2 TESALONICENSES

1 Nejua Pablo, nietok iuan Silvano* uan no iuan Timoteo. Namechtitanilia nejin amatajkuilol namejuan tokniuan akin nanpouij iuan toTajtsin Dios uan toTekotsin Jesucristo ompa Tesalónica:

2 Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios.

3 Nokniuan, nochipa tikitaj ke moneki namoka tiktasojkamatiliskej Dios. Kuali yetok maj tikchiuakan nejon porin okachi nantakuaujtamattokej, uan nanochin okachi namotasojtaj se iuan okse. 4 Yejua ika, tamechueyitaliaj itech inechikoluan Dios porin nantaxikojtokej uan nantakuaujtamatij maski namechtajyouiltijtokej uan nankiixnamiktokej ouijkayomej. 5 Nochi nejin kinextia ke Dios nochipa kiixtalia tein kuali yetok, uan nejin kichiua maj namechnamiki xikalakikan itech iTaixyekanalis Dios, tein ika nantajyouijtokej.

6 Tein melauj, kuali yetok maj Dios kintatsakuilti akin namechtajyouiltijtokej. 7 Sayoj ke namejuan akin nantajyouijtokej, Dios namechyolseuis ijkon kemej tejuan keman toTekotsin Jesús monextis ne iluikak iniuan iangeluan akin semi chikaujkej 8 itech se ueyi tit,* keman kintatsakuiltis akin amo kiixmatij Dios uan akin amo kineltokaj* kuali tanauatilmej* tein ika tajtouaj toTekotsin Jesús. 9 ToTekotsin kiixtalis maj kintatsakuiltikan uan yejuan ixpoliuiskej uan amo kemanok nesiskej, ijkon yejua amo kinitasok nion kinpaleuis ika iueyi chikaualis. 10 Keman toTekotsin ualas para moueyitalis iniuan akin pouij iuan,* nochin akin iuan takuaujtamatij kiueyimojkaitaskej. Uan kemej namejuan nankineltokakej tein tamechiluijkej, no iniuan nanyetoskej.

11 Yejua ika nochipa namoka timotataujtiaj, para maj Dios kiita ke namechnamiki xinemikan kemej namechmatiltij keman namechnotsak. Uan no maj ika ichikaualis senkis kichiua nochi tein kuali tein kinekis kichiuas uan maj kitamichiua nochi tein nankichiujtokej porin nantakuaujtamatij. 12 Ijkon, itokay toTekotsin Jesús moueyitalis namotechkopa uan namejuan namechueyitaliskej porin iuan nanpouij. Nejin kinextis itatiochiualis toDios uan toTekotsin Jesucristo tein amo technamiki.

2 Sayoj ke nokniuan, kemej nankimatij ke toTekotsin Jesucristo mokepas* uan ke tejuan iuan timosentiliskej, tamechiluiaj 2 amo xikauakan maj niman namechtapololtikan komo kijtouaj ke ejkokya itonal Jehová.* Amo ximouikan maski kijtoskej ke Dios kitematiltij oso ke kitekakilijkej oso ke kiitakej itech se amatajkuilol tein kijtouaj ke tejuan tikijkuilojkej.

3 Maj amo akin namechkajkayaua,* porin achto ke ejkos nejon tonal, miakej akin axkan kitekitiliaj Dios kiixnamikiskej uan monextis takat tein ueyi tajtakolej,* tein kiixpoloskej. 4 Yejua taixnamiki uan okachi moueyitalia ke nochi tein nikan taltikpak kiitaj kemej se dios oso kiueyichiuaj, yejua ika motalia itech itemplo Dios uan monextia senteixtenoj kemej se dios. 5 ¿Amo nankielnamikij ke namechiluiaya nejin keman namouanok nietoya?

6 Axkan nankimatij akoni kitsakuilijtok takat tein ueyi tajtakolej,* para maj amo monexti achto ke ajsis tonal. 7 Tein melauj, iueyi tajtakol nejin takat moichtakachiujtokya, sayoj ke nejin ueyi tajtakol kisentokas amo momatis hasta maj poliui akin axkan kitsakuilijtok. 8 Uan ijkuak, monextis takat tein ueyi tajtakolej,* akin toTekotsin Jesús kiixpolos ika chikaualis tein kisa itenoj uan no kiixpolos keman moyeknextis ke mokepakya.* 9 Satanás kichiua maj monexti nejin takat tein ueyi tajtakolej,* uan kimaka ichikaualis para maj kichiua uejueyi taman tein se kimojkaita uan miak milagros tein ika takajkayaua 10 uan kikui nochi taman xolopijyot tein ika kinkajkayaua akin ixpoliuitij.* Yejuan kintatsakuiltiskej porin amo kineltokakej ika nochi ininyolo tamachtilis tein melauak tein ueliskia kinmakixtis. 11 Yejua ika Dios kikaua maj kinpojpolo se tamachtilis tein amo melauak uan maj kineltokakan xolopijyot, 12 para maj nochin yejuan kintatsakuiltikan porin amo kineltokakej tein melauak, ta kinyolpaktij kichiuaskej tein amo kuali.

