2 CORINTIOS

1 Nejua Pablo, niitatitanil Cristo Jesús porin Dios ijkon kinekik, iuan nietok tokniuj Timoteo. Nejin amatajkuilol para namejuan akin nanpouij itech inechikol Dios ompa Corinto uan nochin akin Dios moinxelouilij* akin yetokej Acaya:

2 Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios.

3 Maj tikueyitalikan iDios uan iTajtsin toTekotsin Jesucristo, toTajtsin akin semi teiknelia uan Dios akin nochipa teyolseuia. 4 Yejua techyolseuia* itech nochi tataman ouijkayomej* tein tikpiaj. Uan porin Dios techyolseuia, tejuan no uelis tikinyolseuiskej akin kipanotokej tein yeski ouijkayot. 5 Tejuan semi titajyouiaj porin tiimomachtijkauan Cristo, uan itechkopa Cristo no semi techyolseuiaj. 6 Komo tejuan titajyouiaj, titajyouiaj para tamechyolseuiskej uan tamechmakixtiskej. Uan komo techyolseuiaj, nejin no techpaleuia maj tamechyolseuikan, uan nejon namechpaleuia xikxikokan tein tejuan no tikijyouiaj. 7 Semi namotech titakuaujtamatij, porin tikmatij ke ijkon kemej nantajyouiaj kemej tejuan, no namechyolseuiskej kemej tejuan.

8 Nokniuan, tiknekij xikmatikan kuejmolmej tein tikpiakej itech tal tein poui Asia. Kemej semi titajyouijkej, tikmachiliayaj ke amo titaxikoskiaj, hasta amo tikmatiaj ox timakisaskiaj. 9 Tein melauj, tiknemiliayaj ke yaya timikitij. Sayoj ke nejin techmachtij maj amo totech titakuaujtamatikan, ta maj titakuaujtamatikan iuan Dios akin kichiua maj oksepa nemikan* akin momikilijkejya. 10 Yejua techmakixtij itech ueyi ouijkayot kampa yaya timikitij, uan oksepa techmakixtis. Uan itech titakuaujtamatij, uan tikyekmatij ke nochipa techmakixtis. 11 Namejuan no uelis nantechpaleuiskej keman semi nankitataujtiskej Dios maj techpaleui. Porin komo miakej motataujtiaj, Dios kinkakis uan techpaleuis, uan ijkon miakej kitasojkamatiliskej.

12 Porin semi techyolpaktia nejin: amo teyi techyolkuejmoloua ininixpan oksekin, uan okachiok namouan, tichipaujkanentokej uan timelaujkanentokej kemej Dios tamachtia, amo titakuaujtamatij itech tein tamachtiaj tamatinij, ta itech itatiochiualis Dios tein amo technamiki. 13 Porin tein melauj amo tamechijkuilouilijtokej nion teyi tein amo semi nankiixmatij* nion nankiajsikamatij. Uan nikyekmati ke kuali* nankiajsikamatiskej nochi nejin, 14 ijkon kemej nansekimej nankiajsikamatijya ke tejuan tikchiuaj semi xiyolpakikan; namejuan no nankichiuaskej maj tiyolpakikan itech tonal keman toTekotsin Jesús ualas.

15 Yejua ika, niknekia achto namechkalpanotiuj namejuan para oksepa xiyolpakikan. 16 Niknekia namechkalpanojtikisas keman niaskia Macedonia uan no keman nimokepaskia de Macedonia, ijkon namejuan tepitsin nanechnalkauaskiaj keman niaskia Judea. 17 Keman niknemilijtoya nikchiuas nejin amo sayoj nitajtojtoya. Amo no niknemilijtoya nikchiuas sayoj tein nejua niknekia para nikijtos kemaj uan nimantsin amo. 18 Melauak tein tamechiluiaj, uelis nantakuaujtamatiskej iuan Dios. Amo tikijtouaj kemaj uan nimantsin amo. 19 Porin iKoneuj Dios, Jesucristo, akin Silvano,* Timoteo uan nejua tamechixmatiltijkej, amo kijtoua kemaj uan nimantsin amo, ta keman yejua kijtoua kemaj, nochipa yeski kemaj. 20 Porin nochi tein Dios motenkaua, mochiua* itechkopa Jesús. Yejua ika, itokaykopa no tikiluiaj Dios “maj ijkon mochiua”* para tikueyitaliskej. 21 Sayoj ke akin kiyeknextia ke namejuan uan tejuan tiiaxkauan uan akin techijitak* yejua Dios. 22 Yejua no techneskayotij uan techmakak ichikaualis itech toyolo, uan ijkon yejua moyektenkauak* ke techmakas tatiochiualismej tein onkatij.

23 Ayamo niajtok Corinto porin amo nikneki okachi namechtayokoltis. Dios kimati ke nejin melauak. 24 Amo nikijtojtok ke moneki nantakuaujtamatiskej kemej tejuan tiknekij, porin namejuan nanyolchikaujkej porin nantakuaujtamatij. Tejuan sayoj tisentekitij namouan para nanyolpakiskej.

2 Porin nikixtalij amo namechtayokoltis keman oksepa namechkalpanotiuj. 2 Porin, ¿akoni uelis kichiuas maj niyolpaki komo namechtayokoltia? Sayoj akin niktayokoltij. 3 Yejua ika ijkon namechtajkuilouilij porin amo niknekik nias sayoj para maj nechtayokolti tein nankichiuaj, porin namejuan monekiskia nanechyolpaktiskej. Nejua nikyekmati ke tein nechyolpaktia nejua, no namechyolpaktia nochin namejuan. 4 Porin kemej niyoltajyouijtoya uan nimoyoltekipachojtoya, semi nichokatiaya keman namechtajkuilouilijtoya. Sayoj ke amo namechtajkuilouilij para ximotayokoltikan, ta para xikmatikan ke semi namechtasojta.

5 Uan komo aksa* kichiuak ximotayokoltikan, amo kichiuak maj nejua nitayokoya, ta kichiuak xitayokoyakan nanochin. Sayoj ke amo nikneki okachi ika nitajtos nejin. 6 Nankitatsakuiltijkejya nejon takat. Amo xikixtopeuakanok. 7 Axkan xiktapojpoluikan ika nochi namoyolo uan xikyolseuikan para maj amo mosenkaua porin semi tayokoxtos. 8 Yejua ika, namechyolchikaua xiknextilikan ke nankitasojtaj. 9 Porin no namechtajkuilouilij para nikmatis ox nantatakamatij itech nochi. 10 Komo namejuan nankitapojpoluiaj aksa, nejua no niktapojpoluia. Tein melauj, nochi tein nitetapojpoluij, (komo monekik nitetapojpoluis), nitetapojpoluij para namechpaleuis iixpan Cristo, 11 para maj Satanás amo techkajkayaua,* porin kuali tikmatij toni ika takajkayaua.*

12 Uan keman niajsik Troas para nikteixmatiltis kuali tanauatilmej* tein ika tajtoua Cristo uan kemej yeskia nechtatapouilijkej para nikchiuas itekiuj toTekotsin, 13 nejua semi nimotekipachoj porin amo nikajsik nokniuj Tito. Yejua ika nimonauatij uan niajki Macedonia.

