GÁLATAS

1 Nejua Pablo, namechtajkuilouilia. Nion se takat nechixtalij kemej tatitanil, ta Jesucristo uan toTajtsin Dios, akin kichiuak maj oksepa nemi.* 2 Nejua uan tokniuan akin nouan yetokej, tamechtajkuilouiliaj namejuan akin nanpouij itech nechikolmej tein yetokej Galacia:

3 Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios. 4 Cristo motemakak para techkixtilis totajtakoluan, uan ijkon techmakixtis itech nejin tonalmej* keman mochiujtok tein amo kuali. Yejua kichiuak nejon porin ijkon kinekik toDios uan toTajtsin, 5 akin kinamiki maj kiueyitalikan nochipaya. Maj ijkon mochiua.*

6 Semi nikmojkaita nejin: ijsiujka nankikaujtokej Dios akin namechnotsak itechkopa itatiochiualis Cristo tein amo technamiki, uan peuak nankineltokaj okseki kuali tanauatilmej.* 7 Amo kijtosneki ke onkak okseki kuali tanauatilmej, ta ke moajsij sekin akin namechkuejmolojtokej uan kinekij kikejkepaskej kuali tanauatilmej tein ika tajtoua Cristo. 8 Sayoj ke komo tejuan oso se ángel, amo namechmachtia kuali tanauatilmej tein tamechixmatiltijkej, ta okse taman, maj kitatsakuiltikan. 9 Oksepa namechiluia tein achto tikijtojkej: akin amo namechmachtis kuali tanauatilmej tein nankineltokakej, ta okse taman, maj kitatsakuiltikan.

10 ¿Niktemojtok maj kuali nechitakan oksekin, oso niktemojtok nikyolpaktis Dios? Komo niktemojtoskiaok maj kuali nechitakan oksekin, amo niyeskia niitakeual Cristo. 11 Porin nikneki xikmatikan nokniuan, ke kuali tanauatilmej tein namechixmatiltij amo ualeujtok de se takat, 12 porin amo nechmatiltij nion nechmachtij se takat, ta Jesucristo nechnextilij.

13 Namejuan nankitekakilijkej tein nikchiuaya keman nipouia itech inintaneltokalis judíos. Nankitekakilijkej ke semi nikintajyouiltij akin pouij itech inechikol Dios uan niktemouaya nikixpolos nechikol. 14 Uan no, okachi nitayekantiaya itech inintaneltokalis judíos ke miakej nojudíosikniuan akin katkaj nouampoyuan, porin okachi nikchiuaya ika nochi noyolo tein nechnextilijkej nouejkaujtatuan. 15 Dios kichiuak maj niyoli uan nechnotsak ika itatiochiualis tein amo technamiki. Yejua kiitak ke kuali yetoya 16 maj nikinixmatilti kuali tanauatilmej akin amo judíos para maj kiixmatikan iKoneuj. Keman nechijitak* maj nikchiua nejin, amo akin niktajtanijtiuetsito keniuj nikchiuas. 17 Amo no nipankisak Jerusalén nikinitato akin katkaj tatitanilmej achto ke nejua, ta niajki Arabia uan satepan nimokepak Damasco.

18 Eyi xiuit satepan nipankisak Jerusalén nikalpanoto Cefas* uan iuan nimokauak 15 tonalmej. 19 Sayoj ke amo nikinitak okseki tatitanilmej; ta sayoj Santiago, iikniuj toTekotsin. 20 Namechyekiluia iixpan Dios ke nejin tein namechijkuilouilia amo xolopijyot.

21 Satepan niajki itech talmej tein pouij Siria uan Cilicia. 22 Sayoj ke imomachtijkauan Cristo itech nechikolmej ompa Judea amo keman nechitstoyaj. 23 Sayoj kitekakiliayaj nejin: “Akin achto kinekia kiixpolos totaneltokalis uan techtajyouiltiaya, axkan kiteixmatiltijtok kuali tanauatilmej”. 24 Yejua ika peujkej kiueyitaliaj Dios ika tein nechpanok.

