuin: yekinika, tatitanilmej; ojpatika, tanauatianij;* expatika, tamachtianij; satepan, akin kichiuaj milagros; ompa, akin uelij tapajtiaj; akin tapaleuiaj; akin kimatij taixyekanaskej; akin tajtouaj tataman tajtolmej. 29 ¿Melauj ke amo nochin tatitanilmej uan amo nochin tanauatianij? ¿Melauj ke amo nochin tamachtianij uan amo nochin kichiuaj milagros? 30 ¿Melauj ke amo nochin ueli tapajtiaj uan amo nochin tajtouaj tataman tajtolmej? ¿Melauj ke amo nochin uelij kijtouaj tein kijtosneki se tajtol oso se tajkuilol? 31 Xiksentokakan xiktemokan nankipiaskej okachi uejueyi tatiochiualismej. Uan maski ijkon, namechnextiliti okse taman tein okachi kuali.

13 Komo nitajtoua tataman tajtolmej uan kemej tajtouaj ángeles sayoj ke amo nitetasojta, sayoj niyeskia kemej se tepos tein chikauak komoni uan takuejsoua. 2 Komo ueli niktematiltia tein Dios nechiluia, nikajsikamati nochi tein amo kitematiltijtoya,* nikixmati nochi, semi nitakuaujtamati uan nejon nechpaleuia maj ueli nikinajchiua tepemej, sayoj ke amo nitetasojta, amo teyi nichiujkej.* 3 Komo niktemaka nochi tein nikpia para nikintamakas oksekin oso nimotemaktia para uelis nimoueyimatis* sayoj ke amo nitetasojta, nenkaj nochi tein nikchiua.

4 Akin tetasojta amo yolijsiui uan kualtakat. Akin tetasojta amo tenexikoluia.* Amo kijtojtinemi tein ueli kichiua, amo moueyimati,* 5 amo eliuisti, amo kitemoua tein sayoj yejua kipaleuis, amo niman kualani. Amo kipoujtiuj tein kichiuiliaj. 6 Amo yolpaki keman mochiua tein amo kuali, ta yolpaki keman mochiua tein kuali yetok.* 7 Nochi kijyouia, nochi kineltoka, nochi kichia, nochi kixikoua.

8 Tetasojtalis amo keman tapoloua.* Sayoj ke, ejkos tonal keman amo akinok uelis kitematiltis tein Dios kiluia, amo akinok uelis tajtos itech tataman tajtolmej,* amo akinok uelis kijtos tein oksekin amo kimatij porin ixpoliuiskej nejon tatiochiualismej. 9 Porin amo nochi tikixmatij uan amo ajsitok tiktematiltiaj tein Dios techiluia; 10 sayoj ke keman ejkos tein ajsitok, tein amo ajsitok ixpoliuis. 11 Keman katka niokichpil, nitajtouaya kemej okichpil, nitanemiliaya kemej okichpil uan nitaixejekouaya kemej okichpil. Sayoj ke axkan ke nimoskaltijya, amo nikchiuaok tein se okichpil kichiua. 12 Axkan amo tiyektachiaj porin kemej yeskia timoixitstokej itech se teposteskat, sayoj ke satepan tiyektachiaskej kemej yeskia timoixitstoskiaj iuan aksa.* Axkan amo nochi nikixmati, sayoj ke satepan senkis nikixmatis Dios ijkon kemej yejua senkis nechixmati. 13 Sayoj ke mokauaskejok nejin eyi taman: titakuaujtamatiskej, tikchiaskej tein kuali uan titetasojtaskej. Sayoj ke tein okachi tayekantok yejua titetasojtaskej.

