2 PEDRO

1 Nejua Simón Pedro, niitakeual uan niitatitanil Jesucristo. Nejin amatajkuilol para akin ijkon kemej tejuan no nankineltokaj tein melauak tein kitelpia ipatiuj. Tinochin tikselijkej nejin porin Dios uan toTemakixtijkauj Jesucristo, yolmelaujkej:

2 Kuali xikixmatikan Dios uan toTekotsin Jesús, uan ijkon Dios okachi namechmakatias itatiochiualis tein amo technamiki uan namechpaleuis kuali iuan ximouikakan, 3 porin ika ichikaualis tikpiaj* nochi tein moneki para tikueyichiuaskej Dios ika nochi toyolo. Tikpiaj nochi nejon porin kuali tikixmatij Dios. Yejua technotsak porin semi ueyi uan kualtakat. 4 Yejua ika, motenkauak techmakas* tein semi ueyi uan tein semi kipia ipatiuj. Nejon namechpaleuis xikpiakan nochi tein kuali tein Dios kipia, porin nankikaujkejya tein pitsotik tein kichiuaj akin nemij nikan taltikpak porin kitelnejnekij tein amo kuali.

5 Yejua ika, semi ximochikauakan nankichiuaskej nejin: komo nantakuaujtamatijya, xikchiuakan tein kuali; komo nankichiuajya tein kuali, xikixmatikan Dios;* 6 komo nankiixmatijya Dios, ximotsakuilikan; komo ueli namotsakuiliajya, xitaxikokan; komo nantaxikouajya, xikueyichiuakan Dios ika nochi namoyolo; 7 komo nankiueyichiuajya Dios ika nochi namoyolo, ximotasojtakan kemej yeskia naniknimej; uan komo namotasojtajya kemej yeskia naniknimej, xikintasojtakan nochin. 8 Porin komo ijkon nankichiuaj uan semi nankinextiaj nochi nejin, namechpaleuis amo nenkaj xietokan nion ximochiuakan kemej se kouit tein amo taki, porin kuali nankiixmatij toTekotsin Jesucristo.

9 Porin akin amo kinextia nejin, kemej yeskia amo tachia, moixtsajtsakua para amo kiitas tanex,* uan kielkaua ke kitapojpoluilijkejya tajtakolmej tein ne uejkauj kichiuak. 10 Yejua ika nokniuan, kemej Dios namechnotsak uan namechijitak,* okachi ximochikauakan nankipiaskej nejon tatiochiualis. Porin komo nankisentokaj nankichiuaj nejin, amo keman nankikauaskej tein nankineltokaj. 11 Tein melauj, ijkon nankipiaskej se ueyi tatiochiualis uan nankalakiskej itech iTaixyekanalis toTekotsin uan toTemakixtijkauj Jesucristo. Nejin taixyekanalis uejkauas nochipaya.

12 Yejua ika, nikneki nochipa namechelnamiktis nochi nejin tein namechijkuilouilia, maski nankimatijya uan semi nankineltokaj tein melauak tein namechmachtijkej. 13 Sayoj ke nikita ke kuali yetok oksepa namechelnamiktis nejin axkan ke ninemiok nikan taltikpak.* 14 Porin nikmati ke amo uejkaua amo ninemisok nikan taltikpak* ijkon kemej toTekotsin Jesucristo no nechmatiltij. 15 Nochipa nikchiuas nochi tein niuelis para uelis namoselti nankielnamikiskej* nejin keman amo nietosok.

16 Keman tamechixmatiltijkej ichikaualis toTekotsin Jesucristo uan keman mokepasya,* amo tamechtapouijkej tein amo melauak tein oksekin kuali kinenemilijkej, ta tejuan senkis tikitakej ke semi ueyichiujkej. 17 Porin toTajtsin Dios semi kiueyitalij. Dios akin okachi ueyichiujkej kiueyitalij keman kiluij: “Yejua nejin noKonetsin akin niktasojta; yejua semi nechyolpaktia”. 18 Kemaj, tejuan tikakkej nejin tajtolmej tein ualeuak ne iluikak keman iuan tietoyaj itech tepet tein Dios kijitak.*

19 Yejua ika kuali tikyekmatij ke mochiuas nochi tein Dios kitematiltij. Kuali xikitakan nochi nejon. Itech namoyolo, nejon tajtolmej moneki yeski kemej se candil tein tauia kampa tayouayan. Xiksentokakan xikchiujtokan nejon hasta maj tanesi uan maj nesi sitalin tein kisa achto ke tanesis. 20 Porin namejuan nankimatij nejin tein tayekantok: nion teyi tein Dios kitematiltia itech iTajkuilolamatsin kinemilij aksa.* 21 Porin Dios amo keman kitematiltij nion se taman porin takamej ijkon kinekkej, ta Dios ika ichikaualis kinyekanak* takamej maj kitematiltikan tein kiniluiaya.