2 Keman panok 14 xiujmej, oksepa nipankisak Jerusalén iuan Bernabé, uan no nikuikak Tito. 2 Nipankisak porin toTekotsin nechnextilij ke monekia nias. Ompa nikinmelauilij tokniuan kuali tanauatilmej* tein nikinixmatiltijtok akin amo judíos. Sayoj nimosentilij iniuan tokniuan akin taixyekanayaj itech nechikol, porin niknekia nikmatis ox amo nenkaj katka tekit tein nikchiujtoya oso tein nikchiujka. 3 Sayoj ke nion Tito, akin nouan yetoya, kiluijkej ke monekia motekis,* maski katka griego. 4 Nejon kuejmol peuak keman ichtakakalakkej akin amo yekmelauj tokniuan para techpijpiaskej. Tejuan amo timoajsijok temako porin tipouij iuan Cristo Jesús uan yejuan kichiuasnekiaj maj oksepa tiktakamatikan* tanauatil. 5 Sayoj ke tejuan nion tepitsin* tikintajtolkakkej porin amo tiknekij xikauakan tein melauak tein moajsi itech kuali tanauatilmej.

6 Sayoj ke tokniuan akin kinitaj ke ueyichiuanimej uan semi kintakachiuaj* amo nechiluijkej nion teyi tein yankuik. Amo notekiuj toni chiuanimej, porin Dios amo kiita ox aksa* ueyichiujkej oso amo. 7 Yejuan kiitakej ke nechkauilijkaj maj nikinixmatilti kuali tanauatilmej akin amo judíos,* ijkon kemej Pedro kikauilijkaj maj kinixmatilti judíos,* 8 porin akin kimakak tanauatil Pedro para maj kichiua tekit kemej tatitanil iniuan akin judíos,* no nechmakak tanauatil maj nikchiua tekit kemej tatitanil iniuan akin amo judíos. 9 Uan yejuan kiitakej tatiochiualis tein amo technamiki tein nikselijka. Santiago, Cefas* uan Juan, akin kinitayaj ke okachi tayekantoyaj,* techmatajpalojkej Bernabé uan nejua ika ininyekmay, uan ijkon kinextijkej ke kuali kiitayaj maj tejuan tikinnojnotsatij akin amo judíos uan yejuan maj kinnojnotsatij judíos.* 10 Sayoj ke techiluijkej maj amo tikinelkauakan pobres, uan yejua nejon tein nimochikauani nikchiuas ika nochi noyolo.

11 Sayoj ke, keman Cefas ualaj Antioquía, nikixiluij ke amo kuali tein kichiujtoya. 12 Porin achto ke ejkoskiaj seki tokniuan akin Santiago kinualtitanka, yejua takuaya iniuan akin amo judíos, sayoj ke keman yejuan ejkokej amo takuayaok iniuan uan amo iniuan mosentiliayaok porin kinmouiliaya judíos.* 13 Okseki judíos no peujkej taixkajkayauaj ijkon kemej yejua, uan hasta Bernabé no peuak ijkon taixkajkayaua. 14 Yejua ika, keman nikitak ke amo kichiujtoyaj tein melauak tein moajsi itech kuali tanauatilmej, nikiluij Cefas ininixpan nochin: “Komo tejua ke tijudío tinemi kemej akin kayomej itech okseki altepemej, uan amo kemej judíos, ¿keyej tikneki tikchiuas maj akin kayomej itech okseki altepemej nemikan kemej judíos?”.

15 Tejuan ke tijudíos, uan amo titajtakolchiuanij kemej akin kayomej itech okseki altepemej, 16 tikmatij ke Dios amo kiita ke aksa yolmelauak porin kichiua tein kijtoua tanauatil, ta sayoj porin takuaujtamati iuan Jesucristo. Yejua ika titakuaujtamatij iuan Cristo Jesús: para maj Dios techita ke tiyolmelaujkej porin titakuaujtamatij iuan Cristo, uan amo porin tikchiuaj tein kijtoua tanauatil. Porin Dios amo akin kiitas ke yolmelauak porin kichiua tein kijtoua tanauatil. 17 Komo tejuan timochikaujtokej maj Dios techita ke tiyolmelaujkej itechkopa Cristo uan maski ijkon techitaj ke titajtakolchiuanij, ¿kijtosneki nejon ke Cristo kichiua maj titajtakokan? ¡Amo! 18 Komo axkan nikyekchijchiujtok tein achto nikxitinij, niknextia ke amo niktakamati tanauatil. 19 Yejua ika, itechkopa tanauatil kemej yeskia nimomikilij iixpan tanauatil, uan ijkon uelis ninemis para niktekitilis Dios. 20 Nipilkatok itech kouit iuan Cristo. Amo nikchiuaok tein nejua nikneki,* porin Cristo nemi notech. Tein melauj, axkan ninemi porin nitakuaujtamati iuan iKoneuj Dios, akin nechtasojtak uan noka motemakak. 21 Nejua amo nikixtopeua itatiochiualis Dios tein amo technamiki, porin komo Dios kiita ke aksa yolmelauak porin kitakamati tanauatil, Cristo nenkaj momikilij.