14 ¡Tiktasojkamatiliaj Dios! Yejua nochipa techyekana kemej yeskia tisoldados iuan Cristo akin tentiuitsej keman mokepaj satepan ke tatanitoj. No totechkopa kichiua maj noyampa moixmati* tein Dios tamachtia, kemej teisa tein kualtsin ajuiyak. 15 Tejuan akin tikteixmatiltiaj Cristo, titamatij kemej teisa tein kualtsin ajuiyak iixpan Dios. Nejin tein kualtsin ajuiyak, kinajsi akin momakixtitij* uan akin ixpoliuitij.* 16 Akin ixpoliuitij kijnekuij ke tsojyak kemej teisa tein miket uan tein temiktij, sayoj ke akin momakixtitij kijnekuij ke kualtsin ajuiyak uan kichiua maj nemikan. ¿Uan akoni kimati kichiuas nejin tekit? 17 Tejuan, porin amo timotomintiaj ika* itajtol Dios kemej miakej kichiuaj, ta iixpan Dios, titajtouaj ika nochi toyolo kemej imomachtijkauan Cristo uan kemej akin Dios kintitanik.

3 ¿Moneki oksepa tamechiluiskej tiakonimej? ¿Moneki tamechtitaniliskej amatajkuilolmej kampa kuali toka tajtoskej ijkon kemej oksekin? ¿Moneki xitechijkuilouilikan nejin amamej? 2 Namejuan kemej yeskia nejon amatajkuilol, tein ijkuiliujtok itech toyolo uan tein kiixmatij uan kiixtajtoltiaj* nochin. 3 Porin moyekita ke namejuan kemej yeskia se iamatajkuilol Cristo tein tejuan tikijkuilojkej kemej itekitikauan Dios. Amo ijkuiliujtok ika tapal, ta ika ichikaualis se Dios akin nochipa yoltok, uan amo no ijkuiliujtok itech tet, ta itech se iyolo.

4 Itechkopa Cristo, Dios techyekmatiltia nejon. 5 Sayoj ke tejuan toselti amo tikmatij tikchiuaskej nion teyi, ta Dios techpaleuia maj tikmatikan tikchiuaskej tein yeski. 6 Yejua akin kichiua maj tikmatikan tikteixmatiltiskej* yankuik taman tein Dios motenkauak, uan amo timoyekanaj ika iTanauatil Moisés, ta ika ichikaualis Dios. Porin iTanauatil Moisés kiixtalia maj se miki, sayoj ke ichikaualis Dios kichiua maj se nemi.

7 Sayoj ke, Tanauatil tein kiixtalia maj se miki uan moijkuiloj itech tet, motemakak ika se ueyi tanex, yejua ika israelitas amo ueliaj kiixitayaj Moisés porin iixko semi pepetakaya,* uan nejon tanex yaya ixpoliuiti. 8 Yejua ika, ¡keman motemaka ichikaualis Dios monekiskia yeski okachi kuali! 9 Porin komo Tanauatil tein kiixtalia maj se miki semi kuali katka, ¡tekit tein tapaleuia maj Dios techita ke tiyolmelaujkej okachi kuali! 10 Tein melauj, iTanauatil Moisés semi kuali katka, sayoj ke amo tapaleuiaok porin yankuik taman tein Dios motenkauak okachi kuali. 11 Porin komo tein yaya ixpoliuiti motemakak ika se ueyi tanex, ¡tein amo ixpoliui moneki yeski okachi kuali!

12 Kemej titakuaujtamatij ke mochiuas nejon, amo teyi techtsakuilia maj titajtokan 13 uan amo tikchiuaj kemej Moisés, akin moixtsakuaya ika se tasal para maj israelitas amo kiitanij tein kipanoskia tein yaya ixpoliuiti. 14 Sayoj ke yejuan amo uelia kiajsikamatiaj. Uan hasta axkan, keman moixtajtoltia* tein ne uejkauj Dios motenkaujka, kemej yeskia kisentoka kinixtsakuilijtok nejon tasal, porin sayoj moajchiua itechkopa Cristo. 15 Tein melauj, hasta axkan, ininyolo kisentoka ixtsaktok ika se tasal, yejua ika amo kiajsikamatij tein kijkuiloj Moisés. 16 Sayoj ke, keman se mokepa iuan Jehová,* nejon tasal moajchiua. 17 Jehová* amo moita uan yetok ne iluikak,* uan akin kipiaj ichikaualis Jehová* amo moajsij temako. 18 Uan tinochin amo teyi techixtsaktok uan titamatij kemej teskat tein kinextia ke Jehová* semi ueyichiujkej. Timopataj para timochiuaskej kemej Dios uan para okachi tiknextijtiaskej ke Dios semi ueyichiujkej, senkis kemej kineki Jehová,* akin amo moita uan yetok ne iluikak.*

4 Yejua ika, kemej tikpiaj nejin tekit porin Dios techiknelij, amo timosenkauaj. 2 Okachi kuali, amo tikchiuajok tein moichtakachiua uan tepinaujtij. Uan amo titakajkayauaj nion tikejkepaj* itajtol Dios, ta tejuan tikteixmatiltiaj tein melauak uan ijkon iixpan Dios tiknextiaj ke tikchiujtokej tein kuali para maj nochin* ueli kiitakan. 3 Komo kuali tanauatilmej* tein tikteixmatiltiaj pantsaktok ika se tasal, amo ueli kiitaj akin ixpoliuitij,* 4 akin amo taneltokaj. In dios tein taixyekantok nikan taltikpak* kintanemililtsakua, para maj amo kintauili in kuali tanauatilmej tein semi kualtsitsin. Nejin kuali tanauatilmej ika tajtouaj Cristo, akin tamati kemej Dios. 5 Porin amo tikteixmatiltiaj tein tejuan tikchiuaj, ta tikteixmatiltiaj ke Jesucristo yejua toTekotsin uan ke tejuan tamechtekitiliaj porin tiktakamatij Jesús. 6 Porin Dios kijtoj: “Maj tanesi kampa tayouayan”. Uan ika iixko Cristo, Dios kitauilij toyolo. Ika nejin tauil ueli tikixmatij Dios.

