FILIPENSES

1 Nejua Pablo iuan nietok Timoteo. Tejuan tiitakeualuan Cristo Jesús. Nejin amatajkuilol para nochin akin Dios moinxelouilij* akin pouij iuan Cristo Jesús ompa Filipos uan tayekananij uan tapaleuianij itech nechikol:

2 Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios.

3 Nochipa niktasojkamatilia Dios keman namechelnamiki, 4 nochipa niyolpaki keman chikauak nimotataujtia namoka, 5 porin nantapaleuianij maj moteixmatilti kuali tanauatilmej* desde keman nankikakkej hasta axkan. 6 Porin nikyekmati nejin: ke Dios namechpaleuis xiktamichiuakan tekit tein kuali tein kipeualtij namotech hasta itech tonal keman Cristo Jesús ualas. 7 Semi kuali maj nejua ijkon namechita nanochin, porin semi namechtasojta. Namejuan nanechpaleuianij nikan kampa nitsaktok uan niilpitok* ika cadena uan no ininixpan tekiuanij, para maj amo teyi kitsakuili maj moteixmatilti kuali tanauatilmej. Ijkon namejuan uan nejua tikselianij itatiochiualis Dios tein amo technamiki.

8 Dios kimati ke nejua semi namechtemoua uan ke namechtasojta kemej Cristo namechtasojta. 9 Uan yejua nejin tein niksentoka nitajtani itech nonetataujtiluan: kuali xikixmatikan Dios* uan semi kuali xitaixejekokan uan ijkon okachi nantetasojtatiaskej, 10 xikyekitakan toni okachi tayekantok uan ijkon nanyeskij nanyolchipaujkej uan amo nankinuetsiltiskej* oksekin hasta itech tonal keman Cristo ualas, 11 uan maj Jesucristo namechpaleui nochipa xikchiuakan tein kuali yetok, para maj oksekin kimatikan ke Dios semi ueyi uan maj kiueyitalikan.

12 Nokniuan, nikneki xikmatikan ke tein nikpanotok, tein melauj semi tapaleuijtok maj moteixmatilti kuali tanauatilmej, 13 porin nochin soldados akin kiyekpiaj Tekiuaj uan nochin oksekin kimatij ke nitsaktok uan niilpitok* ika cadena porin niktojtoka Cristo. 14 Uan axkan miakej tokniuan akin kitekitiliaj toTekotsin okachi moyolchikaujtokej porin nitsaktok uan okachi kiteixmatiltijtokej itajtol Dios uan amo mouij.

15 Tikmatij ke sekin kiteixmatiltijtokej Cristo porin nechnexikoluiaj uan porin motatanisnekij, sayoj ke sekin kiteixmatiltiaj porin yekmelauj kinekij kichiuaskej tein kuali. 16 Yejuan ika tajtojtokej Cristo porin tetasojtaj, porin kimatij ke nechixtalijkej para nitapaleuis maj amo teyi kitsakuili maj moteixmatilti kuali tanauatilmej; 17 sayoj ke akin motatanisnekij kiteixmatiltiaj sayoj para tateuiskej, amo porin yolkualmej, ta porin kitemouaj kichiuaskej maj okachi nitajyoui nikan kampa nitsaktok uan niilpitok* ika cadena. 18 ¿Toni ika tapaleuia nejon? Ke maski akin kiteixmatiltiaj taixkajkayauaj oso kichiuaj tein kuali, ika motajtojtok Cristo, uan nejon nechyolpaktia. Tein melauj, no niksentokas niyolpakis 19 porin nikmati ke nejon kichiuas maj nimomakixti porin chikauak namotataujtiaj uan porin ichikaualis Dios tein Jesucristo kitemaka nechpaleuis. 20 Nikyekmati uan nikchia maj amo teyi ika nimopinaujmati, ta amo nimouis nitajtos uan ijkon notechkopa* moueyitalis Cristo, kemej ipa nikchiuani, yeski niyoltos oso nechmiktiskej.

