TEIN KIJKUILOUILIJKEJ TITO

1 Nejua Pablo, niitakeual Dios uan niitatitanil Jesucristo. Nejua nitakuaujtamati ijkon kemej no takuaujtamatij itaijitaluan* Dios uan kuali nikixmati tamachtilis tein melauak, tein kinextia keniuj moneki tikueyichiuaskej Dios ika nochi toyolo. 2 Nochi nejin ueli mochiua porin tikchiaj tinemiskej nochipaya ijkon kemej Dios motenkauak ne uejkaujya. Uan yejua amo ueli takajkayaua, 3 (keman ejkok tonal, yejua kiteixmatiltij itajtol keman nechiluijkej maj nitanojnotsa porin ijkon tanauatij toTemakixtijkauj, Dios). 4 Nimitstajkuilouilia tejua Tito, nokoneuj akin titakuaujtamati kemej nejua:

Maj toTajtsin Dios uan toTemakixtijkauj Cristo Jesús mitsmakakan tatiochiualis tein amo technamiki uan maj mitspaleuikan kuali ximouika iuan Dios.

5 Nimitskauak ompa Creta para tikyektalis tein amo yekyetok uan para tikinixtalis tayekananij itech sejse ueyi xolal, ijkon kemej nimitsnauatij: 6 tayekankej moneki yeski se takat akin kuali nemi para maj amo akin kijijto, moneki kipias sayoj se isiuatsin uan maj ikoneuan taneltokakan, uan maj amo eliuis nemikan nion maj taixnamikikan. 7 Porin tayekankej, Dios kiixtalij kemej tayekankatakeual. Yejua ika, moneki kuali nemis para maj amo akin kijijto, uan maj amo moueyimati nion maj* niman kualani, maj amo se tauankej nion maj tateui, nion maj xijxikuin.* 8 Ta moneki kuali kinselis oksekin, semi kiuelitas* tein kuali, yektalnamiktos,* melaujkanemis uan amo kikauas Dios, uan maj ueli motsakuili. 9 Nochipa moneki kikuis tajtol tein melauak* keman tamachtis,* uan ijkon uelis kinyolchikauas oksekin ika tamachtilis tein kuali* uan kinnextilis tein amo kuali yetok* akin kiixnamikij.

10 Porin onkakej miakej takamej, okachiok akin kijtouaj ke moneki se motekis,* akin taixnamikij, akin sayoj kikinakaj* uan kinkajkayauaj oksekin. 11 Nejin takamej moneki se kintentsakuas,* porin kintapololtijtokej nochin akin nemij itech sejse kali keman tamachtiaj tein amo kuali yetok para kitaniskej tomin.* 12 Hasta inintanauatijkauj,* se akin no kayot Creta, kijtoj: “Akin kayomej Creta nochipa takajkayauaj, kemej yeskiaj koujtajtapialmej tein tekuaj, kampetsmej uan tatsiuinij”.

13 Nejin tein nikijtoua melauak. Yejua ika, xiksentoka xikinchikaujkailui ke amo kuali tein kichiujtokej para maj yektakuaujtamatikan 14 uan maj amo kineltokakan tein amo melauak tein judíos kitetapouiaj, nion maj kichiuakan tein tanauatiaj akin kikauaj tamachtilis tein melauak. 15 Akin chipaujkej kiitaj ke nochi chipauak. Sayoj ke akin amo chipaujkej uan amo takuaujtamatij kiitaj ke amo teyi chipauak, porin inintanemilil uan inintalnamikilis amo chipauak. 16 Senteixtenoj kijtouaj ke kiixmatij Dios, sayoj ke ika tein kichiuaj kinextiaj ke kiixtopeuaj, porin kichiuaj tein semi pitsotik, amo tatakamatij uan amo uelij kichiuaj nion teyi tein kuali.

2 Sayoj ke tejua xiksentoka xitajto kemej kijtoua tamachtilis tein kuali.* 2 Maj takamej akin xiuejkejya* kuali kiixejekokan nochi tein kichiuaskej uan maj amo teyi kiauilmatikan, maj yektalnamikikan uan maj yektakuaujtamatikan, maj semi tetasojtakan uan maj taxikokan. 3 No ijkon, maj siuamej akin xiuejkejya* chipaujkanemikan, maj amo tetakajkayauilikan nion maj tel tayitinemikan vino uan maj tamachtikan tein kuali, 4 uan ijkon uelis kinmachtiskej* siuamej akin okachi ichpochmejok maj kintasojtakan inintakauj uan ininkoneuan, 5 maj yektalnamikikan, maj chipaujkanemikan, maj kichiuakan chiualis ininkalijtik uan maj yolkualmej, maj mokauakan maj kinixyekana inintakauj, uan ijkon amo akin uelis kijijtos itajtol Dios.