7 Sayoj ke, tikpiaj nejin kualtsin tekit maski titamatij kemej se sokikomit* tein kipia teisa tein tel patiyoj. Ijkon nesi ke tikpiaj chikaualis tein toselti amo ueli tikpiaj, nejin chikaualis ualeua imako Dios uan amo totech. 8 Timoajsij kemej yeskia miak taman techpechijtok, sayoj ke ueli timooliniajok; amo tikmatij toni tikchiuaskej, sayoj ke nochipa tikajsij tein uelis tikchiuaskej;* 9 techtajyouiltiaj, sayoj ke amo tietokej toselti; techuetsiltiaj, sayoj ke amo techixpolouaj. 10 Kampa yeski tiouij, tikxikouaj tein Jesús kijyouij, uan nejon kinnextilia oksekin ke titajyouiaj kemej Jesús tajyouij. 11 Tiyoltokej, sayoj ke nochipa techmiktisnekij porin tiktojtokaj Jesús, uan nejon kinnextilia oksekin ke titajyouiaj kemej Jesús tajyouij. 12 Yejua ika maski tejuan uelis timikiskej, nejin namechpaleuis xinemikan.

13 Yejua nejin tein ijkuiliujtok: “Nitakuaujtamatik, yejua ika nitajtoj”. Tejuan no ijkon titakuaujtamatij, yejua ika titajtouaj, 14 porin tikmatij ke akin kichiuak maj Jesús oksepa nemi* no kichiuas maj tejuan oksepa tinemikan para techuikas iixpan Jesús uan iuan tietoskej. 15 Porin nochi nejin mochiuak para namechpaleuis, para maj Dios kinmaka itatiochiualis tein amo technamiki okachi miakej. Porin okachi miakej kitasojkamatilijtokej, uan nejon kiueyitalia Dios.

16 Yejua ika, amo timosenkauaj. Maski tantiuj tochikaualis, toyolo uan totanemilil mojmostaj moyankuilijtiuj. 17 Porin maski ouijkayomej* panotikisaj uan amo uejueyi, kichiua maj tikpiakan okachi uejueyi* tatiochiualismej, tein uejkauaj nochipaya. 18 Amo tiksentokaj titanemiliaj itech tein ueli tikitaj, ta titanemiliaj itech tein amo ueli tikitaj. Porin tein ueli tikitaj sayoj panotikisa, sayoj ke tein amo ueli tikitaj uejkaua nochipaya.

5 Porin tikmatij ke komo uejueliuiti tochan tein tikpiaj nikan taltikpak, nejin tonakayo tein tamati kemej se takenkal, Dios techmakas ompa iluikak se kali tein amo keman uejueliuis, tein amo kichijchiuak se takat. 2 Yekmelauj titayokolchokaj itech nejin kali, semi tiknekij timotaliliskej tein techchijchiuilijkej uan tein ualeua ne iluikak 3 uan ijkon, keman timotaliliskej, amo tixipetsyetoskej.* 4 Tein melauj, akin tietokej itech nejin takenkal titayokolchokaj uan tiyoltajyouiaj. Sayoj ke amo porin tiknekij timokixtiliskej nejin takenkal, ta porin tiknekij timotaliliskej okse para maj ixpoliui tein ueli miki uan maj tikpiakan tein amo ueli miki. 5 Dios techchijchiuak maj ijkon tinemikan uan techmakak ichikaualis, uan ijkon yejua moyektenkauak* ke techmakas tatiochiualismej tein onkatij.

6 Yejua ika senkis tikneltokaj nejin uan tikmatij ke keman tiyoltoskejok* nikan taltikpak, amo tietoskej iuan toTekotsin. 7 Tejuan tikchiuaj nochi porin titakuaujtamatij uan amo porin techyekana tein tikitaj, yejua ika tikmatij nejin. 8 Sayoj ke senkis tikneltokaj uan okachi tiknekij tinemiskej iuan toTekotsin uan amo tiyoltoskej nikan taltikpak. 9 Yejua ika, yeski iuan tinemiskej oso amo iuan tietoskej, sayoj tiktemouaj tikyolpaktiskej. 10 Porin tinochin moneki tietoskej* iixpan Cristo uan yejua kiixtalis tein kinamiki kiselis sejse keman yoltosok nikan taltikpak: kintatsakuiltis akin kichiuaj tein amo kuali uan kintatiochiuis akin kichiuaj tein kuali.

11 Kemej tikmatij ke moneki tikmojkatokaskej toTekotsin tiksentokaj tikintaneltoktiaj oksekin, sayoj ke Dios kuali techixmati, uan nikchia maj namejuan no kuali xitechixmatikan.* 12 Amo tiktemouaj oksepa tamechiluiskej tiakonimej, ta tamechiluijtokej nochi nejin para uelis nantechueyitaliskej, uan ijkon uelis nankinnankiliskej akin sayoj kiitstinemij akoni ueyichiujkej uan amo kiitaj tein se kipia se iyolijtik. 13 Porin komo tikchiujkej teisa tein kinextij ke tikuatapolojtoyaj, tikchiujkej para tikyolpaktiskej Dios; tein melauj amo tikuatapolojtokej, ta tiknekij tamechpaleuiskej. 14 Kemej Cristo techtasojta, nejon techchiualtia maj tiktakamatikan, porin yejua nejin tein tikajsikamatkej: ke se takat momikilij ininka nochin, porin nochin momikilijkajya. 15 Uan yejua ininka momikilij nochin para maj akin nemij, amo kichiuakan tein sayoj yejuan kinekij, ta maj kiyolpaktikan Cristo, akin ininka momikilij uan oksepa nemik.*

16 Yejua ika, desde axkan, amo akin tikitajok kemej oksekin teitaj. Tein melauj, komo tisekimej tikitakej Cristo kemej oksekin kiitaj, amo ijkon tikitajok. 17 Yejua ika, komo se takat poui iuan Cristo, yejua se yankuik takat akin Dios kichijchiuak. Tein achto onkaya panokya. ¡Xikitakan! Axkan onkak miak taman tein yankuik. 18 Sayoj ke nochi ualeua imako Dios, akin itechkopa Cristo kichiuak maj oksepa kuali timouikakan iuan uan techmakak se tekit para tikinpaleuiskej oksekin maj oksepa kuali mouikakan iuan. 19 Nejin kijtosneki ke itechkopa Cristo, Dios kichiujtoya maj miakej oksepa kuali mouikakan iuan, uan amo kinelnamikiliaok inintajtakoluan. Uan Dios technauatij maj tikiniluikan oksekin ke uelis oksepa kuali mouikaskej iuan.

20 Yejua ika, tejuan Dios techtitanik* itokaykopa Cristo,* kemej yeskia Dios totechkopa kintataujtijtoskia nochin. Itokaykopa Cristo, tikintataujtiaj: “Oksepa kuali ximouikakan iuan Dios”. 21 Cristo amo keman tajtakolchiuak uan Dios kitemaktij para kiixtauas totajtakoluan, yejua ika itechkopa uelis tiyeskij tiyolmelaujkej iixpan Dios.

6 Kemej titekitij iuan Dios, tejuan no tamechtataujtiaj amo nenkaj xikselikan itatiochiualis Dios tein amo technamiki. 2 Porin yejua kijtoua: “Nimitskakik itech tonalmej keman nitatiochiujtoya uan nimitspaleuij keman nitemakixtijtoya”. ¡Axkanya nejon tonalmej keman Dios tatiochiujtok! ¡Axkan nejon tonal keman Dios temakixtia!