14 Xiksentokakan xitetasojtakan, sayoj ke no xiksentokakan xiktemokan itatiochiualisuan Dios. Okachi xiktemokan nanueliskej nankitematiltiskej tein Dios namechiluis. 2 Porin akin tajtoua okse tajtol amo kinnojnotsa oksekin, ta Dios. Maski Dios ika ichikaualis kipaleuia maj kijto tein Dios amo kitematiltijtoya,* amo akin kiajsikamati. 3 Sayoj ke, akin kitematiltia tein Dios kiluia teyolchikaua, tepaleuia uan teyolseuia ika tein kijtoua. 4 Akin tajtoua okse tajtol yejua moyolchikaua, sayoj ke akin kitematiltia tein Dios kiluia kinyolchikaua tokniuan itech nechikol. 5 Nikuelitaskia nochin xitajtokan tataman tajtolmej, sayoj ke okachi nikneki xiktematiltikan tein Dios namechiluia. Tein melauj, akin kitematiltia tein Dios kiluia okachi tapaleuia ke akin tajtoua tataman tajtolmej. Porin komo amo kijtoua toni kijtosneki tein kijtojtok, tokniuan amo moyolchikauaskej. 6 Sayoj ke, nokniuan, komo yekintsin namechitati uan namechnojnotsa itech tataman tajtolmej sayoj ke amo namechiluia tein Dios nechnextilij, tein nechmatiltij, tein nechiluij maj nikijto oso amo teyi namechmachtia, ¿keniuj namechpaleuiskia nejon?

7 No ijkon panoua ika tein se kitsotsona, kemej flauta oso arpa. Komo amo kiyekpitsaj oso amo kiyektsotsonaj, ¿keniuj se kimatis tein kitsotsontokej? 8 Uan komo akin kipitstok trompeta amo kiyekpitsa, ¿akoni kimatis ke moneki tateuitiuj? 9 No ijkon, komo amo moyekajsikamati tein nankijtouaj, ¿keniuj kimatiskej tein nankijtojtokej? Nenkaj nantajtojtoskiaj.* 10 Nikan taltikpak motajtouaj miak tataman tajtolmej, uan nochi ueli se kiajsikamati. 11 Sayoj ke komo nejua amo nikajsikamati tein moijtojtok, akin tajtojtok nechitas kemej se analtekoj uan nejua no ijkon nikitas. 12 No ijkon panoua namouan. Yejua ika, kemej semi nankinekij maj Dios namechmaka tataman tatiochiualismej, ximochikauakan nankitelpiaskej tatiochiualismej tein kinyolchikauas tokniuan.

13 Yejua ika, akin tajtoua itech okse tajtol maj kitajtani Dios maj ueli kinilui akin kikaktokej toni kijtojtok. 14 Porin komo nikchiua netataujtil itech okse tajtol, amo nejua nitajtoua, ta Dios nechpaleuia ika ichikaualis. Yejua ika amo teyi nikajsikamati. 15 Komo ijkon, ¿toni moneki nikchiuas? Nikchiuas netataujtil kemej Dios nechpaleuis ika ichikaualis, sayoj ke no nikchiuas netataujtil itech tajtol tein nikajsikamati. Nitaueyichiuas ika tatsotson ijkon kemej Dios nechpaleuis ika ichikaualis, sayoj ke no nitaueyichiuas ika tatsotson itech tajtol tein nikajsikamati. 16 Porin komo tiktasojkamatilijtok Dios ijkon kemej yejua mitspaleuia ika ichikaualis uan namouan yetok se akin amo semi taixmati, ¿keniuj kijtos “Maj ijkon mochiua”* keman timotamitataujtis komo amo kiajsikamati tein tikijtojtok? 17 Maski semi kuali kemej tiktasojkamatilia Dios, akin mitskaktok amo kipaleuia. 18 Niktasojkamatilia Dios porin nitajtoua okachi tajtolmej ke nochin namejuan. 19 Maski ijkon, itech nechikol okachi nikneki nikijtos makuil tajtolmej tein moajsikamatis para no uelis nikinmachtis oksekin uan amo nikijtos 10 mil tajtolmej itech okse tajtol tein amo akin kiajsikamatis.

20 Nokniuan, amo xitanemilikan kemej pipilkonemej, ta okachi kuali ximochiuakan kemej konemej akin amo kiixmatij tein amo kuali* uan xiyektaixejekokan kemej akin moskaltijkejya. 21 Itech iTanauatil Moisés ijkuiliujtok: “Jehová* kijtoua: ‘Nikinnojnotsas akin pouij itech nejin xolal kemej tajtouaj analtekos uan kemej akin tajtouaj okseki tajtolmej, uan maski ijkon amo nechkakiskej’”. 22 Yejua ika keman tokniuan tajtouaj tataman tajtolmej amo kinpaleuia akin taneltokaj, ta akin amo taneltokaj, uan tein Dios kitematiltia amo kinpaleuia akin amo taneltokaj, ta akin taneltokaj. 23 Yejua ika, komo nochin tokniuan mosentiliaj uan nochin tajtouaj tataman tajtolmej uan ompa ajsitij akin amo semi taixmatij oso akin amo taneltokaj, ¿amo kijtoskej ke nankuatapolojtokej? 24 Sayoj ke, komo nanochin nankijtojtokej tein Dios namechiluia uan kalaki se akin amo taneltoka oso se akin amo semi taixmati, kimachilis ke nochin kiluijtokej ke amo kuali tein kichiujtok uan nejon kichiuas maj moyekita. 25 Kemej monextis tein kitatijtok* itech iyolo, motankuaketsas uan moixpilos hasta talpan uan kiueyichiuas Dios uan kijtos: “Dios yekmelauj namouan yetok”.

