Xikonixtali tionajsis kualkan
1. ¿Toni neskayot techkauilia Jiova?
1 Jiova amo keman motajkajtilia. Kemej neskayot, kinpaleuia itekitikauan keman okachi moneki (Heb. 4:16). No techmaka tamachtilis itech “hora” keman moneki (Mat. 24:45). Yejua ika, senkis tikmatij ke tonal keman kiixtalij kiixpolos tein amo kuali “amo ejkos tiotak” (Hab. 2:3). ¡Semi techpaleuia maj Jiova amo motajkajtili! (Sal. 70:5.) Sayoj ke, kemej titajtakouanij uan tikpiaj miak taman tein tikchiuaj itech tonemilis, kemansa techkisa ouij tikchiuaskej nochi itech hora tein tikixtalijkej. ¿Keyej moneki timochikauaskej amo timotajkajtiliskej?
2. ¿Keyej kiueyichiua Jiova keman amo timotajkajtiliaj?
2 Itech nejin itamian tonalmej, keman taltikpakneminij sayoj inintech tanemiliaj, kiitaj ke amo motelneki kichiuaskej tein moneki itech hora tein ixyetok (2 Tim. 3:1-3). Yejua ika keman akin tikchiuaj kemej Cristo timochikauaj tiajsiskej kualkan kampa titekitij, keman timotenkauaj iuan aksa uan itech nechikolmej, taltikpakneminij kiitaj, uan nejon kiueyichiua Jiova (1 Ped. 2:12). ¿Tiajsij kualkan itech totekipan sayoj ke amo ijkuak tikchiuaj itekiyo Dios? Keman tiajsij kualkan itech nechikolmej, achto ke peuas nekuikatil uan netataujtil, tiknextiaj ke tiknekij tikchiuaskej kemej Jiova (1 Cor. 14:33, 40).
3. ¿Keyej tiknextiaj ke tikinpoujkaitaj oksekin keman tiajsij kualkan?
3 Keman amo timotajkajtiliaj tiknextiaj ke tikinpoujkaitaj oksekin (Filip. 2:3, 4). Komo tiajsij kualkan itech nechikolmej, hasta tein mochiua achto ke tiyaskej titanojnotsatiuij, amo tikintapololtiaj tokniuan. Sayoj ke, komo nochipa tiajsij tajkaj, uelis tikteajsikamatiltiskej ke totiempo okachi moneki. Keman tiajsij kualkan tiknextiaj ke amo tikauilmatij tein moneki uan titakuaujtamachmej, nejon kualneskayomej kitasojkamatiskej oksekin.
4. Komo techkisa ouij tiajsiskej kualkan, ¿toni uelis techpaleuis?
4 Komo nochipa tionmotajkajtilia, xionmotajtani keyej. Achto kuali xikonixtali tein tikonchiuas uan ijkon kuali mitsonajsis tiempo (Ecl. 3:1; Filip. 1:10). Xikontajtani inepaleuil Jiova (1 Juan 5:14). Keman amo timotajkajtiliaj tiknextiaj ke tiktasojkamatij ome tanauatilmej tein okachi monekij: tiktasojtaskej Jiova uan oksekin (Mat. 22:37-39).