3 Amo teyi tikchiujtokej tein kichiuas maj oksekin uetsikan,* para maj amo akin kitejteneujto* tekit tein tikchiuaj. 4 Okachi kuali, tiknextiaj ke tiitekitikauan Dios itech nochi tein tikchiuaj: keman tikxikouaj miak taman, keman titajyouiaj, keman amo tikpiaj tein moneki, keman tikpiaj ouijkayomej, 5 keman techmagaj,* keman techtsakuaj, keman timoajsij kampa takuejmolchiuaj, keman chikauak titekitij, keman timokochijsolouaj,* keman amo tikpiaj tein tikuaskej; 6 keman tichipaujkanemij, keman tikixmatij tein melauak, keman amo tiyolijsiuij uan tikualtakamej, keman timokauaj maj techixyekana ichikaualis Dios, keman yekmelauj titetasojtaj uan amo titaixkajkayauaj, 7 keman tikijtouaj tein melauak, keman titakuaujtamatij itech ichikaualis Dios, ijkuak kemej yeskia tikpiaj teposmej toyekmakopa* uan toopochmakopa* tein techpaleuiaj maj tikchiuakan tein kuali yetok, 8 keman techueyitaliaj oso amo techtakachiuaj,* keman kuali toka tajtouaj oso techijijtouaj. Techitaj kemej takajkayauanij maski tikijtouaj tein melauak; 9 kemej akin amo techixmatij maski kuali techixmatij; kemej yeskia timomikilijtokej* maski tiyoltokej; kemej yeskia techtatsakuiltijkej sayoj ke amo techmiktijkej; 10 techitaj kemej yeskia titayokoxtokej maski nochipa tiyolpaktokej; kemej yeskia tipobres maski tikinmakaj miak taman oksekin uan kemej yeskia amo teyi tikpiaskiaj maski tikpiaj nochi.

11 Tokniuan akin nanyetokej Corinto, tamechyeknojnotstokej uan tamechtasojtaj ika nochi toyolo.* 12 Tejuan semi tamechtasojtaj, sayoj ke namejuan amo semi nantechtasojtaj. 13 Yejua ika, no ijkon xikchiuakan touan uan no okachi xitetasojtakan.* Namechnojnotstok kemej yeskia nannokoneuan.

14 Amo ximosentilikan* iniuan akin amo taneltokaj. Porin ¿uelis mouikas tein kuali iuan tein amo kuali?* ¿Uelis mouikas tanex iuan tayouayanilot? 15 Uan no, ¿uelis moyekuikaskej Cristo uan Amokuali?* ¿Toni kinsentilis se akin taneltoka uan se akin amo taneltoka? 16 ¿Uelis yetoskej tatadiosmej* itech itemplo Dios? Porin tejuan kemej yeskia itemplo se Dios akin nochipa yoltok. Ijkon kemej Dios kijtoj: “Nejua ninemis iniuan uan nietos iniuan, uan niyeski ininDios uan yejuan yeskij noxolal”. 17 “Jehová* kijtoua: ‘Yejua ika, xikisakan uan amo iniuan ximonelokanok uan amo xiksentokakan xikmatokakan* tein pitsotik’, ‘uan nejua namechselis’”. 18 “Jehová* akin kipia nochi chikaualis kijtoua: ‘Uan nejua niyeski namopaj uan namejuan nanyeskij nannookichpipiluan uan nannosiuapipiluan’”.

7 Yejua ika, notasojikniuan, kemej Dios touan motenkauak nejin, maj timochipauakan de nochi tein kipitsotilia tonakayo uan totanemilil, nejon kichiujtias maj Dios techita ke okachi tichipaujkej porin tikmojkatokaj.

2 Xitechtasojtakan.* Amo akin tikchiuilianij tein amo kuali, amo akin tikijtakouanij, uan amo akin tikuilianij teisa. 3 Amo namechiluijtok ke amo kuali tein nankichiujtokej, porin namechiluijkaya ke semi tamechtasojtaj. Namechiluia ke amo teyi kichiuas maj amo tamechtasojtakan. 4 Amo teyi nechtsakuilia maj namechilui tein niknemilia. Semi nechyolpaktia tein nankichiuaj. Semi niyolseujtok uan semi niyolpaki maski semi titajyouijtokej.

5 Tein melauj, keman tiejkokej Macedonia amo tiyolseujkej, ta tiksentokakej tikijyouijkej miak tataman: kalampa semi techteuiayaj uan no semi timotekipachojtoyaj. 6 Sayoj ke, Dios akin kinyolseuia akin kinekij mosenkauaskej, techyolseuij keman ejkok Tito. 7 Uan amo sayoj porin touan yetoya, ta no porin nankiyolseuijkej. Yejua techiluij ke semi nanechitasnekiaj, ke semi nantayokoxtoyaj uan semi noka namotekipachojtoyaj, uan nejon okachiok nechyolpaktij.

8 Yejua ika, komo namechtayokoltij ika tein namechijkuilouilij, amo nechyolkokoua. Achto nechyolkokoj nikmatis ke namechtayokoltij tein nikijkuiloj, sayoj ke nikmatik ke amo uejkauak nantayokoxtoyaj. 9 Axkan niyolpaki amo porin namechtayokoltij, ta porin kemej nantayokoxtoyaj namoyolpatakej. Namotayokoltijkej kemej Dios kiyolpaktia, uan tejuan amo teyi tamechchiuilijkej. 10 Porin timotayokoltiskej kemej Dios kiyolpaktia, kichiua maj se moyolpata uan maj se makisa, uan nejin amo akin kiyolkokoua, sayoj ke timotayokoltiskej kemej motayokoltiaj nikan taltikpak, kichiua maj se miki. 11 ¡Xikitakan keniuj namechpaleuij namotayokoltiskej kemej Dios kiyolpaktia! Axkan amo teyiok uelis namechijtouiliskej, nankitauelitajya tein amo kuali, nantamojkatokajya, nankitelnekkej namoyolpataskej, nankitekitiliajya Dios ika nochi namoyolo uan amo nankikauajok maj mochiua tein amo kuali. Itech nochi nejin, nankichiujkej nochi tein monekia.* 12 Amo namechtajkuilouilij porin aksa* kichiujtoya se tajtakol nion porin okse kijyouij nejon tajtakol, ta para maj moyekita iixpan Dios ox yekmelauj nankinekiaj nantechtakamatiskej. 13 Yejua nejon tein techyolseuij.

Sayoj ke, okachi techyolpaktij tikitaskej ke Tito yolpaktoya, porin nochin namejuan nankiyolchikaujkej. 14 Nejua semi namechueyitalij keman iuan nitajtoj Tito uan amo nankichiujkej maj nimopinaujti. Ijkon kemej melauak nochi tein tamechiluijkej, no monextij ke melauak tein tikiluijkej Tito. 15 Uan no, yejua okachi namechtasojta kemej yeskia naniikniuan keman kielnamiki ke nanochin nantatakamatij, uan ke semi nankitakachiujkej* keman nankiselijkej. 16 Niyolpaki porin uelis namotech nitakuaujtamatis* itech nochi.