26 Komo ijkon nokniuan, ¿toni moneki mochiuas? Keman namosentiliaj, se kiueyichiua Dios ika tatsotson, okse tamachtia, okse kijtoua tein Dios kinextilij uan kimatiltij, okse tajtoua itech okse tajtol uan okse kimelaua toni kijtosneki nejon tajtol. Xikchiuakan nochi para namosenyolchikauaskej. 27 Uan komo sekin tajtouaj okse tajtol, maj tajtokan sayoj omen oso eyin uan maj mopapatatiakan, uan maj okse kimelaua tein kijtojtokej. 28 Sayoj ke komo amo akin ueli kimelaua tein kijtojtokej, maj amo tajtokan itech nechikol uan maj kinojnotsakan Dios ininyolijtik. 29 Maj tajtokan ome oso eyi tanauatianij,* uan maj oksekin kitemokan tein kijtosneki. 30 Sayoj ke, komo Dios kinextilia uan kimatiltia teisa se tokniuj keman ompa tokotsyetok, maj amo tajtook akin tajtojtoya. 31 Porin nanochin uelis namopapatatiaskej para nankijtoskej tein Dios namechiluia, uan ijkon nochin kimatiskej uan moyolchikauaskej. 32 Uan tanauatianij moneki kikuiskej kemej moneki tatiochiualismej tein Dios kinmaka. 33 Dios kineki maj nochi moyekchiua uan kitemoua maj nochin yolseujtokan.

Ijkon kemej mochiua itech nochi nechikolmej kampa pouij akin Dios moinxelouilij,* 34 maj siuamej amo teyi kijtokan itech nechikolmej porin yejuan amo uelis tajtoskej, ta okachi kuali, maj mokauakan maj kinixyekanakan, ijkon kemej Dios tanauatij. 35 Komo amo kiajsikamatij teisa, maj kintajtanikan* inintakauj kalijtik, porin tepinaujtij maj se siuat tajto itech nechikol.

36 ¿Xe namotech kisak itajtol Dios? ¿Xe sayoj namejuan namechmaktilijkej?

37 Komo se tokniuj kinemilia ke yejua se tanauatijkej oso ke Dios kimakatok se tatiochiualis, moneki kiitas ke tein nejua namechijkuilouilia, toTekotsin tanauatia. 38 Sayoj ke komo aksa* kiixpanauia nejin, Dios no kiixpanauis.* 39 Yejua ika, nokniuan, xiksentokakan xiktemokan nankitematiltiskej tein Dios namechiluia uan amo xikintakaualtikan akin tajtouaj tataman tajtolmej. 40 Sayoj ke xikyekchiuakan nochi uan kemej moneki.

15 Nokniuan, axkan namechelnamiktia kuali tanauatilmej* tein namechixmatiltij, tein nankineltokakej uan tein amo nankikauaj. 2 No namomakixtiaj komo nankisentokaj nankineltokaj kuali tanauatilmej tein namechixmatiltij. Komo amo, nenkaj peuak nantaneltokaj.

3 Porin tein okachi tayekantok tein namechixmatiltij yejua tein nejua no nechmatiltijkej: ke Cristo momikilij para kiixtauas totajtakoluan, kemej kijtoua Tajkuilolamatsin; 4 ke kitokkej uan ke eyi tonal satepan oksepa nemik,* kemej kijtoua Tajkuilolamatsin, 5 uan ke monextij iixpan Cefas* uan satepan ininixpan 12 tatitanilmej. 6 No monextij ininixpan panoua 500 tokniuan akin senyetoyaj, miakej touan yetokejok, maski sekin momikilijkejya.* 7 Satepan monextij iixpan Santiago; ompa ininixpan nochin tatitanilmej. 8 Keman monextijkaya ininixpan nochin, no monextij noixpan, yejua ika nejua nitamati kemej se konetsin tein yoli achto ke ajsis tonal.