21 Porin komo ninemi, ninemi para niktojtokas Cristo uan komo nimiki, nitatani. 22 Komo moneki ninemisok* nikan taltikpak, uelis okachi niktekitilis Cristo. Sayoj ke amo nikijtos tein niknekiskia. 23 Amo nikmati toni nikijitas,* porin semi nikneki maj nechmakixtikan uan nietos iuan Cristo, porin yejua nejin tein okachi kuali. 24 Sayoj ke, okachi kuali maj ninemiok nikan taltikpak para namechpaleuis. 25 Yejua ika, kemej nikyekmati nejin, nikmati ke niksentokas niyoltos uan niksentokas namouan para okachi kuali nankitekitiliskej Dios uan nanyolpakiskej porin nantakuaujtamatij. 26 Ijkon keman oksepa namouan nietos, semi nanyolpakiskej porin nankitojtokaj Cristo Jesús.

27 Sayoj ke xinemikan kemej kinextis ke nankiteixmatiltiaj kuali tanauatilmej tein ika tajtoua Cristo. Ijkon komo namechkalpanoti oso amo, nikmatis ke amo namotsinkixtiaj uan nankisentokaj ika sayoj se tanemilil, ke nankiixtalijtokej sayoj se taman, nansentekititokej para nantakuaujtamatiskej itech kuali tanauatilmej, 28 uan ke nion tepitsin nankinmouiliaj akin namechtauelitaj. Nejin kinextia ke yejuan kinixpoloskej uan namejuan namakisaskej, uan Dios kitematiltia nejin. 29 Porin namejuan amo sayoj namechmakakej in tatiochiualis para nantakuaujtamatiskej iuan Cristo, ta no para nantajyouiskej porin nankitojtokaj. 30 Yejua ika axkan nankiixnamiktokej ouijkayomej tein nankiitakej ke nikixnamikik, uan kemej nankimatij, nikixnamiktokok.

2 Xikchiuakan nochi tein nanueliskej para nanteyolchikauaskej itechkopa Cristo, para nanteyolseuiskej porin nantetasojtaj, nankitemoskej maj oksekin kuali yetokan, nantetasojtaskej uan nanteikneliskej. 2 Komo nankichiuaj nejon, semi nanechyolpaktiskej. Xikpiakan sayoj se tanemilil, ximotasojtakan se iuan okse, senkis xisentekitikan uan xikixejekokan sayoj se taman. 3 Amo teyi xikchiuakan sayoj para nantateuiskej oso para namoueyimatiskej,* ta xiyolyemankej uan xiknemilikan ke oksekin okachi tayekantokej* ke namejuan. 4 Amo xiktemokan tein sayoj namejuan namechpaleuis, ta no tein kinpaleuis oksekin.

5 Xiksentokakan xitanemilikan kemej Cristo Jesús, 6 porin yejua, maski tamatia kemej Dios, nion tepitsin kinemilij kitakuilis Dios uan mochiuas kemej yejua. 7 Amo, ta kikauak nochi tein kipiaya uan mochiuak kemej se takeual uan mochiuako kemej se takat. 8 Uan amo sayoj nejon, ta keman nemiko kemej takat, kikauak ueyi tanauatil tein kipiaya uan tatakamatik hasta keman momikilij, kemaj, ijkuak kimiktijkej itech se kouit.* 9 Yejua ika, Dios kiueyitalij para maj okachi ueyichiujkej uan ika nochi iyolo kimakak okachi ueyi tanauatil* kemej amo akin kipia, 10 para maj itokaykopa Jesús nochin motankuaketsakan, akin yetokej ne iluikak, nikan taltikpak uan taltampa,* 11 uan maj nochin kijtokan senteixtenoj ke Jesucristo yejua toTekotsin para maj kiueyitalikan toTajtsin Dios.