8 Nokniuan, axkan tiknekij tamechmatiltiskej tein mochiujtok itech nechikolmej nikan Macedonia ika itatiochiualis Dios tein amo technamiki. 2 Keman kipanotoyaj se ueyi ouijkayot tein semi kintajyouiltij, kitemakakej tein kipiayaj ika miak pakilis maski semi pobres. Nejin kinextij ke semi kualtakamej. 3 Nejua ueli nikyekijtoua ke kitemakakej nochi tein uelkej, hasta okachiok. 4 Porin maski amo tikintajtanijkej, nejin tokniuan semi techtataujtijkej maj tikinkauakan maj kitemakakan tein kipiaj, uan ijkon no ueliskiaj kinpaleuiskej akin Dios moinxelouilij.* 5 Uan kichiujkej okachi ke tein tikchiayaj, porin achto mochikaujkej kitekitiliskej toTekotsin ika nochi ininyolo uan techpaleuijkej ijkon kemej Dios kineki. 6 Yejua ika tikyolchikaujkej Tito maj kitamisentili tein nankitemakaskiaj ika nochi namoyolo, porin ipa peujkaya kisentilia. 7 Nochi tein nankichiujtokej namejuan semi kuali. Semi nantakuaujtamatij, kualtsin nantanojnotsaj, nankiixmatij miak taman, semi namochikauaj itech nochi tein nankichiuaj uan yekmelauj nantetasojtaj kemej tejuan tamechtasojtaj. Yejua ika no xitemakakan tein nankipiaj ika nochi namoyolo.

8 Amo namechnauatijtok xitapaleuikan, ta nikneki xikitakan keniuj oksekin mochikauaj tapaleuiskej uan no nikneki nikitas ox yekmelauj nantetasojtaj. 9 Porin namejuan nankiixmatij itatiochiualis toTekotsin Jesucristo tein amo technamiki: maski amo teyi kipolouaya, namoka mochiuak pobre, nejon namechpaleuiskia maj amo teyi namechpolo.

10 Namechiluiti tein niknemilia. Nejin namechpaleuia, porin se xiuitya nankipeualtijkej nejin tekit; tein melauj, nankinextijkej ke nankinekiaj nankichiuaskej. 11 Yejua ika xiktamichiuakan tein nankipeualtijkej, uan xiktemakakan ijkon kemej nanueliskej. Ijkon nankinextiskej ke nankitemakaj ika nochi namoyolo. 12 Porin tein aksa* kitemaka ika nochi iyolo kiyolpaktia Dios, keman kitemaka tein kipia uan amo tein amo kipia. 13 Uan amo nikneki maj oksekin kitelpiakan uan namejuan maj amo namechajsi, 14 ta nikneki maj amo teyi namechpolo namejuan nion yejuan. Ijkon, ika tein axkan nankitelpiaj nankinpaleuiskej akin amo kinajsi, uan ika tein yejuan kitelpiaj no namechpaleuiskej itech tein amo namechajsi, uan ijkon namosenpaleuiskej. 15 Ijkon kemej ijkuiliujtok: “Akin kipiaya miak, amo kipiak okachi, uan akin amo semi kipiaya, amo teyi kipoloj”.

16 Tiktasojkamatiliaj Dios maj Tito namoka motekipacho kemej tejuan. 17 Yejua amo sayoj kichiuak tein tikiluijkej, ta no yekmelauj kinekik kichiuas, uan hasta kiixtalij namechkalpanotiuj. 18 Iuan tiktitanij tokniuj akin itech nochi nechikolmej kuali ika tajtouaj porin kiteixmatiltia kuali tanauatilmej.* 19 Uan amo sayoj nejon, ta tokniuan itech nechikolmej kiixtalijkej maj no touan youi, para techpaleuis maj tikxejxelokan tein ika miak pakilis nankitemakakej. Nejon tapaleuis maj moueyitali toTekotsin uan tiknextiskej ke yekmelauj tiknekij titapaleuiskej. 20 Ijkon amo akin uelis kijtos ke amo kuali tikuitokej tein nankitemakakej ika miak pakilis. 21 Porin ‘timochikauaj amo titakajkayauaskej itech nion teyi, amo sayoj iixpan Jehová,* ta no ininixpan oksekin’.

22 Uan no, iniuan tiktitanij okse tokniuj, akin miakpa kinextiani ke takuaujtamach uan tikitanij ke itech miak taman kuali tekiti. Sayoj ke axkan okachi yektekitis porin semi takuaujtamati namouan. 23 Komo aksa tajtani akoni Tito, xikmatikan ke yejua notekitikaikniuj akin no namechpaleuia. Uan no, komo aksa tajtani akonimej nejin tokniuan, xikmatikan ke tokniuan itech nechikolmej kintitankej* uan yejuan kiueyitaliaj Cristo. 24 Yejua ika xiknextikan ke nankintasojtaj uan xikinnextilikan tokniuan itech nochi nechikolmej keyej kuali namoka titajtouaj.

9 Amo moneki namechtajkuilouilis para nankimatiskej ke moneki nankinpaleuiskej* akin Dios moinxelouilij,* 2 porin nikmati ke yekmelauj nankinekij nantapaleuiskej uan namechueyitalia ininixpan akin yetokej Macedonia, porin nikiniluia ke akin yetokej Acaya se xiuitya kiixtalijtokej tapaleuiskej. Tein melauj, kemej nantapaleuiaj ika nochi namoyolo, miakej no kinekij tapaleuiskej. 3 Sayoj ke nikintitani tokniuan para xikpiakanya tein ika nantapaleuiskej, ijkon kemej nikijtoj ke nankipiayajya, uan ijkon maj amo nenkaj tikijtouanij ke yekmelauj nantapaleuisnekij. 4 Porin komo akin yetokej Macedonia nouan yaskiaj uan namejuan ayamo nankipiaskiaj tein ika nantapaleuiskej, tejuan timopinaujtiskiaj porin namotech titakuaujtamatkej, uan namejuan no namopinaujtiskiaj. 5 Yejua ika nikixejekoj ke monekia nikiniluis tokniuan maj achto yakan kampa namejuan uan maj namechpaleuikan xiksentilikan tein namotenkaujkej nankitemakaskej. Ijkon keman tiajsiskej nankipiaskejya tein nankitemakaskej ika nochi namoyolo, uan amo nankitemakaskej porin namechchikaujkauiaj.

6 Xikelnamikikan nejin: akin sayoj tepitsin tatoka, sayoj tepitsin kisentilis, uan akin miak kitoka, no miak kisentilis. 7 Maj sejse kichiua ijkon kemej kiixtalij itech iyolo, uan maj amo kiyolkoko kitemakas nion maj kitemaka porin kichikaujkauiaj, porin Dios kitasojta akin kitemaka ika miak pakilis.