3 Amo nantanemiliaj namejuan akin nankayomej Galacia, ¿akoni namechkajkayauak? Porin namejuan kuali namechajsikamatiltijkej keniuj kikoujpampilojkej Jesucristo. 2 Sayoj nikneki namechtajtanis* nejin: ¿Dios namechmakak ichikaualis porin nankichiuaj tein kijtoua tanauatil, oso porin nantakuaujtamatij itech tein nankikakkej? 3 ¿Yekmelauj amo nankiajsikamatij? Satepan ke peuak namoyekanaj ika ichikaualis Dios, ¿axkan nankinekij namoyekanaskej ika tein kinemiliaj oksekin? 4 ¿Nenkaj semi nantajyouianij? Nikyekmati ke amo nenkaj nantajyouianij. 5 Komo ijkon, akin namechmaka ichikaualis Dios uan kichiua milagros namoixpan, ¿kichiua nejon porin nankitakamatij tanauatil, oso porin nantakuaujtamatij itech tein nankikakkej? 6 Yejua nejon tein panok iuan Abrahán: “takuaujtamatik iuan Jehová* uan yejua kiitak ke yolmelauak”.

7 Nikyekmati ke namejuan nankimatij ke akin takuaujtamatij yejuan ikoneuan Abrahán. 8 Ne uejkauj, Dios kijtoj itech itajtol ke kinitaskia ke yolmelaujkej akin kayomej itech okseki altepemej porin takuaujtamatiskiaj, yejua ika achto kiixmatiltij kuali tanauatilmej* Abrahán keman kiluij: “Motechkopa nikintatiochiuis akin nemij itech nochin altepemej”. 9 Yejua ika, akin takuaujtamatij kintatiochiuiaj kemej Abrahán, akin takuaujtamatik.

10 Nochin akin takuaujtamatij itech tanauatil kintatsakuiltiskej, porin ijkuiliujtok: “Maj kintatsakuiltikan akin amo nochipa kitakamatij tein ijkuiliujtok itech iTanauatil Moisés”. 11 Uan no, moyekita ke Dios amo akin kiita ke yolmelauak porin kitakamati tanauatil, porin ijkuiliujtok ke “akin yolmelauak nemis porin takuaujtamati”. 12 ITanauatil Moisés amo kijtoua ke moneki se takuaujtamatis, ta kijtoua ke “akin kitakamati tanauatil, nemis porin kitakamati”. 13 Cristo techkouak uan techmakixtij para maj amo techtatsakuiltikan kemej ixyetok itech iTanauatil Moisés, uan yejua kitatsakuiltijkej maski tejuan technamikia maj techtatsakuiltikan, porin ijkuiliujtok: “Akin kikoujpampilouaj kipinaujtiaj”. 14 Nejin mochiuak para maj tatiochiualis tein kimakaskiaj Abrahán no kinmakakan akin nemij itech nochin altepemej itechkopa Cristo Jesús, uan ijkon Dios techmakaskia ichikaualis tein motenkauak techmakas porin titakuaujtamatij.