12 Nokniuantsitsin, namejuan nochipa nantatakamatij, uan axkan ke amo namouan nietok okachiok nantatakamatij. Yejua ika xiksentokakan ximochikauakan nantatakachiuaskej* uan nantamojkatokaskej para maj Dios namechmakixti. 13 Porin Dios namechchikaua uan kichiua xiknejnekikan nankichiuaskej nochi tein kiuelita porin yejua ijkon kineki. 14 Keman nankichiujtoskej tein yeski, amo xikijtokan tein amo nankiuelitaj nion ximotajtolteuikan, 15 para namochiuaskej nanikoneuan Dios akin yolchipaujkej uan amo teyi kintajtakoltiaj. Ijkon nantauiaj kemej se tanex tein semi petani maski nanemij iniuan akin amo yolkualmej uan kichiuaj tein amo kuali. 16 Amo xikajkauakan itajtol Dios tein kichiua maj se nemi. Ijkon itech tonal keman Cristo ualas, uelis niyolpakis keman nikmatis ke amo nenkaj nimochikauak nion nenkaj chikauak nitekitik. 17 Sayoj ke, maski nimotemaktis kemej vino tein kimaktiliayaj Dios tein kipantekayaj itech altar, nitapaleuijtok itech tekit tein nankichiujtokej para nankinpaleuiskej oksekin porin nantakuaujtamatij. Yejua ika nimouelita uan niyolpaki namouan. 18 No ijkon, namejuan no moneki nanyolpakiskej nouan.

19 Axkan nikchia maj toTekotsin Jesús nechkaua maj niman namechtitanili Timoteo, para maj nimoyolchikaua keman yejua nechiluis keniuj nanyetokej. 20 Porin amo nikpia okse kemej yejua,* akin yekmelauj kitemoua keniuj namechpaleuis. 21 Porin nochin oksekin kitemouaj tein sayoj yejuan kinpaleuis, uan amo tein Jesucristo kineki. 22 Sayoj ke namejuan nankimatij ke yejua kinextij ke amo ijkon kichiua. Ijkon kemej se konetsin iuan itat, nouan tekitik kemej se takeual para moteixmatiltis kuali tanauatilmej.* 23 Yejua ika, nikchia niktitanis Timoteo niman keman nikmatis toni nechpanos. 24 Tein melauj, nitakuaujtamati ke toTekotsin nechkauas maj no niman namechitati.

25 Sayoj ke axkan nikita ke moneki namechtitanilis noknitsin Epafrodito. Yejua notekitikaikniuj uan akin nouan tekiti kemej se soldado. Namejuan nanechualtitanilijkej para maj nechpaleuiki. 26 Yejua semi kineki namechitas nanochin uan semi tayokoxtok porin nankimatkej ke mokokouaya. 27 Uan tein melauj yejua semi mokokouaya uan hasta yaya momikiliti. Sayoj ke Dios kiiknelij, uan no nechiknelij para maj amo okachi nitayokoya, porin ipa nitayokoxtok. 28 Yejua ika niman namechtitanilia, ijkon keman nankiitaskej uelis oksepa nanyolpakiskej, uan nejua okachi niyolseuis. 29 Xikselikan ika miak pakilis ijkon kemej nankinseliaj akin kitojtokaj toTekotsin. Uan nochipa semi xikintakachiuakan* tokniuan kemej yejua. 30 Yejua yaya momikiliti porin kitekitilia Cristo,* uan maski ueliskia mikis motemakak nechpaleuis porin namejuan amo nikan nanyetoyaj para nanechpaleuiskej.

3 Uan axkan, nokniuantsitsin, nochipa xiyolpaktokan kemej itatojtokakauan toTekotsin. Amo nechkuejmoloua oksepa namechijkuilouilis tein ipa namechijkuilouilijkaya, porin nejin namechpaleuia.

2 Ximoyekpiakan para maj amo teyi namechchiuilikan itskuimej, akin sayoj techiuiliaj tein amo kuali uan akin kinekij ximotekikan.* 3 Porin tejuan yekmelauj techtekkej.* Tejuan tiktekitilijtokej Dios porin ichikaualis techixyekana uan amo titakuaujtamatij itech tein nikan taltikpak kiitaj ke tayekantok, ta titakuaujtamatij iuan Cristo Jesús.