9 Porin nejua okachi amo niueyichiujkej ke okseki tatitanilmej, uan amo nechnamiki maj nechnotsakan tatitanil, porin nikintajyouiltij akin pouij itech inechikol Dios. 10 Sayoj ke kemej Dios nechnextilij itatiochiualis tein amo technamiki, ueli nikchiua nejin tekit. Uan tatiochiualis tein nechnextilij amo nenkajtik, porin nitekitini okachi ke nochin tatitanilmej. Sayoj ke nejin tekit amo nikchiua ika nochikaualis, ta ika tatiochiualis tein Dios nechnextilij. 11 Yejua ika, yeski nejua oso yejuan akin tanojnotsaj, sayoj se taman tein tikteixmatiltiaj uan ijkon namejuan nantaneltokakej.

12 Komo moteixmatiltijtok ke Cristo oksepa nemik, ¿keniuj nansekimej nankijtouaj ke mikemej amo oksepa nemiskej? 13 Tein melauj, komo mikemej amo oksepa nemiskej, Cristo amo no oksepa nemik. 14 Sayoj ke, komo Cristo amo oksepa nemik, nenkaj titanojnotstinemij uan no nenkaj nantakuaujtamatij. 15 Uan no, komo akin momikilijkejya tein melauj amo oksepa nemiskej, Dios amo no kichiuak maj oksepa nemi Cristo, uan nejon kijtosneki ke tiktakajkayauilijtokej Dios keman tikijtouaj ke kichiuak maj oksepa nemi Cristo. 16 Porin komo akin momikilijkejya amo oksepa nemiskej, Cristo amo no oksepa nemik. 17 Uan no, komo Cristo amo oksepa nemik, nenkaj nantakuaujtamatij uan ayamo kiixtauaj namotajtakoluan. 18 Komo ijkon, akin pouij iuan Cristo uan momikilijkejya* amo no keman oksepa nemiskej. 19 Komo titakuaujtamatij iuan Cristo sayoj axkan keman tiyoltokej, yekmelauj semi titeikneltijkej.

20 Sayoj ke, Cristo yejua akin yekinika oksepa nemik* tein kinextia ke akin momikilijkejya* no oksepa nemiskej. 21 Kemej peuak timomikiliaj itechkopa sayoj se takat, akin momikilijkejya no oksepa nemiskej itechkopa sayoj se takat. 22 Porin ijkon kemej itechkopa Adán nochin momikilijtokej, no ijkon itechkopa Cristo nochin oksepa nemiskej. 23 Sayoj ke sejse motojtokatias ijkuin: Cristo achto,* uan satepan akin pouij iuan Cristo, keman mokepasya.* 24 Uan keman tamis, yejua kimaktilis Taixyekanalis iDios uan iTajtsin, keman kiixpolos nochi tataman taixyekanalis, tanauatil uan chikaualis. 25 Porin yejua moneki tekiuajtis hasta keman Dios kintalis imetstampa nochin akin kitauelitaj. 26 Satepan ke ixpoliuiskej nochin taixnamikinij, mikilis no ixpoliuis. 27 Porin Dios “kitalij nochi imetstampa Cristo”. Sayoj ke, keman kijtoua ke “kitalij nochi imetstampa”, amo ika tajtojtok Dios, porin yejua akin kitalij maj kiixyekana nochi. 28 Uan keman iKoneuj kiixyekanasya nochi, yejua no mokauas maj kiixyekana Dios, akin kimaktilij nochi. Ijkon sayoj Dios kiixyekanas nochi.

29 Komo amo ijkon yeskia, ¿toni kichiuaskej akin moauiaj para momikiliskej? Komo akin momikilijkejya amo oksepa nemiskej, ¿keyej yejuan no moauiaj sayoj para momikiliskej? 30 ¿Uan keyej nochipa no tietokej tamouililpan? 31 Mojmostaj nikita ke nimikiti. Nejon melauak, ijkon kemej no yekmelauj namoka niyolpaki nokniuan, nanimomachtijkauan toTekotsin Cristo Jesús. 32 Komo nejua, ijkon kemej oksekin,* nimoteuij iniuan koujtajtapialmej ompa Éfeso, ¿toni ika nechpaleuia nejon? Komo akin momikilijkejya amo oksepa nemiskej, “maj titakuakan uan maj titatayikan, porin mosta timikiskej”. 33 Maj amo namechkajkayauakan. Komo namouikaj iniuan akin amo yolkualmej, amo nankichiuaskejok tein kuali tein ipa nankichiuaj. 34 Xiyektanemilikan uan xikchiuakan tein kuali yetok uan amo xitajtakojtokan, porin sekin amo kiixmatij Dios. Namechiluia nejin para ximopinaujmatikan.