15 Nokniuan, maj ika namechnojnotsa nejin: keman omen moyektenkauaj teisa uan kiixtaliaj ke ijkon kichiuaskej, amo akin uelis kitamajxitilis nion kikuilis nion teyi. 16 Dios motenkauak iuan Abrahán uan ikoneuj ke kintatiochiuiskia. Tajkuilolamatsin amo kijtoua “uan mokoneuan” porin nejin kinextijtoskia ke ininka tajtojtoya miakej, ta kijtoua “uan mokoneuj”, tein kinextia ke sayoj se ika tajtojtoya: Cristo. 17 No namechiluia nejin: iTanauatil Moisés, tein motemakak 430 xiujmej satepan, amo kichiua maj amo tapaleuiok tein Dios motenkaujkaya, nion kiixpoloua. 18 Porin komo tein Dios techtayokolia, techmaka porin tiktakamatij tanauatil, amo yeskiaok porin ijkon motenkauak. Sayoj ke Dios ika nochi iyolo kimakak Abrahán tein kijtojka ke kimakaskia porin ijkon motenkauak iuan.

19 Komo ijkon, ¿keyej motemakak iTanauatil Moisés? Motemakak para kiyeknextis tein amo kuali uan tapaleuiskia sayoj hasta keman ejkoskia ikoneuj Abrahán akin Dios iuan motenkauak ke kitatiochiuiskia. Dios kinmakak ángeles nejon tanauatil, uan yejuan kitematiltijkej itechkopa se tetajtouijkej. 20 Keman sayoj setsin motenkaua, amo moneki yetos se tetajtouijkej. No ijkon, keman Dios motenkauak, amo monekik se tetajtouijkej. 21 Komo ijkon, ¿iTanauatil Moisés kiixnamiki tein Dios motenkaua? ¡Amo! Porin komo motemakaskia se tanauatil tein ueliskia techpaleuis maj tinemikan, Dios techitaskia ke tiyolmelaujkej porin tiktakamatij nejon tanauatil. 22 Sayoj ke Tajkuilolamatsin kinextij ke nochin moajsiaj imako tajtakol. Ijkon akin takuaujtamatiskej iuan Jesucristo, uelis kiseliskej tein Dios motenkauak.

23 Sayoj ke, achto ke titakuaujtamatiskiaj iuan Cristo, techpixtoya tanauatil, tietoyaj imako uan tikchixtoyaj* tein Dios yaya kinextiti. 24 Yejua ika, iTanauatil Moisés mochiuak kemej se* akin techyekanak hasta Cristo, para maj Dios ueliskia techitas ke tiyolmelaujkej porin titakuaujtamatij. 25 Sayoj ke, axkan ke titakuaujtamatijya, amo monekiok maj techixyekana iTanauatil Moisés.

26 Tein melauj, nanochin nanikoneuan Dios porin nantakuaujtamatij iuan Cristo Jesús. 27 Porin nanochin, akin namoauijkejya uan nanpouij iuan Cristo, namochiujkejya kemej Cristo. 28 Amo tayekantokok ox aksa* judío oso griego, ox moajsi temako oso amo, ox takat oso siuat, porin nochin namejuan nansenpouij iuan Cristo Jesús. 29 Uan no, komo naniaxkauan Cristo yekmelauj nanikoneuan Abrahán, uan nankiseliskej tein Dios motenkauak.

4 Namechiluia ke keman piliok akin kikauiliskej nochi, yejua kemej yeskia se takeual, maski yeski iaxka nochi tein kipia itat, 2 porin moajsij akin kiyekpiaj yejua uan tajpiaj ichan hasta keman ejkos tonal tein itat kiixtalij. 3 No ijkon tejuan, keman katkaj tipilimejok, no tikatkaj titakeualmej porin titanemiliayaj uan tikchiuayaj kemej oksekin. 4 Sayoj ke keman ajsik tonal tein ixyetoya, Dios kiualtitanik iKoneuj, akin se siuat kiyolitij uan monekik kitakamatis tanauatil, 5 para maj kinkouani uan maj kinmakixtiani akin monekia kitakamatiskej tanauatil, uan ijkon Dios ueliskia techselis kemej tiikoneuan.

6 Kemej namejuan nanikoneuan, Dios kiualtitanik itech toyolo ichikaualis iKoneuj, tein kichiua maj chikauak tikijtokan: “¡Abba,* noTajtsin!”. 7 Yejua ika amo titakeualok, ta tiikoneuj Dios. Uan komo tiikoneuj Dios, no tikselis tein yejua kineki techmakas.