4 Uan komo monekiskia, nejua okachi ika nimoueyitaliskia* tein nikan taltikpak kiitaj ke tayekantok, 5 porin nechtekkej* chikueyi tonal satepan ke niyolik, nipoui itech xolal Israel, iniuan ichankauan Benjamín, nihebreo uan notatuan katkaj hebreos. Kemej fariseo senkis nikchiuak tein kijtoua iTanauatil Moisés. 6 Semi nikintajyouiltij tokniuan. Niknextij ke amo teyi ueliskia nechpantiskej porin nochipa nikchiuaya tein iTanauatil Moisés kijtouaya ke kuali yetok. 7 Sayoj ke nochi tein nimotanilij, axkan nikita ke amo tapaleuia* porin niktojtoka Cristo. 8 Uan amo sayoj nejon, ta no nikita ke nochi amo tapaleuia porin okachi tayekantok nikixmatis noTekotsin Cristo Jesús. Kemej niktojtoka, nikauak nochi uan axkan nikita sayoj kemej tajsol, para nikyolpaktis Cristo 9 uan maj nechitakan kemej itatojtokakauj. Sayoj ke amo nikijtoua ke niyolmelauak porin nikchiua tein kijtoua iTanauatil Moisés, ta porin nitakuaujtamati iuan Cristo. Tein melauj, Dios kinita ke yolmelaujkej akin takuaujtamatij iuan Cristo. 10 Semi nikneki nikixmatis Cristo uan ichikaualis akin kichiuak maj oksepa nemi. Nikneki nitajyouis kemej yejua uan nimomikilis kemej yejua, 11 para nikitas ox uelis niyeski semej akin yekinika oksepa nemis.

12 Amo nikijtoua ke nikselijya tein nechtayokoliskej nion ke nikpiaya tein nikixtalijtok nikselis,* ta nimochikaua para nikitas ox no uelis nikselis tein nechtayokolitij, porin nikmati ke yejua ika Cristo Jesús nechijitak.* 13 Nokniuan, amo niknemilia ke nikselijya. Sayoj ke kemaj nikyekmati se taman: nikelkaujtok tein mokauak taikampa uan nimochikaujtok* para nikselis tein satepan onkas. 14 Semi nimochikaujtok para nikselis tein nechtayokoliskej: ninemis ne iluikak iniuan akin Dios kinnotsak itechkopa Cristo Jesús. 15 Yejua ika, akin semi titakuaujtamatij maj no ijkon titanemilikan, uan komo aksa* amo ijkon tanemilia, Dios kinextilis keniuj moneki tanemilis. 16 Uan maski kuali tiktekitilijtokejya Dios, maj ijkon tiksentokakan tikchiujtokan.

17 Nokniuan, nochin namejuan xikchiuakan kemej nejua nikchiujtok uan xikinyekitakan akin kichiujtokej* kemej tamechnextilijkej. 18 Porin moajsij miakej akin kiixtopeuaj Cristo uan kouit* tein ika kimiktijkej. Miakpa ininka nitajtouaya, sayoj ke axkan keman ininka nitajtoua nichoka. 19 Yejuan ixpoliuiskej, uan tein kinejneki ininnakayo kiitaj kemej inindios; moueyitaliaj ika tein monekiskia mopinaujmatiskej uan sayoj tanemiliaj itech tein onkak nikan taltikpak. 20 Sayoj ke tejuan tipouij ne iluikak. Semi tikchixtokej* se totemakixtijkauj, toTekotsin Jesucristo akin yetok ne iluikak. 21 Yejua kipatas tonakayo tein ueli miki uan techmakas se tonakayo tein kualtsin kemej tein yejua kipia. Yejua kichiuas nejin ika iueyi chikaualis, tein ika ueli kiixyekana nochi.

4 Notasojikniuantsitsin, semi namechtasojta uan semi nikneki namechitas. Namejuan nankichiuaj maj niyolpaki uan namechita kemej se corona. Xiksentokakan amo ximotsinkixtikan kemej itatojtokakauan toTekotsin, ijkon kemej namechiluij.

2 Niktataujtia Evodia uan Síntique maj kipiakan sayoj se tanemilil kemej itatojtokakauan toTekotsin. 3 Uan tejua akin yekmelauj tinotekitikaikniuj, no nimitsiluia xiksentoka xikinpaleui nejin siuamej akin mochikauanij kiteixmatiltiskej kuali tanauatilmej* nouan uan iuan Clemente uan no iniuan okseki notekitikaikniuan, akin inintokay ijkuiliujtok itech amatajkuilol kampa ixnesij akin nemiskej.