2 Sayoj ke, ijkon kemej onkayaj tanauatianij akin amo melaujkej itech xolal Israel, no ijkon namouan nesiskej tamachtianij akin amo melaujkej. Yejuan kiichtakapeualtiskej yankuik taneltokalismej tein semi tauejueloskej, uan hasta kiixtopeuaskej ininteko akin kinkouak, uan ijkon kichiuaskej maj niman kinixpolokan. 2 Uan no, miakej kichiuaskej kemej yejuan, kichiuaskej tein tetajyaltia uan amo ixpinauaskej,* uan kichiuaskej maj oksekin eliuis kijijtokan tamachtilis tein melauak. 3 Uan kemej semi kiixnejnekij tein teaxka,* ika xolopijyot kitemoskej namechkajkayauaskej. Sayoj ke Dios ne uejkaujya kiixtalij kintatsakuiltis, uan yeski itech tonal tein kiixtalij uan yekmelauj ixpoliuiskej.

4 Tein melauj, Dios amo kintapojpoluij ángeles tein tajtakojkej, ta kintamotak itech Tártaro,* kampa senkis tayouayanijtik uan kinilpij* ika cadena* hasta keman kiixtalijtok kintatsakuiltis. 5 Amo no kintapojpoluij akin nenkej ne uejkauj keman kinualtitanilij akin amo yolkualmej se tetsaujkakiouit. Sayoj ke kiyekpiak Noé, akin kiteixmatiltiaya tein kuali, iniuan okseki chikomen. 6 Uan kintatsakuiltij akin nemiaj Sodoma uan Gomorra keman kintatij* hasta ke mokaujkej koujnex, uan ijkon kinnextilij tein kinpanoti akin amo yolkualmej. 7 No kimakixtij Lot akin yolmelauak. Yejua semi motekipachouaya porin akin amo yolkualmej* kichiuayaj tein tetajyaltia uan amo ixpinauayaj.* 8 Nejon takat yolmelauak mojmostaj yoltajyouiaya porin kiitaya uan kikakia ke akin nemiaj kampa yejua nemia kichiuayaj tein amo kuali.* 9 Ika nejin moita ke Jehová* kuali kimati keniuj kinmakixtis akin kiueyichiuaj ika nochi ininyolo keman kipanotokej ouijkayomej, uan no kimati kinxelos akin amo yolmelaujkej para kinixpolos itech tonal keman tetatsakuiltis, 10 okachi akin kitemouaj motekaskej iniuan oksekin para kinpitsotiliskej uan kinixtopeuaj akin taixyekanaj.

Kemej amo ixpinauaj uan yoltakuaujkej, amo mouij eliuis kinijijtoskej akin Dios kinueyitalia. 11 Sayoj ke ángeles, maski okachi chikaujkej ke yejuan, amo kinteluiliaj ika eliuis tajtolmej porin kitakachiuaj* Jehová.* 12 Sayoj ke nejin takamej, tamatij kemej tapialmej tein amo kuatamatij uan yolkej para kinkitskiskej uan kinmiktiskej, eliuis kijijtouaj tein amo kimatij. Yejuan ixpoliuiskej porin kichiujtokej tein amo kuali, 13 uan kintatsakuiltiskej porin kichiuaj tein amo kuali.

Semi kinyolpaktia kichiuaskej tein kinejneki ininnakayo, hasta tonayan. Yejuan kipitsotiliaj nechikol uan kichiuaj maj amo kualtsin moita. Semi kinyolpaktia* tamachtiskej tein amo melauak keman namouan tatakuajtokej. 14 Keman kiitaj aksa,* semi kinekij iuan auilnemiskej uan amo ueli kikauaj tajtakol, uan kintanejnektiaj akin amo yektaneltokaj. Kemej yeskia kimamachtijtokej ininyolo para semi kiixnejnekiskej tein teaxka.* Dios kintatsakuiltiti. 15 Keman kikaujkej ojti tein kuali, moixpojpolojkej. Kichiuaj tein kichiuak Balaam ikoneuj Beor, akin kitelnekik maj kitaxtauikan para kichiuas tein amo kuali 16 sayoj ke kitakaualtijkej porin amo kichiuak tein kuali. Se burra tein amo uelia tajtouaya tajtoj kemej tejuan uan kitsakuilij tanauatijkej* para maj amo kichiua tein amo kuali kemej se akin kuatapolojtok.

17 Nejon takajkayauanij tamatij kemej ameyalmej* tein amo kipiaj at uan kemej mixti tein ejekat eliuis kiuika, uan ixyetok yetoskej kampa okachi tayouayan. 18 Sayoj moueyichiuaj keman tajtouaj uan tein kijtouaj amo tapaleuia. Yejuan kichiuaj tein kinejneki ininnakayo uan tein tetajyaltia uan amo ixpinauaj,* uan ika nejon kintanejnektiaj oksekin maj kichiuakan tein amo kuali tein yekin kikaujkej. 19 Maski kiniluiaj ke amo moajsiskejok temako, yejuan moajsij imako tajtakol. Porin akin kitani aksa,* akin tatani mochiua iteko akin tapoloj. 20 Tein melauj, yejuan kikaujkejya tein pitsotik tein kichiuaj oksekin porin kuali kiixmatkej toTekotsin uan toTemakixtijkauj Jesucristo. Sayoj ke komo oksepa mokalakiaj itech nejon tein pitsotik uan ika moixyekanaj, nejon okachi fiero yeskia ke keman ayamo kiixmatiaj tamachtilis tein melauak. 21 Komo yejuan kuali kiixmatkejya ojti tein kuali uan amo kichiuajok tein Dios kinnauatij, okachi kuali yeskia maj amo kiixmatinij. 22 Tein kinpanok kinextia ke melaujkej nejin tajtolmej: “Itskuinti mokepak uan oksepa kikuaj tein kijsotak,* uan pitsot tein yekin kialtijkej* oksepa mosokineloj”.