8 Sayoj ke, keman namejuan amo nankiixmatiaj Dios, namoajsiaj ininmako akin amo yekmelauj dioses. 9 Sayoj ke axkan ke nankiixmatij Dios, oso okachi kuali maj nikijto, axkan ke Dios namechixmati namejuan, ¿keyej oksepa nantanemiliaj uan nankichiuaj kemej oksekin uan nankinekij oksepa namoajsiskej ininmako? Nochi nejon nenkaj uan amo tapaleuia. 10 Namejuan nankinemiliaj ke onkakej seki tonalmej, seki metsti, seki tapoualmej uan xiujmej tein okachi tayekantokej uan naniluitij. 11 Nechtekipachoua maj nenkaj nimochikauani namechpaleuis.

12 Nokniuan, namechtataujtia ximochiuakan kemej nejua, porin nejua no nikatka kemej namejuan. Namejuan amo nanechchiuilijkej tein amo kuali. 13 Sayoj ke nankimatij ke nikokolispeuak, uan nejon tapaleuij maj ueli namechixmatilti kuali tanauatilmej,* porin ayamo nankiixmatiaj. 14 Uan maski namechtekimakak keman nikokolispeuak, amo nanechixtopeujkej nion nanechijiyakej,* ta nanechselijkej kemej se iángel Dios, kemej Cristo Jesús. 15 ¿Keyej amo nanyolpakijok kemej achto? Porin uelis nikyekijtos ke komo ueliskia, namokixtiliskiaj namoixtololouan uan nanechmakaskiaj. 16 ¿Uan axkan nankinemiliaj ke namechtauelita porin namechiluia tein melauak? 17 Yejuan kitelnekij namechtanejnektiskej, sayoj ke amo porin kinekij namechpaleuiskej, ta kinekij xinechkauakan uan ijkon xiknekikan nankintojtokaskej. 18 Kuali yetok maj semi namechtemokan komo kinekij namechpaleuiskej, sayoj ke moneki nochipa ijkon yeski uan amo sayoj keman nejua nietos namouan. 19 Nokoneuantsitsin, oksepa nitajyouia namoka kemej ijkuak se temomaj kipiati ikonetsin. Uan ijkon niksentokas hasta keman namejuan nantamatiskej kemej Cristo. 20 Nikuelitaskia nietos namouan yekintsin uan amo namechnojnotsas kemej namechnojnotstok, porin amo nikajsikamati toni namechpanotok.

21 Xinechiluikan, namejuan akin nankinekij nankitakamatiskej tanauatil, ¿amo nankimatij tein kijtoua iTanauatil Moisés? 22 Ijkuiliujtok ke Abrahán kinpiak ome ikoneuan: se iuan se siuat akin katka takeual uan okse iuan se siuat akin amo katka takeual. 23 Ikoneuj takeual yolik kemej tinochin tiyolij, uan ikoneuj akin amo takeual yolik porin Dios ijkon motenkauak. 24 Nejin kiixnextia tein mochiuaskia satepan, porin nejin ome siuamej kiixnextiaj ome taman tein Dios motenkauak. Se mochiuak itech tepet Sinaí uan tamati kemej Agar, uan nochin akin kitojtokaj, temako yetokej. 25 Agar kijtosneki Sinaí, se tepet tein yetok Arabia, uan kiixnextia Jerusalén tein moajsi axkan, porin yejua moajsi temako iuan ikoneuan. 26 Sayoj ke Jerusalén tein yetok ne ajko, amo yetok temako uan yejua tomomaj.

27 Porin ijkuiliujtok: “Xiyolpaki, siuat akin amo tikinpia konemej. Xitsajtsi porin tiyolpaki, maski amo keman tikmachilij keniuj tekokoj keman se tayolitia. Porin siuat akin kikaujkej kipia okachi konemej ke siuat akin kipia itakauj”. 28 Nokniuan, namejuan nanyolkej porin Dios ijkon motenkauak, ijkon kemej Isaac. 29 Sayoj ke, ijkon kemej ne uejkauj akin yolik kemej tinochin tiyolij, kitajyouiltij akin Dios ika ichikaualis kichiuak maj yoli, no ijkon panoua axkan. 30 Sayoj ke, ¿toni kijtoua Tajkuilolamatsin? “Xiktoka takeual uan iokichpil. Ikoneuj takeual amo kiselis tein kikauiliskej ikoneuj siuat akin amo takeual”. 31 Yejua ika nokniuan, amo tiikoneuan se takeual, ta tiikoneuan siuat akin amo takeual.