4 Nochipa xiyolpakikan kemej itatojtokakauan toTekotsin. Oksepa namechiluia: ¡xiyolpakikan! 5 Maj nochin kimatikan ke namejuan amo nankitemouaj maj nochipa mochiua tein nankinemiliaj. ToTekotsin amo uejka yetok. 6 Amo teyi ika ximoteltekipachokan, ta nochipa xikchiuakan netataujtil uan chikauak xiktataujtikan Dios maj namechixyekana itech tein yeski taman tein nankipanoskej uan nochipa xiktasojkamatilikan. 7 Komo nankichiuaj nejin, Dios namechyolseuis kemej amo akin ueli kiajsikamati, uan nejon kiyekpias namoyolo uan namotanemilil* itechkopa Cristo Jesús.

8 Yejua ika nokniuan, nochipa xitanemilijtokan itech nochi tein melauak, itech nochi tein amo se kiauilmati, itech nochi tein Dios kiita ke kuali yetok,* itech nochi tein chipauak, itech nochi tein kichiua maj se tetasojta, itech nochi tein kuali ika motajtoua,* itech nochi tein kuali uan itech nochi tein kinamiki maj kiueyitalikan. 9 Xikchiuakan tein namechmachtij, tein nankineltokakej, tein nanechkakilijkej uan tein nankiitakej ke nikchiuak, uan Dios akin teyolseuia namouan yetos.

10 Semi niyolpaki uan niktasojkamatilia toTekotsin maj axkan oksepa noka xitanemilikan. Maski ipa noka nantanemilijtoyaj, amo nanueltoyaj nankinextijtoyaj. 11 Amo nikijtoua nejin porin amo nikpia tein ika nimoixpanoltis, porin nikmati keniuj niyolpakis* itech tein yeski taman tein nikpanos. 12 Nikmati keniuj se nemi keman amo teyi se kipia uan nikmati keniuj se nemi keman se kitelpia. Itech nochi uan itech tein yeski taman tein nikpanouani, nikmati tein amo miakej kimatij: keniuj se yolpakis keman se ixuitos uan keman se mayantos, keman se kitelpias uan keman amo teyi se kipias. 13 Nikpia chikaualis para nikixnamikis nochi porin Dios nechmaka chikaualis.

14 Sayoj ke, semi kuali tein nankichiujkej porin nanechpaleuijkej keman nitajyouijtoya. 15 Tein melauj, nokniuan akin nanyetokej Filipos, no nankimatij ke satepan ke yekinika nankikakkej kuali tanauatilmej uan nikisak de Macedonia, itech nion se nechikol nechpaleuijkej nion kinekkej maj nikinpaleui, ta sayoj namejuan; 16 porin keman nietoya Tesalónica, namejuan nanechtitanilijkej tein ika nimoixpanoltis, uan amo sayoj sepa, ta ojpa. 17 Amo niktemojtok xinechtayokolikan teisa, ta sayoj nikneki xikmiakilikan tein kuali tein nankichiuaj iixpan Dios. 18 Sayoj ke nikpia nochi tein nechpoloua uan okachiok. Amo teyi nechpolouaok porin Epafrodito nechmakak tein namejuan nanechtitanilijkej. Tein nanechtayokolijkej kemej yeskia se taman tein kualtsin ajuiyak tein nankimaktilijkej Dios uan tein yejua kiyolpaktia. 19 Yejua ika, noDios akin semi techtatiochiuia, namechmakas nochi tein namechpolos itechkopa Cristo Jesús. 20 ToDios uan toTajtsin kinamiki maj kiueyitalikan nochipaya. Maj ijkon mochiua.*

21 Xinechintajpalouilikan nochin akin Dios moinxelouilij,* akin pouij iuan Cristo Jesús. Tokniuan akin nouan yetokej namechontajpalouaj. 22 Nochin akin Dios moinxelouilij,* uan okachiok akin yetokej ichan Tekiuaj* namechontajpalouaj.

23 Maj toTekotsin Jesucristo namechmaka itatiochiualis tein amo technamiki porin nankinextiaj se kuali tanemilil.