35 Sayoj ke aksa* xa kijtos: “¿Keniuj oksepa nemiskej akin momikilijkejya? Kemaj, ¿keniuj moitaskej keman oksepa nemiskej?” 36 ¡Amo titanemilia! Tein tiktoka amo ixua komo amo achto palani.* 37 Uan amo tiktoka teisa tein moskaltijya ta tiktoka se xinach, yeski trigo oso okse taman xinach. 38 Sayoj ke Dios kichiua maj moskalti kemej yejua kineki uan tataman kemej moskaltia sejse xinach. 39 Takamej uan siuamej, tapialmej, totomej uan pescados* tataman ininnakayo. 40 Onkakej akin pouij ne iluikak uan akin pouij nikan taltikpak, sayoj ke ininkualtsinyo akin pouij ne iluikak amo kemej ininkualtsinyo akin pouij nikan taltikpak. 41 Tataman ininkualtsinyo tonaltsin, metsti uan sitalimej. Tein melauj, sejse sitalin tataman ikualtsinyo.

42 No ijkon mochiua iniuan akin oksepa nemij. Tein se kitokati uejueliui, sayoj ke tein oksepa nemi amo uejueliui. 43 Tein se kitoka tepinaujtij, sayoj ke tein oksepa nemi kiueyitaliaj. Tein se kitoka amo chikauak, sayoj ke tein oksepa nemi chikauak. 44 Tein se kitoka poui nikan taltikpak, uan tein oksepa nemi poui ne iluikak. Komo onkakej akin pouij nikan taltikpak, no onkakej akin pouij ne iluikak. 45 Ijkuiliujtok ijkuin: “Yekinika takat Adán mochiuak se takat akin yoltoya”. Uan okse Adán,* mochiuak kemej akin pouij ne iluikak uan kichiua maj se nemi. 46 Sayoj ke, tein poui ne iluikak amo achto mochiua. Tein poui nikan taltikpak yejua tein achto mochiua uan satepan tein poui ne iluikak. 47 Yekinika takat pouik nikan taltikpak, uan kichijchiujkej ika talnex; ojpatika takat poui ne iluikak. 48 Akin nemij nikan taltikpak tamatij kemej akin Dios kichijchiuak ika talnex; akin pouij ne iluikak tamatij kemej akin yajki iluikak. 49 Uan ijkon kemej titamatij kemej akin kichijchiujkej ika talnex, no tiyeskij kemej akin yajki iluikak.

50 Sayoj ke, nokniuan, namechiluia nejin: nakat uan esti amo ueli kalakij itech iTaixyekanalis Dios nion tein uejueliui ueli mochiua kemej tein amo uejueliui. 51 ¡Xikitakan! Namechiluiti se taman tein Dios amo kitematiltijtoya:* amo tinochin timomikiliskej,* sayoj ke Dios techpatas tinochin 52 ijsiujka, kemej ijkuak se ijkoptiuetsi, keman kipitstoskej trompeta tein ika tatami. Porin trompeta kakistis uan akin momikilijkejya oksepa nemiskej uan amo uejueliuisok ininnakayo, uan tejuan Dios techpatas. 53 Porin nejin tein uejueliui moneki mochiuas kemej tein amo uejueliui, uan tein ueli miki moneki mochiuas kemej tein amo ueli miki. 54 Sayoj ke, keman nejin tein uejueliui mochiuas kemej tein amo uejueliui uan tein ueli miki mochiuas kemej tein amo ueli miki, mochiuasya tein ijkuiliujtok: “Mikilis ixpoliui* nochipaya”. 55 “Mikilis, ¿kani yetok mochikaualis? Mikilis, ¿kani yetok tein ika titetajyouiltia?”.* 56 Tein kichiua maj se miki yejua tajtakol, uan iTanauatil Moisés kichiua maj tajtakol kipia chikaualis. 57 ¡Sayoj ke tiktasojkamatiliaj Dios porin techpaleuia maj titatanikan itechkopa toTekotsin Jesucristo!