6 No ijkon, xiksentoka xikinyolmajxiti takamej akin telpochmejok para maj yektalnamikikan, 7 uan itech nochi, xikchiua tein kuali para maj oksekin no ijkon kichiuakan. Xitamachti tein chipauak* uan amo teyi xikauilmati 8 uan xikui kuali tajtolmej* para maj amo akin kiajsi tein ika mitsijijtos, para maj mopinaujtikan akin taixnamikij porin amo kiajsij nion teyi tein techijtouiliskej. 9 Maj takeualmej mokauakan maj inintekouan kinyekanakan itech nochi: maj kitemokan kinyolpaktiskej, maj amo kinnajnankilikan 10 uan maj amo kintachtekikan, ta maj kinextikan ke takuaujtamachmej, uan ijkon itech nochi kikualnextiskej itamachtilis toTemakixtijkauj, Dios.

11 Porin itatiochiualis Dios tein amo technamiki monextijya uan kimakixtia akin yeski. 12 Nejin techmachtia maj tikixtopeuakan tein kiixnamiki Dios uan tein amo kuali tein kinejnekij akin nemij nikan taltikpak uan maj tiyektalnamiktokan, maj timelaujkanemikan uan maj tikueyichiuakan Dios ika nochi toyolo itech nejin tonalmej.* 13 Moneki ijkon tinemiskej keman tikchixtoskej kualtsin tatiochiualis tein tikchiaj uan maj moueyinexti toueyi Dios uan toTemakixtijkauj Jesucristo. 14 Yejua toka motemaktij para techmakixtis uan ijkon maj amo tikchiuakan nion se taman tein amo kuali,* uan para mochipauilis se xolal tein sayoj yejua iaxka, kampa nochin kinekiskej kichiuaskej tein kuali ika nochi ininyolo.

15 Xiksentoka ika xitajto nejin uan xiksentoka xiteyolmajxiti* uan xiknexti tein amo kuali yetok porin tikpia nochi tanauatil para tikchiuas nejon. Amo xikaua maj nion akin mitsixtopeua.

3 Xiksentoka xikinelnamikti maj mokauakan maj kinixyekanakan uan maj kintakamatikan tekiuanij uan akin kipiaj tanauatil, maj kinekikan kichiuaskej nochi taman tein kuali, 2 maj amo akin kijijtokan, maj amo tateuikan, maj amo kitemokan maj nochipa mochiua tein kinemiliaj uan maj nochipa yolnejmachmej iniuan nochin. 3 Porin achto, tejuan amo no titanemiliayaj uan amo titatakamatiaj, techkajkayaujtoyaj uan amo uelia tikauayaj miak taman tein tiknejnekiaj uan sayoj tiktemouayaj timoyolpaktiskej, semi tikchiuayaj tein amo kuali uan titenexikoluiayaj,* timotemoliayaj maj techtauelitakan uan timotauelitayaj se iuan okse.

4 Sayoj ke toTemakixtijkauj Dios technextilij ke kualtakat uan ke techtasojta. 5 Yejua techmakixtij porin techiknelij uan amo porin tikchiujkej tein kuali. Yejua techmakixtij keman techchipauak uan ijkon kichiuak maj tinemikan, uan no techmakixtij keman techyankuilij ika ichikaualis. 6 Yejua techtelmakak* nejin chikaualis itechkopa toTemakixtijkauj Jesucristo. 7 Yejua kichiuak nejin para maj tikchiakan tinemiskej nochipaya ijkon kemej yejua motenkauak, porin techmakak itatiochiualis tein amo technamiki, tein kichiua maj techita ke tiyolmelaujkej.

8 Nejin tein nikijtojtok melauak, uan nikneki xikinelnamiktijto nejin para maj akin kineltokaj Dios nochipa kinemilijtokan kichiujtoskej tein kuali. Nochi nejin semi kuali uan kinpaleuia nochin.

9 Amo ximokalaki keman ika motajtolteuijtoskej tein amo kipia ipatiuj nion keman ininka tajtojtoskej ininuejkaujtatuan nion keman monajnankilijtoskej nion keman moteuijtoskej ika iTanauatil Moisés, porin amo tapaleuia uan nenkajsan. 10 Xiktakaualti akin kimoyaua tamachtilis tein amo melauak. Komo amo mitskaki keman oksepa tiktakaualtis, amo iuan ximouikaok, 11 porin tikmati ke akin kichiua nejon, kikauak ojti tein kuali uan tajtakolchiujtok uan yejua iselti kiixtalia tein kinamiki kiselis.

12 Keman nimitstitanilis Ártemas oso Tíquico xikchiua nochi tein tiuelis para tinechitatiuj ompa Nicópolis, porin nikixtalij ompa nietos itech tonalmej keman taseseyas. 13 Zenas kuali kiixmati iTanauatil Moisés. Xikinmaka yejua uan Apolos nochi tein monekis para maj amo teyi kinpolo itech ojti. 14 Sayoj ke maj tokniuan no kimatikan nochipa kichiujtoskej tein kuali para tapaleuiskej keman motelnekis, uan ijkon amo nenkaj yetoskej.

15 Nochin akin nouan yetokej mitstajpalouaj. Xinechintajpalouili taneltokanij akin techtasojtaj.

Maj Dios namechmaka nanochin itatiochiualis tein amo technamiki.