Maj tikteixmatiltikan ika miak yolpakilis akoni yekmelauj Jesús

Komo tikmatij kuali tikinmelauiliskej oksekin akoni yekmelauj Jesús, okachi tiyolpakiskej. Takuaujtamatilis tein melauak ualeua itech Jesús (Efes. 2:20). Komo yejua amo moajsiskia, amo tikchiaskiaj tinemiskej nochipaya (Hech. 4:12). Yejua ika, semi moneki maj tikpatiuitakan tekit tein kichiua Jesús tein ika tapaleuia maj mochiua itanejnekilis Dios. Moajsij miak tamachtilismej tein mouikaj iuan Jesús uan tein Biblia amo ika tajtoua, nejon kichiua maj miakej taltikpakneminij amo kimatikan toni kineltokaskej, uan tetayokoltij tikijtoskej ke nejon uelis kichiuas maj amo uelikan kiselikan tatiochiualismej tein Dios motenkaua kinmakas akin takuaujtamatij iuan Jesús. Yolpakilis tein tiknextiaj porin tikixmatij tamachtilis tein melauak techolinis maj tikinpaleuikan akin kipiaj kuali ininyolo maj kimatikan akoni yekmelauj Jesús, keniuj mouika iuan Dios uan keniuj tapaleuia maj mochiua itanejnekilis Jiova. Yejua ika, maj tikteixmatiltikan ika miak yolpakilis akoni yekmelauj Jesús keman tikelnamikiskej imikilis.