58 Yejua ika, nokniuantsitsin, xiksentokakan xiyekijkatokan, amo ximotsinkixtikan uan nochipa xikchiujtokan itekiuj toTekotsin, uan xikmatikan ke amo nenkaj nankitekitilijtokej toTekotsin.

16 Axkan ika nitajtoti tomin tein mosentilia para akin Dios moinxelouilij.* Xikchiuakan ijkon kemej nikinnauatij tokniuan itech nechikolmej ompa Galacia. 2 Itech tonal keman peua semana, nansejsemej moneki nankixeloskej tepitsin tomin ijkon kemej nanueliskej, ijkon keman niajsis amo monekisok nankisentilijtoskej tomin. 3 Uan keman niajsis ompa, nikintitanis sekin maj yakan Jerusalén maj kiuikakan tomin tein nankitemakakej ika pakilis. Nikintitanis akin namejuan nankijtoskej itech namoamatajkuilol ke takuaujtamachmej. 4 Sayoj ke, komo moneki maj no niouj, yejuan nouan yaskej.

5 Nias namechitatiuj keman nipanos Macedonia, porin nipanoti Macedoniajkopa, 6 uan xa nimokauas namouan seki tonalmej oso xa hasta keman panos tonalmej keman taseseya, para tepitsin xinechnalkauatij kampa nias. 7 Porin axkan amo nikneki sayoj namechitstikisas, ta nikchia namouan nietos seki tonalmej, komo Jehová* kineki. 8 Ipa nimokauati nikan Éfeso hasta iluit tein monotsa Pentecostés 9 porin kemej yeskia taueyika nechtatapouilijkej para okachi nitekitis, sayoj ke miakej taixnamikij.

10 Komo ajsi Timoteo, xikpaleuikan para maj nion tepitsin motekipacho keman yetos namouan, porin yejua kichiujtok itekiuj Jehová,* ijkon kemej nejua. 11 Yejua ika, maj amo akin kiixtopeua. Xiknalkauakij tepitsin para nechitakiuj, porin nikchixtok* iniuan tokniuan.

12 Semi niktataujtij tokniuj Apolos maj namechitati iniuan tokniuan. Yejua amo kinemilijtok yas axkan, ta yas keman uelis.

13 Xiijsatokan,* xiksentokakan semi xitakuaujtamatikan, xiyolchikaujkej uan xichikaujkej. 14 Xikchiuakan nochi porin nantetasojtaj.

15 Nokniuan, axkan moneki namechtataujtis teisa. Namejuan nankimatij ke akin nemij ichan Estéfanas yejuan akin yekinika taneltokakej* ompa Acaya uan no nankimatij ke yejuan kinpaleuijkej ika nochi ininyolo akin Dios moinxelouilij.* 16 Namejuan no ximokauakan maj namechyekanakan tokniuan kemej yejuan uan nochin akin tapaleuiaj uan chikauak tekitij. 17 Niyolpaki porin ualajkej Estéfanas, Fortunato uan Acaico. Yejuan semi nechpaleuijkej keman namejuan amo nanyetoyaj. 18 Yejuan nechyolchikaujkej uan namechyolchikaujkej. Yejua ika, xikinpatiuitakan akin ijkon kichiuaj.

19 Tokniuan itech nechikolmej ompa Asia namechtajpalouaj. Áquila uan Prisca, iniuan tokniuan akin mosentiliaj ininchan, namechtajpalouaj ika miak pakilis kemej imomachtijkauan toTekotsin. 20 Nochin tokniuan namechtajpalouaj. Ximotajpalokan se iuan okse ika se beso* kemej yeskia naniknimej.

21 Nejua Pablo, nikmaijkuiloua nejin tajtolmej tein ika namechtajpaloua.

22 Komo aksa* amo kitasojta toTekotsin, maj kitatsakuiltikan. ¡Totekotsin, timitstataujtiaj xiuiki! 23 Maj toTekotsin Jesucristo namechmaka tatiochiualis tein amo technamiki. 24 Nikneki namechyekiluis ke namechtasojta nanochin akin nanimomachtijkauan Cristo Jesús.