5 Cristo techmakixtij para maj amo tietokanok imako iTanauatil Moisés. Yejua ika, ijkon xiksentokakan uan amo ximokauakanok maj kichiuakan ximoajsikan temako.

2 Xikitakan, nejua Pablo, namechiluia ke komo namotekij,* amo namechpaleuis tein Cristo kichiuak. 3 Oksepa nikiluia sejse takat ke komo moteki* moneki kitakamatis nochi itanauatil Moisés. 4 Namejuan, akin nankitemouaj maj Dios namechita ke nanyolmelaujkej porin nankitakamatij tanauatil, nankikaujkej Cristo. Nankiixtopeujkej itatiochiualis tein amo technamiki. 5 Sayoj ke tejuan, ika ichikaualis Dios, semi tikchixtokej* tiyeskij tiyolmelaujkej iixpan Dios porin titakuaujtamatij. 6 Porin, kemej tipouij iuan Cristo Jesús, amo tapaleuia se motekis* oso amo. Tein kemaj tapaleuia yejua komo se takuaujtamati uan se tetasojta.

7 Namejuan kuali namotalojtoyaj. ¿Akoni namechtsajtsakuilij para amo xiksentokakan xiktakamatikan tamachtilis tein melauak? 8 Akin namechnotstok amo yejua akin namechtajtolmakak ijkon xikchiuakan. 9 Tepitsin levadura kixokoltia nochi tixti. 10 Nitakuaujtamati ke namejuan, akin nanpouij iuan toTekotsin, amo taman nantanemiliskej. Sayoj ke, akin namechkuejmolojtok, kitatsakuiltiskej kemej kinamiki. 11 Nokniuan, komo niksentokaskia nitamachtijtinemiskia ke moneki se motekis,* yejuan amo nechtajyouiltiskiaj, uan amo akin nikualantiskia porin nitamachtia ke Cristo kimiktijkej itech kouit.* 12 Niknekiskia maj motamitekikan* nejon akin kitemouaj namechpojpoloskej.

13 Nokniuan, namejuan namechnotskej para amo ximoajsikan temako. Sayoj ke kemej amo namoajsijok temako, amo xiknemilikan ke uelis nankichiuaskej tein kinejneki namonakayo, ta ximotekitilikan kemej takeualmej se iuan okse porin namotasojtaj. 14 Porin nochi iTanauatil Moisés motamichiua ika nejin tanauatil: “Xiktasojta moknitsin kemej tejua timotasojta”. 15 Komo maski ijkon nankisentokaj namokejkejtsomaj uan namokuajkuaj, amokan namoualmiktijtij.

16 Yejua ika, namechiluia nejin: xiksentokakan ximoyekanakan ika ichikaualis Dios uan ijkon amo nankichiuaskej nion teyi tein kinejneki namonakayo. 17 Porin tein kinejneki se inakayo kiixnamiki ichikaualis Dios, uan ichikaualis Dios kiixnamiki tein kinejneki se inakayo. Kemej nejon ome taman moijixnamikij, namejuan amo nankichiuaj tein nankichiuasnekij. 18 Uan no, komo ichikaualis Dios namechixyekana, amo namoyekanajok ika tanauatil.

19 Moyekita tein kichiuaj akin moyekanaj ika tein kinejneki ininnakayo: keman auilnemij,* kichiuaj tein pitsotik, kichiuaj tein tetajyaltia uan amo ixpinauaj,* 20 kiueyichiuaj tein kiueyichiuaj nikan taltikpak, mokalakiaj itech naualot,* tetauelitstinemij, motajtolteuijtinemij, tenexikoluijtinemij, fiero kualanij, tateuisnekij, texexelouaj, kipeualtiaj yankuik taneltokalismej, 21 kinekij moaxkatiliskej tein oksekin kipiaj, tauanaj, eliuistitinemij itech iluimej, uan kichiuaj okseki taman kemej nejin. Namechnauatia, kemej achto namechnauatijkaya, ke akin kichiujtinemij nejin amo kalakiskej itech iTaixyekanalis Dios.