8 Tein melauj, Dios ueli namechnextilia itatiochiualis tein amo technamiki para maj amo keman namechpolo tein moneki uan no xiktelpiakan nochi tein moneki para nankichiuaskej tein yeski taman tein kuali. 9 (Ijkon kemej ijkuiliujtok: “Yejua kitetayokoliani miak taman tein kipia, uan no kinmakani pobres. Tein kuali tein kichiuak nochipa moelnamikis”. 10 Akin kimaka tel miak xinach akin tatoka uan techmaka tein tikmajseuaskej, no kitemakas uan kimiakiltis xinach para xitatokakan. No namechpaleuis xiksentilikan miak taman tein kuali porin nankichiujkej tein kuali). 11 Dios semi namechtatiochiuia para uelis nankitemakaskej miak taman ika pakilis, uan keman tiktemakaskej tein nankititanij, miakej kitasojkamatiliskej Dios. 12 Porin nejin tein nankichiujkej, amo sayoj kinpaleuia maj kipiakan tein kinpoloua akin Dios moinxelouilij,* ta no tapaleuia maj miakej kitasojkamatilikan Dios. 13 Ijkon, yejuan kiueyitaliskej Dios porin tein nankitemakakej kinextia ke namejuan nankichiuaj tein kijtoua kuali tanauatilmej* tein ika tajtouaj Cristo tein nankiteixmatiltiaj. Uan no kinextia ke namechyolpaktia nankinmakaskej tein nankipiaj, yejuan uan nochin. 14 Uan keman yejuan namoka motataujtiskej, kijtoskej ke namechtasojtaj porin Dios semi namechnextiliani itatiochiualis tein amo technamiki.

15 Tiktasojkamatiliaj Dios porin techtayokolij se taman tein semi kuali.*

10 Axkan nejua Pablo, namechtataujtia xikchiuakan tein namechiluia. Keman namechnojnotsa nikchiua kemej Cristo, akin yolyemanik uan kualtakat, maski nansekimej nankijtouaj ke nimoita ke amo teyi nichiujkej keman namouan nietok uan ke sayoj niyolchikauak keman namechtajkuilouilia. 2 Keman namechitatiuj, nikchia maj akin kinemiliaj ke timoyekanaj kemej moyekanaj nikan taltikpak amo ijkon tanemilikanok, para amo monekis nikinchikaujkanojnotsas, kemej xa monekis nikchiuas. 3 Porin maski tinemij kemej nochin, amo timoteuiaj kemej yejuan. 4 Porin tejuan amo timoteuiaj kemej soldados moteuiaj, ta tejuan tikuij tein Dios techmakatok tein semi chikauak para uelis tikxitiniskej* tein kemej yeskia uejueyi tepamit. 5 Porin kemej yeskia tikxitiniaj tanemililmej uan nochi tein kichiua maj oksekin amo kiixmatikan Dios. Tikpatatokej nochi taman tanemililmej* para tikchiuaskej maj kitakamatikan Cristo. 6 Uan keman namejuan nankinextiskej ke senkis nantatakamatij, tejuan tiktatsakuiltiskej akin kisentokas amo tatakamatis.

7 Namejuan nankitayekanaltiaj sayoj kemej se moita. Komo aksa* kiyekmati ke poui iuan Cristo, maj oksepa kuali tanemili itech nejin: ijkon kemej yejua poui iuan Cristo, tejuan no. 8 Porin toTekotsin techmakak tanauatil para tamechyolchikauaskej uan amo para tamechyolkokoskej, uan maski nejua nimoueyitaliskia tepitsinok porin nikpia nejon tanauatil, amo nimopinaujmatiskia. 9 Sayoj ke, amo nikneki xiknemilikan ke nikneki namechmojmoujtis ika tein namechtajkuilouilia. 10 Sekin kijtouaj: “Itech iamatajkuiloluan moita ke kipia tanauatil uan techchikaujkanojnotsa, sayoj ke keman touan yetok moita ke amo chikauak uan keman tajtoua nion se kinekiskia se kikaktos”. 11 Akin kijtos nejon, maj kiita ke tein tamechijkuilouiliaj no yejua nejon tein tikchiuaskej keman tamechitatiuij. 12 Porin tejuan amo tiknekij tipouiskej iniuan akin ininselti moueyichiuaj nion tikchiuaskej kemej yejuan. Yejuan kiixtaliaj ke kuali yetok tein kichiuaj porin ijkon kinemiliaj, uan ijkon kinextiaj ke amo teyi kiajsikamatij.

13 Sayoj ke, tejuan amo ika timoueyitaliskej tein amo tikchiujkej, ta ika tein Dios kiixtalij maj tikchiuakan,* tein ajsi hasta kampa namejuan nanyetokej. 14 Tein melauj, keman tamechitatoj, tejuan amo tikchiujkej tein amo ixyetok tikchiuaskej, ta tejuan achto tamechixmatiltijkej kuali tanauatilmej* tein ika tajtouaj Cristo. 15 Amo, amo ika timoueyitalijtokej tein amo ixyetok tikchiuaskej. Amo ika timoueyitalijtokej tekit tein oksekin kichiuaj, ta tikchiaj okachi xitakuaujtamatikan. Uan ijkon tein tikchiujkejya maj kisentoka momiakili kampa nanyetokej. Ijkon uelis okachi titekitiskej. 16 Uelis tikteixmatiltiskej kuali tanauatilmej itech talmej tein moajsij okachi uejka de kampa namejuan nanemij, para amo ika timoueyitaliskej tein mochiuakya kampa ixyetok tekitis okse. 17 “Sayoj ke akin moueyitalia, maj moueyitali porin kiixmati Jehová”.* 18 Porin akin iselti moueyitalia amo yejua akin Dios kiyolpaktia, ta Jehová* kiixejekoua akoni kiyolpaktia.

11 Nikuelitaskia xinechxikokan maski moitas ke amo nitanemilia. ¡Maski tein melauj nanechxikojtokejya! 2 Porin semi nikneki namechyekpias ijkon kemej Dios namechyekpia, porin nejua nimotenkauak namechnamiktis iuan sayoj se takat, Cristo, uan nikneki namechuikas iixpan kemej se chipauak siuapil.* 3 Sayoj ke ijkon kemej kouat kimatik keniuj kikajkayauas Eva, nimoui maj aksa* kimati keniuj kijtakos namotanemilil uan maj kichiua amo xichipaujkanemikanok uan amo yekmelauj xiktasojtakanok Cristo. 4 Uan nikijtoua nejin porin namejuan nankitajtolkakij ika pakilis akin namechixmatiltia okse Jesús tein tejuan amo tamechixmatiltijkej. Uan no niman nankikauaj maj kichiua ximoyekanakan ika okse tanemilil tein amo nankipiayaj oso maj namechixmatilti okseki kuali tanauatilmej* tein amo nankineltokatoyaj. 5 Porin nikita ke amo teyi kinextia ke namotatitaniluan akin yoyolkualmej* okachi ueyichiuanimej ke nejua. 6 Sayoj ke, maski nejua amo ueli niyektajtoua, kemaj nikixmati Dios, uan nejon tamechyeknextilianij itech nochi.