13 Nokniuan akin Jehová* namechtasojta, nochipa tikitaj ke moneki namoka tiktasojkamatiliskej Dios, porin achtoya namechijitak* para namakisaskej. Ika ichikaualis namechxeloj porin nankineltokakej tamachtilis tein melauak. 14 Yejua namechnotsak para namakisaskej porin nankineltokakej kuali tanauatilmej* tein tamechixmatiltijkej, para uelis namechueyitaliskej ijkon kemej toTekotsin Jesucristo. 15 Yejua ika nokniuan, amo ximotsinkixtikan uan amo xikauakan tein tamechmachtijkej keman tamechnojnotskej oso tamechtajkuilouilijkej. 16 ToTajtsin Dios techtasojta, uan porin technextilij itatiochiualis tein amo technamiki, nochipa techyolseuia uan kichiua maj tikchiakan tein semi kuali. Titajtanij maj Dios uan toTekotsin Jesucristo 17 namechyolseuikan uan namechyolchikauakan para nochipa xikchiuakan uan xikijtokan tein kuali.

3 Uan axkan nokniuan, xiksentokakan toka ximotataujtijtokan para maj itajtol Jehová* kisentoka ijsiujka moteixmatilti uan para maj kipatiuitakan ijkon kemej namejuan nankichiujtokej, 2 uan para maj Dios techmakixti ininmako akin tel amo yolkualmej, porin amo nochin takuaujtamatij. 3 Sayoj ke toTekotsin nochipa kichiua tein kijtoua uan yejua namechyolchikauas uan namechmakixtis imako in Amokuali. 4 Uan no, kemej tiitatojtokakauan toTekotsin tikyekmatij ke nantatakamatij uan nankisentokaskej nankichiuaskej tein tamechnauatijkej. 5 Maj toTekotsin namechpaleui xiktasojtakan Dios uan xitaxikokan para nankisentokaskej nankitekitiliskej Cristo.

6 Axkan nokniuan, itokaykopa toTekotsin Jesucristo, tamechnauatiaj amo ximouikakanok iuan se tokniuj akin amo tatakamati uan amo kichiua tein tamechmachtijkej.* 7 Namejuan nankimatij keniuj nankichiuaskej kemej tejuan, porin keman namouan tietoyaj tejuan amo tiknextijkej ke amo titatakamatiaj 8 nion tiknenkajkuajkej itapalol aksa,* ta youalintonal chikauak titekitikej uan amo timoseuijkej para maj amo akin monekiskia techtekipanos. 9 Ueliskia* tamechtajtaniskej teisa, sayoj ke tiknekiaj tamechnextiliskej keniuj nankichiuaskej kemej tejuan. 10 Tein melauj, keman namouan tietoyaj, tamechnauatiayaj nejin: “Komo aksa amo kineki tekitis, maj amo no takua”. 11 Porin tikmatkej ke nansekimej amo nantatakamatij, porin amo nantekitij uan namokalakijtinemij kampa amo namotekiuj. 12 Akin kichiuaj nejon, tikinnauatiaj uan tikintataujtiaj* itokaykopa toTekotsin Jesucristo, maj yolseujkatekitikan uan maj kikuakan tein yejuan motaniliskej.

13 Sayoj ke nokniuan, xiksentokakan xikchiuakan tein kuali. 14 Sayoj ke komo aksa amo kichiua tein tikijtouaj itech nejin amatajkuilol, kuali xikitakan akoni uan amo iuan ximouikakanok para maj mopinaujmati. 15 Sayoj ke amo xiktauelitakan, ta xiksentokakan xikyolmajxitikan kemej se namokniuj.

16 Maj toTekotsin akin teyolseuia, nochipa namechyolseuijto itech nochi. Maj toTekotsin yeto namouan.

17 Nejua Pablo, nikmaijkuiloua nejin tajtolmej tein ika namechtajpaloua. Nochipa ijkon nikijkuiloua nochi noamatajkuiloluan, para xikmatikan ke nejua nitajkuiloj.

18 Maj toTekotsin Jesucristo namechmaka nanochin itatiochiualis tein amo technamiki.