22 Sayoj ke, akin kinixyekana ichikaualis Dios: tetasojtaj, yolpakij, yolseujtokej, amo yolijsiuij, kualtakamej, yolkualmej, takuaujtamatij, 23 yolnejmachmej uan ueli motsakuiliaj. Amo onkak nion se tanauatil tein uelis kintakaualtis maj kichiuakan nejin. 24 Tein melauj, akin iaxkauan Cristo Jesús kemej yeskia kipilojkej itech kouit tein amo kuali tein semi kinejneki ininnakayo.

25 Komo ichikaualis Dios techixyekana, maj tiksentokakan tiktemokan maj techixyekana ichikaualis Dios. 26 Maj amo timoueyimatikan,* maj amo tiktemokan timotataniskej iniuan oksekin uan maj amo timonexikoluikan.*

6 Nokniuan, takan se aksa* chikoyajtok uan amo kimati, namejuan akin namechixyekana ichikaualis Dios xiktemokan nankipaleuiskej maj moyektali uan amo xikajuakan. Sayoj ke nansejsemej ximotachilikan, amokan no nankichiujkej tein amo kuali. 2 Xiksentokakan ximosenpaleuijtokan keman nankipiaskej ouijkayomej, uan ijkon nankitakamatiskej itanauatil Cristo. 3 Porin komo aksa kinemilia ke ueyichiujkej maski tein melauj amo teyi chiujkej, mokajkayaujtok. 4 Sayoj ke sejse maj kiyekita tein kichiua, uan ijkon yolpakis keman kiitas tein yejua kichiuak, uan amo sayoj kiitstos tein okse ueli kichiua. 5 Porin sejse moneki kichiuas tekit tein kimakatokej.

6 Uan no, akin kimachtijtokej itajtol Dios maj kimaka nochi tein kuali akin kimachtia.

7 Amo ximokajkayauakan: amo akin uelis kikajkayauas Dios. Porin tein se kitoktos yejua tein se kisentilis. 8 Akin moyekana ika tein kinejneki inakayo, ixpoliuis, sayoj ke akin moyekana ika ichikaualis Dios, nemis nochipaya. 9 Yejua ika maj tiksentokakan tikchiujtokan tein kuali, porin keman ajsis tonal tikseliskej tein kuali komo amo tisiouij.* 10 Yejua ika, nochipa keman uelis timosenpaleuiskej, maj tikinpaleuikan nochin, sayoj ke okachiok tokniuan akin touan taneltokaj.

11 Xikitakan keniuj namechtajkuilouilijtok ika uejueyi letra.

12 Akin semi namechiluijtokej ke moneki ximotekikan* kitemouaj maj oksekin kuali kinitakan, porin amo kinekij maj kintajyouiltikan kemej akin kiteixmatiltiaj Cristo, akin kikoujpampilojkej. 13 Porin akin motekij* amo kitakamatij iTanauatil Moisés, sayoj ke kinekij ximotekikan uan ijkon moueyimatiskej* porin kichiujkej ximokauakan maj namechtekikan. 14 Sayoj ke nejua amo keman niknekiskia nimoueyitalis, ta sayoj porin nitakuaujtamati iuan toTekotsin Jesucristo akin momikilij itech se kouit.* Itechkopa, nejua nikinita ke akin nechixnamikij kemej yeskia mikkejya* uan yejuan nechitaj kemej yeskia nimikikya. 15 Porin amo tayekantok ox se moteki* oso amo, ta okachi tayekantok maj Dios techchiua tiyankuikej. 16 Maj yolseujtokan uan maj Dios kinikneli akin ijkon tanemiliaj, kemaj, akin pouij itech Israel tein iaxka Dios.

17 Desde axkan maj amo akin nechkuejmolkalaki, porin notech nikuika tein kinextia ke niitakeual Jesús.

18 Nokniuan, maj toTekotsin Jesucristo namechmaka itatiochiualis tein amo technamiki porin nankinextiaj se kuali tanemilil. Maj ijkon mochiua.*