7 Ika miak pakilis namechixmatiltij ikuali tajtoluan Dios uan amo namechtajtanij tomin. Nimopinaujtij para maj namejuan namechueyitalikan. ¿Nimotajtakolmakak keman nikchiuak nejin? 8 Nikauak maj nechpaleuikan tokniuan itech okseki nechikolmej uan ijkon kemej yeskia nikintachtekij para namechtekitilis. 9 Maski ijkon, keman namouan nietoya uan amo teyi nikpiaya, amo teyi nitajtanik, porin tokniuan akin ualajkej de Macedonia nechpaleuijkej ika nochi tein nechpolouaya. Kemaj, nikchiuak nochi tein niuelik para amo namechtajtanis nion teyi, uan ijkon niksentokas. 10 Nikijtoua tein melauak ijkon kemej Cristo kijtoskia, niksentokas ika nimoueyitalis nejin itech talmej tein pouij Acaya. 11 ¿Uan keyej? ¿Porin amo namechtasojta? Dios kimati ke namechtasojta.

12 Sayoj ke, moajsij sekin akin moueyimatij* uan kijtouaj ke no tatitanilmej kemej tejuan. Yejua ika niksentokas nikchiuas tein nochipa nikchiua para maj amo kipiakan nion teyi tein ika moueyimatiskej. 13 Porin nejon takamej amo yekmelauj tatitanilmej, sayoj kinkajkayauaj oksekin uan mochiuaj kemej yeskia itatitaniluan Cristo. 14 Uan amo nikmojkaita, porin Satanás mochiua kemej yeskia se ángel tein yolkuali.* 15 Yejua ika amo no se kimojkaita maj itekitikauan no taixkajkayauakan para maj moitakan kemej akin kichiuaj tein kuali. Sayoj ke kintatsakuiltiskej ijkon kemej kinnamiki.

16 Oksepa namechiluia: maj amo akin kinemili ke amo nitanemilia. Sayoj ke, maski nankinemiliaj ke amo nitanemilia, xinechkakikan uan ijkon nejua no uelis tepitsin nimoueyitalis. 17 Axkan amo namechnojnotstok kemej namechnojnotsaskia toTekotsin, ta kemej namechnojnotsaskia se akin amo tanemilia, akin sayoj itech takuaujtamati uan moueyitalia. 18 Kemej miakej moueyimatij porin kipiaj miak taman nikan taltikpak, nejua no ijkon nikchiuas. 19 Kemej namejuan nankinemiliaj ke semi nantamattokej, nankintajtolkakij ika pakilis akin amo tanemiliaj. 20 Tein melauj, nankitajtolkakij akin yeski akin kichiua ximoajsikan temako, akin moaxkatilia uan namechkuilia tein nankipiaj, akin moueyichiua uan namechixtopeua uan akin namechixtatsinia.

21 Tepinaujtij maj tikijtokan nejin, porin ueliskia moitas ke semi amo tichikaujkej uan amo ueli tikuij totanauatil kemej moneki.

Sayoj ke, komo sekin amo pinauaj moueyimatiskej,* nejua amo no nipinaua nimoueyimatis maski sekin nechitaskej kemej se akin amo tanemilia. 22 ¿Yejuan hebreos? Nejua no. ¿Yejuan israelitas? Nejua no. ¿Yejuan ikoneuan Abrahán? Nejua no. 23 ¿Yejuan itekitikauan Cristo? Nitanankilia kemej se akin kuatapolojtok: nejua okachi niktekitilia Cristo ke yejuan. Okachi nitekitini, okachi miakpa nechtsakuanij, semi miakpa nechuijuitekinij uan miakpa yaya nimikiti. 24 Makuil viaje judíos nechuijuitekkej treinta y nuevejpa, 25 expa nechuijuitekkej ika takot, sepa nechtetenkej,* expa tamiuejueliuik barco kampa niaya uan nisenyoualtij uan nisentonaltij itech ueyiat kampa okachi uejkatan. 26 Miakkan niajtinemik, miakpa nechuikatoyaya at, nimoinnamikilij tachtekinij, nechtajyouiltijkej nojudíosikniuan uan akin amo judíos, nitajyouij itech ueyi xolal, itech taluakyan uan itech ueyiat uan nechtajyouiltijkej akin amo yekmelauj tokniuan, 27 chikauak nitekitini uan amo nimoseuiani, miakpa nimokochijsolouani,* amo nikpiani tein nikuas nion tein nitayis, miakpa nimayanpanouani, miakpa nisekmikini uan amo nikpiani tein nimotalilis.*

28 Amo sayoj nejon, ta no mojmostaj nimotekipachoua ininka tokniuan itech nochi nechikolmej. 29 Nechtekipachoua komo aksa amo chikauak, uan nechkualantia keman kiuetsiltiaj* se tokniuj.

30 Komo moneki se moueyitalis, ika nimoueyitalis tein kinextia ke amo nichikauak. 31 IDios uan iTajtsin toTekotsin Jesús, akin moneki se kiueyitalis nochipaya, kimati ke amo nitakajkayaujtok. 32 Ompa Damasco, ueyichiujkej akin tekiuaj Aretas kiixyekanaya, kintalij tajpianij itech ueyi xolal para nechkitskiskej, 33 sayoj ke tokniuan nechkalakijkej itech se chikiuit uan itech se ventana nechpantemouijkej tepankespan uan ijkon nicholoj.

12 Moneki nimoueyitalis. Ika namechnojnotsati tein Totekotsin nechitaltij uan nechmatiltij, maski amo teyi niktani ika nejin. 2 Nikixmati se takat akin poui iuan Cristo, akin 14 xiujmejya kiuikatiuetskej hasta expatika iluikak, amo nikmati ox ika inakayo oso amo, nejon sayoj Dios kimati. 3 Kemaj, nikixmati nejon takat akin kiuikatiuetskej xochital, amo nikmati ox ika inakayo oso amo, nejon sayoj Dios kimati. 4 Uan keman yetoya itech xochital, kikakik tajtolmej tein amo ueli se kijtoua uan tein nion akin kikauaj maj kijtojtinemi. 5 Nikueyitaliti nejon takat, sayoj ke nejua nimoueyitalis ika tein kinextia ke amo nichikauak. 6 Maski niknekiskia nimoueyitalis, ika nejon amo niknextiskia ke amo nitanemilia, porin nikijtoskia tein melauak. Sayoj ke amo nimoueyitalia para maj amo akin kinemili ke nikchiua okachi ke tein kiita oso tein nechkakilia, 7 sayoj porin toTekotsin nechmatiltij miak taman tein tel kualtsin.