3 Nokniuantsitsin, ika nejin ojpaya namechtajkuilouilia, uan ijkon kemej itech yekinika amatajkuilol, namechelnamiktia seki taman tein namechpaleuis kuali xitanemilikan, 2 para xikelnamikikan tein achto kijtojkej tanauatianij.* Uan no xikelnamikikan tanauatil tein kitemakak toTekotsin uan Totemakixtijkauj inintechkopa namotatitaniluan. 3 Okachi moneki nankimatiskej ke itech tonalmej keman tatamitiya* nesiskej akin takejkeloskej uan kichiuaskej tein amo kuali tein kinejnekiskej, 4 uan kijtoskej: “Yejua motenkauak ke mokepaskia,* ¿kani yetok axkan? Porin desde keman momikilijkej* touejkaujtatuan, nochi kisentoka kemej ijkuak Dios peuak tachijchiua”.

5 Yejuan kiixtaliaj kiixpanauiskej nejin: ke iluikak yetoyaya desde ne uejkauj uan ke Dios kijtoj maj tal uan at moxelokan uan maj tal moajsi tatajko den at, 6 tein ika Dios kinixpoloj akin nemiaj nejon tonalmej keman taapexonik.* 7 Sayoj ke, Dios no kijtoj ke iluikak uan taltikpak tein axkan yetokej, ixyetokej para ixpoliuiskej ika tit* itech tonal keman Dios kintatsakuiltis uan kinixpolos akin amo yolkualmej.

8 Sayoj ke, nokniuantsitsin, amo xikelkauakan nejin: Jehová* kiita mil xiujmej sayoj kemej se tonal uan se tonal kemej mil xiujmej. 9 Jehová* amo yolikati keman kichiua tein motenkaua, kemej sekin kinemiliaj, ta yejua namechchixtok* porin amo kineki maj nion akin ixpoliui, ta maj nochin moyolpatakan. 10 Sayoj ke, itonal Jehová* ejkos kemej se tachtekkej. Nejon tonal, iluikak ixpoliuis uan chikauak taijkoyokas, uan tein ika chijchiujtok iluikak uan taltikpak, patis porin semi kauantos,* uan taltikpak uan tein itech mochiua chichinauis.*

11 Kemej nochi ijkon patis, ¡xiknemilikan tein nankichiuaj uan tein moneki nankichiuaskej! Moneki nanchipaujkanemiskej uan nankichiuaskej tein kinextis ke nankiueyichiuaj Dios ika nochi namoyolo. 12 Uan no semi xikchiakan maj ejko itonal Jehová* uan amo xikelkauakan.* Ijkuak, iluikak ixpoliuis ika tit* uan tein ika chijchiujtok iluikak uan taltikpak patis porin semi kauantos.* 13 Sayoj ke tikchiaj se yankuik iluikak uan se yankuik taltikpak ijkon kemej Dios motenkauak, uan ompa nochipa mochiuas tein kuali yetok.

14 Yejua ika nokniuantsitsin, kemej nankichixtokej* nejin, xikchiuakan nochi tein nanueliskej para keman Dios namechtamiitas, amo namechajxilis teisa tein pitsotik, tein amo kuali uan kiitas ke kuali namouikaj iuan. 15 Uan no, xiknemilikan ke kemej toTekotsin amo yolijsiui, techpaleuia maj timomakixtikan, ijkon kemej no namechtajkuilouilij toknitsin Pablo. Yejua kijkuiloj nejin porin Dios kichiuak maj tamatkej. 16 Pablo ika tajtoj nejon itech nochi iamatajkuiloluan. Sayoj ke, seki taman tein kijkuiloj ouij se kiajsikamati, uan akin amo teyi kimatij* uan amo yektaneltokaj kikejkepaj, ijkon kemej no kichiuaj ika nochi Tajkuilolamatsin. Nejon kichiuas maj kinixpolokan.

17 Yejua ika nokniuantsitsin, kemej nankimatijya nejin, xitachixtokan para maj amo namechkajkayauakan kemej yejuan kinkajkayaujkej uan amo nanyekijkatoskejok. Yejuan kineltokakej tein amo melauak tein tamachtiaj akin amo yolkualmej.* 18 Okachi kuali, xiksentokakan okachi xikselijtiakan tatiochiualis tein amo technamiki uan okachi xikixmatikan toTekotsin uan toTemakixtijkauj Jesucristo. Yejua kinamiki maj kiueyitalikan axkan uan nochipaya. Maj ijkon mochiua.*