Para maj amo nimoueyimati,* nikpia kemej yeskia se uitsti tein kalakik itech nonakayo, se iángel Satanás, tein kisentoka nechixtajtatsinia* para maj amo nimoueyimati. 8 Expa niktataujtij toTekotsin maj nechkixtili. 9 Sayoj ke yejua nechiluij: “Nimitsmakatokya notatiochiualis tein amo mitsnamiki uan amo teyiok mitspoloua, porin nochikaualis senkis* monextia keman amo tichikauak”. Yejua ika, ika miak pakilis nimoueyitalis ika tein kinextia ke amo nichikauak, para maj ichikaualis Cristo kisentoka notech.* 10 Yejua ika, niyolpaki porin amo nichikauak, keman nechuijuikaltiaj* uan keman amo nikpia tein moneki, keman nechtajyouiltiaj uan keman nikpia ouijkayomej porin niktojtoka Cristo. Porin keman nikuetaujtok, nichikauak.

11 Nimochiuak kemej se akin amo tanemilia. Sayoj ke komo kuali noka nantajtoskiaj, nejua amo ijkon nitajtoskia. Maski amo teyi nichiujkej, amo teyi kinextia ke namotatitaniluan akin yoyolkualmej* okachi ueyichiuanimej ke nejua. 12 Tein melauj, amo nisiouik namechnextilis tein kinextia ke nejua nitatitanil uan nikchiuak milagros uan uejueyi taman tein se kimojkaita. 13 Sayoj se taman kichiuak amo xikpiakan okachi miak tatiochiualismej kemej tokniuan itech okseki nechikolmej: ke nejua amo teyi namechtajtanij. Xinechtapojpoluikan porin nikchiuak nejon tein amo kuali.

14 Xikitakan, ika nejin expaya ueliskia nias namechitatiuj, uan amo teyi namechtajtanis. Porin amo niktemojtok tein nankipiaj, ta namechtemoua namejuan. Amo moneki maj konemej kisentilikan tein ika moixpanoltiskej inintatuan, ta maj tetatmej kisentilikan tein ika moixpanoltiskej ininkoneuan. 15 Nejua ika miak pakilis niktamis nochi tein nikpia uan senkis nimotamis para namechpaleuis. Komo nejua semi namechtasojta, ¿amo no moneki ijkon nanechtasojtaskej? 16 Uan maski amo teyi namechtajtanij, nankijtouaj ke nikmatik keniuj uan toni ika namechkajkayauas. 17 ¿Xe namechkuiliani teisa keman namechtitanilij semej tokniuan? 18 Niktataujtij Tito maj namechkalpanoti uan iuan niktitanik okse tokniuj. ¿Teisa namechkuilij Tito? ¿Melauj ke tiknextijkej sayoj se tanemilil? ¿Melauj ke tikchiuayaj sayoj se taman?

19 Xa nankinemilijtokej ke timotenpaleuijtokej, sayoj ke amo ijkon, ta kemej imomachtijkauan Cristo tikijtojtokej tein melauak iixpan Dios. Notasojikniuan, ika nochi tein tikchiuaj tiktemouaj tamechyolchikauaskej. 20 Porin nimoui maj ijkuak namechitatiuj amo xikchiujtokan tein nikuelitaskia, uan maj nejua amo nikchiua tein nankiuelitaskiaj. Nimoui maj namechajsiti namotajtolteuijtinemij, namonenexikoluijtinemij, fiero nankualanij, nantateuisnekij, nantetakajkayauilijtinemij, nantetenkuitinemij,* namoueyimattinemij* uan nantakuejmolchiujtinemij. 21 Keman oksepa namechitatiuj, xa noDios kichiuas maj nimopinaujti namoixpan uan nejua xa nitayokoyas porin miakej akin achto tajtakolchiujkaj ayamo moyolpatatokej. Yejuan amo kipatatokej kemej kiitaj tein pitsotik, auilnemilis* uan kemej kinitaj akin kichiuaj tein tetajyaltia uan amo ixpinauaj.*

13 Ika nejin expaya nikixtalij namechitatiuj. “Para se kimatis* ox melauak nochi tein moijtoj, moneki yetoskej omen oso eyin akin kiteixpantiskej”. 2 Maski axkan amo ompa nietok, kemej yeskia ojpaya namechkalpanoua. Yejua ika nikinnejmachtijtok akin achto kichiujkej tajtakolmej uan nochin oksekin, ke komo ueli oksepa namechitati, amo nikintapojpoluis akin kichiujtokej tein amo kuali. 3 Ijkon namechnextilis ke Cristo yekmelauj notechkopa tajtojtok. Uan Cristo amo kinextia namoixpan ke amo chikauak, ta kinextia iueyi chikaualis. 4 Tein melauj, yejua kikoujpampilojkej keman amo chikauak katka, sayoj ke Dios ika ichikaualis kichiuak maj oksepa yolto. Uan tejuan amo no tichikaujkej kemej yejua katka, sayoj ke Dios ika ichikaualis, tein namotech tekititok, kichiuas maj iuan tinemikan.

5 Xiksentokakan ximoyekitakan para nankimatiskej ox yekmelauj nantakuaujtamatij. Xiksentokakan xiknextikan keniuj yekmelauj nantamatij. ¿Oso amo nankiitaj ke Jesucristo poui namouan? Cristo amo pouiskia namouan komo amo nankiyolpaktiskiaj Dios. 6 Yekmelauj nikchia xikitakan ke tejuan tikyolpaktiaj Dios.

7 Tiktajtaniaj Dios maj namejuan amo xikchiuakan nion teyi tein amo kuali. Amo titajtanij nejon para maj oksekin techitakan ke tikyolpaktiaj Dios, ta para maj namejuan xikchiuakan tein kuali, maski oksekin kiitaskej ke tejuan amo tikyolpaktiaj Dios. 8 Porin amo ueli tikchiuaj nion teyi tein ika tikixnamikiskej tein melauak, ta sayoj tikchiuaj tein ika moteixmatiltis tein melauak. 9 Yekmelauj tiyolpakij keman tejuan amo tichikaujkej uan namejuan nanchikaujkej. Yejua nejin tein titajtanij itech tonetataujtil: xikyektalikan tein moneki. 10 Yejua ika namechijkuilouilia nejin keman ayamo namouan nietok. Ijkon, keman namouan nietos, amo monekis chikauak nikuis tanauatil tein toTekotsin nechmakak, ta uelis nikuis para namechyolchikauas uan amo para namechtatsakuiltis.

11 Uan axkan, nokniuan, xiksentokakan xiyolpakikan, xikyektalikan tein moneki, ximokauakan maj namechyolseuikan, xikpiakan sayoj se tanemilil uan xiyolseujkanemikan, uan ijkon Dios akin tetasojta uan teyolseuia namouan yetos. 12 Ximotajpalokan se iuan okse ika se beso* kemej yeskia naniknimej. 13 Nochin akin Dios moinxelouilij* namechtajpalouaj.

14 Maj toTekotsin Jesucristo namechmaka itatiochiualis tein amo technamiki, maj Dios kisentoka namechtasojta uan maj ichikaualis Dios kisentoka namechpaleuijto nanochin.